ലോകത്തെ വീക്ഷിക്കൽ

നക്ഷത്ര​ങ്ങളെ എണ്ണൽ

രാത്രി​യിൽ നക്ഷത്രങ്ങൾ നിറഞ്ഞ ആകാശ​ത്തേക്ക്‌ ഉറ്റു നോക്കി എത്ര നക്ഷത്ര​ങ്ങളെ കാണാൻ കഴിയു​മെന്നു നിങ്ങൾ അതിശയം കൂറി​യി​ട്ടു​ണ്ടോ? അടുത്ത കാലത്ത്‌, സ്‌കൈ & ടെലസ്‌കോപ്പ്‌ എന്ന മാഗസിൻ യുഗപ്പ​ഴ​ക്ക​മുള്ള ഈ ചോദ്യം കൈകാ​ര്യം ചെയ്യു​ക​യു​ണ്ടാ​യി. അതിന്റെ ഉത്തരം, ഒരുവൻ വിചാ​രി​ച്ചേ​ക്കാ​വു​ന്ന​തു​പോ​ലെ, അത്ര നിസ്സാ​രമല്ല. ജ്യോ​തി​ശ്ശാ​സ്‌ത്ര പരാമർശ​ഗ്ര​ന്ഥങ്ങൾ പറയു​ന്ന​ത​നു​സ​രിച്ച്‌, വടക്കൻ അക്ഷാം​ശ​ങ്ങ​ളി​ലെ ശരിക്കും ഇരുണ്ട ഒരു ചുറ്റു​പാ​ടിൽ സാധാരണ ഒരു കാഴ്‌ച​ക്കാ​രന്‌ 2,862 നക്ഷത്ര​ങ്ങളെ കാണാം. എന്നാൽ, ഈ നക്ഷത്ര​ങ്ങ​ളെ​ല്ലാം​തന്നെ ഒരു നിർദിഷ്ട സമയത്ത്‌ ആ പ്രദേ​ശത്തെ ചക്രവാ​ള​ത്തി​നു മുകളിൽ ഉള്ളവയല്ല; പലതും ഉദിക്കു​ക​യും അസ്‌ത​മി​ക്കു​ക​യും ചെയ്യുന്നു. കൂടു​ത​ലാ​യി, നേരെ തലയ്‌ക്കു മീതെ അനായാ​സം ദൃശ്യ​മാ​കുന്ന പല നക്ഷത്ര​ങ്ങ​ളും അവ ചക്രവാ​ള​ത്തിന്‌ അടുത്താ​യി​രി​ക്കു​മ്പോൾ അദൃശ്യ​മാണ്‌. അതിന്റെ കാരണം സമു​ദ്ര​നി​ര​പ്പിൽനിന്ന്‌ ഉയരം കുറഞ്ഞ അത്തരം പ്രദേ​ശ​ങ്ങ​ളിൽ, കാഴ്‌ച​ക്കാ​രന്റെ കണ്ണുക​ളിൽ നക്ഷത്ര​വെ​ളി​ച്ചം പതിക്കു​ന്ന​തിന്‌ ഭൂമി​യു​ടെ അന്തരീ​ക്ഷ​ത്തിൽക്കൂ​ടി അതിനു ബഹുദൂ​രം സഞ്ചരി​ക്കേ​ണ്ട​തുണ്ട്‌ എന്നതാണ്‌. 40 ഡിഗ്രി വടക്കേ അക്ഷാം​ശ​ത്തി​ലുള്ള ഒരു നിരീ​ക്ഷ​കന്‌ വർഷം മുഴു​വ​നും ഏതാണ്ട്‌ 1,809 നക്ഷത്രങ്ങൾ കാണാ​മെന്ന്‌ സ്‌കൈ & ടെലസ്‌കോപ്പ്‌ നിഗമനം ചെയ്യുന്നു.

ഐക്യ​നാ​ടു​ക​ളി​ലെ മുഖ്യ ഘാതകർ

ഐക്യ​നാ​ടു​ക​ളി​ലെ മരണത്തി​ന്റെ മുഖ്യ കാരണങ്ങൾ എന്തെല്ലാ​മാണ്‌? ദ ജേണൽ ഓഫ്‌ ദി അമേരി​ക്കൻ മെഡിക്കൽ അസ്സോ​സി​യേ​ഷ​നിൽ പ്രസി​ദ്ധീ​ക​രിച്ച ഒരു പഠനം, ഓരോ വർഷവും മരണങ്ങൾക്കു നിദാ​ന​മായ ബാഹ്യ​മായ അഥവാ ജനിത​ക​പ​ര​മ​ല്ലാത്ത മുഖ്യ ഘടകങ്ങൾ അന്വേ​ഷി​ക്കു​ക​യു​ണ്ടാ​യി. സ്ഥിതി​വി​വ​ര​ക്ക​ണ​ക്കു​കൾ വ്യാപ​ക​മാ​യി സർവേ നടത്തി​യ​ശേഷം പഠനത്തി​ന്റെ നിഗമനം ഇതായി​രു​ന്നു, 1990-ൽ ഐക്യ​നാ​ടു​ക​ളി​ലു​ണ്ടായ 21,48,000 മരണങ്ങ​ളിൽ ഏതാണ്ട്‌ 4,00,000 മരണങ്ങൾ പുകയില നിമി​ത്ത​മാ​യി​രു​ന്നു; 3,00,000 ഭക്ഷണ-വ്യായാമ ശീലങ്ങൾ നിമിത്തം; 1,00,000 മദ്യം നിമിത്തം; 90,000 സൂക്ഷ്‌മാ​ണു​ക്കൾ മുഖാ​ന്തരം; 60,000 പരിസ്ഥി​തി​യെ മലിനീ​ക​രി​ക്കു​ക​യോ ഭക്ഷണ​ത്തെ​യോ വെള്ള​ത്തെ​യോ മലീമ​സ​മാ​ക്കു​ക​യോ ചെയ്യുന്ന വിഷലിപ്‌ത ഘടകങ്ങ​ളാൽ; 35,000 തോക്കു​ക​ളാൽ; 30,000 ലൈം​ഗിക ദുഷ്‌പെ​രു​മാ​റ്റ​ത്താൽ; 25,000 മോ​ട്ടോർ വാഹന​ങ്ങ​ളാൽ; 20,000 നിയമ​വി​രു​ദ്ധ​മായ മയക്കു​മ​രു​ന്നു​പ​യോ​ഗ​ത്താൽ. ഇവയെ​ല്ലാം കണക്കി​ലെ​ടു​ത്താൽ, ഒരു വർഷത്തെ മൊത്തം മരണങ്ങ​ളു​ടെ പകുതി​ക്കു നിദാനം ഇത്തരം ബാഹ്യ​മായ ഘടകങ്ങ​ളാ​യി​രു​ന്നു​വെന്ന്‌ ആ പഠനം കണ്ടെത്തി.

കുട്ടി​ക​ളും യുദ്ധവും

സേവ്‌ ദ ചിൽഡ്രൻ എന്ന ബ്രിട്ടീഷ്‌ ദുരി​താ​ശ്വാ​സ ഏജൻസി​യു​ടെ അടുത്ത കാലത്തെ ഒരു റിപ്പോർട്ടു പറയു​ന്ന​ത​നു​സ​രിച്ച്‌, കഴിഞ്ഞ പത്തു വർഷമാ​യി പട്ടാള​ക്കാ​രെ​ക്കാ​ള​ധി​കം സാധാരണ പൗരൻമാർക്ക്‌—പ്രത്യേ​കിച്ച്‌ കുട്ടി​കൾക്ക്‌—യുദ്ധം വളരെ അപകട​ക​ര​മാ​യി​ത്തീർന്നി​രി​ക്കു​ക​യാണ്‌. ആ ഏജൻസി​യു​ടെ വിദേശ വക്താവ്‌ പിൻവ​രു​ന്ന​പ്ര​കാ​രം പറഞ്ഞതാ​യി ഒരു അസോ​ഷി​യേ​റ്റഡ്‌ പ്രസ്സ്‌ റിപ്പോർട്ടിൽ ഉദ്ധരി​ക്കു​ക​യു​ണ്ടാ​യി: “യുദ്ധം നിമിത്തം മരിക്കുന്ന 10 പേരിൽ ഒമ്പതു പേരും സാധാരണ പൗരൻമാ​രാണ്‌. കുട്ടി​ക​ളാണ്‌ മിക്ക​പ്പോ​ഴും അതിന്റെ മുഖ്യ ഇരകൾ—വാസ്‌ത​വ​ത്തിൽ യുദ്ധം നിമിത്തം മരിക്കാൻ പട്ടാള​ക്കാ​രെ​ക്കാൾ വളരെ​യ​ധി​കം സാധ്യത കൂടു​ത​ലു​ള്ളത്‌ അവർക്കാണ്‌.” 25 പേജുള്ള റിപ്പോർട്ട്‌ ലോക​ത്തി​ലെ കുട്ടി​ക​ളു​ടെ കഴിഞ്ഞ ദശകത്തി​ലു​ണ്ടായ മരണം കണക്കാക്കി, പിൻവ​രുന്ന ദാരു​ണ​മായ സ്ഥിതി​വി​വ​ര​ക്ക​ണ​ക്കു​കൾ പ്രദാനം ചെയ്യുന്നു. ലോക​ത്തി​നു ചുറ്റു​മുള്ള യുദ്ധങ്ങ​ളിൽ 15 ലക്ഷത്തി​ല​ധി​കം കുട്ടികൾ കൊല്ല​പ്പെട്ടു; 40 ലക്ഷത്തി​ല​ധി​കം പേർക്കു വൈക​ല്യ​മോ അന്ധതയോ മസ്‌തി​ഷ്‌ക​ക്ഷ​ത​മോ മുറി​വോ ഉണ്ടായി; 1 കോടി 20 ലക്ഷത്തി​ല​ധി​കം പേർക്കു തങ്ങളുടെ ഭവനം നഷ്ടമായി; 1 കോടി ആളുകൾ അഭയാർഥി​ക​ളാ​യി​ത്തീർന്നു; 50 ലക്ഷം പേർ അഭയാർഥി ക്യാമ്പു​ക​ളിൽ ജീവി​ക്കാൻ നിർബ​ന്ധി​ത​രാ​കു​ക​യും 10 ലക്ഷം പേർ തങ്ങളുടെ കുടും​ബ​ങ്ങ​ളിൽനി​ന്നു വിച്ഛേ​ദി​ക്ക​പ്പെ​ടു​ക​യും ചെയ്‌തു. കഴിഞ്ഞ ദശകത്തിൽ ലോക​ത്തി​ലെ ഓരോ 200 കുട്ടി​ക​ളി​ലും ഒരാൾക്കു യുദ്ധം ആഘാത​മേൽപ്പി​ച്ചു, വൈകാ​രിക ദുഃഖം തരണം ചെയ്യു​ന്ന​തിന്‌ അവർക്കു സഹായം വേണ്ടി​വന്നു.

ഉപ്പിൽ അയഡിൻ

ഭക്ഷണത്തിൽ അയഡിന്റെ കുറവ്‌ ചുരു​ങ്ങി​യ​പക്ഷം 60 കോടി ആളുക​ളു​ടെ സുസ്ഥി​തി​യെ ബാധി​ക്കു​ന്ന​താ​യി ഐക്യ​രാ​ഷ്ട്ര ശിശു​ക്ഷേ​മ​നി​ധി കണക്കാ​ക്കു​ന്നു. ബാധി​ക്ക​പ്പെ​ടു​ന്ന​വ​രിൽ, ഈ അഭാവം ഏതാണ്ട്‌ 1,00,000 ശിശുക്കൾ ക്രെൻറിൻസ്‌ (തൈ​റോ​യ്‌ഡി​ന്റെ കടുത്ത അഭാവം നിമിത്തം ശാരീ​രിക വളർച്ച മുരടി​ച്ച​തും മാനസി​ക​മാ​യി അപര്യാ​പ്‌ത​ത​യു​ള്ള​തു​മായ കുട്ടികൾ) ആയി ജനിക്കാൻ ഇടയാ​ക്കു​ക​യും മറ്റൊരു 5 കോടി കുട്ടി​ക​ളു​ടെ ശാരീ​രി​ക​വും മാനസി​ക​വു​മായ വളർച്ചയെ വികല​മാ​ക്കു​ക​യും ചെയ്യു​ന്ന​താ​യി വിശ്വ​സി​ക്ക​പ്പെ​ടു​ന്നു. അയഡിന്റെ അഭാവം തൈ​റോ​യ്‌ഡ്‌ ഗ്രന്ഥി​യു​ടെ വീക്കമായ ഗോയി​റ്റ​റി​നും കാരണ​മാ​കു​ന്നു. അയഡിൻ കുറവി​നെ​തി​രെ ജാഗ്രത പാലി​ക്കു​ന്നത്‌ എളുപ്പ​വും ചെലവു കുറഞ്ഞ​തു​മാണ്‌—അയഡിൻ ചേർത്ത ഉപ്പ്‌ കേവലം ഉപയോ​ഗി​ക്കുക. 1995 എന്ന വർഷത്തിൽ ലോക​ത്തിൽ വിതരണം ചെയ്യുന്ന ഉപ്പുക​ളിൽ അയഡിൻ ചേർക്കാ​നും 2000 എന്ന വർഷമാ​കു​മ്പോ​ഴേ​ക്കും അയഡിൻ കുറവു നിമി​ത്ത​മു​ണ്ടാ​കുന്ന ക്രമ​ക്കേ​ടു​കൾ നിർമാർജനം ചെയ്യാ​നു​മുള്ള ശ്രമങ്ങൾ നടന്നു​വ​രി​ക​യാണ്‌.

സ്റ്റേഡി​യത്തെ “പുനരാ​ശീർവ​ദി​ക്കു​ന്നു”

തങ്ങളെ വേട്ടയാ​ടുന്ന “ദൗർഭാ​ഗ്യ”ത്തോടു പൊരു​താൻ ഇറ്റലി​യി​ലെ പെസ്‌കാ​റാ​യി​ലുള്ള ഒരു ഫുട്‌ബോൾ ടീം അടുത്ത കാലത്ത്‌ ഒരു കത്തോ​ലി​ക്കാ ബിഷപ്പി​ന്റെ സഹായം തേടി എന്നു ലാ റിപ്പബ്ലിക്ക പത്രം റിപ്പോർട്ടു ചെയ്യുന്നു. “ദൗർഭാ​ഗ്യ”ത്താൽ വലഞ്ഞ—അതിനു കാരണം പൊതു​വേ ആ സ്റ്റേഡി​യ​മാ​ണെന്നു കരുതു​ന്നു—ടീം പ്രസി​ഡൻറ്‌ പുരോ​ഹി​തൻമാർ ശക്തമായി ഇടപെ​ട​ണ​മെന്ന്‌ അഭ്യർഥി​ച്ചു. കുറെ​ക്കാ​ലം മുമ്പ്‌ ഒരു പുരോ​ഹി​തൻ ആ സ്റ്റേഡി​യത്തെ വാഴ്‌ത്തി​യി​രു​ന്നു, അതിനു​ശേഷം നടന്ന മത്സരത്തിൽ ആ ടീം വിജയി​ക്കു​ക​യും ചെയ്‌തു. “പുനരാ​ശീർവാദ”ത്തിൽ—സ്റ്റേഡി​യ​ത്തിൽ ഇരിക്കു​ന്ന​തി​നുള്ള സ്ഥലത്തു​വെച്ച്‌ ബിഷപ്പു നടത്തുന്ന കുർബാന—സംബന്ധിച്ച സ്റ്റാഫം​ഗ​ങ്ങ​ളും പിന്തു​ണ​ക്കാ​രും കളിക്കാ​രും പ്രത്യാ​ശി​ക്കു​ന്നത്‌ ഇത്തവണ ടീം കൂടുതൽ മെച്ചമാ​യി പ്രകടനം നടത്തു​മെ​ന്നാണ്‌. സ്റ്റേഡിയം ഉദ്‌ഘാ​ടനം ചെയ്‌ത​പ്പോ​ഴും അതിനെ വാഴ്‌ത്തി​യി​രു​ന്നു, എന്നാൽ “ഉദ്‌ഘാ​ട​ന​ത്തിൽ വിതറിയ ധൂപവർഗ​ത്തി​ന്റെ ശക്തി കാലപ്പ​ഴ​ക്ക​ത്തിൽ നഷ്ടപ്പെ​ട്ടി​രു​ന്നു” എന്ന്‌ ലാ റിപ്പബ്ലിക്ക പറയുന്നു.

40 വർഷം​കൊണ്ട്‌ 80,000 ഭൂകമ്പങ്ങൾ

“[ജർമനി​യി​ലെ] കൊ​ളോ​ണി​ന​ടു​ത്തുള്ള ബെൻസ്‌ബെർഗിൽ സ്ഥിതി ചെയ്യുന്ന ഭൂകമ്പ​ശാ​സ്‌ത്ര​നി​ലയം ലോക​ത്തി​ന്റെ എല്ലാ ഭാഗങ്ങ​ളി​ലു​മാ​യി 80,000-ത്തിലധി​കം ഭൂകമ്പങ്ങൾ രേഖ​പ്പെ​ടു​ത്തി​യി​രി​ക്കു​ന്നു,” ഫ്രാങ്ക്‌ഫർട്ടർ അൾജമീൻ സൈറ്റുങ്‌ റിപ്പോർട്ടു ചെയ്യുന്നു. ഇത്‌ അറിയി​ച്ചത്‌ ആ നിലയ​ത്തി​ന്റെ തലവനായ പ്രൊ​ഫസർ ലഡ്‌വിക്‌ അഹോർണർ ആണ്‌. ആ നിലയം 40 വർഷങ്ങ​ളാ​യി ഭൂമി​യു​ടെ ചലനങ്ങ​ളെ​യും പ്രകമ്പ​ന​ങ്ങ​ളെ​യും കുറിച്ചു പഠിച്ചു​കൊ​ണ്ടി​രി​ക്കു​ക​യാണ്‌. ലോക​ത്തി​ന്റെ മറ്റു ഭാഗങ്ങ​ളിൽ ഉണ്ടാകുന്ന ഭൂകമ്പങ്ങൾ രേഖ​പ്പെ​ടു​ത്താൻ ഈ നിലയ​ത്തിന്‌ എങ്ങനെ​യാ​ണു കഴിയു​ന്നത്‌? വളരെ സൂക്ഷ്‌മ​ത​യുള്ള ഉപകര​ണങ്ങൾ ഉപയോ​ഗി​ച്ചു​കൊ​ണ്ടാണ്‌ അങ്ങനെ ചെയ്യു​ന്നത്‌, 200 കിലോ​മീ​റ്റർ അകലെ വടക്കൻ സമു​ദ്ര​തീ​രത്ത്‌ ശൈത്യ​കാ​ലത്തെ ശക്തമായ കാറ്റു നിമിത്തം ഉണ്ടാകുന്ന തിരമാ​ലകൾ സൃഷ്ടി​ക്കുന്ന നേരിയ പ്രകമ്പ​ന​ങ്ങ​ളെ​പ്പോ​ലും അളക്കാൻ അവയ്‌ക്കു കഴിയും. ജർമനി​യിൽ ഉണ്ടായി​ട്ടു​ള്ള​തിൽവെച്ച്‌ ഏറ്റവും ശക്തമായ ഭൂകമ്പം ആ നിലയം രേഖ​പ്പെ​ടു​ത്തു​ക​യു​ണ്ടാ​യി, അതു പ്രഹരി​ച്ചത്‌ 1992 ഏപ്രി​ലി​ലാ​യി​രു​ന്നു. ഭൂകമ്പ​മാ​പി​നി​യിൽ അത്‌ 5.9 എന്ന പരിമാ​ണം രേഖ​പ്പെ​ടു​ത്തു​ക​യു​ണ്ടാ​യി.

വൻ പച്ച മതിൽ

നൂറ്റാ​ണ്ടു​കൾക്കു മുമ്പ്‌, ആക്രമണം നടത്തി​യി​രുന്ന മോങ്കൽ സൈന്യ​ങ്ങളെ തിരി​ച്ചോ​ടി​ക്കു​ന്ന​തിൽ ഭാഗി​ക​മാ​യി മാത്രം വിജയ​പ്ര​ദ​മാ​യി​രു​ന്നു ചൈന​യി​ലെ വൻമതിൽ, എന്നാൽ ഒടുവിൽ അതിന്‌ അർഹമായ അംഗീ​കാ​രം ലഭിച്ചി​രി​ക്കു​ന്നു. സയൻസ്‌ ന്യൂസ്‌ പറയു​ന്ന​ത​നു​സ​രിച്ച്‌, 1950-കൾ മുതൽ മതിലി​ന്റെ ഓരത്ത്‌ വൻ വൃക്ഷനി​രകൾ നട്ടുപി​ടി​പ്പി​ച്ചി​രു​ന്നു. ഈ വൻ പച്ച മതിൽ, അതിനെ അങ്ങനെ​യാ​ണു വിളി​ക്കു​ന്നത്‌, ഏതാണ്ട്‌ 30 കോടി മരങ്ങൾ ചേർന്നാണ്‌ ഉണ്ടായി​രി​ക്കു​ന്നത്‌. അതിന്റെ ഉദ്ദേശ്യം: ഗോബി മരുഭൂ​മി​യിൽനി​ന്നും വരണ്ട മറ്റു പ്രദേ​ശ​ങ്ങ​ളിൽനി​ന്നും ചൈന​യി​ലേക്ക്‌ അടിക്കുന്ന പൊടി​ക്കാ​റ്റിന്‌ ഒരു പ്രതി​രോ​ധ​മാ​യി വർത്തി​ക്കുക. ഫലമോ? 1950-കളിൽ ബീജിങ്‌ നഗരത്തിൽ വസന്തകാ​ലത്ത്‌ 10 മുതൽ 20 വരെ പൊടി​ക്കാ​റ്റു​കൾ അടിക്കു​ക​യു​ണ്ടാ​യി, ഓരോ മാസവും 30 മുതൽ 90 വരെ മണിക്കൂർ നേര​ത്തേക്ക്‌ കാണാ​വുന്ന ദൂരം ഒരു കിലോ​മീ​റ്റ​റിൽ താഴെ​യാ​യി അതു കുറയ്‌ക്കു​മാ​യി​രു​ന്നു. എന്നാൽ, 1970-കൾ ആയപ്പോ​ഴേ​ക്കും ഓരോ വസന്തത്തി​ലും ഉണ്ടാകുന്ന ശക്തമായ കാറ്റു​ക​ളു​ടെ എണ്ണം അഞ്ചിലും കുറഞ്ഞി​രു​ന്നു, ഇത്‌ മാസത്തിൽ പത്തിൽ താഴെ മണിക്കൂ​റു​ക​ളി​ലെ കാഴ്‌ചയെ മാത്രമേ അൽപ്പ​മൊ​ന്നു കുറച്ചു​ക​ള​ഞ്ഞു​ള്ളൂ. വിശാ​ല​മായ ഈ വൃക്ഷനി​രകൾ “സാധ്യ​ത​യ​നു​സ​രിച്ച്‌ 20-ാം നൂറ്റാ​ണ്ടിൽ കാലാ​വ​സ്ഥയെ ഭേദ​പ്പെ​ടു​ത്തുന്ന ഏറ്റവും ശക്തമായ പരിപാ​ടി​ക​ളിൽ ഒന്നാണ്‌” എന്ന്‌ ഒരു അന്തരീക്ഷ രസത​ന്ത്രജ്ഞൻ പറഞ്ഞതാ​യി സയൻസ്‌ ന്യൂസ്‌ ഉദ്ധരി​ക്കു​ന്നു.

ജയിലിൽ സാത്താ​ന്യാ​രാ​ധന

ജയിൽ മുറി​യിൽവെച്ച്‌ സാത്താന്യ ആരാധ​നാ​രീ​തി​കൾ നടത്താ​നുള്ള അവകാശം ഒരു തടവു​കാ​രന്‌ യു.എസ്‌.എ.യിലെ കൊള​റാ​ഡോ​യി​ലുള്ള ജയിൽ അധികാ​രി​കൾ നിരസി​ച്ചി​രു​ന്നു. ഒരു ഫെഡറൽ ജയിൽ നിയമം സാത്താന്യ ആരാധ​നയെ വിലക്കി​യി​രു​ന്നു; മാത്രമല്ല, ആരാധ​ന​യ്‌ക്കു വേണ്ടി തടവു​കാ​രൻ ആവശ്യ​പ്പെട്ട ചില സാധനങ്ങൾ—ഒരു കുറു​വടി, ചേങ്ങല, കറുത്ത അങ്കി, മെഴു​കു​തി​രി​കൾ, മെഴു​കു​തി​രി​ക്കാ​ലു​കൾ, പാനപാ​ത്രം, കുന്തി​രി​ക്കം—ആയുധ​ങ്ങ​ളാ​യി ഉപയോ​ഗി​ക്കാൻ സാധ്യ​ത​യു​ണ്ടാ​യി​രു​ന്നു​വെന്ന്‌ ഉദ്യോ​ഗസ്ഥർ വാദിച്ചു. എന്നിരു​ന്നാ​ലും, ഡെൻവ​റി​ലുള്ള ഒരു ഫെഡറൽ ജഡ്‌ജി അടുത്ത കാലത്ത്‌ ആ തീരു​മാ​നത്തെ മറിച്ചു വിധി​ക്കു​ക​യു​ണ്ടാ​യി. ഭരണഘ​ട​നാ​വ​കാ​ശ​മ​നു​സ​രിച്ച്‌, തടവു​കാ​രനു ജയിലിൽവെച്ച്‌ തന്റെ മതം ആചരി​ക്കു​ന്ന​തി​നുള്ള അവകാ​ശ​മു​ണ്ടെന്ന്‌ അദ്ദേഹം വിധിച്ചു. പൈശാ​ചിക ആരാധ​ന​യ്‌ക്ക്‌ എതി​രെ​യുള്ള നിയമം ഭരണഘ​ട​നാ​വി​രു​ദ്ധ​മാ​ണെന്ന നിഗമ​ന​ത്തിൽ ജഡ്‌ജി എത്തി​ച്ചേർന്നു. അസോ​ഷി​യേ​റ്റഡ്‌ പ്രസ്സിന്റെ ഒരു റിപ്പോർട്ടു പറയു​ന്ന​ത​നു​സ​രിച്ച്‌, തന്റെ വിധി​ന്യാ​യ​ത്തിൽ ജഡ്‌ജി ഇങ്ങനെ എഴുതു​ക​യു​ണ്ടാ​യി: “പിശാ​ചിന്‌ അർഹമാ​യത്‌ നാം കൊടു​ക്കേ​ണ്ട​തുണ്ട്‌.” തട്ടി​ക്കൊ​ണ്ടു​പോ​യി എന്ന കുറ്റത്തി​നു പത്തു വർഷത്തെ തടവു​ശി​ക്ഷ​യി​ലാണ്‌ അയാൾ.

തെക്കൻ സമു​ദ്ര​ങ്ങ​ളി​ലെ അടി​യൊ​ഴു​ക്കു​കൾ

പ്രമുഖ സഭാ അധികാ​രി​കൾ, തങ്ങൾ തെക്കൻ പസഫി​ക്കി​ലെ എൻആർജി-കൾ (പുതിയ മതവി​ഭാ​ഗങ്ങൾ) എന്നു വിളി​ക്കു​ന്ന​തി​ന്റെ വളർച്ച​യാൽ അസ്വസ്ഥ​രാ​ണെന്ന്‌ ഫിജിയെ അടിസ്ഥാ​ന​മാ​ക്കി​യുള്ള സഭകളു​ടെ പസഫിക്‌ കോൺഫ​റൻസി​നു വേണ്ടി​യുള്ള ഒരു റിപ്പോർട്ടു വെളി​പ്പെ​ടു​ത്തു​ന്നു. പ്രധാ​ന​മാ​യും ഈ പ്രശ്‌ന​ത്തി​ലുള്ള എൻആർജി-കൾ അസംബ്ലീസ്‌ ഓഫ്‌ ഗോഡ്‌, സെവന്ത്‌ ഡേ അഡ്‌വെൻറി​സ്റ്റ്‌സ്‌, മോർമോൺസ്‌, യഹോ​വ​യു​ടെ സാക്ഷികൾ, ബഹായ്‌ മതത്തിലെ അംഗങ്ങൾ എന്നിവ​രാണ്‌. ദ്വീപു​നി​വാ​സി​ക​ളിൽ ഏതാണ്ട്‌ 20 ശതമാനം പേർ ഈ മതങ്ങളിൽ ചേർന്നി​ട്ടുണ്ട്‌ എന്ന്‌ മാൻ​ഫ്രെഡ്‌ ഏൺസ്റ്റി​നാ​ലുള്ള റിപ്പോർട്ടു പറയുന്നു. എൻആർജി-കൾ രാഷ്ട്രീയ മാറ്റത്തി​നു തടസ്സമാ​ണെന്ന്‌ ആ സഭകൾ പറയുന്നു, കാരണം അവയിൽ ചില വിഭാ​ഗങ്ങൾ രാഷ്ട്രീയ പാർട്ടി​ക​ളി​ലോ പ്രതി​ഷേധ സംരം​ഭ​ങ്ങ​ളി​ലോ ചേരാ​റില്ല; മറ്റു ചിലവ യൂണി​യ​നു​ക​ളിൽ ചേരാ​റില്ല. “ഏൺസ്റ്റ്‌ പറയു​ന്ന​ത​നു​സ​രിച്ച്‌, പരമ്പരാ​ഗത പ്രമുഖ ക്രിസ്‌തീയ സഭകളു​ടെ അനാകർഷ​ക​ത്വം നിമി​ത്ത​മാണ്‌ എൻആർജി-കൾ കൂടുതൽ പ്രസി​ദ്ധ​മാ​യി​ത്തീ​രു​ന്നത്‌” എന്ന്‌ മൈനി​ച്ചി ഡെയ്‌ലി ന്യൂസ്‌ പറഞ്ഞു.

ബലാൽസം​ഗ​ത്തെ​ക്കു​റിച്ച്‌ അർജൻറീ​ന​യി​ലെ പഠനം

1994 ജനുവരി മുതൽ ഒക്ടോബർ വരെ കോർഡോബ എന്ന അർജൻറീ​ന​യി​ലെ ഒരൊറ്റ പ്രവി​ശ്യ​യിൽ മാത്രം 254 ബലാൽസം​ഗങ്ങൾ റിപ്പോർട്ടു ചെയ്യ​പ്പെ​ടു​ക​യു​ണ്ടാ​യി. കോർഡോ​ബ​യിൽനി​ന്നുള്ള ഒരു പൊലീസ്‌ റിപ്പോർട്ട്‌ “ലൈം​ഗിക ലംഘന​ങ്ങളെ ചുറ്റി​പ്പ​റ്റി​യുള്ള സങ്കൽപ്പം ഉപേക്ഷിച്ച”തായി ബ്യൂണസ്‌ അയേഴ്‌സി​ലെ ക്ലാരിൻ എന്ന പത്രം അഭി​പ്രാ​യ​പ്പെ​ടു​ക​യു​ണ്ടാ​യി. അന്ധകാ​ര​ത്തി​ന്റെ മറയ്‌ക്കു പിന്നിൽ, അറിയ​പ്പെ​ടാത്ത വ്യക്തി​കളെ പതിയി​രു​ന്നാ​ക്ര​മി​ക്കുന്ന ലൈം​ഗി​ക​മാ​യി അധഃപ​തിച്ച വ്യക്തി​കളല്ല എല്ലായ്‌പോ​ഴും ബലാൽസം​ഗകർ; ഈ റിപ്പോർട്ട​നു​സ​രിച്ച്‌, ബലാൽസം​ഗം ചെയ്യപ്പെട്ട ഓരോ 10 പേരി​ലും 4 പേർ ബലാൽസം​ഗം ചെയ്യ​പ്പെ​ട്ടത്‌ സ്വന്തം വീട്ടിൽവെച്ച്‌ സ്വന്തം പിതാ​ക്കൻമാ​രാ​ലോ വളർത്ത​പ്പൻമാ​രാ​ലോ മറ്റു ബന്ധുക്ക​ളാ​ലോ ആണ്‌. പൊലീസ്‌ റിപ്പോർട്ടി​ലെ മറ്റു സ്ഥിതി​വി​വ​ര​ക്ക​ണ​ക്കു​കൾ ഇപ്രകാ​രം പ്രകട​മാ​ക്കു​ന്നു. ‘ഈ വർഷം റിപ്പോർട്ടു ചെയ്യപ്പെട്ട 254 ബലാൽസം​ഗ​ങ്ങ​ളിൽ 36 ശതമാ​ന​വും നടന്നത്‌ അവയ്‌ക്ക്‌ ഇരകളാ​യ​വ​രു​ടെ വീട്ടിൽവെ​ച്ചാണ്‌; 23 ശതമാനം, നൃത്തശാ​ലകൾ വിട്ടു​പോ​രു​മ്പോൾ; 13 ശതമാനം, പൊതു​നി​ര​ത്തു​ക​ളിൽവെച്ച്‌; 10 ശതമാനം, വിജന​മായ സ്ഥലത്തു​വെച്ച്‌; 6 ശതമാനം, നിർമാണ സ്ഥലങ്ങളിൽവെച്ച്‌; 3 ശതമാനം, ഫുട്‌ബോൾ കളിക്ക​ള​ങ്ങ​ളി​ലും ബസ്‌സ്റ്റേ​ഷ​നു​ക​ളി​ലെ കക്കൂസു​ക​ളി​ലും ജയിൽമു​റി​ക​ളി​ലും പര്യടന ബസുക​ളി​ലും​വെച്ച്‌.’ 66.54 ശതമാനം കേസു​ക​ളും പൊലീസ്‌ പരിഹ​രി​ച്ച​താ​യി സൂചി​പ്പി​ച്ചു​കൊ​ണ്ടു റിപ്പോർട്ട്‌ ഉപസം​ഹ​രി​ക്കു​ന്നു.