NOMBA

1 Nunku Yehowa wakakula ne Mose mu tshipela tshia Sinai,+ mu ntenta wa kusambakena,+ mu dituku dia kumpala dia ngondo muibidi wa tshidimu tshibidi tshia dipatuka diabu mu buloba bua Ejipitu.+ Wakamba ne: 2 “Bala bungi+ bua tshisumbu tshijima tshia bena Isalele* muntu ku muntu, bilondeshile mêku abu, bilondeshile nzubu ya batatuabu, bilondeshile bungi bua mêna a bantu balume bonso. 3 Wewe ne Alona nenufunde mêna a bantu bonso badi ne bidimu kumbukila ku 20 kubanda+ badi mua kubuela mu tshiluilu mu Isalele, bilondeshile bisumbu biabu.*

4 “Angata muntu umue mu tshisa tshionso; yonso wa kudibu udi ne bua kuikala ku mutu kua nzubu wa batatuende.+ 5 Aa mmêna a bantu bikala mua kukuambuluisha: mu tshisa tshia Lubena: Elisû+ muana wa Shedeu; 6 mu tshisa tshia Simeona: Shelumiele+ muana wa Sulishadai; 7 mu tshisa tshia Yuda: Nashona+ muana wa Aminadaba; 8 mu tshisa tshia Yisakâ: Netanele+ muana wa Suâ; 9 mu tshisa tshia Zebulona: Eliaba+ muana wa Helona; 10 mu bana ba Jozefe, mu tshisa tshia Efelayima:+ Elishama muana wa Amihuda; mu tshisa tshia Manashe: Gamaliele muana wa Pedasû; 11 mu tshisa tshia Benyamina: Abidana+ muana wa Gideoni; 12 mu tshisa tshia Dana: Ahiezê+ muana wa Amishadai; 13 mu tshisa tshia Ashê: Pagiele+ muana wa Okelana; 14 mu tshisa tshia Gada: Eleyasafa+ muana wa Deuele; 15 mu tshisa tshia Nafatale: Ahila+ muana wa Enana. 16 Aba ke bantu ba mu tshisumbu bavuabu babikile. Mbamfumu+ ba bisa bia batatuabu, bamfumu ba binunu bia Isalele.”+

17 Nunku Mose ne Alona bakangata bantu bavuabu babikile mu mêna aba. 18 Bakasangisha tshisumbu tshijima mu dituku dia kumpala dia ngondo muibidi bua bafunde muntu ne muntu, bilondeshile dîna diende, dîku diabu, ne bilondeshile nzubu ya batatuabu, kumbukila ku bantu bavua ne bidimu 20 kubanda,+ 19 anu muvua Yehowa mutumine Mose dîyi bua kuenza. Nunku wakafunda mêna abu mu tshipela tshia Sinai.+

20 Bakafunda bana ba Lubena, ndelanganyi ya muanabute wa Isalele,+ bilondeshile mêna abu, mêku abu, ne nzubu ya batatuabu. Bakabala, muntu ku muntu, bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 21 ne bungi bua bantu bavuabu bafunde mu tshisa tshia Lubena buvua 46 500.

22 Bakafunda ndelanganyi ya Simeona+ bilondeshile mêna ayi, mêku ayi, ne nzubu ya batatuabu. Bakabala, muntu ku muntu, bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 23 ne bungi bua bantu bavuabu bafunde mu tshisa tshia Simeona buvua 59 300.

24 Bakafunda ndelanganyi ya Gada+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 25 ne bungi bua bantu bavuabu bafunde mu tshisa tshia Gada buvua 45 650.

26 Bakafunda ndelanganyi ya Yuda+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 27 ne bungi bua bantu bavuabu bafunde mu tshisa tshia Yuda buvua 74 600.

28 Bakafunda ndelanganyi ya Yisakâ+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 29 ne bungi bua bantu bavuabu bafunde mu tshisa tshia Yisakâ buvua 54 400.

30 Bakafunda ndelanganyi ya Zebulona+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 31 ne bungi bua bantu bavuabu bafunde mu tshisa tshia Zebulona buvua 57 400.

32 Bakafunda ndelanganyi ya Jozefe ya mu tshisa tshia Efelayima+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 33 ne bungi bua bantu bavuabu bafunde mu tshisa tshia Efelayima buvua 40 500.

34 Bakafunda ndelanganyi ya Manashe+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 35 ne bungi bua bantu bavuabu bafunde mu tshisa tshia Manashe buvua 32 200.

36 Bakafunda ndelanganyi ya Benyamina+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 37 ne bungi bua bantu bavuabu bafunde mu tshisa tshia Benyamina buvua 35 400.

38 Bakafunda ndelanganyi ya Dana+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 39 ne bungi bua bantu bavuabu bafunde mu tshisa tshia Dana buvua 62 700.

40 Bakafunda ndelanganyi ya Ashê+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 41 ne bungi bua bantu bavuabu bafunde mu tshisa tshia Ashê buvua 41 500.

42 Bakafunda ndelanganyi ya Nafatale+ bilondeshile mêna ayi, mêku ayi, ne nzubu ya batatuabu. Bakabala bantu balume bonso bavua ne bidimu kumbukila ku 20 kubanda bavua mua kubuela mu tshiluilu, 43 ne bungi bua bantu bavuabu bafunde mu tshisa tshia Nafatale buvua 53 400.

44 Bakafunda mêna a bantu aba kudi Mose pamue ne Alona ne bamfumu 12 ba mu Isalele, muntu yonso uleja mpala wa nzubu wa batatuende. 45 Bakafunda mêna a bena Isalele bonso bavua ne bidimu kumbukila ku 20 kubanda bavua mua kubuela mu tshiluilu mu Isalele, bilondeshile nzubu wa batatuabu, 46 ne bungi bua bantu bonso bavuabu bafunde mêna buvua 603 550.+

47 Kadi kabavua bafunde mêna a bena Lewi+ munkatshi muabu bilondeshile tshisa tshia batatuabu to.+ 48 Nunku Yehowa wakambila Mose ne: 49 “Kadi kuena ne bua kufunda mêna a bena mu tshisa tshia Lewi to, ne kuena ne bua kusangisha bungi buabu ku bua bena Isalele bakuabu to.+ 50 Udi ne bua kuteka bena Lewi bua batangile malu a ntenta wa tshitendelelu wa Bujadiki,+ bintu biende bionso bidibu benza nabi mudimu ne bintu biende bionso bikuabu.+ Nebambule ntenta wa tshitendelelu ne bintu biende bionso bidibu benza nabi mudimu,+ ne nebenzaku mudimu,+ ne nebikale basa tshitudilu tshiabu tshinyunguluke ntenta wa tshitendelelu.+ 51 Dîba dionso dikalabu ne bua kuya ne ntenta wa tshitendelelu, bena Lewi nebamutulakaje;+ ne dîba dikalabu ne bua kulamakaja ntenta wa tshitendelelu, bena Lewi nebamuase; nebashipe muntu yonso udibu kabayi banyishile* udi usemena pabuipi.+

52 “Muena Isalele yonso nease ntenta wende muaba wende ukadibu bamane kuleja, muntu yonso bilondeshile tshisumbu tshiabu tshia bisa bisatu,*+ bilondeshile bisumbu biabu.* 53 Bena Lewi bobu nebase tshitudilu tshiabu tshinyunguluke ntenta wa tshitendelelu wa Bujadiki, bua tshiji tshianyi katshitemenyi tshisumbu tshia bena Isalele;+ ne bena Lewi nebikale ne mudimu wa kulama* ntenta wa tshitendelelu wa Bujadiki.”+

54 Bena Isalele bakenza malu onso avua Yehowa mutumine Mose dîyi bua kuenza. Bakenza anu nanku.

2 Mpindieu Yehowa wakakula ne Mose ne Alona, wamba ne: 2 “Bena Isalele nebase ntenta yabu muaba ukadibu bapeshe tshisumbu tshiabu tshia bisa bisatu,+ muntu yonso pabuipi ne dibendele* dia nzubu wa batatuende. Nebase tshitudilu batangile ntenta wa kusambakena, bamunyunguluke.

3 “Bantu badi batudila luseke lua ku est, lua kudi dîba dipatukila nebikale tshisumbu tshia bisa bisatu bia mu tshitudilu tshia Yuda bilondeshile bisumbu* biabu; mfumu wa bana ba Yuda ke Nashona+ muana wa Aminadaba. 4 Bantu badibu bafunde mu tshiluilu tshiende badi 74 600.+ 5 Tshisa tshiatudila ku luseke luende netshikale tshia Yisakâ; mfumu wa bana ba Yisakâ ke Netanele+ muana wa Suâ. 6 Bantu badibu bafunde mu tshiluilu tshiende badi 54 400.+ 7 Pashishe kudi tshisa tshia Zebulona; mfumu wa bana ba Zebulona ke Eliaba+ muana wa Helona. 8 Bantu badibu bafunde mu tshiluilu tshiende badi 57 400.+

9 “Bantu badibu bafunde mu biluilu bia mu tshitudilu tshia Yuda badi 186 400. Badi ne bua kuasa luendu ba kumpala.+

10 “Tshisumbu tshia bisa bisatu bia mu tshitudilu tshia Lubena+ bilondeshile bisumbu* biabu netshikale lua ku sud; mfumu wa bana ba Lubena ke Elisû+ muana wa Shedeu. 11 Bantu badibu bafunde mu tshiluilu tshiende badi 46 500.+ 12 Tshisa tshiatudila ku luseke luende netshikale tshia Simeona; mfumu wa bana ba Simeona ke Shelumiele+ muana wa Sulishadai. 13 Bantu badibu bafunde mu tshiluilu tshiende badi 59 300.+ 14 Pashishe kudi tshisa tshia Gada; mfumu wa bana ba Gada ke Eleyasafa+ muana wa Luele. 15 Bantu badibu bafunde mu tshiluilu tshiende badi 45 650.+

16 “Bantu badibu bafunde mu biluilu bia mu tshitudilu tshia Lubena badi 151 450, ne badi ne bua kuasa luendu bibidi.+

17 “Padibu baya ne ntenta wa kusambakena,+ tshisumbu tshia bena Lewi tshidi ne bua kuikala munkatshi mua bisumbu bikuabu.

“Badi ne bua kuenza luendu anu mushindu udibu basa bitudilu,+ tshisa tshionso pa muaba watshi, bilondeshile bisumbu biabu bia bisa bisatu bisatu.

18 “Tshisumbu tshia bisa bisatu bia mu tshitudilu tshia Efelayima bilondeshile bisumbu* biabu netshikale lua ku ouest; mfumu wa bana ba Efelayima ke Elishama+ muana wa Amihuda. 19 Bantu badibu bafunde mu tshiluilu tshiende badi 40 500.+ 20 Ku luseke luende nekuikale tshisa tshia Manashe;+ mfumu wa bana ba Manashe ke Gamaliele+ muana wa Pedasû. 21 Bantu badibu bafunde mu tshiluilu tshiende badi 32 200.+ 22 Pashishe kudi tshisa tshia Benyamina; mfumu wa bana ba Benyamina ke Abidana+ muana wa Gideoni. 23 Bantu badibu bafunde mu tshiluilu tshiende badi 35 400.+

24 “Bantu bonso badibu bafunde mu biluilu bia mu tshitudilu tshia Efelayima badi 108 100, ne badi ne bua kuasa luendu bisatu.+

25 “Tshisumbu tshia bisa bisatu bia mu tshitudilu tshia Dana bilondeshile bisumbu* biabu netshikale lua ku nord; mfumu wa bana ba Dana ke Ahiezê+ muana wa Amishadai. 26 Bantu badibu bafunde mu tshiluilu tshiende badi 62 700.+ 27 Ku luseke luende nekuikale tshisa tshia Ashê; mfumu wa bana ba Ashê ke Pagiele+ muana wa Okelana. 28 Bantu badibu bafunde mu tshiluilu tshiende badi 41 500.+ 29 Pashishe kudi tshisa tshia Nafatale; mfumu wa bana ba Nafatale ke Ahila+ muana wa Enana. 30 Bantu badibu bafunde mu tshiluilu tshiende badi 53 400.+

31 “Bantu bonso badibu bafunde mu tshitudilu tshia Dana badi 157 600. Badi ne bua kuasa luendu ba ndekelu,+ bilondeshile bisumbu biabu bia bisa bisatu bisatu.”

32 Aba ke bena Isalele bavuabu bafunde bilondeshile nzubu ya batatuabu; bungi bua bantu bonso bavua mu bitudilu bavuabu bafunde bua kubuela mu tshiluilu buvua 603 550.+ 33 Kadi kabavua babale bena Lewi+ pamue ne bena Isalele bakuabu to,+ anu muvua Yehowa mutumine Mose dîyi. 34 Bena Isalele bakenza malu onso avua Yehowa mutumine Mose dîyi bua kuenza. Eu ke mushindu uvuabu basa bitudilu biabu bilondeshile bisumbu biabu bia bisa bisatu bisatu+ ne ke mushindu uvuabu basa luendu,+ yonso wa kudibu bilondeshile dîku diabu ne bilondeshile nzubu ya batatuabu.

3 Mpindieu edi ndilondangana dia mêku* a Alona ne Mose dituku divua Yehowa muakule ne Mose ku mukuna wa Sinai.+ 2 Aa mmêna a bana ba balume ba Alona: Nadaba muanabute, ne Abihu,+ ne Eleazâ,+ ne Itamâ.+ 3 Aa mmêna a bana ba balume ba Alona, bakuidi bela manyi bavuabu bajadike mu mudimu* wa buakuidi.+ 4 Kadi Nadaba ne Abihu bakafua kumpala kua Yehowa pavuabu bafile kapia kavua kakayi kanyishibue kumpala kua Yehowa+ mu tshipela tshia Sinai, ne kabavua ne bana to. Kadi Eleazâ+ ne Itamâ+ bakatungunuka ne kuenza mudimu wa buakuidi pamue ne tatuabu Alona.

5 Nunku Yehowa wakambila Mose ne: 6 “Luaku ne tshisa tshia Lewi,+ ubimanyike kumpala kua muakuidi Alona, ne bobu nebamuenzele mudimu.+ 7 Badi ne bua kukumbaja mudimu udibu nawu kumpala kuende yeye ne kua tshisumbu tshijima kumpala kua ntenta wa kusambakena, bakumbaja mudimu wabu udi utangila ntenta wa tshitendelelu. 8 Badi ne bua kutangila bintu bionso bidibu benza nabi mudimu+ mu ntenta wa kusambakena, ne kukumbaja mudimu udibu nawu kumpala kua bena Isalele, batangila midimu idi itangila ntenta wa tshitendelelu.+ 9 Neufile bena Lewi kudi Alona ne kudi bana bende ba balume. Mbantu badibu bafile, bafila kudiye, bangata munkatshi mua bena Isalele.+ 10 Udi ne bua kujadika Alona ne bana bende mu mudimu, ne bobu nebakumbaje midimu yabu ya buakuidi,+ ne muntu yonso udibu kabayi banyishile* udi usemena pabuipi udi ne bua kushipibua.”+

11 Yehowa wakatungunuka ne kuakula ne Mose, wamba ne: 12 “Tangila! Buanyi meme, ndi ngangata bena Lewi munkatshi mua bena Isalele pa muaba wa banabute* bonso ba bena Isalele;+ ne bena Lewi nebalue banyi meme. 13 Bualu banabute bonso mbanyi meme.+ Dituku dimvua mushipe banabute bonso ba mu buloba bua Ejipitu+ mvua mudijidile banabute bonso ba mu Isalele kumbukila ku muntu too ne ku nyama.+ Nebalue banyi meme. Meme ndi Yehowa.”

14 Yehowa wakakula kabidi ne Mose mu tshipela tshia Sinai,+ wamba ne: 15 “Funda mêna a bana ba balume ba Lewi bilondeshile nzubu ya batatuabu ne bilondeshile mêku abu. Ufunde muntu mulume yonso kumbukila ku wa ngondo umue kubanda.”+ 16 Nunku Mose wakafunda mêna abu ku dîyi dia Yehowa, anu muvuabu bamutumine dîyi bua kuenza. 17 Aa mmêna a bana ba balume ba Lewi: Gêshona, Kohata, ne Melali.+

18 Mpindieu aa mmêna a bana ba balume ba Gêshona bilondeshile mêku abu: Libini ne Shimei.+

19 Bana ba balume ba Kohata bilondeshile mêku abu bavua: Amalama, Yisehâ, Hebelone, ne Uziele.+

20 Bana ba balume ba Melali+ bilondeshile mêku abu bavua: Mali ne Mushi.+

Aa mmêku a bena Lewi bilondeshile nzubu ya batatuabu.

21 Dîku dia bena Libini+ ne dîku dia bena Shimei akafumina kudi Gêshona. Aa ke mêku a bena Gêshona. 22 Bungi bua bantu balume babu bonso bavuabu bafunde kumbukila ku ba ngondo umue kubanda buvua 7 500.+ 23 Mêku a bena Gêshona avua asa tshitudilu panyima pa ntenta wa tshitendelelu,+ lua ku ouest. 24 Mfumu wa nzubu wa batatu ba bena Gêshona uvua Eleyasafa muana wa Laele. 25 Mudimu wa bana ba Gêshona+ mu ntenta wa kusambakena uvua wa kutangila ntenta wa tshitendelelu, ne ntenta,+ tshibuikilu tshiende,+ tshilamba+ tshia ku tshibuelelu tshia ntenta wa kusambakena, 26 bilamba bilembeleja+ bia lupangu, tshilamba+ tshia ku tshibuelelu tshia lupangu ludi lunyunguluke ntenta wa tshitendelelu ne tshioshelu, mionji ya ntenta, ne midimu yonso idi itangila bintu ebi.

27 Dîku dia bena Amalama, dîku dia bena Yisehâ, dîku dia bena Hebelone, ne dîku dia bena Uziele akafumina kudi Kohata. Aa ke mêku a bena Kohata.+ 28 Bungi bua bantu balume bonso kumbukila ku ba ngondo umue kubanda buvua 8 600; mudimu wabu uvua wa kutangila muaba wa tshijila.+ 29 Mêku a bana ba Kohata avua asa tshitudilu ku luseke lua ku sud kua ntenta wa tshitendelelu.+ 30 Mfumu wa nzubu wa batatu ba mêku a bena Kohata uvua Elisafana muana wa Uziele.+ 31 Mudimu wabu uvua wa kutangila Mushete,+ mêsa,+ tshitekelu tshia miendu,+ bioshelu,+ bintu+ bivuabu benza nabi mudimu muaba wa tshijila, tshilamba+ tshia kukosolola natshi, ne midimu yonso ivua itangila bintu ebi.+

32 Mfumu uvua ku mutu kua bena Lewi uvua Eleazâ+ muana wa muakuidi Alona, uvua utangila bantu bavua batangila midimu ya muaba wa tshijila.

33 Dîku dia bena Mali ne dîku dia bena Mushi akafumina kudi Melali. Aa ke mêku a Melali.+ 34 Bungi bua balume bonso bavuabu bafunde mêna kumbukila ku ba ngondo umue kubanda buvua 6 200.+ 35 Mfumu wa nzubu wa batatu ba mêku a Melali uvua Suliele muana wa Abihayila. Bavua basa tshitudilu ku luseke lua ku nord kua ntenta wa tshitendelelu.+ 36 Bana ba Melali bavua ne mudimu wa kutangila nyunguluilu ya mabaya+ ya ntenta wa tshitendelelu, mikamba yende,+ makunji ende,+ ntaku yende mikale ne masoso, bintu biende bionso bia kuenza nabi mudimu,+ ne midimu yonso ivua itangila bintu ebi,+ 37 kabidi ne makunji avua manyunguluke lupangu ne ntaku yawu mikale ne masoso,+ mpopo yawu ne mionji yawu.

38 Mose, ne Alona ne bana bende ba balume bavua bobu bashila tshitudilu kumpala kua ntenta wa tshitendelelu lua ku est, kumpala kua ntenta wa kusambakena lua kudi dîba dipatukila. Bavua ne mudimu wa kutangila muaba munsantu, bu mudimu uvuabu ne bua kukumbaja bua bena Isalele. Muntu yonso uvuabu kabayi banyishile* uvua usemena pabuipi uvua ne bua kushipibua.+

39 Bantu balume bonso ba bena Lewi bavua Mose ne Alona bafunde mêna ku dîyi dia Yehowa, kumbukila ku ba ngondo umue kubanda bilondeshile mêku abu bavua binunu 22.

40 Pashishe Yehowa wakambila Mose ne: “Funda mêna a banabute bonso ba balume ba bena Isalele kumbukila ku ba ngondo umue kubanda,+ ubabale ne ufunde mêna abu. 41 Udi ne bua kungangatshila bena Lewi pa muaba wa banabute bonso ba bena Isalele,+ ne kuangata bimuna bia bena Lewi pa muaba wa banabute bonso ba bimuna bia bena Isalele.+ Meme ndi Yehowa.” 42 Nunku Mose wakafunda mêna a banabute bonso ba bena Isalele, anu muvua Yehowa mumutumine dîyi bua kuenza. 43 Bungi bua banabute bonso ba balume bavuabu bafunde bilondeshile mêna abu kumbukila ku ba ngondo umue kubanda buvua 22 273.

44 Yehowa wakatungunuka ne kuakula ne Mose, wamba ne: 45 “Angata bena Lewi pa muaba wa banabute bonso ba munkatshi mua bena Isalele, ne angata bimuna bia bena Lewi pa muaba wa bimuna biabu; bena Lewi badi ne bua kulua banyi meme. Meme ndi Yehowa. 46 Bua mushinga wa kupikula nawu+ banabute 273 ba bena Isalele badi bapite pa mutu pa bungi bua bena Lewi,+ 47 wangate nshekele* itanu bua muntu yonso,+ bilondeshile nshekele wa muaba wa tshijila.* Nshekele umue udi ne gera* 20.+ 48 Upeshe Alona ne bana bende ba balume makuta au bu mushinga wa kupikula nawu bantu badi bapite pa mutu pa bungi buabu.” 49 Nunku Mose wakangata makuta a mushinga wa kupikula nawu kudi bantu bavua bapite pa mutu pa mushinga wa kupikula nawu wa bena Lewi. 50 Wakangata makuta kudi banabute ba bena Isalele, nshekele 1 365, bilondeshile nshekele wa muaba wa tshijila. 51 Nunku Mose wakafila makuta a mushinga wa kupikula nawu kudi Alona ne bana bende ba balume bilondeshile dîyi* dia Yehowa, anu muvua Yehowa mutumine Mose dîyi bua kuenza.

4 Nunku Yehowa wakakula ne Mose ne Alona, wamba ne: 2 “Nubale bana ba balume ba Kohata+ munkatshi mua bana ba Lewi, bilondeshile mêku abu ne nzubu ya batatuabu, 3 bonso badi ne bidimu kumbukila ku 30+ too ne ku 50+ badi munkatshi mua badibu basungule bua kuenza mudimu mu ntenta wa kusambakena.+

4 “Eu ke mudimu wa bana ba balume ba Kohata mu ntenta wa kusambakena.+ Mmudimu mutambe tshijila: 5 Pikala bantu basa luendu, Alona ne bana bende nebabuele, nebatulule tshilamba tshia kukosolola natshi+ ne nebatshibuikile pa mushete+ wa Bujadiki. 6 Nebawubuikile tshibuikilu tshia biseba bia nyama ya nkonga, nebadijapu tshilamba tshijima tshia dikala dia ble ne nebabueje mikamba ya kuwambuila+ muaba wayi.

7 “Nebadije kabidi tshilamba tshia dikala dia ble pa mêsa a mampa a dileja,+ nebatekapu malongo, makopo, bibakudi, ne mbidika ya mulambu wa bia kunua;+ mulambu wa pa tshibidilu wa mampa+ neushalapu. 8 Nebadijapu tshilamba tshikunze kunzuu ne nebabuikilapu tshibuikilu tshia biseba bia nyama ya nkonga ne nebabueje mikamba ya kuambuila mêsa+ muaba wayi. 9 Pashishe nebangate tshilamba tshia dikala dia ble, nebabuikile tshitekelu tshia miendu+ tshidi tshitokesha, pamue ne miendu yatshi,+ tushola tuatshi tua kukoka natu mikaba ya miendu,* bintu biatshi bia kuambuila kapia,+ ne tulongo tuatshi tuonso tua kuela natu mafuta mu miendu. 10 Nebatshivungile tshiotshi ne bintu biatshi bionso mu tshibuikilu tshia biseba bia nyama ya nkonga ne nebatshiteke pa tshintu tshia kutshiambuila. 11 Nebadije kabidi tshilamba tshia dikala dia ble pa tshioshelu tshia or,+ nebatshibuikile tshibuikilu tshia biseba bia nyama ya nkonga, ne nebabueje mikamba ya kutshiambuila+ muaba wayi. 12 Pashishe nebangate bintu bionso+ bia kuenza nabi mudimu bidibu benza nabi mudimu muaba wa tshijila pa tshibidilu, nebabiele mu tshilamba tshia dikala dia ble, nebabibuikile tshibuikilu tshia biseba bia nyama ya nkonga, ne nebabiteke pa tshintu tshia kubiambuila.

13 “Nebumbushe butu* mu tshioshelu+ ne nebadijapu tshilamba tshia miosa mikunzubile ya mikoko. 14 Nebatekapu bintu biatshi bionso bidibu benza nabi mudimu ku tshioshelu: bintu bia kuambuila kapia, nsomo, bikasu, ne bibakudi, bintu bionso bidibu benza nabi mudimu ku tshioshelu;+ ne nebadijapu tshibuikilu tshia biseba bia nyama ya nkonga ne nebabueje mikamba ya kutshiambuila+ muaba wayi.

15 “Pikala bantu basa luendu, Alona ne bana bende ba balume badi ne bua kujikija kubuikila bintu bia muaba wa tshijila+ ne bintu bionso bidibu benza nabi mudimu muaba wa tshijila. Pashishe bana ba balume ba Kohata nebabuele bua kubiambula,+ kadi kabena ne bua kulenga bintu bia muaba wa tshijila to, tshianana nebafue.+ Bintu ebi mbujitu* bua bana ba Kohata bua malu adi atangila ntenta wa kusambakena.

16 “Eleazâ,+ muana wa muakuidi Alona, neikale ne mudimu wa kutangila mafuta a kutokesha nawu,+ musenga wa manananshi wa mupuya muimpe,+ mulambu wa pa tshibidilu wa ntete, ne manyi a kuelangana.+ Yeye udi ne mudimu wa kutangila ntenta wa tshitendelelu mujima ne bionso bidimu, kusangisha ne muaba wa tshijila ne bintu biawu bionso bidibu benza nabi mudimu.”

17 Yehowa wakakula kabidi ne Mose ne Alona, wamba ne: 18 “Kanulekedi bua tshisa tshia mêku a bena Kohata+ tshiumbushibue munkatshi mua bena Lewi to. 19 Kadi benzelayi nunku bua bashale ne muoyo ne kabafu bualu mbasemene pabuipi ne bintu bitambe tshijila.+ Alona ne bana bende ba balume nebabuele, nebapeshe yonso wa kudibu mudimu wende ne nebamuleje tshidiye ne bua kuambula. 20 Kabena ne bua kubuela ne kumona bintu bia tshijila nansha bua katantshi kakese to, tshianana nebafue.”+

21 Pashishe Yehowa wakakula ne Mose, wamba ne: 22 “Udi ne bua kubala bungi bua bana ba balume ba Gêshona+ bilondeshile nzubu ya batatuabu ne mêku abu. 23 Ufunde mêna a bantu badi ne bidimu kumbukila ku 30 too ne ku 50, bonso badi munkatshi mua badibu basungule bua kuenza mudimu mu ntenta wa kusambakena. 24 Ebi ke bintu bidibu bapeshe mêku a bena Gêshona bua kutangila ne kuambula:+ 25 Nebambule bilamba bia ntenta wa tshitendelelu,+ ntenta wa kusambakena, tshibuikilu tshiende ne tshibuikilu tshia biseba bia nyama ya nkonga tshidi pa mutu pende,+ tshilamba tshia ku tshibuelelu tshia ntenta wa kusambakena,+ 26 bilamba bilembeleja bia lupangu,+ tshilamba tshia ku tshibuelelu tshia lupangu+ ludi lunyunguluke ntenta wa tshitendelelu ne tshioshelu, mionji yabi ya ntenta ne bintu biabi bionso bia kuenza nabi mudimu ne bintu bionso bia kuenza nabi mudimu ku ntenta. Eu ke mudimu wabu. 27 Alona ne bana bende ba balume nebatangile mudimu wonso wa bena Gêshona+ ne bintu bidibu ne bua kuambula; neubapeshe majitu onso aa bu mudimu wabu. 28 Eu ke mudimu udi mêku a bena Gêshona ne bua kuenza mu ntenta wa kusambakena,+ ne Itamâ+ muana wa muakuidi Alona ke walombola midimu yabu.

29 “Bua bana ba balume ba Melali,+ neubafunde mêna bilondeshile dîku diabu ne bilondeshile nzubu wa batatuabu. 30 Neubafunde kutuadijila ku bidimu 30 too ne ku bidimu 50, bonso badi munkatshi mua badibu basungule bua kuenza mudimu wa ku ntenta wa kusambakena. 31 Ebi ke bintu bidibu ne bua kuambula+ pa bidi bitangila mudimu wabu wa ku ntenta wa kusambakena: nyunguluilu ya mabaya+ ya ntenta wa tshitendelelu, mikamba yende,+ makunji ende,+ ntaku yende mikale ne masoso;+ 32 makunji+ adi manyunguluke lupangu, ntaku yawu mikale ne masoso,+ mpopo yawu ya ntenta,+ ne mionji yawu ya ntenta pamue ne bintu biawu bionso ne midimu yonso idi ibitangila. Neubapeshe bintu bidibu ne bua kuambula bilondeshile mêna abu. 33 Eu ke mushindu wikala mêku a bana ba Melali+ ne bua kuenza mudimu wa ku ntenta wa kusambakena, ku bulombodi bua Itamâ muana wa muakuidi Alona.”+

34 Nunku Mose ne Alona ne bamfumu+ ba tshisumbu bakafunda mêna a bana ba balume ba Kohata+ bilondeshile mêku abu ne bilondeshile nzubu wa batatuabu, 35 bonso bavua ne bidimu kumbukila ku 30 too ne ku 50 bavua munkatshi mua bavuabu basungule bua kuenza mudimu wa ku ntenta wa kusambakena.+ 36 Bungi bua bantu bonso bavuabu bafunde mêna bilondeshile mêku abu buvua 2 750.+ 37 Aba mbantu ba mu mêku a bena Kohata bavuabu bafunde mêna, bonso bavua benza mudimu ku ntenta wa kusambakena. Mose ne Alona bakabafunda bilondeshile dîyi divua Yehowa muambile Mose.+

38 Bavua bafunde mêna a bana ba balume ba Gêshona+ bilondeshile mêku abu ne bilondeshile nzubu wa batatuabu, 39 bonso bavua ne bidimu kumbukila ku 30 too ne ku 50 bavua munkatshi mua bavuabu basungule bua kuenza mudimu ku ntenta wa kusambakena. 40 Bungi bua bantu bonso bavuabu bafunde mêna bilondeshile mêku abu ne bilondeshile nzubu wa batatuabu buvua 2 630.+ 41 Edi divua difunda dia mêna a bena mu mêku a bana ba balume ba Gêshona, bonso bavua benza mudimu ku ntenta wa kusambakena. Mose ne Alona bakabafunda ku dîyi dia Yehowa.+

42 Bavua bafunde mêna a bana ba balume ba Melali bilondeshile mêku abu ne bilondeshile nzubu wa batatuabu, 43 bonso bavua ne bidimu kumbukila ku 30 too ne ku 50 bavua munkatshi mua bavuabu basungule bua kuenza mudimu ku ntenta wa kusambakena.+ 44 Bungi bua bantu bonso ba kudibu bavuabu bafunde mêna bilondeshile mêku abu buvua 3 200.+ 45 Edi divua difunda dia mêna a bena mu mêku a bana ba balume ba Melali, bavua Mose ne Alona bafunde bilondeshile dîyi divua Yehowa muambile Mose.+

46 Mose ne Alona ne bamfumu ba mu Isalele bakafunda mêna a bena Lewi bonso aba bilondeshile mêku abu ne bilondeshile nzubu ya batatuabu; 47 bavua ne bidimu kumbukila ku 30 too ne ku 50, ne bonso bavua basungula bua kuenza mudimu ne kuambula majitu adi atangila ntenta wa kusambakena.+ 48 Bungi bua bantu bonso bavuabu bafunde mêna buvua 8 580.+ 49 Bavua babafunde bilondeshile dîyi divua Yehowa muambile Mose, muntu yonso bilondeshile mudimu uvuabu bamupeshe ne bujitu buvuaye ne bua kuambula; bavua babafunde anu muvua Yehowa mutumine Mose dîyi bua kuenza.

5 Yehowa wakakula kabidi ne Mose, wamba ne: 2 “Tumina bena Isalele dîyi bua bumbushe mu tshitudilu muntu yonso udi ne nsudi+ ne muntu yonso udi bintu bipatuka mu mubidi+ ne muntu yonso udi mukoya bua tshitalu tshia muntu.*+ 3 Nansha yeye muikale muntu mulume anyi muntu mukaji, nudi ne bua kumumbusha. Nudi ne bua kubumbusha mu tshitudilu bua kabanyangi+ tshitudilu tshijima tshia bantu bandi musombele* munkatshi muabu.”+ 4 Nunku bena Isalele bakenza anu nanku, bobu kubumbusha mu tshitudilu. Anu muvua Yehowa muambile Mose, ke muakenza bena Isalele nanku.

5 Yehowa wakatungunuka ne kuakula ne Mose, wamba ne: 6 “Ambila bena Isalele ne: ‘Bikala muntu mulume anyi muntu mukaji muenze umue wa ku mpekatu itu bantu benza ne muenze bualu bua dipanga lulamatu kudi Yehowa, muntu* au mmupile.+ 7 Udi* ne bua kutonda+ mpekatu udiye* muenze ne kupingaja bintu bionso bu difutu dia dipila diende ne kusakidila kabidi tshia bitanu tshia bintu abi;+ udi ne bua kubipesha muntu udiye muenzele bibi. 8 Kadi bikala muntu udiye muenzele bibi kayi ne mulela wa pabuipi udi mua kuangata bintu abi, nebabipeshe Yehowa ne nebikale bia muakuidi, pa kumbusha tshimpanga tshia mukoko tshia kubuikila natshi mpekatu tshikalaye ne bua kumubuikidila natshi mpekatu.+

9 “‘Tshintu tshionso tshia tshijila+ tshidi bena Isalele bafila kudi muakuidi netshikale tshiende.+ 10 Bintu bia tshijila bia muntu yonso nebishale biende. Tshintu tshionso tshidi muntu upesha muakuidi, netshikale tshia muakuidi.’”

11 Yehowa wakatungunuka ne kuakula ne Mose, wamba ne: 12 “Akula ne bena Isalele, ubambile ne: ‘Tangilayi tshidi ne bua kuenzeka bikala mukaji wa muntu mupambuke ne mupange lulamatu kudiye, 13 ne mulume mukuabu musangile nende,+ kadi bayende kayi mumanye bualu abu ne kabuyi bumanyike to, ne yeye mudinyange kadi kakuyi muntu udi mua kujadika bualu abu ne kabayi bamukuate: 14 Nansha mulume mupete mukawu anyi mumone bu ne: mukajende mmupange lulamatu kudiye, pende mudinyange, anyi nansha yeye ne mukawu ne mumone bu ne: mukajende mmupange lulamatu kudiye pende kayi mudinyange, 15 mulume au udi ne bua kulua ne mukajende kudi muakuidi pamue ne mulambu bua mukajende, tshia dikumi tshia efa* wa bukula bua orje. Kena ne bua kupongololapu mafuta anyi kutekapu budimbu bua mupuya muimpe to, bualu mmulambu wa ntete wa mukawu, mulambu wa ntete udi uvuluija dipila.

16 “‘Muakuidi neasemene nende kumpala, neamuimanyike kumpala kua Yehowa.+ 17 Muakuidi neangate mâyi a tshijila mu dibungu, ne muakuidi neangate ndambu wa buloba budi panshi mu ntenta wa tshitendelelu, neabuele mu mâyi au. 18 Muakuidi neimanyike mukaji au kumpala kua Yehowa, neasulule nsuki ya mukaji au, neateke mulambu wa ntete bua divuluija mu tshianza tshiende, mbuena kuamba ne: mulambu wa ntete wa mukawu,+ ne muakuidi neikale ne mâyi a bululu adi apetesha mulawu mu tshianza.+

19 “‘Pashishe muakuidi neatshipishe mukaji, umuambila ne: “Bikala mulume mukuabu kayi musangile nebe paudi ku bukokeshi bua bayebe+ ne kuena mupambuke ne mudinyange, mâyi a bululu adi apetesha mulawu aa kaakuenzedi bualu to. 20 Kadi biwikala mupambuke paudi ku bukokeshi bua bayebe, mudinyange, ne biwikala musangile ne mulume mukuabu+ pa kumbusha bayebe . . .” 21 Pashishe muakuidi neatshipishe mukaji mutshipu udi ne mulawu, ne muakuidi neambile mukaji au ne: “Yehowa akuvuije tshilejilu tshia mulawu ne tshia mutshipu munkatshi mua tshisamba tshienu, padi Yehowa wenza bua tshibelu* tshiebe tshifubidile* ne wenza bua difu diebe diuwule. 22 Mâyi adi apetesha mulawu aa neabuele mu mala ebe bua kuwuja difu diebe ne kuenza bua tshibelu* tshiebe tshifubidile.”* Dîba adi mukaji neambe ne: “Amen! Amen!”*

23 “‘Pashishe muakuidi neafunde milawu eyi mu mukanda ne neayikupuile mu mâyi a bululu. 24 Pashishe neanuishe mukaji au mâyi a bululu adi apetesha mulawu, ne mâyi adi apetesha mulawu neabuele munda muende ne neamuenzele bibi. 25 Muakuidi neangate mulambu wa ntete wa mukawu+ mu tshianza tshia mukaji, neakupakaje mulambu wa ntete au kumpala ne panyima, kumpala kua Yehowa, ne nealue nawu pabuipi ne tshioshelu. 26 Muakuidi neangate dianza dia mulambu wa ntete bu tshimanyinu tshia mulambu, neadifuimishe pa tshioshelu+ ne pashishe neanuishe mukaji mâyi au. 27 Padiye unuisha mukaji mâyi au, bikala mukaji mudinyange ne muenze bualu bua dipanga lulamatu kudi bayende, dîba adi mâyi adi apetesha mulawu neabuele munda muende, neamuenzele bibi, difu diende nediuwule, tshibelu* tshiende netshifubidile,* ne mukaji au nealue tshilejilu tshia mulawu munkatshi mua tshisamba tshiabu. 28 Kadi bikala mukaji kayi mudinyange ne muikale mukezuke, dîba adi kakupeta dinyoka edi to; neimite ne nealele bana.

29 “‘Eu mmukenji udi utangila mukawu,+ dîba didi mukaji upambuka ne udinyanga padiye ku bukokeshi bua bayende, 30 anyi dîba didi mulume upeta mukawu ne umona bu ne: mukajende mmupange lulamatu kudiye; neimanyike mukajende kumpala kua Yehowa, ne muakuidi udi ne bua kumuenzela malu onso adi mu mukenji eu. 31 Mulume kakuikala ne dipila, kadi mukajende neapete dinyoka bua dipila diende.’”

6 Yehowa wakakula kabidi ne Mose, kuambaye ne: 2 “Akula ne bena Isalele, ubambile ne: ‘Bikala muntu mulume anyi muntu mukaji muenze mutshipu wa pa buawu bua kushala Munazi*+ bua Yehowa, 3 kena ne bua kunua mvinyo anyi maluvu makuabu makole to. Kena ne bua kunua vinegre wa mvinyo anyi vinegre wa tshintu kayi tshionso tshidi tshikuata.+ Kena ne bua kunua bintu bienza ne tumuma tua mvinyo anyi kudia tumuma tua mvinyo, nansha tubishi anyi tume. 4 Matuku onso a Bunazi buende kena ne bua kudia tshintu tshionso tshienza ne tumuma tua mvinyo, kubangila anu ku tumuma tua mvinyo tudi katuyi tuanji kuboba too ne ku bizubu biatu.

5 “‘Matuku onso a mutshipu wa Bunazi buende, kapaya kakena ne bua kupita ku mutu kuende to.+ Udi ne bua kushala wa tshijila, ulekela nsuki ya ku mutu kuende ilepa too ne padi matuku a diditeka diende ku luseke bua Yehowa akumbana. 6 Kena ne bua kusemena pabuipi* ne tshitalu tshia muntu* matuku onso adiye ushala muditeke ku luseke bua Yehowa to. 7 Nansha tatuende anyi mamuende anyi muanabu wa balume anyi muanabu wa bakaji yeye mufue, kena mua kudinyanga to,+ bualu tshimanyinu tshia Bunazi buende kudi Nzambi wende tshidi pa mutu wende.

8 “‘Ngua tshijila kudi Yehowa matuku onso a Bunazi buende. 9 Kadi bikala muntu mufuile ku luseke luende mu tshimpitshimpi+ ne udi unyanga nsuki idi tshimanyinu tshia diditeka diende ku luseke bua Nzambi,* udi ne bua kukungula mutu wende+ dituku didiye ujadika dilengejibua diende. Udi ne bua kuwukungula dituku dia muanda mutekete. 10 Dituku dia muanda mukulu, nealue ne tumanda nkutshi* tubidi anyi bana ba nkudimba babidi kudi muakuidi ku tshibuelelu tshia ntenta wa kusambakena. 11 Muakuidi nealongolole umue bu mulambu wa mpekatu ne mukuabu bu mulambu wa kuosha ne neamubuikidile mpekatu bualu mmuenze mpekatu+ padiye mulenge tshitalu tshia muntu.* Pashishe muntu au udi ne bua kujidila mutu wende dituku adi. 12 Udi ne bua kuditeka kabidi ku luseke bua Yehowa bua matuku a Bunazi buende, ne nealue ne tshimpanga tshia mukoko tshitshidi tshiana tshidi mu tshidimu tshiatshi tshia kumpala bu mulambu wa dipila. Kadi kabakubala matuku a kumpala to, bualu uvua munyange Bunazi buende.

13 “‘Mpindieu eu mmukenji udi utangila Munazi: Padiye ukumbaja matuku a Bunazi buende,+ nebalue nende ku tshibuelelu tshia ntenta wa kusambakena. 14 Kuntu aku, udi ne bua kupesha Yehowa mulambu wende wa: tshimpanga tshia mukoko tshia tshimpe tshitshidi tshiana tshidi mu tshidimu tshiatshi tshia kumpala bu mulambu wa kuosha,+ lukungulu lua mukoko lua luimpe ludi mu tshidimu tshialu tshia kumpala bu mulambu wa mpekatu,+ tshimpanga tshia mukoko tshia tshimpe bu mulambu wa diumvuangana,+ 15 tshianda* tshia mampa menza bu bikata kaayi mela luevene menza ne bukula bunefuke busambakaja ne mafuta, mikata ya bibetubetu kayiyi miela luevene milaba mafuta, ne mulambu wayi wa ntete+ ne milambu yayi ya bia kunua.+ 16 Muakuidi nealue nabi kumpala kua Yehowa ne neafile mulambu wende wa mpekatu ne mulambu wende wa kuosha. 17 Nealambule tshimpanga tshia mukoko bu mulambu wa diumvuangana kudi Yehowa pamue ne tshianda* tshia mampa kaayi mela luevene, ne muakuidi nealue ne mulambu watshi wa ntete+ ne mulambu watshi wa bia kunua.

18 “‘Pashishe Munazi udi ne bua kukungula nsuki ivua kayiyi mikosa ya ku mutu* kuende+ ku tshibuelelu tshia ntenta wa kusambakena, ne neangate nsuki ya ku mutu kuende ivua milepe pavuaye mu Bunazi buende ne neayiteke pa kapia kadi muinshi mua mulambu wa diumvuangana. 19 Muakuidi udi ne bua kuangata diboko dia tshimpanga tshia mukoko dilamba,+ diampa dimue dienza bu tshikata mu tshianda,* mukata umue wa tshibetubetu kawuyi muela luevene, ne neabiteke mu bianza bia Munazi panyima pa yeye mumane kukungula tshimanyinu tshia Bunazi buende. 20 Muakuidi udi ne bua kubikupakaja kumpala ne panyima bu mulambu wa kukupakaja kumpala kua Yehowa.+ Ntshintu tshia tshijila bua muakuidi, pamue ne tshiadi tshia mulambu wa kukupakaja ne tshibelu tshia nyama wa mulambu.+ Pashishe Munazi udi mua kunua mvinyo.

21 “‘Eu mmukenji udi utangila Munazi+ udi wenza mutshipu: Yeye muenze mutshipu ne muikale ne mushindu wa kupesha Yehowa mulambu udi mupite bidibu balombe bua Bunazi buende, dîba adi udi ne bua kukumbaja mutshipu wende mu diumvuangana ne mukenji wa Bunazi buende.’”

22 Pashishe Yehowa wakambila Mose ne: 23 “Ambila Alona ne bana bende ba balume ne: ‘Eu ke mushindu unudi ne bua kubenesha+ bena Isalele. Nubambile ne:

24 “Yehowa anubeneshe+ ne anulame.

25 Yehowa anukenkeshile mpala wende,+ ne anuanyishe.

26 Yehowa ajule mpala wende atangile kunudi ne anupeshe ditalala.”’+

27 Nunku badi ne bua kuteka dîna dianyi pa bena Isalele+ bua meme mbabeneshe.”+

7 Dituku divua Mose mujikije kuasa ntenta wa tshitendelelu,+ wakamuela manyi,+ kumujidilaye pamue ne bintu biende bionso, ne tshioshelu, ne bintu biatshi bionso bia kuenza nabi mudimu.+ Pakelaye bintu ebi manyi ne pakabijidilaye,+ 2 bamfumu ba mu Isalele,+ bantu bavua ku mutu kua nzubu ya batatuabu, bakafila mulambu. Bamfumu ba bisa aba bavua balombole difunda dia mêna a bantu 3 bakalua kumpala kua Yehowa ne mulambu wabu wa matempu asambombo mabuikila ne ngombe mipakula 12, ditempu dimue bua bamfumu babidi ne ngombe mulume* umue bua mfumu yonso; bakabifila kumpala kua ntenta wa tshitendelelu. 4 Yehowa wakambila Mose ne: 5 “Angata bintu ebi kudibu bu muikalabu mua kuenza nabi mudimu mu ntenta wa kusambakena, ne ubipeshe bena Lewi, upeshe yonso wa kudibu bilondeshile bidiye nabi dijinga bua midimu yende.”

6 Nunku Mose wakangata matempu au ne ngombe ayi, kubipeshaye bena Lewi. 7 Wakapesha bana ba balume ba Gêshona matempu abidi ne ngombe mipakula inayi bilondeshile bivuabu nabi dijinga bua midimu yabu;+ 8 ne wakapesha bana ba balume ba Melali matempu anayi ne ngombe mipakula muanda mukulu bilondeshile bivuabu nabi dijinga bua midimu yabu, ku bulombodi bua Itamâ muana wa muakuidi Alona.+ 9 Kadi kakapesha bana ba balume ba Kohata tshintu nansha tshimue bualu midimu yabu ivua itangila mudimu wa muaba wa tshijila,+ ne bavua bambula bintu bia tshijila pa makaya abu.+

10 Mpindieu bamfumu bakafila mulambu wabu pavuabu babanjije*+ tshioshelu dituku divuabu batshiele manyi. Pavua bamfumu balue ne mulambu wabu kumpala kua tshioshelu, 11 Yehowa wakambila Mose ne: “Dituku dionso, mfumu yonso neafile mulambu wende bua dibanjija dia tshioshelu , mfumu ne mfumu diende dituku.”

12 Mfumu uvua mufile mulambu wende dituku dia kumpala uvua Nashona+ muana wa Aminadaba wa mu tshisa tshia Yuda. 13 Mulambu wende uvua wa dilongo dimue dia tshiamu tshia arjan dia bujitu bua nshekele* 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,*+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 14 dikopo dimue dia or* dia bujitu bua nshekele dikumi, diuwule tente ne musenga wa manananshi; 15 muana mulume wa ngombe umue, tshimpanga tshimue tshia mukoko, ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 16 muana wa mbuji umue bua mulambu wa mpekatu;+ 17 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Nashona muana wa Aminadaba.+

18 Dituku dibidi Netanele+ muana wa Suâ, mfumu wa Yisakâ, wakafila mulambu. 19 Wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 20 dikopo dimue dia or dia bujitu bua nshekele dikumi, diuwule tente ne musenga wa manananshi; 21 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 22 muana wa mbuji umue bua mulambu wa mpekatu;+ 23 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Netanele muana wa Suâ.

24 Dituku disatu mfumu wa bana ba Zebulona, Eliaba+ muana wa Helona, 25 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 26 dikopo dimue dia or dia bujitu bua nshekele dikumi, diuwule tente ne musenga wa manananshi; 27 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala, bua mulambu wa kuosha;+ 28 muana wa mbuji umue bua mulambu wa mpekatu;+ 29 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Eliaba+ muana wa Helona.

30 Dituku dinayi mfumu wa bana ba Lubena, Elisû+ muana wa Shedeu, 31 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 32 dikopo dimue dia or dia bujitu bua nshekele dikumi, diuwule tente ne musenga wa manananshi; 33 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 34 muana wa mbuji umue bua mulambu wa mpekatu;+ 35 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Elisû+ muana wa Shedeu.

36 Dituku ditanu mfumu wa bana ba Simeona, Shelumiele+ muana wa Sulishadai, 37 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 38 dikopo dimue dia or dia bujitu bua nshekele dikumi, diuwule tente ne musenga wa manananshi; 39 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 40 muana wa mbuji umue bua mulambu wa mpekatu;+ 41 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Shelumiele+ muana wa Sulishadai.

42 Dituku disambombo mfumu wa bana ba Gada, Eleyasafa+ muana wa Deuele, 43 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 44 dikopo dimue dia or dia bujitu bua nshekele dikumi, diuwule tente ne musenga wa manananshi; 45 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 46 muana wa mbuji umue bua mulambu wa mpekatu;+ 47 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Eleyasafa+ muana wa Deuele.

48 Dituku dia muanda mutekete mfumu wa bana ba Efelayima, Elishama+ muana wa Amihuda, 49 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 50 dikopo dimue dia or dia bujitu bua nshekele dikumi, diuwule tente ne musenga wa manananshi; 51 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 52 muana wa mbuji umue bua mulambu wa mpekatu;+ 53 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Elishama muana wa Amihuda.+

54 Dituku dia muanda mukulu mfumu wa bana ba Manashe, Gamaliele+ muana wa Pedasû, 55 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 56 dikopo dimue dia or dia bujitu bua nshekele dikumi, diuwule tente ne musenga wa manananshi; 57 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala, bua mulambu wa kuosha;+ 58 muana wa mbuji umue bua mulambu wa mpekatu;+ 59 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Gamaliele+ muana wa Pedasû.

60 Dituku dia tshitema mfumu+ wa bana ba Benyamina, Abidana+ muana wa Gideoni, 61 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 62 dikopo dimue dia or dia bujitu bua nshekele dikumi, diuwule tente ne musenga wa manananshi; 63 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 64 muana wa mbuji umue bua mulambu wa mpekatu;+ 65 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Abidana+ muana wa Gideoni.

66 Dituku dia dikumi mfumu wa bana ba Dana, Ahiezê+ muana wa Amishadai, 67 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 68 dikopo dimue dia or dia bujitu bua nshekele dikumi, diuwule tente ne musenga wa manananshi; 69 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 70 muana wa mbuji umue bua mulambu wa mpekatu;+ 71 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Ahiezê+ muana wa Amishadai.

72 Dituku dia 11 mfumu wa bana ba Ashê, Pagiele+ muana wa Okelana, 73 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 74 dikopo dimue dia or dia bujitu bua nshekele dikumi, diuwule tente ne musenga wa manananshi; 75 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 76 muana wa mbuji umue bua mulambu wa mpekatu;+ 77 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Pagiele+ muana wa Okelana.

78 Dituku dia 12 mfumu wa bana ba Nafatale, Ahila+ muana wa Enana, 79 wakafila mulambu wende wa dilongo dimue dia tshiamu tshia arjan dia bujitu bua nshekele 130 ne tshibakudi tshimue tshia tshiamu tshia arjan tshia bujitu bua nshekele 70 bilondeshile nshekele wa muaba wa tshijila,+ bionso bibidi biuwule tente ne bukula bunefuke busambakaja ne mafuta bua mulambu wa ntete;+ 80 dikopo dimue dia or dia bujitu bua nshekele dikumi, diuwule tente ne musenga wa manananshi; 81 muana mulume wa ngombe umue, tshimpanga tshimue tshia mukoko ne muana wa mukoko umue wa mpanga udi mu tshidimu tshiende tshia kumpala bua mulambu wa kuosha;+ 82 muana wa mbuji umue bua mulambu wa mpekatu;+ 83 ne ngombe ibidi, bimpanga bia mikoko bitanu, mbuji ya mpumbu itanu, ne bana ba mikoko ba mpanga batanu yonso muikale ne tshidimu tshimue bua mulambu wa diumvuangana.+ Eu ke uvua mulambu wa Ahila+ muana wa Enana.

84 Eu ke uvua mulambu wa dibanjija nawu+ tshioshelu wa kudi bamfumu ba mu Isalele pavuabu batshiele manyi: malongo 12 a tshiamu tshia arjan, bibakudi 12 bia tshiamu tshia arjan, makopo 12 a or;+ 85 dilongo dionso dia tshiamu tshia arjan divua ne bujitu bua nshekele 130 ne tshibakudi tshionso tshivua ne bujitu bua nshekele 70; arjan yonso uvuabu benze nende bintu ebi uvua ne bujitu bua nshekele 2 400 bilondeshile nshekele wa muaba wa tshijila;+ 86 makopo 12 a or muwule tente ne musenga wa manananshi, dikopo dionso dikale ne bujitu bua nshekele dikumi bilondeshile nshekele wa muaba wa tshijila; or yonso uvuabu benze nende makopo uvua ne bujitu bua nshekele 120. 87 Nyama yonso ya mulambu wa kuosha ivua: ngombe milume 12, bimpanga bia mikoko 12, bana ba mikoko ba mpanga 12 yonso muikale ne tshidimu tshimue ne mulambu wayi wa ntete, ne bana ba mbuji 12 bua mulambu wa mpekatu; 88 ne nyama yonso ya mulambu wa diumvuangana ivua: ngombe milume 24, bimpanga bia mikoko 60, mbuji ya mpumbu 60, bana ba mikoko ba mpanga 60 yonso muikale ne tshidimu tshimue. Eu ke uvua mulambu wa dibanjija nawu+ tshioshelu panyima pa bamane kutshiela manyi.+

89 Dîba dionso divua Mose ubuela mu ntenta wa kusambakena bua kuakula ne Nzambi,*+ uvua umvua dîyi diyukila nende diumbukila pa tshibuikidiji+ tshia mushete wa Bujadiki, diumbukila pankatshi pa bakeluba babidi;+ ne Nzambi uvua wakula nende.

8 Yehowa wakakula ne Mose, wamba ne: 2 “Akula ne Alona, umuambile ne: ‘Paudi utemesha miendu, miendu muanda mutekete ayi idi ne bua kukenkesha tshitupa tshidi kumpala kua tshitekelu tshia miendu.’”+ 3 Ke Alona kuenza nunku: Yeye kutemesha miendu bua kukenkesha tshitupa tshivua kumpala kua tshitekelu tshia miendu+ anu muvua Yehowa mutumine Mose dîyi bua kuenza. 4 Tshitekelu tshia miendu tshivua tshienza nunku: Tshivua tshienza ne or mufula; tshivua tshienza ne or mufula kubangila anu ku mulamba watshi too ne ku bilongo biatshi bikadi bikanguke.+ Tshitekelu tshia miendu tshivua tshienza bilondeshile tshikena kumona tshivua Yehowa muleje Mose.+

5 Yehowa wakakula kabidi ne Mose, wamba ne: 6 “Angata bena Lewi munkatshi mua bena Isalele, ubakezule.+ 7 Neubakezule mushindu eu: Neubamiamine mâyi adi akezula ku mpekatu, ne badi ne bua kukungula mubidi wabu mujima ne kapaya, kusukula bilamba biabu ne kudikezula.+ 8 Pashishe nebangate muana mulume wa ngombe+ ne mulambu wende wa ntete+ wa bukula bunefuke busambakaja ne mafuta, ne newangate ngombe mulume mukuabu utshidi muana bua mulambu wa mpekatu.+ 9 Pashishe udi ne bua kulua ne bena Lewi kumpala kua ntenta wa kusambakena ne kusangisha tshisumbu tshijima tshia bena Isalele.+ 10 Paudi ulua ne bena Lewi kumpala kua Yehowa, bena Isalele badi ne bua kutenteka bianza biabu pa bena Lewi.+ 11 Alona udi ne bua kufila* bena Lewi kumpala kua Yehowa bu mulambu wa kukupakaja+ wa kudi bena Isalele, ne nebenze mudimu wa Yehowa.+

12 “Pashishe bena Lewi nebatenteke bianza biabu pa mitu ya ngombe milume+ ayi. Pashishe, ulambule Yehowa ngombe umue bu mulambu wa mpekatu ne mukuabu bu mulambu wa kuosha bua kubuikidila bena Lewi mpekatu.+ 13 Pashishe newimanyike bena Lewi kumpala kua Alona ne bana bende ba balume ne neubafile* bu mulambu wa kukupakaja kudi Yehowa. 14 Udi ne bua kumbusha bena Lewi munkatshi mua bena Isalele, ne bena Lewi nebikale banyi meme.+ 15 Pashishe bena Lewi nebalue bua kuenza mudimu ku ntenta wa kusambakena. Eu ke mushindu uudi ne bua kubalengeja ne kubafila* bu mulambu wa kukupakaja. 16 Bualu mbantu badibu bafile, bafila kundi bangata munkatshi mua bena Isalele. Nendiangatshilabu pa muaba wa banabute* bonso ba bena Isalele.+ 17 Bualu muanabute yonso wa munkatshi mua bena Isalele nguanyi meme, nansha wa muntu nansha wa nyama.+ Ngakadijidilabu dituku dimvua mushipe banabute bonso ba mu buloba bua Ejipitu.+ 18 Nengangate bena Lewi pa muaba wa banabute bonso ba munkatshi mua bena Isalele. 19 Nemfile bena Lewi bu bantu bafila kudi Alona ne bana bende ba balume, bangata munkatshi mua bena Isalele, bua benzele bena Isalele mudimu ku ntenta wa kusambakena+ ne babuikidile bena Isalele mpekatu, bua tshipupu nansha tshimue katshilu munkatshi mua bena Isalele+ bualu bena Isalele badi balua pabuipi ne muaba wa tshijila.”

20 Mose ne Alona ne tshisumbu tshijima tshia bena Isalele bakenzela bena Lewi nunku. Bena Isalele bakenzela bena Lewi malu bilondeshile malu onso avua Yehowa mutumine Mose dîyi bua kubenzela. 21 Nunku bena Lewi bakadikezula, kusukulabu bilamba biabu;+ pashishe Alona kubafilaye* bu mulambu wa kukupakaja kumpala kua Yehowa.+ Pashishe Alona wakababuikidila mpekatu bua kubalengeja.+ 22 Pashishe bena Lewi bakaya bua kuenza mudimu wabu ku ntenta wa kusambakena kumpala kua Alona ne bana bende ba balume. Bakenzela bena Lewi malu anu muvua Yehowa mutumine Mose dîyi bua kubenzela.

23 Nunku Yehowa wakakula ne Mose, wamba ne: 24 “Bualu ebu budi butangila bena Lewi: Muena Lewi udi ne bidimu kumbukila ku 25 kubanda neabuele mu tshisumbu tshia bantu badi benza mudimu wa ntenta wa kusambakena. 25 Kadi padiye upitshisha bidimu 50, neumbuke mu tshisumbu tshia badi benza mudimu abu ne kakuenza kabidi mudimu to. 26 Yeye udi mua kuenzela bana babu badi benza midimu ya ku ntenta wa kusambakena mudimu, kadi yeye kena ne bua kuenzaku mudimu to. Etshi ke tshiudi ne bua kuenza bua bena Lewi ne midimu yabu.”+

9 Yehowa wakakula ne Mose mu tshipela tshia Sinai mu ngondo wa kumpala+ wa tshidimu tshibidi panyima pa bobu bamane kupatuka mu buloba bua Ejipitu, wamba ne: 2 “Bena Isalele badi ne bua kulongolola mulambu wa Pasaka+ padi tshikondo tshiawu tshikumbana.+ 3 Nudi ne bua kuwulongolola padi tshikondo tshiawu tshikumbana, mu dituku dia 14 dia ngondo eu pakadi dîba dibuele, kumpala kua butuku kuila.* Nudi ne bua kuwulongolola bilondeshile mikenji yawu ne mushindu utubu bawenza.”+

4 Ke Mose kuambila bena Isalele bua kulongololabu mulambu wa Pasaka. 5 Nunku bakalongolola mulambu wa Pasaka mu ngondo wa kumpala mu dituku dia 14 dia ngondo au pakavua dîba dibuele, kumpala kua butuku kuila,* mu tshipela tshia Sinai. Bena Isalele bakenza malu bilondeshile bionso bivua Yehowa mutumine Mose dîyi bua kuenza.

6 Kadi kuvua bantu bavua balue bakoya bualu bavua balenge tshitalu,*+ nunku kabavua ne mushindu wa kulongolola mulambu wa Pasaka dituku adi to. Nunku bantu abu bakaya kumpala kua Mose ne Alona dituku adi,+ 7 kumuambilabu ne: “Tudi bakoya bualu tudi balenge tshitalu.* Bua tshinyi bidi mua kutupangisha bua kupesha Yehowa mulambu munkatshi mua bena Isalele padi tshikondo tshiawu tshikumbane?”+ 8 Ke Mose kubambila ne: “Indilayi muaba eu, nganji kumvua dîyi diatuma Yehowa bua bualu buenu.”+

9 Pashishe Yehowa wakambila Mose ne: 10 “Ambila bena Isalele ne: ‘Nansha bikala muntu wa munkatshi muenu anyi wa mu bipungu bienu bialonda mulue mukoya bualu mmulenge tshitalu*+ anyi muye ku luendu lule, udi anu ne bua kulongoluela Yehowa mulambu wa Pasaka. 11 Badi ne bua kuwulongolola mu ngondo muibidi,+ mu dituku dia 14 pakadi dîba dibuele, kumpala kua butuku kuila.* Badi ne bua kuwudia ne mampa kaayi mela luevene ne bisekiseki bia bululu.+ 12 Kabena ne bua kuwulama nansha mukese too ne mu dinda+ ne kabena ne bua kutshibula mufuba wawu to.+ Nebawulongolole bilondeshile mikenji mifunda yonso idi itangila Pasaka. 13 Kadi bikala muntu uvua mukezuke anyi kavua muye ku luendu tshidibi mulengulule bua kulongolola mulambu wa Pasaka, badi ne bua kumbusha* muntu* au mu tshisamba tshiabu,+ bualu kavua mufile mulambu wa Yehowa pavua tshikondo tshiawu tshikumbane to. Muntu au neapete difutu dia mpekatu wende.

14 “‘Bikala muntu musombe buenyi munkatshi muenu, udi pende ne bua kulongoluela Yehowa mulambu wa Pasaka.+ Neenze nunku bilondeshile mukenji mufunda wa Pasaka ne mushindu utubu bamuenza.+ Nekuikale mukenji mufunda wa muomumue buenu nuenu bonso, bua muntu udi musombe buenyi ne bua muena ditunga.’”+

15 Mpindieu dituku divuabu base ntenta wa tshitendelelu,+ ditutu diakabuikila ntenta wa tshitendelelu, ntenta wa Bujadiki, kadi ku dilolo tshintu tshivua tshimueneka bu kapia tshiakimana pa mutu pa ntenta wa tshitendelelu too ne mu dinda.+ 16 Monayi tshivua tshitungunuka ne kuenzeka: Mu munya ditutu divua dimubuikila, ne butuku tshintu tshivua tshimueneka bu kapia tshivua tshimubuikila.+ 17 Dîba dionso divua ditutu dijuka pa ntenta, bena Isalele bavua basa luendu diakamue,+ ne muaba uvua ditutu dimana, ke uvua bena Isalele batudila.+ 18 Bena Isalele bavua basa luendu pavua Yehowa wamba dîyi ne bavua batula pavua Yehowa wamba dîyi.+ Dîba dionso divua ditutu dishala dimane pa mutu pa ntenta wa tshitendelelu, bavua bashala muaba uvuabu batudile. 19 Pavua ditutu dishala pa mutu pa ntenta wa tshitendelelu matuku a bungi, bena Isalele bavua batumikila Yehowa, kabavua basa luendu to.+ 20 Imue misangu ditutu divua dishala dimane pa mutu pa ntenta wa tshitendelelu matuku makese. Pavua Yehowa wamba dîyi, bena Isalele bavua bashala muaba uvuabu batudile, ne pavua Yehowa wamba dîyi, bavua basa luendu. 21 Imue misangu ditutu divua dishala dimane anu kumbukila ku dilolo too ne mu dinda, ne mu dinda pavua ditutu dijuka, bavua basa luendu. Bavua basa luendu nansha mu munya nansha butuku pavua ditutu dijuka.+ 22 Mutantshi wonso uvua ditutu dishala pa mutu pa ntenta wa tshitendelelu, nansha bua matuku abidi, bua ngondo umue anyi bua mutantshi mule, bena Isalele bavua bashala muaba uvuabu batudile, kabayi basa luendu. Kadi pavua ditutu dijuka, bavua basa luendu. 23 Pavua Yehowa wamba dîyi bavua batula, ne pavua Yehowa wamba dîyi bavua basa luendu. Bavua bakumbaja tshivua Yehowa ubalomba bua kuenza ku dîyi divua Yehowa utuma ku butuangaji bua Mose.

10 Nunku Yehowa wakambila Mose ne: 2 “Dienzela mpungi ibidi;+ uyenze ne tshiamu tshia arjan tshifula, ne wikale ubikila nayi tshisumbu ne uleja dîba dia kuasa luendu. 3 Padibu bayela yonso ibidi, tshisumbu tshijima netshilue kuudi ku tshibuelelu tshia ntenta wa kusambakena.+ 4 Bobu bele anu mpungi umuepele, anu bamfumu, bantu badi ku mutu kua binunu bia Isalele, ke balua kuudi.+

5 “Paudi wela mpungi ne dîyi dibanda dipueka, bantu badi mu bitudilu bidi ku est+ nebase luendu. 6 Paudi wela mpungi ne dîyi dibanda dipueka musangu muibidi, bantu badi mu bitudilu bidi ku sud+ nebase luendu. Nebele mpungi mushindu eu dîba dionso didi tshimue tshia kudibi tshiasa luendu.

7 “Mpindieu paudi ubikila tshisumbu tshijima pamue, newele mpungi,+ kadi kuedi ne dîyi didi dibanda dipueka to. 8 Bakuidi, bana ba Alona, nebikale bela mpungi,+ ne diyela nedikale bu mukenji mufunda wa kashidi buenu nuenu mu bipungu bienu bionso.

9 “Binuikala ne bua kuya ku mvita mu buloba buenu bua kuluangana ne mukokeshi mubi udi unutatshisha, nenuele lubila lua mvita ne mpungi,+ ne Yehowa Nzambi wenu neanuvuluke ne neanupandishe kudi bena lukuna benu.

10 “Nenuele kabidi mpungi pa milambu yenu ya kuosha+ ne pa milambu yenu ya diumvuangana+ mu bikondo bienu bia masanka,+ mmumue ne: mu bibilu bienu+ ne ku ntuadijilu kua ngondo yenu; mpungi eyi neyikale bu divuluija buenu nuenu kumpala kua Nzambi wenu. Meme ndi Yehowa Nzambi wenu.”+

11 Mpindieu mu tshidimu tshibidi, mu ngondo muibidi, mu dituku dia 20 dia ngondo au,+ ditutu diakajuka pa ntenta wa tshitendelelu+ wa Bujadiki. 12 Nunku bena Isalele bakatuadija kumbuka mu tshipela tshia Sinai bilondeshile mushindu uvuabu balongolole bua kuasabu luendu,+ ne ditutu diakimana mu tshipela tshia Palana.+ 13 Eu ke musangu wa kumpala uvuabu base luendu balonda dîyi divua Yehowa muambile Mose.+

14 Nunku tshisumbu tshia bisa bisatu bia mu tshitudilu tshia bana ba Yuda tshiakasa luendu kumpala bilondeshile bisumbu biabu,* ne Nashona+ muana wa Aminadaba ke uvua ku mutu kua tshisumbu atshi. 15 Ku mutu kua tshisumbu tshia bana ba Yisakâ kuvua Netanele+ muana wa Suâ. 16 Ku mutu kua tshisumbu tshia bana ba Zebulona kuvua Eliaba+ muana wa Helona.

17 Pavuabu batulakaje ntenta wa tshitendelelu,+ bana ba balume ba Gêshona+ ne bana ba balume ba Melali+ bavua bambula ntenta wa tshitendelelu bakasa luendu.

18 Pashishe tshisumbu tshia bisa bisatu tshia mu tshitudilu tshia Lubena tshiakasa luendu bilondeshile bisumbu biabu,* ne Elisû+ muana wa Shedeu uvua ku mutu kua tshisumbu atshi. 19 Ku mutu kua tshisumbu tshia tshisa tshia bana ba Simeona kuvua Shelumiele+ muana wa Sulishadai. 20 Ku mutu kua tshisumbu tshia tshisa tshia bana ba Gada kuvua Eleyasafa+ muana wa Deuele.

21 Pashishe bena Kohata, bavua bambula bintu bia muaba munsantu,+ bakasa luendu. Ntenta wa tshitendelelu uvua ne bua kuikala mumana kuasa pavuabu bafika.

22 Pashishe tshisumbu tshia bisa bisatu bia mu tshitudilu tshia bana ba Efelayima tshiakasa luendu bilondeshile bisumbu biabu,* ne Elishama+ muana wa Amihuda ke uvua ku mutu kua tshisumbu atshi. 23 Ku mutu kua tshisumbu tshia tshisa tshia bana ba Manashe kuvua Gamaliele+ muana wa Pedasû. 24 Ku mutu kua tshisumbu tshia tshisa tshia bana ba Benyamina kuvua Abidana+ muana wa Gideoni.

25 Pashishe tshisumbu tshia bisa bisatu tshia mu tshitudilu tshia bana ba Dana tshiakasa luendu bilondeshile bisumbu biabu,* bikale bilama panyima pa bitudilu bionso, ne Ahiezê+ muana wa Amishadai ke uvua ku mutu kua tshisumbu atshi. 26 Ku mutu kua tshisumbu tshia tshisa tshia bana ba Ashê kuvua Pagiele+ muana wa Okelana. 27 Ku mutu kua tshisumbu tshia tshisa tshia bana ba Nafatale kuvua Ahila+ muana wa Enana. 28 Eu ke mushindu uvuabu balongolole bua kuasa luendu uvua bena Isalele ne bisumbu biabu* balonda pavuabu basa luendu.+

29 Pashishe Mose wakambila Hobaba, muana wa Luele*+ muena Midiyana tatuende muenu wa Mose ne: “Tukadi tuya muaba uvua Yehowa muambe ne: ‘Nennupeshawu.’+ Luaku tuye koku;+ netukuenzele malu mimpe bualu Yehowa mmulaye Isalele malu mimpe.”+ 30 Kadi yeye wakamuambila ne: “Tshiakuya to. Nempingane mu ditunga dietu kudi balela banyi.” 31 Ke yeye kuamba ne: “Ndi nkulomba ne: kutushiyi to, bualu wewe udi mumanye miaba itudi mua kutudila mu tshipela ne udi mua kuikala muludiki wetu.* 32 Wewe muye netu,+ malu mimpe onso atuenzela Yehowa netukuenzelawu pebe bushuwa.”

33 Nunku bakatuadija luendu lua matuku asatu bumbukila ku mukuna wa Yehowa,+ ne mushete+ wa tshipungidi tshia Yehowa wakaya kumpala kuabu mu luendu lua matuku asatu elu bua kubakebela muaba wa kuikishila.+ 34 Ditutu dia Yehowa+ divua pa mutu pabu mu munya pavuabu bumbuka mu tshitudilu.

35 Dîba dionso divuabu baya ne mushete, Mose uvua wamba ne: “Yehowa wetu, juka,+ bena lukuna bebe batangalajibue, ne bantu badi bakukine banyeme kumpala kuebe.” 36 Pavuabu batula mushete, Mose uvua wamba ne: “Yehowa wetu, pingana kudi binunu bia Isalele bidi bungi kabuyi kubala.”*+

11 Mpindieu bantu bakatuadija kudiabakena bikole kumpala kua Yehowa. Pakumvua Yehowa bualu ebu, tshiji tshiende tshiakatema, ne kapia ka kudi Yehowa kakatuadija kubatemena ne kuosha bamue kumpenga kua tshitudilu. 2 Pakatuadija bantu kudidila Mose, yeye wakasengelela Yehowa,+ kapia kujimaku. 3 Nunku bakinyika muaba au ne: Tabela,* bualu kapia ka kudi Yehowa kakabatemena.+

4 Musumba wa bantu bakuabu*+ uvua munkatshi muabu wakabanga kuleja dijinga dia budinangi,+ ne bena Isalele pabu bakabanga kudila kabidi bamba ne: “Nnganyi watupesha munyinyi bua tuetu kudia?+ 5 Kaa! Tudi tuvuluka mishipa ituvua tudia tshianana mu Ejipitu ne tuyijinga, kabidi ne konkombre, pasteke, matungulu a puaro, matungulu a tshianana ne matungulu a ayi!+ 6 Kadi mpindieu tuetu* tukadi tuletela. Katuena tumona tshintu tshikuabu anu mana aa.”+

7 Mpindieu mana+ avua bu ntete ya koriandre,+ ne avua amueneka bu budimbu bua bedeliume. 8 Bantu bavua bamuangalaka, baangula ne baapela ne mabue a mpelu anyi baatua mu tshinu. Pashishe bavua baalamba mu ngesu anyi baenza mampa a bijengu,+ ne mukana avua bu mukata mushême muela mafuta. 9 Pavua lumuma lupueka mu tshitudilu butuku, mana pawu avua apueka.+

10 Mose wakumvua bantu badila, mu dîku ne mu dîku, muntu yonso ku tshibuelelu tshia ntenta wende. Yehowa wakumvua tshiji tshikole,+ ne Mose pende wakanyingalala bikole. 11 Nunku Mose wakambila Yehowa ne: “Udi mukengeshe muena mudimu webe bua tshinyi? Bua tshinyi tshiena muanyishibue ku mêsu kuebe bua muudi muteke bujitu bua bantu bonso aba pambidi panyi?+ 12 Meme ke uvua muimite bantu bonso aba anyi? Meme ke uvua mubalele, bua wewe kungambila ne: ‘Bambula mu tshiadi tshiebe, anu mutu mulami* wambula muana utshidi wamua,’ bua kuya nabu mu buloba buuvua muditshipe bua kupesha bankambua babu anyi?+ 13 Nempete munyinyi wa kupesha bantu bonso aba penyi? Bualu badi batungunuka ne kudila kumpala kuanyi, bamba ne: ‘Tupesha munyinyi bua tuetu kudia!’ 14 Tshiena mua kuambula bantu bonso aba nkayanyi to; mbampite makanda.+ 15 Bikalabi ne: eu ke mushindu uwangenzela malu, ndi nkulomba bua unshipe anu mpindieu.+ Bingikala muanyishibue ku mêsu kuebe, enza bua tshimonyi dikenga dikuabu kabidi to.”

16 Yehowa wakandamuna Mose ne: “Nsangishila bantu balume 70 ba munkatshi mua bakulu ba mu Isalele, bantu baudi mumanye ne:* mbakulu ne bamfumu ba bantu;+ ulue nabu ku ntenta wa kusambakena, wimane nabu muaba au. 17 Nempueke,+ ne nengakule nebe muaba au,+ nengangate ndambu wa nyuma+ udi pambidi pebe, nemmuteke pambidi pabu, ne bobu nebakuambuluishe bua kuambula bujitu bua bantu aba bua kubuambudi nkayebe to.+ 18 Newambile bantu ne: ‘Nudijidile bua malaba,+ bualu nenudie munyinyi bushuwa bua munuvua badile Yehowa mumvue,+ bambe ne: “Nnganyi watupesha munyinyi bua tuetu kudia? Mu Ejipitu tuvua bimpe be!”+ Bushuwa, Yehowa neanupeshe munyinyi, ne nenudie.+ 19 Kanuakuwudia anu dituku dimue, anyi matuku abidi, anyi matuku atanu, anyi matuku dikumi, anyi matuku 20 to, 20 kadi nenuwudie ngondo mujima, too ne padiwu unupatukila mu mawulu ne unutonda,+ bualu nuvua babenge Yehowa udi munkatshi muenu, ne nuvua nudila kumpala kuende, nuamba ne: “Bua tshinyi tuvua bumbuke mu Ejipitu?”’”+

21 Ke Mose kuamba ne: “Tshisamba tshindi tshidi ne bantu balume binunu 600+ badi benda lua makasa, kadi wewe nkayebe udi muambe ne: ‘Nembapeshe munyinyi mukumbane bua kudiabu ngondo mujima’! 22 Nansha bashipe mikoko yonso ne ngombe yonso, nebibakumbane anyi? Peshi bobu bakuate mishipa yonso ya mu mbuu, neyibakumbane anyi?”

23 Nunku Yehowa wakambila Mose ne: “Tshianza tshia Yehowa ntshîpi bikole anyi?+ Mpindieu neumone bikala tshindi muambe ni tshiakumbana anyi katshiakukumbana.”

24 Ke Mose kupatuka, kuambilaye bantu mêyi a Yehowa. Yeye kusangisha bantu balume 70 ba munkatshi mua bakulu ba mu tshisamba, yeye kubimanyika banyunguluke ntenta.+ 25 Pashishe Yehowa wakapueka mu ditutu,+ kuakulaye nende,+ kuangataye ndambu wa nyuma+ uvuaye nende, kumupeshaye yonso wa ku bakulu 70. Diakamue pakabatulukila nyuma, bakatuadija kuenza malu bu baprofete,*+ kadi kabakenza kabidi nanku to.

26 Kuvua bantu babidi ba mu bantu abu batshivua mu tshitudilu. Mêna abu avua Eladada ne Medada. Nyuma wakabanga kubatulukila bu muvuabu munkatshi mua bantu bavuabu bafunde mêna, kadi kabavua baye ku ntenta to. Nunku bakatuadija kuenza malu mu tshitudilu bu baprofete. 27 Ke nsongalume mukuabu kuyaye lubilu, kuambilaye Mose ne: “Eladada ne Medada badi benza malu mu tshitudilu bu baprofete!” 28 Ke Yoshua+ muana wa Nuna, muambuluishi wa Mose katshia ku bunsonga buende, kuambaye ne: “Mukalenge wanyi Mose, bakandika!”+ 29 Kadi Mose wakamuambila ne: “Udi umvua mukawu bua bualu buanyi anyi? Tòo, meme ndi njinga bua bantu ba Yehowa bonso bikale baprofete, ne bua Yehowa abapeshe nyuma wende!” 30 Pashishe Mose wakapingana mu tshitudilu pamue ne bakulu ba mu Isalele.

31 Pashishe lupepele luakafuma kudi Yehowa, kutuadijalu kusaka nyunyi ya tulumbu lumbuka nayi ku mbuu, luyikulula kumpenga kua tshitudilu,+ mutantshi bu wa luendu lua dituku dijima ku luseke lumue ne mutantshi wa luendu lua dituku dimue ku luseke lukuabu, kumpenga kuonso kua tshitudilu, ne ivua mikunguija panshi mushiki bule bua nkubita* ibidi. 32 Nunku dituku adi dijima ne butuku bujima ne dituku diakalonda dijima bantu bakatshisha bakuata nyunyi ya tulumbu. Kakuvua muntu uvua mukuate nyunyi mishadile ku bipiminu bia homer* dikumi, ne bavua bayadija kumpenga kuonso kua tshitudilu. 33 Kadi patshivuabu ne munyinyi ku mênu, kabayi banji kuwutshiankunya, tshiji tshia Yehowa tshiakatemena bantu, ne Yehowa wakatuadija kushipa bantu dishipa dia dikema menemene.+

34 Nunku bakinyika muaba au ne: Kibelota-hatawa,*+ bualu bakajiikapu bantu bavua baleje dijinga dia budinangi.+ 35 Bantu bakumbuka ku Kibelota-hatawa batangile ku Haselota, ne bakashala ku Haselota.+

12 Mpindieu Mîyama ne Alona bakatuadija kuakula bibi bua Mose bualu bua mukaji muena Kushi uvuaye musele, bualu uvua muangate mukaji muena Kushi.+ 2 Bavua bamba ne: “Yehowa mmuakuile anu mukana mua Mose nkayende anyi? Ki mmuakule kabidi ku butuangaji buetu anyi?”+ Yehowa pende uvua uteleja.+ 3 Kadi muntu eu Mose uvua muena bupuekele kupita bantu bonso*+ bavua pa buloba.

4 Yehowa wakambila Mose ne Alona ne Mîyama diakamue ne: “Patukayi, nuenu bonso basatu, nuye ku ntenta wa kusambakena.” Nunku bakapatuka bonso basatu. 5 Pashishe Yehowa wakapueka mu dikunji dia ditutu,+ kuimanaye ku tshibuelelu tshia ntenta, yeye kubikila Alona ne Mîyama. Bonso babidi kusemenabu. 6 Ke yeye kuamba ne: “Ndi nnulomba bua nuteleje mêyi anyi. Bu muprofete wa Yehowa muikale munkatshi muenu, mvua mua kudimanyisha kudiye mu tshikena kumona+ ne mvua mua kuakula nende mu tshilota.+ 7 Kadi kabiena nanku bua muena mudimu wanyi Mose to! Yeye udi ne nzubu wanyi mujima mu bianza biende.*+ 8 Ndi ngakula nende mpala ne mpala,*+ ngakula nende patoke, kabiyi mu nsumuinu; ne yeye udi umona tshimuenekelu tshia Yehowa. Nunku bua tshinyi kanuvua batshine bua kuakula bibi bua muena mudimu wanyi, kuakula bibi bua Mose?”

9 Nunku tshiji tshia Yehowa tshiakabatemena, yeye kumbuka kudibu. 10 Ditutu diakumbuka pa mutu pa ntenta, ne monayi! Mîyama wakakuatshika disama dia nsudi mitoke tòò anu bu neje.+ Pashishe Alona wakakudimuka kudi Mîyama, kumonaye ne: uvua mukuatshike disama dia nsudi.+ 11 Alona wakambila Mose diakamue ne: “Ndi nkulomba, mukalenge wanyi, bua luse kutulaminyi mpekatu eu to! Bua tshitudi benze, tudi benze malu anu bu bapote. 12 Bua luse, kumulekedi bua ashale bu muntu mufue udi mubidi mubole ndambu padibu bamulele!” 13 Mose wakatuadija kudila kudi Yehowa, wamba ne: “Nzambi wanyi, muondopa koku bua luse!”+

14 Yehowa wakandamuna Mose ne: “Bu tatuende yeye mumutuile mate mu mpala, kavua mua kuikala mufuishibue bundu matuku muanda mutekete anyi? Bamuteke muaba wa nkayende pambelu pa tshitudilu bua matuku muanda mutekete,+ pashishe badi mua kumupingajamu.” 15 Nunku bakateka Mîyama muaba wa nkayende pambelu pa tshitudilu bua matuku muanda mutekete,+ ne bantu kabakasa luendu too ne pakapingajabu Mîyama mu tshitudilu. 16 Pashishe bantu bakumbuka ku Haselota,+ kutuadijabu kutudila mu tshipela tshia Palana.+

13 Pashishe Yehowa wakakula ne Mose, wamba ne: 2 “Tuma bantu bua batentekele* buloba bua Kanâna bundi mpesha bena Isalele. Udi ne bua kutuma muntu umue wa mu tshisa tshionso tshia bankambua babu, yonso wa kudibu muikale mfumu+ munkatshi muabu.”+

3 Nunku Mose wakabatuma kumbukila mu tshipela tshia Palana+ bilondeshile dîyi dia Yehowa. Bantu bonso abu bavua bamfumu ba bena Isalele. 4 Aa mmêna abu: mu tshisa tshia Lubena, Shamua muana wa Zakû; 5 mu tshisa tshia Simeona, Shafata muana wa Holi; 6 mu tshisa tshia Yuda, Kaleba+ muana wa Yefune; 7 mu tshisa tshia Yisakâ, Igala muana wa Jozefe; 8 mu tshisa tshia Efelayima, Hoshea+ muana wa Nuna; 9 mu tshisa tshia Benyamina, Palati muana wa Lafu; 10 mu tshisa tshia Zebulona, Gadadiele muana wa Sodi; 11 mu tshisa tshia Jozefe,+ bua tshisa tshia Manashe,+ Gadi muana wa Susi; 12 mu tshisa tshia Dana, Amiele muana wa Gemali; 13 mu tshisa tshia Ashê, Setû muana wa Mikaele; 14 mu tshisa tshia Nafatale, Nabi muana wa Wofesi; 15 mu tshisa tshia Gada, Gewele muana wa Maki. 16 Aa mmêna a bantu bavua Mose mutume bua kutentekela buloba. Pashishe Mose wakapesha Hoshea muana wa Nuna dîna dia Yoshua.*+

17 Pavua Mose mubatume bua kutentekela buloba bua Kanâna, wakabambila ne: “Nubande kuntu aku, ku Negebe, pashishe nubande ku buloba bua mikuna.+ 18 Nudi ne bua kutangila mudi buloba+ ne bikala bantu badi basombamu bikale ne bukole anyi kabayi ne bukole, bikalabu bakese anyi ba bungi, 19 ne bikala buloba buimpe anyi bubi ne bikala bimenga bidibu basombele bikale bitudilu anyi bikale ne ngumbu. 20 Nutangile kabidi bikala buloba budi ne bufuke* anyi buatuke,*+ ne bikalamu mudi mitshi anyi kayenamu. Nudi ne bua kuikala ne dikima+ ne kuangata ndambu wa bimuma bia mu buloba abu.” Dîba adi tuvua tshikondo tshitu tumuma tua mvinyo tua kumpala tuboba.+

21 Nunku bakabanda, kutentekelabu buloba, kumbukila ku tshipela tshia Sine,+ kupitshila mu Lehoba+ too ne ku Lebo-hamate.*+ 22 Pakabandabu ku Negebe, bakafika ku Hebelone+ kuvua Ahimana, Sheshai ne Talemai+ bena Anaka+ basombele. Mpindieu bavua bibake Hebelone bidimu muanda mutekete kumpala kua Soana wa mu Ejipitu. 23 Pakafikabu mu Tshibandabanda* tshia Eshekola,+ bakakosa ditamba dikale ne tshisumbu tshia tumuma tua mvinyo, divua bantu babidi ba kudibu ne bua kuambuila ku mutshi; kuambulabu kabidi ndambu wa bimuma bia grenade ne bia mfigi.+ 24 Bakabikila muaba au ne: Tshibandabanda* tshia Eshekola*+ bua tshisumbu tshia tumuma tua mvinyo tshivua bena Isalele bakose muaba au.

25 Ku ndekelu kua matuku 40,+ bakalukila bafuma ku ditentekela buloba. 26 Nunku bakapingana kudi Mose ne Alona ne tshisumbu tshijima tshia bena Isalele mu tshipela tshia Palana, ku Kadeshe.+ Bakalondela tshisumbu tshijima malu avuabu bamone, kubalejabu bimuma bia mu buloba abu. 27 Bakalondela Mose ne: “Tuvua babuele mu buloba buuvua mututume; bushuwa mbuloba budi ne mabele ne buitshi bia bungi;+ tangila bimuma bia muomu.+ 28 Kadi bantu badi basombe mu buloba abu badi ne bukole bua bungi, ne bimenga biabu bikolesha mbinene be! Tuvua bamonamu kabidi bena Anaka.+ 29 Bena Amaleka+ mbasombele mu buloba bua Negebe,+ bena Hiti, bena Yebuse,+ ne bena Amole+ mbasombele mu buloba bua mikuna, ne bena Kanâna+ bobu mbasombele kumpenga kua mbuu+ ne ku muelelu kua musulu wa Yadene.”

30 Nunku Kaleba wakateta kutukija bantu pavuabu bimane kumpala kua Mose, kuambaye ne: “Tubandayi mpindieu, tuetu netukuate buloba abu, bualu tudi mua kubunyenga bushuwa.”+ 31 Kadi bantu bavua babande nende bakamba ne: “Katuena mua kubanda bua kuluangana ne bantu abu to, bualu mbatupite bukole.”+ 32 Bakatungunuka ne kuambila bena Isalele lumu lubi+ bua buloba buvuabu baye kutentekela bamba ne: “Buloba butuvua baye kutentekela mbuloba budi budia bantu badi basombamu, ne bantu bonso batuvua bamonamu mbantu banene bale ba mfiondo.+ 33 Tuvua bamonamu Banefilima, bana ba Anaka,+ badi bafumine kudi* Banefilima, patuvua tudifuanyikija nabu, tuvua tudimona anu bu mpasu ne tumueneka kabidi bu mpasu ku mêsu kuabu.”

14 Nunku tshisumbu tshijima tshiakabandisha dîyi, bantu bonso bakatungunuka ne kuela mbila, badila butuku abu bujima.+ 2 Bena Isalele bonso bakatuadija kunungana bua Mose ne Alona,+ ne tshisumbu tshijima tshiakakula bibi bua bualu buabu, tshiamba ne: “Tuvua mua kuikala nansha bafuile mu buloba bua Ejipitu, anyi bafuile nansha mu tshipela emu! 3 Bua tshinyi Yehowa mmulue netu mu buloba ebu bua tuetu kufua ku muele wa mvita?+ Nebakuate bakaji betu ne bana betu.+ Ki mbimpe bua tuetu kupingana mu Ejipitu anyi?”+ 4 Bavua mene bambilangana ne: “Tusungulayi mulombodi, tupingane mu Ejipitu!”+

5 Bua bualu ebu Mose ne Alona bakatua mpala yabu panshi kumpala kua tshisumbu tshijima tshia bena Isalele tshivua tshidisangishe. 6 Yoshua+ muana wa Nuna ne Kaleba+ muana wa Yefune, bavua munkatshi mua bantu bavua baye kutentekela buloba abu, bakadipanda bilamba, 7 bobu kuambila tshisumbu tshijima tshia bena Isalele ne: “Buloba butuvua baye kutentekela abu mbuimpe, buimpe butambe.+ 8 Yehowa yeye mutuanyishe, kakuyi mpata neatubueje mu buloba abu ne neatupeshabu, mbuloba budi ne mabele ne buitshi bia bungi.+ 9 Kadi kanuena ne bua kutombokela Yehowa to, ne kanuena ne bua kutshina bantu ba mu buloba abu+ bualu netubabutule.* Bukubi buabu bukadi bumbushibue, ne Yehowa udi netu.+ Kanubatshinyi to.”

10 Kadi tshisumbu tshijima tshiakamba bua kubasa mabue.+ Butumbi bua Yehowa buakamueneka kudi bena Isalele bonso pa ntenta wa kusambakena.+

11 Pashishe Yehowa wakambila Mose ne: “Bantu aba nebatungunuke ne kumpetula too ne dîba kayi?+ Nebabenge kungitabuja too ne dîba kayi nansha mundi muenze bimanyinu bionso ebi munkatshi muabu?+ 12 Lekela mbatumine tshipupu ne mbabutule, nkuvuije wewe tshisamba tshinene ne tshia bukole kubapita bobu.”+

13 Kadi Mose kuambilaye Yehowa ne: “Dîba adi lumu elu nelufike mu bena Ejipitu+ muuvua mumbushe tshisamba etshi ku bukole buebe, 14 ne nebambile bena mu buloba ebu lumu elu. Bantu aba kabidi bakadi bumvue ne: wewe Yehowa, udi munkatshi mua tshisamba etshi,+ ubamuenekela mpala ne mpala.+ Wewe udi Yehowa, ne ditutu diebe ndimane pa mutu pabu, udi wenda kumpala kuabu mu munya mu dikunji dia ditutu ne butuku mu dikunji dia kapia.+ 15 Wewe mushipe tshisamba etshi musangu umue,* bisamba bidi biumvue lumu luebe bidi mua kuamba ne: 16 ‘Yehowa kavua mukumbane bua kufikisha tshisamba etshi mu buloba buvuaye muditshipe bua kubapesha, ke bualu kayi mmubashipele mu tshipela.’+ 17 Kadi Yehowa, leja koku bukole buebe bunene anu muuvua mulaye pauvua muambe ne: 18 ‘Yehowa, kena ukuata tshiji lubilu, mmuwule tente ne dinanga dia lulamatu,*+ udi ubuikila tshilema ne dishipa dia mikenji, kadi mu mushindu nansha umue kena mua kupanga kunyoka muntu udi mupile, udi ufila dinyoka bua tshilema tshia batatu kudi bana, kudi bantu ba mu tshipungu tshisatu ne kudi bantu ba mu tshipungu tshinayi.’+ 19 Buikila koku tshilema tshia tshisamba etshi bilondeshile dinanga diebe dia lulamatu dia bungi, anu muuvua mubuikidile tshisamba etshi kumbukila mu Ejipitu too ne mpindieu.”+

20 Ke Yehowa kuamba ne: “Ndi mbabuikidila bilondeshile dîyi diebe.+ 21 Kadi ku luseke lukuabu, bulelela, bu mundi meme ne muoyo, buloba bujima nebuwule ne butumbi bua Yehowa.+ 22 Kadi muntu nansha umue wa ku bavua bamone butumbi buanyi ne bimanyinu bianyi+ bimvua muenze mu Ejipitu ne mu tshipela kadi udi mutungunuke ne kunteta+ misangu dikumi eyi, ne kayi muteleje dîyi dianyi,+ 23 kakumona buloba bumvua muditshipe bua kupesha batatuabu nansha kakese. Muntu nansha umue wa ku bavua bampetule kakubumona to, nansha kakese.+ 24 Kadi bu muvua muena mudimu wanyi Kaleba+ muikale ne meji mashilangane ne a bakuabu ne mutungunuke ne kundonda ne muoyo mujima, kakuyi mpata nemmubueje mu buloba buvuaye muye, ne bana bende nebabupiane.+ 25 Bu mudi bena Amaleka ne bena Kanâna+ basombe mu tshibandabanda* etshi, malaba nudi ne bua kukudimuka, kuya batangile mu tshipela mu njila wa ku Mbuu Mukunze.”+

26 Pashishe Yehowa wakambila Mose ne Alona ne: 27 “Tshisumbu tshibi etshi netshitungunuke ne kunungana bua bualu buanyi too ne dîba kayi?+ Ndi mumvue malu adi bena Isalele banungana bua bualu buanyi.+ 28 Ubambile ne: ‘Yehowa udi wamba ne: “Bulelela, bu mundi meme ne muoyo, nennuenzele anu malu andi mumvue nuamba!+ 29 Bitalu bienu nebishadile mu tshipela emu,+ bushuwa, bungi buenu buonso kubangila ku bantu ba bidimu 20 kubanda bavuabu bafunde mêna, bantu bonso ba kunudi bavua banungane bua bualu buanyi.+ 30 Muntu nansha umue wa kunudi kakubuela mu buloba bumvua muditshipe* bua kunuteka,+ pa kumbusha Kaleba muana wa Yefune ne Yoshua muana wa Nuna.+

31 “‘“Nembuejamu bana benu banuvua bambe ne: nebabakuate,+ ne bobu nebamanye buloba bunudi nuenu babenge.+ 32 Kadi bitalu bienu nuenu nebishadile mu tshipela emu. 33 Nunku bana benu nebalue balami ba mikoko mu tshipela bidimu 40,+ ne nebapete difutu dia bienzedi bienu bia dipanga lulamatu,* too ne padi tshitalu tshia muntu wa ndekelu wa kunudi tshishadila mu tshipela emu.+ 34 Bilondeshile bungi bua matuku anuvua batentekele buloba, matuku 40,+ dituku dimue bua tshidimu tshimue, dituku dimue bua tshidimu tshimue, nenupete difutu dia bilema bienu bidimu 40,+ bua numanye tshidi kuntombokela* kumvuija.

35 “‘“Meme Yehowa ke udi muakule. Aa ke malu angenzela tshisumbu tshibi tshionso etshi, bonso bavua badisangishe bua kuntombokela: Nebajikile mu tshipela emu ne nebafuile muaba eu.+ 36 Bantu bavua Mose mutume bua kutentekela buloba, bavua bafikishe tshisumbu tshijima ku dinungana bua bualu buende pavuabu balue ne lumu lubi bua buloba abu,+ 37 bulelela, bantu bavua balue ne lumu lubi bua buloba abu nebakumibue ne nebafue kumpala kua Yehowa.+ 38 Kadi Yoshua muana wa Nuna ne Kaleba muana wa Yefune, bavua munkatshi mua bantu bavua baye kutentekela buloba abu, bobu nebashale ne muoyo kakuyi mpata.”’”+

39 Pavua Mose muambile bena Isalele bonso mêyi aa, bantu bakabanga kudila bikole menemene. 40 Kabidi, bakajuka mu dinda menemene, kukebabu bua kubanda ku lusongo lua mukuna, bamba ne: “Ntuetu aba badilongolole bua kubanda muaba uvua Yehowa muambe, bualu tudi benze mpekatu.”+ 41 Kadi Mose wakamba ne: “Bua tshinyi nudi nubenga dîyi dia Yehowa? Bualu ebu kabuakukumbana to. 42 Kanubandi to, bualu Yehowa kena munkatshi muenu; ne bena lukuna benu nebanutshimune.+ 43 Bualu bena Amaleka ne bena Kanâna mbanuindile kuntu aku,+ ne nenufue ku muele wa mvita. Bualu nudi babenge kulonda Yehowa, ne Yehowa kakuikala nenu to.”+

44 Nansha nanku bakaya lua ku lusongo lua mukuna mu dikamakama,+ kadi mushete wa tshipungidi tshia Yehowa ne Mose kabiakapatuka munkatshi mua tshitudilu to.+ 45 Nunku bena Amaleka ne bena Kanâna bavua basombela ku mukuna au bakapueka, kubaluishabu, bobu kubatangalaja too ne ku Hôma.+

15 Yehowa wakakula kabidi ne Mose, wamba ne: 2 “Akula ne bena Isalele, ubambile ne: ‘Ndekelu wa bionso panuabuela mu buloba bundi nnupesha bua nuenu kusombelamu+ 3 ne panuapesha Yehowa mulambu wa kuosha pa kapia muangata mu ngombe anyi mu mikoko, nansha wowu muikale mulambu wa kuosha+ anyi mulambu bua kukumbaja mutshipu wa pa buawu anyi mulambu wa budisuile+ anyi mulambu kampanda wa mu bikondo bia bibilu bienu bia ku tshidimu+ bua kununkishila Yehowa dipembu dimpe,*+ 4 muntu udi ufila mulambu wende udi kabidi ne bua kutuadila Yehowa mulambu wa ntete wa bukula bunefuke,+ tshia dikumi tshia efa,* busambakaja ne tshia binayi tshia hine* wa mafuta. 5 Nudi ne bua kufila kabidi tshia binayi tshia hine wa mvinyo bu mulambu wa bia kunua pamue ne mulambu wa kuosha+ anyi bua mulambu wa muana wa mukoko yonso wa mpanga. 6 Bua tshimpanga tshia mukoko nudi ne bua kufila bia dikumi bibidi bia tshipiminu tshia efa bia bukula bunefuke busambakaja ne tshia bisatu tshia hine wa mafuta bu mulambu wa ntete. 7 Nudi ne bua kufila kabidi tshia bisatu tshia hine wa mvinyo bu mulambu wa bia kunua, bu dipembu dimpe* kudi Yehowa.

8 “‘Kadi nuenu ne bua kulambula Yehowa+ ngombe mulume bu mulambu wa kuosha+ anyi nulambula mulambu kampanda bua kukumbaja mutshipu wa pa buawu+ anyi milambu ya diumvuangana, 9 nudi ne bua kufila kabidi bia dikumi bisatu bia tshipiminu tshia efa bia bukula bunefuke busambakaja ne tshia bibidi tshia hine wa mafuta bu mulambu wa ntete,+ pamue ne ngombe mulume au. 10 Nudi ne bua kufila kabidi tshia bibidi tshia hine wa mvinyo bua mulambu wa bia kunua,+ bu mulambu muosha pa kapia, bu dipembu dimpe* kudi Yehowa. 11 Nudi ne bua kuenza nunku bua ngombe mulume yonso anyi bua tshimpanga tshia mukoko tshionso anyi bua muana wa mukoko yonso wa mpanga anyi bua mbuji yonso. 12 Nansha bintu binudi nulambula bikale bungi kayi, nudi ne bua kuenza nunku bua tshintu tshionso, bilondeshile bungi buabi. 13 Mushindu eu ke udi muena Isalele yonso wa ku tshilelelu ne bua kufila mulambu muosha pa kapia, bu dipembu dimpe* kudi Yehowa.

14 “‘Bikala muntu wa ku babende udi musombe nenu anyi eu udi musombe munkatshi muenu kukadi bidimu bia bungi menemene ne bua kufila mulambu muosha pa kapia, bu dipembu dimpe* kudi Yehowa, udi ne bua kuenza anu munudi nuenza.+ 15 Nuenu bena mu tshisumbu ne muntu wa ku babende udi musombe nenu nenuikale ne mukenji mufunda wa muomumue. Newikale mukenji mufunda wa kashidi bua bipungu bienu bionso. Muntu udi musombe buenyi neikale mumue nenu kumpala kua Yehowa.+ 16 Nekuikale mukenji wa muomumue ne dipangadika dia muomumue buenu nuenu ne bua muntu wa ku babende udi musombe munkatshi muenu.’”

17 Yehowa wakatungunuka ne kuambila Mose ne: 18 “Akula ne bena Isalele, ubambile ne: ‘Panuabuela mu buloba mundi nya nenu 19 ne panuadia biakudia* kayi bionso bia mu buloba abu,+ nudi ne bua kupesha Yehowa mulambu. 20 Nudi ne bua kufila mulambu wa bukula bua nsekenseke bua kumpala bua ku bintu bienu bia kumpala bia pa madimi+ bu mampa menza bu bikata. Nenubifile mutubu bafila mulambu wa bintu bidi bifuma muaba wa tshishipuidi. 21 Nudi ne bua kupesha Yehowa ndambu wa bukula bua nsekenseke bua kumpala bua ku bintu bienu bia kumpala bia pa madimi bu mulambu mu bipungu bienu bionso.

22 “‘Kadi nuenu benze tshilema, bapangile bua kutumikila mêyi onso adi Yehowa muambile Mose, 23 mêyi onso adi Yehowa munutumine dîyi ku butuangaji bua Mose bua kuenza kubangila ku dituku divua Yehowa mutume dîyi too ne bua bipungu bienu bionso, 24 ne bikalatshi tshienza ku mpukapuka ne tshisumbu katshiyi tshimanye, tshisumbu tshijima tshidi ne bua kulambula muana mulume wa ngombe bu mulambu wa kuosha wa dipembu dimpe* kudi Yehowa, pamue ne mulambu wende wa ntete ne mulambu wende wa bia kunua bilondeshile mutubu benza pa tshibidilu,+ ne muana wa mbuji umue bu mulambu wa mpekatu.+ 25 Muakuidi neabuikidile tshisumbu tshijima tshia bena Isalele mpekatu, ne nebabafuile luse,+ bualu bavua benze tshilema, ne bavua bafile bu mulambu wabu, mulambu muosha pa kapia bua Yehowa ne mulambu wabu wa mpekatu kumpala kua Yehowa bua tshilema tshiabu. 26 Nebafuile tshisumbu tshijima tshia bena Isalele ne muntu wa ku babende udi musombe munkatshi muabu luse, bualu bantu bonso bavua benze tshilema etshi ku mpukapuka.

27 “‘Bikala muntu* muenze mpekatu ku mpukapuka, dîba adi udi ne bua kufila lukungulu lua mbuji lutshidi mu tshidimu tshialu tshia kumpala bua mulambu wa mpekatu.+ 28 Muakuidi neabuikile mpekatu ya muntu* uvua muenze tshilema pavuaye muenze mpekatu kumpala kua Yehowa ku mpukapuka bua babuikile mpekatu au, ne nebamufuile luse.+ 29 Bua muena Isalele wa ku tshilelelu ne muntu wa ku babende udi musombe munkatshi muabu, nekuikale mukenji wa muomumue buenu nuenu mu tshilumbu tshia dienza bualu kampanda kabiyi ku bukole.+

30 “‘Kadi bua muntu* udi wenza bualu kampanda ku bukole,+ nansha yeye muena Isalele wa ku tshilelelu anyi muntu musombe buenyi, udi upenda Yehowa; badi ne bua kumumbusha* munkatshi mua tshisamba tshiabu. 31 Bu mudi muntu au mupepeje dîyi dia Yehowa ne mushipe mukenji wende, badi ne bua kumbusha muntu* au kakuyi mpata.+ Tshilema tshiende tshidi pambidi pende.’”+

32 Pavua bena Isalele mu tshipela, bakasangana muntu mukuabu wangula nkunyi dituku dia Nsabatu.+ 33 Bantu bavua bamusangane wangula nkunyi bakalua nende kudi Mose ne Alona ne kudi tshisumbu tshijima. 34 Bakamulama,+ bualu kabavua banji kuleja tshivuabu ne bua kumuenzela to.

35 Nunku Yehowa wakambila Mose ne: “Muntu au udi ne bua kushipibua kakuyi mpata,+ ne tshisumbu tshijima netshimuase mabue pambelu pa tshitudilu.”+ 36 Nunku tshisumbu tshijima tshiakaya nende pambelu pa tshitudilu, kumuasabu mabue, yeye kufua, anu muvua Yehowa mutumine Mose dîyi bua kuenza.

37 Yehowa wakambila kabidi Mose bualu ebu ne: 38 “Akula ne bena Isalele, ubambile ne: badi ne bua kuenza nzembe ya manda manda kuinshi kua bilamba biabu mu bipungu biabu bionso ne nebatelele muonji wa dikala dia ble ku mutu kua luzembe lua manda manda ludi kuinshi kua tshilamba.+ 39 ‘Nudi ne bua kuikala ne luzembe lua manda manda elu bua nuikale nulumona ne nuvuluka mêyi onso a Yehowa ne nuatumikila.+ Kanuena ne bua kulonda mioyo yenu ne mêsu enu bidi binusaka bua kuenda bundumba bua mu nyuma.+ 40 Mukenji eu newunuambuluishe bua kuvuluka, ne nenutumikile mêyi anyi onso ne nenuikale ba tshijila kudi Nzambi wenu.+ 41 Meme ndi Yehowa Nzambi wenu, uvua munupatule mu buloba bua Ejipitu bua kuleja mundi meme Nzambi wenu.+ Meme ndi Yehowa Nzambi wenu.’”+

16 Pashishe Kola+ muana wa Yisehâ,+ muana wa Kohata+ muana wa Lewi,+ wakajuka pamue ne Datana ne Abilama, bana ba Eliaba,+ ne Ono muana wa Pelete, ba mu bana ba Lubena.+ 2 Bakajuka bua kuluisha Mose, bobu pamue ne bena Isalele 250, bamfumu ba tshisumbu, bantu basungula ba mu tshisumbu, bantu bende lumu. 3 Nunku bakadisanga bua kutombokela+ Mose ne Alona, kubambilabu ne: “Bienu biatutondi! Tshisumbu tshijima ntshia tshijila,+ buonso buabu, ne Yehowa udi munkatshi muabu.+ Nunku bua tshinyi nudi nudibandisha ku mutu kua tshisumbu tshia Yehowa?”

4 Pakumvua Mose bualu ebu, diakamue wakatua mpala wende panshi. 5 Pashishe wakambila Kola ne bena diende bonso ne: “Mu dinda Yehowa neamanyishe wende muntu,+ muntu udi wa tshijila, udi ne bua kusemena kudiye,+ ne muntu yonso wasungulaye+ neasemene kudiye. 6 Enzayi nunku: Wewe Kola ne bena diebe bonso,+ angatayi bintu bia kuambuila kapia,+ 7 malaba nuelamu kapia, nutekapu musenga wa manananshi kumpala kua Yehowa, ne muntu wikala Yehowa mua kusungula,+ yeye ngua tshijila. Nuenu bana ba Lewi+ nuapitshishi!”

8 Nunku Mose wakambila Kola ne: “Telejayi koku, nuenu bana ba Lewi. 9 Mbualu bukese ku mêsu kuenu padi Nzambi wa Isalele munutapulule ku tshisumbu tshia Isalele,+ munuanyishile bua kusemena kudiye bua kuenza mudimu ku ntenta wa tshitendelelu wa Yehowa ne kuimana kumpala kua tshisumbu bua kubenzela mudimu,+ 10 ne bua muvuaye mukusemeje wewe ne bana benu bonso, bana ba Lewi, pabuipi nende anyi? Nudi nukeba kuangata kabidi buakuidi anyi?+ 11 Bua bualu ebu, wewe ne bena diebe bonso badi badisangishe pamue nudi nuluisha Yehowa. Kadi Alona yeye nnganyi bua nuenu kunungana bua bualu buende?”+

12 Pashishe Mose wakabikidisha Datana ne Abilama+ bana ba Eliaba, kadi bobu bakamba ne: “Katuena tulua to! 13 Mbualu bukese paudi mutupatule mu buloba budi ne mabele ne buitshi bia bungi bua kutushipa mu tshipela emu anyi?+ Mpindieu udi ukeba kabidi kudivuija mfumu munene ku mutu kuetu anyi?* 14 Bushuwa, kuena mulue netu mu buloba budi ne mabele ne buitshi bia bungi+ anyi mutupeshe bumpianyi bua madimi ne madimi a tumuma tua mvinyo to. Udi musue kutubula mêsu a bantu abu anyi? Katuena tulua to!”

15 Nunku Mose wakapeta tshiji tshikole, yeye kuambila Yehowa ne: “Kutangidi mulambu wabu wa ntete nansha. Tshiena mubanyenge mpunda nansha umue, anyi muenzele umue wa kudibu bibi to.”+

16 Pashishe Mose kuambilaye Kola ne: “Malaba ulue wewe ne bena diebe bonso kumpala kua Yehowa, wewe, bobu ne Alona. 17 Muntu yonso angate tshintu tshiende tshia kuambuila kapia, elapu musenga wa manananshi, ne muntu yonso alue ne tshintu tshiende tshia kuambuila kapia kumpala kua Yehowa, bintu bia kuambuila kapia 250, ne wewe ne Alona, muntu yonso ne tshintu tshiende tshia kuambuila kapia.” 18 Nunku yonso wa kudibu wakangata tshintu tshiende tshia kuambuila kapia, bobu kuelapu kapia ne musenga wa manananshi, kuimanabu ku tshibuelelu tshia ntenta wa kusambakena pamue ne Mose ne Alona. 19 Pavua Kola musangishe bena diende+ pamue ku tshibuelelu tshia ntenta wa kusambakena bua kubaluisha, butumbi bua Yehowa buakamuenekela tshisumbu tshijima.+

20 Ke Yehowa kuambila Mose ne Alona ne: 21 “Umbukayi munkatshi mua tshisumbu etshi, bua mbabutule anu mpindieu.”+ 22 Bua bualu ebu bakatua mpala yabu panshi, kuambabu ne: “Wewe Nzambi, Nzambi wa bukole bua muoyo budi nabu bantu bonso,*+ mpekatu wa muntu umue udi mua kukufikisha ku dikuatshila tshisumbu tshijima tshiji anyi?”+

23 Pashishe Yehowa wakambila Mose ne: 24 “Akula ne tshisumbu, ubambile ne: ‘Umbukayi kumpenga kua ntenta wa Kola, wa Datana ne wa Abilama!’”+

25 Panyima pa bualu abu Mose wakajuka, kuyaye kudi Datana ne Abilama, ne bakulu+ ba mu Isalele bakaya nende. 26 Yeye kuambila bena mu tshisumbu ne: “Ndi nnulomba bua numbuke ku ntenta ya bantu babi aba, kanulengi tshintu tshiabu nansha tshimue, bua kanulu kujimijibua mu mpekatu wabu yonso.” 27 Diakamue bakumbuka ku nseke yonso ya ntenta wa Kola, wa Datana ne wa Abilama; Datana ne Abilama bakapatuka, kuimanabu ku tshibuelelu tshia ntenta yabu pamue ne bakaji babu, bana babu ba balume, ne bana babu batekete.

28 Ke Mose kuamba ne: “Ku diambuluisha dia bualu ebu nenumanye ne: Yehowa ke udi muntume bua kuenza malu onso aa, tshiena muenze mu meme nkayanyi* to: 29 Bantu aba bobu bafue lufu lutu bantu bonso bafua ne bobu bapete dinyoka dia buena ditu bantu bonso bapeta, nanku Yehowa ki mmuntume to.+ 30 Kadi Yehowa yeye mubenzele bualu bua dikema, ne buloba buobu bukanguke* bubamine bobu ne bintu biabu bionso, ne bobu bapueke mu Lukita* ne muoyo, nenumanye bushuwa ne: bantu aba bavua bapetule Yehowa.”

31 Diakamue pakajikijaye kuakula mêyi onso aa, buloba buakapanduluka muinshi mua makasa abu.+ 32 Nunku buloba kukangukabu,* kubamina bobu pamue ne ba mu nzubu yabu, ne bantu ba Kola bonso,+ ne bintu biabu bionso. 33 Nunku bobu ne bantu babu bonso bakapueka mu Lukita* ne muoyo, buloba kubabuikilabu, bobu kujimina munkatshi mua tshisumbu.+ 34 Bena Isalele bonso bavua babanyunguluke bakanyema bua mbila yabu, bualu bakamba ne: “Tudi tutshina bua buloba kabulu kutumina!” 35 Pashishe kapia kakafuma kudi Yehowa,+ kuoshaku bantu 250 bavua balambula musenga wa manananshi.+

36 Ke Yehowa kuambila Mose ne: 37 “Ambila Eleazâ muana wa muakuidi Alona bua umbushe bintu bia kuambuila kapia+ mu kapia, bualu mbia tshijila. Umuambile kabidi bua atangalaje kapia ntanta. 38 Bintu bia kuambuila kapia bia bantu bavua benze mpekatu bafike ku dijimija mioyo yabu* benze nabi bitata bipepele bia kulamika ku tshioshelu,+ bualu bavua balue nabi kumpala kua Yehowa, ne biakalua bia tshijila. Nebikale bu tshimanyinu kudi bena Isalele.”+ 39 Nunku muakuidi Eleazâ wakangata bintu bia kuambuila kapia bia tshiamu tshia mitaku bivua bantu bavuabu buoshe balue nabi, bobu kubibatalaja bua kubilamika ku tshioshelu, 40 anu muvua Yehowa mumuambile ku butuangaji bua Mose. Tshivua divuluija bua bena Isalele ne: muntu udibu kabayi banyishile* udi kayi wa mu bana ba Alona kena ne bua kulua bua kuosha musenga wa manananshi kumpala kua Yehowa to,+ ne bua muntu nansha umue kalu bu Kola ne bena diende.+

41 Anu dituku diakalonda adi, tshisumbu tshijima tshia bena Isalele tshiakabanga kunungana bua Mose ne Alona,+ tshiamba ne: “Nuenu babidi nudi bashipe bantu ba bende ba Yehowa.” 42 Pavua tshisumbu tshidisangishe pamue bua kutombokela Mose ne Alona, dîba adi bakakudimuka, kutangilabu ku ntenta wa kusambakena, ne monayi! ditutu diakamubuikila, ne butumbi bua Yehowa buakabanga kumueneka.+

43 Mose ne Alona bakaya kumpala kua ntenta wa kusambakena,+ 44 Yehowa kuambilaye Mose ne: 45 “Nuenu, umbukayi munkatshi mua tshisumbu etshi bua mbabutule anu mpindieu.”+ Bua bualu ebu bakatua mpala yabu panshi.+ 46 Pashishe Mose wakambila Alona ne: “Angata tshintu tshia kuambuila kapia, welamu kapia ka ku tshioshelu,+ welapu musenga wa manananshi ne uye lukasa kudi tshisumbu, ubabuikidile mpekatu,+ bualu tshiji ntshifume kudi Yehowa. Tshipupu ntshibangishe!” 47 Alona wakatshiangata diakamue, anu muvua Mose muambe, kubuelaye lubilu munkatshi mua tshisumbu, ne monayi! tshipupu tshikavua tshibange munkatshi mua tshisamba. Nunku wakela musenga wa manananshi mu tshintu tshia kuambuila kapia, kubangaye kubuikidila bantu mpekatu. 48 Wakashala muimane pankatshi pa bantu bavua bafue ne batshivua ne muoyo, ne ndekelu wa bionso tshipupu tshiakimana. 49 Bantu bavua bafue ku tshipupu atshi bavua 14 700, pa kumbusha aba bavua bafue bua bualu bua Kola. 50 Ndekelu wa bionso pavua Alona mupingane kudi Mose ku tshibuelelu tshia ntenta wa kusambakena, tshipupu tshikavua tshijike.

17 Mpindieu Yehowa kuambila Mose ne: 2 “Akula ne bena Isalele ne wangate kudibu dikombo dimue ku nzubu yonso wa batatuabu, kudi bamfumu ba nzubu yonso wa batatuabu,+ makombo onso masanga 12. Ufunde dîna dia muntu yonso pa dikombo diende. 3 Ufunde dîna dia Alona pa dikombo dia Lewi, bualu kudi dikombo dimue bua mfumu wa nzubu yonso wa batatuabu. 4 Uteke makombo au mu ntenta wa kusambakena kumpala kua Bujadiki,+ muaba untu nnumuenekela pa tshibidilu.+ 5 Dikombo dia muntu ungasungula+ nediele ntonga, ne nenjikije manunganyi a bena Isalele adibu banungana bua bualu buanyi,+ ne adibu kabidi banungana bua bualu buenu.”+

6 Nunku Mose wakakula ne bena Isalele, ne bamfumu babu bonso bakamupesha makombo, dikombo bua mfumu yonso wa nzubu wa batatuabu, makombo 12, ne dikombo dia Alona divua padi munkatshi mua makombo abu. 7 Pashishe Mose wakateka makombo au kumpala kua Yehowa mu ntenta wa Bujadiki.

8 Dituku diakalonda pavua Mose mubuele mu ntenta wa Bujadiki, monayi! dikombo dia Alona bua nzubu wa Lewi divua diele ntonga, dienda disampila, diela bilongo ne dikale ne tumuma tua amande tubobe. 9 Ke Mose kumbukaye ne makombo onso kumpala kua Yehowa, kuyaye nawu kudi bena Isalele bonso. Bakaatangila, muntu yonso kuangataye dikombo diende.

10 Pashishe Yehowa wakambila Mose ne: “Pingaja dikombo dia Alona+ kumpala kua Bujadiki bu tshintu tshia kulama bu tshimanyinu+ bua bana ba buntomboji,+ bua manunganyi abu adibu banungana bua bualu buanyi ajike ne bua kabafu to.” 11 Diakamue Mose wakenza anu muvua Yehowa mumutumine dîyi bua kuenza. Wakenza anu nanku.

12 Pashishe bena Isalele bakambila Mose ne: “Mpindieu netufue, netujimine bulelela, tuetu bonso netujimine! 13 Muntu yonso wasemena nansha pabuipi ne ntenta wa tshitendelelu wa Yehowa neafue!+ Tudi ne bua kufua tuetu bonso mushindu eu anyi?”+

18 Pashishe Yehowa wakambila Alona ne: “Wewe ne bana bebe ba balume ne nzubu wa batatuebe nenuambule bujitu bua tshilema tshionso tshidibu benza bua muaba munsantu,+ ne wewe ne bana bebe ba balume nenuambule bujitu bua tshilema tshionso tshidibu benza bua buakuidi buenu.+ 2 Usemeje kabidi bana benu ba balume ba mu tshisa tshia Lewi, tshisa tshia bakakuebe pabuipi, bua badisange kuudi ne bakuenzele wewe+ ne bana bebe ba balume mudimu kumpala kua ntenta wa Bujadiki.+ 3 Badi ne bua kukumbaja midimu idibu ne bua kukuenzela ne idi itangila ntenta mujima.+ Kadi kabena ne bua kusemena pabuipi ne bintu bia kuenza nabi mudimu bia muaba wa tshijila ne tshioshelu bua bobu ne wewe kanufu.+ 4 Nebadisange kuudi ne nebakumbaje majitu abu adi atangila ntenta wa kusambakena ne mudimu wonso wa ku ntenta, ne muntu udibu kabayi banyishile* kena mua kusemena pabuipi nenu to.+ 5 Nudi ne bua kukumbaja mudimu wenu udi utangila muaba wa tshijila+ ne tshioshelu,+ bua tshiji tshikuabu+ katshitemenyi tshisamba tshia Isalele. 6 Meme ndi muangate bana benu bena Lewi munkatshi mua bena Isalele bua kunupeshabu bu dipa.+ Mbantu bafila kudi Yehowa bua kukumbaja mudimu wa ku ntenta wa kusambakena.+ 7 Wewe ne bana bebe ba balume nudi ne bujitu bua kuenza midimu yenu ya buakuidi idi itangila tshioshelu ne bintu bidi panyima pa tshilamba tshia kukosolola natshi,+ ne nudi ne bua kuenza mudimu eu.+ Ndi munupeshe mudimu wa buakuidi bu dipa, ne muntu yonso udibu kabayi banyishile* udi usemena pabuipi badi ne bua kumushipa.”+

8 Yehowa wakambila kabidi Alona ne: “Meme ndi mukuteke bua kutangila bintu bionso bidibu bampesha.+ Ndi mukupeshe wewe ne bana bebe ba balume tshitupa tshia bintu bionso bia tshijila bidi bena Isalele bafila bu tshitupa tshikalabu bakupesha bua kashidi.+ 9 Mona tshitupa tshikala tshiebe mu milambu miosha pa kapia yonso idi mitambe tshijila: mulambu wonso udibu bafila, kusangisha ne milambu yabu ya ntete+ ne milambu yabu ya mpekatu+ ne milambu yabu ya dipila+ idibu balua nayi kundi. Ntshintu tshitambe tshijila buebe wewe ne bua bana bebe ba balume. 10 Udi mua kutshidiila muaba kampanda mutambe tshijila.+ Muntu mulume yonso udi mua kutshidia. Netshikale tshintu tshia tshijila kuudi.+ 11 Tshitupa etshi kabidi netshikale tshiebe: bintu bionso bidibu bafila+ pamue ne milambu yonso ya kukupakaja+ ya bena Isalele. Ndi mukupeshabi wewe ne bana bebe ba balume ne bana bebe ba bakaji bu tshitupa tshikalabu bakupesha bua kashidi.+ Muntu yonso udi mukezuke mu nzubu muebe udi mua kutshidia.+

12 “Mafuta onso a mimpe menemene ne mvinyo mupiamupia yonso wa muimpe menemene ne ntete, bintu biabu bia kumpala bia pa madimi,+ bidibu bapesha Yehowa, meme ndi nkupeshabi.+ 13 Bintu bidi bikola bia kumpala bia ku bintu bionso bia mu buloba buabu bialuabu nabi kudi Yehowa nebikale biebe.+ Muntu yonso udi mukezuke mu nzubu muebe udi mua kubidia.

14 “Tshintu tshionso tshidibu bajidila* mu Isalele netshikale tshiebe.+

15 “Muanabute yonso wa bintu bidi ne muoyo*+ wafilabu kudi Yehowa, nansha wa muntu anyi wa nyama, neikale webe. Kadi udi ne bua kupikula kakuyi mpata muanabute yonso wa bantu,+ ne udi ne bua kupikula kabidi muanabute yonso wa nyama idi kayiyi mikumbane.+ 16 Newumupikule ne mushinga wa kupikula nawu padiye ne ngondo umue kubanda, ku mushinga udibu bakose wa nshekele*+ itanu ya arjan bilondeshile nshekele wa muaba wa tshijila.* Nshekele umue udi ne gera* 20. 17 Kadi kanuena ne bua kupikula muanabute mulume wa ngombe anyi muanabute wa mpanga wa mukoko anyi muanabute wa mbuji.+ Nyama eyi nya tshijila. Neumiamine mashi ayi pa tshioshelu+ ne neufuimishe mafuta ayi bu mulambu muosha pa kapia bua dipembu dimpe* kudi Yehowa.+ 18 Munyinyi wa nyama eyi newikale webe. Newikale webe anu bu tshiadi tshia mulambu wa kukupakaja ne bu tshibelu tshia dia balume.+ 19 Bintu bionso bia tshijila bikala bena Isalele ne bua kupesha Yehowa,+ meme ndi nkupeshabi wewe ne bana bebe ba balume ne bana bebe ba bakaji bu tshitupa tshikalabu banupesha bua kashidi.+ Ntshipungidi tshia mukele tshia kashidi* kumpala kua Yehowa buebe wewe ne bua bana bebe badi nebe.”

20 Yehowa wakatungunuka ne kuambila Alona ne: “Kuakuikala ne bumpianyi mu buloba buabu ne kuakupeta tshitupa tshia buloba munkatshi muabu to.+ Meme ndi tshitupa tshiebe ne bumpianyi buebe munkatshi mua bena Isalele.+

21 “Mpindieu tangila, ndi mupeshe bana ba balume ba Lewi tshia dikumi tshionso+ mu Isalele bu bumpianyi bua mudimu udibu benza, mudimu wa ku ntenta wa kusambakena. 22 Bena mu tshisamba tshia Isalele kabena kabidi mua kusemena ku ntenta wa kusambakena to, tshianana nebapie mpekatu ne nebafue. 23 Bena Lewi nkayabu ke badi ne bua kuenza mudimu wa ku ntenta wa kusambakena ne bobu ke bambula bujitu bua tshilema tshia bena Isalele.+ Mmukenji mufunda wa kashidi mu bipungu bienu bionso bua kabangatshi bumpianyi munkatshi mua bena Isalele to.+ 24 Bualu ndi mupeshe bena Lewi bumpianyi bua tshia dikumi tshidi bena Isalele bafila, tshikalabu bapesha Yehowa. Ke bualu kayi ndi mubambile ne: ‘Kabena ne bua kuangata bumpianyi munkatshi mua bena Isalele to.’”+

25 Pashishe Yehowa wakambila Mose ne: 26 “Newambile bena Lewi ne: ‘Nenupete tshia dikumi tshia kudi bena Isalele tshindi munupeshe bu bumpianyi buenu,+ ne nenuangatamu tshia dikumi tshia tshia dikumi atshi bua kutshifila bu mulambu kudi Yehowa.+ 27 Nenutshiangate bu mulambu wenu bienze bu ntete ya muaba wa tshishipuidi+ anyi bu bintu bia bungi bia ku tshikaminu tshia mvinyo anyi tshia mafuta. 28 Mushindu eu ke unuapesha penu Yehowa bintu bia ku bia dikumi bionso binudi nupeta kudi bena Isalele, ne mu biobi abi ke munuapesha muakuidi Alona bintu bia Yehowa. 29 Nenupeshe Yehowa bintu bia mishindu yonso bia mu bintu bitambe buimpe menemene bidibu banupesha+ bu tshintu tshia tshijila.’

30 “Udi ne bua kubambila kabidi ne: ‘Panudi nufila bintu bitambe buimpe bia mu bintu abi, dîba adi nebiangatshibue bu bintu bia bena Lewi bia muaba wa tshishipuidi ne bia ku tshikaminu tshia mvinyo anyi tshia mafuta. 31 Nuenu ne ba mu nzubu yenu nudi mua kubidiila muaba kayi wonso, bualu ndifutu dienu bua mudimu unudi nuenza ku ntenta wa kusambakena.+ 32 Kanuakupia mpekatu mu bualu ebu panudi nufila bintu bitambe buimpe bia mu bintu abi, ne kanuena ne bua kunyanga bintu bia tshijila bia bena Isalele, tshianana nenufue.’”+

19 Yehowa wakakula kabidi ne Mose ne Alona, wamba ne: 2 “Edi ndîyi difunda dia mukenji didi Yehowa muele: ‘Ambila bena Isalele bua bakuangatshile ngombe mukunze wa muimpe udi kayi ne kalema+ ne udibu kabayi banji kusuika mutshi wa tshikokedi. 3 Nenumupeshe muakuidi Eleazâ, yeye neaye nende pambelu pa tshitudilu ne nebamushipe kumpala kuende. 4 Pashishe muakuidi Eleazâ neangate ndambu wa mashi a ngombe au ne munu wende, neanyakile mashi au buludiludi misangu muanda mutekete lua kumpala kua ntenta wa kusambakena.+ 5 Pashishe nebuoshe ngombe au mu mêsu ende. Nebuoshe tshiseba tshiende ne munyinyi wende ne mashi ende pamue ne tumvi tuende.+ 6 Muakuidi neangate mutshi wa sedre, bisalasala bia tumitshi tua izope+ ne buanda bukunze kunzuu, neabiele mu kapia mudibu buosha ngombe au. 7 Pashishe muakuidi neasukule bilamba biende ne neowe mâyi,* pashishe udi mua kubuela mu tshitudilu; kadi muakuidi neikale mukoya too ne ku dilolo.

8 “‘Muntu uvua muoshe ngombe au neasukule bilamba biende ne mâyi, neowe mâyi* ne neikale mukoya too ne ku dilolo.

9 “‘Muntu udi mukezuke neaboye butu bua ngombe au,+ neabuele pambelu pa tshitudilu muaba kampanda wa mankenda, ne tshisumbu tshia bena Isalele netshibulame bua kuenza nabu mâyi a kukezulangana nawu.+ Mmulambu wa mpekatu. 10 Muntu udi uboya butu bua ngombe au neasukule bilamba biende ne neikale mukoya too ne ku dilolo.

“‘Eu newikale mukenji mufunda wa kashidi bua bena Isalele ne bua muntu wa ku babende udi musombe munkatshi muabu:+ 11 Muntu yonso udi ulenga tshitalu tshia muntu* neikale mukoya matuku muanda mutekete.+ 12 Muntu au neadikezule ne mâyi* au dituku disatu, ne dituku dia muanda mutekete neikale mukezuke. Kadi yeye kayi mudikezule dituku disatu, kakuikala mukezuke dituku dia muanda mutekete to. 13 Muntu udi ulenga tshitalu tshia muntu kayi yonso udi mufue* ne kayi udikezula mmunyange ntenta wa tshitendelelu wa Yehowa,+ ne muntu* au udi ne bua kumbushibua* mu Isalele.+ Bu mudibu kabayi bamumiamine mâyi a kukezulangana nawu,+ udi ushala mukoya. Bukoya buende budi bushala pambidi pende.

14 “‘Eu mmukenji wa kulonda padi muntu ufuila mu ntenta: Muntu yonso udi ubuela mu ntenta amu ne muntu yonso ukavua mu ntenta amu nebikale bakoya matuku muanda mutekete. 15 Tshintu tshionso tshia kuelela bintu tshidibu kabayi basuikaku tshibuikidiji netshikale tshikoya.+ 16 Muntu yonso udi pambelu mu mpata udi ulenga muntu kampanda mushipa ne muele wa mvita anyi tshitalu anyi mufuba wa muntu anyi muaba wa kujikilangana neikale mukoya matuku muanda mutekete.+ 17 Nebambuile muntu udi mukoya au ndambu wa butu bua nyama wa mulambu wa mpekatu uvuabu buoshe ne nebapongoluelapu mâyi a mu mpokolo mu tshintu. 18 Pashishe muntu udi mukezuke+ neangate bisalasala bia tumitshi tua izope,+ neabitue mu mâyi au ne neaanyakile ku ntenta ne ku bintu bionso bia kuelela bintu ne pa bantu* bavuamu ne pambidi pa muntu uvua mulenge mufuba anyi muntu mushipa anyi tshitalu anyi muaba wa kujiikilangana. 19 Muntu mukezuke au neaanyakile pambidi pa muntu mukoya mu dituku disatu ne mu dituku dia muanda mutekete,+ ne neamukezule ku mpekatu mu dituku dia muanda mutekete; pashishe neasukule bilamba biende, neowe mâyi, ne ku dilolo nealue mukezuke.

20 “‘Kadi muntu udi kayi mukezuke ne wikala kayi mudikezule, badi ne bua kumbusha* muntu* au mu tshisumbu,+ bualu mmunyange muaba munsantu wa Yehowa. Ki mbamumiamine mâyi a kukezulangana nawu to, nunku mmukoya.

21 “‘Eu newikale mukenji mufunda wa kashidi buabu bobu: Muntu udi unyakilangana mâyi a kukezulangana nawu+ udi ne bua kusukula bilamba biende ne muntu udi ulenga mâyi a kukezulangana nawu neikale mukoya too ne ku dilolo. 22 Tshintu tshionso tshidi muntu mukoya ulenga netshikale tshikoya, ne muntu* udi utshilenga neikale mukoya too ne ku dilolo.’”+

20 Mu ngondo wa kumpala, tshisumbu tshijima tshia bena Isalele tshiakafika mu tshipela tshia Sine, bantu kutuadijabu kusombela mu Kadeshe.+ Kuntu aku ke kuvua Mîyama+ mufuile ne ke kuvuabu bamujiikile.

2 Mpindieu kakuvua mâyi bua tshisumbu to,+ ne bantu bakadisanga, kutombokelabu Mose ne Alona. 3 Bantu bavua batanda ne Mose,+ bamba ne: “Tuvua mua kuikala nansha bafue pavua bana betu bafue kumpala kua Yehowa! 4 Bua tshinyi nudi balue ne tshisumbu tshia Yehowa mu tshipela etshi bua tuetu ne bimuna bietu kufuilamu?+ 5 Bua tshinyi nudi batupatule mu Ejipitu bua kulua netu muaba mubi eu?+ Muaba eu kawena mamiinu, tumuma tua mfigi, mionji ya tumuma tua mvinyo, ne bimuma bia grenade, ne kakuena mâyi a kunua to.”+ 6 Nunku Mose ne Alona bakumbuka kumpala kua tshisumbu, kuyabu ku tshibuelelu tshia ntenta wa kusambakena, kutuabu mpala yabu panshi, ne butumbi bua Yehowa kubangabu kubamuenekela.+

7 Pashishe Yehowa wakambila Mose ne: 8 “Angata dikombo; wewe ne muanenu Alona nusangishe tshisumbu kaba kamue, nuambile mukuna wa dibue mu mêsu abu bua upatule mâyi awu; neubapatuile mâyi mu mukuna wa dibue au ne neupeshe tshisumbu ne bimuna biabu mâyi a kunua.”+

9 Nunku Mose wakangata dikombo kumpala kua Yehowa,+ anu muvuaye mumutumine dîyi bua kuenza. 10 Panyima pa bualu abu, Mose ne Alona bakasangisha tshisumbu kaba kamue ku mukuna wa dibue, yeye kubambila ne: “Mpindieu umvuayi, nuenu bantomboji! Tudi ne bua kunupatuila mâyi mu mukuna wa dibue eu anyi?”+ 11 Ke Mose kujula tshianza tshiende, kututaye dikombo diende ku mukuna wa dibue misangu ibidi; mâyi kutuadijawu kupatuka a bungi, tshisumbu ne bimuna biabu kubangabu kunua.+

12 Pashishe Yehowa wakambila Mose ne Alona ne: “Bu munuvua kanuyi baleje ditabuja kundi ne banjidile ku mêsu kua tshisamba tshia Isalele, kanuakubueja tshisumbu etshi mu buloba bungabapesha to.”+ 13 Aa mmâyi a Meliba,*+ muaba uvua bena Isalele batande ne Yehowa, nunku yeye wakajidibua munkatshi muabu.

14 Pashishe Mose wakatumina mukalenge wa Edome+ bantu ne mukenji bumbukila mu Kadeshe bua kumuambila ne: “Muanenu Isalele+ udi wamba ne: ‘Udi mumanye bimpe makenga onso atudi bapete. 15 Batatuetu bavua baye mu Ejipitu,+ tuetu kusomba mu Ejipitu bidimu* bia bungi;+ bena Ejipitu kutukengesha tuetu ne batatuetu.+ 16 Ndekelu wa bionso tuakadila kudi Yehowa,+ yeye kutumvuila, kutumaye muanjelu wende,+ yeye kutupatula mu Ejipitu, ne mpindieu tudi mu Kadeshe, tshimenga tshidi ku mikalu ya buloba buebe. 17 Tulekela koku tupitshile mu buloba buebe. Katuakupitshila mu budimi nansha bumue anyi mu budimi bua tumuma tua mvinyo nansha bumue ne katuakunua mâyi a mu tshina nansha tshimue to. Netuendele mu Njila wa Mukalenge, katuyi tukudimuka ni nku dia balume anyi ku dia bakaji too ne mutuapita mu buloba buebe.’”+

18 Kadi Edome wakamuambila ne: “Kuena mua kupitshila mu buloba buetu to. Wewe mupitshilamu, nendue kusambakena nebe ne muele wa mvita.” 19 Bena Isalele pabu kumuambila ne: “Netubandile mu njila munene, ne bituikala tuetu ne bimuna bietu banue mâyi ebe, netufute.+ Katuena tujinga tshintu tshikuabu to, tudi basue anu kupita ku makasa.”+ 20 Kadi wakamba ne: “Kuena mua kupita to.”+ Ke Edome kupatukaye ne bantu ba bungi ne tshiluilu* tshikole bua kusambakena nende. 21 Nunku Edome wakabenga bua kulekela Isalele upitshila mu buloba buende; ke Isalele kukudimuka, kumushiyaye.+

22 Tshisamba tshia Isalele, tshisumbu atshi tshijima, tshiakumbuka ku Kadeshe kufikatshi ku mukuna wa Hô.+ 23 Pashishe Yehowa wakambila Mose ne Alona ku mukuna wa Hô pabuipi ne mikalu ya buloba bua Edome ne: 24 “Alona neasangishibue kudi bena mu tshisamba tshiabu.*+ Kakubuela mu buloba bungapesha bena Isalele to, bualu nuenu babidi nuvua babenge kuenza tshimvua muambe bua mâyi a Meliba.+ 25 Angata Alona ne muanende Eleazâ, ubande nabu ku mukuna wa Hô. 26 Uvule Alona bilamba biende,+ ubivuadike muanende Eleazâ,+ ne Alona neafuile kuntu aku.”*

27 Nunku Mose wakenza anu muvua Yehowa mumutumine dîyi bua kuenza; bobu kubanda ku mukuna wa Hô, mu mêsu mua tshisumbu tshijima. 28 Nunku Mose wakavula Alona bilamba biende, kubivuadikaye muanende Eleazâ. Panyima pa bualu abu Alona wakafuila kuntu aku, ku mutu kua mukuna.+ Pashishe Mose ne Eleazâ kutulukabu ku mukuna. 29 Pakamona tshisumbu tshijima ne: Alona uvua mufue, nzubu mujima wa Isalele wakadila Alona matuku 30.+

21 Pakumvua mukalenge muena Kanâna wa ku Alada+ uvua musombele mu Negebe ne: Isalele uvua muluile njila wa Atalima, wakaluangana ne Isalele, kukuataye bamue ba kudibu, kuyaye nabu. 2 Nunku Isalele wakaditshipa kudi Yehowa, wamba ne: “Wewe mufile bantu aba mu tshianza tshianyi, nembutule bimenga biabu kakuyi mpata.” 3 Nunku Yehowa wakateleja dîyi dia Isalele, kubapeshaye bena Kanâna; kubabutulabu bobu ne bimenga biabu. Ke bualu kayi bakinyika muaba au ne: Hôma.*+

4 Pavuabu batungunuka ne luendu luabu bumbukila ku mukuna wa Hô,+ balonda njila wa ku Mbuu Mukunze bua kunyunguluka buloba bua Edome,+ bantu* bakapungila bua luendu. 5 Bantu bakatuadija kuakula bibi bua Nzambi ne bua Mose,+ bamba ne: “Bua tshinyi nudi batupatule mu Ejipitu bua tuetu kufuila mu tshipela emu? Kamuena ni mbiakudia ni mmâyi,+ ne tuetu* tukadi bakine* bimampa bibi ebi.”+ 6 Nunku Yehowa wakatumina bantu nyoka ya lulengu;* nyoka ayi ivua isuma bantu, nunku bena Isalele ba bungi bakafua.+

7 Nunku bantu bakalua kudi Mose, kuambabu ne: “Tudi benze mpekatu patudi bakule bibi bua Yehowa ne buebe wewe.+ Utulombele kudi Yehowa bua atumbushile nyoka eyi.” Mose wakalombela bantu kudi Nzambi.+ 8 Pashishe Yehowa wakambila Mose ne: “Enza tshimfuanyi tshia nyoka wa lulengu* ne utshiteke ku dikunji. Padibu basuma muntu, dîba adi udi ne bua kutshitangila bua ashale ne muoyo.” 9 Diakamue Mose wakenza nyoka wa tshiamu tshia mitaku,+ kumutekaye ku dikunji,+ ne dîba dionso divua nyoka usuma muntu, ne muntu au yeye mutangile nyoka wa tshiamu tshia mitaku, uvua upanda.+

10 Panyima pa bualu abu bena Isalele bakasa luendu, kutudilabu mu Oboto.+ 11 Pashishe bakumbuka mu Oboto, kutudilabu mu Iye-habalima,+ mu tshipela tshidi tshitangilangane ne Moaba, lua ku est. 12 Bakumbuka kuntu aku, kutudilabu pabuipi ne Tshibandabanda* tshia Zelede.+ 13 Bakumbuka kabidi kuntu aku, kutudilabu mu tshitupa tshia buloba tshia Ânona+ tshidi mu tshipela tshidi tshiumbukile ku mukalu wa bena Amole, bualu Ânona mmukalu wa Moaba, pankatshi pa Moaba ne bena Amole. 14 Ke bualu kayi mukanda wa Mvita ya Yehowa udi wakula bua “Waheba mu Sufaha ne bibandabanda* bia Ânona, 15 ne mpulumuku* wa bibandabanda* udi muye too ne ku luseke lua musoko wa Ale, udi mulamate ku mukalu wa Moaba.”

16 Pashishe bakaya ku Bê. Etshi ntshina tshivua Yehowa muambile Mose ne: “Sangisha bantu bua mbapeshe mâyi.”

17 Tshikondo atshi Isalele wakimba musambu eu:

“Patula mâyi, wewe tshina!—Tshipungulujayi!*

18 Tshina tshivua bakokeshi bumbule, tshivua bantu banene ba mu tshisamba buondole,

Ne dikombo dia mukokeshi ne makombo abu bobu bine.”

Pashishe bakumbuka mu tshipela kuyabu ku Matana, 19 kumbukabu ku Matana kuyabu ku Nahaliele, kumbukabu ku Nahaliele kuyabu ku Bamota.+ 20 Bakumbuka ku Bamota kuyabu mu tshibandabanda tshidi mu buloba* bua Moaba,+ ku mutu kua Pisega+ udi kuulu kua Yeshimone.*+

21 Mpindieu Isalele wakatuma bantu ne mukenji kudi Sihona mukalenge wa bena Amole bua kumuambila ne:+ 22 “Utulekele tupitshile mu buloba buebe. Katuakukudimuka bua kuya mu budimi kampanda anyi budimi bua tumuma tua mvinyo. Katuakunua mâyi a mu tshina nansha tshimue. Netuendele mu Njila wa Mukalenge too ne patuapita buloba buebe.”+ 23 Sihona kakitabila Isalele bua kupitshila mu buloba buende to. Kadi Sihona wakasangisha bantu bende bonso, kupatukaye bua kuluisha Isalele mu tshipela, kufikaye ku Yahasa ne kutuadijaye kuluangana ne Isalele.+ 24 Kadi Isalele wakamutshimuna ne muele wa mvita,+ kukuataye buloba buende+ kumbukila ku Ânona+ too ne ku Yaboka,+ pabuipi ne bena Amona, bualu Yazê+ udi ku muelelu kua buloba bua bena Amona.+

25 Nunku Isalele wakakuata bimenga bionso ebi ne bakatuadija kusombela mu bimenga bionso bia bena Amole,+ mu Heshebona ne mu misoko yonso ivua kumpenga kuende.* 26 Bualu Heshebona uvua tshimenga tshia Sihona, mukalenge wa bena Amole, uvua muluangane ne mukalenge wa Moaba ne mumunyenge maloba ende onso too ne ku Ânona. 27 Ke tshivua tshifikishe ku lusumuinu lua mayobo ludi luamba ne:

“Luayi ku Heshebona.

Tshimenga tshia Sihona tshibakibue ne tshijadikibue bikole.

28 Bualu kapia kavua kafume mu Heshebona, ludimi lua kapia mu tshimenga tshia Sihona.

Nkuoshe Ale wa mu Moaba, bakalenge ba miaba mitumbuke ya Ânona.

29 Diakabi diebe, Moaba! Nenubutudibue nuenu bantu ba Kemoshe!+

Yeye udi uvuija bana bende ba balume banyemakanyi ne bana bende ba bakaji bantu bakuata kudi Sihona, mukalenge wa bena Amole.

30 Tubasayi;

Heshebona neabutudibue too ne ku Dibona;+

Tumushiye tshipela too ne ku Nofaha;

Kapia nekatampakane too ne ku Medeba.”+

31 Nunku Isalele wakatuadija kusombela mu buloba bua bena Amole. 32 Pashishe Mose wakatuma bantu bua kutentekela Yazê.+ Bakakuata misoko ivua kumpenga kuende,* kuipatabu bena Amole bavuamu. 33 Pashishe bakakudimuka, kubandabu ne Njila wa Bashana. Ke Oga+ mukalenge wa Bashana kupatukaye ne bantu bende bonso bua kuluangana nabu mvita ku Edelei.+ 34 Yehowa wakambila Mose ne: “Kumutshinyi to,+ bualu nemmufile yeye ne bantu bende bonso ne buloba buende mu tshianza tshiebe,+ ne neumuenzele anu muuvua muenzele Sihona, mukalenge wa bena Amole, uvua musombele mu Heshebona.”+ 35 Nunku bakatungunuka ne kushipa, kumushipabu yeye pamue ne bana bende ne bantu bende bonso, too ne pavuaku kakuyi kushale muntu wende nansha umue ne muoyo;+ bakakuata kabidi buloba buende.+

22 Pashishe bena Isalele bakasa luendu, kutulabu mu mpata ya bipela ya Moaba, dishiya dia Yadene, bitangilangane ne Yeliko.+ 2 Nunku Balaka+ muana wa Sipô wakamona bionso bivua Isalele muenzele bena Amole, 3 ne Moaba kupetaye buôwa bua bungi bua bantu abu bualu bavua ba bungi be! Bushuwa, Moaba wakumvua buôwa bua bungi bua bena Isalele.+ 4 Nunku Moaba kuambilaye bakulu ba mu Midiyana ne:+ “Mpindieu tshisumbu etshi netshidie miaba yetu yonso anu bu mutu ngombe ujikija mashinde a mu mpata.”

Tshikondo atshi Balaka muana wa Sipô uvua mukalenge wa Moaba. 5 Wakatuma bantu ne mukenji kudi Balâma muana wa Beô ku Petô,+ udi pabuipi ne Musulu,* kuabu kumulela. Yeye kumubikidisha, wamba ne: “Tangila! Bantu bakuabu mbafumine mu Ejipitu. Tangila! Mbabuikile pa mutu pa* buloba buonso,*+ ne mbasombele anu kumpala kuanyi. 6 Mpindieu ndi nkulomba bua ulue, ungelele bantu aba mulawu+ bualu mbampite bukole. Pamuapa ndi mua kubatshimuna, meme kubipata mu buloba ebu, bualu ndi mumanye bimpe ne: muntu uudi ubenesha udi ubeneshibua, ne muntu uudi wela mulawu udi wedibua mulawu.”

7 Nunku bakulu ba mu Moaba ne bakulu ba mu Midiyana bakenza luendu ne difutu dia lubuku mu bianza biabu, kuyabu kudi Balâma,+ kumuambilabu mukenji wa kudi Balaka. 8 Ke yeye kubambila ne: “Lalayi muaba eu, nennuambile dîyi dionso dikala Yehowa mua kungambila.” Nunku bakokeshi ba mu Moaba bakashala ne Balâma.

9 Pashishe Nzambi wakalua kudi Balâma, kuambaye ne:+ “Bantu badi nebe aba mbanganyi?” 10 Balâma kuambilaye Nzambi mulelela ne: “Balaka muana wa Sipô, mukalenge wa Moaba, mmuntumine mukenji, wamba ne: 11 ‘Tangila! Bantu badi bafumina mu Ejipitu aba mbabuikile pa mutu pa* buloba buonso.* Mpindieu luaku, ubangelele mulawu.+ Pamuapa ndi mua kuluangana nabu, meme kubipata.’” 12 Kadi Nzambi wakambila Balâma ne: “Kuena ne bua kuya nabu to. Kuena ne bua kuela bantu abu mulawu nansha, bualu mbabeneshibue.”+

13 Balâma wakajuka mu dinda, kuambilaye bakokeshi ba Balaka ne: “Ndayi mu buloba buenu, bualu Yehowa mmubenge bua meme kuya nenu.” 14 Nunku bakokeshi ba mu Moaba bakasa luendu, kupinganabu kudi Balaka, kumuambilabu ne: “Balâma mmubenge bua kulua netu.”

15 Kadi Balaka wakatuma kabidi bakokeshi ba bungi kupita ba kumpala ne bikale ne butumbi kupita ba kumpala. 16 Bakafika kudi Balâma, kumuambilabu ne: “Balaka muana wa Sipô mmuambe nunku: ‘Ndi nkulomba bua kulekedi tshintu nansha tshimue tshikupangisha bua wewe kulua kundi, 17 bualu nenkupeshe difutu dinene ne nengenze tshionso tshiwangambila bua kuenza. Nunku ndi nkulomba bua ulue kungelela bantu aba mulawu.’” 18 Kadi Balâma kuandamunaye bena mudimu ba Balaka ne: “Nansha Balaka mumpeshe nzubu wende muwule tente ne arjan ne or, tshiena mua kuenza bualu nansha bumue budi bubengangana ne dîyi dia Yehowa Nzambi wanyi, nansha bobu bukese anyi bunene.+ 19 Kadi ndi nnulomba bua nushale muaba eu butuku ebu kabidi, bua ngumvue tshikuabu tshiangambila Yehowa.”+

20 Pashishe Nzambi wakalua kudi Balâma butuku, kumuambilaye ne: “Bikala bantu aba balue bua kukubikila, uye nabu. Kadi udi mua kuamba anu mêyi angakuambila bua kuamba.”+ 21 Nunku Balâma wakajuka mu dinda, kusuikaye tshiseba pa mpunda* wende, kuyaye ne bakokeshi ba mu Moaba.+

22 Kadi tshiji tshia Nzambi tshiakatema bualu yeye uvua uya, ne muanjelu wa Yehowa wakimana mu njila bua kumupumbisha. Kadi Balâma uvua mubande pa mpunda wende, ne uvua ne bena mudimu bende babidi. 23 Kadi pavua mpunda mumone muanjelu wa Yehowa muimane mu njila mutule muele muwukuate ku tshianza, wakajinga bua kumbuka mu njila kuyila mu tshisuku. Kadi Balâma wakabanga kututa mpunda bua kumupingaja mu njila. 24 Pashishe muanjelu wa Yehowa wakimana mu kajila kakese pankatshi pa madimi abidi a tumuma tua mvinyo, kikale ne bimanu bia mabue ku nseke yonso ibidi. 25 Pavua mpunda mumone muanjelu wa Yehowa, wakabanga kudifinyina ku tshimanu, yeye kushindikila dikasa dia Balâma ku tshimanu, Balâma kubangaye kumututa kabidi.

26 Mpindieu muanjelu wa Yehowa wakapita kabidi, kuimanaye muaba mubumbakane uvua kawuyi ne mushindu wa kuyila ni nku dia balume ni nku dia bakaji. 27 Pavua mpunda mumone muanjelu wa Yehowa, wakalala panshi Balâma muikale pa nyima pende, nunku Balâma wakumvua tshiji tshikole, yeye kubanga kututa mpunda wende ne dikombo diende. 28 Ndekelu wa bionso, Yehowa wakenza bua mpunda akule,*+ yeye kuambila Balâma ne: “Tshindi mukuenze ntshinyi bua wewe kuntuta misangu isatu eyi?”+ 29 Balâma kuandamuna mpunda ne: “Bualu udi mumpotele. Bu meme muikale anu ne muele mu tshianza tshianyi, mvua mua kuikala mukushipe!” 30 Nunku mpunda kuambila Balâma ne: “Tshiena mpunda webe uutu ubanda matuku ebe onso too ne lelu anyi? Nkadiku mukuenzele nunku musangu mukuabu anyi?” Yeye kuandamuna ne: “Tòo!” 31 Pashishe Yehowa wakabulula mêsu a Balâma,+ yeye kumona muanjelu wa Yehowa muimane mu njila mukuate muele mu tshianza tshiende. Diakamue yeye kuinama, kutua mpala wende panshi.

32 Nunku muanjelu wa Yehowa wakamuambila ne: “Bua tshinyi uvua mutute mpunda webe misangu isatu eyi? Tangila! Meme mvua mulue bua kukupumbisha, bualu njila webe kena umvuangana ne disua dianyi.+ 33 Mpunda uvua mummone, kujingaye bua kungepuka misangu isatu eyi.+ Fuanyikija ne: kavua mungepuke to! Dîba edi mvua mua kuikala mukushipe ne mushiye mpunda ne muoyo.” 34 Balâma kuambila muanjelu wa Yehowa ne: “Ndi muenze mpekatu, bualu tshivua mumanye ne: wewe ke uvua muimane mu njila bua kusambakena nanyi to. Mpindieu biobi bikale bibi ku mêsu kuebe, nempingane.” 35 Kadi muanjelu wa Yehowa wakambila Balâma ne: “Ndaku ne bantu aba, kadi udi mua kuamba anu mêyi angakuambila.” Nunku Balâma wakatungunuka ne kuya ne bakokeshi ba Balaka.

36 Pavua Balaka mumvue ne: Balâma mmulue, wakaya diakamue bua kusambakena nende mu tshimenga tshia Moaba, tshidi ku muelelu kua Ânona ku mikalu ya buloba abu. 37 Balaka wakambila Balâma ne: “Tshivua mukubikidishe anyi? Bua tshinyi kuvua mulue kundi? Uvua wela meji ne: tshiena ne mushindu wa kukupesha difutu dinene anyi?”+ 38 Balâma kuandamuna Balaka ne: “Mpindieu si ndi mulue kuudi. Kadi nebanganyishile bua kuamba bualu kampanda anyi? Ndi mua kuamba anu mêyi adi Nzambi wela mukana muanyi.”+

39 Nunku Balâma wakaya ne Balaka, kufikabu ku Kîyata-husota. 40 Balaka wakalambula ngombe ne mikoko, kutuminaye Balâma ne bakokeshi bavua nende ndambu wa munyinyi. 41 Mu dinda, Balaka wakangata Balâma, kubandaye nende ku Bamota-bâla* bua yeye kumuenenaku bantu bonso.+

23 Pashishe Balâma wakambila Balaka ne: “Asa bioshelu muanda mutekete muaba eu ne undongoluele ngombe milume muanda mutekete+ ne bimpanga bia mikoko muanda mutekete.” 2 Diakamue Balaka kuenza anu muvua Balâma mumuambile. Pashishe Balaka ne Balâma kulambulabu ngombe mulume ne tshimpanga tshia mukoko pa tshioshelu tshionso.+ 3 Ke Balâma kuambilaye Balaka ne: “Shala muaba eu pabuipi ne mulambu webe wa kuosha, meme nye. Imue misangu Yehowa neayukile nanyi. Bualu buonso buangambilaye, nenkuambilabu.” Nunku wakaya ku mukuna mukese uvua kawuyi ne tshintu.

4 Nunku Nzambi wakayukila ne Balâma+ uvua mumuambile ne: “Ndi muase bioshelu muanda mutekete mu milongo, ne ndi mulambule ngombe mulume ne tshimpanga tshia mukoko pa tshioshelu tshionso.” 5 Yehowa wakateka dîyi edi mukana mua Balâma ne:+ “Pingana kudi Balaka, umuambile nunku.” 6 Nunku wakapingana, kumonaye ne: Balaka ne bakokeshi bonso ba Moaba bavua bimane pabuipi ne mulambu wende wa kuosha. 7 Ke kuelaye lusumuinu elu ne:+

‘Luaku ungelele Yakoba mulawu.

Eyowa, luaku upishe Isalele!’+

 8 Mmunyi mundi mua kuela bantu badi Nzambi kayi muele mulawu mulawu?

Mmunyi mundi mua kupisha bantu badi Yehowa kayi mupishe?+

11 Ke Balaka kuambila Balâma ne: “Tshiudi mungenzele ntshinyi? Ndi mulue nebe bua kuela bena lukuna banyi mulawu, mpindieu tshionso tshiudi muenze tshidi anu kubabenesha.”+ 12 Yeye kuandamuna ne: “Tshiena ne bua kuamba bualu buonso budi Yehowa uteka mukana muanyi anyi?”+

13 Balaka wakamuambila ne: “Luaku koku tuye muaba mukuabu uudi mua kubamuenena. Neumone anu tshitupa tshiabu; kuakubamona bonso to. Ubangelele mulawu lua muaba au.”+ 14 Nunku wakaya nende mu mpata wa Sofima, ku mutu kua Pisega,+ kuasaye bioshelu muanda mutekete ne kulambulaye ngombe mulume ne tshimpanga tshia mukoko pa tshioshelu tshionso.+ 15 Nunku Balâma wakambila Balaka ne: “Shala muaba eu pabuipi ne mulambu webe wa kuosha pandi nyukila ne Nzambi kuntu kuaka.” 16 Nunku Yehowa wakayukila ne Balâma, kutekaye dîyi edi mukana muende ne:+ “Pingana kudi Balaka, umuambile nunku.” 17 Nunku wakapingana kudiye, kumonaye ne: uvua muindile pabuipi ne mulambu wende wa kuosha, ne bakokeshi ba Moaba bavua nende. Balaka kumukonka ne: “Yehowa mmuambe tshinyi?” 18 Nunku wakela lusumuinu elu ne:+

“Juka, Balaka, umvue.

Nteleja, wewe muana wa Sipô.

Padiye wamba bualu kampanda, kakubuenza anyi?

Padiye wakula, kakukumbaja anyi?+

22 Nzambi udi ubapatula mu Ejipitu.+

Yeye udi bu nsengu ya ngombe mulume wa tshisuku buabu bobu.+

Dîba edi nebambe bua Yakoba ne bua Isalele ne:

‘Tangila tshidi Nzambi muenze!’

25 Ke Balaka kuambila Balâma ne: “Ku lumue luseke, biwikala kuyi mua kumuela mulawu, nunku, ku lukuabu luseke kuena ne bua kumubenesha nansha.” 26 Balâma wakandamuna Balaka ne: “Tshivua mukuambile ne: ‘Nengenze malu onso adi Yehowa wamba’ anyi?”+

27 Balaka wakambila Balâma ne: “Luaku koku nye nebe muaba mukuabu kabidi. Misangu mikuabu nebikale bimpe ku mêsu kua Nzambi mulelela bua wewe kumungelela mulawu lua muaba au.”+ 28 Ke Balaka kuyaye ne Balâma ku mutu kua Peô, udi mutangile lua ku Yeshimone.*+ 29 Pashishe Balâma wakambila Balaka ne: “Asa bioshelu muanda mutekete muaba eu ne undongoluele ngombe milume muanda mutekete ne bimpanga bia mikoko muanda mutekete.”+ 30 Nunku Balaka kuenzaye anu muvua Balâma muambe, yeye kulambula ngombe mulume ne tshimpanga tshia mukoko pa tshioshelu tshionso.

24 Pakamona Balâma ne: bivua bisankisha* Yehowa bua kubenesha Isalele, kakaya kabidi bua kukeba bimanyinu bia diakabi to,+ kadi wakatangija mpala wende ku tshipela. 2 Pakabandisha Balâma mêsu ende ne kumonaye Isalele muase bitudilu bilondeshile bisa biende,+ dîba adi nyuma wa Nzambi wakamutulukila.+ 3 Ke yeye kuela lusumuinu elu ne:+

10 Ke Balaka kukuatshila Balâma tshiji tshikole. Balaka wakakumakaja bianza ne dipetu, kuambilaye Balâma ne: “Mvua mukubikile bua wewe kuela bena lukuna banyi mulawu,+ kadi mpindieu kuena muenze tshintu tshikuabu anu kubabenesha misangu yonso isatu eyi. 11 Mpindieu pingana kuebe musangu umue. Mvua musue kukupesha difutu dinene,+ kadi tangila! Yehowa mmukupangishe difutu adi.”

12 Balâma kuandamuna Balaka ne: “Tshivua muambile bantu bauvua mutume ne mukenji ne: 13 ‘Nansha Balaka mumpeshe nzubu wende muwule tente ne arjan ne or, tshiena mua kuenza bualu nansha bumue ku disua dianyi* budi bubengangana ne dîyi dia Yehowa, nansha buimpe nansha bubi; nengambe anu tshiangambile Yehowa’ anyi?+ 14 Mpindieu nkadi nya kudi bena mu tshisamba tshietu. Luaku nkuambile tshikala tshisamba etshi mua kuenzela tshisamba tshienu mu matuku atshilualua.”* 15 Nunku wakela lusumuinu elu ne:+

20 Pakamonaye Amaleka, wakatungunuka ne lusumuinu luende ne:

21 Pakamonaye bena Kene,+ wakatungunuka ne lusumuinu luende ne:

“Muaba webe wa kusombela mmushindame, ne muaba webe wa kusombela mmuashila pa dibue.

22 Kadi muntu mukuabu neoshe Kaina.

Nkushale musangu bule kayi kumpala kua Ashû kukukuata ne kuya nebe?”

23 Wakatungunuka ne lusumuinu luende ne:

“Diakabi! Nnganyi wapanduka penza Nzambi bualu ebu?

Kadi yeye pende neajimine kashidi.”

25 Pashishe Balâma+ wakajuka, kuyaye, kupinganaye muaba wende. Balaka pende kuyila wende njila.

25 Pavua Isalele musombele mu Shitima,+ bantu bakatuadija kuenda masandi ne bana ba bakaji ba mu Moaba.+ 2 Bantu bakaji abu bakabikila bantu ku milambu ya nzambi yabu,+ ne bantu kutuadijabu kudia ne kuinamina nzambi yabu.+ 3 Nunku Isalele wakadisangisha mu ditendelela dia* Bâla wa Peô,+ ne Yehowa wakakuatshila Isalele tshiji tshikole. 4 Yehowa kuambila Mose ne: “Angata balombodi* bonso ba bantu aba, ubakudike kumpala kua Yehowa munda munya,* bua tshiji tshikole tshia Yehowa tshiumbuke kudi Isalele.” 5 Nunku Mose kuambilaye balumbuluishi ba Isalele ne:+ “Muntu yonso wa kunudi udi ne bua kushipa bantu bende bavua badisangishe mu ditendelela dia* Bâla wa Peô.”+

6 Kadi anu dîba adi, muena Isalele mukuabu kuluaye kudi bana babu ne mukaji+ kampanda muena Midiyana ku mêsu kua Mose ne kua tshisumbu tshionso tshia bena Isalele, pavuabu benda badila ku tshibuelelu tshia ntenta wa kusambakena. 7 Pavua Pinehasa+ muana wa Eleazâ muana wa muakuidi Alona mumone bualu abu, diakamue wakajuka munkatshi mua tshisumbu, kuangataye difuma mu tshianza tshiende. 8 Pashishe kulondakajaye mulume muena Isalele au mu ntenta, kubabuejaye bonso babidi difuma, mulume muena Isalele au ne mukaji au lua mu mubidi wende wa buntu bukaji. Nunku tshipupu tshivua mu bena Isalele tshiakimana.+ 9 Bantu bavua bafue ku tshipupu atshi bavua binunu 24.+

10 Pashishe Yehowa kuambilaye Mose ne: 11 “Pinehasa+ muana wa Eleazâ muana wa muakuidi Alona mmumbushe tshiji tshianyi kudi tshisamba tshia Isalele, bualu ki mmuitabe nansha kakese bua muntu atendelele nzambi mukuabu pa kungumbusha meme munkatshi muabu.+ Ke bualu kayi tshiena mubutule bena Isalele nansha mundi ndomba bua bantu bandamate anu meme.+ 12 Nunku amba ne: ‘Ndi ndia nende tshipungidi tshia ditalala. 13 Netshikale tshipungidi tshia buakuidi bua kashidi buende yeye ne bua bana bende balonda panyima pende,+ bualu ki mmuitabe bua muntu atendelele nzambi mukuabu pa kumbusha Nzambi wende+ ne mmubuikidile tshisamba tshia Isalele mpekatu.’”

14 Mpindieu dîna dia mulume muena Isalele uvuabu bashipe pamue ne mukaji muena Midiyana au divua Zimeli muana wa Salu, umue wa ku bamfumu ba nzubu wa batatu ba bena Simeona. 15 Dîna dia mukaji muena Midiyana uvuabu bashipe divua Kozebi muana wa Sû;+ Sû eu uvua mfumu wa bisa bia nzubu wa batatuende mu Midiyana.+

16 Pashishe Yehowa wakambila Mose ne: 17 “Luishayi bena Midiyana, nubashipe,+ 18 bualu mbanuluishe pavuabu banuenzele malu ne budimu mu tshilumbu tshia Peô+ ne tshia Kozebi muana wa mfumu kampanda wa Midiyana, muanabu wa bakaji uvuabu bashipe+ mu tshikondo tshia tshipupu bua tshilumbu tshia Peô.”+

26 Panyima pa tshipupu,+ Yehowa wakambila Mose ne Eleazâ muana wa muakuidi Alona ne: 2 “Nubale bungi bua tshisumbu tshijima tshia bena Isalele kubangila ku bantu badi ne bidimu 20 kubanda, bilondeshile nzubu ya batatuabu, nubale bantu bonso badi mua kubuela mu tshiluilu mu Isalele.”+ 3 Nunku Mose ne muakuidi Eleazâ+ bakakula nabu mu mpata ya bipela ya Moaba+ lua ku Yadene pabuipi ne Yeliko,+ bamba ne: 4 “Nubale bungi buabu kubangila ku bantu badi ne bidimu 20 kubanda, anu muvua Yehowa mutumine Mose dîyi bua kuenza.”+

Mpindieu bana ba Isalele bavua bapatuke mu buloba bua Ejipitu bavua: 5 Lubena,+ muanabute wa Isalele; bana ba balume ba Lubena:+ ba kudi Hanoka, dîku dia bena Hanoka; ba kudi Palu, dîku dia bena Palu; 6 ba kudi Heselona, dîku dia bena Heselona; ba kudi Kâmi, dîku dia bena Kâmi. 7 Aa ke avua mêku a bena Lubena, ne bungi bua bantu babu bavuabu bafunde mêna buvua 43 730.+

8 Muana wa balume wa Palu uvua Eliaba. 9 Bana ba balume ba Eliaba bavua: Nemuele, Datana, ne Abilama. Datana eu ne Abilama bavua bantu basungula ba mu tshisumbu bavua baluishe Mose+ ne Alona pamue ne tshisumbu tshia Kola,+ pavuabu baluishe Yehowa.+

10 Nunku buloba buakakanguka,* kubaminabu. Bua Kola yeye, wakafua ne bena diende pavua kapia kuoshe bantu 250.+ Nunku bakalua tshilejilu tshidi tshidimuija.+ 11 Kadi bana ba Kola kabavua bafue to.+

12 Bana ba balume ba Simeona+ bilondeshile mêku abu: ba kudi Nemuele, dîku dia bena Nemuele; ba kudi Yamina, dîku dia bena Yamina; ba kudi Yakina, dîku dia bena Yakina; 13 ba kudi Zela, dîku dia bena Zela; ba kudi Shawula, dîku dia bena Shawula. 14 Aa ke avua mêku a bena Simeona: bantu 22 200.+

15 Bana ba balume ba Gada+ bilondeshile mêku abu: ba kudi Sefona, dîku dia bena Sefona; ba kudi Hagi, dîku dia bena Hagi; ba kudi Shuni, dîku dia bena Shuni; 16 ba kudi Ozeni, dîku dia bena Ozeni; ba kudi Eli, dîku dia bena Eli; 17 ba kudi Alodi, dîku dia bena Alodi; ba kudi Aleli, dîku dia bena Aleli. 18 Aa ke avua mêku a bana ba balume ba Gada, ne bungi bua bantu babu bavuabu bafunde mêna buvua 40 500.+

19 Bana ba balume ba Yuda+ bavua Ele ne Onana.+ Kadi Ele ne Onana bakafuila mu buloba bua Kanâna.+ 20 Bana ba balume ba Yuda bilondeshile mêku abu: ba kudi Shela,+ dîku dia bena Shela; ba kudi Pelese,+ dîku dia bena Pelese; ba kudi Zela,+ dîku dia bena Zela. 21 Bana ba balume ba Pelese: ba kudi Heselona,+ dîku dia bena Heselona; ba kudi Hamula,+ dîku dia bena Hamula. 22 Aa ke avua mêku a Yuda, ne bungi bua bantu babu bavuabu bafunde mêna buvua 76 500.+

23 Bana ba balume ba Yisakâ+ bilondeshile mêku abu: ba kudi Tola,+ dîku dia bena Tola; ba kudi Puwaha, dîku dia bena Puna; 24 ba kudi Yashuba, dîku dia bena Yashuba; ba kudi Shimelona, dîku dia bena Shimelona. 25 Aa ke avua mêku a Yisakâ, ne bungi bua bantu babu bavuabu bafunde mêna buvua 64 300.+

26 Bana ba balume ba Zebulona+ bilondeshile mêku abu: ba kudi Selede, dîku dia bena Selede; ba kudi Elona, dîku dia bena Elona; ba kudi Yalele, dîku dia bena Yalele. 27 Aa ke avua mêku a bena Zebulona, ne bungi bua bantu babu bavuabu bafunde mêna buvua 60 500.+

28 Bana ba balume ba Jozefe+ bilondeshile mêku abu bavua Manashe ne Efelayima.+ 29 Bana ba balume ba Manashe:+ ba kudi Makî,+ dîku dia bena Makî; ne Makî wakalela Gilada. Ba kudi Gilada,+ dîku dia bena Gilada. 30 Aba ke bavua bana ba balume ba Gilada: ba kudi Yezê, dîku dia bena Yezê; ba kudi Heleke, dîku dia bena Heleke; 31 ba kudi Aseliele, dîku dia bena Aseliele; ba kudi Shekeme, dîku dia bena Shekeme; 32 ba kudi Shemida, dîku dia bena Shemida; ba kudi Hefê, dîku dia bena Hefê. 33 Kadi Selofehada muana wa Hefê kavua ne bana ba balume to, uvua anu ne bana ba bakaji,+ ne mêna a bana ba bakaji ba Selofehada+ avua Mahala, Noa, Hogela, Mileka, ne Tîsa. 34 Aa ke avua mêku a Manashe, ne bungi bua bantu babu bavuabu bafunde mêna buvua 52 700.+

35 Aba ke bavua bana ba balume ba Efelayima+ bilondeshile mêku abu: ba kudi Shutela,+ dîku dia bena Shutela; ba kudi Bekê, dîku dia bena Bekê; ba kudi Tahana, dîku dia bena Tahana. 36 Aba ke bavua bana ba balume ba Shutela: ba kudi Elana, dîku dia bena Elana. 37 Aa ke avua mêku a bana ba balume ba Efelayima, ne bungi bua bantu babu bavuabu bafunde mêna buvua 32 500.+ Bobu aba ke bavua bana ba Jozefe bilondeshile mêku abu.

38 Bana ba balume ba Benyamina+ bilondeshile mêku abu: ba kudi Bela,+ dîku dia bena Bela; ba kudi Ashabele, dîku dia bena Ashabele; ba kudi Ahilama, dîku dia bena Ahilama; 39 ba kudi Shefufama, dîku dia bena Shufama; ba kudi Hufama, dîku dia bena Hufama. 40 Bana ba balume ba Bela bavua Âda ne Nâmana:+ ba kudi Âda, dîku dia bena Âda; ba kudi Nâmana, dîku dia bena Nâmana. 41 Aba ke bavua bana ba balume ba Benyamina bilondeshile mêku abu, ne bungi bua bantu babu bavuabu bafunde mêna buvua 45 600.+

42 Aba ke bavua bana ba balume ba Dana+ bilondeshile mêku abu: ba kudi Shuhama, dîku dia bena Shuhama. Aa ke avua mêku a Dana bilondeshile mêku abu. 43 Mêku onso a bena Shuhama, bungi bua bantu babu buvuabu bafunde mêna buvua 64 400.+

44 Bana ba balume ba Ashê+ bilondeshile mêku abu: ba kudi Yimenaha, dîku dia bena Yimenaha; ba kudi Yishewi, dîku dia bena Yishewi; ba kudi Belia, dîku dia bena Belia; 45 ba kudi bana ba balume ba Belia: ba kudi Hebê, dîku dia bena Hebê; ba kudi Malekiele, dîku dia bena Malekiele. 46 Dîna dia muana wa Ashê wa bakaji divua Sela. 47 Aa ke avua mêku a bana ba balume ba Ashê, ne bungi bua bantu babu bavuabu bafunde mêna buvua 53 400.+

48 Bana ba balume ba Nafatale+ bilondeshile mêku abu: ba kudi Yasele, dîku dia bena Yasele; ba kudi Guni, dîku dia bena Guni; 49 ba kudi Yesê, dîku dia bena Yesê; ba kudi Shilema, dîku dia bena Shilema. 50 Aa ke avua mêku a Nafatale bilondeshile mêku abu, ne bungi bua bantu babu bavuabu bafunde mêna buvua 45 400.+

51 Bungi bua bena Isalele bonso bavuabu bafunde mêna buvua 601 730.+

52 Pashishe Yehowa wakambila Mose ne: 53 “Nenuabanyine bantu aba buloba bua buikale bumpianyi buabu bilondeshile mêna adibu bafunde.*+ 54 Bua bisumbu bia binene, udi ne bua kudiundisha bumpianyi, kadi bua bisumbu bia bikese, udi ne bua kukepesha bumpianyi.+ Nebapeshe tshisumbu tshionso bumpianyi bilondeshile bungi bua bantu badibu bafunde mêna. 55 Kadi nebabanye buloba ku nshobo.+ Nebapete bumpianyi buabu bilondeshile mêna a bisa bia batatuabu. 56 Bumpianyi buonso nebumanyike ku nshobo ne nebabuabanyine bisumbu bia binene ne bisumbu bia bikese.”

57 Mpindieu aba ke bena Lewi bavuabu bafunde mêna+ bilondeshile mêku abu: ba kudi Gêshona, dîku dia bena Gêshona; ba kudi Kohata,+ dîku dia bena Kohata; ba kudi Melali, dîku dia bena Melali. 58 Aa ke avua mêku a bena Lewi: dîku dia bena Libini,+ dîku dia bena Hebelone,+ dîku dia bena Mali,+ dîku dia bena Mushi,+ dîku dia bena Kola.+

Kohata wakalela Amalama.+ 59 Dîna dia mukaji wa Amalama divua Yokebede,+ muana wa Lewi uvua mukajende mumulelele mu Ejipitu. Wakalelela Amalama Alona ne Mose ne Mîyama muanabu wa bakaji.+ 60 Pashishe bakalelela Alona Nadaba, Abihu, Eleazâ, ne Itamâ.+ 61 Kadi Nadaba ne Abihu bakafua bualu bavua bafile kapia kavua kakayi kanyishibue kumpala kua Yehowa.+

62 Bungi bua bantu bonso bavuabu bafunde mêna buvua binunu 23, balume bonso ba ngondo umue kubanda.+ Bualu kabavua babafunde mêna munkatshi mua bena Isalele+ bu muvuabu kabayi mua kubapesha bumpianyi munkatshi mua bena Isalele to.+

63 Aba ke bantu bavuabu bafunde mêna kudi Mose ne muakuidi Eleazâ pavuabu bafunde mêna a bena Isalele mu mpata ya bipela ya Moaba pabuipi ne Yadene bitangilangane ne Yeliko. 64 Kadi munkatshi muabu kamuvua muntu nansha umue uvuabu bafunde dîna kudi Mose ne muakuidi Alona pavuabu babale bungi bua bena Isalele mu tshipela tshia Sinai to.+ 65 Bualu Yehowa uvua muambe bua bualu buabu ne: “Kakuyi mpata nebafuile mu tshipela.”+ Nunku kakuvua muntu nansha umue wa kudibu uvua mushale pa kumbusha Kaleba muana wa Yefune ne Yoshua muana wa Nuna to.+

27 Pashishe bana ba bakaji ba Selofehada,+ muana wa Hefê, muana wa Gilada, muana wa Makî, muana wa Manashe, ba mu mêku a Manashe muana wa Jozefe bakalua. Mêna a bana bende ba bakaji avua Mahala, Noa, Hogela, Mileka, ne Tîsa. 2 Bakimana kumpala kua Mose, kua muakuidi Eleazâ, kua bamfumu,+ ne kua tshisumbu tshijima ku tshibuelelu tshia ntenta wa kusambakena, kuambabu ne: 3 “Tatuetu uvua mufuile mu tshipela, kadi kavua munkatshi mua tshisumbu tshia bena dia Kola tshivua tshidisangishe bua kuluisha Yehowa to,+ kadi uvua mufue bua mpekatu wende nkayende ne kavua mulele muana wa balume nansha umue. 4 Bua tshinyi dîna dia tatuetu didi ne bua kujimina mu dîku diabu anu bualu kavua mulele muana wa balume? Tupesha bumpianyi munkatshi mua bana babu ne tatu.” 5 Nunku Mose wakaya ne tshilumbu tshiabu kumpala kua Yehowa.+

6 Ke Yehowa kuambila Mose nunku: 7 “Bana ba bakaji ba Selofehada mbambilamu. Mu mishindu yonso udi ne bua kubapesha buloba bu bumpianyi munkatshi mua bana babu ne tatuabu ba balume ne kubapesha bumpianyi bua tatuabu.+ 8 Pashishe ambila bena Isalele ne: ‘Muntu yeye mufue kayi mulele muana wa balume, dîba adi nudi ne bua kuenza bua bumpianyi buende buye kudi muanende wa bakaji. 9 Yeye kayi ne muana wa bakaji, nenupeshe bana babu ba balume bumpianyi buende. 10 Yeye kayi ne bana babu ba balume, nenupeshe bana babu ne tatuende ba balume bumpianyi buende. 11 Tatuende yeye kayi ne bana babu ba balume, nenupeshe mulela wa pabuipi menemene wa mu dîku diabu bumpianyi buende, ne nebuikale buende. Dipangadika edi nedikale mukenji mufunda bua bena Isalele, anu muvua Yehowa mutumine Mose dîyi bua kuenza.’”

12 Pashishe Yehowa wakambila Mose ne: “Banda ku mukuna wa Abalima eu,+ umone buloba bungapesha bena Isalele.+ 13 Pawabumona, wewe pebe neusangishibue kudi bena mu tshisamba tshienu*+ anu muvua muanenu Alona musangishibue kudibu,+ 14 bualu pavua tshisumbu tshitande nanyi mu tshipela tshia Sine, nuenu nuvua babenge kutumikila dîyi dianyi bua kunjidila kumpala kuabu ku diambuluisha dia mâyi.+ (Au mmâyi a Meliba+ ku Kadeshe+ mu tshipela tshia Sine.)”+

15 Ke Mose kuambila Yehowa ne: 16 “Yehowa Nzambi udi upesha bantu bonso bukole bua muoyo* atekaku muntu ku mutu kua tshisumbu etshi 17 udi mua kupatuka ne kubuela kumpala kuabu ne udi mua kubapatula ne kubabueja, bua tshisumbu tshia Yehowa katshikadi bu mikoko idi kayiyi ne mulami.” 18 Nunku Yehowa wakambila Mose ne: “Angata Yoshua muana wa Nuna, muntu udi ne nyuma munda muende, ne umutentekele tshianza.+ 19 Pashishe umuimanyike kumpala kua muakuidi Eleazâ ne kumpala kua tshisumbu tshijima, ne udi ne bua kumuteka mu mudimu wende mu mêsu abu.+ 20 Udi ne bua kumupesha ndambu wa bukokeshi* buebe+ bua tshisumbu tshijima tshia bena Isalele tshimuteleje.+ 21 Neimane kumpala kua muakuidi Eleazâ ne yeye neikale umuebejila malu kudi Yehowa bua kumanya dipangadika diende ku diambuluisha dia Ulima.+ Nebikale bapatuka ku dîyi diende ne nebikale babuela ku dîyi diende, yeye ne bena Isalele bonso badi nende ne tshisumbu tshijima.”

22 Nunku Mose wakenza anu muvua Yehowa mumutumine dîyi bua kuenza. Wakangata Yoshua, kumuimanyikaye kumpala kua muakuidi Eleazâ ne kumpala kua tshisumbu tshijima, 23 kumutentekelaye bianza,+ kumujadikaye mu mudimu wende anu muvua Yehowa muambe ku butuangaji bua Mose.+

28 Pashishe Yehowa wakambila Mose ne: 2 “Tumina bena Isalele dîyi, ubambile ne: ‘Nudimuke bua kumpesha mulambu wanyi, biakudia* bianyi. Milambu yanyi miosha pa kapia bu dipembu dimpe* idi ne bua kufidibua mu bikondo biayi.’+

3 “Nunku ubambile ne: ‘Eu ke mulambu muosha pa kapia unuapesha Yehowa: bana ba mikoko babidi ba mpanga bimpe ba tshidimu tshimue ku dituku, bu mulambu wa kuosha wa kufila pa tshibidilu.+ 4 Neulambule muana wa mukoko umue wa mpanga mu dinda, ne neulambule muana wa mukoko wa mpanga mukuabu au pakadi dîba dibuele, kumpala kua butuku kuila,*+ 5 pamue ne tshia dikumi tshia efa* wa bukula bunefuke busambakaja ne tshia binayi tshia hine* wa mafuta a olive idibu batue bu mulambu wa ntete.+ 6 Mmulambu wa kuosha wa kufila pa tshibidilu+ uvuabu bajadike ku mukuna wa Sinai bu dipembu dimpe,* mulambu muosha pa kapia bua Yehowa, 7 pamue ne mulambu wawu wa bia kunua, tshia binayi tshia hine bua muana wa mukoko yonso wa mpanga.+ Upongolole maluvu makole muaba wa tshijila bu mulambu wa bia kunua wa Yehowa. 8 Neulambule muana wa mukoko wa mpanga mukuabu au pakadi dîba dibuele, kumpala kua butuku kuila.* Neumufile pamue ne mulambu wa ntete wa muomumue ne uvuabu bafile mu dinda ne mulambu wawu wa bia kunua wa muomumue bu mulambu muosha pa kapia bu dipembu dimpe* kudi Yehowa.+

9 “‘Kadi dituku dia Nsabatu,+ mulambu newikale wa bana ba mikoko babidi ba mpanga bimpe ba tshidimu tshimue ne bia dikumi bibidi bia tshipiminu tshia efa wa bukula bunefuke busambakaja ne mafuta bu mulambu wa ntete, pamue ne mulambu wawu wa bia kunua. 10 Eu ke mulambu wa kuosha bua Nsabatu, pamue ne mulambu wa kuosha wa kufila pa tshibidilu ne mulambu wawu wa bia kunua.+

11 “‘Ku ntuadijilu kua ngondo yonso* nenulambule Yehowa mulambu wa kuosha wa ngombe milume ibidi itshidi miana, tshimpanga tshia mukoko tshimue ne bana ba mikoko muanda mutekete ba mpanga bimpe ba tshidimu tshimue,+ 12 ne bia dikumi bisatu bia efa wa bukula bunefuke busambakaja ne mafuta bu mulambu wa ntete+ bua ngombe mulume yonso, ne bia dikumi bibidi bia efa wa bukula bunefuke busambakaja ne mafuta bu mulambu wa ntete bua tshimpanga tshia mukoko,+ 13 ne tshia dikumi tshia efa wa bukula bunefuke busambakaja ne mafuta bu mulambu wa ntete bua muana wa mukoko yonso wa mpanga, bu mulambu muosha, dipembu dimpe,*+ mulambu muosha pa kapia bua Yehowa. 14 Milambu yayi ya bia kunua neyikale: tshitupa tshia hine wa mvinyo bua ngombe mulume+ ne tshia bisatu tshia hine bua tshimpanga tshia mukoko+ ne tshia binayi tshia hine bua muana wa mukoko wa mpanga.+ Eu mmulambu wa kuosha wa ku ngondo wa kufila ngondo yonso munkatshi mua tshidimu. 15 Pa kumbusha mulambu wa kuosha wa kufila pa tshibidilu pamue ne mulambu wawu wa bia kunua, nebalambule kabidi Yehowa muana wa mbuji bu mulambu wa mpekatu.

16 “‘Mu ngondo wa kumpala mu dituku dia 14 dia ngondo au, nekuikale Pasaka wa Yehowa.+ 17 Dituku dia 15 dia ngondo au, nekuikale tshibilu. Nenudie mampa kaayi mela luevene matuku muanda mutekete.+ 18 Dituku dia kumpala nekuikale masangisha a tshijila. Kanuena ne bua kuenza mudimu mukole nansha umue. 19 Nenufile mulambu wa kuosha muosha pa kapia bua Yehowa wa ngombe milume ibidi itshidi miana, tshimpanga tshia mukoko tshimue, ne bana ba mikoko muanda mutekete ba mpanga ba tshidimu tshimue. Nudi ne bua kulambula nyama ya mimpe.+ 20 Nenuyilambule ne milambu yayi ya ntete ya bukula bunefuke busambakaja ne mafuta,+ bia dikumi bisatu bia efa bua ngombe mulume ne bia dikumi bibidi bia efa bua tshimpanga tshia mukoko. 21 Neulambule tshia dikumi tshia efa bua muana wa mukoko yonso wa ku bana ba mikoko muanda mutekete ba mpanga abu, 22 pamue ne mbuji umue bu mulambu wa mpekatu bua kunubuikidila mpekatu. 23 Pa kumbusha mulambu wa kuosha wa mu dinda, unudi nufila bua mulambu wa kuosha wa kufila pa tshibidilu, nudi ne bua kufila kabidi milambu eyi. 24 Nenulambule bintu ebi mushindu wa muomumue dituku dionso bua matuku muanda mutekete bu biakudia,* mulambu muosha pa kapia bu dipembu dimpe* kudi Yehowa. Mbia kufila pamue ne mulambu wa kuosha wa kufila pa tshibidilu ne mulambu wawu wa bia kunua. 25 Dituku dia muanda mutekete nudi ne bua kuenza masangisha a tshijila.+ Kanuena ne bua kuenza mudimu mukole nansha umue.+

26 “‘Dituku dia bintu bidi bikola bia kumpala,+ panudi nufila mulambu wa ntete mipiamipia kudi Yehowa,+ nudi ne bua kuenza masangisha a tshijila mu tshibilu tshienu tshia mbingu.+ Kanuena ne bua kuenza mudimu mukole nansha umue.+ 27 Nenufile mulambu wa kuosha bua dipembu dimpe* kudi Yehowa wa ngombe milume ibidi itshidi miana, tshimpanga tshimue tshia mukoko ne bana ba mikoko muanda mutekete ba mpanga ba tshidimu tshimue,+ 28 ne mulambu wayi wa ntete wa bukula bunefuke busambakaja ne mafuta, bia dikumi bisatu bua ngombe mulume yonso, bia dikumi bibidi bia efa bua tshimpanga tshia mukoko, 29 tshia dikumi tshia efa bua muana wa mukoko yonso wa ku bana ba mikoko muanda mutekete ba mpanga abu; 30 pamue ne muana wa mbuji umue bua kunubuikidila mpekatu.+ 31 Nenuyilambule kusakidila ku mulambu wa kuosha wa kufila pa tshibidilu ne mulambu wawu wa ntete. Nyama eyi idi ne bua kuikala ya mimpe,+ pamue ne milambu yayi ya bia kunua.

29 “‘Mu ngondo wa muanda mutekete, dituku dia kumpala dia ngondo, nenuenze masangisha a tshijila. Kanuena ne bua kuenza mudimu mukole nansha umue to.+ Ndituku dinuikale ne bua kuela mpungi.+ 2 Nenufile mulambu wa kuosha bua dipembu dimpe* kudi Yehowa: muana mulume wa ngombe umue, tshimpanga tshia mukoko tshimue, ne bana ba mikoko ba mpanga muanda mutekete ba tshidimu tshimue, nyama yonso mikale mimpe, 3 ne mulambu wayi wa ntete wa bukula bunefuke busambakaja ne mafuta: bia dikumi bisatu bia tshipiminu tshia efa bua ngombe mulume, bia dikumi bibidi bia efa bua tshimpanga tshia mukoko, 4 ne tshia dikumi tshia efa bua muana wa mukoko yonso wa ku bana ba mikoko ba mpanga muanda mutekete, 5 ne mbuji wa mpumbu umue utshidi muana bu mulambu wa mpekatu bua kunubuikidila mpekatu. 6 Milambu eyi nya kusakidila ku mulambu wa kuosha wa ku ngondo ne mulambu wawu wa ntete+ ne ku mulambu wa kuosha wa kufila pa tshibidilu ne mulambu wawu wa ntete,+ pamue ne milambu yayi ya bia kunua,+ bilondeshile mutubu bayifila pa tshibidilu, bu dipembu dimpe,* mulambu muosha pa kapia bua Yehowa.

7 “‘Mu dituku dia dikumi dia ngondo wa muanda mutekete eu nenuenze masangisha a tshijila,+ ne nudi ne bua kudikengesha.* Kanuena ne bua kuenza mudimu nansha umue to.+ 8 Nenufile mulambu wa kuosha kudi Yehowa bu dipembu dimpe:* muana mulume wa ngombe umue, tshimpanga tshia mukoko tshimue ne bana ba mikoko ba mpanga muanda mutekete ba tshidimu tshimue, nyama yonso mikale ya mimpe.+ 9 Nenufile kabidi mulambu wayi wa ntete wa bukula bunefuke busambakaja ne mafuta, bia dikumi bisatu bia efa bua ngombe mulume, bia dikumi bibidi bia efa bua tshimpanga tshia mukoko, 10 tshia dikumi tshia efa bua muana wa mukoko yonso wa ku bana ba mikoko ba mpanga muanda mutekete, 11 ne muana wa mbuji bu mulambu wa mpekatu, pa kumbusha mulambu wa mpekatu wa kubuikila nawu mpekatu+ ne mulambu wa kuosha wa kufila pa tshibidilu ne mulambu wawu wa ntete, pamue ne milambu yayi ya bia kunua.

12 “‘Mu dituku dia 15 dia ngondo wa muanda mutekete nenuenze masangisha a tshijila. Kanuena ne bua kuenza mudimu mukole nansha umue, ne nudi ne bua kuenza tshibilu tshia Yehowa matuku muanda mutekete.+ 13 Nenufile mulambu wa kuosha,+ mulambu muosha pa kapia, wa dipembu dimpe* kudi Yehowa: ngombe milume 13 itshidi miana, bimpanga bia mikoko bibidi, ne bana ba mikoko ba mpanga 14 ba tshidimu tshimue, nyama yonso mikale ya mimpe.+ 14 Nenufile mulambu wayi wa ntete wa bukula bunefuke busambakaja ne mafuta: bia dikumi bisatu bia efa bua ngombe mulume yonso wa ku ngombe milume 13 ayi, bia dikumi bibidi bia efa bua tshimpanga tshionso tshia ku bimpanga bia mikoko bibidi abi, 15 ne tshia dikumi tshia efa bua muana wa mukoko yonso wa ku bana ba mikoko ba mpanga 14 abu, 16 ne muana wa mbuji umue bu mulambu wa mpekatu, pa kumbusha mulambu wa kuosha wa kufila pa tshibidilu, mulambu wawu wa ntete ne mulambu wawu wa bia kunua.+

17 “‘Dituku dibidi nenufile ngombe milume 12 itshidi miana, bimpanga bia mikoko bibidi, ne bana ba mikoko ba mpanga 14 ba tshidimu tshimue, nyama yonso mikale ya mimpe,+ 18 ne mulambu wayi wa ntete ne milambu yayi ya bia kunua bua ngombe milume, bimpanga bia mikoko, ne bana ba mikoko ba mpanga bilondeshile bungi bua nyama anu mutubu benza pa tshibidilu, 19 ne muana wa mbuji bu mulambu wa mpekatu, pa kumbusha mulambu wa kuosha wa kufila pa tshibidilu ne mulambu wawu wa ntete, pamue ne milambu yayi ya bia kunua.+

20 “‘Dituku disatu nenufile ngombe milume 11, bimpanga bia mikoko bibidi, ne bana ba mikoko ba mpanga 14 ba tshidimu tshimue, nyama yonso mikale ya mimpe,+ 21 ne mulambu wayi wa ntete, ne milambu yayi ya bia kunua bua ngombe milume, bimpanga bia mikoko ne bana ba mikoko ba mpanga bilondeshile bungi bua nyama anu mutubu benza pa tshibidilu, 22 ne mbuji umue bu mulambu wa mpekatu, pa kumbusha mulambu wa kuosha wa kufila pa tshibidilu ne mulambu wawu wa ntete ne mulambu wawu wa bia kunua.+

23 “‘Dituku dinayi nenufile ngombe milume dikumi, bimpanga bia mikoko bibidi, ne bana ba mikoko ba mpanga 14 ba tshidimu tshimue, nyama yonso mikale ya mimpe,+ 24 mulambu wayi wa ntete ne milambu yayi ya bia kunua bua ngombe milume, bimpanga bia mikoko ne bana ba mikoko ba mpanga bilondeshile bungi bua nyama anu mutubu benza pa tshibidilu, 25 ne muana wa mbuji bu mulambu wa mpekatu, pa kumbusha mulambu wa kuosha wa kufila pa tshibidilu, mulambu wawu wa ntete ne mulambu wawu wa bia kunua.+

26 “‘Dituku ditanu nenufile ngombe milume tshitema, bimpanga bia mikoko bibidi ne bana ba mikoko ba mpanga 14 ba tshidimu tshimue, nyama yonso mikale ya mimpe,+ 27 ne mulambu wayi wa ntete ne milambu yayi ya bia kunua bua ngombe milume, bimpanga bia mikoko ne bana ba mikoko ba mpanga bilondeshile bungi bua nyama anu mutubu benza pa tshibidilu, 28 ne mbuji umue bu mulambu wa mpekatu, pa kumbusha mulambu wa kuosha wa kufila pa tshibidilu ne mulambu wawu wa ntete ne mulambu wawu wa bia kunua.+

29 “‘Dituku disambombo nenufile ngombe milume muanda mukulu, bimpanga bia mikoko bibidi, ne bana ba mikoko ba mpanga 14 ba tshidimu tshimue, nyama yonso mikale ya mimpe,+ 30 ne mulambu wayi wa ntete ne milambu yayi ya bia kunua bua ngombe milume, bimpanga bia mikoko, ne bana ba mikoko ba mpanga bilondeshile bungi bua nyama anu mutubu benza pa tshibidilu, 31 ne mbuji umue bu mulambu wa mpekatu, pa kumbusha mulambu wa kuosha wa kufila pa tshibidilu, mulambu wawu wa ntete ne milambu yawu ya bia kunua.+

32 “‘Dituku dia muanda mutekete nenufile ngombe milume muanda mutekete, bimpanga bia mikoko bibidi, ne bana ba mikoko ba mpanga 14 ba tshidimu tshimue, nyama yonso mikale ya mimpe,+ 33 ne mulambu wayi wa ntete ne milambu yayi ya bia kunua bua ngombe milume, bimpanga bia mikoko ne bana ba mikoko ba mpanga bilondeshile bungi bua nyama anu mutubu bayifila pa tshibidilu, 34 ne mbuji umue bu mulambu wa mpekatu, pa kumbusha mulambu wa kuosha wa kufila pa tshibidilu, mulambu wawu wa ntete ne mulambu wawu wa bia kunua.+

35 “‘Dituku dia muanda mukulu nenuenze masangisha a pa buawu. Kanuena ne bua kuenza mudimu mukole nansha umue.+ 36 Nenufile mulambu wa kuosha, mulambu muosha pa kapia bu dipembu dimpe* kudi Yehowa: ngombe mulume umue, tshimpanga tshia mukoko tshimue, ne bana ba mikoko ba mpanga muanda mutekete ba tshidimu tshimue, nyama yonso mikale ya mimpe,+ 37 ne mulambu wayi wa ntete ne milambu yayi ya bia kunua bua ngombe mulume, tshimpanga tshia mukoko ne bana ba mikoko ba mpanga bilondeshile bungi bua nyama anu mutubu benza pa tshibidilu, 38 ne mbuji umue bu mulambu wa mpekatu, pa kumbusha mulambu wa kuosha wa kufila pa tshibidilu ne mulambu wawu wa ntete ne mulambu wawu wa bia kunua.+

39 “‘Nenulambule Yehowa bintu ebi mu bibilu bienu,+ kusakidila ku milambu yenu ya kukumbaja nayi mitshipu+ ne milambu yenu ya budisuile+ bu milambu yenu ya kuosha+ ne milambu yenu ya ntete+ ne milambu yenu ya bia kunua+ ne milambu yenu ya diumvuangana.’”+ 40 Mose wakambila bena Isalele malu onso avua Yehowa mumutumine dîyi bua kuenza.

30 Pashishe Mose wakakula ne bamfumu+ ba bisa bia Isalele, wamba ne: “Edi ndîyi didi Yehowa mutume: 2 Bikala muntu mulume mulaye Yehowa bualu anyi muenze mutshipu+ bua kudienzela* mutshipu+ wa kudikanda, kena ne bua kutupa ku dîyi diende to.+ Udi ne bua kuenza bualu buonso buvuaye mulaye bua kuenza.+

3 “Bikala muntu mukaji mulaye Yehowa bualu anyi mudienzele mutshipu wa kudikanda patshidiye nsongakaji mu nzubu mua tatuende 4 ne tatuende udi umvua dilaya diende anyi mutshipu wende wa kudikanda udiye mudienzele* ne tatuende kena wamba bualu, mitshipu yende yonso neyikale ne mushinga, ne mutshipu wonso wa kudikanda udiye mudienzele newikale ne mushinga. 5 Kadi bikala tatuende mumukandike padiye umvua ne: mmudienzele mitshipu anyi mitshipu ya kudikanda, kabiakuikala ne mushinga to. Yehowa neamufuile luse bualu tatuende mmumukandike.+

6 “Kadi biamuselabu kudi mulume patshidiye ku mutshipu wende anyi ku dilaya divuaye mudienzele kayi muele meji bimpe 7 ne bayende udi umvua bualu abu ne kena wamba bualu dituku didiye ubumvua, malaya ende anyi mitshipu yende ya kudikanda bidiye mudienzele nebikale ne mushinga. 8 Kadi bikala bayende mumukandike dituku didiye umvua bualu abu, udi mua kushipa mutshipu au anyi dilaya divua mukaji mudienzele kayi muele meji bimpe,+ ne Yehowa neafuile mukaji au luse.

9 “Bikala mukaji mukamba anyi mukaji udi dibaka difue mulaye bualu, bualu bonso budiye mudisuike bua kuenza nebuikale pa mutu pende.

10 “Kadi bikala muntu mukaji mudienzele dilaya anyi mutshipu wa kudikanda padiye mu nzubu mua bayende, 11 ne bayende mmumvue bualu abu ne ki mmuambe bualu anyi mubenge, malaya ende onso anyi mutshipu wonso wa kudikanda bidiye mudienzele nebikale ne mushinga. 12 Kadi bikala bayende mushipe mushipilamu malaya kayi onso anyi mutshipu kayi wonso wa kudikanda bivua mukaji muditshipe bua kuenza, dituku didiye umvua bualu buabi, kabiakuikala ne mushinga to.+ Bayende mmubishipe, ne Yehowa neafuile mukaji luse. 13 Bua dilaya dionso anyi diditshipa dionso didi ditangila mutshipu wa kudikanda bua kudipangisha amue malu,* bayende udi mua kubijadika anyi bayende udi mua kubishipa. 14 Kadi bikala bayende kayi wamba bualu padi matuku enda apita, udi pende ujadika malaya a mukaji onso anyi mitshipu yende ya kudikanda bidi pa mutu pende. Udi ubijadika bualu kavua muambe bualu dituku divuaye mumvue mukajende ubienza. 15 Kadi yeye mulue kubishipa pashishe, matuku ndambu panyima pa dituku divuaye mubiumvue, neambule bujitu bua dipila dia mukajende.+

16 “Aa mmêyi ne mikandu bivua Yehowa muambile Mose pa bidi bitangila mulume ne mukajende, ne pa bidi bitangila tatu ne muanende wa bakaji utshidi nsonga udi musombele mu nzubu muende.”

31 Pashishe Yehowa wakambila Mose ne: 2 “Usombuele+ bena Isalele kudi bena Midiyana.+ Pashishe neusangishibue kudi bena mu tshisamba tshienu.”*+

3 Ke Mose kuakula ne bantu, kuambaye ne: “Peshayi bantu balume ba munkatshi muenu bia mvita bua baye kuluangana* ne Midiyana ne bua kukumbaja disombuela dia Yehowa kudi Midiyana. 4 Nenutume bantu tshinunu ba mu tshisa tshionso tshia mu bisa bia Isalele ku mvita.” 5 Nunku bakasungula bantu tshinunu mu tshisa tshionso mu binunu bia Isalele,+ bantu binunu 12 bikale ne bia mvita bua kuluangana.*

6 Pashishe Mose wakabatuma ku mvita, bantu tshinunu ba mu tshisa tshionso, pamue ne Pinehasa+ muana wa Eleazâ muakuidi wa tshiluilu, uvua ne bintu bia tshijila ne mpungi ya mvita+ mu tshianza tshiende. 7 Bakela Midiyana mvita, anu muvua Yehowa mutumine Mose dîyi, kushipabu bantu balume bonso. 8 Bakashipa bakalenge ba Midiyana pamue ne bantu bakuabu bavuabu bashipe, mmumue ne: Evi, Lekeme, Sû, Hû, ne Leba, bakalenge batanu ba Midiyana. Bakashipa kabidi Balâma+ muana wa Beô ku muele wa mvita. 9 Kadi bena Isalele bakakuata bantu bakaji ne bana ba mu Midiyana, kuyabu nabu. Bakapawula kabidi nyama yabu yonso ya pambelu, bimuna biabu bionso, ne bintu biabu bionso. 10 Bakuosha bimenga biabu bionso bivuabu basombele ne bitudilu* biabu bionso ne kapia. 11 Bakangata bionso bivuabu banyenge ne bionso bivuabu bapawule, bantu ne nyama bionso. 12 Pashishe bakalua ne bantu bavuabu bakuate, bintu bivuabu bapawule ne bivuabu banyenge kudi Mose ne muakuidi Eleazâ ne kudi tshisumbu tshia bena Isalele, mu tshitudilu mu mpata ya bipela ya Moaba+ pabuipi ne Yadene bitangilangane ne Yeliko.

13 Nunku Mose ne muakuidi Eleazâ ne bamfumu ba tshisumbu bakapatuka bua kusambakena nabu pambelu pa tshitudilu. 14 Kadi Mose wakakuatshila bantu basungula ba mu tshiluilu, bamfumu ba bantu tshinunu tshinunu ne bamfumu ba bantu lukama lukama bavua bafumina ku mvita tshiji. 15 Mose wakabambila ne: “Nudi bashiye bantu bakaji bonso ne muoyo anyi? 16 Monayi! Bobu aba ke bavua basake bena Isalele ku dipanga lulamatu+ kudi Yehowa ku dîyi dia Balâma mu tshilumbu tshia Peô,+ nunku tshipupu kukuatatshi tshisumbu tshia Yehowa.+ 17 Mpindieu nudi ne bua kushipa muana wa balume yonso munkatshi mua bana ne kushipa muntu mukaji yonso ukadi musangile ne mulume. 18 Kadi nudi mua kushiya bana ba bakaji bonso badi kabayi banji kusangila ne balume ne muoyo.+ 19 Pashishe nudi ne bua kushala pambelu pa tshitudilu matuku muanda mutekete. Muntu yonso wa kunudi udi mushipe muntu,* ne muntu yonso wa kunudi udi mulenge muntu mushipa+ udi ne bua kudikezula+ mu dituku disatu ne mu dituku dia muanda mutekete, nuenu ne bantu banudi bakuate. 20 Nudi ne bua kukezula tshilamba tshionso, tshintu tshionso tshia tshiseba, tshintu tshionso tshienza ne miosa ya mbuji ne tshintu tshionso tshienza ne dibaya ku mpekatu.”

21 Pashishe muakuidi Eleazâ wakambila bantu ba mu tshiluilu bavua baye ku mvita ne: “Edi ndîyi difunda dia mukenji divua Yehowa muelele Mose ne: 22 ‘Anu or, tshiamu tshia arjan, tshiamu tshia mitaku, tshiamu tshifiike, tshiamu tshia eten, ne tshiamu tshia plomb, 23 tshintu tshionso tshidi mua kupitshila mu kapia, nudi ne bua kutshipitshisha mu kapia ne netshikale tshikezuke. Kadi nudi ne bua kutshikezula kabidi ne mâyi a kukezulangana nawu.+ Tshintu tshionso tshidi katshiyi mua kupitshila mu kapia nudi ne bua kutshitua mu mâyi. 24 Nudi ne bua kusukula bilamba bienu dituku dia muanda mutekete ne kuikala bakezuke, ne pashishe nudi mua kubuela mu tshitudilu.’”+

25 Pashishe Yehowa wakambila Mose nunku: 26 Bala bungi bua bintu bivuabu bapawule, ubala bionso bivuabu bakuate, bantu ne nyama; wenze nunku pamue ne muakuidi Eleazâ ne bamfumu ba nzubu ya batatuabu ba mu tshisumbu. 27 Tapulula bintu bivuabu bapawule mu bitupa bibidi bua kubiabanyina bantu ba mu tshiluilu bavua baye ku mvita ne bena mu tshisumbu bakuabu bonso.+ 28 Newangate bu tshitadi tshia Yehowa kudi basalayi bavua baye ku mvita, anyima* umue mu anyima 500 yonso, mu bantu, mu ngombe, mu mpunda ne mu mikoko. 29 Nenutshiangate mu tshia bibidi tshiabu ne nenutshipeshe muakuidi Eleazâ bu dipa dia Yehowa.+ 30 Mu tshia bibidi tshidibu bapeshe bena Isalele newangate umue mu 50, mu bantu, mu ngombe, mu mpunda, mu mikoko, ne mu nyama ya pambelu ya mishindu yonso, ne neubipeshe bena Lewi+ badi batangila midimu idi itangila ntenta wa tshitendelelu wa Yehowa.”+

31 Nunku Mose ne muakuidi Eleazâ bakenza anu muvua Yehowa muambile Mose bua kuenza. 32 Bintu bivuabu banyenge, mmumue ne: bintu bivua bishale ku bivuabu bapawule bivua bantu bavua baye ku mvita bangate, bivua mikoko binunu 675, 33 ngombe binunu 72, 34 ne mpunda binunu 61. 35 Bantu bakaji bavua kabayi banji kusangila ne balume+ bavua bantu* binunu 32. 36 Tshia bibidi tshia bintu tshivuabu babanyine bantu bavua baye ku mvita tshivua ne mikoko 337 500. 37 Tshitadi tshia Yehowa tshia mu mikoko tshivua tshia mikoko 675. 38 Kuvua ngombe binunu 36, ne tshitadi tshiayi tshia Yehowa tshia ngombe 72. 39 Kuvua mpunda 30 500, ne tshitadi tshiayi tshia Yehowa tshivua tshia mpunda 61. 40 Kuvua kabidi bantu* binunu 16, ne tshitadi tshiabu tshia Yehowa tshivua tshia bantu* 32. 41 Pashishe Mose wakafila tshitadi atshi kudi muakuidi Eleazâ,+ bu dipa dia Yehowa, anu muvua Yehowa mutumine Mose dîyi bua kuenza.

42 Mu tshia bibidi tshia bintu tshia bena Isalele tshivua Mose mutapulule ku tshitupa tshia bintu bia bantu bavua baye kuluangana mvita, 43 tshia bibidi atshi tshivua ne mikoko 337 500, 44 ne ngombe binunu 36, 45 ne mpunda 30 500, 46 ne bantu* binunu 16. 47 Pashishe Mose wakangata muntu umue mu bantu 50 ne nyama umue mu nyama 50 mu tshia bibidi tshia bena Isalele, yeye kubipesha bena Lewi+ bavua batangila mudimu wa ku ntenta wa tshitendelelu wa Yehowa+ anu muvua Yehowa mutumine Mose dîyi bua kuenza.

48 Pashishe bantu basungula ba mu binunu bia mu tshiluilu,+ bamfumu ba bantu tshinunu tshinunu ne bamfumu ba bantu lukama lukama, bakalua kudi Mose, 49 kuambilabu Mose ne: “Bena mudimu bebe mbabale bungi bua bantu bavua baye ku mvita ku bulombodi buetu, ne muntu nansha umue wa kutudi ki mmujimine to.+ 50 Nunku anyisha bua muntu yonso wa kutudi afile bidiye mupete bu mulambu wa Yehowa: bintu bia or, shene ya ku mikolo, bikanu bia ku maboko, mpeta ya kutua nayi bimanyinu, tukanu tua ku matshi ne bilengejilu bikuabu, bua kutubuikidila mpekatu* kumpala kua Yehowa.”

51 Nunku Mose ne muakuidi Eleazâ bakangata or uvuabu bafile, mmumue ne: bilengejilu bionso. 52 Or yonso wa mulambu uvuabu bapeshe Yehowa kudi bamfumu ba bantu tshinunu tshinunu ne bamfumu ba bantu lukama lukama uvua nshekele* 16 750. 53 Muntu yonso wa mu tshiluilu uvua muangate tshiende tshitupa tshia bintu bivuabu bapawule. 54 Mose ne muakuidi Eleazâ bakangata or kudi bamfumu ba bantu tshinunu tshinunu ne ba bantu lukama lukama, kubuelabu nende mu ntenta wa kusambakena bu divuluija* bua tshisamba tshia Isalele kumpala kua Yehowa.

32 Mpindieu bana ba balume ba Lubena+ ne bana ba balume ba Gada+ bavua ne bimuna bia bungi menemene, bobu kumona ne: buloba bua Yazê+ ne bua Gilada buvua buloba buimpe bua bimuna. 2 Nunku bana ba balume ba Gada ne bana ba balume ba Lubena bakalua kudi Mose, kudi muakuidi Eleazâ ne kudi bamfumu ba tshisumbu, kuambabu ne: 3 “Atalota, Dibona, Yazê, Nimela, Heshebona,+ Eleale, Sebama, Nebo,+ ne Beone,+ 4 buloba buvua Yehowa mutshimune kumpala kua tshisumbu tshia Isalele,+ mbuloba buimpe bua bimuna, ne bena mudimu bebe badi ne bimuna bia bungi.”+ 5 Bakamba kabidi ne: “Bituikala bakulengelele, itaba bapeshe bena mudimu bebe buloba ebu bua buikale buabu. Kutusambuishi Yadene to.”

6 Ke Mose kuambila bana ba balume ba Gada ne bana ba balume ba Lubena ne: “Bana benu nebaye ku mvita panudi nuenu nushala basombe muaba eu anyi? 7 Bua tshinyi nudi nutekesha tshisamba tshia Isalele mu mikolo bua katshisabuki bua kubuela mu buloba budi Yehowa mujadike bua kubapesha? 8 Ke tshivua batatuenu benze pamvua mubatume kumbukila ku Kadeshe-bânea bua kutangila buloba.+ 9 Pavuabu babande mu Tshibandabanda* tshia Eshekola+ ne bamone buloba, bakatekesha tshisamba tshia Isalele mu mikolo bua katshiyi mu buloba buvua Yehowa ne bua kubapesha.+ 10 Tshiji tshia Yehowa tshiakatema dituku adi, nunku kuditshipaye ne:+ 11 ‘Bantu bavua bumbuke mu Ejipitu ba bidimu 20 kubanda kabakumona buloba+ bundi muditshipe kudi Abalahama, kudi Izaka, ne kudi Yakoba+ bua kubapesha to, bualu ki mbandonde ne muoyo mujima to, 12 pa kumbusha Kaleba+ muana wa Yefune muena Kenizi ne Yoshua+ muana wa Nuna, bualu mbalonde Yehowa ne muoyo mujima.’+ 13 Nunku tshiji tshia Yehowa tshiakatemena Isalele, yeye kubatambakaja mu tshipela bidimu 40+ too ne pakajika bantu bonso ba mu tshipungu tshivua tshienza malu mabi ku mêsu kua Yehowa.+ 14 Mpindieu nudi bajuke pa muaba wa batatuenu bu bana ba bantu bena mpekatu badi balundula tshiji tshikole tshia Yehowa kudi Isalele. 15 Nuenu balekele kumulonda, kakuyi mpata neabalekele kabidi mu tshipela emu, ne nenubutuishe bantu bonso aba.”

16 Pashishe bakalua kudiye, kuambabu ne: “Tulekela tuase bikumbi bia mabue bua bimuna bietu ne bimenga bua bana betu muaba eu. 17 Kadi netuikale anu badilongolole bua mvita+ ne netuye kumpala kua bena Isalele too ne patuabafikisha muaba wabu, padi bana betu bashala basombele mu bimenga bikolesha, bantu ba mu buloba kabayi mua kubenzela bualu. 18 Katuakupingana ku nzubu yetu too ne padi muena Isalele yonso upeta buende buloba bu bumpianyi.+ 19 Bualu katuakupeta nabu bumpianyi dia muamua dia Yadene kuya kuaka to, bualu tudi bapete buetu bumpianyi luseke elu lua ku est kua Yadene.”+

20 Mose kubandamuna ne: “Binuenza bualu ebu: Nuenu bangate bia mvita kumpala kua Yehowa bua kuya ku mvita;+ 21 ne bikala yonso wa kunudi muambule bia mvita, musabuke Yadene kumpala kua Yehowa bu mudiye wipata bena lukuna bende kumpala kuende+ 22 too ne padi buloba bukuatshibua kumpala kua Yehowa,+ dîba adi nudi mua kupingana+ ne kuikala kanuyi ne dipila kumpala kua Yehowa ne kua Isalele. Nunku buloba ebu nebulue buenu kumpala kua Yehowa.+ 23 Kadi nuenu kanuyi benze bualu ebu, nenuikale benzele Yehowa mpekatu. Dîba adi numanye ne: mpekatu wenu neanupete. 24 Nunku nudi mua kuasa bimenga bua bana benu ne bikumbi bua mikoko yenu,+ kadi nudi ne bua kuenza tshinudi balaye.”

25 Bana ba Gada ne bana ba Lubena kuambilabu Mose ne: “Bena mudimu bebe nebenze anu mudi mukalenge wanyi utuma dîyi. 26 Bana betu, bakaji betu, bimuna bietu ne nyama yetu yonso ya pambelu nebishale mu bimenga bia Gilada amu,+ 27 kadi bena mudimu bebe nebasabuke dia muamua, muntu mulume yonso muambule bia mvita bua kuluangana mvita kumpala kua Yehowa,+ anu mudi mukalenge wanyi wamba.”

28 Nunku Mose wakatuma dîyi bua bualu buabu kudi muakuidi Eleazâ, Yoshua muana wa Nuna, ne bamfumu ba nzubu ya batatu ba bisa bia Isalele. 29 Mose wakabambila ne: “Bikala bana ba balume ba Gada ne bana ba balume ba Lubena basabuke nenu dia muamua dia Yadene, muntu mulume yonso muambule bia mvita kumpala kua Yehowa, ne buloba bukuatshibue kumpala kuenu, dîba adi nenubapeshe buloba bua Gilada bua buikale buabu.+ 30 Kadi bikalabu kabayi bambule bia mvita ne basabuke nenu dia muamua, dîba adi nebasombele munkatshi muenu mu buloba bua Kanâna.”

31 Ke bana ba balume ba Gada ne bana ba balume ba Lubena kuambabu ne: “Tshidi Yehowa muambile bena mudimu bebe ke tshituenza. 32 Netuambule bia mvita, tuetu kusabuka dia muamua kumpala kua Yehowa mu buloba bua Kanâna,+ kadi buloba butuapiana nebuikale dia munemu dia Yadene.” 33 Nunku Mose wakabapesha, mmumue ne: mupeshe bana ba balume ba Gada, bana ba balume ba Lubena,+ ne tshitupa tshia tshisa tshia Manashe+ muana wa Jozefe, bukalenge bua Sihona+ mukalenge wa bena Amole ne bukalenge bua Oga+ mukalenge wa Bashana buloba bua bimenga abi mu bitupa abi, ne bimenga bia buloba buvua bubunyunguluke.

34 Bana ba balume ba Gada bakasa* Dibona,+ Atalota,+ Aloê,+ 35 Atalota-shofana, Yazê,+ Yogebeha,+ 36 Bete-nimela,+ ne Bete-halana,+ bimenga bikolesha, ne bakibaka bikumbi bia mabue bua mikoko. 37 Bana ba Lubena bakasa Heshebona,+ Eleale,+ Kiyatayima,+ 38 Nebo,+ ne Bâla-meona+ (bakashintulula mêna a bimenga ebi) ne Sibema; bakatuadija kuinyika bimenga bivuabu basulule mêna a tshianana.

39 Bana ba Makî+ muana wa Manashe bakaya ku Gilada, bobu kumukuata, kuipatabu bena Amole bavuamu. 40 Nunku Mose wakapesha Makî muana wa Manashe Gilada, yeye kubanga kusombelamu.+ 41 Yaî muana wa Manashe wakaya kudibu, yeye kukuata misoko yabu ya ntenta, ne yeye kubanga kuyibikila ne: Hawota-yaî.*+ 42 Noba wakaya, kukuataye Kenata ne misoko ya kumpenga kuende,* ne kubangaye kumubikila ne: Noba bilondeshile dîna diende yeye.

33 Elu ke luendu luvua tshisamba tshia Isalele tshienze mu bitupa mu bitupa pavuabu bapatuke mu buloba bua Ejipitu+ bilondeshile bisumbu biabu*+ ku bulombodi bua Mose ne Alona.+ 2 Mose uvua ufunda miaba ivuabu bashila luendu mu luendu luabu luonso ku dîyi dia Yehowa, ne elu nduendu luvuabu benza bumbuka muaba kampanda baya muaba mukuabu:+ 3 Bakumbuka ku Lamesese+ mu ngondo wa kumpala, dituku dia 15 dia ngondo au.+ Mu dituku mene diakalonda dituku dia Pasaka,+ bena Isalele bakapatuka ne dishindika dionso* ku mêsu kua bena Ejipitu bonso. 4 Dîba adi bena Ejipitu bavua bajiika banabute bonso bavua Yehowa mushipe munkatshi muabu,+ bualu Yehowa uvua mulumbuluishe nzambi yabu.+

5 Nunku bena Isalele bakumbuka ku Lamesese, kutudilabu ku Sukota.+ 6 Pashishe bakumbuka ku Sukota, kutudilabu ku Etame+ udi ku muelelu kua tshipela. 7 Pashishe bakumbuka ku Etame, kupinganabu batangile ku Pihahilota, udi mutangilangane ne Bâla-sefona,+ bobu kutudila kumpala kua Migedola.+ 8 Pashishe bakumbuka ku Pihahilota, kupitshilabu munkatshi mua mbuu+ batangile mu tshipela,+ kutungunukabu ne luendu lua matuku asatu mu tshipela tshia Etame+ ne kutudilabu ku Mala.+

9 Pashishe bakumbuka ku Mala, kufikabu ku Elima. Mpindieu mu Elima muvua mishimi ya mâyi 12 ne mabue a ngaji 70, nunku bakatudilamu.+ 10 Pashishe bakumbuka ku Elima, kutudilabu pabuipi ne Mbuu Mukunze. 11 Pashishe bakumbuka ku Mbuu Mukunze, kutudilabu mu tshipela tshia Sina.+ 12 Pashishe kumbukabu mu tshipela tshia Sina, kutudilabu ku Dofaka. 13 Pashishe bakumbuka ku Dofaka, kutudilabu ku Alusha. 14 Pashishe bakumbuka ku Alusha, kutudilabu ku Lefidima,+ kuvua kakuyi mâyi bua bantu kunuabu. 15 Pashishe bakumbuka ku Lefidima, kutudilabu mu tshipela tshia Sinai.+

16 Bakumbuka mu tshipela tshia Sinai, kutudilabu ku Kibelota-hatawa.+ 17 Pashishe bakumbuka ku Kibelota-hatawa, kutudilabu ku Haselota.+ 18 Pashishe bakumbuka ku Haselota, kutudilabu ku Litema. 19 Pashishe bakumbuka ku Litema, kutudilabu ku Limona-pelese. 20 Pashishe bakumbuka ku Limona-pelese, kutudilabu ku Libina. 21 Bakumbuka ku Libina, kutudilabu ku Lisa. 22 Pashishe bakumbuka ku Lisa, kutudilabu ku Kehelata. 23 Pashishe bakumbuka ku Kehelata, kutudilabu ku mukuna wa Shefê.

24 Pashishe bakumbuka ku mukuna wa Shefê, kutudilabu ku Halada. 25 Pashishe bakumbuka ku Halada, kutudilabu ku Makehelota. 26 Pashishe bakumbuka+ ku Makehelota, kutudilabu ku Tahata. 27 Pashishe bakumbuka ku Tahata, kutudilabu ku Tela. 28 Pashishe bakumbuka ku Tela, kutudilabu ku Miteka. 29 Pashishe bakumbuka ku Miteka, kutudilabu ku Hashemona. 30 Pashishe bakumbuka ku Hashemona, kutudilabu ku Moselota. 31 Pashishe bakumbuka ku Moselota, kutudilabu ku Bene-yâkana.+ 32 Pashishe bakumbuka ku Bene-yâkana, kutudilabu ku Hô-hagidegada. 33 Pashishe bakumbuka ku Hô-hagidegada, kutudilabu ku Yotebata.+ 34 Pashishe bakumbuka ku Yotebata, kutudilabu ku Abalona. 35 Pashishe bakumbuka ku Abalona, kutudilabu ku Esione-gebê.+ 36 Pashishe bakumbuka ku Esione-gebê, kutudilabu mu tshipela tshia Sine,+ mmumue ne: ku Kadeshe.

37 Pashishe bakumbuka ku Kadeshe, kutudilabu ku mukuna wa Hô,+ ku mikalu ya buloba bua Edome. 38 Muakuidi Alona wakabanda ku mukuna wa Hô ku dîyi dia Yehowa, yeye kufuilaku mu tshidimu tshia 40 panyima pa bena Isalele bamane kupatuka mu buloba bua Ejipitu, mu ngondo muitanu, dituku dia kumpala dia ngondo au.+ 39 Alona uvua ne bidimu 123 pakafuaye ku mukuna wa Hô.

40 Mpindieu mukalenge wa Alada,+ muena Kanâna uvua usombela mu Negebe mu buloba bua Kanâna, wakumvua bua dilua dia bena Isalele.

41 Pakapita matuku, bakumbuka ku mukuna wa Hô,+ kutudilabu ku Salemona. 42 Pashishe bakumbuka ku Salemona, kutudilabu ku Punona. 43 Pashishe bakumbuka ku Punona, kutudilabu ku Oboto.+ 44 Pashishe bakumbuka ku Oboto, kutudilabu ku Iye-habalima ku mikalu ya Moaba.+ 45 Pashishe bakumbuka ku Iyima, kutudilabu ku Dibona-gada.+ 46 Pashishe bakumbuka ku Dibona-gada, kutudilabu ku Alamona-dibelatayima. 47 Pashishe bakumbuka ku Alamona-dibelatayima, kutudilabu ku mikuna ya Abalima+ kumpala kua Nebo.+ 48 Ndekelu wa bionso bakumbuka ku mikuna ya Abalima, kutudilabu mu mpata ya bipela ya Moaba pabuipi ne Yadene bitangilangane ne Yeliko.+ 49 Bakashala batudile pabuipi ne Yadene, kumbukila ku Bete-yishimota too ne ku Abele-shitima,+ mu mpata ya bipela ya Moaba.

50 Yehowa wakakula ne Mose mu mpata ya bipela ya Moaba pabuipi ne Yadene lua ku Yeliko, wamba ne: 51 “Akula ne bena Isalele, ubambile ne: ‘Nudi nusabuka Yadene bua kubuela mu buloba bua Kanâna.+ 52 Bantu bonso badi basombele mu buloba abu, nudi ne bua kubipata kumpala kuenu, kubutula mpingu yabu yonso ya mabue+ ne mpingu yabu yonso ya tshiamu,*+ ne nudi ne bua kubumbula miaba yabu mitumbuke ya tshijila yonso.+ 53 Nenuangate buloba ne nenusombelamu, bualu nennupeshe kakuyi mpata buloba abu bua buikale buenu.+ 54 Nudi ne bua kuabanya buloba ku nshobo+ munkatshi mua mêku enu bua buikale buenu. Bua tshisumbu tshidi ne bantu ba bungi nenudiundishe bumpianyi buatshi, ne bua tshisumbu tshidi ne bantu bakese nenukepeshe bumpianyi buatshi.+ Bumpianyi bua muntu yonso nebuikale muaba udi nshobo ikuata. Nenupete miaba yenu bu bumpianyi bilondeshile bisa bia batatuenu.+

55 “‘Kadi bantu badi basombele mu buloba abu nuenu kanuyi babipate kumpala kuenu,+ bantu banudi nuanyishila bua kushala nebikale bu bintu bidi biosha mu mêsu enu ne bu mêba mu mbadi yenu, ne nebanutatshishe mu buloba bunuasombela.+ 56 Dîba adi nennuenzele tshimvua musue kubenzela.’”+

34 Nunku Yehowa wakakula kabidi ne Mose, wamba ne: 2 “Ambila bena Isalele mêyi aa ne: ‘Panudi nubuela mu buloba bua Kanâna,+ ebu ke buloba buikala bumpianyi buenu, buloba bua Kanâna bilondeshile mikalu yabu.+

3 “‘Mukalu wenu wa ku sud newumbukile ku tshipela tshia Sine kumpenga kua Edome, ne mukalu wenu wa ku sud luseke lua ku est newumbukile ku ndekelu kua Mbuu wa Mukele.*+ 4 Mukalu wenu newutape tshibenda bua kupitshila ku sud kua njila udi mubande ku Akalabima,+ utungunuka too ne ku Sine, ne ndekelu wawu neikale ku sud kua Kadeshe-bânea.+ Pashishe newuye too ne ku Hasâ-adâ,+ utungunuka too ne ku Asemona. 5 Mukalu newutape tshibenda ku Asemona mutangile ku Kasulu ka tshilonda nkoka* ka mu Ejipitu, ne ndekelu wawu neikale ku Mbuu.*+

6 “‘Mukalu wenu wa ku ouest newikale Mbuu Munene* ne maloba a ku muelelu kuawu. Eu newikale mukalu wenu wa ku ouest.+

7 “‘Mpindieu eu ke wikala mukalu wenu wa ku nord: Kumbukila ku Mbuu Munene nenukose mukalu wenu too ne ku mukuna wa Hô. 8 Kumbukila ku mukuna wa Hô nenukose mukalu wenu too ne ku Lebo-hamate,*+ ne ndekelu wa mukalu neikale ku Sedada.+ 9 Mukalu wenu newuye too ne ku Zifelona, ne ndekelu wawu neikale Hasâ-enana.+ Eu newikale mukalu wenu wa ku nord.

10 “‘Pashishe nenukose mukalu wenu wa ku est kumbukila ku Hasâ-enana too ne ku Shefama. 11 Mukalu wenu newumbukile ku Shefama uya too ne ku Libela udi ku est kua Ayina, ne mukalu wenu newupueke ne newusambuluke mpulumuku wa ku est kua Mbuu wa Kinelete.*+ 12 Mukalu wenu newuye too ne ku Yadene, ne ndekelu wawu neikale Mbuu wa Mukele.+ Ebu ke buikala buloba buenu+ ne mikalu idi mibunyunguluke.’”

13 Nunku Mose wakambila bena Isalele ne: “Ebu ke buloba bunuikala mua kuabanya ku nshobo+ bu bumpianyi buenu, anu mudi Yehowa mutume dîyi bua kupesha bisa tshitema ne tshitupa. 14 Bualu tshisa tshia bena Lubena bilondeshile nzubu wa batatuabu, tshisa tshia bena Gada bilondeshile nzubu wa batatuabu, ne tshitupa tshia tshisa tshia Manashe bikadi bimane kupeta bumpianyi buabi.+ 15 Bisa bibidi ne tshitupa abi bikadi bimane kupeta bumpianyi buabi ku est kua tshitupa tshia buloba tshia Yadene pabuipi ne Yeliko, lua kudi dîba dipatukila.”+

16 Yehowa wakakula kabidi ne Mose, wamba ne: 17 “Aa mmêna a bantu bikala ne bua kunuabanyina buloba bua buikale buenu: muakuidi Eleazâ+ ne Yoshua+ muana wa Nuna. 18 Nenuangate kabidi mfumu umue mu tshisa tshionso bua kuabanya buloba bu bumpianyi buenu.+ 19 Aa mmêna a bantu abu: mu tshisa tshia Yuda:+ Kaleba+ muana wa Yefune; 20 mu tshisa tshia bana ba Simeona:+ Shemuele muana wa Amihuda; 21 mu tshisa tshia Benyamina:+ Elidada muana wa Kisilona; 22 mu tshisa tshia bana ba Dana,+ mfumu umue: Buki muana wa Yogeli; 23 bua bana ba Jozefe,+ mu tshisa tshia bana ba Manashe,+ mfumu umue: Haniele muana wa Efoda; 24 mu tshisa tshia bana ba Efelayima,+ mfumu umue: Kemuele muana wa Shifetana; 25 mu tshisa tshia bana ba Zebulona,+ mfumu umue: Elisafana muana wa Pânaka; 26 mu tshisa tshia bana ba Yisakâ,+ mfumu umue: Palatiele muana wa Azana; 27 mu tshisa tshia bana ba Ashê,+ mfumu umue: Ahihuda muana wa Shelomi; 28 mu tshisa tshia bana ba Nafatale,+ mfumu umue: Pedahele muana wa Amihuda.” 29 Aba ke bantu bavua Yehowa mutumine dîyi bua kuabanyina bena Isalele buloba mu buloba bua Kanâna.+

35 Yehowa wakakula kabidi ne Mose mu mpata ya bipela ya Moaba pabuipi ne Yadene+ lua ku Yeliko wamba ne: 2 “Ambila bena Isalele ne: badi ne bua kupesha bena Lewi bimenga bia kusombela mu bumpianyi buapetabu,+ ne badi kabidi ne bua kupesha bena Lewi mpata ya kudishila nyama idi minyunguluke bimenga abi.+ 3 Nebasombele mu bimenga abi, ne mpata ya kudishila nyama ayi neyikale bua bimuna biabu, bintu biabu, ne nyama yabu mikuabu yonso. 4 Mpata ya kudishila nyama ya bimenga binuapesha bena Lewi neyikale bule bua nkubita* tshinunu kumbukila ku tshimanu kumpenga kuonso kua tshimenga. 5 Nenupime nkubita 2 000 pambelu pa tshimenga luseke lua ku est, nkubita 2 000 luseke lua ku sud, nkubita 2 000 luseke lua ku ouest, ne nkubita 2 000 luseke lua ku nord, tshimenga tshikale munkatshi. Eyi ke yikala mpata ya kudishila nyama ya bimenga biabu.

6 “Bimenga binuapesha bena Lewi nebikale bimenga bisambombo bia kunyemena+ binuafila bua muntu udi mushipangane kunyemenamu,+ ne bimenga bikuabu 42. 7 Bungi bua bimenga binudi ne bua kupesha bena Lewi nebuikale 48, pamue ne mpata yabi ya kudishila nyama.+ 8 Bimenga binuabapesha nebikale bia mu bumpianyi bua bena Isalele.+ Mu tshisumbu tshidi ne bantu ba bungi nenuangate bia bungi, ne mu tshisumbu tshidi ne bantu bakese nenuangate bikese.+ Tshisumbu tshionso netshipeshe bena Lewi ndambu wa bimenga biatshi bilondeshile bumpianyi buditshi tshipeta.”

9 Yehowa wakatungunuka ne kuakula ne Mose, wamba ne: 10 “Akula ne bena Isalele, ubambile ne: ‘Nudi nusabuka Yadene bua kuya mu buloba bua Kanâna.+ 11 Nudi ne bua kusungula bimenga bidi binukumbanyine bua bikale bimenga bia kunyemena mudi muntu udi mushipe muntu* kampanda kabiyi ku bukole mua kunyemena.+ 12 Bimenga ebi nebikale muaba wa nuenu kunyemena musombuedi wa mashi,+ bua muntu udi mushipangane kafu too ne padiye wimana kumpala kua tshisumbu bua kulumbulula.+ 13 Bimenga bisambombo binuafila nebiambuluishe bua bualu ebu. 14 Nenufile bimenga bisatu dia munemu dia Yadene+ ne bimenga bisatu mu buloba bua Kanâna+ bua bikale bimenga bia kunyemena. 15 Bimenga bisambombo ebi nebikale muaba wa kunyemena bua bena Isalele, bua muntu udi musombe buenyi,+ ne bua muena tshimuangi udi munkatshi muabu, bua muntu yonso udi mushipe muntu* kampanda kabiyi ku bukole anyemenamu.+

16 “‘Kadi bikalaye mumukume ne tshintu tshia tshiamu, ne yeye mufue, muntu au mmushipianganyi. Badi ne bua kushipa mushipianganyi kakuyi mpata.+ 17 Anyi bikalaye mumukume ne dibue didi mua kushipa muntu ne yeye mufue, muntu au mmushipianganyi. Badi ne bua kushipa mushipianganyi kakuyi mpata. 18 Anyi bikalaye mumukume ne tshintu tshia mutshi tshidi mua kushipa muntu ne yeye mufue, muntu au mmushipianganyi. Badi ne bua kushipa mushipianganyi kakuyi mpata.

19 “‘Musombuedi wa mashi ke udi ne bua kushipa mushipianganyi. Padiye usambakena nende, yeye nkayende ke wamushipa. 20 Bikala muntu mufue bualu mmumusakile bua lukinu anyi mmumuase tshintu ne meji mabi,*+ 21 anyi bua lukinu yeye mumukume ne tshianza, yeye mufue, kakuyi mpata nebashipe muntu uvua mumukume. Muntu au mmushipianganyi. Musombuedi wa mashi neashipe mushipianganyi padiye usambakena nende.

22 “‘Kadi bikalaye mumusakile ku mpukapuka kabiyi bua lukinu anyi mumuase tshintu kayi ne meji mabi,*+ 23 anyi bikalaye kavua mumumone ne muenze bua dibue dimukume, ne kavua muena lukuna wende anyi kavua ukeba kumuenzela bibi, ne muntu au yeye mufue, 24 dîba adi tshisumbu netshilumbuluishe muntu uvua mumushipe ne musombuedi wa mashi bilondeshile mêyi a dilumbuluisha aa.+ 25 Pashishe tshisumbu netshipandishe muntu udi mushipangane ku tshianza tshia musombuedi wa mashi ne netshimupingaje mu tshimenga tshia kunyemena tshivuaye munyemene ne udi ne bua kusombelamu too ne padi muakuidi munene uvua muedibue manyi a tshijila ufua.+

26 “‘Kadi muntu uvua mushipangane yeye mupatuke mu mikalu ya tshimenga tshia kunyemena tshivuaye munyemene 27 ne musombuedi wa mashi yeye mumupete pambelu pa mikalu ya tshimenga tshivuaye munyemene ne mushipe muntu uvua mushipangane au, kena ne dibanza dia mashi to. 28 Bualu udi ne bua kusombela mu tshimenga tshivuaye munyemene too ne padi muakuidi munene ufua. Kadi panyima pa lufu lua muakuidi munene, muntu uvua mushipangane udi mua kupingana mu buloba buende.+ 29 Malu aa neikale kunudi bu mikenji mifunda ya kulumbuluishangana nayi mu bipungu bienu bionso miaba yonso inudi nusombela.

30 “‘Muntu yonso udi ushipa muntu* kampanda udi ne bua kushipibua bu mushipianganyi+ ku bujadiki* bua bantemu;+ kadi kabakushipa muntu* nansha umue ku bujadiki bua ntemu anu umue to. 31 Kanuena ne bua kuangata tshintu tshia kupikula natshi muoyo* wa mushipianganyi udi mukumbanyine lufu to, bualu udi ne bua kushipibua kakuyi mpata.+ 32 Kanuena kabidi ne bua kuangata tshintu tshia kupikula natshi muntu udi munyemene mu tshimenga tshia kunyemena, numuanyishila bua apingane bua kusomba kabidi mu buloba buende muakuidi munene kayi muanji kufua to.

33 “‘Kanuena ne bua kunyanga buloba bunudi nusombela to, bualu mashi adi anyanga buloba,+ ne kakuena mua kuikala dibuikila dia mpekatu bua mashi adibu bele panshi, anu ku mashi a muntu uvua muele mashi au panshi.+ 34 Kuena ne bua kunyanga buloba bunudi basombele, bundi meme panyi musombele; bualu meme Yehowa ndi musombele munkatshi mua tshisamba tshia Isalele.’”+

36 Bamfumu ba mêku ba mu ndelanganyi ya Gilada muana wa Makî+ muana wa Manashe, ba mu mêku a bana ba Jozefe bakalua, kuakulabu ne Mose ne bamfumu bavua ku mutu kua mêku a bena Isalele. 2 Bakamba ne: “Yehowa mmutumine mukalenge wanyi dîyi bua kuabanyina bena Isalele buloba ku nshobo+ bu bumpianyi; ne Yehowa wakatumina mukalenge wanyi dîyi bua kuangata bumpianyi bua muanetu Selofehada kubupesha bana bende ba bakaji.+ 3 Bobu babasele kudi bantu ba mu tshisa tshikuabu tshia mu Isalele, dîba adi nebumbushe bumpianyi bua bantu bakaji aba ku bumpianyi bua batatuetu ne nebabusakidile ku bumpianyi bua tshisa tshikalabu, nunku nebumbushe bumpianyi abu ku tshitupa tshia bumpianyi buetu. 4 Mpindieu pakumbana Tshidimu tshia budikadid+i bua bena Isalele, dîba adi nebasakidile bumpianyi bua bantu bakaji aba ku bumpianyi bua tshisa tshikalabu, nunku nebumbushe bumpianyi buabu ku bumpianyi bua tshisa tshia batatuetu.”

5 Nunku Mose wakatumina bena Isalele dîyi ku dîyi dia Yehowa ne: “Bualu budi tshisa tshia bana ba Jozefe tshiamba mbulelela. 6 Tangilayi mukenji udi Yehowa muele bua bana ba bakaji ba Selofehada: ‘Badi mua kusedibua kudi bantu bonso badibu basue. Kadi badi ne bua kubasela anu kudi bantu ba mu dîku dia mu tshisa tshia tatuabu. 7 Bumpianyi nansha bumue bua bena Isalele kabuena mua kutambakana bumbuka mu tshisa kampanda buya mu tshisa tshikuabu to, bualu bena Isalele badi ne bua kulama bumpianyi bua tshisa tshia bankambua babu. 8 Nunku muana wa bakaji yonso udi ne bumpianyi munkatshi mua bisa bia Isalele udi ne bua kulua mukaji wa muntu wa mu ndelanganyi ya mu tshisa tshia tatuende,+ bua bena Isalele balame bumpianyi bua bankambua babu. 9 Bumpianyi nansha bumue kabuena ne bua kutambakana bumbuka mu tshisa tshimue buya mu tshisa tshikuabu to, bualu bisa bia Isalele bidi ne bua kulama bumpianyi buabi.’”

10 Bana ba bakaji ba Selofehada bakenza anu muvua Yehowa mutumine Mose dîyi.+ 11 Nunku Mahala, Tîsa, Hogela, Mileka, ne Noa, bana ba bakaji ba Selofehada,+ bakasedibua kudi bana ba bana babu ne tatuabu. 12 Bakalua bakaji ba bantu ba mu mêku a Manashe muana wa Jozefe bua bumpianyi buabu bushale mu tshisa tshia dîku dia tatuabu.

13 Aa mmêyi ne mapangadika bivua Yehowa mupeshe bena Isalele ku butuangaji bua Mose mu mpata ya bipela ya Moaba pabuipi ne Yadene lua ku Yeliko.+