Okutuukiriza Obulungi Obuweereza Bwaffe—Okulekawo Kye Munaayogerako ng’Ozzeeyo

Lwaki Kikulu: Omuntu bw’asiima obubaka bwaffe, tuba twagala okuddayo tufukirire ensigo ey’amazima gye tuba tusimbye. (1 Kol. 3:6) Nga tetunnavaawo tuba twetaaga okumubuuza olunaku lwe tunaamusanga awaka. Okugatta ku ekyo, kiba kirungi ne tulekawo ekibuuzo kye tunaddamu nga tuzzeeyo okumukyalira. Ekyo kijja kumuleetera okwesunga olunaku lwe tunaddayo, era ekibuuzo ekyo bwe kiba kiddibwamu mu kitabo kye tumulekedde, ajja kwagala okukisoma. Bwe tulekawo kye tunaayogerako omulundi omulala kiba kyangu okuddayo kubanga tuba tumanyi kye tugenda okwogerako, era naye aba atusuubira. Bwe tuba tuzzeeyo tuyinza okutandika nga tumugamba nti, “Tukomyewo okuddamu ekibuuzo kye twakulekera.”

Engeri y’Okukikolamu:

Bw’oba otegeka ennyanjula gy’onookozesa ng’obuulira nnyumba ku nnyumba, tegeka n’ekibuuzo ky’onoolekera omuntu. Ekibuuzo ekyo kiyinza okuba nga kiddibwamu mu kitabo ky’ogenda okumulekera, oba nga kiddibwamu mu kimu ku bitabo bye tukozesa okuyigiriza abantu Bayibuli ky’onoomuwa ng’ozzeeyo.
Omuntu bw’aba asiimye obubaka bwaffe, mutegeeze nti wandyagadde okweyongera okukubaganya naye ebirowoozo era oluvannyuma mubuuze ekibuuzo kye wategese, ky’onoddamu ng’ozzeeyo. Mu bitundu ebimu, abantu balina eby’okukola bingi era bayinza obutayagala kuddamu kubakyalira. Bwe kiba bwe kityo, oyinza okumubuuza nti: “Otera okubeerawo awaka mu budde nga buno? [Muleke abeeko ky’addamu.] Wiiki ejja nnandyagadde okudda nziremu ekibuuzo kino . . . Bw’onooba olina eby’okukola bingi ojja kuntegeeza.”
Bw’osuubiza okuddira omuntu, fuba okuddayo mu kiseera kyennyini kye muba mulagaanye. (Mat. 5:37) Bw’omala okukubaganya naye ebirowoozo, lekawo kye munaayogerako ng’ozzeeyo omulundi omulala.

Mu Mwezi Guno Gezaako Kino:

Bw’oba otegeka ennyanjula gy’onookozesa, tegeka n’ekibuuzo ky’onoolekera omuntu. Oyo gw’onooba obuulidde naye mubuulireko ekibuuzo ekyo.