“Malu onso enjibue bua kunudiundisha”

¹ Patudi tutantshilangana ne bana betu, tudi ne bua kubenzela malu mimpe adi mua kubadiundisha mu nyuma. Mmuomumue ne: kuikala ne dijinga dia kubakuba mu nyuma. Patudi tuditua mu mudimu kampanda wa disumbisha bintu anyi wa malu makuabu, tudi ne bua kuikala badimuke bua bualu nansha bumue butudi tuenza kabusesuishi bana betu.​—2 Kol. 6:3; Filip. 1:9, 10.

² Bamue mbaditue mu dienda dia mishinga idi kayiyi mua kuenda bimpe, batekemena ne balabidila bena Kristo nabu bua bikale babasumba bintu biabu. Imue kumpanyi ya dipana dia bintu itu ikankamija baleji-mpala bawu bua kuangata muntu yonso bu kiliya anyi muntu wabasumba bintu, kusangisha ne aba badibu nabu mu bitendelelu biabu. Bamue bana betu batu bakadi babikidishe Bantemu bakuabu ba bungi ne tshipatshila tshia kubafikisha ku dianyisha ne ku diditua pabu mu dienda dia mushinga kampanda. Bakuabu pabu badi bajinga kuendesha bungenda buabu bimpe badi batumina bena kuitabuja nabu bintu bidibu kabayi babalombe, bikandakanda, malu a mu Internet anyi bande. Bidiku biakanyine bua muena Kristo kuendelaye mushinga pambidi pa bena Kristo nende anyi? Tòo!​—1 Kol. 10:23, 24, 31-33.

³ Bana betu badi ne bua kudimuka: Ki mbuena kuamba ne: muena Kristo kêna mua kuenda mushinga ne muena Kristo nende kampanda to. Abu mbualu budi butangila muntu nkayende. Kadi bakuabu badi babangisha bungenda bubi bua lukuka, ne basaka bena kuitabuja nabu bua kuenza pabu bia muomumue anyi babalomba bua kuelamu pabu makuta a kuenduluka nawu. Bungenda bua mushindu’eu, misangu yonso kabutu buya kumpala to, ne butu bujimijila bantu makuta a bungi be! Nansha bavua baditue mu mishinga eyi mua kuikala bavua ne dijinga dia kupeta makuta a bungi diakamue kabiyi binengakana, tshinudi ne bua kumanya ntshia se: muntu uvua mutuadije bualu ebu kêna ne bua kuela meji ne: kabakumupesha tshilema biatua bungenda abu panshi to. Udi ne bua kudianjila kuela meji bimpe menemene bua mushindu udibi mua kutatshisha nsombelu wa mu nyuma ne wa ku mubidi wa bana babu bikala mishinga ayi kayiyi miende bimpe. Bana betu badi ne majitu mu tshisumbu tshia bena Kristo badi nangananga ne bua kuikala ne budimu mu midimu idibu benza bualu bena Kristo nabu badi babanemeka ne babeyemena. Mbibi menemene bua kunyanga dibeyemena edi. Muanetu udi mua kujimija amue masanka a mudimu wetu wa tshijila bikala bakuabu kabatshiyi bamunemeka to.

⁴ Tshipatshila tshietu tshidi ne bua kuikala tshia kulekela ‘malu onso enjibue bua kudiundishangana.’ (1 Kol. 14:26) Tudi ne bua kuepuka bualu buonso budi mua kubuejija anyi kukankamija dienda dia mushinga mu tshisumbu. Malu a nunku kaena umvuangana nansha kakese ne tshitudi tudisangishila pamue tshidi Bible wamba nansha.​—Eb. 10:24, 25.