Eyemena Yehowa bua kukumbaja dilongolola diende
“Bantu bakane nkayabu nebapiane buloba ne nebasombepu tshiendelele.”—MUSAMBU WA 37:29.
1. Bua bantu ne buloba ebu, Yehowa udi ne dilongolola kayi?
PAFUKILE Yehowa baledi betu ba kumpala, Adame ne Eva, wakabenza bapuangane. Wakabafuka bua kuikalabu ne muoyo wa tshiendelele pa buloba ebu—bu buobu mua kutumikila mikenji yende. (Genese 1:26, 27; 2:17) Kabidi, Nzambi wakabateka mu mparadizu. (Genese 2:8, 9) Yehowa wakabambila ne: “Nuikale bena kulela, nulua ba bungi, nuwuje buloba tente ne nubukokeshe.” (Genese 1:28) Nenku, ndelanganyi yabu ivua mua kutangalaka pa buloba bujima, ne dibulunge-buloba edi divua ne bua kulua mparadizu muwule tente ne bapuangane, bukua-bantu bena disanka. Ntuadijilu mulenga kayipu uvua dîku dia bantu dipete! “Nzambi wakamona bintu bionso biakenzaye ne biakadi bimpe be!”—Genese 1:31, Mukanda wa Nzambi.
2. Nsombelu wa malu a bantu udi ujula nkonko kayi?
2 Kadi, nsombelu wa malu a bantu mu kupita kua bidimu binunu ne binunu kêna muakanangane ne dilongolola dia Nzambi dia ku mbangilu nansha kakese. Bukua-bantu mbabule bupuangane ne badi kule ne disanka. Nsombelu idi pa buloba idi yenda inyanguka, amu bu mukavuabi bilayibue bua dikalaku dia malu matambe bubi mu tshikondo tshietu etshi. (2 Timote 3:1-5, 13) Nanku, mmunyi mutudi mua kueyemena bualu bua se: dilongolola dia Nzambi bua bantu nedikumbane mu matuku makese atshilualua akadi pa kukumbana? Nekuanji kupita bikuabo bikondo muikala nsombelu mibi ne bua kutungunuka anyi?
Tshiakabipisha nsombelu ntshinyi?
3. Bua tshinyi Yehowa kakajikija diakamue buntomboji bua bukua-bantu?
3 Aba badi ne dimanya dijalame dia Dîyi dia Nzambi difunda ku spiritu wende mbamanye bua tshinyi Yehowa mmulekelele nsombelu eyi mibi idi pa buloba. Mbamanye kabidi tshienzaye bua malu aa. Biangatshile mu Bible, mbalonge ne: baledi betu ba ntuadijilu bakatumika bibi ne tshipedi tshia dikema tshia budikadidi mu disungula tshivua Nzambi mupesha bantu. (Fuanyikija ne 1 Petelo 2:16.) Bakatupakana bikole bu mua kasungulabu njila mubi wa budishikaminyi pa kubenga Nzambi. (Genese nshapita 2 ne 3) Buntomboji buabu buakajudija nkonko minene, bu mudi eyi: Mfumu mutambe bunene udi ku mutu kua bionso udi ne bukokeshi bua kuludika bantu anyi? Buabu buobu, diludika diende ndipite buimpe anyi? Bantu badi mua kulubuluka padibu badiludika kakuyi bulombodi bua Nzambi anyi? Mushindu muakane wa kupeta mandamuna ku nkonko eyi uvua kulekela bantu badiludika mu kupita kua siekele. Bipeta bivua ne bua kuleja kakuyi mpata bikala bantu mua kulubuluka kakuyi diambuluisha dia Mubafuki wabo.
4, 5. (a) Tshipeta kayi tshipetele bantu bua dibenga buludiki bua Nzambi? (b) Kakuyi mpata, dipita dia bidimu dialeji tshinyi?
4 Pavua Adame ne Eve bumbuke kudi Nzambi, kakabakuatshisha kabidi mu bupuangane to. Bu muakabulabu diambuluisha diende, bakanyanguka. Bu tshipeta, kuvua dipanga bupuangane, bukulakaje, ndekelu wa bionso lufu. Ku butuangaji bua mikenji ya dilelangana, baledi betu ba kumpala bakasambulujila ndelanganyi yabu yonso pamue ne tuetu petu ngikadilu eyi mibi. (Lomo 5:12) Ne kuapatuki tshipeta kayi mu buludiki bua bantu buanengi bidimu binunu ne binunu? Nkupatuka tshipeta tshibi tshitambe, anu bu mudi Muambi 8:9 wamba mu bulelela buonso ne: “Muntu udi ukokesha muntu bua diakabi diende.”
5 Dipita dia bidimu dialeji kakuyi mpata nansha mikese ne: bantu kabena ne bukokeshi bua kulubuluja malu abu padibu badiludikila mianda kakuyi diambuluisha dia kudi Mubafuki wabu. Muenzeja kudi spiritu wa Nzambi, Yelemiya, umue wa ku bafundi ba Bible, wakamba ne: “Ndi mumanye, Ô Yehowa, ne: njila wa muntu mupatula ku buloba kêna ku bukokeshi buende. Muntu udi wenda kêna ne bukenji bua kulombola dikasa diende to.”—Yelemiya 10:23; Dutelonome 32:4, 5; Muambi 7:29.
Dilongolola dia Nzambi ki ndishintuluke to
6, 7. (a) Dipita dia bidimu binunu ne binunu mu mianda ya bantu ya kale ndishintulule dilongolola dia Yehowa anyi? (b) Ntshinyi tshidi mu dilongolola dia Yehowa?
6 Dipita dia bidimu binunu ne binunu bia mianda ya bantu ya kale—diuwule tente ne malu mabi pamue ne makenga—mbishintulule dilongolola dia Nzambi anyi? Dîyi diende didi diamba ne: “Etshi ke tshidi Yehowa muambe, Mufuki wa mawulu, yeye Nzambi mulelela, Muenji wa buloba ne Mubufumbi, yeye wakabujadika, kakabufuka patupu, yeye nngudi mubuenze bua bantu basepu.” (Yeshayi 45:18) Nenku, Nzambi wakenza buloba bu nzubu wa bantu, ne ke tshidi dilongolola diende too ne mpindieu.
7 Yehowa kakafuka buloba anu bua bantu basepu, kadi kabidi, wakabuenzela dilongolola dia ne: bulue mparadizu wasankisha bantu bapuangane, bena musangelu. Ke bua tshinyi Bible wakadianjila kulaya ne: nekuikale “buloba bupiabupia,” nsangilu wa bantu mupiamupia, “muikala buakane.” (2 Petelo 3:13) Mu Buakabuluibua 21:4, Dîyi dia Nzambi didi dituambila ne: mu bulongolodi buende bupiabupia, “neakupule tshinsonji tshionso ku mêsu [a bukua-bantu], lufu kaluakuikalaku kabidi, nansha madilu nansha didiabakena, nansha bisama kabiakuikalaku kabidi.” Bua tubingila tua mushindu’eu, Yezu uvua mua kuakula bua dilua dia bulongolodi bupiabupia pa buloba bu “Mparadizu.”—Luka 23:43.
8. Bua tshinyi tudi ne bua kuikala ne dishindika dia se: Yehowa neakumbaje dilongolola diende?
8 Bu mudi Yehowa Mufuki wa bukole-buonso ne muena meji wonso, muntu nansha umue kêna mua kupumbisha dilongolola diende. “Yehowa wa biluilu watshipi, wamba ne: ‘Bushuwa, anu bu mundi muele meji, ke mudibi ne bua kuenzeka; ne anu tshindi mupangadije, ke tshialua bushuwa.’” (Yeshayi 14:24) Nenku, padi Nzambi wamba ne: neakudimune buloba ebu mparadizu muasombela bantu bapuangane, bualu ebu nebuenzeke. Yezu wakamba ne: “Ba diakalenga mbapole-malu, bualu nebapete buloba.” (Matayi 5:4, Mukenji Mulenga; fuanyikija ne Musambu wa 37:29.) Tuikalayi bajadike dikumbuna dia mulayi eu pashishe tuenze malu mu diumvuangana nawu. Eyowa, tudifilayi ne kasuki nansha bia lufu bua bualu buawu.
Bakeyemena Yehowa
9. Tshiakenza Abrahame ntshinyi tshiakaleja ne: uvua mueyemene Yehowa?
9 Batshinyi ba Nzambi bavule mu mianda ya bantu ya kale bakadifila ne kasuki nansha bua lufu bua dilongolola dia Nzambi didi ditangila buloba bualu bavua bajadike ne: neadikumbaje. Nansha muvua dimanya diabo dikale dikese, bakeyemena Nzambi ne bakiibaka nsombelu yabu pa kuenza disua diende. Tshilejilu, kuvua Abrahame, uvua pa buloba bidimu 2 000 kumpala kua dilua dia Yezu pa buloba—tshikondo tshile kumpala kua difundibua dia Bible. Wakeyemena Yehowa bua kukumbaja malaya Ende. Pamu’apa, Abrahame wakalongela malu adi atangila Mutufuki kudi nkambua wende wa lulamatu Sem, uvua pende mulongeshibue kudi Nowa. Nenku, pakatuma Nzambi dîyi kudi Abrahame bua kumbukaye mu tshimenga tshia Ur wa bena Kadeya tshivua tshiuwule tente ne bubanji, bua kuyaye ku buloba bua bena Kanana buvuaye kayi muibidilangane nabu ne buikale bua njiwu, nkambua ewu uvua mumanye ne: uvua ne bua kueyemena Yehowa, ke bualu kayi wakaya. (Ebelu 11:8) Pakakumbana dîba, Yehowa wakamuambila ne: “Nempatule ditunga dinene munda muebe.”—Genese 12:2.
10, 11. Bua tshinyi Abrahame wakanyisha kulambula muanende wa balume umuepele, Izake?
10 Tshiakenzeka ntshinyi kunyima kua Abrahame mumane kulela Izake? Yehowa wakaleja Abrahame ne: ku butuangaji bua Izake ndelanganyi yende ivua ne bua kulua ditunga dinene. (Genese 21:12) Nenku, bidi mua kumueneka ne: kudi dibengangana padi Yehowa wambila Abrahame, amu bu diteta dia ditabuja diende, bua amulambule muanende wa balume Izake. (Genese 22:2) Kadi, ne dieyemena dijima kudi Yehowa, Abrahame wakela tshidia bua kubukumbaja, wangata kela kende bua kukosa Izake muminu. Ndekelu wa bionso, Nzambi wakatuma muanjelu bua kukandikaye Abrahame.—Genese 22:9-14.
11 Bua tshinyi Abrahame uvua ne butumike bua nanku? Ebelu 11:17-19 udi usokolola ne: “Ku ditabuja, Abrahame, pakamutetabo, bua kuamba bimpe, wakalambula Izake, ne muntu wakapeta mu disanka malaya wakateta bua kufila muanende wa balume umuepele, nansha muakamuambilabu ne: ‘Ng’edi diabikidibua ne: “ndimiinu diebe” nedipatukile kudi Izake.’ Kadi, uvua mutekemene se: Nzambi uvua ne bukokeshi bua kumujula nansha ku lufu; wakapetelaku mu ngakuilu wa mu tshimfuanyi.” Bia muomumue, Lomo 4:20, 21 udi wamba ne: “Bualu bua mulayi wa Nzambi, [Abrahame] kakatenkakana mu ditabuja, . . . muikale mujadike menemene ne: tshidi [Nzambi] mulaye ntshidiye kabidi ne bukole bua kuenza.”
12. Mmunyi muakafutshibua Abrahame bua lulamatu luende?
12 Abrahame wakafutshibua bua ditabuja diende, kadi ki ng’amu bua dipandishibua dia Izake ne bua dipatula “ditunga dinene” ku butuangaji buende nansha, kadi mbua mushindu mukuabo kabidi. Nzambi wakambila Abrahame ne: “Ku diambuluisha dia dimiinu diebe matunga wonso a pa buloba neabeneshibue bushuwa bualu wateleji dîyi dianyi.” (Genese 22:18) Mmushindu kayi? Mfumu wa Bukalenge bua Nzambi bua mu diulu uvua ne bua kupatukila ku ndelanganyi ya Abrahame. Bukalenge ebu nebubutule bulongolodi bubi ebu budi muînshi mua Satana. (Danyele 2:44; Lomo 16:20; Buakabuluibua 19:11-21) Pashishe, pa buloba bukezula muînshi mua bukokeshi bua Bukalenge, Mparadizu neatampakane pa buloba bujima, ne bikale bafumina mu “matunga wonso,” bantu badi benza disua dia Nzambi nebapete makanda a mubidi mapuangane ne muoyo wa tshiendelele. (1 Yone 2:15-17) Nansha muvua Abrahame ne dimanya dikese pa bidi bitangila Bukalenge, wakeyemena Nzambi muikale utekemena dibanjijibua diabu.—Ebelu 11:10.
13, 14. Bua tshinyi Yobo wakeyemena Nzambi?
13 Kunyima kua bidimu nkama ne nkama, kuakalua Yobo, uvua ne muoyo munkatshi mua siekele wa 17 ne wa 16 K.B.B. mu ditunga didi lelu’eu ne dîna dia Arabie. Yeye pende uvuaku diambedi Bible kayi muanji kufundibua. Yobo “wakadileja kayi wa kubanda bualu ne mululame, mutshinyi wa Nzambi ne muepuki wa bubi.” (Yobo 1:1) Pakatua Satana Yobo disama dibi ditambe, muntu eu wa lulamatu “kakapatula muaku wa mpekatu nansha umue” munkatshi mua mateta ende. (Yobo 2:10, The New English Bible) Yobo wakeyemena Nzambi. Nansha muvuaye kayi mumanye menemene bua tshinyi uvua ukenga bikole nenku, wakafila muoyo wende mujima kudi Nzambi ne ku malaya Ende.
14 Yobo uvua mumanye ne: nansha bu yeye mua kufua, dituku kampanda, Nzambi uvua mua kumupingaja ku muoyo ku diambuluisha dia dibiishibua ku lufu. Wakaleja ditekemena diende edi pakambilaye Yehowa Nzambi ne: “Ô, bu wewe mua kunsokoka mu sheole [lukita], . . . bu wewe mua kunfundila tshikondo ne kumvuluka! Biafua muntu wa dikanda, udi mua kuikala kabidi ne muoyo anyi? . . . Neumbikile, meme nkayanyi nenkuandamune.” (Yobo 14:13-15) Nansha muvuaye mua kukuula muoyo, Yobo wakaleja ditabuja mu bukokeshi budi nabu Yehowa ku mutu kua bionso, pa kuamba ne: “Too ne pandi nkuula muoyo, tshiakulekela bua muoyo-mutoke wanyi to!”—Yobo 27:5.
15. Mmunyi muakaleja Davidi dieyemena diende ku dilongolola dia Yehowa?
15 Siekele bu isambombo kunyima kua Yobo anyi bidimu pabuipi ne tshinunu kumpala kua Yezu kuvuaye pa buloba, Davidi wakaleja dieyemena diende ku bulongolodi bupiabupia. Wakamba mu misambu ne: “Aba badi batekemena kudi Yehowa ke balua kupiana buloba. Ne kunyima kua mutantshi mukese, muntu mubi kakuikalaku kabidi nansha . . . Kadi, badipuekeshi nebapiane buloba, ne bushuwa, nebasanke mu ditalala divulavulayi. Bantu bakane nebapiane buloba, ne nebasombepu tshiendelele.” Bua ditekemena diende dikena ditenkakana, Davidi wakamba ne: “Eyemena Yehowa . . . Kabidi, ikala ne disanka dinene bua Yehowa, ne yeye neakumbaje majinga a mu mutshima webe.”—Musambu wa 37:3, 4, 9-11, 29.
16. Nditekemena kayi divua nadi ‘divuba dinene dia bantemu’?
16 Mu kupita kua siekele, balume ne bakaji ba lulamatu bavua pabu ne ditekemena dia muomumue edi dia muoyo wa tshiendelele pa buloba. Bushuwa, bakenza ‘divuba dinene dia bantemu’ bavua bateke muoyo wabu mujima ku malaya a Yehowa. Bavule ba ku bantemu ba Yehowa aba ba kale bakakengeshibua ne kushipibua bua ditabuja diabu, “bua bapete dibiishibua ku lufu dimpe ditambe.” Mmunyi nanku? Mu bulongolodi bupiabupia, Nzambi neabafute [difutu dia] dibiishibua ku lufu dimpe ditambe ne ditekemena dia muoyo wa kashidi.—Yone 5:28, 29; Ebelu 11:35; 12:1.
Bantemu bena nkristo badi beyemena Nzambi
17. Mmunyi muvua bena nkristo ba mu siekele wa kumpala beyemene Yehowa bikole?
17 Mu siekele wa kumpala B.B., Yehowa wakasokoluela tshisumbu tshia bena nkristo tshitshivua tshifumina ku dibanjijibua malu mavule adi atangila Bukalenge ne bukokeshi buabu pa buloba. Tshilejilu, spiritu wende wakasaka mupostolo Yone bua kufundaye ne: bungi bua bakokesha pamue ne Yezu Kristo mu Bukalenge bua mu diulu nebuikale bua bantu 144 000. Buobu abu mbasadidi ba lulamatu ba Nzambi “bakasumbaye mu bukua-bantu.” (Buakabuluibua 7:4; 14:1-4) Nebakokeshe buloba bujima “bu bakalenge” pamue ne Kristo mu diulu. (Buakabuluibua 20:4-6) Nenku, bena nkristo ba mu siekele wa kumpala bakeyemena bikole Yehowa bua kukumbaja dilongolola diende dia Bukalenge bua mu diulu ne buloba, muaba wabu wakokeshilabu, bavua banyisha lufu bua ditabuja diabu. Ba kudibu bavule bakenza nanku.
18. Mmunyi mudi Bantemu ba Yehowa ba lelu’eu bidikija bana babu ba kale?
18 Lelu’eu, Bantemu ba Yehowa pabuipi ne miliyo itanu badi ne dieyemena dia Nzambi dia muomumue ne dia bana babu bavua ne muoyo mu siekele ya kumpala kuabu. Bantemu ba mu matuku aa, buobu pabu mbafile muoyo wabu mujima mu malaya a Nzambi. Mbamulambule mioyo yabu ne badi bangata Bible mu kabujima kende bua kukolesha ditabuja diabu. (2 Timote 3:14-17) Bantemu ba Yehowa ba mu matuku aa badi bidikija balondi ba Yezu ba mu siekele wa ntuadijilu bakamba ne: badi ne bua “kutumikila Nzambi bu mfumu pamutu pa bantu.” (Bienzedi 5:29) Mu siekele eu, bavule ba ku Bantemu bena nkristo aba badi bakengeshibua ne tshikisu. Bamue bakashipibua bualu bua ditabuja diabu. Bakuabu bakafua bua masama, njiwu, anyi bukulakaje. Mushindu umue ne bantemu ba lulamatu ba bikondo bishale, mbeyemene Nzambi bualu mbamanye ne: neabapingajile muoyo mu bulongolodi buende bupiabupia ku diambuluisha dia dibiishibua ku lufu.—Yone 5:28, 29; Bienzedi 24:15; Buakabuluibua 20:12, 13.
19, 20. Ntshinyi tshituamanyi pa bidi bitangila milayi ya mu Bible bua matuku etu aa?
19 Bantemu ba Yehowa mbasankidile dibapatula mu matunga wonso, bua kubuelabu mu buwetu bumuepele bua pa buloba bujima buvua bumane kumanyishibua mu mulayi wa mu Bible. (Yeshayi 2:2-4; Buakabuluibua 7:4, 9-17) Ne Yehowa udi utumika nabu mu mudimu wa buambi pa buloba bujima bua kunguija, ku diambuluisha dia buimpe bukena-butuakanyine ne bukubi bua bakuabu bena mutshima mululame. (Nsumuinu 18:10; Matayi 24:14; Lomo 10:13) Buonso abu mbeyemene Yehowa ne muoyo wabu mujima, mbamanye ne: mu tshitupa tshîpi emu, neabanjije bulongolodi buende bupiabupia bua dikema.—Fuanyikija ne 1 Kolinto 15:58; Ebelu 6:10.
20 Milayi ya mu Bible idi ileja ne: bulongolodi bua Satana bukadi mu matuku abu a ndekelu kukadi mpindieu bidimu bitue ku 80, kutuadija mu tshidimu tshia 1914 tshia mashintuluka. Bulongolodi ebu bukadi butua ku tshibungubungu tshiabu. (Lomo 16:20; 2 Kolinto 4:4; 2 Timote 3:1-5) Bantemu ba Yehowa badi ne dikima ne dipangadika bualu mbamanye ne: mu mutantshi muîpi emu, Bukalenge bua Nzambi nebutuadije kulombola malu wonso a pa buloba. Pa kutuisha ku tshibungubungu bulongolodi ebu bubi ne pa kubanjija bulongolodi bupiabupia buakane, Nzambi neumbushe nsombelu mibi idi pa buloba kukadi siekele mivulavulayi.—Nsumuinu 2:21, 22.
21. Bua tshinyi tudi’anu ne disanka nansha kuoku kuikale ndululu mu matuku etu aa?
21 Pashishe, bua kashidi, Nzambi nealeje ditukuba diende dinene pa dituupumuina mabenesha apingana pa muaba wa malu mabi atudi tupeta biangatshile ku kale. Nanku, malu mimpe neatufikile mu bulongolodi bupiabupia mu mushindu wa ntatu yetu ya kale kujiminayi mu tshivulukilu tshietu. Mmushindu kayipu udibi bikankamija bua kumanya ne: Yehowa ‘neabulule tshianza tshiende ne neakumbaje dijinga dia tshintu tshionso tshia muoyo.’—Musambu wa 145:16; Yeshayi 65:17, 18.
22. Bua tshinyi tudi ne bua kueyemena Yehowa?
22 Mu bulongolodi bupiabupia, bukua-bantu bena lulamatu nebamone dikumbana dia Lomo 8:21: “Bifukibua pabi nebipikudibue ku dinyanguka, ne kuikala ne budikadile bua butumbi bua bana ba Nzambi.” Nebamone dikumbana dia disambila diakalongesha Yezu bamulondi bende: “Bukalenge buebe bulue. Disua diebe dienzeke pa buloba bu mudidi dienzeka diulu.” (Matayi 6:10) Pa nanku, eyemena Yehowa ne mutshima webe mujima, bualu dilaya diende dikena ntupakanyi ndiedi: “Bantu bakane nebapiane buloba, nebasombepu tshiendelele.”—Musambu wa 37:29.
Mmunyi muudi mua kuandamuna?
◻ Bua bantu ne buloba ebu, Yehowa udi ne dilongolola kayi?
◻ Bua tshinyi Nzambi mmulekelele nsombelu mibi idi pa buloba?
◻ Mmunyi muvua bantu bena lulamatu ba kale baleje diabo dieyemena Yehowa?
◻ Bua tshinyi basadidi ba Nzambi ba lelu’eu mbeyemene Yehowa?
[Tshimfuanyi mu dibeji 16]
Nzambi wakafuka bantu bua kuikalabu ne muoyo wa tshiendelele ne disanka mu mparadizu pa buloba
[Tshimfuanyi mu dibeji 18]
Abrahame wakeyemena bukole budi nabu Yehowa bua dibiisha bafue