Kokanisa te ete okokoka te mpo ozali na makoki ya kosala yango te
1. Mpo na nini bandeko mosusu baboyaka kosɛnga na moto báyekola na ye Biblia?
1 Oboyaka kosɛnga na moto oyekola na ye Biblia mpo okanisaka ete okokoka kotambwisa boyekoli yango malamu te? Basaleli ya sembo ya ntango ya kala, na ndakisa Moize mpe Yirimia bazalaki na bantango mosusu kokanisa ete bakokoka te kosala mosala oyo Yehova apesaki bango. (Kob. 3:10, 11; 4:10; Yir. 1:4-6) Bandeko mingi mpe bayokaka bongo. Kasi, ndenge nini okoki kolonga makanisi yango?
2. Mpo na nini tosengeli te kosuka kaka na kosakola ndako na ndako mpe kotikela basusu mosala ya koyekola na bato Biblia?
2 Tóbosana te ete Yehova asɛngaka biso te tosalá makambo oyo tokokoka te kosala. (Nz. 103:14) Na yango, etinda ya ‘kokómisa bato bayekoli,’ ‘koteya bango,’ ezali moko ya bitinda oyo tokoki kokokisa. (Mat. 28:19, 20) Ezali libaku oyo Yehova apesi kaka te epai ya baoyo bazali na makoki to mayele mingi. (1 Ko. 1:26, 27) Yango wana, tósuka kaka te na kosakola ndako na ndako mpe tótikela basusu mosala ya koyekola na bato Biblia.
3. Ndenge nini Yehova apesaka biso formasyo mpo tóyekola na bato Biblia?
3 Yehova nde apesaka biso formasyo: Yehova nde apesaka biso formasyo mpo tókómisa bato bayekoli. (2 Ko. 3:5) Na nzela ya ebongiseli na ye azali koteya biso solo oyo euti na Biblia, oyo ata bato oyo batángá mingi na mokili bayebi yango te. (1 Ko. 2:7, 8) Asalaki ete mayele ya koteya ya Yesu, oyo azali moteyi monene, ekomama na Biblia mpo tólanda ndakisa na ye, mpe tozwaka formasyo na nzela ya lisangá. Lisusu, Yehova apesi biso bisaleli oyo tosengeli na yango mpo na koteya Biblia. Apesi biso bisaleli lokola buku Biblia etyaka, oyo ezali komonisa solo na ndenge oyo ebongi mpe na lolenge oyo ezali mpasi te mpo na kokanga ntina. Na yango, kotambwisa boyekoli ya Biblia ezali mpasi te ndenge tokoki kokanisa.
4. Mpo na nini tosengeli kolikya ete Yehova akosunga biso?
4 Yehova asalisaki Moize mpe Yirimia bákokisa mokumba na bango. (Kob. 4:11, 12; Yir. 1:7, 8) Biso mpe tokoki kosɛnga Yehova asalisa biso. Kutu, ntango toyekolaka na moto Biblia, toteyaka ye solo na ntina ya Yehova, yango ezali likambo oyo esepelisaka ye. (1 Yoa. 3:22) Yango wana, tiká ete omityela mokano ya kosangana na mosala ya koyekola na bato Biblia, lolenge moko ya mosala na biso ya kosakola oyo epesaka esengo mingi mpe ememaka matomba.