EBISOBOLA OKUTUYAMBA OKWEGGYAMU OBUKYAYI

4 | Katonda Asobola Okukuyamba Okweggyamu Obukyayi

Bayibuli Ky’Egamba:

“Ebyo ebiri mu kibala eky’omwoyo kwe kwagala, essanyu, emirembe, obugumiikiriza, ekisa, obulungi, okukkiriza, obukkakkamu, okwefuga.”—ABAGGALATIYA 5:22, 23.

Kye Kitegeeza:

Katonda asobola okutuyamba okweggyamu obukyayi. Omwoyo omutukuvu gusobola okutuyamba okukulaakulanya engeri ze tutandisobodde kukulaakulanya ku lwaffe. Mu kifo ky’okukozesa obusobozi bwaffe okweggyamu obukyayi, tusaanidde okwesigama ku buyambi Katonda bw’atuwa. Bwe tukola tutyo, tusobola okuba ng’omutume Pawulo eyagamba nti: “Nnyinza byonna olw’oyo ampa amaanyi.” (Abafiripi 4:13) Mazima ddala tujja kusobola okugamba nti: “Obuyambi bwange buva eri Yakuwa.”—Zabbuli 121:2.

Ky’Oyinza Okukola:

“Yakuwa annyambye okukyuka. Kati sikyali muntu mukambwe, wabula ndi muntu wa mirembe.”—WALDO

Saba Yakuwa akuwe omwoyo gwe omutukuvu. (Lukka 11:13) Musabe akuyambe okukulaakulanya engeri ennungi. Laba ekyo Bayibuli ky’eyogera ku ngeri ezituyamba okwewala obukyayi. Gamba nga, okwagala, emirembe, obugumiikiriza, n’okwefuga. Fuba okukulaakulanya engeri ezo era beera n’abantu abafuba okwoleka engeri ezo. Abantu ng’abo bajja ‘kukukubiriza okwagala abalala n’okukola ebikolwa ebirungi.’—Abebbulaniya 10:24.

Ekyokulabirako—WALDO

Yeggyamu Obukyayi

Waldo yayita mu mbeera enzibu ennyo ng’akyali muto eyamuviirako okuba n’obukyayi. Agamba nti: “Emirundi mingi nnalwananga n’abayaga ku nguudo . . . Lumu ekibinja ekyali kitakolagana na kibinja kyaffe kyapangisa omutemu okunzita. Naye nnasobola okusimattuka wadde nga nnafuna ekiwundu.”

Waldo teyasanyuka mukyala we bwe yatandika okuyiga Bayibuli n’Abajulirwa ba Yakuwa. Agamba nti: “Nnali saagalira ddala Bajulirwa ba Yakuwa, era emirundi mingi nnabavumanga ebigambo eby’obuwemu. Naye banzirangamu n’obukkakkamu.”

Oluvannyuma lw’ekiseera, Waldo naye yatandika okuyiga Bayibuli. Agamba nti: “Tekyannyanguyira kukolera ku ebyo bye nnali njiga. Nnali sirowooza nti ndisobola okufuga obusungu bwange.” Naye waliwo Waldo kye yayiga okuva mu Bayibuli ekyamuyamba okukola enkyukakyuka.

Agamba nti: “Lumu Alejandro, eyali anjigiriza Bayibuli, yansaba okusoma Abaggalatiya 5:22, 23. . . . Yanyinnyonnyola nti nnali sisobola kukulaakulanya ngeri ezo mu maanyi gange, wabula nti omwoyo gwa Katonda omutukuvu gwe gwandinnyambye okuzikulaakulanya. Ekyo kyakyusa endowooza yange!”

Waldo yeesiga Katonda okumuyamba okweggyamu obukyayi, era n’amuyamba okubweggyamu. Agamba nti: “Ab’eŋŋanda zange n’abo abaali mikwano gyange beewuunya engeri obulamu bwange gye bukyuseemu.” Era agattako nti: “Yakuwa annyambye okukyuka. Kati sikyali muntu mukambwe, wabula ndi muntu wa mirembe.”