സമ്മേളന ഓർമിപ്പിക്കലുകൾ
പരിപാടിയുടെ സമയം: രാവിലെ 8 മുതൽ ഹാളിൽ പ്രവേശിക്കാം. മൂന്നു ദിവസവും രാവിലെ 9:20-ന്‌ പ്രാരംഭ സംഗീതം ആരംഭിക്കും. സംഗീതം ആരംഭിക്കാൻ പോകുന്നുവെന്ന അറിയിപ്പു കേൾക്കുമ്പോൾ എല്ലാവരും ഇരിപ്പിടങ്ങളിൽ വന്നിരിക്കേണ്ടതാണ്‌. അങ്ങനെയാകുമ്പോൾ മാന്യവും ക്രമീകൃതവുമായ വിധത്തിൽ പരിപാടി തുടങ്ങാനാകും. വെള്ളിയാഴ്‌ചയും ശനിയാഴ്‌ചയും ഉള്ള സമാപന ഗീതവും പ്രാർഥനയും വൈകുന്നേരം 5-നും, ഞായറാഴ്‌ച 4-നും ആയിരിക്കും.
‘യഹോവയെ പാടി സ്‌തുതിക്കുക’: പുരാതന നാളുകളിൽ ദൈവജനം യഹോവയെ സ്‌തുതിക്കുന്നതിൽ സംഗീതം ഉപയോഗിച്ചിട്ടുണ്ട്‌. ഇന്നും സത്യാരാധനയുടെ ഒരു പ്രമുഖഭാഗമാണ്‌ സംഗീതം. (സങ്കീ. 28:7) നമ്മുടെ മേഖലാ സമ്മേളനത്തിന്റെ ഓരോ സെഷനും തുടങ്ങുന്നത്‌ സംഗീതത്തോടെ ആയിരിക്കും. ഇത്‌ വെറും പശ്ചാത്തല സംഗീതമല്ല, മറിച്ച്‌ യഹോവയെക്കുറിച്ച്‌ പഠിക്കാനും അവനെ ആരാധിക്കാനും ആയി പ്രത്യേകം തയ്യാറാക്കിയതാണ്‌. അതുകൊണ്ട്‌, അധ്യക്ഷൻ സംഗീതം തുടങ്ങുന്നുവെന്ന അറിയിപ്പ്‌ നടത്തുമ്പോൾ സംസാരിച്ച്‌ നടക്കുന്നതിനുപകരം എല്ലാവരും സീറ്റിൽ വന്നിരുന്ന്‌ വിലമതിപ്പോടെ സംഗീതം ശ്രദ്ധിക്കണം. ഇങ്ങനെ ചെയ്യുന്നത്‌ വാച്ച്‌ടവർ ഓർക്കെസ്‌ട്രയിലെ അംഗങ്ങളുടെ പ്രയത്‌നത്തെ നാം മാനിക്കുന്നുവെന്ന്‌ കാണിക്കുകയായിരിക്കും. വർഷത്തിൽ രണ്ടു പ്രാവശ്യം ഈ ഓർക്കെസ്‌ട്രയിലെ സഹോദരീസഹോദരന്മാർ ന്യൂയോർക്കിലെ പാറ്റേർസണിൽ സ്വന്തം ചെലവിൽ വന്ന്‌ നമ്മുടെ ആസ്വാദനത്തിനായി മനോഹരമായ സംഗീതം തയ്യാറാക്കുന്നു. ഈ സംഗീതം അതീവശ്രദ്ധയോടെ കേട്ടശേഷം എല്ലാവരും യഹോവയെ സ്‌തുതിച്ചുകൊണ്ട്‌ രാജ്യഗീതങ്ങൾ പാടണം.
പാർക്കിങ്‌: പാർക്കിങ്‌ സ്ഥലങ്ങളുടെ നിയന്ത്രണം നമുക്കു ലഭിക്കുന്ന എല്ലാ സമ്മേളനങ്ങളിലും, പാർക്ക്‌ ചെയ്യാനുള്ള ഇടം ആദ്യം വരുന്നവർക്ക്‌ ആദ്യം എന്ന രീതിയിൽ സൗജന്യമായി ലഭിക്കും. പാർക്കിങ്ങിനുള്ള സ്ഥലം സാധാരണഗതിയിൽ പരിമിതമായതിനാൽ, കാറുകളിലും മറ്റും ഒന്നോ രണ്ടോ പേർ മാത്രം യാത്ര ചെയ്യുന്നതിനുപകരം സ്ഥലസൗകര്യം പരമാവധി ഉപയോഗപ്പെടുത്തേണ്ടതാണ്‌.
ഇരിപ്പിടം പിടിച്ചുവെക്കൽ: ഓരോ പ്രഭാതത്തിലും ഹാളിലേക്കുള്ള വാതിൽ തുറക്കുമ്പോൾ സീറ്റു പിടിക്കാൻ ദയവായി മത്സരിച്ച്‌ ഓടരുത്‌. മറ്റുള്ളവരുടെ നന്മ അന്വേഷിക്കുന്നതിൽ കാണിക്കുന്ന ആത്മത്യാഗ മനോഭാവം യഥാർഥ ക്രിസ്‌ത്യാനികളായി നമ്മെ തിരിച്ചറിയിക്കുകയും ദൈവത്തെ മഹത്വപ്പെടുത്താൻ മറ്റുള്ളവരെ പ്രേരിപ്പിക്കുകയും ചെയ്യും. (യോഹ. 13:34, 35; 1 കൊരി. 13:5; 1 പത്രോ. 2:12) നിങ്ങളോടൊപ്പം ഒരേ വീട്ടിൽ താമസിക്കുന്നവർക്കോ ഒരേ വാഹനത്തിൽ യാത്രചെയ്യുന്നവർക്കോ അധ്യയനമെടുക്കുന്നവർക്കോ വേണ്ടി മാത്രമേ ഇരിപ്പിടങ്ങൾ പിടിച്ചുവെക്കാവൂ. നിങ്ങൾ പിടിച്ചിട്ടില്ലാത്ത സീറ്റുകളിൽ ദയവായി സാധനങ്ങൾ വെക്കരുത്‌. ഈ ക്രമീകരണത്തോടു സഹകരിച്ചാൽ സീറ്റ്‌ കിട്ടാതെ വിഷമിക്കുന്നവർക്ക്‌ അവ കണ്ടെത്താനാകും. വയോധികർക്കും വൈകല്യമുള്ളവർക്കും വേണ്ടി പ്രത്യേകം ഇരിപ്പിടങ്ങൾ ക്രമീകരിച്ചിട്ടുണ്ട്‌. ഇവ പരിമിതമായതിനാൽ അവരോടൊപ്പം ഒന്നോ രണ്ടോ സഹായികൾ മാത്രമേ ഇരിക്കാവൂ.
ഉചിതമായ വസ്‌ത്രധാരണം: സമ്മേളനത്തിനു വരുമ്പോൾ നമ്മുടെ വസ്‌ത്രധാരണം ഉചിതവും മാന്യവും ആയിരിക്കണം, അല്ലാതെ ലോകത്തിന്റെ അങ്ങേയറ്റത്തെ രീതികൾ ആയിരിക്കരുത്‌. (1 തിമൊ. 2:9) ഹോട്ടലുകളിലേക്ക്‌ പോകുകയും വരികയും ചെയ്യുമ്പോഴും സെഷനുകൾക്ക്‌ ഇടയിലെ സമയത്തും അതിനുശേഷവും അങ്ങേയറ്റം അലസമായ വസ്‌ത്രധാരണരീതി നാം ഒഴിവാക്കണം. അങ്ങനെയായാൽ സമ്മേളന ബാഡ്‌ജ്‌ ധരിക്കാൻ നമുക്ക്‌ അഭിമാനം തോന്നും. സാക്ഷീകരിക്കാൻ അവസരം ലഭിക്കുമ്പോൾ അത്‌ ചെയ്യാൻ ലജ്ജ തോന്നുകയും ഇല്ല. ഈ വരുന്ന സമ്മേളനത്തിൽ നമ്മുടെ ചമയവും നല്ല നടത്തയും ആത്മാർഥഹൃദയരായ ആളുകളെ ബൈബിളിന്റെ ജീവരക്ഷാകരമായ സന്ദേശത്തിലേക്ക്‌ ആകർഷിക്കുകമാത്രമല്ല യഹോവയെ സന്തോഷിപ്പിക്കുകയും ചെയ്യും.—സെഫ. 3:17.
നല്ല മര്യാദയോടെ ഇലക്‌ട്രോണിക്‌ ഉപകരണങ്ങൾ പ്രവർത്തിപ്പിക്കുക: നമ്മുടെ ഫോണുകളും ഇലക്‌ട്രോണിക്‌ ഉപകരണങ്ങളും മറ്റുള്ളവർക്ക്‌ പരിപാടികൾക്കിടെ ശല്യം വരാതെ ക്രമീകരിക്കുന്നതിൽ നല്ല മര്യാദ കാണിക്കണം. ക്യാമറയോ വീഡിയോ റിക്കാർഡറോ ഇലക്‌ട്രോണിക്‌ ടാബ്‌ലറ്റോ മറ്റെന്തെങ്കിലും ഇലക്‌ട്രോണിക്‌ ഉപകരണങ്ങളോ പ്രവർത്തിപ്പിക്കുമ്പോൾ മറ്റുള്ളവരെ ശല്യം ചെയ്യുകയോ അവരുടെ കാഴ്‌ചയ്‌ക്ക്‌ തടസ്സം വരുത്തുകയോ ചെയ്യാതെ അവരോട്‌ കരുതൽ കാണിക്കുക. പരിപാടിക്കിടെ അനാവശ്യമായി ഇമെയിൽ സന്ദേശങ്ങൾ അയയ്‌ക്കാതിരുന്നുകൊണ്ടും നാം നല്ല മര്യാദ കാണിക്കണം.
ഉച്ചഭക്ഷണം: ഉച്ചയ്‌ക്കുള്ള ഇടവേളയിൽ ഹോട്ടലിൽ പോയി ഭക്ഷണം കഴിക്കുന്നതിനുപകരം എന്തെങ്കിലും ലഘുവായി കരുതുക. ഇരിപ്പിടത്തിന്‌ അടിയിൽ വെക്കാവുന്നതരം സഞ്ചിയും മറ്റും ഭക്ഷണം കൊണ്ടുവരാൻ ഉപയോഗിക്കാമെങ്കിലും വലിയ പാത്രങ്ങളും ചില്ലുപാത്രങ്ങളും സമ്മേളനസ്ഥലത്തു കൊണ്ടുവരരുത്‌.
സംഭാവനകൾ: ലോകവ്യാപക വേലയ്‌ക്കുവേണ്ടി സമ്മേളനസ്ഥലത്ത്‌ സംഭാവനകൾ നൽകിക്കൊണ്ട്‌ സമ്മേളന ക്രമീകരണങ്ങളോടു നമുക്കു വിലമതിപ്പു കാണിക്കാം. സമ്മേളനസ്ഥലത്ത്‌ സംഭാവനയായി നൽകുന്ന ചെക്കുകൾ “The Watch Tower Bible and Tract Society of India.” എന്ന പേരിലാണ്‌ എഴുതേണ്ടത്‌. ചിലയിടങ്ങളിൽ സംഭാവനകൾ ഡെബിറ്റ്‌ അഥവാ ക്രെഡിറ്റ്‌ കാർഡ്‌ വഴിയും നൽകാം.
മരുന്നുകൾ: ഡോക്‌ടറുടെ നിർദേശപ്രകാരം നിങ്ങൾ ഏതെങ്കിലും മരുന്ന്‌ കഴിച്ചുകൊണ്ടിരിക്കുകയാണെങ്കിൽ അവ കൂടെക്കരുതുക. സമ്മേളനസ്ഥലത്ത്‌ അവ ലഭിക്കില്ല. പ്രമേഹരോഗികൾ ഉപയോഗിക്കുന്ന സിറിഞ്ചുകളും സൂചികളും ശരിയായ വിധത്തിൽ നിർമാർജനം ചെയ്യേണ്ടതാണ്‌. അവ അപകടകരമായതിനാൽ സമ്മേളനസ്ഥലത്തോ ഹോട്ടലിലോ ഉള്ള ചവറ്റുകുട്ടയിൽ ഇടരുത്‌.
സുരക്ഷിതത്വത്തിനുവേണ്ടിയുള്ള മുൻകരുതലുകൾ: തെന്നിയും തട്ടിയും വീഴുന്നത്‌ ഒഴിവാക്കാൻ ദയവായി ശ്രദ്ധിക്കുക. ഹാളിനുള്ളിൽ ഓടിക്കളിക്കാൻ കുട്ടികളെ അനുവദിക്കരുത്‌. ഓരോ വർഷവും പാദരക്ഷകളുടെ, പ്രത്യേകിച്ച്‌ ഉയർന്ന ഹീലുള്ളവയുടെ ഉപയോഗം മൂലം പരിക്കു പറ്റാറുണ്ട്‌. നടപ്പാതകളിലൂടെയും ഗോവണിപ്പടികളിലൂടെയും മറ്റും സുരക്ഷിതമായി നടക്കാൻ സഹായിക്കുന്ന ഒതുക്കമുള്ള ഷൂസുകൾ തിരഞ്ഞെടുക്കുന്നതായിരിക്കും ഏറ്റവും ഉചിതം.
കുഞ്ഞുങ്ങളെ ഇരുത്തിക്കൊണ്ടുപോകുന്ന വണ്ടികളും ചാരുകസേരകളും: സമ്മേളനസ്ഥലത്ത്‌ ഇവ കൊണ്ടുവരരുത്‌. മാതാപിതാക്കളുടെ അടുത്തുതന്നെയുള്ള ഇരിപ്പിടത്തിൽ സ്ഥാപിക്കാൻ കഴിയുന്ന, കുട്ടികൾക്കായുള്ള പ്രത്യേക സുരക്ഷാസീറ്റുകൾ ഉപയോഗിക്കാവുന്നതാണ്‌.
പെർഫ്യൂം: വായു സഞ്ചാരത്തിനായി കൃത്രിമ മാർഗങ്ങൾ ഉപയോഗിക്കേണ്ടിവരുന്ന അടഞ്ഞ ഹാളുകളിലാണ്‌ മിക്ക സമ്മേളനങ്ങളും നടക്കുന്നത്‌. അതുകൊണ്ടുതന്നെ ശ്വാസതടസ്സമോ അലർജിയോ ഉള്ളവർക്ക്‌ അസ്വസ്ഥത ഉളവാക്കാവുന്ന രൂക്ഷഗന്ധമുള്ള പെർഫ്യൂമുകളുടെയും മറ്റും ഉപയോഗം കുറച്ചുകൊണ്ട്‌ മറ്റുള്ളവരോടു പരിഗണന കാണിക്കാം.—1 കൊരി. 10:24.
ദയവായി ബന്ധപ്പെടുക (S-43) ഫാറങ്ങൾ: സമ്മേളനസ്ഥലത്ത്‌ അനൗപചാരിക സാക്ഷീകരണം നടത്തുമ്പോൾ ആരെങ്കിലും താത്‌പര്യം കാണിക്കുന്നെങ്കിൽ അവരെക്കുറിച്ചുള്ള വിവരങ്ങൾ നൽകുന്നതിന്‌ ദയവായി ബന്ധപ്പെടുക എന്ന ഫാറം ഉപയോഗിക്കേണ്ടതാണ്‌. പൂരിപ്പിച്ചശേഷം അവ പുസ്‌തകശാലയിൽ ഏൽപ്പിക്കാനാകും; അല്ലെങ്കിൽ മടങ്ങിച്ചെല്ലുമ്പോൾ നിങ്ങളുടെ സഭാസെക്രട്ടറിയെ ഏൽപ്പിക്കാവുന്നതാണ്‌.
റസ്റ്റോറന്റുകളിൽ: നല്ല പെരുമാറ്റത്താൽ യഹോവയുടെ നാമം മഹത്വപ്പെടുത്തുക. ഒരു ക്രിസ്‌തീയ ശുശ്രൂഷകനു ചേർന്ന രീതിയിൽ വസ്‌ത്രം ധരിക്കുക. പല സ്ഥലങ്ങളിലും സേവനത്തിനനുസരിച്ച്‌ ടിപ്പ്‌ കൊടുക്കുന്ന രീതിയുണ്ട്‌.
ഹോട്ടലുകളിൽ:
വേണ്ടതിലധികം മുറികൾ ബുക്കുചെയ്യരുത്‌; അനുവദിച്ചിരിക്കുന്നതിലും കൂടുതൽ ആളുകളെ മുറിയിൽ താമസിപ്പിക്കരുത്‌.
അടിയന്തിരസാഹചര്യമില്ലെങ്കിൽ ബുക്കുചെയ്‌ത മുറി റദ്ദാക്കരുത്‌. ഇനി, അങ്ങനെ ചെയ്യാൻ തീരുമാനിച്ചാൽ എത്രയും വേഗം അക്കാര്യം ഹോട്ടൽ അധികൃതരെ അറിയിക്കുക. അങ്ങനെയായാൽ മറ്റുള്ളവർക്ക്‌ അത്‌ ഉപയോഗിക്കാം. (മത്താ. 5:37) ബുക്കിങ്‌ റദ്ദാക്കിയതിന്റെ രേഖ കൈപ്പറ്റാൻ മറക്കരുത്‌.
ഡെബിറ്റ്‌കാർഡോ ക്രെഡിറ്റ്‌കാർഡോ ഉപയോഗിച്ചാണ്‌ ഹോട്ടലിൽ മുറി ബുക്കുചെയ്യുന്നതെങ്കിൽ, മുറിവാടകയും താമസസമയത്ത്‌ ഹോട്ടലിന്‌ എന്തെങ്കിലും നഷ്ടം വരുത്തിയാൽ അതും നികത്താനാവശ്യമായ ഒരു തുക നിങ്ങളുടെ അക്കൗണ്ടിൽനിന്നു പിടിച്ചുവെക്കുമെന്ന കാര്യം പ്രത്യേകം ഓർമിക്കുക. മുറി ഒഴിഞ്ഞ്‌ ഏതാനും ദിവസങ്ങൾക്കുള്ളിൽ അവരുമായുള്ള പണമിടപാടു തീർക്കുന്നതുവരെ നിങ്ങൾക്ക്‌ ആ പണം ഉപയോഗിക്കാൻ കഴിയില്ല.
സാധനങ്ങൾ കൊണ്ടുപോകാനുള്ള ട്രോളികൾ ലഭ്യമാണെങ്കിൽ, പുറത്തിറങ്ങാൻ തയ്യാറായിക്കഴിഞ്ഞേ അത്‌ എടുക്കാവൂ; മറ്റുള്ളവർക്ക്‌ ഉപയോഗിക്കാൻ കഴിയേണ്ടതിന്‌ ഉടനെ തിരിച്ചുവെക്കുകയും വേണം.
നിങ്ങളുടെ സാധനങ്ങൾ ചുമക്കുന്ന ഹോട്ടൽ ജോലിക്കാർക്ക്‌ ടിപ്പ്‌ കൊടുക്കാൻ മറക്കരുത്‌. മുറിയിൽ നിങ്ങൾക്കുവേണ്ട സേവനം ചെയ്‌തുതരുന്ന ആൾക്കും നാട്ടുനടപ്പനുസരിച്ചു ടിപ്പ്‌ കൊടുക്കുക.
അനുവാദം ഉണ്ടെങ്കിലേ ഹോട്ടൽ മുറിയിൽ പാചകം ചെയ്യാവൂ.
ഹോട്ടലിൽ ആയിരിക്കുമ്പോൾ ഉപചാരാർഥം ലഭിക്കുന്ന പ്രഭാതഭക്ഷണമോ പാനീയങ്ങളോ ഐസ്‌ തുടങ്ങിയ സാധനങ്ങളോ അമിതമായി ആഹരിച്ചുകൊണ്ട്‌ ദുരുപയോഗം ചെയ്യരുത്‌.
ഹോട്ടൽ ജീവനക്കാരുമായി ഇടപെടുമ്പോഴെല്ലാം ദൈവാത്മാവിന്റെ ഫലം പ്രകടിപ്പിക്കുക. ഹോട്ടലിൽ വരുന്ന എല്ലാവരെയും അവർക്കു തൃപ്‌തിപ്പെടുത്തേണ്ടത്‌ ഉണ്ടെന്ന കാര്യം മനസ്സിൽപ്പിടിച്ചുകൊണ്ട്‌ ക്ഷമയും പരിഗണനയും ന്യായബോധവും കാണിക്കുക.
നീന്തൽക്കുളം, ജിം, ഇടനാഴികൾ എന്നിവ ഉൾപ്പെടെ ഹോട്ടലിൽ എവിടെയായിരുന്നാലും മാതാപിതാക്കൾ കുട്ടികളെ പ്രത്യേകം ശ്രദ്ധിക്കണം.
ശുപാർശ ചെയ്യപ്പെടുന്ന ലോഡ്‌ജുകളുടെ പട്ടികയിൽ കാണിച്ചിരിക്കുന്ന നിരക്ക്‌, നികുതി ഒഴികെയുള്ള ഒരു ദിവസത്തെ നിരക്കാണ്‌. നിശ്ചിത നിരക്കിലധികം ഈടാക്കുന്നെങ്കിൽ പണം കൊടുക്കുന്നതിനുമുമ്പ്‌, സമ്മേളനസ്ഥലത്തുള്ള താമസസൗകര്യ ഡിപ്പാർട്ടുമെന്റിൽ എത്രയും പെട്ടെന്ന്‌ വിവരം അറിയിക്കുക.
ഹോട്ടൽ മുറിയോടുള്ള ബന്ധത്തിൽ എന്തെങ്കിലും പ്രശ്‌നമുണ്ടാകുന്നപക്ഷം അക്കാര്യം സമ്മേളനസ്ഥലത്തുവെച്ചുതന്നെ താമസസൗകര്യ ഡിപ്പാർട്ടുമെന്റിൽ അറിയിക്കുക. അവർക്കു നിങ്ങളെ സഹായിക്കാനായേക്കും.
സ്വമേധാസേവനം: സേവനം ചെയ്യാൻ ആഗ്രഹിക്കുന്നവർ സ്വമേധാസേവന ഡിപ്പാർട്ടുമെന്റിൽ പേര്‌ നൽകേണ്ടതാണ്‌. മാതാപിതാക്കൾ, രക്ഷിതാക്കൾ, അവർ അനുവദിക്കുന്ന ഏതെങ്കിലുമൊരു മുതിർന്ന വ്യക്തി എന്നിവരോടൊപ്പം 16 വയസ്സിൽ താഴെയുള്ള കുട്ടികൾക്കും സ്വമേധാസേവനത്തിൽ പങ്കെടുക്കാം.