WAAKAVIHERA ATTHU WIIRA APHEELE WIITTHUCA-THO
MWAHA 7
Upisa nrima
Ikano: “Ayo khayaahiya wiitthuciha ni ulalya ihapari comaana.”—Mite. 5:42.
Isiyani Paulu yaapankilyaawe?
1. Moone IVIDIYU awula nsome Miteko 19:8-10. Mwamalihaka, mwaakhule ala makohwaala:
Nincuwela cani wiira Paulu ahopisa nrima ukati waalalyaawe ihapari comaana?
Manannani Paulu cahaahiyerenryaawe uturuwela uwuulumana atthu yaapheela wiitthucihiya ihapari comaana, ni uyo aavirihile myeeri mikavi aturuwelaka uwuulumana?
Ntakihero na Paulu ninniitthuciha isiyani?
2. Nihaana nilevaka ukatiihu ni ikuru cihu wiira nituruwele waathotola atthu ampheela usomihiya Ibiiblya.
Muntakihe Paulu
3. Mwiikurumice wiira mwamootole ntthuuyo iwoora inkhalanaawe ukati. Mwiikohe co: ‘Ukatini unhalaaka umphwanya ula ntthuula? Nihukuni ni nipuroni unhalaaya ukhitirya wiira kimoopane mwaha ula ntthuula?’ Mwiitthenkace saana wiira nturuwele umootola ntthu, hataa ukhalaka wiira iwoora inkhalaawe nuukati kahi phiiwoora nyuuva yaapheeleenyu urwaa unthotola.
4. Munleehanane umoopana mwaha nihuku nikhwaawe. Mwamalihaka uwoopana mwaha ntthu, mmananihe uleehana nuuyo ukati wooreera ukumanaca-tho wiira nrweehele uhoolo mwahooyo. Mwiikurumice wiira nrwee umoonanana khampa nleehanneenyu.
5. Nhimoocye ntthuuyo. Nhuupuwele wiira ntthuuyo khampheela usomihiya Ibiiblya nlattu woohimphwanya uwannyawe awula nlattu womphwanya avaraka miteko. (1 Akor. 13:4, 7) Hataa ukhalaka commo, nhoocye. Nhihiyerere upisa nrima, masi nvarele nteko saana ukatiinyu.—1 Akor. 9:26.