ആനക്കൊമ്പ്‌—അതിന്റെ വില എത്ര?

കെനിയയിലെ ഉണരുക! ലേഖകൻ

സിംബാബ്‌വേയിലെ ഹരാ​രേ​യിൽവെച്ച്‌ 1997 ജൂണിൽ നടന്ന ഒരു അന്താരാ​ഷ്‌ട്ര സമ്മേള​ന​ത്തിൽ 138 രാജ്യ​ങ്ങ​ളിൽനി​ന്നുള്ള പ്രതി​നി​ധി​കൾ, ആനക്കൊ​മ്പു വ്യാപാ​ര​ത്തി​ന്മേൽ ഏഴു വർഷമാ​യി ഏർപ്പെ​ടു​ത്തി​യി​രുന്ന ആഗോള നിരോ​ധ​ന​ത്തിന്‌ അയവു​വ​രു​ത്താൻ വോട്ടു​ചെ​യ്‌തു. കടുത്ത വാദ​പ്ര​തി​വാ​ദ​ങ്ങൾക്കു​ശേഷം കൈ​ക്കൊണ്ട ആ തീരു​മാ​നം തെക്കൻ ആഫ്രി​ക്ക​യി​ലെ ബോട്‌സ്വാ​ന, നമീബിയ, സിംബാ​ബ്‌വേ എന്നീ മൂന്നു രാജ്യ​ങ്ങൾക്ക്‌ ആനക്കൊമ്പ്‌ വിൽക്കാ​നുള്ള അനുമതി നൽകി. ഒരു രാജ്യ​ത്തിന്‌, അതായത്‌ ജപ്പാന്‌, മാത്രമേ അതു വിൽക്കാ​വൂ എന്ന കരാറി​ന്മേൽ. തെക്കൻ ആഫ്രി​ക്ക​യിൽനി​ന്നുള്ള പ്രതി​നി​ധി​കൾ തീരു​മാ​നം കേട്ട്‌ സന്തോ​ഷി​ച്ചു, ആനന്ദാ​തി​രേ​ക​ത്താൽ അവർ ഗാനമാ​ല​പി​ച്ചു. മറ്റു പ്രതി​നി​ധി​ക​ളാ​കട്ടെ, ആഫ്രിക്കൻ ആനകളു​ടെ ഗതി എന്താകു​മെ​ന്നോർത്ത്‌ പരി​ഭ്രാ​ന്ത​രാ​യി.

പൊതു​യു​ഗ​ത്തി​നു​മുമ്പ്‌ മൂന്നാം നൂറ്റാ​ണ്ടിൽ ഹാനിബൽ റോമൻ സൈന്യ​ത്തെ വെല്ലു​വി​ളി​ച്ച​പ്പോൾ മെരു​ക്കി​യെ​ടുത്ത ആഫ്രിക്കൻ ആനകളു​ടെ ഒരു നിരതന്നെ അദ്ദേഹ​ത്തോ​ടൊ​പ്പം ഉണ്ടായി​രു​ന്നു. അന്നാളു​ക​ളിൽ ആഫ്രിക്കൻ ആനകൾ കോടി​ക്ക​ണ​ക്കി​നു​ണ്ടാ​യി​രു​ന്നു. കേപ്പ്‌ മുതൽ കെയ്‌റോ വരെയുള്ള പ്രദേ​ശങ്ങൾ അവ കൈയ​ട​ക്കി​യി​രു​ന്നു.

എന്നാൽ സ്ഥിതി​ഗ​തി​കൾ മാറി​യി​രി​ക്കു​ന്നു. ഒരു നിരീ​ക്ഷകൻ അഭി​പ്രാ​യ​പ്പെട്ടു: “ആനകളാ​കുന്ന സമു​ദ്ര​ത്തിൽ ജനങ്ങളാ​കുന്ന ദ്വീപു​കൾ എന്നതു മാറി ഇപ്പോൾ ജനങ്ങളാ​കുന്ന സമു​ദ്ര​ത്തിൽ ആനകളാ​കുന്ന ദ്വീപു​കൾ എന്ന അവസ്ഥയാ​യി​രി​ക്കു​ന്നു.” ആളുക​ളു​ടെ എണ്ണം പെരു​കി​യ​പ്പോൾ ഭൂമി​ക്കു​വേ​ണ്ടി​യുള്ള മത്സരത്തിൽ ആനകൾക്കാണ്‌ നഷ്ടം നേരി​ട്ടത്‌. ആനകളു​ടെ എണ്ണം കുറയാ​നുള്ള മറ്റൊരു ഘടകം സഹാറ മരുഭൂ​മി​യു​ടെ തെക്കോ​ട്ടുള്ള വ്യാപ​ന​മാണ്‌.

എങ്കിലും ഈ കാരണ​ങ്ങ​ളെ​യൊ​ക്കെ​യും മറിക​ട​ക്കാൻ പോന്ന​താ​യി​രു​ന്നു ആനക്കൊ​മ്പി​നു​വേ​ണ്ടി​യുള്ള ആവശ്യം. പുലി​ക​ളു​ടെ അസ്ഥികൾ, കാണ്ടാ​മൃ​ഗ​ങ്ങ​ളു​ടെ കൊമ്പു​കൾ എന്നിവ​യ്‌ക്കു​ള്ള​തു​പോ​ലെ ആനക്കൊ​മ്പിന്‌ ഔഷധ​ഗുണ സംബന്ധ​മായ കെട്ടു​ക​ഥ​ക​ളു​മാ​യി ബന്ധമൊ​ന്നു​മില്ല. എങ്കിലും അത്‌ ആഡംബ​ര​വ​സ്‌തു​വാണ്‌, ഭംഗി​യു​ള്ള​താണ്‌, ഈടു​നിൽക്കു​ന്ന​താണ്‌. തന്നെയു​മല്ല, അതിൽ കൊത്തു​പണി ചെയ്യാ​നും എളുപ്പ​മാണ്‌. പുരാ​ത​ന​കാ​ലം മുതൽക്കേ ആനക്കൊ​മ്പു​ത്‌പ​ന്ന​ങ്ങളെ വിലപി​ടി​പ്പു​ള്ള​തും ആകർഷ​ക​വു​മായ വസ്‌തു​ക്ക​ളു​ടെ കൂട്ടത്തിൽ പെടു​ത്തി​യി​രി​ക്കു​ന്നു.

ഹാനിബൽ മരിച്ച്‌ നാനൂറു വർഷത്തി​നു​ശേഷം റോമൻ സാമ്രാ​ജ്യം ആനക്കൊ​മ്പി​നു​വേ​ണ്ടി​യുള്ള അഭിനി​വേ​ശത്തെ ശമിപ്പി​ക്കാൻ വടക്കൻ ആഫ്രി​ക്ക​യി​ലെ ആനകളെ കൂട്ട​ത്തോ​ടെ കൊ​ന്നൊ​ടു​ക്കി. അതിൽപ്പി​ന്നെ ആ അഭിനി​വേശം വിശേ​ഷി​ച്ചും പാശ്ചാ​ത്യ​ലോ​കത്ത്‌ കത്തിനി​ന്നി​രി​ക്കു​ന്നു. ഈ നൂറ്റാ​ണ്ടി​ന്റെ ആരംഭ​ത്തിൽ ആനക്കൊ​മ്പി​നു​വേ​ണ്ടി​യുള്ള ആവശ്യം അതിയാ​യി വർധി​ച്ചി​രി​ക്കു​ന്നു—മുൻകാ​ല​ങ്ങ​ളി​ലെ​പ്പോ​ലെ കരകൗ​ശ​ല​വ​സ്‌തു​ക്ക​ളും മതപര​മായ വസ്‌തു​ക്ക​ളും ഉണ്ടാക്കാ​നാ​യി​രു​ന്നില്ല, മറിച്ച്‌, പിയാ​നോ കീബോർഡു​കൾ ഉണ്ടാക്കാ​നാ​യി​രു​ന്നു. ആനകൾക്കാ​യുള്ള പോരാ​ട്ടം എന്ന ഇംഗ്ലീഷ്‌ പുസ്‌തകം പറയു​ന്ന​ത​നു​സ​രിച്ച്‌, 1910-ൽ മാത്ര​മാ​യി ഐക്യ​നാ​ടു​ക​ളിൽ 3,50,000 കീബോർഡു​കൾ നിർമി​ക്കാൻ ഏതാണ്ട്‌ 700 ടൺ ആനക്കൊമ്പ്‌ (13,000 ആനകളെ കൊന്ന്‌ എടുത്തത്‌) ഉപയോ​ഗി​ക്കു​ക​യു​ണ്ടാ​യി.

അനിയ​ന്ത്രിത വേട്ട

ഒന്നാം ലോക​മ​ഹാ​യു​ദ്ധത്തെ തുടർന്ന്‌ ആനക്കൊ​മ്പി​നു​വേ​ണ്ടി​യുള്ള ആവശ്യം കുറഞ്ഞു​വന്നു. വന്യജീ​വി​സം​ര​ക്ഷണം സംബന്ധിച്ച പുതിയ നിയമങ്ങൾ പാസാ​ക്ക​പ്പെട്ടു, ആനകളു​ടെ എണ്ണം വർധി​ക്കാൻ തുടങ്ങി. എങ്കിലും 1970-കളുടെ ആരംഭ​ത്തോ​ടെ വീണ്ടും ആനകളെ കൂട്ട​ത്തോ​ടെ കൊല്ലാൻ തുടങ്ങി. ഇപ്പോൾ ആനക്കൊ​മ്പി​നാ​യി മുറവി​ളി കൂട്ടി​യത്‌ ആയിടെ സമ്പന്നമായ ഏഷ്യൻ രാജ്യ​ങ്ങ​ളാ​യി​രു​ന്നു.

ഇപ്രാ​വ​ശ്യം ആഫ്രി​ക്ക​യി​ലെ ആനകൾക്കു ഭീഷണി ഉയർത്തി​യത്‌ രണ്ട്‌ ഘടകങ്ങ​ളാ​യി​രു​ന്നു. കനംകു​റഞ്ഞ സങ്കീർണ ആയുധ​ങ്ങ​ളു​ടെ വർധിച്ച ലഭ്യത​യാ​യി​രു​ന്നു ഒരു ഘടകം. അങ്ങനെ ഒരൊറ്റ ആനയെ മാത്രമല്ല, ഒരു ആനക്കൂ​ട്ട​ത്തെ​ത്തന്നെ ഒറ്റയടിക്ക്‌ വെടി​വെച്ചു വീഴ്‌ത്താൻ എളുപ്പ​മാ​യി​ത്തീർന്നു. കൊത്തു​പണി നടത്താ​നുള്ള വൈദ്യു​ത ഉപകര​ണങ്ങൾ ഉപയോ​ഗിച്ച്‌ ക്ഷണനേ​രം​കൊണ്ട്‌, വിപണി​യി​ലേ​ക്കാ​വ​ശ്യ​മായ ആനക്കൊ​മ്പു​ത്‌പ​ന്ന​ങ്ങൾക്ക്‌ രൂപം​നൽകാ​മെ​ന്നാ​യി. മുൻകാ​ല​ങ്ങ​ളിൽ, ജപ്പാൻകാ​ര​നായ ഒരു കൊത്തു​പ​ണി​ക്കാ​രൻ ഒരൊറ്റ ആനക്കൊ​മ്പിൽ കൊത്തു​പണി നടത്താൻ ഒരു വർഷം എടുത്തി​രി​ക്കാം. എങ്കിലും വൈദ്യു​ത ഉപകര​ണ​ങ്ങ​ളു​ടെ സഹായ​ത്തോ​ടെ എട്ട്‌ ആളുക​ളുള്ള ഒരു ഫാക്‌ട​റി​യിൽ 300 ആനകളു​ടെ കൊമ്പു​കൾ ഉപയോ​ഗിച്ച്‌ ഒരൊറ്റ ആഴ്‌ച​കൊണ്ട്‌ ആഭരണ​ങ്ങ​ളും ഹാങ്കോ​യും (ജപ്പാനിൽ പ്രചാ​ര​ത്തി​ലുള്ള, പേരുകൾ കുത്താ​നുള്ള സീലുകൾ) നിർമി​ക്കാ​വുന്ന സ്ഥിതി​വന്നു. ആനക്കൊ​മ്പി​നു​വേ​ണ്ടി​യുള്ള ആവശ്യം വർധി​ച്ച​തോ​ടെ അതിന്റെ വിലയും കുതി​ച്ചു​യർന്നു. പണമൊ​ഴു​കി​യത്‌ അനധി​കൃ​ത​വേ​ട്ട​ക്കാ​രു​ടെ കീശയി​ലേക്കല്ല, പിന്നെ​യോ ഇടനി​ല​ക്കാ​രു​ടെ​യും ഇടപാ​ടു​കാ​രു​ടെ​യും പക്കലേ​ക്കാ​യി​രു​ന്നെന്നു മാത്രം. ഇവരിൽ പലരും അതിസ​മ്പ​ന്ന​രാ​യി​ത്തീർന്നു.

ആനകളു​ടെ എണ്ണത്തി​ലു​ണ്ടായ നഷ്ടം ഞെട്ടി​ക്കു​ന്ന​താ​യി​രു​ന്നു. ഏതാണ്ട്‌ രണ്ടു പതിറ്റാ​ണ്ടു​കൾക്കൊണ്ട്‌ ടാൻസാ​നി​യ​യ്‌ക്ക്‌ 80 ശതമാനം ആനകൾ നഷ്ടമായി, ഭൂരി​ഭാ​ഗ​വും അനധി​കൃ​ത​വേ​ട്ട​ക്കാ​രു​ടെ കരങ്ങളാൽ. കെനി​യ​യ്‌ക്ക്‌ 85 ശതമാ​ന​വും ഉഗാണ്ടക്ക്‌ 95 ശതമാ​ന​വും ആനകൾ നഷ്ടമായി. ആദ്യ​മൊ​ക്കെ, അനധി​കൃ​ത​വേ​ട്ട​ക്കാർ മുഖ്യ​മാ​യും വളർച്ച​യെ​ത്തിയ കൊമ്പ​നാ​ന​ക​ളെ​യാ​യി​രു​ന്നു വെടി​വെച്ചു വീഴ്‌ത്തി​യി​രു​ന്നത്‌, കാരണം അവയ്‌ക്കാ​യി​രു​ന്നു ഏറ്റവും വലിയ കൊമ്പു​ക​ളു​ണ്ടാ​യി​രു​ന്നത്‌. എന്നാൽ വളർച്ച​യെ​ത്തിയ ആനകളു​ടെ എണ്ണം കുറഞ്ഞ​പ്പോൾ അനധി​കൃത നായാ​ട്ടു​കാർ കുട്ടി​ക്കൊ​മ്പ​ന്മാ​രെ​പോ​ലും വെടി​വെച്ചു വീഴ്‌ത്താൻ തുടങ്ങി. അക്കാലത്ത്‌, കൊമ്പു​ക​ളെ​ടു​ക്കാൻ പത്തുല​ക്ഷ​ത്തി​ലേറെ ആനക​ളെ​യെ​ങ്കി​ലും കൊന്നി​രി​ക്കാം. ഇതുമൂ​ലം ആഫ്രി​ക്ക​യി​ലെ ആനകളു​ടെ എണ്ണം 6,25,000 ആയി ചുരുങ്ങി.

ആഗോള നിരോ​ധ​നം

ആനക്കൊ​മ്പു വ്യാപാ​രം നിയ​ന്ത്രി​ക്കാ​നും ആനകളു​ടെ കൂട്ടക്കു​രു​തി അവസാ​നി​പ്പി​ക്കാ​നു​മുള്ള ശ്രമങ്ങൾ ദയനീ​യ​മാ​യി പരാജ​യ​പ്പെട്ടു. ഒടുവിൽ 1989 ഒക്‌ടോ​ബ​റിൽ സ്വിറ്റ്‌സർലൻഡിൽ നടന്ന സമ്മേള​ന​ത്തിൽ, വംശനാശ ഭീഷണി നേരി​ടുന്ന ജീവി​വർഗ​ങ്ങ​ളു​ടെ അന്താരാ​ഷ്‌ട്ര വിൽപ്പന സംബന്ധിച്ച കരാർ (സിഐ​ടി​ഇ​എസ്‌) അതിന്റെ അംഗരാ​ഷ്‌ട്ര​ങ്ങൾക്കി​ട​യി​ലെ ആനക്കൊ​മ്പു വ്യാപാ​രം പാടേ നിരോ​ധി​ച്ചു. ആനകളു​ടെ സംരക്ഷ​ണ​ത്തിന്‌ വൻതു​കകൾ ഇറക്കി​ക്കൊണ്ട്‌ നിരോ​ധ​നത്തെ ശക്തി​പ്പെ​ടു​ത്തി.

ആനക്കൊമ്പ്‌ നിരോ​ധനം മൂലം കരിഞ്ച​ന്ത​യിൽ അതിന്റെ വില ഉയരു​മെ​ന്നും അങ്ങനെ അനധി​കൃ​ത​വേട്ട വർധി​ക്കു​മെ​ന്നും ചിലർ പ്രവചി​ച്ചു. എന്നാൽ സംഭവി​ച്ചത്‌ വിപരീ​ത​മാണ്‌. ആനക്കൊ​മ്പി​ന്റെ വില കുത്തനെ ഇടിഞ്ഞു. മുമ്പ്‌ പണം വാരി​ക്കൂ​ട്ടി​യി​രുന്ന വിപണി​കൾ ക്ഷയിച്ചു​പോ​യി. ഉദാഹ​ര​ണ​ത്തിന്‌, ഇന്ത്യയിൽ ആനക്കൊ​മ്പി​ന്റെ മൊത്ത​ക്ക​ച്ച​വ​ട​ത്തിൽ 85 ശതമാനം ഇടിവു​ണ്ടാ​യി. ഇവിടു​ത്തെ ആനക്കൊമ്പ്‌ കരകൗശല വിദഗ്‌ധർക്ക്‌ വേറെ തൊഴിൽ കണ്ടെ​ത്തേ​ണ്ടി​വന്നു. അനധി​കൃ​ത​വേ​ട്ട​യിൽ ശ്രദ്ധേ​യ​മായ കുറവു​ണ്ടാ​യി. നിരോ​ധ​ന​ത്തി​നു മുമ്പ്‌ കെനി​യ​യിൽ അനധി​കൃ​ത​വേ​ട്ട​ക്കാർ ഓരോ വർഷവും 2,000 ആനക​ളെ​യെ​ങ്കി​ലും കൊന്നി​രു​ന്നു. 1995-ഓടെ ഈ സംഖ്യ 35 ആയി കുറയു​ക​യു​ണ്ടാ​യി. തന്നെയു​മല്ല, കെനി​യ​യി​ലെ ആനകളു​ടെ എണ്ണം 1989-ൽ 19,000 ആയിരു​ന്നത്‌ ഇന്ന്‌ ഏതാണ്ട്‌ 26,000 ആയി ഉയർന്നി​രി​ക്കു​ന്നു.

ഇക്കാര​ണ​ങ്ങൾ നിമിത്തം ലണ്ടൻ ആസ്ഥാന​മാ​ക്കി​യുള്ള പരിസ്ഥി​തി പര്യ​വേക്ഷണ ഏജൻസി ആനക്കൊ​മ്പി​ന്മേ​ലുള്ള നിരോ​ധ​നത്തെ “അടുത്ത​കാ​ലത്തെ പരിരക്ഷണ ചരി​ത്ര​ത്തി​ലെ വൻവി​ജ​യ​ങ്ങ​ളി​ലൊന്ന്‌” എന്ന്‌ പ്രകീർത്തി​ക്കു​ക​യു​ണ്ടാ​യി. എങ്കിലും എല്ലാവ​രും, വിശേ​ഷിച്ച്‌ തെക്കൻ ആഫ്രി​ക്ക​യി​ലു​ള്ളവർ ഈ ആഹ്ലാദം പങ്കിടു​ന്നില്ല.

തെക്കൻ ആഫ്രി​ക്ക​യി​ലെ ആനകൾ

തെക്കൻ ആഫ്രിക്കൻ രാജ്യ​ങ്ങ​ളിൽ 2,00,000-ത്തിലേറെ ആനകൾ—ആഫ്രിക്കൻ ആനകളു​ടെ മൊത്തം സംഖ്യ​യു​ടെ മൂന്നി​ലൊന്ന്‌—ഉണ്ട്‌. ഇത്‌ ഭാഗി​ക​മാ​യി, ഫലപ്ര​ദ​മായ പരിരക്ഷണ നയങ്ങൾ കാരണ​വും ഭാഗി​ക​മാ​യി, പൂർവ ആഫ്രി​ക്ക​യി​ലെ​യും മധ്യ ആഫ്രി​ക്ക​യി​ലെ​യും ആനക്കൂ​ട്ട​ങ്ങളെ വകവരു​ത്തിയ മാരകാ​യു​ധ​ങ്ങ​ളേ​ന്തിയ മിലീ​ഷ്യ​കൾ ഈ രാജ്യ​ങ്ങ​ളിൽ ഇല്ലാ​തെ​പോ​യതു കാരണ​വു​മാണ്‌.

എങ്കിലും ആനകളു​ടെ എണ്ണം വർധി​ക്കവേ ആനകളും ഗ്രാമ​വാ​സി​ക​ളും തമ്മിൽ മിക്ക​പ്പോ​ഴും ഏറ്റുമു​ട്ട​ലു​ക​ളു​ണ്ടാ​കാ​റുണ്ട്‌. വളർച്ച​യെ​ത്തിയ ഒരാന വലിയ തീറ്റി​പ്രി​യ​നാണ്‌. ദിവസ​ത്തിൽ 300 കിലോ​യി​ലേറെ ആഹാരം അവൻ അകത്താ​ക്കി​യേ​ക്കാം. അയൽപ​ക്ക​ത്തെ​ങ്ങാ​നും ഒരാന​യു​ണ്ടെ​ങ്കിൽ നിങ്ങൾ ഇക്കാര്യം മനസ്സി​ലാ​ക്കി​യി​രി​ക്കും.

സിംബാ​ബ്‌വേ ആസ്ഥാന​മാ​ക്കി​യുള്ള ആഫ്രിക്ക റിസോ​ഴ്‌സസ്‌ ട്രസ്റ്റ്‌ പറയുന്നു: “ആഫ്രിക്കൻ ഗ്രാമ​ങ്ങ​ളിൽ വസിക്കുന്ന മിക്കവ​രും ആനയെ ഭയത്തോ​ടും സംശയ​ത്തോ​ടും ശത്രു​ത​യോ​ടും കൂടെ​യാ​ണു വീക്ഷി​ക്കു​ന്നത്‌. വിളകൾ തിന്നു​മു​ടി​ച്ചു​കൊ​ണ്ടോ വളർത്തു​മൃ​ഗ​ങ്ങ​ളെ​യും മറ്റും ചവിട്ടി​ക്കൊ​ന്നു​കൊ​ണ്ടോ ആനകൾക്ക്‌ മനുഷ്യ​രു​ടെ ഉപജീ​വ​ന​മാർഗം മണിക്കൂ​റു​കൾക്കകം നശിപ്പി​ക്കാൻ സാധി​ക്കും. വീടു​ക​ളും സ്‌കൂ​ളു​ക​ളും കന്നുകാ​ലി​ത്തൊ​ഴു​ത്തു​ക​ളും ഫലവൃ​ക്ഷ​ങ്ങ​ളും ചിറക​ളും അവ നശിപ്പി​ക്കു​ന്നു, മണ്ണ്‌ ഇളക്കി മറിക്കു​ന്നു. ആനകൾ വരുത്തി​വെച്ച നഷ്ടങ്ങ​ളെ​ക്കു​റി​ച്ചുള്ള റിപ്പോർട്ടു​കൾ പ്രാ​ദേ​ശിക ദിനപ്പ​ത്ര​ങ്ങ​ളിൽ ദിവസ​വും കാണാം.”

ആനകളു​ടെ ഗണ്യമാ​യൊ​രു സംഖ്യയെ നിലനിർത്തി​പ്പോ​രു​ന്ന​തിൽ തെക്കൻ ആഫ്രിക്കൻ രാഷ്‌ട്രങ്ങൾ അഭിമാ​നം​കൊ​ള്ളു​ന്നു. എന്നാൽ പരിര​ക്ഷണം പണച്ചെ​ല​വുള്ള സംഗതി​യാണ്‌. തന്നെയു​മല്ല മറ്റ്‌ ആഫ്രിക്കൻ രാജ്യ​ങ്ങ​ളി​ലെ പ്രശ്‌ന​ങ്ങൾക്ക്‌ തങ്ങൾ പിഴ​യൊ​ടു​ക്കേ​ണ്ട​വ​രാ​ണെന്ന്‌ അവർ കരുതു​ന്നില്ല. നിയ​ന്ത്രിത ആനക്കൊ​മ്പു വ്യാപാ​രം, പരിരക്ഷണ ശ്രമങ്ങൾക്കു​വേണ്ട പണം നൽകു​മെ​ന്നും സംഭവിച്ച നഷ്ടം നികത്താൻ ഗ്രാമീണ കർഷകരെ സഹായി​ക്കു​മെ​ന്നും അവർ ന്യായ​വാ​ദം ചെയ്യുന്നു.

ആനക്കൊ​മ്പു ശേഖരം

ആനകൾ വിഹരി​ക്കുന്ന രാജ്യ​ങ്ങ​ളിൽ ആനക്കൊമ്പ്‌ കുന്നു​കൂ​ടു​ന്നു. ഈ കൊമ്പു​കൾ ലഭിക്കു​ന്നത്‌, എണ്ണം കുറയ്‌ക്കാൻവേണ്ടി നിയമ​പ​ര​മാ​യി കൊല്ലുന്ന ആനകളിൽനി​ന്നും സ്വാഭാ​വിക രീതി​യിൽ ചാകുന്ന ആനകളിൽനി​ന്നു​മാ​കാം. അല്ലെങ്കിൽ അവ അനധി​കൃത പൂഴ്‌ത്തി​വെ​പ്പു​കാ​രിൽനിന്ന്‌ കണ്ടു​കെ​ട്ടി​യ​വ​യു​മാ​കാം. ഈ ആനക്കൊ​മ്പു​കൾക്കൊണ്ട്‌ എന്താണു ചെയ്യു​ന്നത്‌?

കെനി​യ​യിൽ ആനക്കൊ​മ്പു​കൾ കത്തിച്ചു​ക​ള​യു​ന്നു. 1989 ജൂലൈ മുതൽ കെനിയ കോടി​ക്ക​ണ​ക്കി​നു രൂപ വിലവ​രുന്ന ആനക്കൊമ്പ്‌ പരസ്യ​മാ​യി കത്തിച്ചി​രി​ക്കു​ന്നു, നഷ്ടം നികത്താ​നുള്ള ധനസഹാ​യം മറ്റെങ്ങു​നി​ന്നും നേരിട്ട്‌ ലഭിക്കാ​തി​രു​ന്നി​ട്ടു​പോ​ലും. 1992-ൽ സാംബി​യ​യും അതിന്റെ ആനക്കൊ​മ്പു ശേഖരം കത്തിക്കു​ക​യു​ണ്ടാ​യി. സന്ദേശം വ്യക്തമാണ്‌: കെനി​യ​യ്‌ക്കും സാംബി​യ​യ്‌ക്കും ആനക്കൊ​മ്പു വ്യാപാ​ര​ത്തിൽ പങ്കാളി​ക​ളാ​കാൻ ആഗ്രഹ​മി​ല്ലാ​യി​രു​ന്നു.

മറ്റു രാജ്യങ്ങൾ തങ്ങളുടെ ആനക്കൊ​മ്പു ശേഖരങ്ങൾ വരും​കാ​ല​ത്തേ​ക്കുള്ള നിക്ഷേ​പ​മാ​യി സൂക്ഷി​ച്ചി​രി​ക്കു​ന്നു. 170 കോടി രൂപയു​ടെ, മൊത്തം 462 ടൺ തൂക്കം വരുന്ന ആനക്കൊ​മ്പു​കൾ ആഫ്രിക്കൻ രാജ്യങ്ങൾ ഇപ്പോൾ ശേഖരി​ച്ചു​വെ​ച്ചി​ട്ടു​ണ്ടെന്ന്‌ ലോക​ത്തി​ലെ ഏറ്റവും വലിയ വന്യജീ​വി നിരീക്ഷണ സംഘട​ന​യായ ട്രാഫിക്‌ കണക്കാ​ക്കു​ന്നു. ജപ്പാനു​മാ​യി വ്യാപാ​രം നടത്താ​നുള്ള അനുവാ​ദം ഇപ്പോൾ ലഭിച്ചി​രി​ക്കുന്ന ബോട്‌സ്വാ​ന, നമീബിയ, സിംബാ​ബ്‌വേ എന്നീ മൂന്നു രാജ്യ​ങ്ങ​ളു​ടെ കൈവശം 120 ടൺ ആനക്കൊ​മ്പുണ്ട്‌. അതു​കൊണ്ട്‌ പലരും ഇപ്രകാ​രം ചോദി​ക്കു​ന്നു: ‘സാമ്പത്തി​ക​മാ​യി ബുദ്ധി​മു​ട്ട​നു​ഭ​വി​ക്കുന്ന ഒരു ദേശത്ത്‌ ആനക്കൊ​മ്പു​കൾ പണ്ടകശാ​ല​ക​ളിൽ പൊടി​പി​ടി​ച്ചി​രി​ക്കാൻ അനുവ​ദി​ക്ക​പ്പെ​ടു​ന്നത്‌ എന്തു​കൊ​ണ്ടാണ്‌? അവ വിറ്റ്‌, ആ പണം പരിരക്ഷണ ശ്രമങ്ങൾക്കാ​യി തിരി​ച്ചു​വി​ട​രു​തോ?’

ഉത്‌ക​ണ്‌ഠകൾ നിലനിൽക്കു​ന്നു

ആനക്കൊ​മ്പു വിൽപ്പ​ന​യു​ടെ​മേൽ ഏർപ്പെ​ടു​ത്തി​യി​രി​ക്കുന്ന നിരോ​ധ​ന​ത്തിന്‌ അയവു വരുത്തു​ന്നത്‌ ആനകളു​ടെ പരിര​ക്ഷ​ണ​ത്തി​നു സഹായ​ക​മാ​കു​മെന്ന്‌ ചില ആഫ്രിക്കൻ രാഷ്‌ട്രങ്ങൾ വാദി​ക്കു​മ്പോൾ, വീണ്ടും ആരംഭി​ച്ചി​രി​ക്കുന്ന അനധി​കൃ​ത​വേട്ട തടയണ​മെ​ങ്കിൽ പൂർണ നിരോ​ധ​നം​തന്നെ ഏർപ്പെ​ടു​ത്ത​ണ​മെന്ന്‌ മറ്റുള്ളവ ഉറച്ചു വിശ്വ​സി​ക്കു​ന്നു. ആനക്കൊ​മ്പു വ്യാപാ​രം എത്ര കർശന​മാ​യി നിയ​ന്ത്രി​ക്കു​ന്നു എന്നതിനെ ചുറ്റി​പ്പ​റ്റി​യാണ്‌ ഉത്‌കണ്‌ഠ മുഴുവൻ. അനധി​കൃ​ത​മാ​യി ശേഖരിച്ച ആനക്കൊ​മ്പു​കൾ നിയമാ​നു​സൃത വാണി​ജ്യ​ത്തി​ലേക്കു പ്രവേ​ശി​ക്കാൻ വിപണന സംവി​ധാ​നങ്ങൾ പഴുതു​കൾ നൽകു​മോ? അമിത​ലാ​ഭം പ്രതീ​ക്ഷി​ച്ചുള്ള അനധി​കൃ​ത​വേ​ട്ട​യു​ടെ കാര്യ​മോ? നിരോ​ധ​ന​ത്തിന്‌ അയവു വരുത്തു​ന്ന​തു​മൂ​ലം, ആനകൾ കൊല്ല​പ്പെ​ടു​ക​യും ഭാവി​യിൽ നിരോ​ധ​ന​ത്തിന്‌ കൂടുതൽ അയവു വരു​മെന്നു പ്രതീ​ക്ഷി​ക്കുന്ന ആളുകൾ അവ പൂഴ്‌ത്തി​വെ​ക്കു​ക​യും ചെയ്യു​മോ?

ആഫ്രി​ക്ക​യിൽ തോക്കു​കൾ മുമ്പെ​ന്ന​ത്തെ​ക്കാ​ള​ധി​കം സുലഭ​മാ​ണെ​ന്നു​ള്ള​തും ഉത്‌കണ്‌ഠ വർധി​പ്പി​ക്കു​ന്നു. അവിടെ നടക്കുന്ന ആഭ്യന്ത​ര​യു​ദ്ധങ്ങൾ മൂലം ഓട്ടോ​മാ​റ്റിക്ക്‌ തോക്കു​കൾ ഇന്ന്‌ ജനങ്ങളു​ടെ കൈക​ളി​ലും എത്തിയി​രി​ക്കു​ന്നു. കടുത്ത സാമ്പത്തിക ഞെരുക്കം അനുഭ​വി​ക്കുന്ന ഇവർ പണമു​ണ്ടാ​ക്കാൻ അവ ഉപയോ​ഗി​ക്കു​ന്ന​തി​നു മടിക്കു​ന്നില്ല. ഈസ്റ്റ്‌ ആഫ്രിക്കൻ വൈൽഡ്‌ ലൈഫ്‌ സൊ​സൈ​റ്റി​യു​ടെ ഡയറക്‌ട​റായ നെഹെമയ റോട്ടിച്ച്‌ എഴുതി: “[പുനരാ​രം​ഭി​ക്ക​പ്പെട്ട വ്യാപാ​രം നിമിത്തം] ആനക്കൊമ്പ്‌ വീണ്ടും വിപണി​യി​ലെ​ത്തി​യി​രി​ക്കു​ന്ന​തി​നാൽ ഈ തോക്കു​കൾ ആനകൾക്കു​നേരെ തിരി​യു​മെ​ന്ന​തി​നു സംശയ​മില്ല—നഗരത്തി​ലെ ഒരു ബാങ്ക്‌ കൊള്ള​യ​ടി​ക്കു​ന്ന​തി​നെ​ക്കാൾ ഏറെ എളുപ്പം വിസ്‌തൃ​ത​മായ ഒരു പ്രദേ​ശ​ത്തു​വെച്ച്‌ ഒരു ആനയെ വെടി​വെച്ചു വീഴ്‌ത്തു​ന്ന​താ​ണ​ല്ലോ.”

അനധി​കൃ​ത​വേട്ട തടയാ​നുള്ള നടപടി​കൾ ചെല​വേ​റി​യ​വ​യാ​ണെന്നു മാത്രമല്ല ദുഷ്‌ക​ര​വു​മാ​ണെ​ന്ന​താണ്‌ മറ്റൊരു പ്രശ്‌നം. ആനകൾ വിഹരി​ക്കുന്ന വിശാ​ല​മായ പ്രദേ​ശങ്ങൾ നിരീ​ക്ഷ​ണ​വി​ധേ​യ​മാ​ക്കാൻ വളരെ​യ​ധി​കം സാമ്പത്തി​ക​വി​ഭ​വങ്ങൾ ആവശ്യ​മാണ്‌. പൂർവ ആഫ്രി​ക്ക​യിൽ ഇവ കണ്ടെത്താൻ പ്രയാ​സ​മാണ്‌.

ആനകൾക്ക്‌ എന്തു ഭാവി?

ആനക്കൊമ്പ്‌ വ്യാപാ​ര​ത്തി​ന്മേ​ലുള്ള നിരോ​ധ​ന​ത്തിന്‌ അയവു വരുത്താ​നുള്ള തീരു​മാ​ന​ത്തി​ന്റെ അനന്തര​ഫ​ലങ്ങൾ എന്തായി​രി​ക്കു​മെന്ന്‌ കാത്തി​രു​ന്നു കാണേ​ണ്ടി​യി​രി​ക്കു​ന്നു. ശ്രമങ്ങ​ളെ​ല്ലാം വിജയി​ച്ചാ​ലും ആനകൾക്കു നേരെ​യുള്ള ഭീഷണി ഇല്ലാതാ​കില്ല. പെരു​കുന്ന ജനസം​ഖ്യ​യും ആനകൾക്കൊ​രു ഭീഷണി​യാണ്‌. കാരണം ആളുകൾക്ക്‌ കൃഷി​ചെ​യ്യാ​നും മറ്റും സ്ഥലം ആവശ്യ​മാണ്‌. തെക്കൻ ആഫ്രി​ക്ക​യിൽ മാത്ര​മാ​യി, കൂടു​ത​ലും കൃഷി ചെയ്യാ​നാ​യി, വർഷം​തോ​റും 20 ലക്ഷം ഏക്കർ വനം വെട്ടി​ത്തെ​ളി​ക്കു​ന്നു—ഇസ്രാ​യേ​ലി​ന്റെ വലുപ്പ​ത്തി​ന്റെ പകുതി​യോ​ളം പ്രദേശം എന്നർഥം. ജനങ്ങളാ​കുന്ന സമു​ദ്ര​ത്തി​ന്റെ വിസ്‌തൃ​തി കൂടി​ക്കൊ​ണ്ടി​രി​ക്കവേ, ആനകളാ​കുന്ന ദ്വീപു​കൾ ചുരു​ങ്ങി​ക്കൊ​ണ്ടി​രി​ക്കു​മെന്നു തീർച്ച.

വേൾഡ്‌ വാച്ച്‌ മാഗസിൻ പറയുന്നു: “ഈ പ്രശ്‌ന​ത്തെ​ക്കു​റിച്ച്‌ പഠിച്ചി​ട്ടു​ള്ള​വ​രെ​ല്ലാം സമ്മതി​ക്കുന്ന ഒരു കാര്യ​മുണ്ട്‌: ആഫ്രിക്കൻ ആനകൾക്ക്‌ ഒരു ഇരുണ്ട ഭാവി​യാ​ണു​ള്ളത്‌. [ജനസം​ഖ്യാ​വർധ​നവു മൂലമു​ണ്ടാ​കുന്ന] ആവാസ പ്രതി​സന്ധി, പല ആനകളും ഒരു വിധത്തി​ല​ല്ലെ​ങ്കിൽ മറ്റൊരു വിധത്തിൽ വളർച്ച​യെ​ത്തു​ന്ന​തി​നു മുമ്പ്‌ ചെരി​യാൻ ഇടയാ​ക്കും. നിയമാ​നു​സൃ​ത​മാ​യി വേട്ടയാ​ടു​ക​യോ എണ്ണം കുറയ്‌ക്കാൻ കൊല്ലു​ക​യോ—അല്ലെങ്കിൽ അനധി​കൃത വേട്ടക്കാർ കൊല്ലു​ക​യോ—ചെയ്‌തി​ല്ലെ​ങ്കി​ലും അവ പട്ടിണി​കി​ടന്നു ചാകും.”

ഈ ഇരുണ്ട ഭാവി പ്രതീക്ഷ ആനയുടെ സ്രഷ്ടാ​വായ യഹോ​വ​യാം ദൈവ​ത്തി​ന്റെ വീക്ഷണ​ത്തോ​ടു ചേർച്ച​യി​ലല്ല. തന്റെ സൃഷ്ടി​ക​ളെ​ക്കു​റിച്ച്‌ ദൈവ​ത്തി​നുള്ള കരുതൽ യേശു​വി​ന്റെ ഈ വാക്കു​ക​ളിൽ പ്രകട​മാണ്‌: “രണ്ടു കാശിന്നു അഞ്ചു കുരി​കി​ലി​നെ വില്‌ക്കു​ന്നി​ല്ല​യോ? അവയിൽ ഒന്നി​നെ​പ്പോ​ലും ദൈവം മറന്നു​പോ​കു​ന്നില്ല.” (ലൂക്കൊസ്‌ 12:6) ഒരു ചെറിയ കുരി​കി​ലി​നെ​പ്പോ​ലും ദൈവം മറന്നു​പോ​കു​ന്നില്ല എങ്കിൽ വലിയ ആനയുടെ ദുരവ​സ്ഥയെ അവൻ അവഗണി​ക്കു​ക​യില്ല എന്ന്‌ നമുക്ക്‌ ഉറപ്പു​ണ്ടാ​യി​രി​ക്കാൻ കഴിയും.

[16-ാം പേജിലെ ചതുരം]

ആനക്കൊമ്പിനെ സംബന്ധിച്ച്‌

“ആനക്കൊമ്പ്‌ ഒരു മനോഹര വസ്‌തു​വാ​ണെ​ന്നു​ള്ള​തി​നു സംശയ​മില്ല. ആഭരണ​ങ്ങ​ളു​ണ്ടാ​ക്കാ​നും കൊത്തു​പ​ണി​കൾ നടത്താ​നും ഉപയോ​ഗി​ക്ക​പ്പെ​ടുന്ന മറ്റു വസ്‌തു​ക്ക​ളിൽനി​ന്നു വ്യത്യ​സ്‌ത​മാ​യി അതി​നൊ​രു തിളക്ക​വും കാന്തി​യു​മുണ്ട്‌. എന്നാൽ പ്രസ്‌തുത വസ്‌തു ഉപയോ​ഗി​ക്കു​മ്പോൾ അത്‌ ഒരാന​യു​ടെ കൊമ്പാ​ണെന്ന കാര്യം പലരും വിസ്‌മ​രി​ക്കു​ന്നു എന്നാണ്‌ എനിക്കു തോന്നു​ന്നത്‌. ഐവറി എന്ന പദം അത്‌ ആനക്കൊ​മ്പാ​ണെന്ന ആശയം നമ്മുടെ മനസ്സിൽനി​ന്നു വേർപെ​ടു​ത്തി​ക്ക​ള​യു​ന്നു. ചിലർ വിവേ​ച​ന​ശൂ​ന്യ​മാ​യി അതിനെ മരതക​ക്ക​ല്ലി​ന്റെ​യും തേക്കി​ന്റെ​യും കരിന്താ​ളി​യു​ടെ​യും തൃണമ​ണി​യു​ടെ​യും, സ്വർണ​ത്തി​ന്റെ​യും വെള്ളി​യു​ടെ​യും​പോ​ലും, കൂട്ടത്തിൽ പെടു​ത്തു​ന്നു. എന്നാൽ ഒരു വലിയ വ്യത്യാ​സ​മുണ്ട്‌: മറ്റു വസ്‌തു​ക്കൾ ഒരു മൃഗത്തിൽനി​ന്നു ലഭിച്ചതല്ല; എന്നാൽ ഒരു ആനക്കൊമ്പ്‌, ഉളിപ്പ​ല്ലി​നു രൂപമാ​റ്റം സംഭവി​ച്ച​താണ്‌. ആനക്കൊ​മ്പിൽ തീർത്ത മനോ​ഹ​ര​മായ ഒരു വള കൈക​ളി​ല​ണി​യു​ക​യോ കൊത്തു​പണി ചെയ്‌ത ലോല​മായ ഒരു വസ്‌തു കൈയിൽ പിടി​ക്കു​ക​യോ ചെയ്യു​മ്പോൾ ആ വസ്‌തു, ആഹാരം കഴിക്കാ​നും കുഴി​ക്കാ​നും കുത്താ​നും കളിക്കാ​നും പോര​ടി​ക്കാ​നും കൊമ്പു​കൾ ഉപയോ​ഗി​ച്ചി​രുന്ന ഒരാന​യിൽനിന്ന്‌ ലഭിച്ച​താ​ണെ​ന്നും ആ വസ്‌തു കൈയിൽ കിട്ടാൻ തക്കവണ്ണം ആ ആന കൊല്ല​പ്പെ​ട​ണ​മാ​യി​രു​ന്നെ​ന്നും തിരി​ച്ച​റി​യാൻ ഒരുവൻ തന്റെ മനസ്സിനെ വിശാ​ല​മാ​ക്കണം.”—സിന്ത്യ മൊസ്‌ എഴുതിയ ആന സ്‌മര​ണകൾ (ഇംഗ്ലീഷ്‌).

[19-ാം പേജിലെ ചതുരം]

ആനകളെ സംബന്ധിച്ച്‌

ആനകൾ വലിയ കായബ​ല​മു​ള്ള​വ​യാണ്‌. അവയ്‌ക്കു ദേഷ്യം വന്നാൽ ഭൂമി വിറയ്‌ക്കും. തുമ്പി​ക്കൈ​കൊണ്ട്‌ നിങ്ങളെ പൊക്കി​യെ​ടുത്ത്‌ ഒരു കല്ല്‌ വായു​വി​ലേക്ക്‌ ചുഴറ്റി​യെ​റി​യു​ന്ന​തു​പോ​ലെ എറിയാൻ ഒരാന​യ്‌ക്കു കഴിയും. എന്നിരു​ന്നാ​ലും അത്‌ തുമ്പി​ക്കൈ​കൊണ്ട്‌ നിങ്ങളെ തലോ​ടു​ക​യോ നിങ്ങളു​ടെ കൈക​ളിൽനിന്ന്‌ സൗമ്യ​ത​യോ​ടെ ആഹാരം വാങ്ങി​ക്കു​ക​യോ ചെയ്യും. ആനകൾ ബുദ്ധി​ശാ​ലി​ക​ളും നിഗൂ​ഢ​സ്വ​ഭാ​വ​മു​ള്ള​വ​യും തമാശ​ക്കാ​രു​മാണ്‌. അവ ശക്തമായ കുടുംബ വിശ്വ​സ്‌തത പ്രകട​മാ​ക്കു​ന്നു, മുറി​വേൽക്കു​മ്പോൾ പരസ്‌പരം പരിപാ​ലി​ക്കു​ന്നു, തങ്ങൾക്കി​ട​യിൽ ആർക്കെ​ങ്കി​ലും രോഗ​മു​ണ്ടാ​കു​മ്പോൾ പരിച​രി​ക്കു​ന്നു, കുടും​ബാം​ഗ​ത്തി​ന്റെ മരണ​ത്തോ​ടു പ്രതി​ക​രി​ക്കു​ന്നു. ഒരാന, മറ്റ്‌ മൃഗങ്ങ​ളു​ടെ അവശി​ഷ്ടങ്ങൾ ഗൗനി​ക്കാ​റി​ല്ലെ​ങ്കി​ലും മറ്റ്‌ ആനകളു​ടെ അസ്ഥികൾ തിരി​ച്ച​റി​യു​ക​യും അവ ചിതറി​ച്ചി​ടു​ക​യോ കുഴി​ച്ചി​ടു​ക​യോ ചെയ്‌തു​കൊണ്ട്‌ പ്രതി​ക​രി​ക്കു​ക​യും ചെയ്യുന്നു.

[18-ാം പേജിലെ ചിത്രം]

രണ്ട്‌ രാജ്യങ്ങൾ കൈവ​ശ​മുള്ള ആനക്കൊമ്പ്‌ കത്തിച്ചു​ക​ള​ഞ്ഞി​രി​ക്കു​ന്നു; മറ്റുചി​ല​വ​യാ​കട്ടെ അതൊരു നിക്ഷേ​പ​മാ​യി സൂക്ഷി​ച്ചി​രി​ക്കു​ന്നു