ບົດທີ 61
ເຂົາເຈົ້າບໍ່ຍອມກົ້ມກາບ
ຫຼັງຈາກກະສັດເນບູກາດເນັດຊາຝັນເຫັນຮູບປັ້ນໃຫຍ່ ລາວກໍໄດ້ສ້າງຮູບປັ້ນຄຳບັກໃຫຍ່ໆແລະຕັ້ງໄວ້ຢູ່ທົ່ງພຽງດູຣາ. ແລ້ວລາວກໍເອີ້ນພວກຄົນສຳຄັນທີ່ສຸດຂອງປະເທດໃຫ້ມາລວມກັນຢູ່ຕໍ່ໜ້າຮູບປັ້ນນັ້ນ. ຊາດຣາກ ເມຊາກ ແລະອາເບດເນໂກກໍຖືກເອີ້ນມານຳ. ກະສັດສັ່ງວ່າ: ‘ເມື່ອພວກເຈົ້າໄດ້ຍິນສຽງແກ ສຽງພິນ ແລະສຽງປີ່ ໃຫ້ພວກເຈົ້າທຸກຄົນກົ້ມກາບຮູບປັ້ນນີ້! ຖ້າຜູ້ໃດບໍ່ຍອມກົ້ມກາບ ຜູ້ນັ້ນກໍຊິຖືກໂຍນເຂົ້າໄປໃນເຕົາໄຟທີ່ຮ້ອນໆ.’ ແລ້ວຜູ້ຊາຍຄົນເຮັບເຣີສາມຄົນຈະກົ້ມກາບຮູບປັ້ນນັ້ນບໍ? ຫຼືເຂົາເຈົ້າຈະນະມັດສະການແຕ່ພະເຢໂຫວາອົງດຽວ?
ແລ້ວກະສັດກໍສັ່ງໃຫ້ຫຼິ້ນດົນຕີ ທຸກຄົນກໍກົ້ມກາບແລະນະມັດສະການຮູບປັ້ນນັ້ນ. ແຕ່ຊາດຣາກ ເມຊາກ ແລະອາເບດເນໂກບໍ່ໄດ້ເຮັດ. ມີບາງຄົນເຫັນແລະໄປຟ້ອງກະສັດວ່າ: ‘ຜູ້ຊາຍເຮັບເຣີ 3 ຄົນນັ້ນບໍ່ຍອມກົ້ມກາບຮູບປັ້ນຄຳທີ່ທ່ານເຮັດຂຶ້ນມາ.’ ເນບູກາດເນັດຊາຈຶ່ງເວົ້າກັບເຂົາເຈົ້າວ່າ: ‘ຂ້ອຍຈະໃຫ້ໂອກາດພວກເຈົ້າກົ້ມກາບຮູບປັ້ນອີກເທື່ອໜຶ່ງ. ແຕ່ຖ້າພວກເຈົ້າຍັງບໍ່ຍອມເຮັດ ຂ້ອຍຈະໂຍນພວກເຈົ້າເຂົ້າໄປໃນເຕົາໄຟທີ່ຮ້ອນໆ. ບໍ່ມີພະເຈົ້າອົງໃດຈະຊ່ວຍພວກເຈົ້າໃຫ້ລອດຈາກມືຂ້ອຍໄດ້.’ ເຂົາເຈົ້າຕອບກະສັດວ່າ: ‘ພວກເຮົາບໍ່ຢາກໄດ້ໂອກາດດອກ. ພະເຈົ້າທີ່ພວກເຮົານະມັດສະການຈະຊ່ວຍພວກເຮົາ. ແຕ່ເຖິງເພິ່ນຈະບໍ່ຊ່ວຍ ພວກເຮົາກໍຈະບໍ່ຍອມກົ້ມກາບຮູບປັ້ນຂອງທ່ານ.’
ເນບູກາດເນັດຊາໃຈຮ້າຍແຮງ ລາວຈຶ່ງສັ່ງວ່າ: ‘ໃຫ້ເພີ່ມຄວາມຮ້ອນໃນເຕົາໄຟຂຶ້ນເປັນ 7 ເທົ່າ!’ ແລະສັ່ງທະຫານວ່າ: ‘ມັດເຂົາເຈົ້າ 3 ຄົນ ແລ້ວໂຍນເຂົ້າໄປໃນເຕົາໄຟ!’ ເຕົາໄຟຮ້ອນແທ້ຮ້ອນວ່າຈົນທະຫານທີ່ເຂົ້າໄປໃກ້ຕາຍທັນທີ. ຜູ້ຊາຍເຮັບເຣີ 3 ຄົນຖືກໂຍນເຂົ້າໄປໃນເຕົາໄຟແລ້ວ ແຕ່ເມື່ອເນບູກາດເນັດຊາແນມເບິ່ງ ລາວກໍເຫັນຜູ້ຊາຍ 4 ຄົນຍ່າງຢູ່ໃນເຕົາໄຟ. ລາວຢ້ານຫຼາຍແລະເວົ້າກັບພວກຂ້າລາຊະການວ່າ: ‘ພວກເຮົາໂຍນ 3 ຄົນເຂົ້າໄປໃນເຕົາໄຟຕົ໋ວ? ແຕ່ເປັນຫຍັງຂ້ອຍເຫັນມີ 4 ຄົນ ແລະຄົນທີ 4 ເບິ່ງຄືທູດສະຫວັນ!’
ເນບູກາດເນັດຊາເຂົ້າໄປໃກ້ເຕົາໄຟແລະຮ້ອງວ່າ: ‘ອອກມາແມ້ ຜູ້ຮັບໃຊ້ຂອງພະເຈົ້າສູງສຸດ!’ ທຸກຄົນງຶດຫຼາຍທີ່ເຫັນຊາດຣາກ ເມຊາກ ແລະອາເບດເນໂກຍ່າງອອກມາຈາກເຕົາໄຟໂດຍທີ່ບໍ່ເປັນຫຍັງເລີຍ. ຜິວໜັງ ຜົມ ແລະເຄື່ອງນຸ່ງຂອງເຂົາເຈົ້າກໍບໍ່ຖືກໄຟໄໝ້ ແລະກໍບໍ່ມີກິ່ນຄວັນໄຟຕິດໂຕເຂົາເຈົ້າເລີຍ.
ເນບູກາດເນັດຊາເວົ້າວ່າ: ‘ພະເຈົ້າຂອງຊາດຣາກ ເມຊາກ ແລະອາເບດເນໂກເປັນພະເຈົ້າອົງຍິ່ງໃຫຍ່. ເພິ່ນໄດ້ສົ່ງທູດສະຫວັນມາຊ່ວຍເຂົາເຈົ້າ. ບໍ່ມີພະເຈົ້າອົງໃດຄືກັບພະເຈົ້າຂອງເຂົາເຈົ້າ.’
ບໍ່ວ່າຈະເກີດຫຍັງຂຶ້ນ ເຈົ້າຕັ້ງໃຈຈະພັກດີຕໍ່ພະເຢໂຫວາຄືກັບຜູ້ຊາຍເຮັບເຣີ 3 ຄົນນີ້ບໍ?
“ເຈົ້າຕ້ອງນະມັດສະການພະເຢໂຫວາພະເຈົ້າ ແລະຮັບໃຊ້ເພິ່ນຜູ້ດຽວເທົ່ານັ້ນ.”—ມັດທາຍ 4:10