Eyemena Yehowa ne Dîyi diende

“Badi bamanye dina diebe nebakueyemene.”​—MUSAMBU WA 9:10.

1. Bua tshinyi tudi anu mua kuikala ne dieyemena kudi Yehowa ne Dîyi diende mu matuku etu aa a buena-lelu?

MU BULONGOLODI ebu bua buena-lelu, dibikila bua kueyemena Nzambi ne Dîyi diende, Bible, didi mua kumueneka bu didi kadiyi ne dikuatshisha ne kadiyi dikumbanyine. Pabi, meji a Nzambi mmadijadike mudiwu malelela ne makuatshishi mu bule bua tshikondo tshile. Mufuki wa mulume ne mukaji m’Muvuiji wa dibaka ne dîku, ne mmumanye makengela etu kupita muntu mukuabu kayi yonso. Bu mudi makengela a nshindamenu a muntu kaayi mashintuluke, mishindu minene ya dikumbaja makengela aa mmishale payi ya muomumue. Mibelu ya meji ya mu Bible, nansha muvuayi mifunda kukadi siekele mivule, itshidi anu ipetesha buludiki butambe buimpe bua dilubuluka mu nsombelu ne mu dijandula ntatu. Diyangata ne mushinga didi difikisha ku disanka divule​—nansha mu bulongolodi ebu bujingakane, bua malu a sianse mutudi basombele!

2. (a) Mmamuma kayi mimpe adi ditumikila mêyi-matuma a Nzambi dikuame mu nsombelu wa bantu ba Yehowa? (b) Ntshintu kayi tshikuabu tshia pa mutu tshidi Yehowa mulaye bua aba badi ne butumike kudiye ne Dîyi diende?

² Dieyemena Yehowa ne ditumikila mêyi-maludiki a mu Bible bidi bituala malenga makuatshishi dituku dionso. Tshijadiki tshia tshiambilu tshidi kuulu etshi ntshilejibue mu nsombelu ya miliyo ya Bantemu ba Yehowa pa buloba bujima bàdì bapete dishindika ne dikima bua kutumikila mibelu ya mu Bible. Buabu buobu, kueyemena Mufuki ne Dîyi diende nkudijadike mudiku kuimpe. (Musambu wa 9:9, 10) Ditumikila mêyi-matuma a Nzambi ndibavuije bantu bakane pa bidi bitangila bukezuke, bululame, disuminyina mu dienza dia mudimu wa bungi, kanemu bua muoyo ne bua bintu bia bakuabu, ne butshintshikidi mu didia ne dinua. Ndifikishe ku dinanga dimpe ne dikela mu dîku​—kuikala bakididi ba benyi, bena lutulu, baleji ba luse, ne balekeledianganyi ba bilema—​pamue ne bintu bikuabu bivule. Mbakumbane mu mushindu mualabale bua kuepuka mamuma mabi a tshiji, lukinu, dishipangana, lubabu, buôwa, lulèngù, diditambisha, dishimangana, didingilangana, tshiendenda, ne buenzavi. (Musambu wa 32:10) Kadi Nzambi udi wenza bivule bipite ne kule dilaya bipeta bimpe bua aba badi balama mikenji yende. Yezu wakamba ne: aba badi balonda njila wa Buena-nkristo ‘katataka nebapete bintu misangu lukama bitambe bia diambedi mu tshikondo etshi, . . . bamamu ne bana ne madimi, ne makenga kabidi; palua tshikondo tshikuabu, nebapete muoyo wa tshiendelele.’​—Mâko 10:29, 30.

Epuka kueyemena meji a bena bulongolodi ebu

3. Mu ditungunuka ne kueyemena kudi Yehowa ne Dîyi diende, ntatu kayi idi bena nkristo bakama imue misangu?

³ Lutatu bua bantu bapange bupuangane ndua se: mbinyikibue ku dipepeja anyi dipua muoyo tshidi Nzambi ulomba. Mbipepele bua kutuadijabu kuela meji ne: mbamanye bipitshidile anyi se: meji a kudi bamanyi bapiluke ba mu bulongolodi ebu mmapite a Nzambi, ne se: ng’a buena-lelu menemene. Basadidi ba Nzambi badi pabu mua kudima mmuenenu eu, bu mudibu basombele munkatshi mua bulongolodi ebu. Ke bua tshinyi, pa kualabaja dibikila edi dia dinanga dia kuteleja mibelu yende, Tatuetu wa mu diulu udi kabidi usakidila madimuija makanyine aa: ‘Muananyi, kupu [mikenji yanyi muoyo, ne mutshima webe utumikile mêyi-matuma anyi, NW], bualu neakutentekajile dilepa dia matuku ne bidimu bia muoyo ne ditalala. Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe. Kuikadi muena meji ku mêsu kuebe wewe; utshine Yehowa, umuke ku malu mabi.’​—Nsumuinu 3:1, 2, 5-7.

4. Mmushindu kayi udi “meji a bena bulongolodi ebu” atangalaka kuonso, ne bua tshinyi adi “bupote ku mêsu kua Nzambi”?

⁴ Meji a bulongolodi ebu adi mabodiame ne asanganyibua ku mpokolo mivule. Kudi bilongelu bivule bia dilongela, ne “kakuena ndekelu wa kufunda kua mikanda ya bungi.” (Muambi 12:12) Mpindieu tshidi tshibikidibue bu njila munene wa mamanyisha mu malu a ordinatere udi ulaya bua kupetesha mamanyisha akena ndekelu pa tshiena-bualu pabuipi ne tshionso. Kadi dipetshibua dia dimanya edi dionso kadiena ditamba kuvuija bulongolodi ebu buena meji mapitshidile anyi dijandula ntatu yabu. Bishilangane, nsombelu wa bulongolodi ebu udi wenda ubiipa dituku dionso. Mbiumvuike bua tshinyi Bible udi utuambila ne: “meji a bena bulongolodi ebu adi bupote ku mêsu kua Nzambi.”​—1 Kolinto 3:19, 20, NW.

5. Mmadimuija kayi adi Bible ufila pa bidi bitangila “meji a bena bulongolodi ebu”?

⁵ Mu tshitupa etshi tshia ndekelu tshia matuku a ku nshikidilu, mbitekemenyibue anu se: mudingianganyi munene, Satana Diabolo, neatangalaje mafi mavulavulayi mu madikolela bua kunyanga dieyemena mu bulelela bua Bible. Bashikuluji batontolodi ba Bible mbapatule mikanda mivulavulayi ikena bijadiki idi yela mpata pa bujalame ne dieyemenyibua bia Bible. Paulo wakadimuija muena nkristo nende ne: ‘Wewe Timote, ulame tshiakakupeshabu; epuka ku biakulakula bia patupu ne ku mpata ya bantu badi ne lungenyi ludibo batupakana ne, [Ndimanya, NW]; bakuabo pakitabujabo lungenyi elu, bakapambuka bualu bua ditabuja.’ (1 Timote 6:20, 21) Bible udi kabidi ubela ne: ‘Nudimuke bua muntu kikadiku udi mua kununyanga ne nkindi yende ne lubombo lua patupu, bu mudi bilele biamba kudi bantu, bu mudi mayisha a kumudilu a pa buloba, [adi mashilangane ne, NW] mudi Kristo mutuyishe.’​—Kolosai 2:8.

Luisha dinyikibua ku mpata

6. Bua tshinyi ditabuluka didi dikengedibua bua mpata kayivu kuela miji mu mutshima?

⁶ Tshienzedi tshikuabu tshia budimu tshia Diabolo ntshia dikuna mpata mu lungenyi. Utu mudiakaje bua kusunguluja butekete kampanda mu ditabuja ne kububabidila. Eu yonso udi wela mpata avuluke se: eu udi panyima pa mpata ya mushindu’eu ng’eu wakambila Eva ne: “Nzambi wakamba ne, Kanudi mamuma a mitshi yonso idi mu budimi, anyi?” Diakamue pakajikija Mutetshi eu kukuna mpata mu lungenyi luende, tshidia tshiakalonda tshivua kumuambila dishima, diakitabujaye. (Genese 3:1, 4, 5) Bua ditabuja dietu kadivu kunyangibua kudi mpata bu muakanyangibua dia Eva, bidi bikengela bua tuikale batabuluke. Bikala ndambu nansha mukese wa mpata pa bidi bitangila Yehowa, Dîyi diende, anyi bulongolodi buende mituadije kunenga mu mutshima webe, angata ne lukasa luonso dipangadika bua kuyumbusha kumpala kua kulelayi tshintu kampanda tshidi mua kunyanga ditabuja diebe.​—Fuanyikija ne 1 Kolinto 10:12.

7. Ntshinyi tshidi mua kuenjibua bua kumbusha mpata?

⁷ Ntshinyi tshidi mua kuenjibua? Bua musangu eu kabidi, diandamuna didi kueyemena Yehowa ne Dîyi diende. ‘Biapanga mukuabu wenu meji, aalombe kudi Nzambi udi upa bonso ne mutshima mutoke kayi ubatobolola; nebamupeshawu. Kadi alombe ne ditabuja, kayi ne mpata; bualu bua udi wela mpata udi ufuana divuala dia mâyi manene diendeshibua kudi lupepele ne diedibua mulu.’ (Yakobo 1:5, 6; 2 Petelo 3:17, 18) Nunku disambila dienza ne disuminyina kudi Yehowa ke tshidia tshia kumpala. (Musambu wa 62:8) Pashishe, kuelakanyi bua kulomba diambuluisha dia kudi batangidi bena dinanga mu tshisumbu. (Bienzedi 20:28; Yakobo 5:14, 15; Yuda 22) Nebakuambuluishe bua kusokolola mpokolo wa mpata yebe, ìdì mua kuikala mikebesha kudi lutambishi anyi ngeledi mubi wa meji.

8. Mmunyi mudi ngelelu wa meji wa butontolodi utuadija, ne ntshinyi tshidi tshibujandula?

⁸ Dibala anyi diteleja dia ngenyi ya batontolodi anyi nkindi ya bulongolodi ebu mbibueje mpata ya lulengu anyi? Mu mushindu wa meji, Bible udi ubela ne: ‘Unanukile bua kudifila [muanyishibue, NW], bu muena mudimu udi kayi ne bua kufua bundu, uludikile bantu njila mululame mu dîyi dia Nzambi dia bushuwa. Kadi epuka ku biakulakula bia patupu; bualu bua ben’abi nebatambe kudiunda mu malu adi kâyi anemekela Nzambi; ne mêyi abo neavulangane bu mputa wa lubangu.’ (2 Timote 2:15-17) Bidi bijula ntema pa kumona se: bavule bàdì bapone ku butontolodi bakadibueja mu njila mubi pa kubanga kudiabakena pa mushindu uvuabu badiumvua bangatshibue mu bulongolodi bua Yehowa. (Yuda 16) Dipiisha mitabuja diakalua kunyima. Anu bu mudi doktere wenza lukasa bua kujikija mputa wa lubangu, enza ne lukasa bua kumbusha mu lungenyi dinyikibua kayi dionso ku didiabakena, dia kuikala mupange kusankishibua kudi mushindu udi malu enjibua mu tshisumbu tshia bena nkristo. (Kolosai 3:13, 14) Umbusha tshintu kayi tshionso tshidi tshilubuluja mpata ya mushindu’eu.​—Mâko 9:43.

9. Mmunyi muatuambuluisha midimu mimpe ya teokrasi ya pa tshibidilu bua kushala ne makanda mu ditabuja?

⁹ Shimata bikole kudi Yehowa ne ku bulongolodi buende. Ne lulamatu luonso idikija Petelo, wakamba ne dishindika dionso ne: ‘Mukalenge, netuye kudi nganyi? Wewe udi ne mêyi a muoyo wa tshiendelele.’ (Yone 6:52, 60, 66-68) Ikala ne programe muimpe wa dilonga dia Dîyi dia Yehowa bua kulama ditabuja diebe dikole, bu ngabu munene, uudi mua ‘kuepela nende miketa yonso ya Satana idi ne kapia kasuikaku.’ (Efeso 6:16) Tungunuka ne kuikala muzanzamuke mu mudimu wa Buena-nkristo, pa kuabanyangana ne dinanga mukenji wa Bukalenge ne bakuabu. Dituku dionso, eleela meji ne dianyisha pa mushindu udi Yehowa mukubeneshe. Leja dianyisha bua dimanya dia bulelela diudi nadi. Dienza bintu bionso ebi bu tshibidilu tshimpe tshia Buena-nkristo nedikuambuluishe bua kuikala ne disanka, kunanukila, ne kuepuka mpata.​—Musambu wa 40:4; Filipoi 3:15, 16; Ebelu 6:10-12.

Dilonda buludiki bua Yehowa mu dibaka

10. Bua tshinyi bidi mu mushindu wa pa buawu bia mushinga bua kutangila kudi Yehowa bua kupeta buludiki mu dibaka dia bena nkristo?

¹⁰ Pa kulongolola bua se: mulume ne mukaji basombe pamue bu bena dibaka babidi, Yehowa wakalongolola ki ng’anu bua kuuja buloba bilenga kadi kabidi bua kuvudija disanka diabu. Kadi, mpekatu ne dipanga bupuangane mbikebeshe ntatu minene mu malanda a dibaka. Bena nkristo ki mbepula ku nsombelu eyi to, bualu mbapange pabu bupuangane ne badi bapetangana ne bifimpakaji bia nsombelu wa buena-lelu. Kadi, bilondeshile bualabale bua dieyemena diabu kudi Yehowa ne Dîyi diende, bena nkristo badi mua kupeta bipeta bimpe mu dibaka ne mu dikolesha bana babu. Mu dibaka dia bena nkristo kamuena muaba bua bienzedi ne bibidilu bia bulongolodi ebu. Dîyi dia Nzambi didi ditubela ne: “Dibaka dikale dinemekibua munkatshi mua bantu bonso, bulalu kabunyanguki; Nzambi nealumbuluishe bena masandi bajike ne bena masandi babake.”​—Ebelu 13:4.

11. Mu dijandula ntatu ya dibaka, ntshinyi tshidi bena dibaka buonso babidi ne bua kuanyisha?

¹¹ Dibaka dìdì dienjibue bilondeshile mibelu ya mu Bile didi ne nsombelu wa dinanga, wa dibenga kulengulula bujitu, ne wa dikubibua. Bubidi buabu mulume ne mukaji badi bumvua ne banemeka dîyi-diludiki dia bumfumu. Padi ntatu ijuka, pa tshibidilu mmikebesha kudi ndambu wa dilengulula kutumikila mibelu ya mu Bible. Mu dijandula lutatu kampanda lua munanunanu, bidi bia mushinga bua se: bena dibaka buonso babidi bashindamene ne bululame buonso pa tshidi bushuwa lutatu elu ne bakame miji ya bualu pamutu pa bimanyinu bia bualu. Bikala mayukidilangana a matuku adi panshi aa mafikishe ku diumvuangana dikese peshi kâyi mafikishe ku diumvuangana, bena dibaka babidi badi mua kulomba diambuluisha dikena kansungasunga kudi mutangidi kampanda muena dinanga.

12. (a) Mpa ntatu kayi mitangalake mu dibaka padi Bible ufila mibelu? (b) Bua tshinyi bidi bikengela bua se: bena dibaka buonso babidi benze malu mu diumvuangana ne njila ya Yehowa?

¹² Lutatu ludi lutangila diyukidilangana, kanemu bua nyanji ya umue ne mukuabu, kanemu bua bumfumu, anyi mushindu udi mapangadika angatshibua anyi? Ludi lutangila dikolesha bana, peshi butshintshikidi mu dikumbaja majinga a bitupa bia lulelu anyi? Peshi mmalu a mfranga a dîku, ndijikija lutetuku, mbulunda, ndiangatshibua ku mudimu dia mukaji peshi mmuaba unudi ne bua kusombela anyi? Nansha lutatu luikale lua bishi, Bible udi ufila mibelu mikuatshishi buludiludi ku diambuluisha dia mikenji peshi kabiyi buludiludi ku diambuluisha dia mêyi-maludiki. (Matayo 19:4, 5, 9; 1 Kolinto 7:1-40; Efeso 5:21-23, 28-33; 6:1-4; Kolosai 3:18-21; Tito 2:4, 5; 1 Petelo 3:1-7) Padi bena dibaka buonso babidi badikanda ku dienza malomba a budisui ne bashiila dinanga mpunga bua kulejibuadi mu mushindu wa tshishiki mu dibaka, disanka dinenanenayi didi dipetshibua. Kudi ne bua kuikala dikengela dinenanenayi kudi bena dibaka buonso babidi bua kuenza mashintuluka adi akengedibua, bua kuenza malu mu diumvuangana ne njila ya Yehowa. ‘Udi umvua dîyi ne ntema neapete diakalengele; udi weyemena Yehowa neikale ne disanka.’​—Nsumuinu 16:20.

Bansonga​—Telejayi Dîyi dia Nzambi

13. Bua tshinyi ki mbipepele bua bansonga bena nkristo kukola ne ditabuja dikole kudi Yehowa ne Dîyi diende?

¹³ Bu mudi bulongolodi ebu bubi bubanyungulule, ki mbipepele bua bansonga bena nkristo kukola ne ditabuja. Kabingila kamue kadi se: “bena panu bonso badi mu bianza bia Muena bubi,” Satana Diabolo. (1 Yowanese 5:19, MMM) Bansonga mbabunda kudi muluishi eu mubi údí mua kuenza bua bubi bumueneke buimpe. Mmuenenu ya meme-diambedi, bipatshila bia budisui, dizukila malu akena a tshitembu ne a luonji, ne dipatshila dinekesha dia masanka​—bionso ebi bidi bipatukila ku mushindu umuepele, mutangalake wa diela meji mumvuija mu Bible bu “spiritu udi utumika mpindieu mu bana ba bupidia.” (Efeso 2:1-3, NW) Satana mmulubuluje ne budimu “spiritu” eu mu mikanda ya mu tulasa, mu mijiki mivule mitangalake kuonso, mu manaya, ne mu mishindu mikuabu ya dijikija lutetuku. Baledi badi ne bua kutabala bua kukanda buenzeji bua mushindu’eu pa kuambuluisha bana babu bua kukola eku beyemena Yehowa ne Dîyi diende.

14. Mmunyi mudi bansonga mua ‘kunyema bijingajinga bibi bia bunsonga’?

¹⁴ Paulo wakapesha muenzejanganyi nende wa mudimu nsongalume Timote mubelu wa bu-tatu udi ulonda eu: ‘Nyema bijingajinga bibi bia bunsonga. Ipatshila buakane, ditaba, dinanga ne bupole, pamue ne badi babila Mfumu ne muoyo mukezuke.’ (2 Timoteyi 2:22, MMM) Nansha mudi ‘nkuka yonso ya bansonga’ kayiyi mibi pa nkayayi, bansonga badi ne bua ‘kuyinyema’ mu ngumvuilu wa se: badi ne bua kuepuka bua kuvuija bintu ebi diditatshisha diabu, pa kubenga kushiila bipatshila bia buena-Nzambi dîba, peshi pa kubishiila anu dîba dikese. Diibaka dia mubidi, manaya, mijiki, didiolola, dijikija lutetuku, ne ngendu, nansha mudibi bushuwa kabiyi bibi pa nkayabi, bidi mua kuikala buteyi bialuabi bintu bia mushinga mu nsombelu. Nyema miyuki ikena tshipatshila, diendakanangana, disua kumanya bivule pa bitupa bia lulelu dinekesha, disomba tshianana dìdì dilela lunsuya, ne didiabakena bua mudi baledi bebe kabayi bakumvuila.

15. Mmalu kayi adi mua kuenzeka mu lupengeleke mu nzubu adi mua kufikisha bansonga ku dikala ne nsombelu wa buena-mpala ibidi?

¹⁵ Nansha mu lupengeleke mu nzubu, njiwu idi mua kuikala mibutamine bansonga. Bikala bindidimbi bia buenzavi anyi tshikisu bia ku televizion anyi video bibandidibua, dijinga dia kuenza malu mabi didi mua kukunyibua. (Yakobo 1:14, 15) Bible udi ubela ne: “Nuenu badi bananga Yehowa, nuikale ne malu mabi lukuna.” (Musambu wa 97:10; 115:11) Yehowa mmumanye bikala muntu uteta kuikala ne nsombelu wa buena-mpala ibidi. (Nsumuinu 15:3) Bansonga bena nkristo, kenketayi tshibambalu tshienu. Udi mulamike ku bimanu foto ya bantu bende lumu mu manaya anyi mijiki bena tshiendenda bena bulongolodi ebu, anyi udi mulamike bintu bimpe bìdì bikale bivuluiji bimpe? (Musambu wa 101:3) Mu tshitekelu tshiebe tshia bilamba, utuku ne bilamba bidipope, peshi bimue bivualu biebe bidi bileja mishindu minekesha ya mvuadilu ya bulongolodi ebu anyi? Mu mishindu ya budimu Satana udi mua kukukuata mu buteyi biwapona mu ditetshibua dia kulabula tshidi tshibi. Bible udi ne meji wonso ubela ne: “Lamayi nkatshinkatshi, nuikale batabale. Muluishi wenu, Diabolo, udi wenda anu bu ntambue udi ukungula, ukeba muntu wa kudiaye.”​—1 Petelo 5:8, NW.

16. Mmunyi mudi mibelu ya mu Bible mua kuambuluisha nsonga kampanda bua se: muntu kayi yonso wa nsongo ikale utunka buende?

¹⁶ Bible udi ukubela bua kudimukila ditantshilangana diebe. (1 Kolinto 15:33) Balunda bebe badi ne bua kuikala aba badi batshina Yehowa. Kutekeshibu kudi difimpakajibua. (Musambu wa 56:11; Nsumuinu 29:25) Ikala ne butumike kudi baledi bebe batshinyi ba Nzambi. (Nsumuinu 6:20-22; Efeso 6:1-3) Kudimuka kudi bakulu bua kupeta buludiki ne dikankamijibua. (Yeshaya 32:1, 2) Lama lungenyi luebe ne mêsu ebe pa manême ne bipatshila bia mu nyuma. Keba bikondo bua kuenza dilubuluka mu nyuma ne bua kudifila mu midimu ya tshisumbu. Longa mushindu wa kuenza bintu ne bianza biebe. Ulue mukole ne muena dikanda mu ditabuja, ne nunku neufile tshijadiki tshia se: udi muntu bushuwa​—muntu wa mushinga muakanyine muoyo mu bulongolodi bupiabupia bua Yehowa! Tatuetu wa mu diulu neikale utunka buebe, baledi bebe ba pa buloba nebasanke buebe, ne bana betu bena nkristo nebakankamijibue kuudi. Ke tshidi ne mushinga!​—Nsumuinu 4:1, 2, 7, 8.

17. Mmasanka kayi adi avuila aba badi beyemena Yehowa ne Dîyi diende?

¹⁷ Mu tshiambilu tshia mêyi a kasala mufundi wa misambu wakasakibua bua kufunda ne: ‘Yehowa kêna upala badi benda mu buakane tshintu tshimpe tshimue. Yehowa wa misumba, disanka didi kudi muntu udi ukueyemena!’ (Musambu wa 84:11, 12) Eyowa, disanka ne dilubuluka, ki ndiedibua mâyi ku makasa ne dipangila, ke biavuila aba badi beyemena Yehowa ne Dîyi diende, Bible.​—2 Timote 3:14, 16, 17.

Mmunyi muwandamuna?

◻ Bua tshinyi bena nkristo kabena ne bua kuteka dieyemena diabu ku “meji a bena bulongolodi ebu”?

◻ Ntshinyi tshidi ne bua kuenjibua bikala muntu ne mpata?

◻ Mmunyi mudi dienza malu mu diumvuangana ne njila ya Yehowa dituala dilubuluka ne disanka mu dibaka?

◻ Mmunyi mudi Bible wambuluisha bansonga ‘bua kunyema bijingajinga bibi bia bunsonga’?

[Tshimfuanyi mu dibeji 23]

Bena nkristo badi bakudimuka kudi Yehowa ne Dîyi diende, eku babenga “meji a bena bulongolodi ebu” bu bupote

[Tshimfuanyi mu dibeji 25]

Mêku adi eyemena Yehowa ne Dîyi diende adi apeta bipeta bimpe ne disanka