Mukumwekesha Ñahi Kusakilila Hefutu Danyiloña?

1-2. Mulambu waYesu wefutu danyiloña watusañumunaña kwiladi, nawa muloñadi? (2 AKorinda 5:​14, 15) (Talenu nimwevulu.)

NEYI anayamwini nakuyifumisha mwitala dayihumukila, kwila mumwekesha kusakilila kudi muntu wunamwini wumi wenu nehi? Hela chakwila kudi antu amakwawu anamwiniwu, chakadi nikujina mukukeña kumwekesha kusakilila halwenu, kulonda mumwekeshi nenu chuma chinayililiyi chalema nankashi.

² Neyi chalumbulwiliwu muchibaaba chinafumihu, hitukutwesha kudamwina etu aweni kuyuma yatama yitwamonaña muloña wanshidi yitwaswanaku. Hela chochu, mulambu waYesu wefutu danyiloña wunateli kutwamwina kuhitila mukuletesha (1) atwanakeneña nshidi jitwakoñaña, (2) tukuhweleleña netu akatuuka chikupu kunshidi yitwaswana, nawa (3) atunuñañesheña cheñi naNzambi. Muloña wefutu danyiloña, tukweti kuchiñeja kwakushakama haya nyaaka mwiituña daYehova dadiha. Mwamweni, Yesu wamwekesheli nindi wayikeña antu chikupu chahaniniyi wumi windi kukoola wena, nawa wayikeñeli henohu kanda yenzi niheseki. (Yish. 8:​30, 31) Kapostolu Pawulu wasonekeli nindi “kukeña kukwetiyi Kristu kwatusañumunaña.” (Tañenu 2 AKorinda 5:​14, 15.) Chumichi chinatalishi mukwila nawu kukeña kwatukeñayi Yesu kunateli kutusañumuna kwilahu chuma chimu, kulonda tumwekeshi netu twalemesha chikupu mulambu windi wefutu danyiloña.

3. Muloñadi muntu-himuntu chinateli kumwekeshelayi kusakilila hefutu danyiloña munjila yambukaku?

³ Chumanyi chimunateli kwila hakwila mumwekeshi kusakilila hefutu danyiloña? Chuma chimukwila chinateli kwambuka nachuma chinateli kwilayi muntu mukwawu. Hakwila mutiyishi ichi chuma, toñojokenu hanichi chakutalilahu: Fwikijenu antu asatu anakuya kwiluña dodimu, ilaña owu antu anakufumina kumaluña ashiyashana. Nawa njila jinakuzatishawu jinaambuki. Munjila yoyimu, “njila” yimukuzatisha hakwila mushiki kumunakuya, hela netu chuma chimukwila hakwila mumwekeshi kusakilila hefutu danyiloña, chinashindameni hachidi wubwambu wenu naYehova chayinu mpinji. Muloña wachumichi, achinu chibaaba chikuhosha hamazanvu asatu awantu: (1) Atudizi aBayibolu, (2) akaKristu apapatishewa, (3) nianyikoku anafumi hamukanka.

ATUDIZI ABAYIBOLU

4. Yumanyi yamonañayi Yehova mudi atudizi aBayibolu?

⁴ Neyi munakudiza Bayibolu, toñojokenuña haniyi nsañu: Chimuneteji nsañu yayiwahi, munamwekeshi nenu mudi hakachi kawantu anakukokayi Yehova kwikala amabwambu jindi. (Yow. 6:44; Yilw. 13:48) ‘Yehova diyi washinshikaña munyichima.’ Ichi chinatalishi mukwila nawu wamonaña chimwadishañaku hakudiza kulonda mumwiluki, nawa wazañalalaña hakumona chimunakupama nichimunakuhimpa yilwilu yenu kulonda muhandeña kwesekeja nanshimbi jindi. (Yish. 17:3; 27:11) Ifutu danyiloña didayikwashaña kwikala nawubwambu wakola naYehova. (Rom. 5:​10, 11) Bayi muvulamena kulema kwachumichiku.

5. Atudizi aBayibolu anateli kwovwahila ñahi wunlomboli wekala haAFwilipi 3:16?

⁵ Chineli mudi kadizi waBayibolu, yumanyi yimwatela kwila hakwila mumwekeshi kusakilila hefutu danyiloña? Chuma chimu chimwatela kwila hikulondela kufumba kwakapostolu Pawulu kwayisonekeleliyi aFwilipi, kwakwila nawu: “Kwesekeja nakupama kwejima kutunapaminiku, tutwalekenuhu kwenda chiwahi muniyi njila yoyimu.” (Fwili. 3:16) MuBayibolu yikwawu iyi vasi ayibalumuna nawu: “Tukakelenu kwenda mutunashiki dehi.” Kwesekeja nanikukufumba, bayi mwiteja chuma chidi chejima chiyikañeshi kutwalekahu kwenda munjila yatwalaña kuwumiku.—Mat. 7:14; Luka 9:62.

6. Yumanyi yatela kwilawu atudizi aBayibolu neyi kudi yuma yinakuyikalila kuhimpa? (Kuhituluka 30:​11-14) (Talenu nimwevulu.)

⁶ Chumanyi chimukwila neyi chinakuyikalila kwiteja ntañishilu yamuBayibolu yimunadizi katataka? Sandujolelenuhu nsañu yikwawu hanoyu ntañishilu, nawa mulombenu Yehova kulonda yayikwashi kutiyisha oyu nsañu chiwahi. (Mas. 86:11) Nawa neyi oyu ntañishilu yichidi yayikalila kutiyisha, yishiyenu haniyi mpinji, ilaña bayi muleka kudiza Bayiboluku. Indi neyi kudi chaaku chakaanishawu muBayibolu chinakuyikalila kuleka? Anukenuña nenu Yehova halejaña antu abula kuwanina kwila chuma chikukañanya kwilawuku. Mukutwesha kuhanda kwesekeja nanshimbi jindi. (Tañenu Kuhituluka 30:​11-14.) Nawa Yehova washiika nindi wukuyikwashaña. (Isa. 41:10, 13; 1 Kor. 10:13) Dichi bayi muzeyaku. Chatela musheña nankashi maana hakukala kumunakumona, ilaña sakililenuña hayuma yejima yinayililiyi Yehova, kushilahu nintanjikilu yefutu danyiloña. Chimukuswejelañaku kumukeña Yehova, mukumona nenu “nshimbi jindi hijakalaku.”—1 Yow. 5:3.a

7. Yumanyi yatela kutoñojokahu anyana anakukulishilawu muchalala?

⁷ Indochu enu anyana anakukulishilawu muchalala? Ninenu mudi atudizi aBayibolu. Kafwampi, iyenu atudizi aBayibolu alemeshawu nankashi kudi anvwali jenu. Bayibolu yahosha nawu: “Swinenu kwakwihi naNzambi, niyena wukuswina kwakwihi nanenu.” (Yak. 4:8; 1 Kushi. 28:9) Neyi enu mutachikilahu kuswina kwakwihi naYehova, niyena wukuswina kwakwihi nanenu. Yehova hayimonaña nindi mudi hohu hezanvu dawantuku. Watukokaña hamuntu-hamuntu, kushilahu nimuntu wejima anakukulishilawu muchisaka chawaYinsahu. Chumanyi chinaleteshi enu mwiikali nawubwambu wawuwahi naYehova? Ifutu danyiloña, nawa dichuma chimwatela kulemesha nankashi. (Rom. 5:​1, 2) Dichi henohu kanda muyi kuChanukishu chachinu chaaka, kwila mutoñojoka kufwa kwaYesu chikwalemena kudi enu nehi? Lekenu yitoñojoka yamuchidiwu yiyikwashi kuzata nañovu kulonda mushikiji chikonkwanyi chenu chikwawu chakuspiritu chimunakufwila, hela hichikonkwanyi chamuchidinyi, kulonda mumwekeshi nenu munakusakilila hefutu danyiloña dahanayi Yehova kuhitila mudi Mwanindi.b

AKAKRISTU APAPATISHEWA

8. AkaKristu apapatishewa amwekeshaña ñahi nawu akuhwelela mwifutu danyiloña?

⁸ Neyi mudi mukaKristu wapapatishewa, munamwekeshi dehi nenu mwakuhwelela mwifutu danyiloña muyuma yayivulu yimwelaña. Chakutalilahu, mwelili yuma yayikwashili kuswina kwakwihi naYehova nikuhanda kwesekeja nanshimbi jindi. Mwovwahilili lushimbi lwaYesu lwakwilisha atumbanji kuhitila mukulejaku antu yuma yimwakuhwelela. Mwadihanini enu aweni kudi Yehova nawa mwapapatisheweli. Mwamonahu dehi ikañesha muloña wakuhakwilaku kudifukula kwalala? (2 Tim. 3:12) Muloña wakuumika nakashinshi, mwamwekeshaña nenu mwamukeña Yehova nawa mwasakililaña hefutu danyiloña dahanayi kuhitila mudi Mwanindi.—Heb. 12:​2, 3.

9. AkaKristu apapatishewa atela kwikala asoñama kuwubanjinyi?

⁹ Neyi yaaka yinakotoki kufuma hitwapapatisheweli, twatela kwiluka iwu wubanji. Mukuhita kwampinji, tutachika kudiwula kulema kwefutu danyiloña. Chumichi chatachikaña ñahi? Talenu chuma chayimwekeneni akaKristu amuEfwesesa. Yesu asañwiliwu wayihamekeli hakuumika kwamwekesheliwu. Hela chochu, wayilejeli nindi: ‘Mudi enu nawanimu ichi chuma chatama, munaleki kukeña kumwadiña naku hakusambila.’ (Chim. 2:​3, 4) Mazu ahosheliyi Yesu anakumwekesha nawu mukaKristu nateli kutachi kuleka chovu-chovu kumukalakela Nzambi namuchima wejima. Muntu wamuchidiwu watwalekañahu kulomba, kuya nakupompa nikushimwina ilaña iku nakwila yuma yejimiyi chakudikanjikija hohu. Hanakwila yumiyi muloña wakukeña Nzambiku. Yumanyi yimwatela kwila neyi mumona nenu kukeña kumwamukeña Yehova kunatachiki kunoña chovu-chovu?

10. Munateli ‘kutoñojoka ñahi chikupu nikudinkamu’ munyidimu yawakaKristu yimwazataña? (1 Timotewu 4:​13, 15)

¹⁰ Kapostolu Pawulu wamulejeli Timotewu ‘kutoñojokaña chikupu nikudinkamu’ munyidimu yawakaKristu yazatileñayi. (Tañenu 1 Timotewu 4:​13, 15.) Kwesekeja naniku kufumba, wahishenu chikupu njila yimwadifukwilañamu kulonda mutwalekihu kwiteja “spiritu yajila yiyikojeji mwiikali neyena.” (Rom. 12:11) Chakutalilahu, hadaha tachikenu kwikala nampinji yakuloñesha chiwahi nsañu yimukudiza hakupompa, neyi muloñesha chiwahi chikuyikwasha kutiyilila nakanañachima hampinji yakupompa. Indi kwiji munateli kuwahishaku njila yakudiza kwankawenu kuhitila mukwikala nampinji yeneni yakutoñojoka chikupu hayuma yimunadizi. Neyi chochimwatwalekañahu nakusonsela hakesi kulonda kesi katwalekihu kubutuka, neyi mukwilaña iyi yuma yitunashimuni kukuyikwasha kwikala cheñi namuchima wakusakilila hayuma yejima yatwililayi Yehova, kushilahu niifutu danyiloña. Nawa munyilungu yinashaliku henohu Chanukishu kanda, munateli kwikala nampinji yakutoñojokaña chikupu hayuma yayiwahi yitwadiluñishaña etu aYinsahu jaYehova. Chakadi nikujina, kwila mwenimu kukuyikwasha kwikala namuchima wakusakilila nankashi hefutu danyiloña, chuma chayikwashaña kwikala nawubwambu naYehova.

11-12. Neyi mpinji jikwawu munakumona nenu iyena denu dakudikita dinatachiki kukeha, komana chinayi mukwila nawu Nzambi naleki kuyinka spiritu yindi? Lumbululenu. (Talenu nimwevulu.)

¹¹ Neyi chayinu mpinji munakumona nenu himunakudikita chikupu mukudifukula kwalala kwesekeja nachimunakukeñaku, kuzeya nehi nawa bayi mukunkulula nenu Nzambi naleki kuyinka spiritu yindiku. Anukenuña mazu akapostolu Pawulu ayisonekeleliyi aKorinda kutalisha hamudimu windi wakushimwina nindi: “Neyi niwuzata chakudikanjikija, hohamu nichidi namudimu wawuñamba wankunjikawu.” (1 Kor. 9:17) Watalishili mudihi?

¹² Pawulu mpinji jikwawu walwishileña nayaaku yamukañeshelaña kwikala neyena dakushimwina. Hela chochu, wazatili hakumina ñovu yindi kutwalekahu kuzata mudimu windi wakushimwina hela chakwila dichatoñojokeleñayi haniyi mpinji. Dichuma chimunateli kwila ninenu. Fwilenuña kwila yuma yaloña hela chakwila munakumona nenu iyena dinakukeha. Dichi lombenuña “muchima wakufwila kukoña yuma niñovu yakwilamu.” (Fwili. 2:13) Twalekenuhu kwila yuma yikuyikwasha kwikala nawubwambu wakola naNzambi. Kuhwelelenu nenu mukuhita kwampinji yuma yimukwilaña, yakayikwasha kumukeña cheñi Yehova nikwikala neyena dakudikita.

13. Tunateli ñahi kutwalekahu kudeseka kulonda twiluki neyi tudi “muchikuhwelelu”?

¹³ Mumpinji-mumpinji, twatela kudishinshikaña etu aweni kwesekeja nawunlomboli wekala ha 2 AKorinda 13:5 wahosha nawu: “Desekenuña kulonda mwiluki neyi mudi muchikuhwelelu; dishinshikenuña kulonda mwiluki chimwekala enu aweni.” Chakutalilahu, twatela kudihula etu aweni malwihu adi neyi: ‘Komana inakutwamijaku yuma yaWanta muchihandilu chami?’ (Mat. 6:33) ‘Yisela yinatondaña yamwekeshaña nawu nahela yuma yatama?’ (Mas. 97:10) ‘Komana naletaña kuwunda nikunuñañana hakachi kawakwetu akakwitiya?’ (Efwe. 4:​2, 3) Chanukishu himpinji yatukwashaña kutoñojoka nankashi hefutu danyiloña datwinkayi Yehova, chatukwashaña kwikala nampinji yakudishinshika etu aweni nikumona kwila nawu tunakumuhandila Kristu bayi etu aweniku.

ANYIKOKU ANAFUMI HAMUKANKA

14. Yumanyi yinateli kuletesha akaKristu amakwawu kufuma hamukanka wanyikoku?

¹⁴ AkaKristu amakwawu alekaña kudikunda nachipompelu hanyima yakukalakala nakashinshi hadi tukweji indi kwiji hadi yaaka yayivulu. Yumanyi yaleteshaña? Amakwawu muloña wakusweja “[kwakama] kwamuwumi.” (Luka 21:34) Amakwawu ahukanaña muloña wamazu indi kwiji yilwilu yamukwawu mukakwitiya. (Yak. 3:2) Amakwawu niwena muloña wakukoña nshidi jamaneni nawa ashintajalaña kulomba wukwashu. Hichikweti muloña nachuma chinaleteshiku, yumanyi yimwatela kwila neyi munafumi hamukanka wanyikoku? Ntanjikilu yayiwahi yefutu danyiloña yikuyisañumuna kwila chumanyi?

15. Yehova wamwekeshaña ñahi nindi wayakamenaña anyikoku anafumi hamukanka? (Ezekeli 34:​11, 12, 16)

¹⁵ Toñojokenu chatiyañayi Yehova kutalisha hadi antu anafumi hamukanka wanyikoku. Hayikaanaña hela kuyivulamenaku. Ilaña, wakeñakeñaña anyikoku ajimbala. Wayidiishaña nikuyikwasha kulonda afunti kudi yena. (Tañenu Ezekeli 34:​11, 12, 16.) Komana hidichuma chinakwilayi Yehova nanenuku? Dichinakwilayi! Kafwampi, chineli munakutaña nsañu yinasonekiwu muchinu chibaaba, munakumwekesha nenu muchima wenu wunakufwila kwila yuma yaloña. Yehova wamweni yuma yayiwahi mumuchima wenu nawa wayikokeleli muchalala, wuchidi kumona yuma yayiwahi mudi enu nawa nakukeña nindi mufunti muchipompelu.

16. Yumanyi yatela kwilawu anyikoku ajimbala hakwila afunti kudi Yehova? (Talenu nimwevulu.)

¹⁶ Mubroshuwa yaFuntenu Kudi Yehova mwekala awa mazu akukolesha akwila nawu: “Kuhwelelenu nenu Yehova wukuyikwasha neyi mufunta kudi yena. Wukuyikwasha kuumika neyi munaneñi, kumanisha kukala kwayikatishaña kumuchima nikwikala nakuwunda kwamuyitoñojoka nimumuchima muloña wakwikala nachinleji chitooka. Mukwikala cheñi neyena dakumukalakela Yehova hamu nawakwenu akwakudifukula.” Anukenuña cheñi nenu akulumpi anakufwila kuyikwasha. Anateli kwikala kudi enu “neyi iluña mwakuswama mpepela, iluña mwakwiyama nvula yeneni.” (Isa. 32:2) Hakwila mumwekeshi kusakilila hefutu danyiloña, dihulenu nenu, ‘Yumanyi yinatela kwila hakwila ‘nololi nsañu’ naYehova?’ (Isa. 1:18; 1 Pet. 2:25) Chakutalilahu, kwila mufuukulahu kuya nakupompa Kwitala daWanta nehi? Kwila muhanjeka namukulumpi muchipompelu nakumuleja nenu munakukeña ayikwashi kufunta kudi Yehova nehi? Nateli kuleja muntu wukutachika kudiza Bayibolu nanenu hakapinji. Mwatela kukuhwelela nenu Yehova wukukiswila kulomba kwenu kwakufwila kumwekesha kusakilila hefutu danyiloña dahaniniyi Mwanindi.

YUMANYI YIMUKWILA?

17-18. Tunateli kuzatisha ñahi mpinji yetu chiwahi henohu Chanukishu chachinu chaaka kanda chishiki?

¹⁷ Yesu wahosheli nindi ifutu danyiloña dekaliliku “kulonda muntu wejima wukumukuhwelela akabuli kujilumuka, ilaña akekali nawumi wahaya nyaaka.” (Yow. 3:16) Ifutu danyiloña hinjila yashaku Yehova yakutwamwina nachu kunshidi nikukufwa. Wejima wetu twatela kulemesha ifutu danyiloña. (Rom. 3:​23, 24; 2 Kor. 6:1) Hamafuku akutwala kuChanukishu, twekalaña nakukooleka kwakutoñojoka hakukeña kwatumwekeshelawu kudi Yehova niYesu. Nawa iku kukeña kwatusañumunaña kumwekesha muchima wakusakilila.

¹⁸ Ifutu danyiloña dikuyiletesha ñahi enu kumwekesha muchima wakusakilila? Ñakwilu yenu yinateli kwambuka nañakwilu yamuntu mukwawu. Ilaña ilukenu nenu Yehova wukuyikiswila nyidimu yimunakudikita yakudibomba nawakakudifukula amakwawu amavulu ‘anakubula kudihandila awenawu, ilaña anakumuhandila owu wayifwilili.’—2 Kor. 5:15.