October

Kutala shimbu jimwe cheji kumikaluhwilanga kwononoka tahi? Mwangana Ndavichi chamukaluhwililenga, ngocho alombele kuli Kalunga ngwenyi: “Nguhane muchima wakufwila kukwononoka.” (Samu 51:12) Numba tuhu Ndavichi azangile Yehova, oloze shimbu jimwe chamukaluhwililenga kwononoka, kaha mukiko chapwa nakuli yetu. Mwomwo ika? Chatete, twaswana muchima wakulikanga. Chamuchivali, Satana afwila kutulingisa tulikange kuli Yehova ngana muze alikangile ikiye. (Koli. 2, 11:3) Chamuchitatu, vatujingilika kuvatu vaze vatwama namuchima wakulikanga, “yikiko shipilitu yize yili nakuzata noholili muli vana vakulikanga.” (Efwe. 2:2) Shikaho twatela kuzata nangolo mangana tufungulule muchima wakufwila kulinga shili, nakufungulula nawa Liyavolo navatu vamukaye kenyi vaze vafwila kutulingisa tulikange. Twatela kukilikita twononoke Yehova navaze ahana wata. w23.10 6 ¶1

Uno chakukomwesa alingile Yesu chakwalumuna meya kupwa vinyo nachitunangula vyuma muka? Nachitunangula kupwa namuchima wakulinyisa. Yesu kalisashile hachakukomwesa alingileko, kaha nawa kalisashilenga havyuma ateselengamoko. Oloze alinyishile nakuhana upahu nakavumbi kuli ise. (Yowa. 5:​19, 30; 8:28) Nge natulondezeza Yesu hakuhona kulimona kupwa tuvavalemu chikuma, kaha katweshi kulisasanga havyuma natutesamoko. Katwatela kulisashila hali etu vaveneko, oloze twatela kulisashila hali Kalunga uze tweji kuzachilanga. (Yele. 9:​23, 24) Twatela kumuhananga kavumbi kakanene. Anukenu ngwenu vyuma vyosena vyamwaza tweji kuvilinganga mwomwo yakutukafwa kuli Yehova. (Koli. 1, 1:​26-31) Nge natupwa vakulinyisa, kaha katweshi kulisasa havyuma vyamwaza natulingila vakwetuko. Twasuuluka hakutachikiza ngwetu Yehova eji kumonanga vyuma tweji kulinganga nakuvimona kupwa vyavilemu. (Esekesenuko Mateu 6:​2-4; Hepe. 13:16) Chikupu vene, tweji kwivwisanga Yehova kuwaha kachi nge natulondezeza Yesu hakupwa namuchima wakulinyisa.—Petu. 1, 5:6. w23.04 4 ¶9; 5 ¶11-12

Kaposetolo Paulu vamuhwiminyinyine akolezeze vaka-Kulishitu vahakenga kulutwe vyuma vasaka vakwavo. Uno tunahase kuzachisa ngachilihi chisoneka kana nge tuli nakukunguluka? Hakwanukanga ngwetu navakwetu nawa vali nakufwila kukumbululaho ngana muze tuli nakusaka etu. Achishinganyekenu hachuma chino. Nge muli nakushimutwila namasepa jenu, kutala yenu kaha namuhanjikanga chakuzeneka kuvahana lisesa lyakuhanjikaho tahi? Kamweshi kulinga ngochoko. Namusaka navakiko vazane muchihande muli nakushimutwila. Chochimwe nawa, nge tuli nakukunguluka, twasaka vatu vavavulu vakumbululeho. Tachikizenu ngwenu jila yimwe yakukolezezelamo vandumbwetu shina kuvahana lisesa lyakuhanjika vyuma vafwelela. (Koli. 1, 10:24) Shikaho, twatela kukumbululanga mukavatu, mangana tuseleko navakwetu vazanemo. Numba vene nge muli nakukumbulula mukavatu, kanda kuhanjika vishina vyavivuluko. Nge namukumbulula vishina vyosena vili mupalangalafu, kaha vakwenu nevi navakumbulula vyauchi. w23.04 22-23 ¶11-13

Twatela kwanuka kulema chakutwalaho kukafwa vakwetu chikumanyi hakuzata mulimo wakwambulula. Twatela kupwa vavavwovu hakuzata mulimo wakwambulula. Vatu tweji kuwananga vafuma kuvisemwa vyakulisezaseza vaze nawa vafwelela vyuma vyakulisezaseza kaha nawa vakwechi vishinganyeka vyakulisezaseza. Kaposetolo Paulu, apwile wamuvwovu kaha nayetu tunahase kulinangulako kuli ikiye. Yesu atongwele Paulu kupwa “kaposetolo kuli vaka-mafuchi eka.” (Loma 11:13) Echi chalingishile Paulu ambulile vaYuleya navaHelase navaka-kutanga, navatu vamumembo, navilolo jafulumende navamyangana. Hakusaka avanangule nakuvaheta kumichima, Paulu alilingishilenga kupwa “vyuma vyosena kuvatu vakulisezaseza vosena.” (Koli. 1, 9:​19-22) Ashinganyekelenga hachisemwa chavatu, navyuma vafwelelele kaha chamukafwilenga awane mwakuputukila kuvambulila. Nayetu nawa tunahase kuzata kanawa mulimo wakwambulula nge natupwa vavavwovu nakushinganyekanga nawa chikuma hajila tunahase kukafwilamo vatu vaze natwambulila. w23.07 23 ¶11-12

Vatu vavavwovu kavapwa vakuhehelako. Chasakiwa kupwa vakujikiza numba tuunde muchima nge vanatulingi mwamupi. Kuvova chatwama hamukana “[wa]mihako yashipilitu.” (Ngale. 5:​22, 23) Lizu lyachiHelase valumuna ngwavo “kuvova,” lwola lumwe valizachishilenga kukavalu wamumusenge uze vanahombola. Achishinganyekenu hakavalu kana. Numba tuhu mwononoka olozenyi wakujikiza. Uno etu vatu tunahase kupwa ngachilihi tuvavavwovu oku nawa tuvakujikiza? Katweshi kuhasa kulinga ngocho mungolo jetuko. Twatela kulomba Kalunga atuhane shipilitu yenyi mangana yitukafwe tupwenga vavavwovu. Vatu vavavulu vanalinangula kupwa namuchima kanou. Vinjiho vavavulu vanakulanga mujila yayivwovu kuvatu vaze vanasakenga kulipula navo jipami, kaha chuma kana chinalingisa vatu veka vevwilile kumujimbu wamwaza.—Chimo. 2, 2:​24, 25. w23.09 15 ¶3

Kaposetolo Yowano vamumwenesele chakumwenesa chakukomwesa chize chasolwele vakulwane 24 vali nakulemesa Yehova mwilu. Vapwile nakwalisa Kalunga nakuhanjika ngwavo atamo kutambula “upahu nakavumbi nangolo.” (Kuso. 4:​10, 11) Vangelo vakushishika nawa vatwama navyuma vyavivulu vyakuvalingisa valise Yehova nakumuvumbika. Vatwama nenyi hamwe mwilu kaha vamutachikiza kanawa. Veji kumonanga vilinga vyenyi kuhichila muvyuma eji kulinganga. Kumona vyuma eji kulinganga Yehova cheji kuvakunyulanga vamwalise. (Yopa 38:​4-7) Nayetu nawa tweji kwalisanga Yehova mukulomba chetu nakuhanjika hatoma vyuma twazanga hali ikiye navize vyeji kutwivwisanga kuwaha. Omu namutanganga Mbimbiliya nakulinangulayo, wanenu vilinga vyaYehova vize vyeji kumivwisanga kuwaha. (Yopa 37:23; Loma 11:33) Kaha mulwezenu Yehova omwo mweji kwivwanga havilinga kana. Tunahase nawa kwalisa Yehova hakutukafwa nakukafwa vandumbwetu vakushipilitu.—Samwe. 1, 2:​1, 2. w23.05 3-4 ¶6-7

Mu 1919, Mbavilone Yayinene kayapwile cheka nangolo havatu jaKalungako. Mumwaka kana “ndungo wakushishika wakuzangama” aputukile kuzata mangana akafwe vatu vamwaza michima vaputuke kutambuka “[mu]Jila yaKujila.” (Mateu 24:​45-47; Isa. 35:8) Mulimo wakuwahisa jila uze vazachile shimbu kanda lwola lwaRussell, wakafwile vatu vaze vaputukile kutambuka mujila kana valinangule hali Yehova navyuma ajina. (Vishi. 4:18) Chavakafwilenga nawa vahase kukavangiza jishimbi jaYehova. Yehova katonda ngwenyi kuvanga vatu jenyi valumuke halwola lwolumweko. Oloze natomesanga vatu jenyi chindende chindende. Natukawahilila omu natukevwisanga Kalunga ketu kuwaha muvyuma vyosena. Jijila josena jasakiwa kujiwahisa lwola lwosena. Kufuma vene mu 1919, mulimo wakuwahisa “Jila yaKujila” unatwalengaho lika mangana chipwenga chachashi vatu vavavulu kuseza Mbavilone Yayinene. w23.05 17 ¶15; 19 ¶16

Lizavu lyaKutwaminyina linanangulanga vaka-kuvakafwa mujikomiti jakulisezaseza jaLizavu lyaKutwaminyina. Ava vaka-kukafwa vali nakuzata milimo yayivulu muliuka. Shikaho vanapu jino vakulizanga mangana vakatwaleho lika kuzakama mikoko jaKulishitu. Omu vawavisa vamakumishilo navakaya mwilu kusongo yaluyando lwalunene, kulemesa chamuchano nachikatwalangaho lika hano hamavu. Vaka-kulemesa Kalunga navakatwalaho lika kuvazakama mwomwo yachiyulo chaYesu Kulishitu. Chikupu vene, tunatachikiza ngwetu Ngonge wakuMangonge, kulumbununa kulifutula chavaka-mafuchi, mwakafumbukila vatu jaKalunga. (Ezeke. 38:​18-20) Oloze vatu jaKalunga navakatwalaho lika kulemesa Yehova, kaveshi kukavahonesako. Yehova mwakavayovola. Kaposetolo Yowano vamumwenesele “liyongomena lyalinene” lyamikoko veka jaKulishitu. Yowano vamulwezele ngwavo eli “liyongomena lyalinene” linapu vatu vaze “vanafumu muluyando lwalunene.” (Kuso. 7:​9, 14) Chikupu vene, vatu kana navakapwa vakukingiwa. w24.02 5-6 ¶13-14

Uno vyuma muka twatela kulinga numba tutambule shipilitu yajila? Twatela kuyilombanga, nakulinangulanga Mazu aKalunga vahwima, nakulikatanga naliuka lyenyi lize vali nakutwaminyina nashipilitu. Echi nachitukafwa tupwenga “[na]mihako yashipilitu.” (Ngale. 5:​22, 23) Kalunga eji kuhananga kaha shipilitu yenyi kuvatu vaze veji kulamanga vishinganyeka vyavo navilinga kupwa vitoma. Keshi kutwalaho kutuhana shipilitu yenyi kachi nge natutwalaho lika kushinganyeka vyuma vyavipi nakuvilingako. (Teso. 1, 4:​7, 8) Hakusaka tutwaleho lika kutambula shipilitu yajila, katwatela ‘kulumbilisa upolofwetoko.’ (Teso. 1, 5:20) Lizu “upolofweto” vanavuluka hano lyatalisa kumujimbu uze Yehova eji kutuhananga kuhichila mushipilitu yenyi yajila, kuhakilako namujimbu walikumbi lyaYehova nakwanguhwa chamakumbi tuli nakuyoyelamo. Katwashinganyeka ngwetu likumbi lyaYehova chipwe Alamangetone kavyeshi kukeza mulwola lwetuko. Oloze tweji kwanukanga kupwako chalikumbi kana, hakupwa navilinga vyakwoloka nakufwilanga nawa kupwa ‘navilinga vyakuzachila Kalunga.’—Petu. 2, 3:​11, 12. w23.06 12 ¶13-14

Uno etu vaka-Kulishitu natulinga ngachilihi nge mivwimbimbi yakuneha peha yakusaka kulisavala yineza halikina lyetu? Hahaze vene, twatela kutala kweka. Tunahase kulihenda kuvyuma kana kachi nge natwanuka ngwetu chuma chachilemu kuli yetu shina usoko wetu naYehova. Anukenu ngwenu namivwimbimbi yimwe yize yinahase kusoloka nge kayeshi yavyuma vyakuneha pehako, yinahase kusangumuna peha yakusaka kulisavala. Mwomwo ika twatela kulihendela kumivwimbimbi kana? Mwomwo katweshi nakusaka kulingisa kachuma numba kakandende katulingise tulinge ukoji mumichima yetuko. (Mateu 5:​28, 29) Ndumbwetu David uze apwa mukulwane mulifuchi lyaThailand ambile ngwenyi: “Ngweji kulihulisanga ngwami, ‘Numba tuhu mivwimbimbi yimwe kayapwa hivyuma vyakuneha pehako, uno Yehova mwangwivwila kuwaha nge nangutwalaho kuyitala tahi?’ Kulihulisa chihula kana cheji kungukafwanga ngusakule kanawa vyakulinga.” Tweji kusakulanga kanawa vyakulinga mwomwo yakwivwa woma wakwivwisa Yehova kupihya. Kwivwa Kalunga woma chikiko “kuputuka chamangana.” w23.06 23 ¶12-13

Ava ‘tupete’ vavuluka pamo vatalisa kuvikungulwilo. Yehova atufwelelesa ngwenyi mwakatukinga haluyando lwalunene nge natutwalaho lika kulinunga navandumbwetu. Shikaho twatela kuzata nangolo oholyapwa mangana tuzange chikuma vandumbwetu, mwomwo kuyovoka chetu chinahase kukapendamina hakulinga ngocho. Lwola “[lwa]likumbi lyaYehova lyalinene” nalukapwa lwalukalu chikuma. (Zefwa. 1:​14, 15) Halwola kana, navatu jaYehova navakamona ukalu. Oloze nge natupwa vakulizanga oholyapwa kaha natukaunda muchima nakukakafwa vakwetu. Natukapwa nalukakachila mukala ukalu natukamona. Omu natukamona vandumbwetu vali nakuyanda, natukavevwila keke nakuzata nangolo mangana tukavakafwe. Kaha natukalipandama chikuma navandumbwetu mwomwo twavazanga chikuma. Yehova jino mwakatufweta kuyoya chahaya myaka mukaye muze vatu kaveshi kukanuka cheka jiponde naluyando vanamonongako.—Isa. 65:17. w23.07 7 ¶16-17

Kakavulu Mazu aKalunga alumbununa vatu vakushishika kupwa vangolo. Oloze navatu vaze vapwilenga vangolo chikuma, shimbu jimwe valivwilenga kupwa vakuhehela. Chakutalilaho, lwola lumwe Mwangana Ndavichi alivwile nge ‘nazame ngana mwapili,’ oloze halwola lukwavo ‘alizuzukilile nawoma.’ (Samu 30:7) Samasone apwile nangolo chikuma mwomwo yakumukafwa kushipilitu yaKalunga, oloze atachikijile ngwenyi chakuzeneka kumukafwa kuli Kalunga ‘mwazeya nakupwa ngana mwavatu vosena.’ (Kuyu. 14:​5, 6; 16:17) Ava malunga vakushishika vazaminenga mwomwo Yehova ikiye avahanyinenga ngolo. Kaposetolo Paulu naikiye atachikijile ngwenyi asakiwilenga ngolo jakufuma kuli Yehova. (Koli. 2, 12:​9, 10) Amwenenga ukalu wamisongo. (Ngale. 4:​13, 14) Shimbu jimwe nawa chamukaluhwililenga kulinga vyuma vyakwoloka. (Loma 7:​18, 19) Kaha lwola lukwavo nawa alizakaminyinenga nakwivwa woma havyuma vinahase kumusolokela. (Koli. 2, 1:​8, 9) Oloze omu Paulu apwile wakuhehela akwachile nawa ngolo. Mujila muka? Yehova amuhanyine ngolo jize asakiwile. w23.10 12 ¶1-2

Kachi nge lwola lumwe natulivwa ngwetu tuvamokomoko, twatela kwanuka ngwetu Yehova ikiye atukokele. (Yowa. 6:44) Eji kumonanga vyuma vyamwaza muli etu, vize pamo katweshi kuhasa kumona etu vaveneko. (Miji. 2, 6:30) Shikaho tunahase kumufwelela kachi nge mwatulweza ngwenyi twapwa tuvavalemu. (Yowa. 1, 3:​19, 20) Shimbu kanda tulinangule muchano, etu vamwe twalingilenga vyuma vize vyeji kutulingisanga tulihane milonga. (Petu. 1, 4:3) Navaka-Kulishitu vakushishika veji kulipikanga natutenga twavo. Nyi ngachilihi yenu? Kutala mweji kushinganyekanga ngwenu Yehova kamikonekelako tahi? Nge mukiko, kaha kutachikiza ngwenu navangamba jaYehova vakushishika vanevunga mwomumwe nachimivendejeka. Chakutalilaho, kaposetolo Paulu alimwenenga kupwa wakuvindama omu ashinganyekelenga hatutenga twenyi. (Loma 7:24) Chipwe ngocho, Paulu apihililile nakwalumuka nakumumbapachisa. Numba tuhu alingile ngocho, oloze alimwenenga kupwa “wamundende hali vaposetolo vosena,” kaha nawa “muka-shili chikuma.”—Koli. 1, 15:9; Chimo. 1, 1:15. w24.03 27 ¶5-6

Chishina chimwe tunahase kulinangula kuli Mwangana Yehowashe uze asakwile kulinga vyuma vyavipi, shina twatela kusakulanga masepa vaze vazanga Yehova nakusaka kumwivwisa kuwaha, vaze nawa navatukafwa tulinge vyuma vyakwoloka. Katwatela kusakulanga kaha masepa vamyaka yakusemuka yoyimwe nayetuko. Anukenu ngwenu, Yehowashe apwile kanyike chikuma hakumwesekesa kuli Yehoyata uze alikachile nenyi. Shikaho, lihulisenu hali masepa jenu ngwenu: ‘Kutala veji kungukafwanga ngufwelele chikuma Yehova tahi? Uno veji kungukolezezanga ngukavangize jishimbi jaYehova tahi? Kutala veji kuhanjikanga hali Yehova nahamuchano wenyi waulemu tahi? Uno vamona jishimbi jaYehova kupwa jajilemu tahi? Kutala veji kuhanjikanga kaha vyuma vize ngwasaka tahi, nyi veji kuhamukanga kungwolola kachi nge ngunalimbenje?’ (Vishi. 27:​5, 6, 17) Kuhanjika muchano, nge masepa jenu kavazanga Yehovako kaha kamwatela kulikata navoko. Oloze nge masepa jenu vazanga Yehova, kaha likatenu navo, vanahase kumikafwa.—Vishi. 13:20. w23.09 9-10 ¶6-7

Lizu Alafwa lyaputuka nasona watete muvasopelo vachiHelase, kaha lizu Omenga lyaputuka nasona wamakumishilo. Yehova hakuzachisa mazu ‘Alafwa naOmenga’ alumbunwine ngwenyi nge naputuka vyuma, kaha mwavitesamo nakuvikumisa. Hanyima yakutenga Alama naEve, Yehova avalwezele ngwenyi: “Semenunga muvule chikuma, muzalise hamavu, nakuwalamanga.” (Kupu. 1:28) Halwola kana, chapwile kwijiva nge, Yehova nambe ngwenyi, “Alafwa.” Avalwezele hatoma vyuma ajinyine ngwenyi, nakukapwa lwola luze vaka-tanga yaAlama naEve vakwononoka, kaha nawa vakukupuka navakatesamo mulimo wakuzalisa ano mavu nakuwalumuna kupwa palachise. Halwola kana, nachikapwa kwijiva nge Yehova nambe ngwenyi “Omenga.” Omu Yehova akumishile kutenga “melu namavu navyuma vyosena vyatwamamo,” ahanjikile mazu aze asolwele nge mwakatesamo chikupu vyuma ashika. Chikupu vene atufwelelesa ngwenyi mwakatesamo vyuma ajina kutalisa kuvatu nakumavu. Vyuma kana navikatesamo chikuma kusongo yalikumbi lyakusokesa 7.—Kupu. 2:​1-3. w23.11 5 ¶13-14

Ungeji waukalu wakufuma kuMbavilone nakuya kuIsalele wapwile wakutambuka tukweji vawana, oloze Yehova avafwelelesele ngwenyi kala vyuma vize vyatelelele kuvahonesa kukinduluka mwakavifumisako. VaYuleya vakushishika vatachikijile ngwavo vyuma navakalivwisa kuwaha nge vanakinduluka kuIsalele, vyavivulu kuhambakana vize navaseza. Chuma chachilemu havyuma kana shina kulemesa Kalunga. MuMbavilone kamwapwile tembele yakulemesela Yehovako. Kamwapwile lijiko lyakulumbila haze vaIsalele vatelelele kuhanyina vimuna vakuvatula kweseka naJishimbi vahanyine Moseko, kaha nawa kakwapwile vapilishitu vakulongesa kanawa vaze vatelelele kulumbanga wana kanako. Chuma chikwavo nawa shina vatu jaYehova vapwile vavandende hakuvesekesa kuli vaze valemeselenga tulunga vamakuli, vaze nawa kavavumbikilenga jishimbi jaYehovako. Shikaho vaYuleya vakushishika vavavulu vapwile nakutalilila kukinduluka kwimbo lyavo kuze navakakindulwisa kulemesa chamuchano. w23.05 14-15 ¶3-4

Twasakiwa kutukafwa kushipilitu yajila yaKalunga mangana tutwaleho lika kutambuka “nge vana vakumunyika.” Mwomwo ika? Mwomwo chapwa chachikalu kutwalaho lika kupwa vatoma mukaye kano kavilinga vyavipi. (Teso. 1, 4:​3-5, 7, 8) Shipilitu yajila nayitukafwa tufungulule vishinganyeka vyakaye, kuhakilako vene namangana autu navishinganyeka vize vyalimbalaka navishinganyeka vyaKalunga. Shipilitu yajila nayitukafwa nawa tusolole “kuwaha chosena, nakwoloka.” (Efwe. 5:9) Jila yimwe tunahase kutambwilamo shipilitu yajila shina kuyilomba. Yesu ambile ngwenyi, Yehova eji kuhananga “shipilitu yajila kuli vaze navamulombayo.” (Luka 11:13) Tweji kutambulanga nawa shipilitu yajila hakwalishila hamwe navakwetu Yehova hakukunguluka chavaka-Kulishitu. (Efwe. 5:​19, 20) Shipilitu yajila yaKalunga nayitukafwa tuyoye mujila yize nayivwisa Kalunga kuwaha. w24.03 23-24 ¶13-15

Uno muli nakusakiwa muchima wakutalilila chikoki tahi? Nge mukiko, kaha lombenu Kalunga amikafwe mupwenga namuchima kana. Muchima wakutalilila chikoki wapwa muhako washipilitu. (Ngale. 5:​22, 23) Shikaho tunahase kulomba Yehova atuhane shipilitu yenyi nakutukafwa tupwenga namihako yayo. Nge tuli mucheseko chakusaka kulinga vyuma mukulusuka, twatela ‘kulombanga lika’ Kalunga atuhane shipilitu yajila yitukafwe tupwenga namuchima wakutalilila chikoki. (Luka 11:13) Tunahase nawa kulomba Yehova atukafwe tumonenga vyuma ngana muze avimona ikiye. Kaha nge tunalombo lyehi, twatela kuzata nangolo tusololenga muchima wakutalilila chikoki hakumbi hakumbi. Nge natulombanga chikuma nakukilikita tupwenga vaka-kutalilila chikoki, kaha nachipwa jino chachashi kusolola muchima kana mwomwo unazame muli etu. Weji kutukafwanga nawa tushinganyekenga havyakutalilaho vyamuMbimbiliya. MuMbimbiliya mwatwama vyakutalilaho vyavivulu vyavatu vaze vapwile namuchima wakutalilila chikoki. Nge natuhunanananga havyakutalilaho kana, kaha natuwana jijila jakusolwelamo muchima wakutalilila chikoki. w23.08 22 ¶10-11

Yesu afwelelesele kaposetolo Petulu ngwenyi Yehova mwamuzakama. Akafwile nawa Petulu navakwavo vaposetolo vakwate vaishi mujila yakukomwesa. (Yowa. 21:​4-6) Echi chakukomwesa chajikijishile lufwelelo lwaPetulu atachikize ngwenyi Yehova nahase kumuhana vyuma vyasakiwa mukuyoya. Pamo kaposetolo Petulu anukile mazu aYesu akwamba ngwenyi, Yehova mwakazakamanga vaze “[veji kutondanga lika] chatete Wangana.” (Mateu 6:33) Echi chakafwile Petulu ahake kulutwe mulimo wakwambulula kuhambakana mulimo wakuta vaishi. Halikumbi lyaPendekoseta mu 33 C.E., Petulu ambulwile natwima, kaha akafwile vatu vavavulu vetavile mujimbu wamwaza. (Vili. 2:​14, 37-41) Kufumaho, akafwile vaSamaliya navatu vakumafuchi eka valinangule hali Kulishitu nakumukavangiza. (Vili. 8:​14-17; 10:​44-48) Chikupu vene, Yehova azachishile Petulu mujila yakulipwila mangana anehe vatu vakuvisemwa vyakulisezaseza muchikungulwilo. w23.09 20 ¶1; 23 ¶11

Kafwe myaka yivali kufuma haze vaka-Mbavilone vanongesele Yelusalema Mwangana waMbavilone Nevukataneza alotele chilota chamutu wamunene wachifwanyisa. Asakile kujiha vaka-kumulweza mangana vosena kuhakilako vene naNdanyele kachi nge kaveshi kumulweza vyuma naloto naulumbunwiso wavyoko. (Ndanye. 2:​3-5) Ndanyele atelelele kulingako vyuma vimwe washiwashi kuchina vatu navavajiha. “Ayile kuli mwangana, kaha amulembelelele amuhaneko lwola numba jino akaye nakumulumbunwina chilota chenyi.” (Ndanye. 2:16) Chuma kana chasakiwile kupwa wakuhamuka nalufwelelo. Kakwatwama unjiho wakusolola nge Ndanyele alumbunwinenga vilotako. Alwezele masepa jenyi “valombe kuli Kalunga wamwilu avatetele nakuvalweza echi chuma chakusweka.” (Ndanye. 2:18) Yehova akumbulwile kulomba kana. Ndanyele alumbunwine chilota chaNevukataneza hakumukafwa kuli Kalunga. Kaha ikiye namasepa jenyi kavavajihileko. w23.08 3 ¶4

Shinganyekenu hanganyo yakupwa namuchima wakutalilila chikoki. Nge tuli namuchima wakutalilila chikoki, kaha natupwa vakuwahilila nakuunda. Shikaho, muchima kana nautukafwa tupwenga vakulikangula kumujimba namuvishinganyeka. Nautukafwa nawa tutwamenga kanawa navakwetu. Chikungulwilo nachipwa chakulinunga chikuma. Nge katweshi kukwata washi matotoko mwomwo yakutwivwisa kupihya kuli vakwetu, kaha katweshi kutohwesa chihandeko. (Samu 37:​8, kwinyikila.; Vishi. 14:29) Chachilemunyi, tweji kulondezezanga Setu wamwilu nakupandama chikuma kuli ikiye. Chikupu vene, muchima wakutalilila chikoki himuchima wamwaza uze weji kutunganyalisanga. Numba tuhu kachapwa chachashi kuusololanga lwola lwosenako, oloze Yehova mwatukafwa tutwaleho kupwa nawo. Kaha shimbu tuli nakuvandamina kaye kakahya, twatela kufwelela ngwetu “meso aYehova eji kutalanga vaze vamwivwa woma, vaze vavandamina zangi yenyi yakwilila.” (Samu 33:18) Shikaho, tufwilenu kutwalaho kuvwala muchima wakutalilila chikoki. w23.08 22 ¶7; 25 ¶16-17

Yakova alumbunwine ngwenyi mutu nahase kulivuluka kupwa muka-lufwelelo, oloze vilinga vyenyi kavyeshi nakusolola lufweleloko. (Yako. 2:​1-5, 9) Yakova avulukile nawa mutu uze amwene ngwenyi ‘ndumbwenyi ali nauvu kaha nawa keshi navyakulyako,’ oloze kamukafwileko. Numba tuhu mutu kana alivulukile kupwa muka-lufwelelo, oloze kasolwele lufwelelo kana muvilingako, ngocho lufwelelo lwenyi lwapwile lwamokomoko. (Yako. 2:​14-16) Yakova avulukile Lahave kupwa mutu uze asolwele lufwelelo lwamwenemwene muvilinga. (Yako. 2:​25, 26) Evwile mijimbu hali Yehova kaha atachikijile ngwenyi apwile nakukundwiza vaIsalele. (Yoshu. 2:​9-11) Asolwele lufwelelo lwenyi muvilinga hakukinga vandoji javaIsalele vavali omu kuyoya chavo chapwile muponde. Echi chalingishile ou pwevo wakuhona kukupuka uze kapwile kaIsaleleko, vamuvuluke kupwa wakwoloka ngana muze chapwile kuli Apalahama. Chakutalilaho chaLahave chasolola nge chapwa chachilemu kupwa nalufwelelo luze lwazama havilinga. w23.12 5-6 ¶12-13

Etu vaka-Kulishitu katwasaka kukumina kaha hakulinangula muchano wamuMbimbiliya wamaputukiloko. Tweji kufwilanga kulinangula “[navyuma] vyakujiminyina vyaKalunga” hakutukafwa nashipilitu yenyi yajila. (Koli. 1, 2:​9, 10) Munahase kulitomena kulinga chilongesa chauka mangana chimikafwe mupandame chikuma kuli Yehova. Chakutalilaho, munahase kukekesa omwo Yehova asolwelelele vangamba jenyi vakushikulu zangi nomwo nawa chuma kana chasolola nge nayenu amizanga. Munahase kukekesa vyuma alongesele Yehova muIsalele kutalisa kukumulemesa nomwo vyuma kana vyalifwana najila vaka-Kulishitu vali nakumulemeselamo makumbi ano. Chipwe munahase kulinangula upolofweto uze Yesu ateselemo omu apwile hano hamavu. Munahase kulivwisa kuwaha kulinangula vihande kana hakuzachisa chinoma chaWatch Tower Publications Index chipwe Chinoma Chakukafwa Vinjiho jaYehova Kuhehwojola. Kulinangula vyuma vyakujiminyina vyamuMbimbiliya nachimikafwa muzamise lufwelelo lwenu “nakupwa nachinyingi chakumutachikiza Kalunga.”—Vishi. 2:​4, 5. w23.10 18-19 ¶3-5

Lizu “yayinene” lize azachishile kaposetolo Petulu lyalumbununa “kutanduula.” Mazu amakumishilo asolola chuma tunahase kulinga nge natupwa nazangi yayinene. Zangi kana yeji kufwikanga jishili javandumbwetu. Chuma kana tunahase kuchilumbununa ngana: Zangi yetu tweji kuyikwatanga namavoko avali kwijiva nge lihina, kaha tweji kuyitanduulanga swi nomu nayifwika “jishili jajivulu” keshi yimwe kahako. Lizu kufwika lyalumbununa kukonekela. Ngana muze lihina linahase kufwika chuma chize chili namajilo, nazangi yinahase kufwika tutenga twavandumbwetu nakuhehela chavo. Zangi yetu yakuzanga vakwetu yatela kupwa yakuzama mangana tuhase kukonekelanga vandumbwetu hatutenga twavo, numba tuhu lwola lumwe chasakiwa kukilikita. (Kolo. 3:13) Nge natukonekelanga vakwetu, kaha natufwila kwivwisa Yehova kuwaha nakusolola nawa ngwetu zangi yetu yapwa yakuzama. w23.11 11-12 ¶13-15

Omu Mwangana Yoshiya apwile namyaka yakusemuka 26 aputukile kutungulula tembele. Kahomu vatu vapwile nakuzata mulimo kana, vawanyine “mukanda waJishimbi jize Yehova ahanyine kuhichila muli Mose.” Omu mwangana evwile mazu amumukanda kana, hahaze vene aputukile kukavangiza vyuma vasonekelemo. (Miji. 2, 34:​14, 19-21) Kutala muli nakufwila kutanganga Mbimbiliya hakumbi hakumbi tahi? Nge mukiko, kutala muli nakulivwisayo kuwaha tahi? Kutala mweji kusonekanga jivesi jize jinahase kumikafwa mukuyoya chenu tahi? Omu Yoshiya apwile namyaka yakusemuka 39 alingile vyuma vyavipi vize vyamujihishile. Alifwelelele ivene muchishishisa chakulomba Yehova amutwaminyine. (Miji. 2, 35:​20-25) Vyuma muka natulinangulako? Twatela kutwalaho kutondatonda Yehova chamokomoko namyaka yakusemuka tuli nayo chipwe myaka tunalinangula Mbimbiliya. Kulumbununa nge twatela kutwalaho kulomba Yehova atutwaminyine, nakulinangula Mazu enyi, nakwivwilila kuvyuma navatulweza vandumbwetu vakuhya kushipilitu. Nge natulinga ngocho, kaha katweshi kulimbenja chikumako, oloze natupwa vakuwahilila mukuyoya chetu.—Yako. 1:25. w23.09 12 ¶15-16

Mbimbiliya yavuluka mapwevo vamwenemwene vavavulu vaze vazangile Yehova nakumuzachila. Vapwile mapwevo “vaka-kulinga vyuma nakwesekela, vakushishika muvyuma vyosena.” (Chimo. 1, 3:11) Vandumbwetu vamapwevo vanahase kulondezeza nawa mapwevo vaka-Kulishitu vakuhya muvikungulwilo. Enu vandumbwetu vamapwevo vavanyike, fwilenu kutachikiza vandumbwetu vamapwevo vakuhya kushipilitu vaze munahase kulondezeza. Talenu havilinga vyavo vyamwaza, nakumona omwo munahase kuvalondezezelamo. Muka-Kulishitu wakuhya atela kupwa namuchima wakulinyisa. Nge pwevo mwapwa wakulinyisa, kaha mwalivwisa kuwaha usoko wamwaza naYehova navandumbwenyi. Chakutalilaho, pwevo uze azanga Yehova eji kukundwizanga namuchima wakulinyisa lundongi luze Ise wamwilu ahakako kutalisa kutanga. (Koli. 1, 11:3) Lundongi kana lweji kuzatanga muchikungulwilo namutanga. w23.12 18-19 ¶3-5

Yehova asaka malunga vazangenga mapwevo javo nakuvazakama kumujimba namuvishinganyeka nakushipilitu. Kupwa nauhashi wakushinganyeka, nakuvumbika mapwevo, nakuzata kanawa milimo, navimikafwa mupwenga lunga wamwenemwene. Nge munengila muulo, munahase kusakula kupwa navana. Vyuma muka munahase kulinangula kuli Yehova mangana mupwenga muvisemi vamwenemwene? (Efwe. 6:4) Yehova alwezele Mwanenyi Yesu hatoma ngwenyi amuzanga kaha nawa ngwenyi amwivwila kuwaha. (Mateu 3:17) Kachi nge munapu muvisemi kaha shimbu yosena fwilenunga kulweza vana venu ngwenu mwavazanga. Fwilenunga kuvasangejeka havyuma vyamwaza veji kulinganga. Chisemi uze eji kulondezezanga Yehova eji kukafwanga vana venyi vapwenga mapwevo namalunga vakuhya kushipilitu. Munahase kupwa vakulizanga oholyapwa vyamulimo wakupwa chisemi hakuzakama vakwenu mutanga namuchikungulwilo nakufwila nawa kusolola ngwenu mwavazanga kaha nawa ngwenu mwavamona kupwa vavalemu.—Yowa. 15:9. w23.12 28-29 ¶17-18

Etu vangamba jaYehova vakushishika tweji kumonanga ukalu namisongo yize veji kumonanga vatu vosena. Shimbu jimwe nawa veji kutuyanjisanga nakutufumbukila kuvatu vaze vahunga vatu jaKalunga. Numba tuhu Yehova kahonesa ukalu kana kutusolokelako, oloze atushika ngwenyi mwatukafwa. (Isa. 41:10) Nahase kutukafwa tutwaleho lika kupwa vakuwahilila, nakusakula kanawa vyakulinga, nakupwa vakushishika numba tuhu tuli nakumona ukalu. Yehova atushika ngwenyi mwatuhana chuma chize Mbimbiliya yavuluka ngwayo, “kuunda chaKalunga.” (Fwili. 4:​6, 7) Echi chapwa kuunda chamumuchima namuvishinganyeka chize cheji kwizanga mwomwo yakupwa nausoko wamwaza naYehova. Kuunda kana chahambakana “kunangakana chosena,” kaha nawa chapwa chamwaza chikuma. Uno mwevwaho lyehi kuunda chamwenemwene hanyima yakulomba chikuma kuli Yehova tahi? Kuunda kana chapwa “kuunda chaKalunga.” w24.01 20 ¶2; 21 ¶4

Kuzanga Kalunga chikiko cheji kulingisanga vatu vakushishika valise lijina lyenyi namuchima wavo wosena. Mwangana Ndavichi atachikijile ngwenyi kwalisa lijina lyaYehova chinapu kwalisa Yehova ivene. Nge tunevu lijina lyaYehova, tweji kushinganyeka omwo apwa navilinga atwama navyo namilimo yenyi yakukomwesa. Ndavichi afwililile kumona lijina lyaIse kupwa lyalilemu nakulyalisa. Asakile ‘kwalisa lijina lyaYehova’ namwono wenyi wosena. Chochimwe nawa, vaLevi vatwaminyinenga vakwavo hakwalisa Yehova. Vahanjikile mujila yakulinyisa ngwavo kavapwile namazu ambwende, akuzachisa hakwalisa lijina lyaYehova lyajilako. (Nehe. 9:5) Chakuzeneka kuhuhwasana Yehova evwile kuwaha chikuma hakumona omu vatu jenyi vamwalishilenga mujila yakulinyisa. w24.02 9 ¶6

Nge kamwateselemo chuma chachikalu chize mwalitomeneneneko, Yehova keshi kumimona ngwenyi munahonoko. (Koli. 2, 8:12) Linangulenuko vyuma vimwe. Anukenunga vyuma vize munatesamo lyehi. Mbimbiliya ngwayo “Kalunga kapwa wakuhengako numba avulyame milimo yenu.” (Hepe. 6:10) Shikaho nayenu kamwatela kuvulyamangako. Shinganyekenunga havyuma vize munatesamo lyehi. Vyuma vimwe shina kutunga usepa naYehova, chipwe kwambulila vakwenu vyaikiye, chipwe kumimbapachisa. Hakuwana nge munazovoloka nakutesamo vyuma vimwe, ngocho navyuma vize munalitomena oholyapwa munahase kuvitesamo. Munahase kutesamo chuma chize munalitomena hakumikafwa kuli Yehova. Livwisenunga kuwaha hakumona omwo Yehova ali nakumikafwa nakumikisula omu muli nakukilikita mangana mutesemo vyuma munalitomena. (Koli. 2, 4:7) Nge kamweshi kuzeyako, kaha navamikisula chikuma.—Ngale. 6:9. w23.05 31 ¶16-18

Yehova eji kwivwilanga kuwaha vatu vaze azanga. Visoneka vyasolola mapapa kavali aze Yehova alwezele Yesu ngwenyi apwile Mwanenyi uze azanga, uze evwila kuwaha. (Mateu 3:17; 17:5) Kutala namwivwa kuwaha nge Yehova mwamilweza ngwenyi amivwila kuwaha tahi? Yehova kahanjika nayetu nalizu lyakufuma mwiluko, oloze eji kuhanjikanga nayetu kuhichila muMazu enyi. Nge natutanga mazu aYesu muMikanda yaMujimbu Wamwaza, kaha chili kwijiva nge tuli nakwivwa lizu lyaYehova lyakutwivwila kuwaha. Yesu alondezezele vilinga vyaIse mujila yakukupuka. Shikaho, nge tuli nakutanga mazu aYesu aze asolwele ngwenyi evwila kuwaha vaka-kumukavangiza vakushishika vakuhona kukupuka, kaha tweji kumonanga ngwetu Yehova ali nakuhanjika mazu kana kuli yetu. (Yowa. 15:​9, 15) Nge tuli nakumona ukalu, kachalumbununa nge Yehova keshi nakutwivwila kuwahako. Oloze ukalu kana weji kutukafwanga tusolole ngwetu twazanga chikuma Kalunga kaha nawa twamufwelela.—Yako. 1:12. w24.03 28 ¶10-11