Chitwakeñekelaña Ifutu Danyiloña

1-2. Tunakukeñeka kutwamwina kuchumanyi, nawa muloñadi? (ARoma 7:​22-24) (Talenu nimwevulu.)

FWIKIJENU chumichi. Itala dinahumuki nawa mudi muntu wunakañanyi kufuma muloña wayuma yinamushachili yinahumwoki. Wamumi, ilaña hakutwesha kufumisha yuma yinamushachiliku. Nakukumina hohu dakubilela, nakukuhwelela nindi kudi antu akwinza nakumwamwina.

² Wejima wetu tudi mukukala neyi kudimu iwu muntu. Munjilanyi? Adama chavulumwiniyi nakudikaña naNleñi yindi, wekalili mukanshidi. Kuhiñahu wasambwishili anyanindi. Chafumamu, antu ejima ayishachila kudi iyi nshidi yaswanawu neyi iwu muntu anashachiliwu kudi yuma yinahumwoki, nawa kufwana iwu muntu twakeñekaña wunateli kutwamwina. Kapostolu Pawulu walumbulwili chiwahi chekala nshidi yitwaswana mumukanda windi wayisonekeleliyi aRoma. (Tañenu ARoma 7:​22-24.) Walembeli nindi amwamwini “kuniwu mujimba [wamutwalileña] kuniku kufwa.” Pawulu amushachilili kudi nshidi yaswaniniyi, chakwila diyamukojejeli yashiki nikukufwa. (Rom. 6:23) Tudi mukukala kwokumu ninetu. Tunakukeñeka kutwamwina!

3. Ifutu danyiloña dinateli kutukuula kuyumanyi?

³ Pawulu chahosheleñayi hanshidi, wahosheli hohu hayuma yatama wanyi. Hanyima yakwihula nindi: “Hinyi wukuñamwina kuniwu mujimba wunakuntwala kuniku kufwa?” Wadakwilili yomweni ilu lwihu munjila yayiwahi nindi: “Namusakilili Nzambi kuhitila mudi Yesu Kristu Mwanta wetu!” (Rom. 7:25) Pawulu watalishileña kumulambu waYesu wefutu danyiloña.a Ifutu danyiloña dinateli kutwamwina kuhitila mukukojeja (1) atwanakeneña nshidi jetu, (2) atuukeña kunshidi yitwaswana, nawa (3) atunuñañesheña cheñi naNleñi yetu. Chitukuhanjekaña haniyi yikuma, tukuswejelaku kumukeña Yehova, “Nzambi wahanaña kuchiñeja.” (Rom. 15:13) Tukuswejelaku cheñi kumusakilila Yesu—muloña “kuhitila mudi yena atukuula nefutu danyiloña.”—Kol. 1:14.

IFUTU DANYILOÑA DALETESHAÑA ATWANAKENEÑA NSHIDI

4-5. Muloñadi antu ejima chakeñekelañawu ifutu danyiloña? (Mukwakutañisha 7:20)

⁴ Twakeñekaña ifutu danyiloña hakwila atwanakeni nshidi jetu. Wejima wetu, antu abula kuwanina, twakoñaña nshidi chili mumazu hela muyuma yitwelaña. (Tañenu Mukwakutañisha 7:20.) Nshidi jikwawu jamaneni nankashi. Chakutalilahu, kwesekeja naNshimbi jaMosi antu akoñeleña nyiloña yawujila nikujahañana ayibabesheleña kuhita mukuyijaha. (Lev. 20:10; Kuch. 35:​30, 31) Hela chochu, nshidi jajivulu jamaneni nankashi wanyi, ilana nijena hinshidi. Chakutalilahu, ñimbi yaMasamu Davidi wahosheli nindi: “Nukuhemba nyendu yami kulonda nibuleña kuvulumuna nedimi dami.” (Mas. 39:1) Eña, mpinji jikwawu tunateli kuvulumuna namazu hitwahoshaña.—Yak. 3:2.

⁵ Toñojokenu hamazu imwahosheli niyuma yimwelili kunyima. Kudihu mazu imwahosheleli antu amakwawu imunakutoñojoka nenu kachi mwayihosheli wanyi? Kudihu yiluwa yimwakoñeli yimwaditoñeshaña? Chakadi nikujina, ñakwilu yenu kumalwihu ejima ayedi yidi yakwila nawu eña. Bayibolu yahosha nawu: “Neyi tuhosha netu, ‘Hitukweti nshidiku,’ tunakudidimba etu aweni nawa chalala hichidi mudi etuku.”—1 Yow. 1:8.

6-7. Chumanyi chaletesha Yehova atwanakeneña nshidi jetu? (Talenu nimwevulu.)

⁶ Ifutu danyiloña dichuma chaletesha chiikali chaswayi kutwanakena nshidi jetu kudi Yehova. (Efwe. 1:7) Ilaña, hela chakwila Yehova watwanakenaña nshidi jitwakoñaña kushindamena hefutu danyiloña, ichi hichinayi mukwila nawu wadiwulaña nshidi jitwakoñañaku. Yehova wahela nshidi. (Isa. 59:2) Muloña wawuñanji windi waloña dichaletesha yashiku ntanjikilu yakwanakenamu nshidi.

⁷ Nshimbi jaMosi jashimwini nawu aIsarela atela kulambula nyilambu yawanyama hakwila ayibutili nshidi jawu. (Lev. 4:​27-31; 17:11) Iyi nyilambu yadiña nakwimenaku mulambu waYesu wabadika niyuma yayiwahi yikadiluñishawu antu kumbidi. Mulambu waYesu diwaletesha Yehova atwanakeneña nshidi jetu. Pawulu welukili chikupu kulema kwamulambu wakufwa kwaYesu, neyi chamwekeshayi munsañu yayisonekeleliyi akaKristu muKorinda. Chamanishiliyi kusoneka yuma yatama yelileñawu kunyima, wayilejeli nindi: “Anayiweleshi munatooki; anayijiliki; anayiteni kuloña mwijina daMwanta Yesu Kristu ninaspiritu yaNzambi yetu.”—1 Kor. 6:​9-11.

8. Chumanyi chimukutoñojokañahu hampinji yimukudiloñeshaña kuya kuChanukishu chachinu chaaka?

⁸ Himunakudiloñesha kuya kuChanukishu chachinu chaaka, ikalenuña nampinji yakutoñojoka hachidi chihandilu chenu muloña wakuyanakena kudi Yehova. Chakutalilahu, muloña wefutu danyiloña, himwatela kudinkañamu nyiloña hanshidi yimwakoñeli kunyima yimwadanakena dehiku. Indi neyi chinakuyikalila kwiteja nenu anayanakeni nshidi yimwakoñeli kunyima? Hadaha mwadihosheshahu dehi nenu, ‘Neluka nami Yehova wanakenaña, ilaña kwila nidanakena ami aweni nehi.’ Neyi mwatiyaña muniyi njila, anukenu nenu Yehova diyi wanakenaña, nawa wamwinka Mwanindi wuswa wakusompesha. Yehova hayinka enu hela muntu wudi wejima mudimu wakufuukula muntu atela kwanakenayi hela atela kubula kwanakenayiku. Bayibolu yahoshaña nawu: “Neyi tunakwenda muchejeji neyi [Yehova] chekalayi muchejeji, . . . mashi aMwanindi Yesu atutookeshaña kunshidi jejima.” (1 Yow. 1:​6, 7) Tunateli kukuhwelela awa mazu neyi chitwakuhwelela ntañishilu yikwawu yekala muBayibolu. Ifutu danyiloña dichuma chaletesha Yehova atutiyileña luwi, nawa Izu dindi dahosha nawu “wanakenaña swayi.”—Mas. 86:5.

IFUTU DANYILOÑA DALETESHAÑA ATUUKEÑA

9. MuBayibolu, izu dakwila nawu nshidi datalisha mudihi? (Isamu 51:5 nitumazu twaheshina)

⁹ MuBayibolu, izu dakwila nawu “nshidi” hidatalisha hohu kuyuma yatama yitwelañaku ilaña datalisha cheñi kukubula kuwanina kutwavwalikaña naku. (Tañenu Isamu 51:5 nitumazu twaheshina.) Kubula kuwanina kwatukokolaña kulonda twileña yuma yatama nawa kwatuleteshaña tukateña, kushinakaja nikufwa. Chumichi chatukwasha kwiluka muloña waweni anyikeki, abulahu dehi kukoña nshidi, chakatilañawu nikufwa. Chatukwasha cheñi kwiluka chuma chacheni chaleteshaña antu atama niamawahi akabakaneña nikufwa. Antu ejima abula kuwanina afuma kudi Adama, aswana nshidi.

10. Yumanyi yafuminimu chelili aAdama naEva avulumuni?

¹⁰ Toñojokenu hachuma chayimwekeneni aAdama naEva chelili avulumuni nakwikala antu abula kuwanina. Chumichi chayiletesheli atachiki kumona yihuñu. Hanyima yakudikaña, aAdama naEva atachikili kumona kukala kwafumini mukufumpa lushimbi lwaNzambi, dikwila nawu lushimbi ‘lwasonekeliwu munyichima yawu.’ (Rom. 2:15) Atachikili kumona nawu yuma yinatachiki kuhimpika, nawa yataminineñaku. Achimweni nawu atela kujika yiidi yawu yimu yamujimba nikumuswama Nleñi yawu. (Kutach. 3:​7, 8) Kufuma tuhu haniyi mpinji, aAdama naEva atachikili kudinka nyiloña, kusweja kwakama, kutoñojoka nawu akiñewa wanyi, kuyeña nikutiya nsonyi. Atiyileña muniyi njila kushika nimpinji yafwiliwu.—Kutach. 3:​16-19.

11. Kukalanyi kutwamonaña muloña wanshidi yitwaswana?

¹¹ Nshidi yatuleteshaña ninetu kumona kukala neyi kwamweni eyala namumbanda atachi. Twakabakanaña kumujimba nimuyitoñojoka muloña wanshidi yitwaswana. Hela chakwila tukuzata nañovu chamuchidinyi kuwahishaku chihandilu chetu, ilaña hohamu tukumonaña kukala kutukukañanya kumanisha etu aweni. Muloñadi? Muloña neyi chochahosha Bayibolu, ‘atwibalumuna nakwikala amukunkulwayi.’ (Rom. 8:20) Chumichi chatumwekenaña hamuntu-hamuntu nawa chamwekenaña niantu ejima. Chakutalilahu, toñojokenu hadi antu chinakuzatawu nañovu kuwahisha iseki, kukañesha madombu, kumanisha nzala nikuleta kuwunda hakachi kamatuña. Ilaña akañanyaña kumanisha iku kukala. Ifutu danyiloña dinateli kutukuula ñahi kunshidi yitwaswana?

12. Ifutu danyiloña datwinkaña kuchiñejanyi?

¹² Ifutu danyiloña datwinkaña kuchiñeja kwakwila nawu “yileñaleña . . . akayisubula kuwuduñu wakutoka.” (Rom. 8:21) Neyi yuma yayiwahi yitwachiñejaña muloña wefutu danyiloña yinatachiki dehi kuzatika mwiituña daNzambi dadiha, hitwakakabakanaña nayikatu kumujimba hela muyitoñojokaku; indi kwiji kulwisha nayitoñojoka yakudinka nyiloña, kwakama, kutoñojoka netu twakiñewa wanyi, kuyeña nikutiya nsonyiku. Kubombelahu, nyidimu yitwakadikitaña kuwahisha iseki nikushakama mukuwunda hiyakaya mumenjiku, ilaña kukala kwejima kwakamana hakayuulañayi owu watukuulili, “Kalamba waKuwunda,” Yesu Kristu.—Isa. 9:​6, 7.

13. Yumanyi yikwawu yimukutoñojokañahu hampinji yimunakudiloñesha kuya kuChanukishu chachinu chaaka?

¹³ Toñojokenu hayuma yayiwahi yimwakadiluñishaña neyi anayikuuli dehi kunshidi yimwaswanini. Fwikijenu chimwakatiyaña mpinji yejima chimwahinduka mwakola kumujimba, munakuhanda chihandilu chakubula kwakama nenu, enu hela antu imwakeña akushakama nanzala, akukata hela kufwa. Nichayinu mpinji munateli kwikala mukuwunda hampinji ‘yimunakukwatisha kukuchiñeja kwenu . . . kudi neyi chikuñu chakwimika nachu wumi wenu, kwalala nawa kwakola mbe-e.’ (Heb. 6:​18, 19) Neyi chikuñu chakwimika nachu watu chichemikaña watu, yuma yitwachiñejaña etu akaKristu yinateli kukolesha chikuhwelelu chenu nawa yinateli kuyikwasha kuumika kukala kwejima kumunakumona makonu. Mwamweni, mwatela kukuhwelela chikupu nenu Yehova wakekala “mukakufweta antu amukeñakeñaña chikupu.” (Heb. 11:6) Mwakundejewaña nikuchiñeja yuma yayiwahi yakumbidi muloña wefutu danyiloña.

IFUTU DANYILOÑA DATUNUÑAÑESHAÑA CHEÑI NANZAMBI

14. Nshidi yaletesha wubwambu wetu naNleñi kwikala ñahi, nawa muloñadi?

¹⁴ Kufuma tuhu mpinji yavulumwini aAdama naEva, antu adambula kudi Nzambi. Nawa Bayibolu yahosha nawu antu ejima ayitwala kwakulehi naNleñi. (Rom. 8:​7, 8; Kol. 1:21) Muloñadi? Muloña nshimbi jaYehova jaloña hijamwitejaña kudiwula nshidiku. Bayibolu yahosha hadi Yehova nawu: “Mesu eyi atooka nankashi kwila atala hayuma yatama nehi, nawa kwila witeja kutama nehi.” (Hab. 1:13) Dichi nshidi yasha mukoleku weneni hakachi kaNzambi nawantu. Kwosi niwumu hakachi ketu wunateli kwikala nawubwambu naYehova chiña hohu neyi iwu mukoleku anawufumishihu kulonda atunuñañeshi cheñi nayena. Ifutu danyiloña didatunuñañeshaña cheñi naNzambi.

15. Yumanyi yayiwahi yafumamu mwifutu danyiloña?

¹⁵ Bayibolu yahosha nawu Yesu “diyi mulambu wakufumishahu nshidi jetu.” (1 Yow. 2:2) Izu dachiGiriki kwabalumunawu izu dakwila nawu “mulambu wakufumishahu,” dinateli kutalisha kukwila chuma ‘chakutiyisha kuwaha.’ Ifutu danyiloña damutiyishili ñahi Yehova kuwaha? Hitunateli kutoñojoka netu kufwa kwaMwanindi kwamuzañalesheliku. Ilaña ifutu danyiloña damwekesheli chekala wuñanji waYehova waloña. Chumichi chamuletesheli yafuntishi cheñi wubwambu wadiña hakachi kayena nawantu. (Rom. 3:​23-26) Wateneni nikuloña antu adifukwileña kudi yena nakashinshi henohu Kristu kanda yafwi. (Kutach. 15:​1, 6) Wayiteneni kuloña kushindamena hachumanyi? Kushindamena hefutu danyiloña dakumbidi. Yehova wakuhweleleli chikupu nindi Mwanindi, Yesu, wakahana idi ifutu danyiloña. (Isa. 46:10) Ifutu danyiloña denzunwini njila yakunuñañeshelamu cheñi antu naNzambi.

16. Yumanyi yikwawu yimwatela kutoñojokahu hampinji yimunakudiloñesha kuya kuChanukishu chachinu chaaka? (Talenu nimwevulu.)

¹⁶ Toñojokenu chidi chihandilu chenu chayinu mpinji muloña wakwikala cheñi nawubwambu wawuwahi naNzambi. Chakutalilahu, hadaha mwamutenaña Yehova nenu “Tata” yenu, neyi chatulejeliyi Yesu nindi twileña. (Mat. 6:9) Mpinji jikwawu munateli kumutena Yehova nenu “Ibwambu” denu. Neyi tunakuzatisha mazu adi neyi “Tata” hela “Ibwambu,” twatela kwilaña mwenimu nakalemesha chikupu nikudizoza. Muloñadi? Muloña chineli tudi akanshidi, hitunateli kuditondela etu aweni kwikala amabwambu jaYehovaku. Ifutu danyiloña hohu dichuma chatuleteshaña twikaleña nawubwambu naYehova. Kuhitila mudi Yesu, Yehova watwesheli “[kukundamisha] yuma yejima kudi yomwenindi hakuleta kuwunda kuhitila mumashi apwekesheliyi [Yesu] hamutondu wakuyandishila.” (Kol. 1:​19, 20) Dichaletesha tudiluñisheña wubwambu wawuwahi naYehova nihayinu mpinji hituchidi abula kuwanina.

IFUTU DANYILOÑA DAMWEKESHAÑA NAWU YEHOVA WUKWETI LUWI

17. Ifutu danyiloña damwekeshaña ñahi chekala luwi lwaYehova? (AEfwesesa 2:​4, 5)

¹⁷ Ifutu danyiloña damwekeshaña hatooka nawu Yehova “wasweja luwi nankashi.” “Watwinkeli wumi . . . nihampinji yitwadiña afu kuyuma yatama yitwakoñeleña.” (Tañenu AEfwesesa 2:​4, 5.) Antu adi “nanyichima yashinshika yakukeña kwikala nawumi wahaya nyaaka,” anakubilela muloña aneluki nawu nshidi yitwaswana yinayishachili nawa anakukeña muntu wakuyamwina. (Yilw. 13:48) Yehova wayakulaña awa antu kuhitila mukuyikwasha kudiza nsañu yayiwahi yaWanta windi, kulonda amwiluki yena niMwanindi Yesu. (Yow. 17:3) Neyi Satana watoñojokeli nindi kudikaña kwaAdama naEva kwaluwañesheli nkeñelu yaNzambi, wadidimbileña hohu yomweni.

18. Hampinji yitunakutoñojokahu chikupu hefutu danyiloña, chumanyi chalema chitwatela kwanukaña?

¹⁸ Hampinji yitunakutoñojoka chikupu hayuma yayiwahi yitwadiluñishaña muloña wefutu danyiloña, bayi tuvulamena chuma chasweja kulemaku. Chatela tumoneña ifutu danyiloña netu hintanjikilu yayiwahi yatukwashaña hohu etu, twatela kwanukaña netu diyi njila yazatishañayi Yehova kumanishilamu kukala kweneni kwaleteliyi Satana mwitempa daEdeni. (Kutach. 3:​1-5, 15) Yehova wajilikaña ijina dindi kuzatisha ifutu danyiloña, nakuditookesha kukutama kwejima kwaletawu hanidi ijina. Watwamwinaña cheñi kunshidi nikufwa, nakumwekesha hatooka nindi hiNzambi wakukeña. Nawa muloña waluwi lwindi lwasweja, hichikweti muloña nanshidi yitwaswanaku, Yehova watwiteja kulonda tumwekesheña hatooka netu yuma yahoshañayi Satana hadi yena, yakutwamba. (Yish. 27:11) Munateli kumwekesha ñahi kusakilila hefutu danyiloña? Twakakula ilu lwihu muchibaaba chinalondelihu.