Wiaik Ien Ñan Read Im Katak

“Wiaik ien, bwe ran ko renana.”​—DRI EPESÕS 5:​16.

1. Etke ej juõn men emeletlet ñan karõklok ien eo ad, im wãwen eo jej kajerbal ien eo ad ej kalikar ta kin kij?

EMWIJ kar ba bwe “ñan kãlet ien ej ñan kejbãrok ien.” Juõn armij eo ej karõk an ien kin men ko ej aikwij kõmmani ekkã an naj bõk elaplok tokjen jen ien ko an. King emeletlet eo Solomon ear je: “Kar karõk ien kin men otemjej, ewõr juõn ien kin men otemjej iumin lañ.” (Ecclesiastes 3:1, Moffatt) Kij aolep ewõr ejja joñan in ien eo jemaroñ kajerbale; ej bebe eo ad kin ewi wãwen jenaj kajerbale. Wãwen eo jej kõlajrak men ko raorõk im ñan ajeje ien eo ad ej kalikar ta eo ej bed ebak ñan buruõd.​—Matu 6:​21.

2. (a) Ilo katak eo an ion Tol eo, ta eo Jesus ear ba kin aikwij ko ad ilo jitõb? (b) Etale ta eo jej aikwij kõmmane kin kij make?

² Jej aikwij bõk ien ñan mõñã im kiki kinke men kein rej men in aikwij ko an kanniek. Ak ta kin aikwij ko ad ilo jitõb? Jej jelã bwe jej aikwij kabwe aikwij kein bareinwõt. Ilo Katak eo an ion Tol eo, Jesus ear ba: “Emõnõnõ ro rej jelã kin aikwij eo air ilo jitõb.” (Matthew 5:​3, New World Translation) Eñin unin ekkeini an “dri korijer e tiljek im meletlet” kakememej kij kin aorõkin ad karõk ien ñan read im katak Bible eo. (Matu 24:45) Kwomaroñ kile aorõkin men in, ak kwomaroñ eñjake bwe ejelok am ien ñan katak ak read Bible. Elañe eindein, jen etale jet wãwen ko kwomaroñ kõmman ien ilo mour eo am ñan read Nan in Anij, ñan katak ibbam make, im ñan kalmenlokjen.

Bukõt Ien ñan Read im Katak Bible

3, 4. (a) Ri jilek Paul ear letok nan in kakabilek ta eo kin wãwen kajerbal ien eo ad, im men in ej kitibuj ta? (b) Ta melelen nan ko an Paul ke ear kakabilek kij ñan ‘wiaik ien’?

³ Ilo lemnak kin ien eo jej mour ie, kij aolep jej aikwij bokake nan ko an ri jilek Paul: “Inem komin kanuij lale ekijkan ami etetal, jab einwõt dri jaje, a einwõt dri meletlet; Im wiaik ien, bwe ran ko renana. Kin men in komin jab bwebwe, a komin jelalokjen ta eo ankil an Iroij.” (Dri Epesõs 5:​15-​17) Emol, nan in kakabilek in ej jelet aolep wãwen ko in mour ko ad einwõt ri Christian ro emwij wujleplok ad mour, ekoba karõk ien ñan jar, katak, kwelok, im bõk kunad ilo joñan ad maroñ ñan kwalok kin “news eo emõn kin ailiñ eo.”​—Matthew 24:​14, NW; 28:19, 20.

⁴ Elõñ ian ri karejar ro an Jehovah rainin rej lo an bin air karõk ien ilo mour ko air ñan read Bible im katak. Alikar, je ban kobalok bar juõn awa ilo ran eo ad, inem ej aikwij oktak melelen nan in kakabilek eo an Paul. Ilo kajin Greek, nan eo “wiaik ien” ej melelen ñan wia jen tokjen bar juõn men. Ilo Expository Dictionary, an W. E. Vine ej lelok melele eo ñan “kortokjen jabdewõt ien ko remõn, im ukõte ñan tokjen eo emõntata bwe kwojjab maroñ kajeblake ñe e jako.” Jen ta ak jen ia eo jemaroñ wiaik ien ñan read im katak Bible?

Jej Aikwij Karõk Men ko Raorõktata

5. Etke im ewi wãwen jej aikwij “melejoñ men ko re lijiklok”?

⁵ Ijellokin eddo ko ad kin men ko an lal, ewõr bareinwõt men ko lor jitõb jej aikwij lali. Einwõt ri karejar ro an Jehovah emwij wujleplok ad mour, jej aikwij “boub ilo jerbal an Iroij.” (1 Corinthians 15:​58, NW) Kin un in, Paul ear kaiñ ri Christian ro ilo Philippi bwe ren “melejoñ men ko re lijiklok.” (Dri Pilippai 1:​10) Melelen men in bwe rej aikwij karõk men ko raorõk moktata. Men ko ilo jitõb ren ien otemjej bed iman men ko ilo kanniek. (Matu 6:​31-​33) Ak, jej aikwij bareinwõt jokkin wõt juõn ñe jej kajejjet eddo ko ad ilo jitõb. Ewi wãwen jej ajeje ien ko ad ikõtan wãwen ko reinjuõn ilo mour in Christian eo ad? Overseer ro rej ito-itak rej report bwe ibwiljin “men ko relijiklok” me juõn ri Christian ej aikwij lale, ekkã air jerwane katak ibbeir make im read Bible.

6. Wiaik ien emaroñ kitibuj ta ñe ej jelet jikin jerbal eo ad ak jerbal ko ilo mweo?

⁶ Einwõt emwij ad loe, wiaik ien ej kitibuj “kortokjen jabdewõt ien ko remõn” im “ukõte ñan tokjen eo emõntata.” Inem elañe karõk eo ad in read Bible im manit in katak ko ad rejjab emõn, jej aikwij etale kij make ñan lale ewi wãwen jej kajerbal ien ko ad. Elañe ej le jen joñan ad aikwij jerbal ilo jikin jerbal eo ad, im elap an kañ ien im kajur eo ad, jej aikwij kõmmane bwe en juõn men jej jar ñan Jehovah kake. (Sam 55:22) Jenaj maroñ kõmman oktak ko me renaj letok elaplok ien kin men ko raorõk me rej jelet kabuñ eo ñan Jehovah, ekoba katak im read Bible. Emwij ba ilo jimwe bwe jerbal ko an kõrã rejjab jemlok. Inem ri Christian sister ro rej aikwij bareinwõt karõklok men ko air raorõk im kejbãrok ien ñan read im katak Bible.

7, 8. (a) Jemaroñ bõk ien jen makitkit ta ko bwe jen maroñ read im katak? (b) En ta un eo unin ad ikkure, im ilo ad kememej men in ewi wãwen enaj jibañ kij ñan karõklok men ko ad raorõk?

⁷ Ekkã, elõñ iad jemaroñ wiaik ien jen makitkit ko rejjab aorõk bwe en wõr ien ñan katak. Jemaroñ kajitõkin kij make, ‘Ewi joñan ien eo ij joloke ñan read magazine ak newspaper ko, aluij program ko ilo television, roñjake kajañjañ, ikkure kin video game ko? Ij kajerbal elaplok ien ke iman computer eo jen aõ read Bible? Paul ej ba: “Komin jab bwebwe, a komin jelalokjen ta eo ankil an Iroij [Jehovah].” (Dri Epesõs 5:​17) Le jen joñan aluij television ej un eo elaptata unin elõñ ri Kennan ro ejelok ien ñan air katak im read Bible.​—Sam 101:3; 119:37, 47, 48.

⁸ Jet rej ba bwe rejjab maroñ katak aolep ien, ej aikwij wõr ien rej kakije. Ke ej mol men in, emaroñ juõn men emõn ñan etale joñan ien eo jej kajerbale ñan kakije im keidi ibben ien eo jej kajerbale ñan katak ak read Bible. Jemlok eo emaroñ kailbõk yuk. Ikkure im kakije, ke raorõk, rej aikwij bed ilo juõn jikin ekkar. Mejenkajjik eo air ej ñan kakijeik kij bwe jen maroñ bar kijejeto in bõk kunad ilo makitkit ko ilo jitõb. Elõñ program ko ilo television im video game ko rej kammõkmõk armij, ak read im katak Nan in Anij ej kakajur im kemourure kij.​—Sam 19:​7, 8.

Ewi Wãwen Jet Rej Kõmman Ien ñan Katak

9. Ta tokjen ko rej walok jen ad lore nan in rejañ eo ilo booklet eo Examining the Scriptures Daily​—1999?

⁹ Page eo iman ilo 1999 booklet in Examining the Scriptures Daily ej ba: “Enaj lap an wõr tokjen ñan etale eon in ran ko kajjojo im uak ko jen booklet in ilo jibboñ. Kwonaj eñjake bwe Jehovah, ri Kaki eo Elaptata, ear kworuji yuk kin nan in katak ko an. Ilo kanan ej konono kin Jesus Christ bwe ej bõk tokjen jen nan in katak ko an Jehovah kajjojo jibboñ: ‘Ej [Jehovah] kworuj jiboñ otemjej, Ej kworuj lojiliñiõ bwe en roñ einwõt ro emwij katakin ir.’ Nan in katak rot kein kar lelok ñan Jesus ‘loin ro emwij katakin ir’ bwe en ‘jela ekijkan an jibõñ eo e mõk kin nan ko.’ (Isa. 30:​20, NW; 50:4; Mat. 11:28-​30) An kworuj yuk kajjojo jibboñ kin nan in katak ejejjet jen Nan eo an Anij ejamin jibañ yuk ñan kijenmij wõt ilo abañ ko am ak enaj bareinwõt lewõj ‘loin ro emwij katakin ir’ bwe kwon maroñ jibañ ro jet.”a

10. Ewi wãwen jet rej kõmman ien ñan read im katak, in kin tokjen ta ko?

¹⁰ Elõñ ri Christian ro rej lor nan in rejañ in ilo air read eon in ran ko kajjojo im uak ko im ilo air read im katak Bible eo ilo jibboñ tata. Ilo France juõn pioneer etiljek ej ruj ilo jibboñ tata kajjojo ran im bõk 30 minute ko ñan read Bible. Ta eo ear kamaroñ e ñan kõmman men in iumin elõñ yiõ ko? Ej ba: “Juõn kõnan jen tu-mũlal in buruõd ej kamakit iõ, im ij lor wõt schedule eo aõ in read jekdon ta!” Jekdon ien ta eo jej kãlete ilo juõn ran, men eo deo ej bwe jen lor wõt schedule eo ad. René Mica, eo ear bed ilo jerbal in pioneer iumin elõñlok jen 40 yiõ ko ilo Europe im North Africa, ej ba: “Kar mejenkajjik eo aõ jen 1950 bwe in read aolepen Bible eo ilo yiõ ko otemjej, juõn men iar kõmmane 49 alen. Ij eñjake bwe men in eaorõk bwe in kejbãrok juõn kõtan emãnãn ibben ri Kõmanmõn eo aõ. Kalmenlokjen kin Nan eo an Anij ej jibañ iõ bwe en emõn aõ melele kin ekajet jimwe eo an Jehovah im kadkad ko jet kadkadin im ear juõn unjen kajur elap.”b

“Ekan ilo Ien Ekkar”

11, 12. (a) “Kijier” ta ko ilo jitõb “dri kõmñe eo etiljek im meletlet” kar litoki? (b) Ewi wãwen rar letok “kijeir” ilo ien eo ejejjet?

¹¹ Einwõt manit ko in keini am mõñã ej kõmman am ejmour ilo kanniek, juõn schedule in keini am katak im read Bible ej kõmman am ejmour ilo jitõb. Ilo Gospel in Luke, jej read nan ko an Jesus: “Inem wõn dri kõmñe eo etiljek im meletlet, eo iroij eo an e naj kairoij e ion ro dri korijeran, bwe en lelok kijeir ñõn ir ien ejejit?” (Luk 12:42) Iumin elõñlok jen 120 yiõ ko kiõ, mõñã ko ilo jitõb ilo “ien ejejit” kar litoki ilo Imõniaroñroñ, im bareinwõt book im publication ko jet rej wawa ion Bible.

¹² Lale nan ko ilo “ien ejejit.” Ilo ien eo ejejjet, “ri Kaki eo Elaptata,” Jehovah, ikijen Nejin im class in karejar eo, ear tel armij ro an ilo men eo ikijen katak im mwil. Ej einwõt jaar aolep roñ juõn ainikien ej ba ñan kij “ ‘Eñin ial eo, komin etetal iloan,’ ñe komij jeor ñan anbijmaroñ, im ñe kom jeor ñan anmiñ.” (Isaiah 30:20, 21, NW) Bareinwõt, ñe armij ro kajjojo rej read Bible eo im aolep book in Bible ko, ekkã air eñjake bwe lemnak ko rej kwaloki iloan elap an jejjet ñan ir. Aet, nan in kakabilek im nan in tel ko rekwojarjar renaj itok ilo ien eo ejejjet, im kamaroñ kij ñan jumae men in kabo ko ak kõmman juõn bebe emeletlet.

Kaddek Manit ko Remõn ñan Mõñã

13. Ta jet ian manit ko renana ñan mõñã men ko ilo jitõb?

¹³ Ñan bõk tokjen jen “kijeir” kar letoke ilo ien eo ejejjet, jej aikwij manit ko remõn ñan mõñã. Eaorõk bwe en wõr juõn schedule in keini ad read Bible im katak ibbed make im ñan lore. Ewõr ke ibbam manit ko remõn ñan mõñã men ko ilo jitõb im ien ko ñan keini am katak ibbam make? Ak kwoj baj readi wõt katak ko kar keboji ñan kij, mõñã ilo mõkaj, ilo nan in kõkkar, ak bõlen jolok jet ien mõñã ko. Manit ko renana ñan mõñã men ko ilo jitõb kar kõmman bwe jet ren mõjno ilo tõmak⁠—ak buñ jen tõmak.​—1 Timote 1:​19; 4:​15, 16.

14. Etke ewõr tokjen ñan liñõre katak ko me jej jelã kaki?

¹⁴ Jet remaroñ eñjake bwe ededelok air jelã kin irinekatak ko im bwe ejjab aolep katak ko rej bõkmantak juõn men elukkun kãl. Kin men in, karõk in katak im bed ilo kwelok ko rejjab men in aikwij ko. Bõtab, Bible eo ej kwalok bwe jej aikwij bõk kakememej kin men ko ededelok ad katak kaki. (Sam 119:95, 99; 2 Piter 3:1; Jud 5) Einwõt juõn ri kõmãt ej keboj ejja kein kãre ko ilo elõñ wãwen ko, class in ri karejar eo ej letok mõñã ko ilo jitõb ilo elõñ wãwen ko. Meñe ilo katak ko me ekutkut air kar etale mokta, ewõr tibdik in point ko kwojjab kõnan likjap jen i. Men eo emol ej bwe tokjen eo jej bõke jen katak eo jej readi ej wawa ion joñan ien eo im jibadbad ko jej kõmmani ñe jej katak.

Tokjen ko ilo Jitõb Jej Bõki Jen Ad Read im Katak

15. Ewi wãwen read im katak Bible eo ej jibañ kij ñan kakõmõnmõnlok ad ri jerbal ro kin Nan eo an Anij?

¹⁵ Elõñ tokjen ko jej bõki jen ad read im katak Bible eo. Ej jibañ kij ñan jibadõk juõn ian eddo in Christian ko ad, melelen, bwe jen maroñ juõn “dri jerbal e jamin jok im ejimewõt an katakin kin nan in mol.” (2 Timote 2:​15) Ñe elaplok ad read im katak Bible eo, enaj laplok an obrak lemnak ko ad kin lemnak ko an Anij. Inem, einwõt Paul, jenaj maroñ ‘kamelele ñõn ir jen Jeje ko, im kameleleik im kamol’ kin mol ko raibujuij kin karõk ko an Jehovah. (Jerbal 17:​2, 3) Kabel eo ad ñan katakin enaj laplok, im bwebwenato ko, katak ko, im nan in kakabilek ko ad renaj laplok air kõketak ilo jitõb.​—Jabõn Kennan Ko 1:5.

16. Ilo wãwen et eo jej make bõk tokjen jen ad read im katak Nan eo an Anij?

¹⁶ Bareinwõt, ien eo jej kajerbale ñan etale Nan eo an Anij enaj kamaroñ kij ñan ukõt mour eo an bwe en jejjetlok ñan wãwen ko an Jehovah. (Sam 25:4; 119:​9, 10; Jabõn Kennan Ko 6:​20-​23) Enaj kakajurlok kadkad ko ad kadkadid ilo jitõb, einwõt ettã buru, tiljek, im mõnõnõ. (Duteronomi 17:19, 20; Reveles̃õn 1:3) Ñe jej jerbale jelãlokjen eo jej bõke jen ad read im katak Bible, jenaj lañliñ kin an tortok jitõb an Anij ilo mour eo ad, im walok ilo tokjen eo bwe enaj lap an jerbal leen jitõb ko ilo men otemjej jej kõmmani.​—Dri Galetia 5:​22, 23.

17. Ewi wãwen joñan lapin im emõnin ad read im katak Bible eo ej jelet kõtan eo ad ibben Jehovah?

¹⁷ Men eo eaorõktata, ien eo jej wiaiki ak bõke jen makitkit ko jet bwe jen maroñ read im katak Nan eo an Anij enaj bõktok jerammõn ko relap ikijen kõtan eo ad ibben Anij. Paul ear jar bwe ri Christian ro mõttan ren “obrõk kin jela ankil An [Anij] ilo meletlet otemjej im lolãtãt jen Jitõb. Bwe ami etetal en tellokõn Iroij im kabuñburuen ilo men otemjej.” (Dri Kolosse 1:​9, 10) Bareinwõt, bwe ad “etetal en tellokõn Iroij [Jehovah],” jej aikwij “obrõk kin jela ankil An ilo meletlet otemjej im lolãtãt jen Jitõb.” Alikar, ñan ad bõk jerammõn im buñburu an Jehovah men in ej wawa ion joñan lapin im emõnin ad read im katak Bible eo.

18. Jerammõn ta ko jemaroñ bõki elañe jej lore nan ko an Jesus emwij je ilo Jon 17:⁠3?

¹⁸ “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Eñin juõn ian eon ko elaptata an ri Kennan ro an Jehovah kajerbale ñan jibañ ro jet ñan kile aorõkin katak Nan eo an Anij. Emol an jab diklok an aorõk bwe kij kajjojo jen make kõmmane. Kejatdikdik eo ad ñan bõk mour indio ej ekkejel ion ad jelãlok kin Jehovah im Nejin, Jesus Christ. Im lemnak kin ta melelen men in. Ejamin wõr jemlokin ad katak elõñlok men ko kin Jehovah​—im enaj wõr ien indio ñan katak kake!​—Ekklisiastis 3:​11; Dri Rom 11:⁠33.

[Kamelele ko itulal]

Kajitõk in Elij ko

• Wãwen eo jej kajerbal ien eo ad ej kalikar ta kin kij?

• Jemaroñ wiaik ak bõk ien jen makitkit ta ko bwe jen maroñ read im katak Bible eo?

• Etke jej aikwij lale manit ko ad ñan mõñã men ko ilo jitõb?

• Tokjen ta ko jej bõki jen ad read im katak Jeje ko?

[Pija]

Keini ad read im katak Bible eo enaj kamaroñ kij bwe en ‘jimewõt ad katakin kin nan in mol’

[Pija]

Ilo ad kõmman bwe makitkit ko jet ilo mour eo ad eboub en jokkin wõt juõn ibben jibadbad ko ad ilo jitõb men in ej bõktok jerammõn ko relap