Okutuukiriza Obulungi Obuweeereza Bwaffe—Okubuulira mu Bifo Awakolerwa Bizineesi

Lwaki Kikulu: Olw’okuba abantu bangi ebiseera ebisinga babimala ku mirimu gyabwe, engeri esinga obulungi ey’okubatuusaako amawulire g’Obwakabaka kwe kugenda mu bifo gye bakolera. Okubuulira mu bifo awakolerwa bizineesi kiyinza okuvaamu ebirungi, kubanga abantu be tutasanze waka bwe baba ku mirimu gyabwe baba beetegefu okutuwuliriza kuba baba balowooza nti tuli bakasitoma. Okusobola okubuulira mu bifo ng’ebyo, tusaanidde okukozesa amagezi, okwekolako era n’okwambala mu ngeri esaanira. (2 Ko. 6:3) N’olwekyo, omulabirizi w’obuweereza asaanidde okumanya obulungi engeri ebitundu ebikolerwamu bizineesi gye bibuulirwamu era asaanidde n’okumanya ababuulizi ababibuuliramu.

Engeri y’Okukikolamu:

Teekateeka ennyanjula ennyimpimpi. Bwe tukozesa obudde bungi nga tubuulira omukozi, ayinza obutatuwa kakisa kwogera naye omulundi omulala.
Buulira mu bifo ng’ebyo mu kiseera we bitabeerera na bakasitoma bangi, gamba nga ku makya nga baakaggulawo.
Kakasa nti osooka kwogera ne nnannyini bizineesi, era yoleka omukwano. Oyinza okugamba nti, “Tubakyaliddeko wano we mukolera kubanga tetutera kubasanga waka.” Kozesa ennyanjula ennyimpimpi, era oluvannyuma oyinza okumuwa tulakiti, magazini, oba ekimu ku bitabo byaffe. Obutabaleetera kulowooza nti tulina bye tutunda, kiba kirungi obutayogera ku nteekateeka y’okuwaayo okuwagira omulimu gwaffe, okuggyako nga tubuuziddwa engeri omulimu gwaffe gye guyimirizibwawo.
Nnannyini bizineesi bw’aba asiimye obubaka bwaffe, musabe oyogereko n’abakozi abalala. Mu bifo ebimu, oyinza okusaba olukusa n’oleka ebitabo byaffe mu kifo abakozi we bawummulira oba we batuukira.
Kozesa amagezi era kyusaamu we kyetaagisa. Ng’ekyokulabirako, omukozi bw’aba ayogera ne kasitoma oba ng’alina by’akola, osobola okumulindako n’amaliriza.

Mu Mwezi Guno Gezaako Kino:

Mu kusinza kwammwe okw’amaka okunaddako, mwegezeemu ennyanjula ennyimpimpi gye musobola okukozesa nga mubuulira mu kifo awakolerwa bizineesi.