Kwalok Nan Einwõt juõn Family Ilo December
1 “Ro drom rej mõnõnõ in lewoj ir mõke ilo ran in Am kajur.” Nan kein ilo Psalm 110:3 emõn an kalikar dolul eo an Jehovah ej jerbal rainin. Ilo alliñ in December, elõñ ro uan family ko enaj wor ien ko remõn ñõn kalaplok ‘jerbal eo air ilo mõnõnõ’ ilo air kalaplok ijo kwunair ilo jerbal in kwalok nan. Ñõn ‘kejbãrok ien’ jej aikwij kõmmõn karõk ko im kejbarok wãwen eo jej scheduli ien ko ad.—Kol. 4:5; 1 Kor. 9:26.
2 Ro redik remaroñ kortokjen ien kakije jen school ilo ien holiday ko. Elañe kwoj juõn ri school, kwomaroñ ke koba ibben jodikdik ro jet ibelakin lõl ro renaj jerbal einwõt auxiliary pioneer ro ilo December? Elañe eindein, kwonaj lõñliñ kin elõñ jerammõn ko. Kom ro jinen im jemen kom maroñ ke auxiliary pioneer ibben ro nejimi? Ak, ibben an aolepen family eo jerbal ibben don, remaroñ ke jibañ juõn uan family eo ñõn pioneer? Aolepen ro uan family eo ren kõmmõn juõn jibadbad ejej uan ñõn bõk kwunair ilo jerbal in kwalok nan kajjojo weekend ilo December.—1 Kor. 15:58.
3 Kõmmõn Karõk ko Rekwon im Bin: Elikin ami etale maroñ ko ñõn kalaplok jerbal eo ami einwõt juõn family, bõk jidik ien ñõn je mejenkajjik ko an kajjojo uan family eo. Bõlen kom maroñ je ion calendar eo an family eo juõn schedule in kwalok nan kajjojo ran. Kememej, elañe kwoj likjap in kõmmõn karõk ko rekwon im bin, alliñ eo enaj motlok mokta jen am tõbar mejenkajjik ko am.—Jabõn Kennan 20:18.
4 Service overseer eo enaj bareinwõt kõnan kõmmõn karõk ko rekwon im bin kin jerbal in kwalok nan an congregation eo, ilo lemnak kin ri mweo ro rej mejurlep ilo jibboñ in holiday (ran in kakije) ko. Elõñ congregation ko kar wor tõbrak ilo air scheduli jerbal in kwalok nan ilo ran in kakije ko erumij lok jidik jen ien eo ekkã air jino ilo jibboñ, inem bar kwelok ibben don ilo elikin raelip.
5 Juõn Ien eo Emõn: Iminene ej kwalok bwe December ej juõn alliñ elap an wor tõbrak ikijen kwalok kin news eo emõn. Elõñ lok armij ekkã air bed ilo moko imweir, im rejjab kanuij boub. Ro elap air tõmak ilo kabuñ ekkã air mõnõnõ in konono kin men ko lor jitõb. Jekõnan kortokjen wãwen kein ñõn kwalok kin news eo emõn im ilo wãwen in ‘mõnõnõ in lelok ir make’ einwõt juõn family.