Marsë 17 äämp ja ogäˈän yajwowäˈänyë jäˈäy mä yajjamyatsäˈänyë Jesusë yˈoˈkën xëë

1. ¿Ti yajtuuntsondäˈägäämp 17 äämbë marsë?

¹ Ko jëmëjt jëmëjt nduˈukmujkëm, duˈunën njamyajtsëmë Jesusë yˈoˈkën xëë (1 Kor. 11:26). Pääty ntsojkënyëˈäjtëm ets mayë jäˈäy nyëjkxët parë tmëdooˈitët wiˈixë Diosë yˈoyjyaˈayˈäjtën dyaˈixyëty ko ojts xyjuˈuybyëtsëˈëmëm (Fwank 3:16). Mä tyäˈädë jëmëjt, ja ogäˈän yajwowäˈänyë jäˈäy sääbëdë 17 äämbë marsë mä yajjamyatsäˈänyë Jesusë yˈoˈkën xëë. ¿Ja tyam ogäˈän ndukniwijtsëm parë mayë jäˈäy nwoˈojëm?

2. ¿Wiˈix mbäät ngëyäjkëmë inbitasyonk?

² ¿Wiˈix ngëyäjkëmë inbitasyonk? Oy ko kyaj jekyë jäˈäy nmëtmaytyakëm. Ko nety të ngäjpxpoˈkxëm, mbäät nˈanmäˈäyëm: “Yëˈë nmoˈoyaambyë tyäˈädë neky parë mnëjkxët 5 äämbë abril mëdë mfamilyë mäjëts njamyatsäˈändë abëtsemy nyaxwinyëdë Jesusë yˈoˈkën xëë. Jap nyaxäˈäny tuˈugë diskursë mä yajnimaytyäˈägäˈäny wiˈix ndukˈoyˈäjtëm ko Jesus ojts xykyuˈoˈkëm ets ti tyam tyuumpy. Namayˈäjtënë mdëkët, kyaj pënë meeny sentääbë yaˈˈamdoy. Yä yajnigajpxy ti oorë tsyondäˈägäˈäny ets mää tyunäˈänyëty”. Nan mbäät ngëyäjkëmë rebistë sääbëdë domingë pën nˈijxëm ko jäˈäy yˈoymyëdoopy.

3. ¿Ti mbäät nduˈunëm parë niˈamukë jäˈäy yajmoˈoyët tuˈugë inbitasyonk?

³ Wow niˈamukë jäˈäy. Nˈokpëjtakëmë winmäˈäny ets niˈamukë jäˈäy nwoˈojëm. Pääty, nˈokwoˈojëm pënaty ogäˈän të nijëmbijtëm, pënaty mëët nˈëxpëjkëmë Biiblyë, jiiky mëguˈuk, mëdëjkpäˈä, diˈib mëët nduˈunëm ets diˈib mëët nˈeskuelëˈäjtëm o pënaty nˈixyˈäjtëm. Etsë mëjjäˈäytyëjk diˈib mä naymyujkën yëˈë tyukniwitsëyandëp wiˈix wyäˈkxäˈäny ja inbitasyonk parë nyaˈˈabëtsëˈëmëm ja territooryë. Nuˈun kujkë jëmëjt nyaxy jantsy oy wyimbëtsemy ko jäˈäy yajwowdë. Extëm junktëˈëy, tuˈugë nmëguˈukˈäjtëm diˈibë jäˈäy lyugäär moopy ojts tˈixy ko jyajty tuˈugë toxytyëjk, ta tˈanmääy ko tˈëxtäˈäyaˈany ja diˈibë nety të wyoyëty. Perë tyäˈädë toxytyëjk ta jyënany ko kyaj pën tˈixyˈaty, pes ja xëë nety të nyaxtë nmëguˈukˈäjtëm diˈib yajwäˈkxtëbë inbitasyonk tëjkm dëjkm.

4. ¿Tiko mbäät ndukˈijt ndukxoˈonëm mä ja inbitasyonk wyäˈkxäˈäny?

⁴ Mbäät jyaˈty ja jäˈäy diˈib të xywyoy mä yajjamyatsäˈänyë Jesusë yˈoˈkën xëë. Ets pën kyaj jyaˈty, nëgoo ko nety të xytyunyë mëjää parë jäˈäy të tnijawë. Ko xyajwäˈkxët ja inbitasyonk duˈun ja jäˈäy xytyuknijawët ko Jesus yëˈë tyam tuump Rey. Ets ko xytyukˈit xytyukxonët, duˈun xyajnigëxëˈëgët ko mmëjjäˈäwëp mëjwiin kajaa ko të myajjuuybyëtsemy, duˈun tpëkëdë kuentë ja jäˈäyëty ets ja nmëguˈukˈäjtëm diˈib mä naymyujkën, per diˈib niˈigyë pyëkaambyë kuentë yëˈë Jyobaa (Kol. 3:15).