Chakushimwina Kuzatisha Mesa yaNyikanda

Kushimwina kuzatisha mesa ningolofwana yanyikanda kunakuleta chikupu antu ashinshika muchalala. (Yow. 6:44) Dichi, aeluda ayileja kuloñesha ntanjikilu yakushimwina mumaluña mwekala antu amavulu mwiluña dachipompelu mwahitaña antu amavulu nankashi. Chineli jimesa janyikanda tunateli kujituntulula, hitwatela kulomba lusesa kunfulumenduku. Anyi atela kuzata iwu mudimu? Akwakushimwina adi nakashinshi, adilemesha nawa eluka kuhanjeka nawantu chiwahi. Heshina hadi yuma yatela kwilawu akwakushimwina niyikubula kwilawu yikuyikwasha kushimwina chiwahi.

Yuma Yitwatela Kwila:

Ikalenu akasunuka, amuzañalu nikukwasha antu anakuhita. Akwakushimwina amakwawu atumbaña chimwemweta nawa emushaña. Neyi muntu nakuhita iku nakutala hamesa yanyikanda, mukuhosha nenu, “Sendenuhu mukanda neyi munakeñi.”
Imanenu heluña datelela nahadi mesa yanyikanda. Kumaluña amakwawu akwakushimwina azataña chiwahi neyi emana kwakwihi namesa yanyikanda. Akwakushimwina amakwawu amoni neyi kwimena kwakwihi kwakañeshaña antu kwimana hamesa yanyikanda, dichi emenaña hahalehi sampu anamoni muntu nemani nakutala hamesa. Neyi muntu nemani hamesa, hanjekenu nindi, hadaha munateli kumwihula nenu, “Mwadihulahu dehi ilu lwihu?”
Zatishenuña Bayibolu mpinji yejima.
Lejenu antu chitwadizaña Bayibolu neyi asenda mukanda wakudizamu chidi neyi mukanda waChatañishaña Bayibolu. Mutalishenu vidiyo yaMuloñadi Wutwatela Kudizila Bayibolu? hanshiña yenu.
Tambulenu manaamba awantu adi nampwila yakudiza. Neyi owu muntu washikamaña mwiluña denu wanyi, sonekenu fomu yaMwani Mukeñenu Iwu Muntu (S-43) nyakalenu kumwinka nsoneki.