ജോർജിയ—പരിര​ക്ഷി​ക്ക​പ്പെട്ട ഒരു പുരാതന പൈതൃ​കം

ഉണരുക! ലേഖകൻ

ഹിമ​ത്തൊ​പ്പി​യ​ണിഞ്ഞ 4,600 മീറ്റർ ഉയരമുള്ള പർവത​നി​ര​കൾക്കി​ട​യി​ലാ​യി സ്ഥിതി​ചെ​യ്യുന്ന ഫലഭൂ​യി​ഷ്‌ഠ​മായ താഴ്‌വാ​ര​ങ്ങ​ളുള്ള, ചിലർ 100-ഉം അതില​ധി​ക​വും വർഷം ജീവി​ക്കുന്ന ഒരു രാജ്യത്ത്‌ താമസി​ക്കാൻ നിങ്ങൾ ഇഷ്ടപ്പെ​ടു​മോ? ജോർജി​യ​ക്കാ​രെ സംബന്ധി​ച്ചി​ട​ത്തോ​ളം ഇത്‌ കേവലം സ്വപ്‌നമല്ല. ഒരു യാഥാർഥ്യ​മാണ്‌.

യൂറോ​പ്പി​ന്റെ​യും ഏഷ്യയു​ടെ​യും ഭൂമി​ശാ​സ്‌ത്ര​പ​ര​വും സാംസ്‌കാ​രി​ക​വു​മായ അതിർത്തി​യി​ലാണ്‌ ജോർജിയ സ്ഥിതി​ചെ​യ്യു​ന്നത്‌. പുരാ​ത​ന​കാ​ലത്ത്‌, വിഖ്യാ​ത​മായ പട്ടുപാ​ത​യി​ലെ ഒരു പ്രധാ​ന​പ്പെട്ട താവള​മാ​യി​രു​ന്നു ജോർജിയ. മാർക്കോ​പോ​ളോ ചൈന​യി​ലേക്ക്‌ യാത്ര​ചെ​യ്‌ത​തും ഇതുവ​ഴി​യാ​യി​രു​ന്നു. കിഴക്കും പടിഞ്ഞാ​റു​മാ​യുള്ള ഈ ബന്ധത്തിൽനിന്ന്‌ ജോർജിയ സാമ്പത്തി​ക​വും സാംസ്‌കാ​രി​ക​വു​മാ​യി പ്രയോ​ജനം നേടി. എന്നാൽ ഇതുവ​ഴി​യുള്ള യാത്ര തങ്ങൾക്കും പ്രയോ​ജ​ന​ക​ര​മാ​ണെന്ന്‌ ചില​പ്പോ​ഴൊ​ക്കെ ആക്രമ​ണ​കാ​രി​ക​ളും കണ്ടെത്തി. ഒരു കണക്കനു​സ​രിച്ച്‌, ജോർജി​യ​യു​ടെ തലസ്ഥാ​ന​മായ ടിബി​ലി​സി 29 പ്രാവ​ശ്യം നശിപ്പി​ക്ക​പ്പെട്ടു! ഇന്ന്‌, ടിബി​ലി​സി തിര​ക്കേ​റിയ, ജീവസ്സുറ്റ ഒരു നഗരമാണ്‌. അവി​ടെ​യി​പ്പോൾ ഒരു ഭൂഗർഭ റെയിൽപ്പാ​ത​യും വളരെ​ക്കാ​ലം പഴക്കമുള്ള വാസ്‌തു​ശിൽപ്പ സ്‌മാരക സ്‌തൂ​പ​ങ്ങ​ളും ആധുനിക കെട്ടിട സമുച്ച​യ​ങ്ങ​ളു​മുണ്ട്‌.

ജോർജി​യ​യു​ടെ ഏകദേശം 87 ശതമാനം പ്രദേ​ശ​വും പർവത​നി​ബി​ഡ​മാണ്‌. ഹിമാ​വൃ​ത​വും വിജന​വു​മായ പർവത ശൃംഗ​ങ്ങ​ളിൽനി​ന്നു പുറ​പ്പെട്ട്‌ നിമ്‌ന​പ്ര​ദേ​ശ​ങ്ങ​ളി​ലൂ​ടെ ഒഴുകുന്ന 25,000 നദികൾ ഇവി​ടെ​യുണ്ട്‌. അവയിൽ പലതി​ലും നിറയെ ട്രൗട്ട്‌ മത്സ്യങ്ങ​ളുണ്ട്‌. രാജ്യ​ത്തി​ന്റെ മൂന്നി​ലൊ​രു ഭാഗത്തി​ല​ധി​ക​വും വനങ്ങളും കുറ്റി​ച്ചെ​ടി​ക​ളും​കൊ​ണ്ടു നിറഞ്ഞി​രി​ക്കു​ന്നു. ജോർജി​യ​യു​ടെ വടക്കേ അതിർത്തി​യി​ലുള്ള കോക്ക​സസ്‌ പർവത​നിര വടക്കു​നി​ന്നുള്ള കൊടും ശൈത്യ​കാ​ലാ​വ​സ്ഥ​യിൽനിന്ന്‌ രാജ്യ​ത്തി​ന്റെ ഉൾഭാ​ഗ​ങ്ങളെ സംരക്ഷി​ക്കു​ന്നു. കരിങ്ക​ട​ലിൽനി​ന്നുള്ള ഈർപ്പ​മുള്ള വായു​നി​മി​ത്തം അങ്ങനെ ജോർജി​യ​യു​ടെ പടിഞ്ഞാ​റൻ ഭാഗം ചൂടു​ള്ള​താ​യി​ത്തീ​രു​ന്നു. ജോർജിയ, അവധി​ക്കാ​ലം ചെലവ​ഴി​ക്കാൻ വരുന്ന​വ​രു​ടെ ഇഷ്ടപ്പെട്ട സ്ഥലമാ​യി​രി​ക്കു​ന്ന​തി​ന്റെ ഒരു കാരണ​മി​താണ്‌. ഈ മിതമായ കാലാവസ്ഥ ലോക​ത്തി​ലെ ഏറ്റവും പുരാ​ത​ന​വും മികച്ച​തു​മായ വീഞ്ഞു​നിർമാണ സമ്പ്രദാ​യ​ങ്ങ​ളി​ലൊ​ന്നി​നു സംഭാവന ചെയ്‌തി​രി​ക്കു​ന്നു. 500-ലധികം ഇനങ്ങളി​ലുള്ള മുന്തി​രി​പ്പ​ഴ​വും അത്രയും​തന്നെ ഇനങ്ങളി​ലുള്ള വീഞ്ഞും ജോർജിയ ഉത്‌പാ​ദി​പ്പി​ക്കു​ന്നു!

എന്നിരു​ന്നാ​ലും, ജോർജി​യ​യു​ടെ ഏറ്റവും വലിയ മുതൽക്കൂട്ട്‌ അവിടത്തെ ജനങ്ങളാണ്‌. തങ്ങളുടെ ചങ്കൂറ്റം, ബുദ്ധി, ഔദാ​ര്യ​പൂർവ​മായ അതിഥി​പ്രി​യം, നർമരസം, ജീവ​നോ​ടുള്ള സ്‌നേഹം എന്നിവ നിമിത്തം യുഗങ്ങ​ളി​ലു​ട​നീ​ളം അവർ അറിയ​പ്പെ​ട്ടി​രി​ക്കു​ന്നു. പാട്ടു​ക​ളും നൃത്തങ്ങ​ളും​കൊണ്ട്‌ അവരുടെ സംസ്‌കാ​രം സമ്പന്നമാണ്‌. ജോർജി​യ​യി​ലെ ഭവനങ്ങ​ളിൽ ഇന്നും ഭക്ഷണ​ശേഷം നാടോ​ടി​പ്പാ​ട്ടു​കൾ പാടാ​റുണ്ട്‌.

അഞ്ചാം നൂറ്റാ​ണ്ടു​മു​ത​ലുള്ള സുദീർഘ​മായ ഒരു സാഹി​ത്യ​ച​രി​ത്ര​വും ജോർജി​യ​യ്‌ക്കുണ്ട്‌. വളരെ വ്യത്യ​സ്‌ത​വും വടി​വൊ​ത്ത​തു​മായ അക്ഷരങ്ങ​ളുള്ള ജോർജി​യൻഭാഷ, ബൈബിൾ ഏറ്റവും ആദ്യം വിവർത്ത​നം​ചെ​യ്യ​പ്പെട്ട ഭാഷക​ളി​ലൊ​ന്നാ​യി​രു​ന്നു. ഈ സാംസ്‌കാ​രി​കോ​ന്ന​തി​യെ​ല്ലാം ജോർജി​യ​യു​ടെ ഗതകാ​ല​വു​മാ​യി ബന്ധപ്പെ​ട്ടി​രി​ക്കു​ന്നു. അത്‌ ഒരു പുരാതന പൈതൃ​കം പരിര​ക്ഷി​ക്ക​പ്പെട്ട ആധുനിക രാജ്യ​മാണ്‌.

[24-ാം പേജിലെ ചിത്ര​ത്തിന്‌ കടപ്പാട്‌]

Pat O’Hara/Corbis

[25-ാം പേജിലെ ചിത്രങ്ങൾ]

1. ജോർജി​യൻ ബൈബിൾ

2. അവി​ടെ​യുള്ള ചിലർ 100-ഉം അതില​ധി​ക​വും വർഷം ജീവി​ക്കു​ന്നു!

3. ടിബി​ലി​സി​യി​ലെ തിര​ക്കേ​റിയ ഒരു തെരുവ്‌

[കടപ്പാട്‌]

Dean Conger/Corbis