Hoshenuña Chalala muNjila Yayiwahi

1. Yumanyi yitwatela kwila hakwila twiikali muchisaka chaYehova?

NEYI dikatachi kudiluka namukwetu mutwadifukwilaña kudi Yehova hamu, lwihu lwatachi lutwavula kwihula lwekala lwakwila nawu, “Mwadizili ñahi chalala?” Amakwawu akulaña nawu “ayikulishilili muchalala.” Nawa amakwawu anateli kuhosha nawu “anadizi hohu chalala katataka.” Twakulaña muniji njila muloña chalala chaMwizu daNzambi chatulombolaña muchihandilu chetu chejima. Muloñadi? Muloña tweluka netu tunateli kwikala muchisaka chaYehova chiña hohu neyi tumwekesha chitwakeña chalala nikuhanda kwesekeja nanichi chalala. Chumichi munabombeli kwikala ashinshika munhoshelu yetu nimuyilwilu yetu.—Mas. 15:​1-3.

2. (a) Antu amwilukili Yesu nawu himuntu wamuchidinyi? (b) Chalala chashimwineñayi Yesu chayiletesheli antu kwila chumanyi?

² Yesu wahosheleña chalala mpinji yejima. Ayilumbu jindi elukili nawu wahosheleña chalala hela chakwila mpinji jikwawu yuma yahosheleñayi yayitiyishileña kuwaha wanyi. (Mat. 22:16) Kutalisha hayuma yakafuma muchalala chadizishileñayi, Yesu wahosheli nindi: “Nenjili nakwaambula mwana weyala natata yindi, mwana wamumbanda namama yindi nawa mumbanda wesumbu namuku windi wamumbanda.” (Mat. 10:35) Yesu hakeñeleña nindi antu akaaneña nsañu yatañishileñayi yena niakakumulondelaku, ilaña welukili nindi chumichi chakamwekana. (Mat. 23:37) Welukili nindi nsañu yadizishileñayi yikuletesha kaayi kwaambuka mumazanvu ayedi, akeña chalala chamuBayibolu niachihela.—2 Tes. 2:​9-11.

3. Yumanyi yitukuhanjekahu muchinu chibaaba?

³ Neyi cheliliyi Yesu, twazataña nañovu kwikala ashinshika kuhitila mukuhosha chalala mpinji yejima, hela chakwila mpinji jikwawu antu akututiyaña kutama muloña wakwila mwenimu. Nawa twatañishaña nikudizisha chalala chamuBayibolu, hela chakwila antu amakwawu atiyaña kutama nsañu yitwatañishaña. Komana chumichi chinatalishi mukwila nawu twatela kutoñojokahu wanyi hachitunateli kuhosha nimpinji yitunateli kuhosha chalala chamuBayibolu? Inehi! Muchinu chibaaba tukusambila kwakula lwihu lwatachi, lwakwila nawu: Kudihi kutunateli kuwana chalala? Kuhiñahu tukwakula ilu lwihu: Muloñadi, munjilanyi nawa mpinjinyi yitwatela kuhosha chalala? Ñakwilu janawa malwihu jikutukwasha kuwahishaku wuswa wetu wakuhosha chalala munjila yayiwahi, dikwila nawu mukubabala nawa hampinji yatelela.

KUDIHI KUTUNATELI KUWANA CHALALA?

4. Muloñadi wutukuhoshela netu Yehova diyi Nsulu yachalala?

⁴ Yehova diyi Nsulu yachalala. Yuma yejima yahoshañayi yalala. Chakutalilahu, mwahoshañayi kutalisha hayuma yaloña niyatama mwalala. (Mas. 19:9; 119:​142, 151) Yuma yejima yahoshayi kutalisha hayuma yakamwekana kumbidi yalala. (Isa. 55:​10, 11) Hakañanyaña kushikija munakaniyiku. (Kuch. 23:19) Kafwampi, Yehova kwila atwamba nehi! (Heb. 6:18) Muloña wayumiyi, dichamutenenañawu Yehova nawu “Nzambi yachalala.”—Mas. 31:5.

5. Muloñadi chichekalila chaswayi kumwiluka “Nzambi yachalala”? Lumbululenu. (Yilwilu 17:27)

⁵ Hichikweti muloña nachahoshañawu antu amakwawuku, chaswayi kumwiluka Yehova, “Nzambi yachalala.” Wunsahu wamwekeshaña nawu wekala kwoku, wamwekenaña muyuma yatunyeñumuka. (Rom. 1:20) Hampinji yahosheleñayi nezanvu dawakamaana aGiriki, muAtenisi, kapostolu Pawulu wahosheli nindi Nzambi nakukeña ‘tumuwani’ nawa nindi “yena hekala kwakulehi nanetu ejimaku.” (Tañenu Yilwilu 17:27.) Kafwampi, Yehova wakokelaña kudi yomwenindi antu adizoza nawa akeñakeñaña chalala.—Yow. 6:44.

6. Chalalanyi chikwawu chashimunawu muBayibolu, nawa muloñadi ichi chalala chichayitiyishilaña kuwaha?

⁶ Njila yimu yinateli kutukwasha kumwiluka Yehova hikudiza Bayibolu. Amayala asonekeli Bayibolu ayoneneni naspiritu yajila. (2 Pet. 1:​20, 21) Dichi yuma yejima yekala muBayibolu yalala nawa twatela kuyikuhwelela. Chakutalilahu, twatela kuyikuhwelela chiyahosha hakuleña kwayuma yejima yamwiwulu niyuma yikweti wumi yahamaseki. (Kutach. 1:​1, 26) Twatela kukuhwelela chiyahosha kutalisha hachitwavulumwinaña wejima wetu nawa nimuloña waweni makabi chinaswejeliwu nikufwa. (Rom. 5:12; 6:23) Twatela kuyikuhwelela chikupu chiyahosha nawu Yehova, kuhitila mudi Mwanindi, wakafumishahu kutama kwejima kwakojejawu kudi Satana, “tata yakutwamba.” (Yow. 8:44; Rom. 16:20) Nawa twatela kushindamena hachikaninu chamuBayibolu chakwila nawu Yesu wakajilumuna antu atama, wakasañula afu, wakawahisha iseki nawa wakatukwasha kwikala awanina. (Yow. 11:​25, 26; 1 Yow. 3:8) Kwenoku kukooleka kwatwinkayi Yehova! Watudizisha chalala nawa watwinka kukooleka kwakudizisha antu amakwawu ichi chalala.—Mat. 28:​19, 20.

MULOÑA WAWENI WUTWAHOSHELAÑA CHALALA

7-8. Komana chuma chatusañumunaña kuhosha chalala chekala chalema? Shimunenu chakutalilahu. (Maku 3:​11, 12) (Talenu ninyevulu.)

⁷ Neyi chitwashimuna hakusambila, twatela kuhoshaña chalala neyi tunakukeña kwikala muchisaka chaYehova. Hela chochu, hakwila tumutiyisheña kuwaha, kudi yuma yikwawu yitwatela kwila kubadika hohu hakuhosha chalala. Muloña waweni wutwahoshelaña chalala walema nankashi kudi Yehova. Talenu chuma chamwekeni hampinji Yesu yazatileñayi mudimu windi hanu hamaseki. (Tañenu Maku 3:​11, 12.) Hashimwinineñayi kwakwihi naKaluñalwiji kaÑaliliya, izaza deneni dawantu denjili kudi yena. Hakachi kanawa antu hadiña antu adiña nawandemoni, adibukili kumesu aYesu nakuhosha nawu: “Eyi wudi Mwana kaNzambi.” Muloñadi awa andemoni chahosheleliwu chalala kutalisha hadi Yesu? Chuma chafwilileñawu hikukojeja antu atiyilileña ayikuhweleli nawa nkumininaku ayilekeshi kumukalakela Yehova. Andemoni ashimwini chalala, ilaña nkeñelu yakwila mwenimu yadiña yatama. Hiyamudimbili Yesu hela kumutiyisha kuwahaku. Kafwampi, Yesu wayilejeli awa andemoni nindi bayi ahosha hadi yenaku.

⁸ Chumanyi chitunakudizilaku kuniyi nsañu? Chuma chatusañumunaña tuhosheña chalala chalema kudi Yehova. Dichi chalema nankashi neyi tushimwinaña chalala nankeñelu yayiwahi nawa tuhanaña kudi Yehova kalemesha kejima kitwatambwilaña!—Mat. 5:16; esekejenu Yilwilu 14:​12-15.

9. Chumanyi chikwawu chitwatela kutondolwela kwila, nawa muloñadi?

⁹ Talenu chuma chitwatela kwila hakwila tubuleña kudiletela kalemesha etu aweni. Twili netu mukulumpi atuleja nsañu yakujinda nawa etu tulejaku antu amakwawu iyi nsañu. Neyi antiyilili jetu mukuhita kwampinji eluka nawu nsañu yitwayilejeli yalala, anateli kututiya kuwaha muloña wayuma yitweluka nawa akutachika kutoñojoka nawu tweluka nsañu yakujinda yayivulu. Chumichi chikuyiletesha asweji kutumona nawu twalema, ilaña Nzambi hakutachika kutumona nindi twalemaku. (Yish. 11:13) Muloñadi? Muloña tunashimuni nsañu yakujinda nawa tunahoshi nsañu yalala nankeñelu yatama.

NJILA YITWATELA KUHOSHELAMU CHALALA

10. Munateli kulumbulula ñahi mwatalisha mazu akwila nawu nhoshelu ‘yayiwahi’? (AKolosi 4:6)

¹⁰ Tañenu AKolosi 4:6. Kapostolu Pawulu wanukishili akaKristu ashakamineña muKolosi nindi nhoshelu yawu “mpinji yejima [yikaleña yayiwahi].” Chumichi chatalisha mudihi? Mazu achiGiriki azatishawu haniyi vasi atalisha mukwila nawu nhoshelu yetu yatela kwikala yakukwasha antiyilili jetu, yaluwi nawa yekoku.

11-12. Muloñadi chitwatela kwikalila asoñama hampinji yitunakudizisha antu chalala? Shimunenu chakutalilahu. (Talenu ninyevulu.)

¹¹ Twatela kuzatisha kufumba kwaPawulu kwakwikala nanhoshelu yayiwahi neyi tunakudizisha antu chalala. Bayibolu yayeni yesekejaña chalala chiyikweti nampoku yakabali yatwa yinateli kwaambula wumi naspiritu. Munjila yikwawu, ichi chalala chinateli kusolola wuntu wetu wamukachi niyitoñojoka yetu. (Heb. 4:12) Ilaña neyi tubula kuzatisha Bayibolu chachiwahi, tunateli kuhilisha antu hela kuyiletesha atachiki kubobola nanetu. Talenu chumichi chichinateli kumwekana.

¹² Fwikijenu chumichi. Hampinji yitudi mumudimu wakushimwina, tunawani muntu wadifukulaña kuyifwikija mpinji yejima, nawa wadiluñishaña chidika chaKrisimansi nichaIsita nachisaka chindi. Kuzatisha Bayibolu, tukutachika kumulumbulwila netu hiwusupi kudifukula kuyifwikija nikumuleja hatooka netu chidika chaKrisimansi nichaIsita jakundama kukudifukula kwakutwamba. (Isa. 44:​14-20; 2 Kor. 6:​14-17) Neyi dichitwelili hefuku ditwahanjekeli nindi katachi, dikwila nawu twamulejeleña chalala, ilaña hitwazatishili Izu daNzambi chiwahiku.

13. Tunateli kutoweja ñahi mazu etu namuñwa?

¹³ Pawulu wayilejeli cheñi antu atañileña nyikanda yindi nindi atela kutoweja namuñwa mazu ahoshañawu. Hatalishili mukwila nindi twatela kuhimpa chalala hela kuchiswekaku. Ilaña, watalishileña mukwila nindi nhoshelu yetu yatela kwikala ‘yakutoweja’ kulonda tushimwineña chalala munjila yikuyitiyisha kuwaha antiyilili jetu. (Yoba 12:11) Chinateli kwikala chakala kwila mwenimu. Kutalisha kuyakuda, tunateli kutachika kutoñojoka netu yakuda yitwakeña etu niantu amakwawu ayikeña. Munjila yoyimu, tunateli kutachika kutoñojoka netu antu ejima atiyaña kuwaha nhoshelu yetu. Ilaña diimu wanyi. Chakutalilahu, antu akuyisemwa yimu anateli kuhosha yuma yinakutoñojokawu chakadi kuhita mumbanda, hela chakwila anakuhosha nawakulumpi. Hela chochu, antu akuyisemwa yikwawu anateli kumona nawu kuhosha muniyi njila hichetejewaku, nawa hikasawuntu. Pawulu wahosheli nindi twatela kwiluka “[chitwatela] kwakula muntu-himuntu.” Chumichi chinakutalisha mukwila nawu twatela kuhosha, bayi kwesekeja nachitunakukeña hela chisemwa chetuku, ilaña kwesekeja nachinakukeña antiyilili jetu.

MPINJI YITWATELA KUHOSHA CHALALA

14. Hampinji yadiñayi hamaseki, komana Yesu wayidizishili atumbanji twindi yuma yejima yelukiliyi? Lumbululenu.

¹⁴ Yesu wahosheleña munjila yayiwahi mpinji yejima nawakakumulondela, nawa wayidizishili yuma yayivulu. (Maku 6:34) Ilaña kwachidiña yuma yikwawu yayivulu yateleleli kudizawu. Yesu wakeñeleña wanyi kuyidizisha yuma yejima yelukiliyi. Welukili wuswa wadiñawu nawu. Welukili nindi iyi hiyadiña mpinji yatelela yakuyidizishilamu yuma yikwawu yalemaku. Kafwampi, wahosheli nindi hiyadi kutwesha kutiyishisha achina chalalaku. (Yow. 16:12) Chumichi chinakutudizishadi?

15. Komana twatela kudizisha atudizi etu aBayibolu yuma yejima yitweluka hampinji yimu? Lumbululenu. (Yishimu 25:11) (Talenu nimwevulu.)

¹⁵ Yuma yeliliyi Yesu yinakumwekesha nawu kwiluka chalala kwatalisha wanyi mukwila nawu twatela kuyidizisha antu yuma yejima yitweluka hampinji yimuku. Tunateli kwimbujola ñahi yuma yeliliyi Yesu? Twatela kuyitoñojokelañaku antu kwesekeja nachidi yuma muchihandilu chawu. Toñojokenu cheñi hadi ona muntu wadiluñishaña chidika chaKrisimansi nichaIsita nachisaka chindi. Tweluka netu iyi yidika yakundama kukudifukula kwakutwamba nawa Nzambi wayitiyaña kuwaha wanyi. Ilaña fwikijenu munatachiki kudiza Bayibolu naniwu muntu henohu kunashali mulungu wumu hela yiyedi nefuku daKrisimansi. Nhoshelu yetu yikwikala yayiwahi wanyi neyi tumuleja chahosha Bayibolu kutalisha hayidika yakundama kukudifukula kwakutwamba nawa tukuhwelela netu wukuleka kudiñija muchidika chaKrisimansi hayoyenoyu mpinji. Diimu tuhu, atudizi amakwawu ashikenaña kuzatisha yuma yejima yinakudizawu muBayibolu. Ilaña, amakwawu chasendaña mpinji yeneni hakwila ahimpi yitoñojoka niyilwilu yawu. Tunateli kuyikwasha atudizi etu aBayibolu kupaminaku neyi tuyilejaña yuma yatela kwilukawu hohu hanoyu mpinji, dikwila nawu, hampinji yikuyipelela kutiyisha oyu nsañu.—Tañenu Yishimu 25:11.

16. Munateli kukwasha ñahi atudizi enu aBayibolu “[kutwalekahu] kwenda muchalala”?

¹⁶ Kudi yuma yatensha hohu yatuzañaleshaña neyi chitwazañalalaña kukwasha antu kwiluka chalala chahosha hadi Yehova. Tunateli kuyikwasha “[kutwalekahu] kwenda muchalala” neyi twila yuma yinalondelihu: Kutwalekahu kwila yuma yayiwahi yatela kwimbujolawu. (3 Yow. 3, 4) Zatenuña nañovu kulonda chihandilu chenu chimwekesheña hatooka nawu mwakuhwelela muyikaninu yekala Mwizu daNzambi. Hoshenuña chalala nankeñelu yayiwahi. Hoshenuña munjila yayiwahi, kuzatisha mazu amwovu nawa aluwi hampinji yatelela neyi munakudizisha antu chalala. Nawa hanenuña kudi Yehova kalemesha kejima kimunakutambwila. Neyi mwilaña mwenimu, mukumwekeshaña nenu mwekala kukabadi kaYehova, Nzambi yachalala.