KIBAYÃ YIIB-N-SOAB SEBRE
1 A Davɩɩd biig a Salomo naamã paama pãng hal wʋsgo, la a Wẽnnaam a Zeova ra bee ne-a, n kɩt t’a lebg kãseng wʋsgo.+
2 A Salomo kɩtame tɩ b tigim Israyɛll fãa, neb tusr-tusr nanambsã la neb koabg-koabg nanambsã, bʋ-kaoodbã la Israyɛll nanambsã fãa, buudã rot taoor dãmba. 3 Dẽ, a Salomo ne nin-buiidã fãa kẽnga Gabawõ+ zĩ-zãntgẽ* wã, bala yaa be la Wẽnnaam sɛk-roogã ra be. Yaa sɛk-roog ning a Zeova tʋm-tʋmd a Moyiiz sẽn da tilg we-raoogẽ wã. 4 La a Davɩɩd ra yiisa Wẽnnaam Koglgã Kiryat-yeyarim+ n tall n kẽng zĩig ning a sẽn da segl a yĩngã. Yẽ ra tilga fu-roog a yĩng Zerizalɛm.+ 5 La b ra rɩka zũud tẽn-kugrã+ a Huur biig a Uri biig a Bɛtsalɛll+ sẽn da maanã, n tɩ rɩgl a Zeova sɛk-roogã sɛɛga. A Salomo ne nin-buiidã ra pʋʋsda a taoore.* 6 Dẽ, a Salomo maana maand be a Zeova taoore. Yẽ maana maand sẽn yõogd bugum bãmb tusr sɛk-roogã zũud tẽn-kugrã+ zugu.
7 Yʋn-kãnga, Wẽnnaam vẽnega a meng ne a Salomo n yeel-a yaa: “Kos maam bũmb ning fo sẽn dat tɩ m kõ-fo.”+ 8 A Salomo leoka Wẽnnaam yaa: “Yãmb maana mam ba a Davɩɩd+ neer wʋsgo, n kɩt tɩ mam ledg-a n lebg rĩma.+ 9 La masã, m Wẽnnaam a Zeova, kɩt-y tɩ yãmb sẽn pʋlem m ba a Davɩɩd bũmb ningã pidsi.+ Bala yãmb kɩtame tɩ mam lebg rĩma, n na n soog nin-buiid sẽn yaa wʋsg wa tẽngã tomã.+ 10 Masã, kõ-y maam yam la bãngr+ tɩ m lʋɩ nin-buiidã taoore. Bala ãnd n tõe n kao yãmb nin-buiidã sẽn yaa wʋsg woto wã bʋʋdo?”+
11 Wẽnnaam yeela a Salomo yaa: “Sẽn yaa woto la fo rata, la f pa kos arzɛka, paoongo, ziir wall neb nins sẽn kis foomã kũumã, pa rẽ bɩ yõ-woko, tɩ yaa yam ne bãngr la fo kos sẽn na yɩl n bʋ mam nin-buiidã m sẽn kɩt tɩ f lebg b rĩmã yĩnga,+ 12 fo na n paama yamã ne bãngrã. M na n kõ-f-la arzɛk me, la paoong ne ziir rĩm baa a ye sẽn zɩ n paame, sẽn deng foo bɩ sẽn na n yaool n wa fo poore.”+
13 Woto, a Salomo yii Gabawõ+ zĩ-zãntgẽ* wã, zĩig ning sɛk-roogã sẽn be wã n leb Zerizalɛm. Yẽ rɩɩ naam Israyɛlle. 14 A Salomo ra ket n tigimda saar-dãmb* ne wed-moose.* Yẽ ra tara saar-dãmb tusr la kobs-naase, ne wed-moos* tus-piig la a yiibu.+ A ra ninga kẽer a saar-dãmbã tẽnsẽ,+ la a ning sãnda Zerizalɛm n pẽneg rĩmã.+ 15 Rĩmã kɩtame tɩ wanzuri wã ne sãnemã lebg wʋsg Zerizalɛm wa kuga,+ tɩ sɛɛdr tɩɩs raadã me lebg wʋsg wa Sefela wã wom-seese.*+ 16 A Salomo ra kɩtdame tɩ b kẽnd n daad a wed-moosã Ezɩpt+ n watẽ. Rĩmã toandbã da raada wed-moosã bãgr-bãgr* tɩ b ligdã pa toeemdẽ ye.+ 17 Saar-dãmbã b sẽn da kẽnd n daad Ezɩptã a yembr fãa ligd yaa wanzuri ligd-koeems kobs-yoobe, tɩ wed-moaag yaa koabg la pis-nu. Toandbã ra lebsd n koosd-b-la ne Hɛt nebã rĩm-dãmbã la Siiri rĩm-dãmbã fãa.
2 A Salomo kõo noor tɩ b me roog a Zeova yʋʋrã yĩnga,+ la b me na-yir a rĩungã yĩnga.+ 2 A Salomo yãka tʋm-tʋmd-zaals* tus-pis-yopoe, ne rap tus-pis-nii tɩ b peesd kug tãensẽ wã,+ tɩ rap tus a tã la kobs-yoob yaa yel-gɛtba, n get tʋm-tʋmdbã yelle.+ 3 Sẽn paase, a tʋma koɛɛg Tɩɩr rĩm a Hiram+ nengẽ n yeele: “Maan-y bũmb ning yãmb sẽn maan m ba a Davɩɩdã n kõ-ma. Yãmb da tool-a-la sɛɛdr tɩɩs raad t’a me na-yir n zĩnd a pʋgẽ.+ 4 Mam dat n mee roog mam Wẽnnaam a Zeova yʋʋrã yĩnga, n welg-a toor* a yĩnga. B na n yõogda wisd sẽn tar yũ-noog+ a taoore, n dɩgend bur sẽn dogend taab zugã,*+ la b yõogd maand yibeoog ne zaabre,+ Vʋʋsg rayã sasa,+ ki-paal sasa,+ la tõnd Wẽnnaam a Zeova tigã sasa.+ Rẽ yaa tõog Israyɛll nebã sẽn tog n tũ wakat fãa. 5 Roog ning m sẽn dat n me wã na n yɩɩ kãsenga, bala tõnd Wẽnnaamã yaa kãseng n yɩɩd wẽnnaam-dãmb a taabã fãa. 6 La ãnd n tõe n me roog n kõ-a? Baa saasẽ saagã pa tõe n deeg-a ye.+ Woto wã, mam yaa ãnd n na n me roog n kõ-a? Mam sẽn tõe bal yaa m me zĩig b sẽn na n maand maand sẽn nusd bug-zõos yẽ yĩnga. 7 Tʋm-y nug-tʋʋm dãmb sẽn mi sãnem tʋʋma, wanzuri, zũudu,+ kutu, rũms kõbd gĩs sẽn yaa miid-miidu, gĩs-moaam la gĩs sẽn yaa kẽeg haoo* tʋʋma, la sẽn tõe n tall kɩtg n gʋle, t’a wa mam nengẽ. A na n tʋma Zida ne Zerizalɛm, n naag nug-tʋʋm dãmb nins m ba a Davɩɩd sẽn bao n kõ-mã.+ 8 La y tool-m Libã sɛɛdr tɩɩs raado, ne zenevirie tɩɩs+ raad la algumim raado.+ Bala mam miime tɩ yãmb tʋm-tʋmdbã mii Libã+ tɩɩs kɛɛbo. Mam tʋm-tʋmdbã na n naaga yãmb tʋm-tʋmdbã,+ 9 tɩ b segl raad wʋsg n kõ-ma. Bala roog ning mam sẽn tog n me wã na n yɩɩ kãseng hal wʋsgo. 10 La ade! Mam na n kõo yãmb tʋm-tʋmdbã rɩɩbo,+ b rãmb nins sẽn na n kɛ tɩɩsã yĩnga. Yaa bɩle koor* tus-pisi, orz* koor tus-pisi, divẽ bat* tus-pisi la kaam bat tus-pisi.”
11 Tɩɩr rĩm a Hiram gʋlsa sebr n tool a Salomo n yeele: “Yaa a Zeova sẽn nong a nin-buiidã yĩng la a sẽn yãk yãmb tɩ y lebg a nin-buiidã rĩmã.” 12 A Hiram leb n yeelame: “Bɩ Israyɛll Wẽnnaam a Zeova paam pẽgre, soab ning sẽn naan saasã ne tẽngã. Bala yẽ kõo rĩm a Davɩɩd biig sẽn tar yam,+ n yaa gũus-m-meng soaba, la sẽn tar bãngre,+ n na n me roog a Zeova yĩnga, la roog a rĩungã yĩnga. 13 Mam tʋmda nug-tʋʋm dãmb sẽn tar minim n pid ne bãngre. Yaa a Hiram-abi+ 14 sẽn yaa Dan buudã pag bi-riblã, t’a ba wã yaool n yaa Tɩɩr nedã. Yẽ tara minim sãnem tʋʋm wɛɛngẽ, wanzuri tʋʋma, zũudu, kutu, kuga, raado, rũms kõbd gĩs sẽn yaa miid-miid tʋʋm wɛɛngẽ, gĩs sẽn yaa kẽeg haoo* tʋʋma, fut sẽn wʋg ne gĩs-bãaneg la ne gĩs-moaam+ tʋʋm wɛɛngẽ. A tõe n talla kɩtg n gʋle, la a maan bũmb fãa wa sẽn zems mamsg ning b sẽn kõ-a wã.+ A na n tʋma ne yãmb nug-tʋʋm dãmbã sẽn tar minimã, la ne yãmb ba a Davɩɩd sẽn yaa m zu-soabã nug-tʋʋm dãmbã sẽn tar minimã. 15 La masã, bɩ m zu-soabã tool bɩle wã ne orzã,* la kaamã ne divẽ wã yẽ sẽn pʋlem a tʋm-tʋmdbã.+ 16 La tõnd na n kɛɛ Libã+ tɩɩsã wa yãmb sẽn datã tɛka, la d sẽb raadã n tũnug mogrã tɩ ta Zope,+ tɩ yãmb wa wʋk n kẽng Zerizalɛm.”+
17 A Salomo sõda sãamb nins fãa sẽn da be Israyɛll soolmẽ wã,+ a ba a Davɩɩd sẽn sõd nin-buiidã poore,+ n mik tɩ yaa neb tus-koabg la pis-nu la a tãab la kobs-yoobe. 18 Woto, a kɩtame tɩ bãmb tus-pis-yopoe da yaa tʋm-tʋmd-zaalse,* tɩ tus-pis-nii peesd kug+ tãensã zutu, tɩ tus a tã la kobs-yoob yaa yel-gɛtba, n kɩtdẽ tɩ nebã tʋmdẽ.+
3 A Salomo sɩnga a Zeova roogã meeb+ Zerizalɛm, Moriya+ tãngã zugu, zĩig ning a Zeova sẽn da vẽneg a meng ne a ba a Davɩɩdã.+ Yaa zĩig ning a Davɩɩd sẽn da maneg Zebuus rao a Ornan zɛɛgẽ wã.+ 2 A sɩnga meebã kiuug a yiib-n-soabã rasem a yiib-n-soabã daare, a naamã yʋʋm a naas-n-soabã. 3 A Salomo yẽbga Wẽnnaam roogã t’a woglmã yaa kãntɩɩg pis-yoobe, t’a yalmã yaa kãntɩɩg pisi,+ wa sẽn zems pĩnd dãmbã makdgã.* 4 Zãongã* sẽn da be taoorã woglem ra yaa kãntɩɩg pisi, wa sẽn zems roogã yalem, t’a zãntlmã yaa koabg la pisi.* Yẽ gãnega roogã pʋg ne sãnem halaale.+ 5 Yẽ luda ro-bedrã pʋg ne zenevirie raado, n bolg-a ne sãnem halaale,+ la a gʋl koms tɩɩs a zugu,+ n nags-a ne bãense.+ 6 Sẽn paase, yẽ gãnega roogã ne kug-neeba.+ Sãnemã+ a sẽn tall n bolg roogã yaa Parvayim sãnem. 7 A bolga roogã, sug-raadã, rigno-kogsã, lalsã la kʋɩlensã ne sãnem.+ A gʋla seribẽ-rãmb lalsã zutu.+
8 Yẽ maana Zĩ-sõng sẽn yɩɩdã ro-pʋgã+ t’a woglmã yaa kãntɩɩg pisi, n zems roogã yalem, t’a yalmã me yaa kãntɩɩg pisi. Yẽ bolg-a-la ne sãnem halaal+ talã* kobs-yoobe. 9 Põentsã sãnem zɩslem ra yaa sɩkl* pis-nu, la a bolga yĩngr ro-pʋsã ne sãnem.
10 Yẽ maana seribẽ-rãmb a yiib Zĩ-sõng sẽn yɩɩdã ro-pʋgẽ wã, n bolg-b ne sãnem.+ 11 Seribẽ-rãmbã+ pɩgsã woglem fãa ra yaa kãntɩɩg pisi. A yembr pɩgsr woglem ra yaa kãntɩɩg a nu, n da sɩɩsd roogã lalga, t’a pɩgsr a to wã woglem yaa kãntɩɩg a nu, n sɩɩsd seribẽ a to wã pɩgsre. 12 La seribẽ a to wã pɩgsr woglem ra yaa kãntɩɩg a nu, n da sɩɩsd roogã lalg a to wã, t’a pɩgsr a to wã woglem yaa kãntɩɩg a nu, n sɩɩsd pipi seribẽ wã pɩgsre. 13 Seribẽ-kãensã pɩgsã sẽn da tẽegã woglem yaa kãntɩɩg pisi. B ra yasa b nao zut tɩ b nensã tees roogã pʋgẽ.*
14 A leb n maana fu-lilldgã+ ne gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la fuug sẽn wʋg ne gĩs-bãanega, n gʋl seribẽ-rãmb a zugu.+
15 Yẽ maana ra-lugs+ a yiib roogã taoore, tɩ b woglmã ra yaa kãntɩɩg pis-tã la a nu. Puglã sẽn da fõg ra-luk fãa zugã ra yaa kãntɩɩg a nu.+ 16 Yẽ leb n maana bãens sẽn wõnd yãndo, n yagl-b ra-lugsã zutu, la a maan gernaad tɩɩg biis bãmb koabg n yagl bãensã zutu. 17 Yẽ lugla ra-lugsã wẽnd-doogã taoore, a yembr rɩtgo, a to wã goabga. Yẽ boola rɩtg soabã tɩ Yakin,* la goabg soabã tɩ Bowaaze.*
4 A Salomo maana zũud tẽn-kugrã+ t’a woglmã yaa kãntɩɩg pisi, a yalmã kãntɩɩg pisi, t’a zãntlmã yaa kãntɩɩg piiga.
2 Rẽ poore, a maana zũud Mogrã.*+ A ra yaa gilga, t’a noorã kɩreng a ye n tãag a kɩreng a to wã yaa kãntɩɩg piiga, t’a zãntlmã yaa kãntɩɩg a nu. Yaa wĩir woglem sẽn ta kãntɩɩg pis-tã n tõe n vilimd-a n soge.+ 3 Yẽ nagsa a noorã tẽngr ne kãana,+ n gilg-a zãnga. Mogrã noor fãa zugu, kãntɩɩg fãa ra yaa bãmb piiga. La kãanã ra yaa ruls a yiibu, tɩ b naag b fãa n yõg ne mogrã. 4 Mogrã da roga lols piig la a yiib zugu.+ A tãab nens n da tees rɩtgo, t’a tãab tees nin-taoore, t’a tãab tees goabga, t’a tãab tees yaanga, tɩ Mogrã rog b zugu. Lolsã seesã fãa ra teesa taaba. 5 Mogrã taglem ra yaa nug-biis a naase.* La b maana a noorã wa wũmbl noore, n yaa wa rulg-lɛlma. Mogrã ra tõe n deega koom bat* tus a tãabo.
6 Sẽn paase, a maana la-pogd piig waasg yĩnga, n ning bãmb b nu rɩtgo, a nu goabga.+ B ra pɛgsda bũmb nins b sẽn tall n maan maoong sẽn yõogd bugmã beenẽ.+ La mogrã ra yaa maan-kʋʋdbã waasg yĩnga.+
7 Yẽ maana sãnem fɩtl-dogends piig+ wa b sẽn tog n yɩ to-to wã,+ n ning-b wẽnd-doogã pʋgẽ, a nu rɩtgo, a nu goabga.+
8 Yẽ maana taabl-dãmb piig n ning-b wẽnd-doogã pʋgẽ, a nu rɩtgo, a nu goabga,+ la a maan sãnem laas koabga.
9 A maana maan-kʋʋdbã samandã+ ne saman-kãsengã,+ la samanã kʋɩlense, n bolg kʋɩlensã ne zũudu. 10 La yẽ ninga zũud mogrã rɩtgo, yaang sẽnese.+
11 A Hiram maana tompɛglem laasã me, pell-dãmbã ne laasã.+
Woto, a tʋma tʋʋm nins fãa rĩm a Salomo sẽn yeel-a t’a tʋm Wẽnnaam roogã yĩngã n sa:+ 12 Yaa ra-lugs+ a yiibã ne b pugli wã sẽn da yaa wa rʋgd n fõg b zutẽ wã, gãmba+ a yiibã sẽn na n ning pugli wã sẽn da be ra-lugsã zugã, 13 gernaad tɩɩg biis bãmb kobs-naasã+ gãmba a yiibã yĩnga, gernaad tɩɩg biis ruls a yiibã gãmbr fãa yĩnga, b sẽn na n ning pugli wã sẽn wõnd rʋgdã sẽn be ra-lugsã zugã,+ 14 bilim-bilim* piigã ne la-pogd piigã sẽn be b zutã,+ 15 Mogrã ne lols piig la a yiibã sẽn be a tẽngrã,+ 16 tompɛglem laasã, pell-dãmbã, yaagdsã,+ la teedã fãa a Hiram-abiiv+ sẽn maan ne zũud b sẽn saase, n kõ rĩm a Salomo a Zeova roogã yĩngã. 17 Rĩmã kɩtame tɩ b rõog te-kãens yagd pʋgẽ Zʋrdẽ kʋɩlgã soolmẽ, Sukot+ ne Zereda sʋka. 18 A Salomo maana te-kãensã fãa wʋsgo. B pa mak zũudã n bãng a zɩslem ye.+
19 A Salomo maana Wẽnnaam roogã teed fãa:+ Sãnem tẽn-kugrã,+ taabl-dãmb+ nins zug b sẽn dogend burã b sẽn kõt Wẽnnaamã,+ 20 fɩtl-dogendsã ne b fɩtl-dãmbã sẽn maan ne sãnem halaal+ tɩ b wit Zĩ-sõng sẽn yɩɩdã noorẽ wã wa sẽn zems noy nins b sẽn gãnegã, 21 tɩ-puudã, fɩtl-dãmbã la yɩʋʋsã, fãa sẽn yaa ne sãnem halaalã, 22 teed nins b sẽn tar n kiisd fɩtl-dãmbã bugmã, laasã, wũmbli wã la bugum laasã, fãa sẽn maan ne sãnem halaalã. Sẽn na n baase, a maana roogã noor ne a pʋgẽ kʋɩlensã Zĩ-sõng sẽn yɩɩdã yĩnga,+ la wẽnd-doogã kʋɩlensã, b fãa ne sãnem.+
5 A Salomo tʋma tʋʋm nins fãa a sẽn da segd n tʋm a Zeova roogã yĩngã n baase.+ Rẽ poore, a kɩtame tɩ b tɩ tall teed nins a ba a Davɩɩd sẽn da welg toor Wẽnnaam yĩngã*+ n wa kẽese, la a rɩk wanzuri wã, sãnemã la teed a taabã fãa n ning Wẽnnaam roogã laog bĩngr zĩisẽ.+ 2 Wakat kãnga, a Salomo tigma Israyɛll kãsem-dãmbã, Israyɛll buud toɛy-toɛyã fãa taoor dãmb la b buudã rot taoor dãmba. Bãmb waa Zerizalɛm n na n dɩk a Zeova kaoolã koglg a Davɩɩd tẽngẽ wã,+ rat n yeel tɩ Siyõ.+ 3 Israyɛll rapã fãa tigma taab rĩmã taoore, tigr* ning b sẽn maand kiuug a yopoe-n-soabã sasa.+
4 Dẽ, Israyɛll kãsem-dãmbã fãa waame, tɩ Levi buudã neb rɩk Koglgã.+ 5 Bãmb rɩka Koglgã, sɛk-roogã,+ la te-sõamyã nins fãa sẽn da be fu-roogẽ wã. Maan-kʋʋdbã ne Levi buudã neb* rɩka bõn-kãense. 6 Rĩm a Salomo ne Israyɛll nin-buiidã fãa b sẽn da bool tɩ b wa tigim rĩmã nengẽ wã ra bee Koglgã taoore. Bãmb kʋʋ piis ne niis wʋsg n maan maando,+ hal tɩ b pa tõe n sõde, bɩ n bãng b sõorã ye. 7 Dẽ, maan-kʋʋdbã talla a Zeova kaoolã koglg n tɩ ning a zĩigẽ, taoor-taoor doogã sẽn yaa Zĩ-sõng sẽn yɩɩdã pʋgẽ, seribẽ-rãmbã pɩgsã tẽngre.+ 8 Seribẽ-rãmbã pɩgsã ra tẽegame n lud zĩig ning Koglgã sẽn be wã, tɩ seribẽ-rãmbã ra be Koglgã zugẽ, n lud-a ne a ra-bɩlmã.+ 9 Ra-bɩlmã ra wogmame, hal tɩ ned sã n be Zĩ-sõngã sẽn be Zĩ-sõng sẽn yɩɩdã taoor bɩ a ne b zutã. La a soab sã n be yɩnga, a pa ne-b ye. Bãmb keta be hal ne rũndã. 10 Bũmb da pa be Koglgã pʋgẽ n zʋʋg kug-wals a yiibã ye. Yaa kug-wals nins a Moyiiz sẽn ning be Horɛɛbã,+ a Zeova sẽn da wa n maan kaool+ ne Israyɛll nebã b sẽn wa n yi Ezɩptã.+
11 Maan-kʋʋdbã sẽn yi zĩ-sõngẽ wã, (bala maan-kʋʋdb nins sẽn da be be wã ra yɩlga b mense,+ baa b sẽn da yaa sull ning fãa maan-kʋʋdba)+ 12 Levi buudã neb nins fãa sẽn da yaa yɩɩn-yɩɩndb+ t’a Azaf+ ne a Heman+ la a Yedutun+ ne b kom-dibli wã la b ba-biisã yaa b taoor dãmbã ra yera fut sẽn wʋg ne gĩs-bãanega, n zãad waase, yʋʋm-teed sẽn tar riss la pendse. Bãmb da yasa tẽn-kugrã yaanga, tɩ maan-kʋʋdb koabg la pisi sẽn da peebd tãntãad be ne-ba.+ 13 Neb nins sẽn peebd tãntãadã ne yɩɩn-yɩɩndbã ra naaga taab koɛɛg a yembr n pẽgd a Zeova n pʋʋsd-a barka, tɩ tãntãadã, waasã la yʋʋm-teed a taabã rãamd zẽkdẽ tɩ b pẽgd a Zeova n yetẽ: “Bala a yaa sõma, a maan-neerã paada wakat fãa.”+ Wakat kãnga, sawadg n pid roogã, a Zeova roogã.+ 14 Maan-kʋʋdbã ra pa tõe n tʋm b tʋʋmã, sawadgã yĩnga. Bala Wẽnnaam a Zeova ziirã ra pida a roogã.+
6 Wakat kãnga, a Salomo yeelame yaa: “Zeova, yãmb da yeelame tɩ y na n zĩnda lik bida pʋgẽ.+ 2 Masã, mam mee roog sẽn tar ziir yãmb yĩnga, zĩig yãmb sẽn na n zĩnd wakat fãa yĩnga.”+
3 Dẽ, rĩmã wẽnemdame n tees Israyɛll nin-buiidã fãa, n na n ning-b barka, tɩ Israyɛll nin-buiidã fãa yas yĩngri.+ 4 A yeelame: “Bɩ Israyɛll Wẽnnaam a Zeova paam pẽgre, soab ning sẽn yaag a noor n pʋlem m ba a Davɩɩde, la a pids a pʋlengã ne a meng nusã pãng n yeele: 5 ‘Hal daar ning mam sẽn yiis m nin-buiidã Ezɩpt soolmẽ wã tɛka, mam pa yãk tẽng baa a ye Israyɛll soolmã tẽns toɛy-toɛyã pʋsẽ, n na n me roog m yʋʋrã yĩng n zĩnd be ye.+ La mam pa yãk ned t’a na n lʋɩ Israyɛll nebã sẽn yaa m nin-buiidã taoor ye. 6 La mam yãka Zerizalɛm+ tɩ m yʋʋrã na n zĩnd be, la m yãk a Davɩɩd t’a rɩ naam Israyɛll nebã sẽn yaa m nin-buiidã zugu.’+ 7 La m ba a Davɩɩd da rata ne a sũur fãa n me roog Israyɛll Wẽnnaam a Zeova yʋʋrã yĩnga.+ 8 La a Zeova yeela m ba a Davɩɩd yaa: ‘Fo rata ne f sũur fãa n me roog mam yʋʋrã yĩnga. Fo sẽn dat rẽ wã yaa bõn-neere. 9 La pa foom n na n me roogã ye. Yaa biig ning fo sẽn na n dogã* n na n me roog mam yʋʋrã yĩnga.’+ 10 A Zeova pidsa a pʋlengã, bala mam ledga m ba a Davɩɩde, n zĩ Israyɛll naam geerã zug+ wa a Zeova sẽn da pʋlmã.+ Sẽn paase, mam mee roogã Israyɛll Wẽnnaam a Zeova yʋʋrã yĩnga. 11 La mam ninga Koglgã sẽn tar kaoolã+ a Zeova sẽn maan ne Israyɛll nebã beenẽ.”
12 Dẽ, a Salomo yalsa a Zeova tẽn-kugrã sɛɛgẽ, Israyɛll nin-buiidã fãa taoore, n zẽk a nusã.+ 13 (Bala a Salomo ra maana pibr ne zũud n ning samandã tẽn-sʋka.+ A woglmã ra yaa kãntɩɩg* a nu, t’a yalmã yaa kãntɩɩg a nu, t’a zãntlmã yaa kãntɩɩg a tãabo. Yẽ ra yasa a zugu.) A yĩgimda Israyɛll nin-buiidã fãa taoor n zẽk a nus n tees yĩngri,+ 14 n yeele: “Israyɛll Wẽnnaam a Zeova, Wẽnnaam a to ka be saasẽ, wall tẽngã zug n wõnd yãmb ye. Yãmb pidsda y kaoolã la y nong y tʋm-tʋmdbã sẽn tũud yãmb ne b sũy fãa wã ne nonglem sẽn pa sate.+ 15 Yãmb pidsa bũmb ning y sẽn pʋlem m ba a Davɩɩdã.+ Yãmb yaaga y noor n pʋlme, la rũndã yãmb pidsa y pʋlengã ne y nugã pãngã.+ 16 La masã, Israyɛll Wẽnnaam a Zeova, bɩ y kell n pids bũmb ning y sẽn pʋlem m ba a Davɩɩd sẽn yaa y tʋm-tʋmdã. Yãmb da yeel-a lame: ‘Fo kom-dibli wã sã n gũus ne b yel-manesmã, n tũ mam tõogã+ wa fo sẽn kẽn mam taoorã,+ fo roogã kõn tol n kong rao sẽn na n zĩnd Israyɛll naam geerã zug ye.’ 17 La masã, Israyɛll Wẽnnaam a Zeova, bɩ y kɩt tɩ yãmb sẽn pʋlem m ba a Davɩɩd sẽn yaa y tʋm-tʋmdã bũmb ningã pidsi.
18 “La Wẽnnaam sɩd na n zĩnda tẽngã zug ne ninsaalbã bɩ?+ Ade! Baa saasẽ saagã* pa tõe n deeg yãmba,+ tɩ b gomd ro-kãngã mam sẽn me wã ye.+ 19 La masã, mam Wẽnnaam a Zeova, bɩ y kelg y tʋm-tʋmdã pʋʋsgã la a se-yõkrã. Kelg-y y tʋm-tʋmdã sẽn kelemd n kot sõngrã, la a pʋʋsgã a sẽn pʋʋsd yãmb taoorã. 20 Bɩ yãmb nif get ro-kãngã wĩntoog la yʋngo, zĩig ning yãmb sẽn da yeel tɩ y yʋʋrã na n zĩndame wã,+ tɩ y tʋm-tʋmdã sã n tees ro-kãngã n pʋʋs yãmb bɩ y kelge. 21 Kelg-y y tʋm-tʋmdbã sẽn kot yãmb sõngrã, la Israyɛll nebã sẽn yaa y nin-buiidã kosgã b sẽn na n tees ro-kãngã n kosã.+ Bɩ y zĩnd saasẽ,+ zĩig ning yãmb sẽn be wã, n kelge. Kelg-y la y kõ-b sugri.+
22 “B sã n wa yeel ned t’a beega a to, n kɩt t’a wẽen tɩ tõe n wa ne yell* a zugu, a sã n wa tẽn-kugrã taoor do-kãngã pʋgẽ wẽenegã* yĩnga,+ 23 bɩ y zĩnd saasẽ n kelg la y kao y tʋm-tʋmdbã bʋʋdo, n sɩbg nin-wẽngã wa sẽn zems a tʋʋm-tʋmdɩ wã,+ la y wilg tɩ nin-tɩrgã pa tar taale, n dol-a wa sẽn zems a tɩrlmã.+
24 “Bɛ sã n tõog Israyɛll nebã sẽn yaa yãmb nin-buiidã b sẽn beegd yãmbã yĩnga,+ b sã n lebg n wa yãmb nengẽ n pẽg yãmb yʋʋrã+ la b pʋʋs yãmb+ n yõk y sɛɛg ro-kãngã pʋgẽ,+ 25 bɩ y zĩnd saasẽ n kelg+ la y kõ Israyɛll nebã sẽn yaa y nin-buiidã yel-wẽnã sugri, n tall-b n lebg n wa tẽng ning yãmb sẽn kõ bãmb ne b yaab-rãmbã pʋgẽ.+
26 “Saasã sã n pag tɩ saag pa le niid+ yãmb nin-buiidã sẽn beegd yãmbã yĩnga,+ b sã n tees ro-kãngã n pʋʋs yãmb la b pẽg yãmb yʋʋrã, n bas b yel-wẽnã yãmb sẽn kibl-bã* yĩnga,+ 27 bɩ y zĩnd saasẽ n kelg la y kõ Israyɛll nebã sẽn yaa y nin-buiidã sugr b yel-wẽnã yĩnga. Bala yãmb na n zãmsa bãmb tɩ b bãng so-sõng ning b sẽn segd n tũ wã,+ la y kɩt tɩ saag ni+ tẽng ning y sẽn kõ y nin-buiidã tɩ yɩ b pʋɩɩrã pʋgẽ.
28 “Kom bɩ bã-loangdg sã n kẽ soolmã pʋgẽ,+ pa rẽ bɩ pems-tʋʋlg sã n kɩt tɩ koodã kʋɩ, kood bãaga,+ kalwaar bɩ sʋy sẽn dɩt wʋsgo,+ wall b bɛɛb sã n wa gũbg bãmb b soolmã tẽng ning pʋgẽ,+ bɩ yel-beed sã n paam-ba, wall bãag n yõk-ba,+ 29 sẽn yaa pʋʋsg ning fãa,+ bɩ sẽn yaa se-yõkr ning fãa la neda,+ wall Israyɛll nebã fãa sẽn yaa y nin-buiidã maan-yã, (bala ned fãa mii yel-beed ning sẽn paam-a la toog ning sẽn be ne-a,)+ b sã n zẽk b nus n tees ro-kãngã,+ 30 bɩ y zĩnd saasẽ, zĩig ning yãmb sẽn be wã+ n kõ sugr+ la y keo ned kam fãa wa sẽn zems a tʋʋma. Bala yãmb mii sẽn be a sũurẽ, (yãmb y ye bal n sɩd mi sẽn be ninsaal sũurẽ,)+ 31 sẽn na yɩl tɩ b zoe yãmba, n tũ yãmb soayã wakat ning fãa b sẽn na n zĩnd tẽng ning yãmb sẽn kõ d yaab-raabã pʋgẽ.
32 “Sẽn paase, sãan sẽn pa Israyɛll ned sã n yi zĩ-zãrgẽ n wa ka yãmb yʋ-kãsengã+ la y pãn-kãsengã* yĩnga, n tees ro-kãngã n pʋʋse,+ 33 bɩ y zĩnd saasẽ, zĩig ning yãmb sẽn be wã, n kelg la y maan sãanã sẽn kos bũmb ning fãa, sẽn na yɩl tɩ dũniyã nebã fãa bãng yãmb yʋʋrã+ la b zoe yãmba, wa Israyɛll nebã sẽn yaa y nin-buiidã sẽn zoet yãmbã, la b bãng me tɩ yãmb yʋʋrã bee ro-kãngã mam sẽn me wã zugu.
34 “Yãmb sã n tʋm y nin-buiidã tɩ b kẽng n tɩ zab ne b bɛɛba,+ b sã n tees tẽn-kãngã yãmb sẽn yãkã, la roog ning mam sẽn me yãmb yʋʋrã yĩngã n pʋʋs yãmba,+ 35 bɩ y zĩnd saasẽ n kelg b pʋʋsgã ne b se-yõkrã, la y kao bʋʋdã n sõng-ba.+
36 “B sã n beeg yãmba, (bala ned kae n pa beegdẽ ye,)+ tɩ y sũur puug ne bãmb tɩ kɩt tɩ y bas-b b bɛɛbã nugẽ, b bɛɛbã sã n tall-b n kẽng tẽng a to, yaa zĩ-zãrgẽ wall zĩig sẽn pẽ,+ 37 bãmb yamã sã n tek tẽng ning pʋgẽ b sẽn yõg-b n kẽngã tɩ b lebg n wa yãmb nengẽ n yõk yãmb sɛɛg beenẽ n yeele: ‘Tõnd beegame, n maan sẽn pa sõma, tõnd tʋma tʋʋm-wẽnse,’+ 38 b sã n lebg n wa yãmb nengẽ ne b sũur fãa,+ la b sɩɩg* fãa tẽng ning pʋgẽ b sẽn yõg-b n kẽngã,+ n tees soolem ning yãmb sẽn kõ b yaab-rãmbã, la tẽng ning yãmb sẽn yãkã+ ne roog ning mam sẽn me yãmb yʋʋrã yĩngã n pʋʋse, 39 bɩ y zĩnd saasẽ, zĩig ning yãmb sẽn be wã, n kelg b pʋʋsgã ne b se-yõkrã, n kao bʋʋdã n sõng-ba,+ la y kõ y nin-buiidã sẽn beeg yãmbã sugri.
40 “Masã m Wẽnnaam, m kotame tɩ y puk y nin la y kɩll y tʋbr n kelg pʋʋsg ning fãa b sẽn pa zĩ-kãngã n pʋʋse.*+ 41 Wẽnnaam a Zeova, yik-y n kẽ-y y vʋʋsg zĩigẽ wã,+ yãmb ne Koglg ning sẽn makd y pãngã. Wẽnnaam a Zeova, bɩ yãmb maan-kʋʋdbã yeelg fãagre, la bɩ neb nins sẽn maand sɩd ne yãmbã kɩdem sũ-noog yãmb sõmblmã pʋgẽ.+ 42 Wẽnnaam a Zeova, bɩ y ra raag y sẽn yãk* a soabã+ n bas ye. Bɩ y tẽeg neer ning yãmb sẽn maan y tʋm-tʋmd a Davɩɩdã.”+
7 A Salomo sẽn pʋʋs n sa wã bala,+ bugum n yi saasẽ+ n wa rɩ maoongã sẽn yõogd bugmã ne maand a taabã, la a Zeova ziirã pida roogã.+ 2 Maan-kʋʋdbã ra pa tõe n kẽ a Zeova roogẽ wã ye. Bala a Zeova roogã ra pida ne a Zeova ziirã.+ 3 La Israyɛll nebã fãa ra yas n getame tɩ bugum yit yĩngr n sigda, t’a Zeova roogã pid ne a ziirã. Bãmb wõgemdame n fõgen b nens tẽng zĩig ning b sẽn gãneg kug sẽn peesã, la b wõgemd n pʋʋs a Zeova bark n yeele: “Bala a yaa sõma, a maan-neerã paada wakat fãa.”
4 Rĩmã ne nin-buiidã fãa maana maand a Zeova taoore.+ 5 A Salomo kʋʋ niis tus-pisi la a yiibu, ne piis tus-koabg la pisi n maan maando. Woto, rĩmã ne nin-buiidã fãa maana tigr Wẽnnaam doogã pakr yĩnga.+ 6 Maan-kʋʋdbã ra yasa b tʋʋmã zĩisẽ, wa Levi buudã neb me sẽn da yas b zĩisẽ n zãad yʋʋm-teed nins b sẽn tar n yɩɩnd a Zeova yĩngã.+ (Rĩm a Davɩɩd ra maana yʋʋm-te-kãens tɩ b na n tar-b n pʋʋsd a Zeova barka, tɩ wakat ning fãa a Davɩɩd sẽn pẽgd Wẽnnaam ne-ba,* bɩ b reesd n yetẽ: “A maan-neerã paada wakat fãa.”) La maan-kʋʋdbã ra peebda tãntãad bãmb taoor tɩ rãamdã zẽkdẽ,+ tɩ Israyɛll nebã fãa yasẽ.
7 Dẽ, a Salomo kɩtame tɩ samand ning sẽn be a Zeova roogã taoor tẽn-sʋkã yɩ sõngo. Yɩɩ tɩlɛ t’a maan maand sẽn yõogd bugmã+ la a kõ zems-n-taar maandã kaam beenẽ. Bala zũud tẽn-kugrã+ a Salomo sẽn da maanã ra pa tõe n deeg maand sẽn yõogd bugmã, kood biis kũunã,+ la maandã kaam ye.+ 8 Wakat kãnga, a Salomo ne Israyɛll nebã fãa maana tigrã rasem a yopoe.+ Neb kʋʋng-kʋʋng sẽn yi hal Lebo-hamat* n tãag Ezɩpt kosoogã* n wa.+ 9 La rasem a nii-n-soabã daare,* bãmb maana tigsg sẽn yaa zalle.+ Bala bãmb maana tẽn-kugrã pakr tigr rasem a yopoe, la tigrã rasem a yopoe. 10 La kiuug a yopoe-n-soabã rasem pisi la a tãab-n-soabã daare, yẽ kuilsa nin-buiidã b zagsẽ ne kɩdeng+ la sũ-noogo, bõn-sõma nins fãa a Zeova sẽn da maan n kõ a Davɩɩd ne a Salomo la Israyɛll nebã sẽn yaa a nin-buiidã yĩnga.+
11 Woto, a Salomo mee a Zeova roogã ne na-yirã n sa.+ Yẽ tõogame n maan bũmb nins fãa a sẽn da rat ne a sũur fãa n maan a Zeova roogã ne a meng roogã wɛɛngẽ wã.+ 12 Rẽ poore, a Zeova vẽnega a meng ne a Salomo+ ne yʋngã n yeel-a yaa: “Mam wʋma fo pʋʋsgã, la mam yãka ro-kãngã t’a na n yɩ zĩig b sẽn na n maand maando.+ 13 Mam sã n pag saasã tɩ kɩt tɩ saag pa le niida, la mam sã n kɩt tɩ sʋy sẽn dɩt kood sãam soolmã, wall m sã n tʋm bã-loangdg m nin-buiidã sʋka, 14 mam nin-buiidã b sẽn boond ne mam yʋʋrã+ sã n sik b mens+ n pʋʋs maam la b bao maam n wẽnemd n bas b tʋʋm-wẽnsã,+ mam na n zĩnda saasẽ n kelg la m kõ b yel-wẽnã sugri, n lebs n maneg b tẽnga.+ 15 Masã, mam na n puka m nin la m kɩll m tʋbr n kelg pʋʋsg ning fãa b sẽn na n pʋʋs zĩ-kãngã.+ 16 La mam yãka ro-kãngã n kɩt t’a lebg sõngo, tɩ m yʋʋrã na n zĩnd a zug wakat fãa yĩnga,+ la tɩ mam ninã ne m sũurã na n zĩnd a zug wakat fãa.+
17 “La fo sã n tũ maam wa f ba a Davɩɩde, n maan bũmb nins fãa mam sẽn yeel foomã, la f sak mam noyã la m bʋ-kaoor toor-toorã,+ 18 mam na n vigla fo naamã geer+ wa m sẽn da maan kaool ne fo ba a Davɩɩd+ n yeel-a t’a roogã kõn tol n kong rao sẽn na n dɩ naam Israyɛllã.+ 19 La yãmb sã n wẽnemd n bas m noyã la m tõodã mam sẽn kõ yãmbã, la y sã n sɩng wẽnnaam-dãmb a taab tũub n wõgemd b taoore,+ 20 mam na n võo Israyɛll nebã tẽng ning m sẽn kõ-bã zugu,+ la m wẽnemd n bas roogã mam sẽn kɩt tɩ yaa sõng m yʋʋrã yĩngã, la m kɩt tɩ buud a taabã fãa yaal-a* la b paoog-a.+ 21 Ro-kãngã na n lebga raboogo. Na n linga ned ning fãa sẽn na n loog a sɛɛgẽ n ges-a,+ t’a soke: ‘Bõe yĩng t’a Zeova maan tẽn-kãngã la ro-kãngã woto?’+ 22 Dẽ, b na n leokame yaa: ‘Yaa bãmb sẽn bas b yaab-rãmbã Wẽnnaam a Zeova+ sẽn yiis-b Ezɩptã,+ la b sak wẽnnaam-dãmb a taab n wõgemd bãmb taoore, n tũ-bã yĩnga.+ Yaa rẽ la a sẽn kɩt tɩ to-kãngã fãa paam-bã.’”+
8 A Salomo mee a Zeova roogã ne a meng roogã* yʋʋm pisi pʋgẽ.+ 2 Rẽ poore, a lebs n mee tẽns nins a Hiram+ sẽn da kõ-a wã n zĩnig Israyɛll neb* beenẽ. 3 Sẽn paase, a Salomo kẽnga Hamat-zoba n tɩ reeg-a. 4 Dẽ, yẽ paasa Tadmoor sẽn be we-raoogẽ wã pãnga, la a paas tẽns nins fãa a sẽn da me Hamat+ n bĩngd teedã+ me pãnga. 5 A paasa tẽngr Bɛt-horonnã+ ne zugẽ Bɛt-horonnã+ pãng me, n gũbg-b ne lals sẽn tar kʋɩlens la sogdse. 6 A Salomo mee Baalate,+ n paas tẽns nins fãa a sẽn bĩngd teedã ne a saar-dãmbã,*+ a wed-rʋʋdbã tẽnse, la bũmb ning fãa a sẽn da rat n me Zerizalɛm, Libã, la soolem ning a sẽn so wã fãa pʋgẽ.
7 Sã n yaa ne Hɛt nebã, Amoor nebã, Perɛɛz nebã, Hevi nebã la Zebuus neb+ nins sẽn da ket soolmẽ wã n pa Israyɛll nebã,+ 8 b yagens nins sẽn da ket soolmã pʋgẽ wã, rat n yeel tɩ b rãmb nins Israyɛll nebã sẽn pa kʋ wã,+ a Salomo kɩtame tɩ b tʋmd tʋʋm-wɛgl n tãag rũndã.+ 9 La a Salomo pa kɩt tɩ Israyɛll ned baa a ye lebg a yamb n tʋmd a tʋʋmã ye.+ Bala bãmb n da yaa a tãb-biisi, a tãb-biisã nanambs taoor dãmba, la a saar-wẽndbã ne a wed-rʋʋdbã taoor dãmba.+ 10 Rĩm a Salomo ra tara tʋʋm taoor dãmb nanambs kobs-yi la pis-nu. Yaa bãmb n da yaa tʋm-tʋmdbã yel-gɛtba.+
11 A Salomo yiisa a Farawõ bi-puglã+ a Davɩɩd tẽngẽ wã me n tɩ kẽes-a zak ning a sẽn da me n kõ-a wã pʋgẽ,+ bala yẽ yeelame yaa: “Baa a sẽn yaa mam pagã, a pa segd n zĩnd Israyɛll rĩm a Davɩɩd zakẽ wã ye. Bala zĩis nins a Zeova Koglgã sẽn zĩndã yaa sõamyã.”+
12 A Salomo maana maand sẽn yõogd bugum+ n kõ a Zeova, a Zeova tẽn-kugr+ ning a sẽn me zãongã* taoorã zugu.+ 13 Yẽ maana wa b sẽn minim n maand daar fãa wã, n maan maand wa sẽn zems noor ning a Moyiiz sẽn kõ Vʋʋsg rayã wɛɛngẽ,+ ki-paalã,+ la tig nins b sẽn segd n maan naoor a tãab yʋʋmdã pʋgẽ wã wɛɛngẽ:+ Yaa Bur sẽn pa ning rabɩll tigrã,+ Kẽebgã tigrã,*+ la Zãn tigã.+ 14 Sẽn paase, a ninga maan-kʋʋdbã sul toɛy-toɛyã+ b tʋʋm zĩisẽ wa sẽn zems noor ning a ba a Davɩɩd sẽn da kõ wã, n ning Levi buudã neb b tʋʋm zĩisẽ tɩ b na n pẽgd+ Wẽnnaam la b tʋmd b tʋʋmã maan-kʋʋdbã taoor wa sẽn segd n yɩ to-to daar fãa wã, la a ning rigno-gũudbã sul toɛy-toɛyã sull fãa a rignoorẽ,+ bala yaa noor Wẽnnaam dao a Davɩɩd sẽn da kõ. 15 B pa bʋdg n bas noor ning rĩmã sẽn da kõ maan-kʋʋdbã ne Levi buudã neb bũmb fãa wɛɛngẽ, la teedã bĩngr dotã wɛɛngẽ wã ye. 16 A Salomo tʋʋmã fãa ra sigla sõma, sẽn sɩng ne a Zeova roogã yẽbgr daar+ n tãag a baasgo. Woto, b mee a Zeova roogã n sa.+
17 Yɩɩ wakat kãng la a Salomo kẽng Eziyon-gebɛɛr+ ne Elote,+ mogrã noore, Edom soolmẽ wã.+ 18 A Hiram+ tʋma a tʋm-tʋmdbã tɩ b tall koom-kogend ne neb sẽn mi mogrã zug tʋʋm sõma n tɩ kõ a Salomo. Bãmb tũu a Salomo tʋm-tʋmdbã n kẽng Ofɩɩr+ n tɩ tall sãnem talã* kobs-naas la pis-nu+ n wa kõ rĩm a Salomo.+
9 Saba+ rĩm-poakã wʋma b sẽn gomd a Salomo yʋʋrã sẽn yi wã yelle. Dẽ, yẽ waa Zerizalɛm n na n sok a Salomo sogsg sẽn yaa toogo, n mak-a n gese. Yẽ waa ne tʋm-tʋmdb kʋʋngo, ne yʋgma sẽn zɩlg bomiye kaam* la sãnem wʋsgo,+ ne kug-neeb wʋsgo. Rĩm-poakã kẽe a Salomo nengẽ n sok-a sogsg nins fãa sẽn da be a sũurẽ.+ 2 A Salomo leoka a sogsgã fãa. A sokr baa a ye pa yɩ toog wʋsg* ne a Salomo t’a pa tõog n leok ye.
3 Saba rĩm-poakã sẽn yã a Salomo yamã,+ roog ning a sẽn me wã,+ 4 a taablã rɩɩbo,+ a tʋm-tʋmdbã sẽn zĩ to-to a taablẽ wã, a tʋm-tʋmdb nins sẽn pʋɩt rɩɩbã taablẽ wã ne b fu-yerdɩ wã, neb nins sẽn pʋdgd bõn-yũudlã n kõt rĩmã ne b fu-yerdɩ wã, maand sẽn yõogd bugmã rĩmã sẽn maand a Zeova roogẽ wã wakat fãa wã,+ ling-a-la hal wʋsgo. 5 Dẽ, a yeela rĩmã yaa: “Bũmb ning mam sẽn da wʋm m tẽngẽ wã y tʋʋmã* la y yamã wɛɛngẽ wã ra yaa sɩda. 6 La sã n pa mam sẽn wa tɩ m nif yã wã, mam da pa tẽed ye.+ B sẽn togs maam bũmb ning yãmb yam-kãsengã wɛɛngẽ wã pa ta pʋɩ-sʋk meng ye.+ Mam sẽn yã wã yɩɩda bũmb ning m sẽn da wʋmã hal zĩig sẽn zãre.+ 7 Sũ-noog rãmb la rap la tʋm-tʋmdb nins sẽn be ne yãmb wakat fãa n kelgd y yam goamã! 8 Bɩ yãmb Wẽnnaam a Zeova paam pẽgre, soab ning sẽn nong yãmba, n zĩnig yãmb a naam geerã zug tɩ y yaa rĩm yãmb Wẽnnaam a Zeova yʋʋr yĩngã. Bala yaa yãmb Wẽnnaamã sẽn nong Israyɛll+ n dat t’a ket n be wakat fãa wã yĩng la a sẽn yãk yãmb tɩ y lebg Israyɛll rĩma, n na n kaood bʋʋd tɩrga, la y rɩt y naamã ne tɩrlmã.”
9 Rẽ poore, rĩm-poakã kõo rĩmã sãnem talã* koabg la pisi,+ la bomiye kaam* wʋsgo, ne kug-neeb wʋsgo. Ned zɩ n wa ne bomiye kaam wʋsg wa Saba rĩm-poakã sẽn kõ rĩm a Salomo wã ye.+
10 Sẽn paase, a Hiram tʋm-tʋmdbã ne a Salomo tʋm-tʋmdbã sẽn da yit Ofɩɩr+ n wat ne sãnemã ra yita be n wat ne algumim daado, la kug-neeb me.+ 11 Rĩmã rɩka algumim daadã n maan rʋʋds a Zeova roogã+ ne na-yirã yĩnga,+ la pends ne yʋʋm-teed sẽn tar riss yɩɩn-yɩɩndbã yĩnga.+ Hal n tãag rũndã, b ra nan zɩ n yã a buud Zida soolmã pʋgẽ ye.
12 Rĩm a Salomo me kõo Saba rĩm-poakã bũmb ning fãa a sẽn date, la a sẽn kose, n yɩɩg* bũmb ning a sẽn tall n wa kõ rĩmã. Rẽ poore, rĩm-poakã leba a tẽngẽ wã ne a tʋm-tʋmdbã.+
13 Sãnem ning a Salomo sẽn da paamd yʋʋmd fãa wã zɩslem yaa talã kobs-yoob la pis-yoob la a yoobe.+ 14 Sẽn paase, toandbã ne lɛɛbdbã la Araab-rãmbã rĩm-dãmb fãa ne soolmã guvɛrneer-dãmb ra wat n kõta a Salomo sãnem la wanzuri.+
15 Rĩm a Salomo kɩtame tɩ b kalem sãnem ne bũmb a taab n kud gãn-bɛd kobs-yi+ (gãong fãa maaneg rɩka sãnem sɩkl* kobs-yoobe,)+ 16 la gãn-bõoneg* kobs-tã b sẽn maan ne sãnem b sẽn kalem ne bũmb a taaba, (gãn-bil fãa maaneg rɩka sãnem min* a tãabo.) La a bĩng-b-la roog ning b sẽn boond tɩ Libã tɩɩs roogã pʋgẽ.+
17 Rĩmã kɩtame me tɩ b maan geer sẽn yaa kãseng ne wob-yẽna, n bolg-a ne sãnem halaale.+ 18 B ra tabda rʋʋds a yoob n ta geerẽ wã. Sãnem nao-roagendg n da tong ne geerã, la nug-roagendg n da be geerã goabg la rɩtgo, tɩ b maan gɩgma+ a yiib tɩ b yas nug-rogendsã sɛɛgẽ. 19 Gɩgma+ piig la a yiib n da yas rʋʋds a yoobã zugẽ, a yembr rʋʋdg fãa baasgẽ. Rĩung baa a ye ra zɩ n maan a naam geer woto ye. 20 Rĩm a Salomo sẽn da yũud ne teed ninsã fãa ra maana ne sãnem. Libã tɩɩs roogã teed fãa me ra maana ne sãnem halaale. B ra pa maan bũmb baa a ye ne wanzuri ye. Bala b ra geta wanzuri wa bõn-zaalg a Salomo wakatẽ wã.+ 21 Bala rĩmã koom-kogendã ra kẽnda Tarsiis+ ne a Hiram+ tʋm-tʋmdbã. Vugr yʋʋm a tãab fãa, Tarsiis koom-kogendã ra wata ne sãnem, wanzuri, wob-yẽna,+ wãamse, la bulwãad buudu.
22 Woto, rĩm a Salomo arzɛkã ne a yamã ra yɩɩda dũniyã rĩm-dãmb a taabã fãa.+ 23 Sẽn paase, dũniyã fãa rĩm-dãmb ra tʋll n yãa a Salomo n paam n kelg a yam goamã Wẽnnaam sẽn kõ-a wã.+ 24 B ned kam fãa ra wata ne kũuni: Yaa teed sẽn maan ne wanzuri, teed sẽn maan ne sãnem, futu,+ zab-teedo, bomiye kaam,* wed-moos la bõn-weese.* B ra maanda woto yʋʋmd fãa. 25 A Salomo ra tara rot tus a naas a wed-moosã ne a saar-dãmbã* yĩnga, la wed-moos* tus-piig la a yiibu.+ A ra ninga kẽer a saar-dãmbã tẽnsẽ, la a ning sãnda Zerizalɛm n pẽneg rĩmã.+ 26 A Salomo rɩɩ naam rĩm-dãmb nins fãa sẽn da be sẽn sɩng ne Kʋɩlgã* n tãag Filisti nebã soolmã ne Ezɩpt toadgã zugu.+ 27 Rĩmã kɩtame tɩ wanzuri wã lebg wʋsg Zerizalɛm wa kuga, tɩ sɛɛdr tɩɩs raadã me lebg wʋsg wa Sefela wã wom-seese.*+ 28 B ra kẽnda Ezɩpt+ la soolem a taabã fãa pʋsẽ n daad wed-moos n wat n kõt a Salomo.
29 A Salomo vɩɩmã kibay+ nins sẽn kellã, hal b sɩngr n tãag b saabo, b gʋlsa rẽ fãa no-rɛɛs a Natã+ sebrã pʋgẽ, Sɩlo rao a Ahiya+ bãngr-gomdã pʋgẽ, la vẽnegr nins bãngd* a Ido+ sẽn gʋls a Nebat biig a Zerobowam+ wɛɛngẽ wã pʋgẽ. 30 A Salomo zĩnda Zerizalɛm n dɩ naam Israyɛll fãa zug yʋʋm pis-naase. 31 Rẽ poore, a kii wa a yaab-rãmbã, la b mum-a-la a ba a Davɩɩd tẽngẽ wã,+ t’a biig a Roboam ledg-a n lebg rĩma.+
10 A Roboam kẽnga Sikɛm,+ bala Israyɛll nebã fãa ra waa be n na n yãk-a t’a lebg rĩma.+ 2 A Nebat biig a Zerobowam+ wʋma rẽ (wakat kãng t’a ra ket n bee Ezɩpti, bala a ra zoee rĩm a Salomo yĩng n tɩ be Ezɩpti.)+ La tao-tao bala, a yii be n wa. 3 Woto, bãmb tʋmame tɩ b tɩ bool a Zerobowam. Yẽ ne Israyɛll nebã fãa waa a Roboam nengẽ n yeel-a yaa: 4 “Yãmb ba wã kɩtame tɩ tõnd zɩɩbã yaa zɩsgo.+ La yãmb sã n yols tʋʋm-toogã y ba wã sẽn kõ tõndã, n kɩt tɩ zɩɩb ning a sẽn dogl tõndã lebg faasga, tõnd na n saka yãmba.”
5 Rẽ la a Roboam yeel-b yaa: “Kuil-y la y wa ka ne rasem a tãabo.” Dẽ, nin-buiidã loogame.+ 6 Rĩm a Roboam soka nin-kẽemb* nins sẽn da tʋm ne a ba a Salomo a sẽn wa n ket n vɩ wã yaa: “Yãmb sagenda maam tɩ m leok nin-buiidã tɩ bõe?” 7 Nin-kẽembã* leok-a lame yaa: “Yãmb sã n maan nin-kãensã neer n leok-b noog-noogo, b na n yɩɩ yãmb tʋm-tʋmdb wakat fãa.”
8 La a basa saglg ning nin-kẽembã* sẽn kõ-a wã, n yẽs ne kom-bɩɩs nins sẽn yaa a rog-taase, la sẽn lebg a tʋm-tʋmdb masã wã.+ 9 A sok-b lame yaa: “Nin-buiidã yeela maam tɩ m yols zɩɩb ning m ba wã sẽn zɩlg-bã. Yãmb sagenda maam tɩ m leok-b tɩ bõe?” 10 Kom-bɩɩs nins sẽn yaa a rog-taasã leok-a lame yaa: “Ad yãmb sẽn segd n leok nin-buiidã sẽn yeel tɩ y ba wã kɩtame tɩ bãmb zɩɩbã yaa zɩsgo, la tɩ y segd n yolsa rẽ n kõ-bã bũmb ninga. Yeel-y-b yaa: ‘Mam nug-bilã taglem na n yɩɩga m ba wã kɩɩlgo. 11 Mam ba wã rogla yãmb zɩɩb sẽn yaa zɩsgo, la mam na n paasa y zɩɩbã. Mam ba wã sɩbga yãmb ne sãbse, la mam na n sɩbga yãmb ne kalwaas-rãmba.’”
12 A Zerobowam ne nin-buiidã fãa kẽnga a Roboam nengẽ rasem a tãab-n-soabã daare, wa rĩmã sẽn da yeel-b tɩ b lebg n wa ka la rasem a tãabã.+ 13 La rĩmã leoka nin-buiidã ne mo-beedo. Woto, a tõdga saglg ning nin-kẽembã* sẽn kõ-a wã. 14 A tũu kom-bɩɩsã saglgã n yeel-b yaa: “Mam na n zɩsga yãmb zɩɩbã, mam na n paas-a lame. Mam ba wã sɩbga yãmb ne sãbse, la mam na n sɩbga yãmb ne kalwaas-rãmba.” 15 Woto, rĩmã pa kelg nin-buiidã ye. Bala Wẽnnaam n da rat tɩ yɩ woto,+ sẽn na yɩl t’a Zeova sẽn da kɩt tɩ Sɩlo rao a Ahiya+ togs a Nebat biig a Zerobowam bũmb ningã pidsi.
16 La rĩmã sẽn zãgs n pa kelg Israyɛll nebã yĩnga, bãmb leoka rĩmã yaa: “Bõe pʋɩɩr la tõnd tar ne a Davɩɩde? Tõnd pa tar rogem-pʋɩɩr ne a Zese* biigã ye. Israyɛll neba, bɩ y ned kam fãa leb a wẽnnaam-dãmbẽ! Bɩ a Davɩɩd+ ges a roogã rãmb yelle!” Dẽ, Israyɛll nebã fãa leba b zagsẽ.*+
17 La rĩm a Roboam ra ket n yaa Israyɛll neb nins sẽn be Zida tẽnsã pʋgẽ wã naaba.+
18 Rĩm a Roboam tʋma a Hadoram+ sẽn da get neb nins sẽn tʋmd tʋʋm-wɛglã yellã, la Israyɛll nebã lob-a-la ne kug n kʋ. Rĩm a Roboam paam n kẽe a saarã* n zoe n kẽng Zerizalɛm.+ 19 La Israyɛll nebã kell n tõdga a Davɩɩd roogã rãmb hal n tãag rũndã.
11 A Roboam sẽn ta Zerizalɛmmã, tao-tao bala, a tigma Zida roogã neb la Bẽnzame roogã neba,+ tãb-biis tus-koabg la pis-nii sẽn mi zabr sõma,* tɩ b na n tɩ zab ne Israyɛll nebã n deeg naamã n lebs a Roboam.+ 2 La a Zeova goma ne a Semaya+ sẽn yaa Wẽnnaam daoã n yeel-a yaa: 3 “Yeel a Salomo biig a Roboam sẽn yaa Zida rĩmã, ne Israyɛll neb nins fãa sẽn be Zida la Bẽnzame soolmẽ wã yaa: 4 ‘Ad a Zeova sẽn yeele: “Yãmb pa segd n tɩ zab ne y ba-biisã ye. Y ned kam fãa lebg n kuil a yiri, bala yaa maam n kɩt tɩ yɛlã yɩ woto.”’”+ Dẽ, bãmb saka a Zeova goamã n lebge, n pa tɩ zab ne a Zerobowam ye.
5 A Roboam zĩnda Zerizalɛm, la a me tẽns sẽn gũbg ne lals Zida. 6 Woto, yẽ lebs n manega Betlehɛm,+ Etam, Tekowa,+ 7 Bɛt-sʋʋr, Soko,+ Adulam,+ 8 Gat,+ Maresa, Zɩf,+ 9 Adorayim, Lakiis,+ Azeka+ 10 Zora, Ayalon+ la Ebrõ.+ Yaa tẽns sẽn da gũbg ne lals n be Zida ne Bẽnzame soolmẽ wã. 11 Sẽn paase, a paasa zĩis nins sẽn da gũbg ne lalsã pãnga, la a ning tãb-biis taoor dãmb beenẽ n da kõt-b rɩɩbo, kaam la divẽ, 12 la a kõ tẽns toɛy-toɛyã gãn-bɛd ne kãna. A paasa b pãngã hal wʋsgo. La yẽ kell n sooga Zida ne Bẽnzame.
13 Maan-kʋʋdbã ne Levi buudã neb sẽn da be Israyɛll soolmã fãa pʋgẽ wã yii b tẽnsã fãa pʋsẽ n wa n na n teel a Roboam. 14 Levi buudã nebã basa b rũms wãbneg zĩisã la b paoongã fãa+ n wa Zida ne Zerizalɛm. Bala a Zerobowam ne a kom-dibli wã ra yiisa bãmb b tʋʋmdẽ wã tɩ b pa le yaa a Zeova maan-kʋʋdb ye.+ 15 A Zerobowam yãka a maan-kʋʋdb zĩ-zãntsã* yĩnga,+ la wẽnnaam-dãmb nins sẽn wõnd bʋʋsã*+ ne nag-bi wã a sẽn maanã yĩnga.+ 16 Israyɛll buud toɛy-toɛyã neb nins fãa sẽn da yãk yam n na n bao Israyɛll Wẽnnaam a Zeova ne b sũur fãa wã tũu bãmb n kẽng Zerizalɛm, n na n tɩ maand maoong n kõt a Zeova sẽn yaa bãmb yaab-rãmbã Wẽnnaamã.+ 17 Nin-kãensã paasa Zida naamã pãnga, la b teel a Salomo biig a Roboam yʋʋm a tãabo. Bala bãmb dɩka a Davɩɩd ne a Salomo naoor yʋʋm a tãabo.
18 A Roboam rɩka a Mahalat n maan a paga. A Mahalat ra yaa a Davɩɩd biig a Yerimot ne a Zese biig a Eliyaab+ bi-pugl a Abihayɩll biiga. 19 A Mahalat wa n doga a Roboam kom-dibli: Yaa a Yewuus ne a Semariya la a Zaham. 20 A Mahalat poore, a Roboam kẽe kãadem ne a Maaka sẽn yaa a Absalom+ yagengã. Yẽ wa n doga a Abiya,+ a Atayi ne a Ziza la a Selomit. 21 A Roboam da nonga a Absalom yageng a Maaka n yɩɩd a pagb a taabã ne a pʋg-rɩkdsã*+ fãa, bala yẽ ra tara pagb piig la a nii ne pʋg-rɩkds pis-yoobe. La yẽ wa n doga kom-dibli pisi la a nii la kom-pugli pis-yoobe. 22 A Roboam yãka a Maaka bi-ribl a Abiya t’a yaa a ba-biisã taoor soab la b naaba, bala yẽ ra ratame t’a wa lebg rĩma. 23 La yẽ tʋma ne yam n kɩt t’a kom-dibli wã kẽer tɩ zĩnd* Zida ne Bẽnzame soolmã ween-vɩɩs fãa pʋsẽ. Yaa tẽns nins fãa sẽn gũbg ne lalsã pʋsẽ.+ Yẽ ra kõt-b-la rɩɩb hal sõma, la a bao pagb wʋsg n kõ-ba.
12 A Roboam naamã sẽn wa n vigl kãn-kãe+ t’a paam pãngã bala, a basa a Zeova Tõogã sakre,+ tɩ Israyɛll nebã fãa me rɩk a naoore. 2 A Roboam naamã yʋʋm a nu soabã pʋgẽ, Ezɩpt rĩm a Sisak+ wa n zaba ne Zerizalɛm, bala b pa maan sɩd ne a Zeova ye. 3 A Sisak yii Ezɩpt n wa ne saar-dãmb* tusr la kobs-yi, wed-rʋʋdb tus-pis-yoobe, n paas tãb-biis sẽn kẽnd nao sõor ka tɛk sẽn yaa Libi neba, Suki la Etiyopi neba.+ 4 Yẽ zab n deega Zida tẽns nins sẽn gũbg ne lalsã, la a wa n taa Zerizalɛm.
5 No-rɛɛs a Semaya+ babsa a Roboam ne Zida nanambsã sẽn da tigim taab Zerizalɛm a Sisak yĩngã n yeel-b yaa: “Ad a Zeova sẽn yeele: ‘Yãmb basa maam. Woto yĩnga, ma-me basa yãmb+ a Sisak nugẽ.’” 6 Israyɛll nanambsã ne rĩmã sẽn wʋm dẽ, b sika b mens+ n yeel yaa: “A Zeova yaa tɩrga.” 7 A Zeova sẽn yã b sẽn sik b mensã, a Zeova yeela a Semaya yaa: “Bãmb sika b mense, mam pa na n sãam-b ye.+ Ka la bilfu, m na n fãag-b lame. Mam pa na n tũnug ne a Sisak n wilg tɩ m sũur puuga ne Zerizalɛm ye. 8 La bãmb na n lebga a tʋm-tʋmdba, n bãng tɩ b sã n yaa mam tʋm-tʋmdba, pa yembr ne b sẽn na n yaa tẽns a taabã rĩm-dãmb tʋm-tʋmdb ye.”
9 Woto, Ezɩpt rĩm a Sisak wa n zaba ne Zerizalɛm. Yẽ wʋka a Zeova roogã laogã+ ne na-yirã laogã fãa. A wʋka bũmb fãa, baa sãnem gãnd nins a Salomo sẽn da maanã.+ 10 Dẽ, rĩm a Roboam maana zũud gãnd n ledg sãnem gãndã. A rɩk-b lame n kõ gũudb* nins sẽn da gũud na-yirã rignoorã taoor dãmba. 11 Rĩmã sã n da wat a Zeova roogẽ wã, gũudbã ra kẽedame n dɩk zũud gãndã n zãada. Rẽ poore, b lebsd-b-la gũudbã roogẽ. 12 Rĩmã sẽn sik a mengã yĩnga, a Zeova sũur sigame t’a bas-a,+ la a pa sãam-b zãng ye.+ Sẽn paase, b yãa bõn-sõma Zida.+
13 Rĩm a Roboam paasa a naamã pãng Zerizalɛm n kell n yɩ rĩma. A sẽn wa n na n deeg naamã t’a tara yʋʋm pis-naas la a ye. La yẽ rɩɩ naam yʋʋm piig la a yopoe Zerizalɛm, tẽng ning a Zeova sẽn yãk Israyɛll buud toɛy-toɛyã fãa sʋk n na n ning a yʋʋrã. Rĩmã ma yʋʋr da yaa a Naama, n yaa Amon neda.+ 14 La a Roboam maana sẽn yaa wẽnga. Bala a ra pa yãk yam a sũurẽ n na n bao a Zeova ye.+
15 A Roboam kibarã, a sɩngr n tãag a saab bee no-rɛɛs a Semaya+ ne bãngd* a Ido+ goamã b sẽn gʋls tɩ be buudã rot sõdb sebrã pʋgẽ wã. La zab n zĩnd a Roboam ne a Zerobowam sʋk wakat fãa.+ 16 A Roboam wa n kii wa a yaab-rãmbã, tɩ b mum-a a Davɩɩd tẽngẽ wã,+ t’a biig a Abiya+ ledg-a n lebg rĩma.
13 Rĩm a Zerobowam naamã yʋʋm piig la a nii-n-soabã, a Abiya lebga Zida rĩma.+ 2 Yẽ rɩɩ naam Zerizalɛm yʋʋm a tãabo. A ma yʋʋr la a Mikaya,+ n yaa Gibeya+ rao a Uriyɛll bi-pugla. Zab me n zĩnd a Abiya ne a Zerobowam sʋka.+
3 A Abiya kẽnga zabr ne tãb-biis tus-kobs-naas sẽn yaa gãndaado, la sẽn mi zabr sõma.*+ La a Zerobowam yii ne tãb-biis tus-kobs-nii sẽn yaa gãndaado, la sẽn mi zabr sõma,* tɩ b tong taab ned fãa ne a zĩig n na n zabe. 4 A Abiya tɩ rʋʋ Zemarayim tãngã sẽn be Efrayim soolmã zĩig ning sẽn yaa tãensã, n yeele: “A Zerobowam ne Israyɛll nebã fãa, kelg-y maam. 5 Yãmb pa mi tɩ Israyɛll Wẽnnaam a Zeova maana yamsem kaool*+ ne a Davɩɩd n na n kõ yẽ ne a kom-dibli wã+ rĩung tɩ b soog Israyɛll wakat fãa yĩng la?+ 6 La a Nebat biig a Zerobowam+ sẽn yaa a Davɩɩd biig a Salomo tʋm-tʋmdã yikame n kɩɩs a zu-soabã.+ 7 Neb sẽn ka tʋʋm la sẽn ka bark n kẽng n tɩ naag-a. Bãmb tõoga a Salomo biig a Roboam, a sẽn da wa n nan yaa yãag n zoet rabeem n pa tõe n yals b taoorã.
8 “La masã, yãmb tagsdame tɩ y tõe n yalsa a Zeova rĩungã sẽn be a Davɩɩd kom-dibli nugẽ wã taoore. Bala yãmb yaa neb kʋʋngo, tɩ sãnem nag-bi wã a Zeroboam sẽn maanã yaa yãmb wẽnnaam-dãmb n be ne yãmba.+ 9 Yãmb pa rig a Aarõ yagensã sẽn yaa a Zeova maan-kʋʋdbã+ ne Levi buudã nebã, la y yãk y maan-kʋʋdb wa tẽns a taabã neb sɩda?+ Ned ning fãa sẽn wa ne* lol-poll la pe-raad a yopoe tõe n lebga sẽn pa-b wẽnnaam-dãmbã maan-kʋʋda. 10 La sã n yaa ne tõnd yẽ, yaa a Zeova la tõnd Wẽnnaam,+ la tõnd pa bas-a ye. Tõnd maan-kʋʋdbã sẽn yaa a Levi yagensã tʋmda a Zeova tʋʋmã tɩ Levi buudã neb sõngd-ba. 11 Bãmb maanda maand sẽn yõogd bugum a Zeova yĩng yibeoog la zaabr fãa,+ n yõogd wisd sẽn tar yũ-noogo,+ n dogend burã taab*+ sãnem taablã zugu, la b yõgend fɩtl-dãmbã sẽn be sãnem fɩtl-dogendgã+ zug zaabr fãa.+ Bala tõnd maanda bũmb nins d sẽn segd n maan tõnd Wẽnnaam a Zeova yĩngã. La yãmb yẽ bas-a lame. 12 Masã, kelg-y-yã! Wẽnnaam sɩd-sɩdã bee ne tõnd n lʋɩt tõnd taoore, ne a maan-kʋʋdbã sẽn zãad zabr tãntãadã n na n peeb zabr peebg tɩ d zab ne yãmba. Israyɛll neba, ra n zab-y ne y yaab-rãmbã Wẽnnaam a Zeova ye. Bala y pa na n tõog ye.”+
13 La a Zerobowam tʋma neb tɩ b tɩ solg n na n yi bãmb poorẽ wã n zab ne-ba. Woto, Israyɛll nebã ra bee Zida nebã taoore, tɩ Israyɛll neb nins sẽn solgã be bãmb poorẽ. 14 Zida nebã sẽn wẽnemde, b mikame tɩ b segd n zaba poorẽ la taoore. Dẽ, bãmb kelmame n bool a Zeova,+ tɩ maan-kʋʋdbã ra peebd tãntãadã tɩ rãamdã zẽkdẽ. 15 Zida nebã kelma zabr kɛlenga, la bãmb sẽn kelem zabr kɛlengã, Wẽnnaam kɩtame t’a Abiya ne Zida nebã tõog a Zerobowam ne Israyɛll nebã fãa. 16 Israyɛll nebã zoee Zida nebã taoore, tɩ Wẽnnaam ning-b Zida nebã nugẽ. 17 A Abiya ne a nebã kʋʋ bãmb hal wʋsgo. Bãmb talla Israyɛll nebã kʋʋbo, tɩ b rap tus-kobs-nu sẽn mi zabr sõma* ki. 18 Woto, Israyɛll nebã reega yãnd baraare. La Zida nebã tõog-b lame, bala bãmb teega b yaab-rãmbã Wẽnnaam a Zeova.+ 19 A Abiya kell n diga a Zerobowam n deeg tẽns a nengẽ. Yaa Betɛll+ ne tẽns nins a sẽn so wã,* Yesana ne tẽns nins a sẽn so wã, la Efrayin+ ne tẽns nins a sẽn so wã. 20 A Abiya naamã wakatẽ, a Zerobowam pa tol n le paam pãng ning a sẽn da tarã ye. La a Zeova wa n kʋ-a lame.+
21 A Abiya ra paamda pãng n paasdẽ. Yẽ wa n peega pagb piig la a naase,+ n dog kom-dibli pisi la a yiibu, ne kom-pugli piig la a yoobe. 22 A Abiya vɩɩmã kibare, a sẽn maan bũmb ninsã la a goamã, b gʋlsa rẽ fãa no-rɛɛs a Ido+ sɛbã pʋsẽ.
14 A Abiya wa n kii wa a yaab-rãmbã, tɩ m mum-a a Davɩɩd tẽngẽ wã,+ t’a biig a Aaza ledg-a n lebg rĩma. A naamã wakate, tẽngã zĩnda bãan yʋʋm piiga.
2 A Aaza maana sẽn yaa sõma la tɩrg a Wẽnnaam a Zeova nifẽ. 3 Yẽ yãgsa bu-zẽmsã wẽnnaam-dãmbã tẽn-kugã+ la zĩ-zãntsã,* n siig kugã b sẽn lugl n pʋʋsdẽ wã,+ la a kɛ ra-lugsã b sẽn lugl n pʋʋsdẽ* wã.+ 4 Sẽn paase, yẽ yeela Zida nebã tɩ b bao b yaab-rãmbã Wẽnnaam a Zeova, la b sak a Tõogã ne a noyã. 5 Woto, yẽ sãama zĩ-zãntsã* la wisd tẽn-kugã+ Zida tẽnsã fãa pʋgẽ. La a Aaza wakatẽ wã, rĩungã zĩnda bãane. 6 Yẽ mee tẽns sẽn gũbg ne lals Zida soolmẽ wã,+ bala yʋʋm-kãense, bãan da bee soolmã fãa pʋgẽ tɩ bɛɛb pa zabd ne bãmba, a Zeova sẽn kɩt tɩ bãmb zĩnd bãanã yĩnga.+ 7 Yẽ yeela Zida nebã yaa: “Yik-y tɩ d me tẽn-kãensã n gũbg-b ne lals la gasdo,+ n ning-b kʋɩlens* sẽn tar sogdse. Tẽngã ket n yaa tõnd n so, bala tõnd baoo d Wẽnnaam a Zeova. Tõnd bao-a lame, la a kɩtame tɩ bãan be soolmã zĩig fãa.” Woto, bãmb tõog n meeme.+
8 Zida soolmẽ wã, a Aaza ra tara tãb-biis tus-kobs-tã sẽn zãad gãn-bɛd la kãna. Bẽnzame soolmẽ wã me, a ra tara tãb-biis tus-kobs-yi la pis-nii sẽn yaa gãndaado, n zãad gãn-bõoneg* la tãbdo.*+
9 Etiyopi ned a Zeera wa n waa ne tãb-biis milyõ a yembre, la saar-dãmb* kobs-tã+ n na n zab ne Zida. A sẽn wa n ta Maresa wã,+ 10 a Aaza yiime n na n zab ne-a, tɩ b tong taab ned fãa ne a zĩig Zefata longã sẽn be Maresa wã pʋgẽ, n na n zabe. 11 Dẽ, a Aaza boola a Wẽnnaam a Zeova+ n yeele: “Zeova! Yãmb sã n na n sõng neba, pa be ne b yaa wʋsgo, bɩ b ka pãng ye.+ Tõnd Wẽnnaam a Zeova, sõng-y tõndo! Bala tõnd teega yãmba,+ la yaa ne yãmb yʋʋr la tõnd yi n na n zab ne kʋʋngã.+ Zeova, yãmb yaa tõnd Wẽnnaam. Da bas-y tɩ ninsaal sẽn yaa kiidã tõog yãmb ye.”+
12 Woto, a Zeova kɩtame t’a Aaza ne Zida nebã tõog Etiyopi nebã, la Etiyopi nebã zoeeme.+ 13 A Aaza ne a nebã riga bãmb n tãag Geraare,+ la bãmb talla Etiyopi nebã kʋʋb hal tɩ b ned baa a ye pa kell ye. Bala a Zeova ne a tãb-biisã kʋʋ bãmb zãnga. Rẽ poore, bãmb wʋka te-zɛɛdem wʋsgo. 14 Sẽn paase, bãmb zaba ne tẽns nins fãa sẽn gũbg Geraarã, bala a Zeova rabeem kẽe tẽn-kãens nebã. Bãmb zɛɛ teed tẽnsã fãa pʋsẽ, bala teed wʋsg ra bee be b sẽn tõe n zɛ. 15 Bãmb tɩ zaba ne rũm-kɩɩmbã me b fu-rotẽ wã n deeg rũm-bõoneg wʋsg ne yʋgma. La rẽ poore, b lebg n leba Zerizalɛm.
15 Wẽnnaam vʋʋsmã siga a Odɛɛd biig a Azariya. 2 Dẽ, yẽ yikame n kẽng n tɩ seg a Aaza n yeel-a yaa: “Aaza, Zida la Bẽnzame buudã fãa, kelg-y maam! Yãmb sẽn pa ne a Zeova n kaoos to-to fãa, a bee ne yãmba.+ Yãmb sã n bao-a, a na n basame tɩ yãmb yã-a.+ La yãmb sã n bas-a, yẽ me na n basa yãmba.+ 3 Hal sẽn kaoose, Israyɛll nebã ra pa tũud Wẽnnaam sɩd-sɩdã, b ra pa paamd tɩ maan-kʋʋd zãmsd-ba, la b ra pa tũud tõogã me ye.+ 4 La b toogã pʋgẽ, b sẽn lebg n wa Israyɛll Wẽnnaam a Zeova nengẽ n bao-a wã, a basame tɩ b yã-a.+ 5 Wakat kãnga, ned baa a ye ra pa tõe n tog sor ne bãan ye.* Bala gudgr n da be soolmã nin-buiidã fãa sʋka. 6 Buud ra wõrda buud a to, tɩ tẽng wõrd tẽng a to. Bala Wẽnnaam ra kɩtame tɩ yel-beed toor-toor paamd-ba, n wat ne zũnd-zãnde.+ 7 La sã n yaa ne yãmba, keng-y y sũur la y ra koms raood ye.+ Bala b na n dola yãmb y tʋʋmdã yĩnga.”
8 A Aaza sẽn wʋm gom-kãensã ne no-rɛɛs a Odɛɛd bãngr-gomdã, a kenga a sũur n menes bõn-naandsã sẽn yaa bõn-yoodã* Zida+ ne Bẽnzame la tẽns nins fãa a sẽn dees Efrayim soolmã zĩig ning sẽn yaa tãensã pʋgẽ wã, la a lebs n manega a Zeova tẽn-kugr ning sẽn da be a Zeova zãongã* taoorã.+ 9 Yẽ tigma Zida ne Bẽnzame soolmã nebã fãa, n paas sãamb nins sẽn yi Efrayim ne Manase la Sɩmeyõ soolmẽ wã n wa be ne-bã.+ Bala nin-kãensã wʋsg sẽn yã t’a Aaza Wẽnnaam a Zeova bee ne-a wã, b yii Israyɛll n wa yẽ nengẽ. 10 Dẽ, b tigm-b-la Zerizalɛm, a Aaza naamã yʋʋmd piig la a nu soabã kiuug a tãab-n-soabã. 11 Baraare, b yãka rũms b te-zɛɛdmã pʋgẽ n kʋ maand n kõ a Zeova. Yɩɩ niis kobs-yopoe ne piis tus a yopoe. 12 Sẽn paase, bãmb maana kaool n na n bao b yaab-rãmbã Wẽnnaam a Zeova ne b sũur fãa la ne b sɩɩg* fãa.+ 13 Ned ning fãa sẽn pa na n bao Israyɛll Wẽnnaam a Zeova, a yaa kãsem t’a yaa bilfu, pag bɩ raoa, b segd n kʋ-a lame.+ 14 Dẽ, bãmb zẽka b koees n wẽen ne a Zeova, n da kaasd ne sũ-noog la b peebd tãntãad ne bardo. 15 Zida nebã fãa kɩdma sũ-noog wẽenegã yĩnga, bala yɩɩ ne b sũy fãa la b ra wẽen-yã. Bãmb baoo Wẽnnaam ne b sũy fãa tɩ Wẽnnaam bas tɩ b yã-a,+ la a Zeova kell n kɩtame tɩ b zĩnd bãan zĩig fãa.+
16 Rĩm a Aaza pʋd n deega a yaab-poak a Maaka+ naamã.* Bala a ra maana bõn-naand-yoogo, ra-lukã b sẽn lugl n pʋʋsdẽ* wã yĩnga.+ A Aaza luba a bõn-naandgã, n pãb-a n wã zõg-zõge, n yõog-a Sedrõ longã pʋgẽ.+ 17 La b pa sãam zĩ-zãntsã*+ Israyɛll soolmẽ wã ye.+ Baasgo, a Aaza tũu Wẽnnaam ne a sũur fãa a yõor tɛka.+ 18 A rɩka bũmb nins yẽ ne a ba wã sẽn kõ Wẽnnaamã,* n tɩ ning Wẽnnaam roogẽ wã: Yaa wanzuri, sãnem la teed toor-toore.+ 19 Zabr pa tol n zĩnd soolmã pʋgẽ, n tãag a Aaza naamã yʋʋmd pis-tã la a nu soabã ye.+
16 A Aaza naamã yʋʋm pis-tã la a yoob-n-soabã, Israyɛll rĩm a Baasa+ wa n zaba ne Zida, n sɩng Rama+ tẽngã meebo, n na n paas a pãnga. Yẽ maana woto sẽn na yɩl tɩ ned ra tõog n yi Zida sẽn yaa rĩm a Aaza soolmã wall a kẽ ye.+ 2 Dẽ, a Aaza wʋka wanzuri wã ne sãnemã sẽn da be a Zeova roogã laog bĩngr zĩigẽ,+ la na-yirã laog bĩngr zĩigẽ wã n tʋm tɩ b tɩ kõ Siiri rĩm a Bɛn-hadaad+ sẽn be Damaasã, n yeel-a yaa: 3 “Kaool n be yãmb ne maam sʋka, la mam ba wã ne yãmb ba wã sʋka. Mam toond-y-la wanzuri ne sãnem. Wa n sãam-y kaool ning sẽn be yãmb ne Israyɛll rĩm a Baasa sʋkã, t’a zãag ne maam.”
4 A Bɛn-hadaad kelga rĩm a Aaza, n tʋm a tãb-biisã nanambs tɩ b wa zab ne Israyɛll tẽnsã n deeg Iyon,+ Dan,+ Abɛll-mayim la Naftali+ tẽnsã zĩis nins fãa b sẽn bĩngd teedã. 5 A Baasa sẽn wʋm dẽ, a basa Rama meeb tao-tao, n yals a tʋʋmdã. 6 Dẽ, rĩm a Aaza peega Zida nebã fãa tɩ b kẽng n tɩ wʋk kugã la raadã rĩm a Baasa sẽn da tar n met Rama wã.+ Yẽ reega rẽ n lebs n paas Geba+ ne Mizpa+ pãnga.*
7 Wakat kãnga, gɛt a Hanani+ waa Zida rĩm a Aaza nengẽ n yeel-a yaa: “Yaa yãmb sẽn teeg Siiri rĩmã n pa teeg y Wẽnnaam a Zeova wã yĩng la Siiri rĩmã tãb-biisã sẽn põsg yãmbã.+ 8 Etiyopi nebã ne Libi nebã ra pa wa ne tãb-biis kʋʋng wʋsg ne saar-dãmb* la wed-rʋʋdb wʋsg sɩda? La yãmb sẽn teeg a Zeova wã, a ning-b-la yãmb nugẽ.+ 9 Bala a Zeova ninã geta dũniyã zĩig fãa sõma,+ n na n sõng neb nins sẽn tũud-a ne b sũur fãa wã.+ Yãmb maana yalemd yel-kãngã pʋgẽ. Masã tɛka, yãmb kõn põs zab ye.”+
10 La a Aaza sũur yika ne gɛtã, t’a kɩt tɩ b ning-a bãens roogẽ, bala a goamã puuga a sũur wʋsgo. A Aaza sɩnga neb a taab namsg nin-buiidã sʋk wakat kãng me. 11 A Aaza vɩɩmã kibarã, a sɩngr n tãag a baasgo, b gʋlsa rẽ fãa Zida ne Israyɛll rĩm-dãmbã kibay sebrã pʋgẽ.+
12 A Aaza naamã yʋʋm pis-tã la a wɛ soabã, a bẽe nao bãag hal tɩ wa kenge. La baa ne a bãagã, a pa bao a Zeova sõngr ye. Yaa tɩpdb sõngr la a bao-yã. 13 A Aaza wa n kii wa a yaab-rãmbã.+ A kii a naamã yʋʋm pis-naas la a ye soabã. 14 Woto, b mum-a-la yao-neer pʋgẽ, a sẽn da kɩt tɩ b tu a Davɩɩd tẽngẽ wã.+ B gãneg-a-la gãag sẽn pid ne bomiye kaam* la bũmb toor-toor b sẽn kalem tɩ lebg ka-zaeedem sẽn pa wõnd a taaba.+ Sẽn paase, b yõoga wisd hal wʋsg a yĩnga.
17 A Aaza biig a Zozafat+ n ledg-a n lebg rĩma, la yẽ paasa a naamã pãng Israyɛlle. 2 Yẽ ninga tãb-biis Zida tẽns nins fãa sẽn gũbg ne lalsã pʋsẽ, la a ning tãb-biis sul Zida ne Efrayim tẽns nins a ba a Aaza sẽn da reegã pʋsẽ.+ 3 A Zeova kell n zĩnda ne a Zozafate, a sẽn dɩk a yaab a Davɩɩd naoor+ n pa bao Baal-dãmbã yĩnga. 4 Bala yẽ baoo a ba wã Wẽnnaamã,+ n tũ a noyã, la a pa maan wa Israyɛll nebã ye.+ 5 A Zeova kell n vigla naamã kãn-kãe a Zozafat nugẽ.+ Zida nebã fãa ra kõta a Zozafat kũuni, la yẽ paama arzɛgs ne ziir wʋsgo.+ 6 A talla raood n tũ a Zeova soayã. Yẽ pʋd n menesa zĩ-zãntsã*+ la ra-lugsã b sẽn lugl n pʋʋsdẽ* wã+ Zida soolmẽ wã.
7 A naamã yʋʋm a tãab-n-soabã, a tʋmame tɩ b tɩ bool a nanambsã, t’a kɩt tɩ b saag Zida tẽnsã pʋsẽ n zãms nebã. Yaa a Bɛn-hayɩll, a Abdiyaas, a Zakari ne a Netanɛll la a Mikaya. 8 Levi neb n da be ne-ba: Yaa a Semaya, a Netaniya, a Zebadiya, a Asayɛll, a Semiramot, a Yehonatan, a Adoniza, ne a Tobiza la a Toob-adoniza, n paas maan-kʋʋdb a Elisama ne a Zoram.+ 9 Bãmb sɩnga nebã zãmsg Zida, la b ra zãada a Zeova Tõogã sebre,+ n gilgd Zida tẽnsã fãa n zãmsd nin-buiidã.
10 La a Zeova rabeem kẽe tẽns nins fãa sẽn da gũbg Zida wã, la bãmb pa zab ne a Zozafat ye. 11 Filisti nebã ra wata ne kũun la ligd n yaood a Zozafat fadgo.* Araab-rãmbã me yãka pe-raad tus a yopoe la kobs-yopoe ne boees tus a yopoe la kobs-yopoe b rũmsã sʋk n wa kõ-a.
12 A Zozafat pãngã ra tara paasgo,+ la yẽ ra meta zĩis sẽn gũbg ne lalse,+ la tẽns Zida soolmẽ wã n na n bĩngd teedo.+ 13 Yẽ tʋma tʋʋm-kãsems Zida tẽnsẽ wã, n da tar sodaase, zabr gãndaad Zerizalɛm. 14 B ra tigma nin-kãensã wa sẽn zems b buud toɛy-toɛyã roto: Zida buudã sʋka, tãb-biis tusr-tusr nanambs n da be. Yaa a Adna sẽn da yaa naabã, la zabr gãndaad tus-kobs-tã n da be ne-a.+ 15 Yẽ ra soo a Yehohanan sẽn yaa naabã, la neb tus-kobs-yi la pis-nii n da be ne a Yehohanan. 16 A leb n da soo a Zikri biig a Amasɩya sẽn kõ a meng ne yamleoog a Zeova tʋʋmdã yĩngã, la zabr gãndaad tus-kobs-yi n da be ne a Amasɩya. 17 Bẽnzame+ buudã sʋka, yɩɩ a Eliyada sẽn da yaa zabr gãndaoogã, la neb tus-kobs-yi sẽn bob tãp la gãong n da be ne-a.+ 18 A Eliyada ra soo a Yehozabaad, la neb tus-koabg la pis-nii sẽn tar zab-teed n da be ne a Yehozabaad. 19 Nin-kãensã me ra tʋmd n kõta rĩmã, n paas neb nins rĩmã sẽn da ning Zida tẽns nins sẽn gũbg ne lalsã fãa pʋsẽ wã.+
18 A Zozafat paama arzɛgs ne ziir wʋsgo,+ la a wa n lebga a Akaab+ rɛɛmba.* 2 Yʋʋm a wãn loogr poore, a kẽnga Samari a Akaab nengẽ,+ t’a Akaab kʋ piis ne niis wʋsg n maan maoong yẽ ne neb nins sẽn tũ-a wã yĩnga. A Akaab pẽdg-a lame t’a yãag-a tɩ b tɩ zab ne Ramot-galaad.+ 3 Rẽ poore, Israyɛll rĩm a Akaab soka Zida rĩm a Zozafat yaa: “Yãmb na n tũu maam tɩ d kẽng Ramot-galaad bɩ?” T’a Zozafat leok-a yaa: “Tõnd yaa bũmb a yembre. Mam nebã yaa yãmb neba. Tõnd na n teela yãmb zabrẽ wã.”
4 La a Zozafat yeela Israyɛll rĩmã yaa: “M bõos tɩ d reng n sok a Zeova n ges sã n taa a yam.”+ 5 Woto, Israyɛll rĩmã tigma no-rɛɛsdb kobs-naas n sok-b yaa: “Tõnd segd n tɩ zaba ne Ramot-galaad bɩ, bɩ m pa segd n kẽnge?” Tɩ b leok-a yaa: “Kẽng-y-yã! Wẽnnaam na n ning-a-la yãmb nugẽ.”
6 A Zozafat sokame yaa: “A Zeova no-rɛɛs pa be ka la?+ D bool yẽ me t’a sok Wẽnnaam n kõ-do.”+ 7 Tɩ Israyɛll rĩmã leok-a yaa: “No-rɛɛs a ye n kete.+ A tõe n soka a Zeova n kõ-do, la mam kis-a lame. Bala a zɩ n togs maam koe-noog ye. Yaa koe-beed daar fãa.+ Yaa a Himla biig a Mikaya.” T’a Zozafat leok yaa: “Bɩ rĩmã ra gom woto ye.”
8 Dẽ, Israyɛll rĩmã boola na-yirã tʋm-tʋmd a ye, n yeel-a yaa: “Kẽng n tɩ tall a Himla biig a Mikaya n wa tao-tao.”+ 9 Wakat kãng tɩ Israyɛll rĩmã ne Zida rĩm a Zozafat ra yeelga b naam fut tɩ b ned kam fãa zao a geerẽ. Bãmb ra zĩi zɛɛgã sẽn be Samari tẽngã rignoorã sɛɛgẽ wã. No-rɛɛsdbã fãa ra togsda bãngr-goam bãmb taoore. 10 A Kenana biig a Sedesiyaas rɩka kut n maan yɩɩl n yeele: “Ad a Zeova sẽn yeele: ‘Yãmb na n talla yɩɩn-kãensã n tã Siiri nebã, hal n menes-b zãnga.’” 11 No-rɛɛsdb a taabã fãa me ra togsda gom-yɛngã. Bãmb da yeta rĩmã yaa: “Kẽng-y Ramot-galaad tɩ y na n tõoga zabrã.+ A Zeova na n ning-a-la y nugẽ.”
12 Ned ning sẽn kẽng n na n tɩ bool a Mikaya wã yeel-a lame yaa: “Ade! No-rɛɛsdbã fãa togsda rĩmã koe-noogo. M bõos tɩ yãmb me tɩ gom wa bãmba.+ Togs-y koe-noogo.”+ 13 A Mikaya leok-a lame yaa: “Mam wẽenda ne a Zeova sẽn vɩ wã tɩ yaa mam Wẽnnaamã sẽn na n yeel maam bũmb ningã bal la m na n togse.”+ 14 A sẽn ta rĩmã nengẽ wã, rĩmã sok-a lame yaa: “Mikaya, tõnd segd n tɩ zaba ne Ramot-galaad bɩ, bɩ m pa segd n kẽnge?” La zĩig pʋgẽ, a leokame yaa: “Kẽng-y tɩ y na n tõoga zabrã. B na n ning-a-la yãmb nugẽ.” 15 Tɩ rĩmã sok-a yaa: “Naoor a wãn la mam na n kɩt tɩ fo wẽen tɩ f pa na n togs maam bũmb a Zeova yʋʋr yĩnga, sã n pa sɩd bala?” 16 Rẽ la a Mikaya yeel-yã: “Mam nee Israyɛll nebã fãa sẽn sãeeg tãensã zut wa piis sẽn pa tar pe-kɩɩma.+ A Zeova yeelame: ‘Nin-kãensã pa le tar naab ye. Bɩ b ned kam fãa leb a yir ne laafɩ.’”
17 Dẽ, Israyɛll rĩmã yeela a Zozafat yaa: “Mam pa pĩnd n yeel yãmb t’a pa na n togs koe-noog mam zugu, sã n pa koe-beed bal sɩda?”+
18 Rẽ poore, a Mikaya yeelame: “Bɩ y kelg a Zeova koɛɛga: Mam yãa a Zeova sẽn zao a geerã zug+ tɩ saasẽ tãb-biisã fãa+ yas a goabg la a rɩtgo.+ 19 A Zeova sok-b lame yaa: ‘Yaa ãnd n na n belg Israyɛll rĩm a Akaab t’a kẽng Ramot-galaad n tɩ ki?’ Malɛk a ye ra yeta bũmbu, t’a to yeel bũmb a to. 20 Dẽ, malɛk+ n wa n yals a Zeova taoor n yeele: ‘Maam n na n belg-a.’ T’a Zeova sok-a yaa: ‘Fo na n maana wãna?’ 21 T’a leoke: ‘Mam na n yiime n tɩ kɩt t’a no-rɛɛsdbã fãa yag ziri.’ Tɩ Wẽnnaam yeel-a yaa: ‘Fo na n belg-a lame. Fo sɩd na n tõogame. Kẽng n tɩ maan wa f sẽn yeelã.’ 22 Yaa rẽ n so t’a Zeova kɩt tɩ yãmb no-rɛɛsdbã yagd ziri wã.+ La sɩd-sɩda, a Zeova yeelame tɩ yel-beed n na n paam yãmba.”
23 A Kenana biig a Sedesiyaas+ kolgame n waag a Mikaya+ pɛk+ n sok-a yaa: “A Zeova vʋʋsmã tũu yɛ n yi mam nengẽ n gom ne foo?”+ 24 T’a Mikaya leok-a yaa: “Daar ning fo sẽn na n kẽ roog pʋgẽ n tɩ solg hal a yaangã, f na bãng a sẽn tũ zĩig ninga.” 25 Dẽ, Israyɛll rĩmã yeelame yaa: “Tall-y-yã a Mikaya n tɩ kɩs a Amo sẽn yaa tẽngã taoor soabã ne rĩmã biig a Zowaase. 26 Yeel-y-b tɩ mam yeelame tɩ b kẽes ra-kãngã bãens roog+ n kõt-a bur ne koom bilf bala, hal tɩ m yi zabrẽ wã n lebg n wa ne laafɩ.”” 27 La a Mikaya leokame yaa: “Yãmb sã n lebg n wa ne laafɩ, dẽnd a Zeova pa gom ne maam ye.”+ Rẽ poore, a paasame: “Yãmb a nin-buiidã fãa, ning-y m sẽn yeelã y yamẽ.”
28 Woto, Israyɛll rĩmã ne Zida rĩm a Zozafat kẽnga Ramot-galaade.+ 29 Israyɛll rĩmã yeela a Zozafat yaa: “Mam na n toeema fut n kẽ zabrẽ wã tɩ nebã ra bãng maam ye. La yãmb segd n yeelga y naam futã.” Dẽ, Israyɛll rĩmã toeema fut tɩ b kẽ zabrẽ wã. 30 La Siiri rĩmã ra yeela a saar-dãmbã* nanambs yaa: “Ra n zab-y ne ned baa a ye, a yaa nin-kãseng t’a yaa nin-bila, sã n pa ne Israyɛll rĩmã bala.” 31 Saar-dãmbã nanambsã sẽn yã a Zozafatã, b yeela b sũyẽ yaa: “Israyɛll rĩmã la woto.” Dẽ, bãmb wẽnemdame n na n zab ne a Zozafate, t’a sɩng kaasg n kot sõngre,+ la zĩig pʋgẽ, Wẽnnaam a Zeova sõng-a lame n kɩt tɩ b lebg n loog n bas-a. 32 Saar-dãmbã nanambs sẽn bãng tɩ pa Israyɛll rĩmã, zĩig pʋgẽ, b lebgame n bas-a.
33 La ned a yembr n yãag a tãp n tão yaare, tɩ peemdã tɩ kẽ Israyɛll rĩmã kut fuugã* sogdsã sʋk n kõs-a. Dẽ, rĩmã yeela ned ning sẽn wẽnd a saarã yaa: “Wẽnemd n tall maam n yi zabrẽ* wã tɩ b pogla maam wʋsgo.”+ 34 Zabrã wɩnga wʋsg baraare, la b kell n gãda Israyɛll rĩmã t’a yals saarã pʋgẽ n tees Siiri nebã hal n tãag zaabre. La wĩntoogã sẽn wa n kẽedẽ, rĩmã kiime.+
19 Dẽ, Zida rĩm a Zozafat lebg n kuila a na-yirã Zerizalɛm ne laafɩ.+ 2 La bãngd* a Hanani+ biig a Zehu+ yiime n tɩ seg rĩm a Zozafat n yeel-a yaa: “Yaa nin-wẽns la yãmb segd n sõng bɩ?+ Yaa neb nins sẽn kis a Zeova wã la yãmb segd n nongẽ sɩda?+ Yãmb sẽn maan woto wã kɩtame t’a Zeova sũur puud ne yãmba. 3 Baasgo, b yãa bõn-sõma yãmb nengẽ.+ Bala yãmb menesa ra-lugsã b sẽn lugl n pʋʋsdẽ* wã soolmã pʋgẽ, la y yãka yam y sũur pʋgẽ* n na n bao Wẽnnaam sɩd-sɩdã.”+
4 A Zozafat kell n zĩnda Zerizalɛm, la a wa n le yi n kẽnga nin-buiidã nengẽ, sẽn sɩng ne Bɛɛr-seba n tãag Efrayim soolmã zĩig ning sẽn yaa tãensã,+ n na n kɩt tɩ b lebg n wa b yaab-rãmbã Wẽnnaam a Zeova nengẽ.+ 5 Sẽn paase, yẽ yãka bʋ-kaoodb soolmã tõr pʋgẽ, Zida soolmã tẽng ning fãa sẽn gũbg ne lals pʋgẽ.+ 6 La a yeela bʋ-kaoodbã yaa: “Gũus-y neer ne y sẽn maandã, bala yãmb pa kaood bʋʋdã ninsaal yĩng ye. Yaa a Zeova yĩnga. Yẽ bee ne yãmb bʋ-kaoor fãa sasa.+ 7 Masã, bɩ a Zeova rabeem kẽ yãmba.+ Gũus-y neer ne yãmb sẽn maandã. Bala tõnd Wẽnnaam a Zeova pa nong kɛgre,+ a pa bakd neda,+ la a pa reegd noor-madgr me ye.”+
8 Zerizalɛm me, a Zozafat yãka Levi buudã neb ne maan-kʋʋdb kẽere, la Israyɛll buudã rot taoor dãmb kẽer tɩ b na n lebg bʋ-kaoodb a Zeova yĩnga, la b na n welgd yɛl Zerizalɛm nebã yĩnga.+ 9 Yẽ kõ-b-la noor n yeel yaa: “Ad bũmb ning y sẽn segd n maan ne pʋ-peelem la ne y sũur fãa, y sẽn zoet a Zeova wã yĩnga. 10 Yãmb ba-biisã sã n yi b tẽnsẽ wã n wa ne yell y sẽn segd n bʋ, tɩ yaa zɩɩm la b raag-yã+ wall tõogo, noor bɩ bʋ-kaoor poorẽ no-koeemde, yãmb segd n keoog-b lame tɩ b ra wa paam taal a Zeova taoor ye. Sã n pa rẽ, a sũur na n puuga ne yãmb la ne y ba-biisã. Maand-y woto n da wa paam taal ye. 11 Ad maan-kʋʋdb taoor soab a Amariya sẽn so yãmb fãa wã. A na n sõngda yãmb yell buud fãa sẽn kẽed ne a Zeova tʋʋmdã wɛɛngẽ.+ A Ismayɛll biig a Zebadiya sẽn yaa Zida buudã taoor soabã n na n get yɛl nins fãa sẽn kẽed ne rĩmã tʋʋmã. La Levi buudã nebã na n yɩɩ yãmb sõangdba. Tall-y raood la y tʋme, la bɩ a Zeova zĩnd ne neb nins fãa sẽn maand sẽn yaa neerã.”*+
20 Rẽ zugẽ, Mowaab nebã+ ne Amon nebã+ la Amonim-rãmbã* kẽer waame n na n zab ne a Zozafate. 2 Dẽ, b tɩ yeela a Zozafat yaa: “Kʋʋn-kãseng n yi Mogrã* soolmẽ, Edom+ soolmẽ wã n wa n na n zab ne yãmba. B bee Hazazon-tamaar, rat n yeel tɩ Ɛn-gedi.”+ 3 A Zozafat sẽn wʋm dẽ, a yɛɛsa wʋsgo, la yẽ yãka yam ne a sũur fãa n na n bao a Zeova.+ Dẽ, yẽ moona no-loeer Zida soolmã fãa pʋgẽ. 4 Zida nebã fãa tigma taab n na n sok a Zeova.+ Bãmb yii Zida tẽnsã fãa pʋsẽ n wa n na n bao a Zeova sõngre.
5 A Zozafat yalsa Zida ne Zerizalɛm tigingã taoore, a Zeova roogã saman-paalgã noore, 6 n yeele:
“Tõnd yaab-rãmbã Wẽnnaam a Zeova, yãmb pa Wẽnnaam n be saasẽ sɩda?+ Pa yãmb n dɩt naam dũniyã soolem toɛy-toɛyã fãa zut sɩda?+ Pãng bee yãmb nugẽ, la ned pa tõe n yals yãmb taoor ye.+ 7 Tõnd Wẽnnaam, yãmb pa rig soolem-kãngã nebã Israyɛll sẽn yaa yãmb nin-buiidã taoore, n dɩk-a n kõ yãmb zoa a Abrahaam yagensã tɩ b na n soog-a wakat fãa sɩda?+ 8 La bãmb tilga be n me wẽnd-doog yãmb yʋʋrã yĩnga,+ n yeele: 9 ‘Yel-beed sã n paam tõndo, tũu ne sʋʋga, bʋ-kaoore, bã-loangdg bɩ kom, tõnd na n yalsa ro-kãngã taoor la yãmb taoore, (bala yãmb yʋʋrã bee ro-kãngã pʋgẽ)+ n bool yãmb tɩ y sõng-d d yel-pakrã pʋgẽ, la yãmb na n kelga tõnd la y fãag-do.’+ 10 La ade! Amon nebã, Mowaab la Seyɩɩr soolmã zĩig ning sẽn yaa tãensã nebã+ bee ka. Yaa b rãmb nins yãmb sẽn pa sak tɩ y nebã zab ne-ba, b sẽn wa n yit Ezɩptã. Israyɛll nebã wẽnemdame n loog n bas-b n pa sãam-b ye.+ 11 Masã bãmb donda tõnd wẽnga, n wa n na n yiis tõnd tẽng ning yãmb sẽn kõ tõnd tɩ yaa d pʋɩɩrã pʋgẽ.+ 12 Tõnd Wẽnnaam, yãmb pa na n sɩbg-b sɩda?+ Bala tõnd pa tar pãng n na n yals kʋʋn-kãngã sẽn wat n na n zab ne tõndã taoore, la d pa mi d sẽn segd n maaneg ye.+ Tõnd nin geta yãmba.”+
13 Wakat kãnga, Zida nebã fãa ra yasa a Zeova taoor ne b pagbã, b kambã,* la hal baa ne b kom-bõonegã.
14 Dẽ, nin-buiidã sʋka, a Zeova vʋʋsmã siga a Yahaziyɛll. Yẽ yaa Levi buudã ned a Azaf yageng a Mataniya biig a Yeyɛll biig a Benaya biig a Zakari biiga. 15 Yẽ yeelame yaa: “Zida la Zerizalɛm nin-buiidã fãa, la rĩm a Zozafate, kelg-y neere! Ad a Zeova sẽn yeele: ‘Ra n zoe-y rabeem wall y yɛɛs kʋʋn-kãngã yĩng ye. Bala zabrã pa yãmb zabr ye. Yaa Wẽnnaam zabre.+ 16 Beoog bɩ y yi n tɩ seg-ba. B na n dɩka Ziiz sorã n watẽ, la yãmb na n yãa bãmb longã* sẽn tees Yeruwɛll we-raoogã satmẽ. 17 Yãmb pa na n zab ne-b ye. Yãmb we n yals y zĩisẽ, yals-y sɩɩ+ n ges a Zeova sẽn na n fãag-y to-to.+ Zida la Zerizalɛm neba, ra n zoe-y rabeem wall y yɛɛs ye.+ Beoog bɩ y yi n seg-ba, t’a Zeova na n zĩnda ne yãmba.’”+
18 Tao-tao bala, a Zozafat wõgemdame n fõgen a neng tẽnga, la Zida ne Zerizalɛm nebã fãa wõgemda a Zeova taoor n na n waoog a Zeova. 19 Rẽ poore, Levi buudã neb sẽn yaa a Kehat yagensã,+ la a Koore yagensã yikame n zẽk b koees hal sõma n pẽg Israyɛll Wẽnnaam a Zeova.+
20 Bãmb yika vẽkembeoogã yibeoog pĩnda, n kẽng Tekowa+ we-raoogẽ wã. Bãmb sẽn wa n kẽndã, a Zozafat yalsame n yeel yaa: “Zida la Zerizalɛm neba, kelg-y maam! Tẽ-y yãmb Wẽnnaam a Zeova tɩ y na n tõog n yalsa kãn-kãe.* Tẽ-y-yã a no-rɛɛsdbã,+ la yãmb na n paama tõogre.”
21 A Zozafat sẽn yẽs ne nin-buiidã n sɛ wã, a yãka rap tɩ b na n yɩɩl+ a Zeova yĩnga, la b yeelg fut sẽn yaa sõamyã n lʋɩ tãb-biisã taoor n pẽgd Wẽnnaam n yetẽ: “Pʋʋs-y-yã a Zeova barka, bala a maan-neerã paada wakat fãa.”+
22 Bãmb sẽn sɩng yɩɩlg ne sũ-noog n pẽgd Wẽnnaamã, a Zeova piga Amon nebã, Mowaab nebã, la Seyɩɩr soolmã zĩig ning sẽn yaa tãensã nebã sẽn da wa n na n deeg Zida wã, n kɩt tɩ b wẽneg n kʋ taaba.+ 23 La Amon nebã ne Mowaab nebã wẽneg n zaba ne Seyɩɩr+ soolmã zĩig ning sẽn yaa tãensã nebã, n na n sãam-b la b menes-ba. Bãmb sẽn kʋ Seyɩɩr nebã n sa, b wẽneg n kʋʋ taaba.+
24 La Zida nebã sẽn ta gasgã sẽn be we-raoogẽ wã+ n ges kʋʋngã sẽn da beẽ wã, b yãa b kũ-rãmbã sẽn dʋre.+ Ned baa a ye pa põs ye. 25 Dẽ, a Zozafat ne a nin-buiidã waame n na n zɛ b teedã. Bãmb yãa paoong wʋsgo, la fut ne te-sõma wʋsg kũ-rãmbã sʋk n wʋke, hal n wa pa le tõe n tʋk ye.+ Teedã sẽn da waoogã yĩnga, yɩɩ hal rasem a tãab la b rɩk n wʋke. 26 Rasem a naas-n-soabã daare, bãmb tigma taab Beraka longẽ wã, n pẽg a Zeova.* Rẽ n so tɩ b pʋd zĩigã yʋʋr tɩ Beraka* longo.+ La b boond-a-la woto hal n tãag rũndã.
27 Dẽ, a Zozafat lʋɩɩ Zida ne Zerizalɛm nebã fãa taoor tɩ b leb Zerizalɛm ne kɩdengo, bala a Zeova ra kɩtame tɩ b kɩdemd sũ-noog b sẽn tõog b bɛɛbã yĩnga.+ 28 Bãmb waa Zerizalɛm ne yʋʋm-teed sẽn tar rissi, pends+ la tãntãado,+ n kẽng a Zeova roogẽ wã.+ 29 Wẽnnaam rabeem kẽe soolem toɛy-toɛyã fãa, b sẽn wʋm t’a Zeova zaba ne Israyɛll bɛɛbã yĩnga.+ 30 Woto, a Zozafat rĩungã zĩnda bãane, la a Wẽnnaamã kɩtame tɩ bãan kell n zĩnd a soolmã zĩig fãa.+
31 La a Zozafat kell n dɩɩ naam Zida. A sẽn wa n lebg rĩmã t’a tara yʋʋm pis-tã la a nu, la a rɩɩ naam yʋʋm pisi la a nu Zerizalɛm. A ma yʋʋr la a Azuba, n da yaa a Sili bi-pugla.+ 32 A rɩka a ba a Aaza naoore.+ Yẽ pa tol n bʋdg ye. A maana sẽn yaa tɩrg a Zeova nifẽ.+ 33 Baasgo, b pa sãam zĩ-zãntsã* ye.+ Nin-buiidã me ra nan pa yãk yam b sũur pʋgẽ* n na n tũ b yaab-rãmbã Wẽnnaamã ye.+
34 A Zozafat vɩɩmã kibay nins sẽn kellã, b sɩngr n tãag b saabã, b gʋlsa rẽ fãa n naag bũmb ning a Hanani+ biig a Zehu+ sẽn gʋls tɩ be Israyɛll rĩm-dãmbã kibay sebrã pʋgẽ wã. 35 Rẽ poore, Zida rĩm a Zozafat maana kaool ne Israyɛll rĩm a Akaziya sẽn da tʋmd tʋʋm-wẽnsã.+ 36 Yẽ zemsa ne a Akaziya tɩ b na n maan koom-kogend n kẽnd Tarsiis.+ Bãmb maana koom-kogendã Eziyon-gebɛɛr.+ 37 La Maresa rao a Dodavawu biig a Eliyezɛɛr togsa a Zozafat bãngr-gomd n yeele: “Yãmb sẽn maan kaool ne a Akaziya wã yĩnga, a Zeova na n sãama y tʋʋmã.”+ Woto, koom-kogendã bõrame,+ la bãmb pa tõog n kẽng Tarsiis ye.
21 A Zozafat kii wa a yaab-rãmbã, tɩ b mum-a a Davɩɩd tẽngẽ wã ne a yaab-rãmbã. Rẽ poore, a biig a Zoram n ledg-a n lebg rĩma.+ 2 Yẽ ba-biisã sẽn yɩ a Zozafat kom-dibli wã yaa a Azariya, a Yeyiyɛll, a Zakari, a Azariya ne a Mikayɛll la a Sefatiya. Bãmbã fãa yɩɩ Israyɛll rĩm a Zozafat kom-dibli. 3 Bãmb ba wã kõ-b-la teed wʋsg sẽn maan ne wanzuri la sãnem, la te-sõma a taab n paas tẽns sẽn gũbg ne lals Zida soolmẽ wã.+ La yẽ rɩka naamã n kõ a Zoram.+ Bala yẽ n da yaa a bi-kãsenga.
4 A Zoram sẽn deeg a ba wã naamã, yẽ kʋʋ a ba-biisã fãa+ ne sʋʋga, la a kʋ Israyɛll nanambs kẽer n na n paas a naamã pãnga. 5 A Zoram sẽn deeg naamã t’a tara yʋʋm pis-tã la a yi, la a rɩɩ naam yʋʋm a nii Zerizalɛm.+ 6 Yẽ rɩka Israyɛll rĩm-dãmbã naoore,+ n maan wa a Akaab roogã rãmba, bala a rɩka a Akaab bi-pugl n maan a paga.+ A ra maanda sẽn yaa wẽng a Zeova nifẽ. 7 La a Zeova ra pa rat n sãam a Davɩɩd roogã, a sẽn da maan kaool ne a Davɩɩdã yĩnga.+ Bala a ra pʋlmame t’a na n kõo a Davɩɩd ne a kom-dibli wã fɩtl* wakat fãa yĩnga.+
8 A Zoram naamã wakate, Edom nebã tõdgame tɩ b pa na n le sak Zida ye.+ Bãmb yãka b toorẽ dĩma.+ 9 Dẽ, a Zoram ne a nanambsã kẽnga be ne a saar-dãmbã* fãa. Yẽ yika ne yʋng n zab ne Edom nebã sẽn da gũbg yẽ ne a saar-dãmbã nanambsã, n tõog-ba. 10 La Edom nebã kell n tõdga fasɩ tɩ b kõn sak Zida n tãag rũndã. Wakat kãnga, Libna+ me tõdga a Zoram, bala a ra basa a yaab-rãmbã Wẽnnaam a Zeova.+ 11 Sẽn paase, a Zoram ra maana zĩ-zãnts*+ Zida tãensã zut n kɩt tɩ Zerizalɛm nebã pa maan sɩd ne Wẽnnaam ye.* Yẽ kɩtame tɩ Zida nebã bʋdge.
12 La no-rɛɛs a Eli+ wa n gʋlsa sebr n tool a Zoram n yeel-a yaa: “Ad fo yaab a Davɩɩd Wẽnnaam a Zeova sẽn yeele: ‘Fo pa rɩk f ba a Zozafat+ wall Zida rĩm a Aaza+ naoor ye. 13 Fo rɩka Israyɛll rĩm-dãmbã naoore,+ n kɩt tɩ Zida ne Zerizalɛm nebã maan wa a Akaab roogã rãmba,+ n pa maan sɩd ne Wẽnnaam ye.*+ Fo pʋd n kʋʋ f ba-biisã+ sẽn yaa fo ba wã roog rãmbã sẽn da são foo wã. 14 Woto yĩnga, a Zeova na n sɩbga fo nin-buiidã, f kom-dibli wã ne f pagbã la f paoongã fãa ne to-kãsenga. 15 Fo na n bẽe bãas wʋsgo, ne yãad bãaga, hal tɩ bãagã wa kɩt tɩ f yãadã yit daar fãa.’”
16 Dẽ, a Zeova kɩtame+ tɩ Filisti nebã+ ne Araab-rãmb+ nins sẽn pẽ Etiyopi nebã yik zabr ne a Zoram. 17 Bãmb wa n zaba ne Zida, n wõr n kẽ tẽngã, n wʋk paoong ning fãa b sẽn yã na-yirã,+ n paas a kom-dibli wã ne a pagbã n looge. Yaa a Zowakaaz*+ sẽn yaa a kom-dibli wã yao-zʋʋgã bal n põse. 18 La bõn-kãensã fãa zugẽ, a Zeova loba a Zoram yãad bãag sẽn pa tõe n maage.+ 19 Bilf poore, yʋʋm a yiib sẽn looge, bãagã kɩtame t’a yãadã yi, la bãagã nams-a-la wʋsg hal t’a ki. A nin-buiidã pa yõog wisd a yĩnga, wa b sẽn da yõog wisd a yaab-rãmbã yĩngã ye.+ 20 A Zoram sẽn wa n lebg rĩmã t’a tara yʋʋm pis-tã la a yiibu, la yẽ rɩɩ naam yʋʋm a nii Zerizalɛm. A sẽn ki wã, ned pa yãb-a ye. Dẽ, b mum-a-la a Davɩɩd tẽngẽ wã,+ la pa yɩ rĩm-dãmbã yaadẽ ye.+
22 Zerizalɛm nebã kɩtame t’a Zoram kom-dibli wã yao-zʋʋg a Akaziya ledg-a n lebg rĩma. Bala fãadbã sẽn da wa sikã zĩigẽ ne Araab-rãmbã kʋʋ a kẽem-dãmbã fãa.+ Woto, a Zoram biig a Akaziya sɩnga naam dɩɩb Zida.+ 2 A Akaziya sẽn wa n lebg rĩmã t’a tara yʋʋm pisi la a yi, la yẽ rɩɩ naam Zerizalɛm yʋʋmde. A ma wã yʋʋr la a Atali,+ n da yaa a Omri+ yagenga.*
3 Yẽ me rɩka a Akaab roogã rãmb naoore,+ bala a ma wã n da sagend-a t’a maand sẽn yaa wẽnga. 4 A Akaziya ra maanda sẽn yaa wẽng a Zeova nifẽ wa a Akaab roogã rãmba. Bala a ba wã kũum poore, bãmb n lebg a sagendb tɩ wa ne a wãabo. 5 A kelga b saglsã n tũ rĩm a Akaab biig a Zoram n kẽng Ramot-galaad+ n na n tɩ zab ne Siiri rĩm a Azayɛlle,+ tɩ tãb-tãoodbã tão a Zoram n pogle. 6 Yẽ leba Zizreyɛll+ n na n tɩ tɩp poglg ning Siiri nebã sẽn pogl-a Rama, a sẽn wa n zabd ne Siiri rĩm a Azayɛllã.+
La a Zoram+ biig a Akaziya* sẽn yaa Zida rĩmã kẽnga Zizreyɛll n na n tɩ ges a Akaab biig a Zoram,+ a sẽn paam sãmpogrã yĩnga.*+ 7 Wẽnnaam kɩtame t’a Akaziya sẽn wa n na n ges a Zorammã tũ ne a yõore. A sẽn ta wã, a tũu a Zoram tɩ b yi n na n seg a Nimsi yageng* a Zehu,+ soab ning a Zeova sẽn da yãk* t’a na n sãam a Akaab roogã rãmbã.+ 8 A Zehu sẽn wa n sɩng Wẽnnaam bʋ-kaoorã pidsg a Akaab roogã rãmb zugã, a yãa Zida nanambsã, ne a Akaziya kẽem-dãmbã kom-dibli sẽn yaa a Akaziya tʋm-tʋmdbã, n kʋ-ba.+ 9 Rẽ poore, yẽ kɩtame tɩ b gẽes a Akaziya. La bãmb tɩ yõk-a-la Samari zĩig ning a sẽn da tɩ solgã n wa kõ a Zehu. Dẽ, bãmb kʋ-a lame la b mum-a.+ Bala b yeelame yaa: “Yaa a Zozafat sẽn bao a Zeova ne a sũur fãa wã yagenga.”+ A Akaziya roogã ra pa le tar ned sẽn tõe n deeg naamã ye.
10 A Akaziya ma a Atali+ sẽn yã t’a biigã kiime wã, a yikame n na n kʋ Zida na-roogã kom-dibli wã fãa.+ 11 La rĩm a Zoram bi-pugl a Zosebat soos n dɩka a Akaziya bi-riblã a ba-biisã b sẽn da segd n kʋ wã sʋka. Yẽ tɩ solga a Zowas+ ne a yaoolã ro-gãag pʋgẽ. Rĩm a Zoram+ bi-pugl a Zosebat sẽn da yaa maan-kʋʋd a Zehoyada+ pag la a Akaziya tãoã tõog n solga a Zowase, t’a Atali pa paam-a n kʋ ye.+ 12 A Zowas kell n paa ne bãmb yʋʋm a yoobe, n da solg Wẽnnaam doogẽ wã. Wakat kãng t’a Atali rɩta naam soolmã pʋgẽ.
23 Yʋʋm a yopoe-n-soabã, maan-kʋʋd a Zehoyada tʋma ne raoodo, n maan kaool ne tãb-biis koabg-koabg nanambsã.+ Yɩɩ ne a Zerowam biig a Azariya, a Yehohanan biig a Ismayɛlle, a Obɛɛd biig a Azariya, ne a Adaya biig a Maaseya, la a Zikri biig a Elisafat. 2 Dẽ, bãmb saaga Zida soolmã n tigim Levi buudã neb+ sẽn be Zida tẽnsã fãa pʋsẽ wã, ne Israyɛll buudã rot taoor dãmba. Bãmb sẽn wa Zerizalɛmmã, 3 nin-buiidã fãa maana kaool+ ne rĩmã Wẽnnaam doogã pʋgẽ. Rẽ poore, a Zehoyada yeela bãmb yaa:
“Ade! Rĩmã biig na n dɩɩ naamã wa a Zeova sẽn yeel a Davɩɩd kom-dibli wã wɛɛngẽ wã.+ 4 Ad yãmb sẽn segd n maane: Maan-kʋʋdbã ne Levi buudã neb nins sẽn tʋmd+ vʋʋsg daarã na n welga taab sul a tãabo, tɩ sull a yembr yɩ rigno-gũudba,+ 5 tɩ sull a yiib-n-soabã zĩnd na-yirã,+ tɩ sull a tãab-n-soabã gũ rignoor ning b sẽn boond tɩ Yẽbgrã rignoorã. La nin-buiidã fãa na n zĩnda a Zeova roogã samandẽ.+ 6 Ra n bas-y tɩ ned baa a ye kẽ a Zeova roogã pʋgẽ, sã n pa maan-kʋʋdbã ne Levi buudã neb sẽn tʋmd be wã bala.+ Bãmb n tõe n kẽ, bala b yaa sull sẽn welg toore. La nin-buiidã fãa segd n tũu a Zeova noorã. 7 Levi buudã neb segd n gũbga rĩmã tɩ ned kam fãa zãad a zab-teedo. Ned ning sẽn na n kẽ roogã pʋgẽ bɩ y kʋ-a. Pa-y ne rĩmã zĩig ning fãa a sẽn na n kẽnge.”
8 Levi buudã neb ne Zida nebã fãa maana wa maan-kʋʋd a Zehoyada sẽn yeelã bal kɛpɩ. Bãmb ned kam fãa peega a neb nins sẽn tʋmd vʋʋsg daarã, la sẽn pa tʋmd-b vʋʋsg daarã.+ Bala maan-kʋʋd a Zehoyada pa bas sulã+ tɩ b sig tʋʋm ye. 9 Dẽ, maan-kʋʋd a Zehoyada rɩka rĩm a Davɩɩd kãnã, gãn-bõonegã* ne a gãn-gilsã+ sẽn da be Wẽnnaam doogẽ wã,+ n kõ tãb-biis koabg-koabg nanambsã.+ 10 Yẽ kɩtame tɩ nebã fãa yals b zĩisẽ tɩ ned kam fãa zãad a zab-teoogo, sẽn sɩng ne wẽnd-doogã nug-rɩtgo, n tãag a nug-goabgã. Kẽer da bee tẽn-kugrã sɛɛgẽ, tɩ sãnda be wẽnd-doogã sɛɛgẽ n gũbg rĩmã. 11 Rẽ poore, b talla rĩmã biigã+ n yi n fõgn-a maanfã, la b rɩk Kasetã*+ n dogl a zugã t’a lebg rĩma, t’a Zehoyada ne a kom-dibli wã sudg a zugã kaam. Dẽ, bãmb yeelame yaa: “Wẽnd na kaoos rĩmã!”+
12 A Atali sẽn wʋm nin-buiidã sẽn zoet la b kilsd rĩmã nao rãamdã, tao-tao bala, yẽ kẽnga nin-buiidã nengẽ a Zeova roogẽ wã.+ 13 Dẽ, a yãa rĩmã sẽn yas a ra-lukã sɛɛgẽ, rignoorẽ wã. Nanambsã+ ne sẽn peebd-b tãntãadã ra bee ne rĩmã, tɩ soolmã nin-buiidã fãa ra kɩdemdẽ+ la b peebd tãntãado, tɩ yɩɩn-yɩɩndbã zãad yʋʋm-teedã n be taoor tɩ b kɩdemdẽ. Zĩig pʋgẽ, a Atali pãrsa a futã n zẽk a koɛɛg n yeele: “Yaa zãmbo! Yaa zãmbo!” 14 La maan-kʋʋd a Zehoyada kɩtame tɩ tãb-biis koabg-koabg nanambsã, b rãmb nins sẽn da get tãb-biisã yellã yi, n yeel-b yaa: “Tall-y-yã-a n yi nebã sʋka. Ned sã n pʋg-a bɩ y kʋ-a ne sʋʋga!” Bala maan-kʋʋdã ra yeelame tɩ b ra kʋ-a a Zeova roogẽ wã ye. 15 Woto, bãmb tall-a lame n looge, la b sẽn ta na-yirã zĩig ning b sẽn boond tɩ Wed-moosã rignoorẽ wã, b kʋ-a-la zĩig pʋgẽ.
16 A Zehoyada kɩtame tɩ nin-buiidã fãa ne rĩmã maan kaool ne yẽ, n yeel tɩ b na n kell n yɩɩ a Zeova nin-buiidu.+ 17 Rẽ poore, nin-buiidã fãa waa a Baal roogẽ* wã n siig-a,+ n pãb a tẽn-kugã ne a bõn-naandsã n sãeege,+ la b kʋ a Baal maan-kʋʋd a Matã+ tẽn-kugã taoore. 18 Dẽ, a Zehoyada rɩka a Zeova roogã yell gesg n bobl maan-kʋʋdbã ne Levi buudã nebã. Yaa b rãmb nins a Davɩɩd sẽn da weel sull-sull tɩ b na n get a Zeova roogã yelle, n maand a Zeova maand sẽn yõogd bugmã+ wa sẽn gʋls a Moyiiz Tõogã pʋgẽ,+ ne sũ-noog la yɩɩla, wa a Davɩɩd sẽn wilgã. 19 Yẽ kɩtame me tɩ rigno-gũudbã+ yas a Zeova roogã rignoyẽ, sẽn na yɩl tɩ ned ning fãa sẽn yaa rẽgd ra kẽ ye. Baa sẽn yaa rẽgd ning fãa. 20 Rẽ poore, a Zehoyada peega tãb-biis koabg-koabg nanambsã,+ nin-kãsemsã n paas nin-buiidã taoor dãmba, tẽngã nin-buiidã fãa tɩ b yãag rĩmã n yi a Zeova roogẽ wã. Bãmb tũu na-yirã yĩngr dignoorã n kẽng na-yirã n tɩ zĩnig rĩmã rĩungã+ geer zugu.+ 21 Woto, tẽngã nin-buiidã fãa kɩdma sũ-noogo, la tẽngã zĩnda bãane. Bala b kʋʋ a Atali ne sʋʋga.
24 A Zowas sẽn wa n na n deeg naamã t’a tara yʋʋm a yopoe,+ la a rɩɩ naam Zerizalɛm yʋʋm pis-naase. A ma yʋʋr da yaa a Zibiya, n yit Bɛɛr-seba.+ 2 A Zowas maana sẽn yaa tɩrg a Zeova nifẽ, maan-kʋʋd a Zehoyada vɩɩmã tõre.+ 3 A Zehoyada baoo pagb a yiib n kõ-a, la yẽ roga kom-dibli la kom-pugli.
4 Rẽ zugẽ, a Zowas tʋlga ne a sũur fãa n na n maneg a Zeova roogã.+ 5 Woto, yẽ tigma maan-kʋʋdbã ne Levi buudã neb n yeel-b yaa: “Saag-y Zida tẽnsã pʋsẽ n deeg ligd Israyɛll nebã fãa nengẽ, n manegd y Wẽnnaamã roog+ yʋʋmd fãa. Yãmb segd n maana tao-tao.” La Levi buudã neb pa maan tao-tao ye.+ 6 Dẽ, rĩmã boola maan-kʋʋdbã taoor soab a Zehoyada n sok-a yaa:+ “Bõe yĩng tɩ yãmb pa kɩt tɩ Levi buudã neb reeg yaood sẽn yaa sõngã Zida ne Zerizalɛm nebã nengẽ wa a Zeova tʋm-tʋmd a Moyiiz sẽn wilgã+ n wa, yaood ning Israyɛll nin-buiidã fãa sẽn segd n yao Kasetã sɛk-roogã yĩngã?+ 7 Bala pʋg-wẽng a Atali+ kom-dibli wã ra kẽe Wẽnnaam a Zeova roogã pʋgẽ ne pãnga,+ n wʋk a te-sõamyã fãa n tɩ waoog Baal-dãmbã.” 8 Dẽ, rĩmã kɩtame tɩ b maan koglg+ n dɩgl a Zeova roogã noore.+ 9 Rẽ poore, b moona Zida ne Zerizalɛm fãa pʋgẽ tɩ b wa ne yaood sẽn yaa sõngã+ a Zeova tʋm-tʋmd a Moyiiz sẽn dogl Israyɛll nebã we-raoogẽ wã. 10 Nanambsã ne nin-buiidã fãa kɩdma sũ-noogo,+ la b ra wata ne kũun n ningd koglgã pʋgẽ hal t’a wa pidi.*
11 Levi buudã neb sã n da wa tall koglgã n na n tɩ kɩs rĩmã, n yã tɩ ligdã sẽn be be wã lebga wʋsgo, rĩmã seb-gʋlsd ne maan-kʋʋdbã taoor soab tʋm-tʋmd wat n vaaga ligdã koglgã pʋgẽ+ la b tɩ lebs-a a zĩigẽ. Yaa woto la b ra maand daar fãa, la b paama ligd wʋsgo. 12 Rĩmã ne a Zehoyada ra rɩkda ligdã n kõt neb nins sẽn get a Zeova roogã tʋʋmdã yellã, tɩ b reegd n yaood kug-pɛɛsdbã ne nug-tʋʋm dãmbã a Zeova roogã manegr yĩnga,+ n paas sẽn tʋmd-b kutã la ne sẽn tʋmd-b zũud tʋʋmã sẽn na yɩl tɩ b maneg a Zeova roogã. 13 Neb nins sẽn get tʋʋmdã yellã kɩtame tɩ tʋm-tʋmdbã sɩng tʋʋmdã, la bãmb gesame tɩ tʋʋmdã kẽng taoore. Bãmb manega Wẽnnaam doogã t’a lebg wa pĩndã, la b paas-a pãnga. 14 Bãmb sẽn sa tʋʋmdã, tao-tao bala, b rɩka ligdã sẽn kellã n tɩ kɩs rĩmã ne a Zehoyada. La bãmb rɩkame n maan teed a Zeova roogã yĩnga. Yaa teed tʋʋmdã yĩnga, teed b sẽn na n tar n maand kũun toor-toorã, la wũmbli ne teed a taab sẽn maan ne sãnem la wanzuri.+ A Zehoyada vɩɩmã tõre, bãmb da maanda maand sẽn yõogd bugum+ wakat fãa a Zeova roogã pʋgẽ.
15 A Zehoyada kʋʋla wʋsg n tɩg yʋʋma, n yaool n ki. A sẽn wa n na n ki wã t’a tara yʋʋm koabg la pis-tã. 16 B mum-a-la a Davɩɩd tẽngẽ wã ne rĩm-dãmbã.+ Bala yẽ maana neer Israyɛlle,+ Wẽnnaam la a roogã wɛɛngẽ.
17 A Zehoyada kũumã poore, Zida nanambsã wa n wõgemda rĩmã taoore, la rĩmã kelga bãmba. 18 Bãmb basa b yaab-rãmbã Wẽnnaam a Zeova roogã, n sɩng ra-lugsã* ne bõn-naandsã pʋʋsgo, hal tɩ Wẽnnaam sũur puug ne Zida la Zerizalɛm b yel-wẽndã yĩnga. 19 A Zeova ra tʋmda no-rɛɛsdb n na n kɩt tɩ b lebg n wa a nengẽ. No-rɛɛsdbã ra tar-b-la keoogre,* la b pa sak n kelg ye.+
20 Wẽnnaam vʋʋsmã siga maan-kʋʋd a Zehoyada+ biig a Zakari t’a yals nin-buiidã taoor n yeel-b yaa: “Ad Wẽnnaam sẽn yeele: ‘Bõe yĩng tɩ yãmb kɩɩsd a Zeova noyã? Yãmb pa na n tõog ye! Yãmb sẽn bas a Zeova wã yĩnga, yẽ me na n basa yãmba.’”+ 21 La bãmb sɩɩga taab noor+ tɩ rĩmã kɩt tɩ b lob-a kug a Zeova roogã samandẽ n kʋ.+ 22 Woto, rĩm a Zowas pa tẽeg neer ning a Zakari ba a Zehoyada sẽn maan-a wã ye. Yẽ kʋʋ a biigã, la a sẽn wa n kiidẽ wã a yeelame yaa: “Bɩ a Zeova gese, la a sok-yã.”+
23 Yʋʋmdã sɩngrẽ, Siiri tãb-biisã wa n zaba ne a Zowas n kẽ Zida ne Zerizalɛm ne pãnga.+ Bãmb kʋʋ nin-buiidã nanambsã fãa,+ n wʋk b paoongã fãa n tɩ kõ Damaas rĩmã. 24 Baa Siiri tãb-biisã sẽn wa zabrã sẽn pa waoogã, a Zeova ninga tãb-biis kʋʋng b nugẽ,+ bala bãmb ra basa b yaab-rãmbã Wẽnnaam a Zeova. Woto, Wẽnnaam tũnuga ne bãmb* n sɩbg a Zowas. 25 Bãmb sẽn loog n bas-a wã t’a pogla wʋsgo.* A tʋm-tʋmdbã sɩɩga taab noor n na n maan-a wẽnga, a sẽn daag maan-kʋʋd a Zehoyada kom-dibli wã* zɩɩmã yĩnga.+ Bãmb kʋ-a-la a gãagẽ wã.+ Woto, yẽ kiime tɩ b mum-a a Davɩɩd tẽngẽ wã,+ la b pa mum-a rĩm-dãmbã yaadẽ ye.+
26 Ad neb nins sẽn sɩɩg taab noor+ n kʋ-a wã yʋya: Yaa Amon pag a Simeyat biig a Zabaad ne Mowaab pag a Simrit biig a Yehozabaad. 27 A kom-dibli wã ne bãngr-goam nins b sẽn da togs n keoog-a wã+ yelle, la Wẽnnaam doogã manegr*+ yellã, b gʋlsã rẽ fãa Rĩm-dãmbã sebr pʋgẽ. La a biig a Amazɩya n ledg-a n lebg rĩma.
25 A Amazɩya sẽn deeg naamã t’a tara yʋʋm pisi la a nu, la a rɩɩ naam Zerizalɛm yʋʋm pisi la a wɛ. A ma wã yʋʋr la a Zewowadan, n yit Zerizalɛm.+ 2 A Amazɩya ra maanda sẽn yaa tɩrg a Zeova nifẽ, la ra pa ne a sũur fãa ye. 3 La a naamã sẽn wa n paam pãngã, a kʋʋ a tʋm-tʋmdb nins sẽn da kʋ a ba wã sẽn da yaa rĩmã.+ 4 La a pa kʋ b kambã, bala a maaname tɩ zems bũmb ning sẽn gʋls Tõogã sẽn be a Moyiiz sebrã pʋgẽ wã. Be, a Zeova yeelame yaa: “Ba-rãmb pa segd n ki b kamb yel-wẽn yĩng ye. Kamb me pa segd n ki b ba-rãmb yel-wẽn yĩng ye. Ned kam fãa segd n kii a yel-wẽn yĩnga.”+
5 A Amazɩya tigma Zida nebã n kɩt tɩ b yals wa sẽn zems b buudã roto, n zems ne neb tusr-tusr nanambsã, la neb koabg-koabg nanambsã, Zida ne Bẽnzame fãa yĩnga.+ A sõda neb nins sẽn tar yʋʋm pisi la sẽn yɩɩd rẽ wã,+ n mik tɩ yaa neb tus-kobs-tã sẽn mi zabr sõma* n tõe n kẽng zabre, la sẽn tõe n tall kãnd la gãong sẽn yaa yaleng n zabe. 6 Sẽn paase, yẽ yãka wanzuri talã* koabg n yao Israyɛll tãb-biis tus-koabg sẽn yaa gãndaad tɩ b lebg a tãb-biisi. 7 La Wẽnnaam dao a ye n wa n yeel-a yaa: “N-na! Ra n bas-y tɩ Israyɛll tãb-biisã tũ yãmb ye. Bala a Zeova pa be ne Israyɛlle,+ la a pa be ne Efrayim ned baa a ye. 8 Kẽng-y y yembr n tɩ wɩsg y meng n zab ne raoodo. Sã n pa rẽ, Wẽnnaam tõe n kɩtame tɩ yãmb lak n lʋɩ y bɛɛbã taoore. Bala Wẽnnaam tara pãng n tõe n sõng neda,+ la a tõe tɩ ned lak n lʋɩ.” 9 Rẽ la a Amazɩya sok Wẽnnaam daoã yaa: “La wanzuri talã koabgã mam sẽn kõ Israyɛll tãb-biisã?” Tɩ Wẽnnaam daoã leok-a yaa: “A Zeova tõe n kõo yãmb sẽn yɩɩd rẽ.”+ 10 Dẽ, a Amazɩya kɩtame tɩ tãb-biisã sẽn yi Efrayim n wa yẽ nengẽ wã lebg n leb b tẽngẽ. La bãmb sũurã ra puuda ne Zida. Woto, bãmb lebg n leba b tẽngẽ wã ne sũ-pu-kãsenga.
11 A Amazɩya kenga a sũur n tall a tãb-biisã n kẽng Yamsem longã pʋgẽ+ n tɩ kʋ Seyɩɩr+ dap tus-piiga. 12 La Zida nebã yõga bãmb tus-piig vɩɩse. Dẽ, bãmb tall-b lame n kẽng pĩig sẽn yaa lug-lug zugu, n tɩ tus-b tɩ b fãa lʋɩ n bedse. 13 La tãb-biis nins a Amazɩya sẽn da kɩt tɩ b lebg n pa tũ-a n kẽng zabrã+ ra tɩ zabda ne Zida tẽnse, sẽn sɩng ne Samari+ n tãag Bɛt-horon.+ Bãmb kʋʋ neb tus a tã la b wʋk teed wʋsgo.
14 La a Amazɩya sẽn tɩ zab ne Edom nebã n tõog n lebg n watẽ wã, yẽ wʋka Seyɩɩr nebã wẽnnaam-dãmbã n wa vigl tɩ yaa a wẽnnaam-dãmba,+ n wõgemded b taoor la a maand maoong sẽn nusd bug-zõos n kõt-ba. 15 Woto, a Zeova sũur puuga wʋsg ne a Amazɩya t’a tʋm no-rɛɛs t’a tɩ yeel-a yaa: “Bõe yĩng tɩ yãmb tũud neb wẽnnaam-dãmb sẽn pa tõog n fãag-b yãmb nugẽ?”+ 16 La no-rɛɛsã sẽn wa n gomdã, rĩmã leok-a lame yaa: “Tõnd n yãk foo tɩ f lebg rĩmã sagend bɩ?+ Mum f noorã!+ Sã n pa rẽ, m na n kɩtame tɩ b kʋ-fo.” Woto, no-rɛɛsã loogame. La nand t’a looge, a paasame yaa: “Mam miime tɩ Wẽnnaam yãka yam n na n sãam yãmba, y sẽn maan bõn-kãngã wã yĩnga, la y sẽn pa kelg mam saglgã.”+
17 Rĩm a Amazɩya wa n yẽsa ne a sagendbã, n tʋm koɛɛg Israyɛll rĩm a Zehu biig a Zowakaaz biig a Zowas nengẽ n yeel-a yaa: “Wa tɩ d seg taab n zabe.”+ 18 Israyɛll rĩm a Zowas tʋmame tɩ b tɩ yeel Zida rĩm a Amazɩya yaa: “Libã gõos tuugã tʋma koɛɛg Libã sɛɛdr tɩɩgã nengẽ n yeel-a yaa: ‘Rɩk f bi-puglã n kõ mam biigã t’a maan a paga.’ La Libã we-rũng n pɩʋʋg be, n tab gõos tuugã. 19 Fo yeelame yaa: ‘Ade! Mam tõoga Edom.’+ Rẽ kɩtame tɩ fo lebg wuk-m-meng soab n dat tɩ b pẽg-fo. La kell n pa f zakẽ wã.* Bõe yĩng tɩ f na n bao yel-beed n kõ f meng n wa ne f lʋɩɩse, la Zida me lʋɩɩse?”
20 La a Amazɩya pa kelg ye.+ Bala yaa Wẽnnaam n da rat n ning bãmb b bɛ wã nugẽ,+ b sẽn tũ Edom wẽnnaam-dãmbã yĩnga.+ 21 Woto, Israyɛll rĩm a Zowas kẽngame tɩ yẽ ne Zida rĩm a Amazɩya na n seg taab Bɛt-semes+ sẽn be Zida soolmẽ wã n zabe. 22 Israyɛll nebã tõoga Zida nebã, tɩ bãmb ned kam fãa zoe n kuil a yiri.* 23 Israyɛll rĩm a Zowas yõka Zida rĩm a Amazɩya sẽn yaa a Akaziya biig a Zowas biigã Bɛt-semese. Yẽ tall-a lame n kẽng Zerizalɛm, n tɩ siig a lalgã kãntɩɩg kobs-naase,* sẽn sɩng ne Efrayim rignoorã+ n tãag Gõdrã zĩigẽ rignoorã.+ 24 A Zowas wʋka sãnemã ne wanzuri wã, la teed nins fãa sẽn da be Wẽnnaam doogã pʋgẽ t’a Obɛɛd-edom gũudẽ wã, la sẽn da be na-yirã laog bĩngr zĩisẽ wã,+ la a yõg neb me. Rẽ poore, a leba Samari.
25 A Zowas biig a Amazɩya+ sẽn yaa Zida rĩmã vɩɩmda yʋʋm piig la a nu Israyɛll+ rĩm a Zowakaaz biig a Zowas+ kũumã poore. 26 A Amazɩya vɩɩmã kibay nins sẽn kellã, b sɩngr n tãag b baasgo, b gʋlsa rẽ fãa Zida ne Israyɛll rĩm-dãmbã kibay sebrã pʋgẽ. 27 A Amazɩya sẽn wa n bas a Zeova tũubã tɛka, neb n sɩɩg taab noor+ Zerizalɛm n na n maan-a wẽnga, t’a zoe n kẽng Lakiise. La b tʋma neb tɩ b babs-a Lakiis n tɩ kʋ-a beenẽ. 28 Dẽ, bãmb tall-a-la ne wed-moos n wa mum-a Zida tẽngẽ wã ne a yaab-rãmbã.
26 Dẽ, Zida nin-buiidã fãa yãka a Ozɩyas+ sẽn da tar yʋʋm piig la a yoobã n kɩt t’a ledg a ba a Amazɩya+ n lebg rĩma. 2 Rĩmã* sẽn ki wa a yaab-rãmbã+ poore, yẽ lebs n mee Elot+ tẽngã n kɩt t’a le naag Zida soolmã tẽnse. 3 A Ozɩyas+ sẽn deeg naamã t’a tara yʋʋm piig la a yoobe, la yẽ rɩɩ naam yʋʋm pis-nu la a yiib Zerizalɛm. A ma wã yʋʋr la a Zekoliya, n yit Zerizalɛm.+ 4 Yẽ ra maanda sẽn yaa tɩrg a Zeova nifẽ wa a ba a Amazɩya.+ 5 A Zakari, rao ning sẽn zãms-a Wẽnnaam zoeesã vɩɩm tõre, yẽ ra baooda Wẽnnaam. Wakat ning fãa yẽ sẽn da baood Wẽnnaam a Zeova wã, a kɩtame t’a yɛlã fãa ra yaa sõma.+
6 Yẽ kẽng n tɩ zaba ne Filisti nebã+ n wurg Gat+ ne Zabne+ la Asdood+ lalsã. Dẽ, a mee tẽns Asdood soolmẽ wã, la Filisti nebã sʋka. 7 Wẽnnaam ra sõngd-a lame n zabd ne Filisti nebã, Araab-rãmbã+ sẽn da be Gʋʋr-baal soolmẽ wã, la Mewunim-dãmbã. 8 Amon nebã+ sɩnga a Ozɩyas fadg* yaoobo. A yʋʋrã wa n yiime n saag n ta Ezɩpti, bala a ra paama pãng hal wʋsgo. 9 Sẽn paase, a Ozɩyas mee gasd+ Zerizalɛm n paas b pãnga. Yaa Gõdrã zĩig rignoorã+ sɛɛgẽ, longã rignoor+ sɛɛgẽ la zĩig ning b sẽn me n paas lalgã pãngã sɛɛgẽ. 10 A leb n mee gasd+ we-raoogẽ wã la a tu* buls wʋsgo, bala a ra tara rũms ka tɛka. Yẽ maana woto me Sefela wã pʋgẽ ne tẽn-nabrẽ* wã. A ra tara ka-koaadba, la neb sẽn kood a viyn pʋtã tãensẽ wã la Karmelle, bala a ra nonga koobo.
11 Sẽn paase, a Ozɩyas ra tara tãb-biis sẽn tar zab-teed sõma zabr yĩnga. Bãmb da sigla sull-sull n kẽnd n zabdẽ. Seb-gʋlsd a Yeyɛll+ ne a Maaseya sẽn yaa sõangdã n da sõd bãmb sull-sull n gʋls b yʋyã.+ A Hananiya sẽn yaa rĩmã nanambsã nin-yendã n da yaa b yiibã taoor soaba. 12 Buudã rot taoor dãmb sẽn da so tãb-bi-kãensã sẽn yaa gãndaadã sõorã fãa ra yaa tus a yi la kobs-yoobe. 13 Tãb-biisã b sẽn da so wã sõor yaa bãmb tus-kobs-tã la a yopoe la kobs-nu sẽn mi zabr sõma la sẽn yaa gãndaad n sõngd rĩmã n zabd ne bɛɛbã.+ 14 A Ozɩyas kõo tãb-biisã fãa gãndo, kãna,+ kut pugli, kut futu,*+ tãbd la loobse.+ 15 Sẽn paase, a kɩtame tɩ bãngdb maan zabr masĩn-dãmb Zerizalɛm. Bãmb dogl-b-la gasdã zut+ la lalsã kɩrems tɩ b tõe n tall n tão pɛɛm la b lob kug-bɛda. Woto, yẽ yʋʋrã yiime n saag zĩig zãnga, bala a ra paama sõngr hal wʋsgo, t’a pãngã paase.
16 La a pãngã sẽn wa n paasã, tao-tao bala, yẽ lebga wuk-m-meng soab tɩ wa ne a wãabo. Yẽ beega a Wẽnnaam a Zeova n kẽ a Zeova roogẽ wã n na n yõog wisdu, wisd tẽn-kugrã zugu.+ 17 Zĩig pʋgẽ, maan-kʋʋd a Azariya ne a Zeova maan-kʋʋdb a taab bãmb pis-nii n pʋgl-a ne raood n kẽ. 18 Bãmb gɩdga rĩm a Ozɩyas n yeel-a yaa: “Pa zems tɩ yãmb a Ozɩyas yõog wisd n kõ a Zeova ye.+ Yaa maan-kʋʋdbã bal n segd n yõog wisdu, bala bãmb la a Aarõ+ yagense, b rãmb nins b sẽn welg toor dẽ yĩngã. Yi-y zĩ-sõngẽ wã tɩ yãmb beegame la y pa na n paam waoogr Wẽnnaam a Zeova nengẽ dẽ yĩng ye.”
19 La a Ozɩyas sẽn da zãad wisd yõogr laag a nugẽ n na n yõog wisdã sũur puugame.+ La a sũurã sẽn puug ne maan-kʋʋdbã sasa, wãood+ n puk a rĩirẽ wã maan-kʋʋdbã taoor a Zeova roogã pʋgẽ, wisd tẽn-kugrã sɛɛgẽ. 20 Maan-kʋʋdbã taoor soab a Azariya ne maan-kʋʋdbã fãa sẽn wẽnemd n ges-a, b yãa wãood sẽn puk a rĩirẽ wã. Dẽ, bãmb yiis-a-la tao-tao, la yẽ mengã yii ne yãgbo, bala a Zeova sɩbg-a lame.
21 Rĩm a Ozɩyas kell n yɩɩ wãoor a yõor tɛka. A sẽn da yaa wãoorã yĩnga, a ra bee roog pʋgẽ kɛɛnga,+ bala a ra pa tar sor n na n kẽng a Zeova roogẽ wã ye. A biig a Zotam n da get na-yirã yelle, n kaood soolmã nin-buiidã bʋʋdo.+
22 A Ozɩyas vɩɩmã kibay nins sẽn kellã, b sɩngr n tãag b baasgo, a Amooz biig a Ezayi+ sẽn yaa no-rɛɛsã gʋlsa rẽ fãa. 23 Dẽ, a Ozɩyas kii wa a yaab-rãmbã tɩ b mum-a ne a yaab-rãmbã. La yɩɩ rĩm-dãmbã pʋʋgẽ,* bala bãmb yeelame yaa: “A yaa wãoore.” La a biig a Zotam+ n ledg-a n lebg rĩma.
27 A Zotam+ sẽn deeg naamã t’a tara yʋʋm pisi la a nu, la a rɩɩ naam Zerizalɛm yʋʋm piig la a yoobe. A ma wã yʋʋr la a Zerusa, n da yaa a Zadok bi-pugla.+ 2 A ra maanda sẽn yaa tɩrg a Zeova nifẽ wa a ba a Ozɩyase,+ la yẽ pa pẽdg n na n kẽ a Zeova roogẽ wã ye.+ La nin-buiidã ra ket n maanda sẽn yaa wẽnga. 3 Yẽ mee a Zeova roogã yĩngr dignoorã,+ la a me Ofɛll+ lalgã. 4 A mee tẽns+ Zida soolmã zĩig ning sẽn yaa tãensã+ me, la a me zĩis sẽn gũbg ne lals+ la gasd+ zĩis nins tɩɩsã sẽn waoogã. 5 A Zotam zaba ne Amon nebã+ rĩm hal n wa tõog-ba. Dẽ, Amon nebã kõ-a-la wanzuri talã* koabga, bɩle koor* tus-piiga, ne orz* koor tus-piig yʋʋm-kãnga. Amon nebã leb n yao-a-la woto yʋʋm a yiib-n-soabã ne a tãab-n-soabã.+ 6 A Zotam ra paamda pãng n paasdẽ, bala yẽ ra yãka yam n na n tũ a Wẽnnaam a Zeova soayã.
7 A Zotam vɩɩmã kibay nins sẽn kellã, zab nins a sẽn zabã la bũmb nins a sẽn maanã, b gʋlsa rẽ fãa Israyɛll ne Zida rĩm-dãmbã kibay sebrã pʋgẽ.+ 8 A sẽn deeg naamã t’a tara yʋʋm pisi la a nu, la a rɩɩ naam Zerizalɛm yʋʋm piig la a yoobe.+ 9 A Zotam kii wa a yaab-rãmbã tɩ b mum-a a Davɩɩd tẽngã pʋgẽ.+ La a biig a Akaaz n ledg-a n lebg rĩma.+
28 A Akaaz+ sẽn deeg naamã t’a tara yʋʋm pisi, la a rɩɩ naam Zerizalɛm yʋʋm piig la a yoobe. A pa maan sẽn yaa tɩrg a Zeova nifẽ wa a yaab a Davɩɩd ye.+ 2 Yẽ rɩka Israyɛll rĩm-dãmbã togs-n-taare,+ hal n dõog Baal-dãmb bõn-naandse.+ 3 Sẽn paase, yẽ maana maoong sẽn nusd bug-zõos a Hinom bi-riblã longã* pʋgẽ, n yõog a kom-dibli bugmẽ,+ n tʋm tʋʋm-beed nins fãa bu-zẽms+ nins a Zeova sẽn dig n yiis Israyɛll nebã taoorã sẽn maanã. 4 Yẽ leb n da maanda maand la maoong sẽn nusd bug-zõos zĩ-zãntsẽ*+ wã, kunkubẽ wã la tɩ-bedr sẽn tar vãad wʋsg fãa tẽngre.+
5 Woto, a Wẽnnaam a Zeova ning-a-la Siiri rĩmã nugẽ+ tɩ b tõog-a, n yõg b neb wʋsg n kẽng Damaase.+ Bãmb leb n ning-a-la Israyɛll rĩmã nugẽ t’a kʋ a neb wʋsgo. 6 A Remaliya biig a Peka+ kʋʋ neb tus-koabg la pisi sẽn yaa gãndaad Zida soolmẽ wã daar-n-yɛnga. Bala bãmb da basa b yaab-rãmbã Wẽnnaam a Zeova.+ 7 Tãb-biig a Zikri sẽn yaa Efrayim nedã kʋʋ rĩmã biig a Maaseya ne a Aazrikam sẽn da get na-yirã yellã, n paas a Ɛlkana sẽn yaa rĩmã pʋgdgã. 8 Sẽn paase, Israyɛll nebã yõga b ba-biisã tus-kobs-yi. Yɩɩ pagba, kom-dibli la kom-pugli. Bãmb leb n zɛɛ teed wʋsgo, n tall n kẽng Samari.+
9 La a Zeova no-rɛɛs a yembr n da be be t’a yʋʋr la a Odɛɛde. Yẽ yiime n tɩ seg tãb-biisã sẽn wat Samari wã n yeel-b yaa: “Ade! Yaa yãmb yaab-rãmbã Wẽnnaam a Zeova sũur sẽn puug ne Zida wã la a sẽn ning-b yãmb nugẽ,+ tɩ y kʋ-b ne sũ-puugr sẽn zẽk n ta saasẽ wã. 10 Masã, yãmb dat n kɩtame tɩ Zida ne Zerizalɛm pagbã la b rapã lebg y tʋm-tʋmdba.+ La rẽ yĩnga, yãmb me pa tar taal yãmb Wẽnnaam a Zeova taoor sɩda? 11 Masã, kelg-y maam! Lebs-y y ba-biisã neb nins yãmb sẽn yõgã. Bala a Zeova sũur puuda ne yãmba.”
12 A sẽn gom woto wã, Efrayim nanambs kẽere, a Yehohanan biig a Azariya, a Mesilemot biig a Berekɩya, a Salum biig a Yehizkɩya la a Hadlayi biig a Amaza zaba sẽn kẽng-b zabrã n lebg n watẽ wã, 13 n yeel-b yaa: “Da wa-y ne neb nins y sẽn yõgã ka ye! Bala na n kɩtame tɩ tõnd paam taal a Zeova taoore. Yãmb sẽn dat n maanã na n paasa tõnd yel-wẽnã la d kongrã, bala tõnd taalã zoe n yaa wʋsgo, tɩ Wẽnnaam sũur puud ne Israyɛlle.” 14 Woto, sodaasã rɩka neb nins b sẽn yõgã ne teedã b sẽn zɛ wã+ n kɩs nanambsã ne nin-buiidã fãa. 15 Dẽ, b sẽn bool neb nins yʋy n yãk-bã yikame n ges b sẽn yõg b rãmbã yelle, n bao fut te-zɛɛdmã sʋk n kõ sẽn da yaa-b bɛɛlã. Woto, bãmb yeelg-b-la futu, la b kõ-b neooda, rɩɩb la koom, n paas kaam tɩbsg yĩnga. Sẽn paase, bãmb dɩka neb nins sẽn da pa tar pãngã ne bõense, n tall-b n kẽng b ba-biisã nengẽ Zeriko sẽn yaa koms tɩɩs tẽngã. Rẽ poore, bãmb leba Samari.
16 Wakat kãnga, rĩm a Akaaz kosa Asiiri rĩm-dãmbã sõngre.+ 17 Edom nebã le wa n zaba ne Zida n yõg neb n tall n looge. 18 Filisti nebã+ me wa n zaba ne tẽnsã sẽn be Sefela wã+ ne Zida Negɛɛbã pʋgẽ wã, n deeg Bɛt-semes,+ Ayalon,+ Gederot, Soko ne tẽns nins a sẽn so wã,* Timna+ ne tẽns nins a sẽn so wã,* Gimzo ne tẽns nins a sẽn so wã.* La bãmb tilga beenẽ. 19 A Zeova ninga Zida yãnde, Israyɛll rĩm a Akaaz yĩnga. Bala a basa Zida nebã tɩ b kẽ moogo, tɩ kɩt tɩ b beeg a Zeova wʋsgo.
20 La Asiiri rĩm a Tilgat-pilnezɛɛr+ pa sõng-a ye. A pʋd n wa n zaba ne-a n kẽes-a toog+ wʋsg pʋgẽ. 21 A Akaaz ra pɩɩsa a Zeova roogã laogo, na-yirã+ ne nanambsã zagsã laog n kõ Asiiri rĩmã, la pa naf-a ye. 22 La rĩm a Akaaz toogã pʋgẽ, a maneg n beega a Zeova n paase. 23 Yẽ sɩnga maand maaneg n kõt Damaas nebã sẽn tõog-a wã wẽnnaam-dãmbã+ n yetẽ yaa: “Siiri wẽnnaam-dãmbã sẽn sõngd-bã, mam na n kʋʋ maand n kõ-b tɩ b sõng ma-me.”+ La bãmb waa ne yẽ la Israyɛll nebã fãa lʋɩɩse. 24 Sẽn paase, a Akaaz wʋka Wẽnnaam doogã teedo. Yẽ wãa Wẽnnaam doogã teed peese,+ n pag a Zeova roogã kʋɩlense,+ la a me tẽn-kug Zerizalɛm pẽgsẽ wã fãa. 25 Zida tẽnsã fãa pʋsẽ, yẽ maana zĩ-zãnts* n na n maand maoong sẽn nusd bug-zõos n kõt wẽnnaam-dãmb a taaba,+ la yẽ beega a yaab-rãmbã Wẽnnaam a Zeova.
26 A Akaaz vɩɩmã kibay nins sẽn kellã, bũmb nins fãa a sẽn maanã, b sɩngr n tãag b baasgo, b gʋlsa rẽ fãa Zida ne Israyɛll rĩm-dãmbã kibay sebrã pʋgẽ.+ 27 Dẽ, a Akaaz kii wa a yaab-rãmbã, la b mum-a-la Zerizalɛm tẽngã pʋgẽ. B pa mum-a rĩm-dãmbã yaadẽ ye.+ La a biig a Ezekɩyaas n ledg-a n lebg rĩma.
29 A Ezekɩyaas+ sẽn deeg naamã t’a tara yʋʋm pisi la a nu, la a rɩɩ naam yʋʋm pisi la a wɛ Zerizalɛm. A ma wã yʋʋr la a Abiya, n yaa a Zakari bi-pugla.+ 2 A ra maanda sẽn yaa tɩrg a Zeova nifẽ+ wa a yaab a Davɩɩde.+ 3 A naamã pipi yʋʋmdã pipi kiuugã, a paka a Zeova roogã kʋɩlens n maneg-ba.+ 4 Rẽ poore, yẽ boola maan-kʋʋdbã la Levi buudã neb n tigm-b zĩ-vɩʋʋg ning sẽn be yaangã. 5 Yẽ yeel-b lame yaa: “Yãmb a Levi buudã neba, kelg-y maam! Yɩlg-y y mense,+ la y yɩlg y yaab-rãmbã Wẽnnaam a Zeova roogã. Yiis-y bũmb nins fãa sẽn yaa rẽgdã zĩ-sõngẽ wã.+ 6 Bala tõnd ba-rãmbã pa maan sɩd ne tõnd Wẽnnaam a Zeova ye. Bãmb maana sẽn yaa wẽng a nifẽ.+ B bas-a lame, la b wẽnemd n bas a Zeova roogã, n tud-a b kudga.+ 7 Sẽn paase, bãmb paga zãongã* kʋɩlens+ la b kiis fɩtl-dãmbã.+ Bãmb basa wisdã yõogre,+ la b pa le maand maand sẽn yõogd bugmã+ b sẽn da maand zĩ-sõngẽ wã n kõt Israyɛll Wẽnnaamã ye. 8 Woto yĩnga, a Zeova sũur puuga ne Zida la Zerizalɛm+ hal n kɩt t’a lebg bũmb sẽn lingd nebã, sẽn kẽesd-b rabeem, la sẽn kɩtd tɩ b fɩɩndẽ,* wa yãmb ninã sẽn ne wã.+ 9 Yaa rẽ n kɩt tɩ b kʋ tõnd yaab-rãmbã ka ne sʋʋga,+ la b yõg d kom-dibli wã ne d kom-pugli wã la d pagbã n kẽng yembdo.+ 10 La masã, mam tʋlla ne m sũur fãa n maan kaool ne Israyɛll Wẽnnaam a Zeova+ t’a sũur sẽn puud ne tõndã sigi. 11 M kamba, masã pa wakat yãmb sẽn segd n deem* ne y tʋʋmdã ye. Bala a Zeova yãka yãmb tɩ y na n yas a taoor n tʋmd a tʋʋmã,+ la y yõogd a maandã tɩ nusd bug-zõose.”+
12 Levi buudã neb sẽn wʋm dẽ, bãmb yikame. A Kehat yagensã+ sʋka, yɩɩ a Amasayi biig a Mahat ne a Azariya biig a Zowɛll. A Merari yagensã+ sʋka, yɩɩ a Abdi biig a Kis ne a Yehalelɛll biig a Azariya. A Gɛrson yagensã+ sʋka, yɩɩ a Zima biig a Yowa ne a Yowa biig a Edɛn. 13 A Elizafan kom-dibli wã sʋka, yɩɩ a Simri ne a Yehuwɛll. A Azaf+ kom-dibli wã sʋka, yɩɩ a Zakari ne a Mataniya. 14 A Heman kom-dibli+ wã sʋka, yɩɩ a Yeyiyɛll ne a Simeyi. A Yedutun kom-dibli+ wã sʋka, yɩɩ a Semaya ne a Uziyɛll. 15 Bãmb tigma b ba-biisã tɩ b yɩlg b mens n wa, wa rĩmã sẽn yeel-b tɩ zems ne a Zeova goamã, n na n yɩlg a Zeova roogã.+ 16 Dẽ, maan-kʋʋdbã kẽe a Zeova roogẽ wã n na n yɩlg-a, la bãmb yiisa bũmb nins fãa b sẽn yã a Zeova roogã pʋgẽ tɩ yaa rẽgdo, n tall-b n tɩ rʋʋg a Zeova roogã samandẽ.+ Dẽ, Levi buudã neb wʋk-b lame n tɩ rʋʋg Sedrõ longã+ pʋgẽ. 17 Woto, bãmb sɩnga yɩlgrã pipi kiuugã pipi daarã, la kiuugã rasem a nii-n-soabã, bãmb taa a Zeova roogã zãongẽ.*+ Bãmb dɩka rasem a nii n yɩlg a Zeova roogã, la pipi kiuugã rasem piig la a yoob-n-soabã, b sɛɛme.
18 Rẽ poore, bãmb kẽnga rĩm a Ezekɩyaas nengẽ n tɩ yeel-a yaa: “Tõnd yɩlga a Zeova roogã fãa, maoong sẽn yõogd bugum tẽn-kugrã+ ne a teedã fãa,+ la taabl ning zug b sẽn dogend burã taab+ zugã* ne a teedã fãa n sa. 19 Teed nins fãa rĩm a Akaaz sẽn pa maan sɩd ne Wẽnnaamã+ sẽn da yiis n dɩgl kɛɛng a naamã sasa wã, tõnd maneg-b lame la d yɩlg-ba,+ tɩ b be a Zeova tẽn-kugrã taoore.”
20 La rĩm a Ezekɩyaas yika yibeoog pĩnd n tigim tẽngã nanambsã, tɩ b kẽng a Zeova roogẽ wã. 21 Bãmb zɩɩ lols a yopoe, pe-raad a yopoe, pe-bi-raad a yopoe la boees a yopoe n na n maan yel-wẽnd maoong rĩungã yĩnga, wẽnd-doogã yĩnga, la Zida yĩnga.+ Woto, yẽ yeela maan-kʋʋdbã sẽn yaa a Aarõ yagensã tɩ b kʋ maandã a Zeova tẽn-kugrã zugu. 22 Dẽ, bãmb kooda niisã,+ tɩ maan-kʋʋdbã rɩk zɩɩmã n mes tẽn-kugrã zugu.+ Rẽ poore, b kooda pe-raadã n mes zɩɩmã tẽn-kugrã zugu, la b kood pe-bi-raadã n mes zɩɩmã tẽn-kugrã zugu. 23 La bãmb talla boeesã b sẽn na n tall n maan yel-wẽnd maoongã n wa ne rĩmã ne nin-buiidã taoor tɩ b tik b nusã b zutu. 24 Maan-kʋʋdbã kood-b lame n dɩk zɩɩmã n maan yel-wẽnd maoong tẽn-kugrã zugu, n na n maan paasg* Israyɛll fãa yĩnga. Bala rĩmã ra yeelame tɩ maoongã sẽn yõogd bugmã ne yel-wẽnd maoongã segd n yɩɩ Israyɛll fãa yĩnga.
25 Wakat kãnga, a kɩtame tɩ Levi buudã neb yals a Zeova roogẽ wã ne waase, yʋʋm-teed sẽn tar rissi, la pends+ wa sẽn zems a Davɩɩd+ ne rĩmã bãngd* a Gaad+ la no-rɛɛs a Natã+ sẽn da wilgã. Bala a Zeova n da kɩt t’a no-rɛɛsdbã kõ noorã. 26 Woto, Levi buudã neb ra yasa ne yʋʋm-teed nins a Davɩɩd sẽn da maanã, tɩ maan-kʋʋdbã me yas ne tãntãado.+
27 Dẽ, a Ezekɩyaas kõo noor tɩ b maan maoong sẽn yõogd bugmã tẽn-kugrã zugu.+ La b sẽn sɩng maoongã sẽn yõogd bugmã maanegã, b sɩnga a Zeova yɩɩllã yɩɩlgo, tɩ tãntãadã me sɩng peebgo, n pʋgl yʋʋm-teed nins rĩm a Davɩɩd sẽn da maanã. 28 La b sẽn wa n yɩɩndẽ tɩ tãntãadã peebdẽ wã, nin-buiidã fãa wõgemdame. B talla woto hal tɩ b maan maoongã sẽn yõogd bugmã n sa. 29 B sẽn kʋ maoongã n sa wã bala, rĩmã ne neb nins fãa sẽn da be ne-a wã sulgame n wõgemde. 30 La rĩm a Ezekɩyaas ne nanambsã yeela Levi buudã neb tɩ b rɩk a Davɩɩd ne bãngd* a Azaf yɩɩlã goamã n pẽg a Zeova.+ Woto, bãmb pẽga Wẽnnaam ne sũ-no-kãsenga, la b sulgame n wõgemde.
31 Rẽ poore, a Ezekɩyaas yeelame yaa: “Masã, b sẽn welg yãmb toor a Zeova yĩngã, bɩ y wa ne maand la bark pʋʋsg kũun a Zeova roogẽ wã.” Dẽ, nin-buiidã sɩnga waoong ne maand la bark pʋʋsg kũuni. La ned ning sẽn dat ne a sũur fãa waa ne maand sẽn yõogd bugum.+ 32 Maandã sẽn yõogd bugmã nin-buiidã sẽn tall n wa wã sõor yɩɩ niis pis-yopoe, pe-raad koabga, la pe-bi-raad kobs-yi. Rũm-kãensã fãa yɩɩ maand sẽn yõogd bugum a Zeova yĩnga.+ 33 Sẽn paase, kũun sẽn welg toorã yɩɩ niis kobs-yoobe, la piis tus a tã. 34 La maan-kʋʋdbã sõor da paoodame, tɩ b pa tõe n sɩ maoongã sẽn yõogd bugmã rũmsã fãa ye. Woto, Levi buudã neb sẽn yaa bãmb ba-biisã sõng-b lame+ n tãag tʋʋmdã saabo, la hal tɩ maan-kʋʋdbã tõog n yɩlg b mense.+ Bala Levi buudã neb talla yẽesem wʋsg* b mensã yɩlgr wɛɛngẽ n yɩɩg maan-kʋʋdbã. 35 Sẽn paase, maandã sẽn yõogd bugmã,+ ne zems-n-taar maandã kaam+ la divẽ kũun maand sẽn yõogd bugmã yĩngã+ ra yaa wʋsgo. Woto, bãmb lebs n sɩnga* a Zeova roogã tʋʋmdã. 36 La a Ezekɩyaas ne nin-buiidã fãa kɩdma sũ-noog bũmb ning Wẽnnaam sẽn maan a nebã yĩngã,+ bala woto fãa yɩɩ zĩig pʋgẽ.
30 A Ezekɩyaas tʋma koɛɛg Israyɛll+ ne Zida fãa, la a pʋd n gʋls lɛta n tʋm tɩ b tɩ kõ Efrayim ne Manase nebã,+ n bool-b tɩ b wa Zerizalɛm a Zeova roogẽ wã tɩ b maan Pak tigrã Israyɛll Wẽnnaam a Zeova yĩnga.+ 2 La rĩmã ne nanambsã la Zerizalɛm nin-buiidã fãa rɩka sard n na n maan Pak tigrã kiuug a yiib-n-soabã,+ 3 b sẽn pa tõog n maan-a wakat ning b sẽn da segd n maan-a wã yĩnga.+ Bala maan-kʋʋdbã sẽn yɩlg b mensã ra paoodame,+ la nebã me ra pa tigim taab Zerizalɛm ye. 4 B sẽn dɩk sard ningã taa rĩmã ne nin-buiidã fãa yam. 5 Woto, b yãka yam n na n moon Israyɛll soolmã fãa pʋgẽ, sẽn sɩng ne Bɛɛr-seba n tãag Dan,+ tɩ nebã wa Zerizalɛm tɩ b maan Pakã Israyɛll Wẽnnaam a Zeova yĩnga, bala b ra pa naag taab n maan-a wa tõogã sẽn wilgã ye.+
6 Dẽ, koe-taasdbã* maana wa rĩmã sẽn yeelã. Bãmb saaga Israyɛll ne Zida soolmã fãa pʋgẽ ne lɛta wã rĩmã ne a nanambsã sẽn gʋlsã, n yetẽ yaa: “Israyɛll neba! Lebg-y n wa-y-yã a Zeova sẽn yaa a Abrahaam, a Izaak la a Israyɛll Wẽnnaamã nengẽ, tɩ yẽ me lebg n wa neb nins sẽn põs Asiiri rĩm-dãmbã nugẽ wã nengẽ.+ 7 Da n yɩ-y wa y yaab-rãmbã la y ba-biisã sẽn pa maan sɩd ne b yaab-rãmbã Wẽnnaam a Zeova, t’a kɩt tɩ b lebg bũmb sẽn kẽesd nebã rabeem wa yãmb sẽn ne wã ye.+ 8 Masã, ra n yɩ-y tõatb wa y yaab-rãmbã ye.+ Sak-y-yã a Zeova n wa a roogã+ a sẽn kɩt tɩ yɩ sõng wakat fãa yĩngã pʋgẽ, la y tũ y Wẽnnaam a Zeova t’a sũurã sẽn puug ne yãmbã sigi.+ 9 Bala yãmb sã n lebg n wa a Zeova nengẽ, neb nins sẽn yõg y ba-biisã la y kom-dibli wã na n zoee b nimbãanega,+ n bas-b tɩ b lebg n wa tẽn-kãngã pʋgẽ,+ bala yãmb Wẽnnaam a Zeova yaa sõmblem soab la nimbãan-zoɛta,+ la yãmb sã n lebg n wa a nengẽ, a pa na n wẽnemd a neng n bas yãmb ye.”+
10 Woto, koe-taasdbã* saaga tẽng-tẽng Efrayim ne Manase+ soolmẽ wã, hal baa Zabulõ. La nebã ra yaanda bãmb la b laad-ba.+ 11 Baasgo, Asɛɛr la Manase ne Zabulõ neb kẽer n sik b mens n wa Zerizalɛm.+ 12 Sẽn paase, Wẽnnaam tẽega a nug Zida n kɩt tɩ nebã yɩ yam a yembre,* n na n maan rĩmã ne nanambsã sẽn yeel tɩ zems ne a Zeova gomdã.
13 Kʋʋng n tigim Zerizalɛm n na n maan Bur sẽn pa ning rabɩll tigrã+ kiuug a yiib-n-soabã pʋgẽ.+ Nebã yɩɩ ka tɛka. 14 Bãmb yikame n yãgs tẽn-kugã sẽn da be Zerizalɛmmã,+ la wisd yõogr tẽn-kugã fãa+ n tɩ lob Sedrõ longã pʋgẽ. 15 Bãmb kʋʋ Pakã maoong kiuug a yiib-n-soabã rasem piig la a naas-n-soabã daare. Yãnd yõka maan-kʋʋdbã ne Levi buudã neba, tɩ b yɩlg b mens n tall maand sẽn yõogd bugum n wa a Zeova roogẽ wã. 16 B tɩ yalsa b zĩisẽ wã wa sẽn zems Wẽnnaam dao a Moyiiz Tõogã sẽn wilgã. Dẽ, maan-kʋʋdbã reega zɩɩmã Levi buudã neb nugẽ n mese.+ 17 Neb wʋsg n da be nin-buiidã sʋk n da pa yɩlg b mense, tɩ Levi buudã neb ges neb nins fãa sẽn pa yɩlg b mensã Pakã maand koodg yelle,+ n na n yɩlg-b n kõ a Zeova. 18 Bala neb wʋsgo, la sẽn yɩɩd fãa, sẽn yi-b Efrayim, Manase,+ Isakaar la Zabulõ wã ra pa yɩlg b mens ye. La bãmb yaool n dɩɩ Pakã, n pa tũ bũmb ning sẽn gʋlsã ye. La a Ezekɩyaas pʋʋsa b yĩng n yeel yaa: “Bɩ a Zeova sẽn yaa sõmblem soabã+ yaaf 19 ned ning fãa sẽn yãk yam a sũur pʋgẽ* n na n bao Wẽnnaam sɩd-sɩdã,+ a yaab-rãmbã Wẽnnaam a Zeova, baa a soab sã n da pa yɩlg a meng wa sẽn zems yɩlemdã noyã.”+ 20 La a Zeova reega a Ezekɩyaas pʋʋsgã n kõ nin-buiidã sugri.*
21 Woto, Israyɛll nebã sẽn da be Zerizalɛmmã maana Bur sẽn pa ning rabɩll tigrã+ rasem a yopoe ne sũ-no-kãsenga,+ la Levi buudã neb ne maan-kʋʋdbã ra pẽgda a Zeova daar fãa, n wẽed b yʋʋm-teedã n pẽgd a Zeova tɩ rãamdã zẽkdẽ.+ 22 Sẽn paase, a Ezekɩyaas goma ne Levi buudã neb fãa sẽn da tũud a Zeova ne yamã n keng b raoodo. La bãmb dɩɩ tigrã rasem a yopoe wã fãa sasa,+ n maand zems-n-taar maand+ la b pʋʋsd b yaab-rãmbã Wẽnnaam a Zeova barka.
23 Dẽ, nin-buiidã fãa rɩka sard n na n maan tigrã rasem a yopoe n paase. Woto, bãmb maana tigrã rasem a yopoe yɛs ne kɩdengo.+ 24 Zida rĩm a Ezekɩyaas kõo lols tusr ne piis tus a yopoe nin-buiidã yĩnga, tɩ nanambsã kõ lols tusri, la piis tus-piig+ nin-buiidã yĩnga. La maan-kʋʋdb wʋsg ra yɩlgda b mense.+ 25 Zida nin-buiidã fãa, maan-kʋʋdbã, Levi buudã neb ne nin-buiidã fãa sẽn yi Israyɛll n wa wã,+ la sãambã+ sẽn yi Israyɛll soolmẽ wã ne sẽn be-b Zida wã ra kɩdemda sũ-noogo. 26 La sũ-no-kãseng zĩnda Zerizalɛm, bala sẽn sɩng ne Israyɛll rĩm a Davɩɩd biig a Salomo wakatã, bũmb a woto ra zɩ n maan Zerizalɛm ye.+ 27 Levi buudã neb nins sẽn yaa maan-kʋʋdbã wa n yikame n ning nin-buiidã barka.+ Wẽnnaam wʋma b koeesã, la b pʋʋsgã zẽk n taa a zĩ-sõngẽ wã, hal saasẽ.
31 Bãmb sẽn maan bõn-kãensã fãa n sa wã, tao-tao bala, Israyɛll nebã fãa sẽn da be be wã yik n kẽe Zida tẽnsã pʋsẽ n pãb kugã b sẽn da lugl n pʋʋsdẽ wã n wã, n lub ra-lugsã b sẽn lugl n pʋʋsdẽ*+ wã, n siig zĩ-zãntsã*+ ne tẽn-kugã+ Zida ne Bẽnzame soolmã fãa pʋsẽ, n paas Efrayim ne Manase+ soolmã fãa pʋsẽ, hal n sãam-b zãng fasɩ. Rẽ poore, Israyɛll nebã fãa lebg n leba b tẽnsẽ, tɩ ned kam fãa leb a yiri.
2 Dẽ, a Ezekɩyaas sigla maan-kʋʋdbã b sulã pʋsẽ,+ la a sigl Levi buudã neb me b sulã pʋsẽ,+ n ning maan-kʋʋd fãa ne Levi buudã ned fãa a tʋʋmd zĩigẽ+ tɩ b na n maand maandã sẽn yõogd bugmã la zems-n-taar maandã, n tʋmd b tʋʋmdã, n pʋʋsd Wẽnnaam bark la b pẽgd-a, a Zeova samanã* rignoyẽ.+ 3 Rĩmã ra yãka pʋɩɩr a paoongã pʋgẽ n kõ maand sẽn yõogd bugmã yĩnga,+ n paas yibeoog ne zaabr maandã yĩnga,+ la vʋʋsg rayã,+ ki-paalã+ ne tig toɛy-toɛyã+ maand sẽn yõogd bugmã yĩng wa sẽn zems bũmb ning sẽn gʋls a Zeova Tõogã pʋgẽ wã.
4 Sẽn paase, rĩmã yeela nin-buiidã sẽn be Zerizalɛmmã tɩ b kõ maan-kʋʋdbã ne Levi buudã neb b pʋɩɩrã+ tɩ b tõog n tũ a Zeova tõogã sõma.* 5 Rĩmã sẽn kõ noorã, tao-tao bala Israyɛll nebã kõo b koodã rẽenem biisi, ne divẽ-paalgã, kaamã,+ sɩɩdã, la b bõn-koaadl buud fãa+ rẽenem biis hal wʋsgo. Bãmb talla bũmb fãa piig-pʋɩɩr zembal n wa ne.+ 6 Israyɛll ne Zida neb nins fãa sẽn be Zida tẽnsẽ wã me talla b niisã ne b piisã piig-pʋɩɩr n wa, la b bõn-sõamyã wã b sẽn welg bãmb Wẽnnaam a Zeova yĩngã piig-pʋɩɩr+ n wa. Bãmb tallame n wa rʋʋg rʋy toɛy-toɛy wʋsgo. 7 Kiuug a tãab-n-soabã,+ bãmb sɩnga b kũunã rʋʋgr rʋy toɛy-toɛya, n baas kiuug a yopoe-n-soabã pʋgẽ.+ 8 A Ezekɩyaas ne nanambsã sẽn wa n yã rʋyã, bãmb pẽga a Zeova la b ning Israyɛll sẽn yaa a nin-buiidã barka.
9 A Ezekɩyaas soka maan-kʋʋdbã ne Levi buudã neb n na n bãng kũun-kãensã fãa sẽn yiẽ, 10 t’a Azariya sẽn yaa maan-kʋʋdb taoor soaba, n yaa a Zadok roogã nedã leok-a yaa: “B sẽn sɩng ne kũunã waoong a Zeova roogẽ wã tɛka,+ nebã rɩtame n tɩgd hal tɩ kelld wʋsgo. Bala a Zeova ninga a nin-buiidã bark hal tɩ woto fãa kelle.”+
11 A Ezekɩyaas sẽn wʋm dẽ, yẽ yeel-b lame tɩ b maneg teed bĩngr zĩis*+ a Zeova roogã pʋgẽ. La bãmb manega rotã. 12 B ra ket n wata ne kũunã ne b sũur fãa, piig-pʋɩyã+ la bõn-sõamyã wã. Levi buudã ned a Konaniya n da get bõn-kãensã fãa yelle, t’a ba-biig a Simeyi yaa a pʋgdga. 13 Yaa a Yeyiyɛll, a Azaziya, a Nahat, a Asayɛll, a Yerimot, a Zozabaad, a Eliyɛll, a Ismakiya ne a Mahat la a Benaya la b ra yãk tɩ b sõngd a Konaniya ne a ba-biig a Simeyi wa rĩm a Ezekɩyaas sẽn da kõ noorã, t’a Azariya ra get Wẽnnaam doogã yelle. 14 A Yimna biig a Koore sẽn yaa Levi buudã ned n gũud yaang+ rignoorã n da get Wẽnnaam yamleoog kũunã yelle,+ la a pʋɩt kũunã b sẽn kõ a Zeova wã,+ la bũmb nins sẽn yaa sõamyã wʋsgã.+ 15 Neb nins sẽn da sõngd yẽ maan-kʋʋdbã tẽnsẽ wã+ yaa a Edɛn, a Miniyamin, a Yesuwa, a Semaya ne a Amariya la a Sekaniya sẽn yaa neb b sẽn tõe n teegã. B tʋʋmd da yaa kõt b saam-biisã b pʋɩɩr b sulã pʋsẽ,+ tɩ b kãsembã la b bõonegã fãa paamd bũmb a yembre. 16 B ra kõta bãmb pʋɩ-kãnga, n paas b sẽn da kõt neb nins b sẽn sõd sõdgã sebr pʋgẽ tɩ b ra wat a Zeova roogẽ wã daar fãa n tʋmd b tʋʋmdã wa sẽn zems b sulã. B sõda b kom-dibli nins fãa sẽn tar yʋʋm a tãab la sẽn yɩɩd rẽ wã n naage.
17 B sõda maan-kʋʋdbã wa sẽn zems b buudã roto,+ wa b sẽn sõd Levi buudã neb nins yʋʋm sẽn zems pisi la sẽn yɩɩd rẽ wã+ tɩ zems b sulã tʋʋmã.+ 18 B sõda b kambã fãa, b pagbã, b kom-dibli wã la b kom-pugli wã, b nin-buiidã fãa. Bala b ra modgdame n na n kell n yɩ yɩlma, b sẽn bobl-b tʋʋm-sõamyã wã yĩnga. 19 B sõda a Aarõ yagensã me, maan-kʋʋdb nins sẽn da be rũms wãbneg zĩisẽ sẽn gũbg b tẽnsã.+ Tẽnsã fãa pʋsẽ, b yãka rap n sõdg b yʋyã tɩ b na n kõt rao fãa sẽn yaa maan-kʋʋd la Levi buudã ned ning fãa b sẽn sõd a rɩɩbo.
20 A Ezekɩyaas maana woto Zida soolmã fãa pʋgẽ. La yẽ kell n maana sẽn yaa sõma la tɩrg a Wẽnnaam a Zeova nifẽ, la a maan sɩd ne-a. 21 La bũmb ning fãa yẽ sẽn maan n bao a Wẽnnaamã, yaa wẽnd-doogã tʋʋmd wɛɛngẽ+ tɩ yaa Tõogã ne a noyã wɛɛngẽ, a maana rẽ ne a sũur fãa la a sẽn da maand fãa ra yãkda nenga.
32 A Ezekɩyaas sẽn sak Wẽnnaam n maan bõn-kãensã fãa wã poore,+ Asiiri rĩm a Senakeriib waame n na n zab ne Zida. Yẽ tilga a sik n gilg tẽns nins fãa sẽn gũbg ne lalsã, n dat n poog lalsã n kẽ n deeg-ba.+
2 A Ezekɩyaas sẽn yã t’a Senakeriib wat n na n zaba ne Zerizalɛmmã, 3 a yẽsa ne a nanambsã la a tãb-biisã, n yãk yam n na n yẽd ko-bunds zĩis nins sẽn pa be tẽngã pʋgẽ wã,+ la bãmb teel-a lame. 4 B tigma neb wʋsgo, tɩ b yẽd ko-bundsã fãa ne kʋɩls nins koom sẽn zoet soolmã pʋgã, n yetẽ yaa: “Tõnd pa na n bas tɩ Asiiri rĩm-dãmbã wa paam koom wʋsg ye.”
5 Sẽn paase, yẽ nanga pãng n maneg n me lalgã sẽn da lʋɩ wã zãnga, n me gasd a zugu, la a me lalg a to yɩngã. A maneg n mee a Davɩɩd tẽngã Milo wã,*+ la a maan zab-teed wʋsgo, la zab gãndo. 6 Yẽ yãka tãb-biis nanambs tɩ b na n lʋɩ nin-buiidã taoore, la a tigm-b tẽngã rignoore, zãma wã zĩigẽ, n keng b raood n yeel-b yaa: 7 “Keng-y y sũur la y tall raoodo. Ra n zoe-y rabeem wall y yɛɛs Asiiri rĩmã+ la kʋʋng ning sẽn be ne-a wã yĩng ye. Bala sẽn be-b ne tõndã yɩɩda sẽn be-b ne yẽ wã.+ 8 Yaa ninsaal pãng n be ne yẽ, la yaa tõnd Wẽnnaam a Zeova n be ne tõnd n na n sõng tõndo, la a zab tõnd zabã.”+ Zida rĩm a Ezekɩyaas sẽn gom woto wã, kenga nin-buiidã raoodo.+
9 Rẽ poore, Asiiri rĩm a Senakeriib sẽn wa n be Lakiis+ ne a tãb-biisã fãa la a ziirã fãa wã, yẽ tʋma a tʋm-tʋmdbã Zerizalɛm, Zida rĩm a Ezekɩyaas la Zida neb nins fãa sẽn be Zerizalɛmmã+ nengẽ tɩ b tɩ yeel-b yaa:
10 “Ad Asiiri rĩm a Senakeriib sẽn yeele: ‘Yaa bõe la yãmb teeg n ket Zerizalɛm tɩ tõnd yaool n gũbg-a?+ 11 Pa a Ezekɩyaas n belgd yãmb n na n kɩt tɩ kom la ko-yũud kʋ-yã, n yetẽ tɩ yãmb Wẽnnaam a Zeova na n fãaga yãmb Asiiri rĩmã+ nugẽ sɩda? 12 Pa Ezekɩyaas-kãng n sãam yãmb Wẽnnaamã zĩ-zãntsã*+ ne a tẽn-kugã,+ la a yeel Zida ne Zerizalɛm nebã tɩ b segd n wõgemdeda tẽn-kugr a yembr taoore, la b maand b maand sẽn nusd bug-zõosã tẽn-kug-kãng zug sɩda?+ 13 Yãmb pa mi maam ne m yaab-rãmbã sẽn maan tẽns a taabã nebã fãa bũmb ningã la?+ Tẽn-kãens wẽnnaam-dãmbã tõog n fãaga b soolmã mam nugẽ sɩda?+ 14 Tẽn-kãens fãa mam yaab-rãmbã sẽn sãamã wẽnnaam-dãmb sʋka, bʋg n tõog n fãag a nin-buiid mam nugẽ tɩ yãmb Wẽnnaamã na n tõog n fãag yãmb mam nugẽ?+ 15 Masã, da n bas-y t’a Ezekɩyaas belg-y wall a kẽes-y moog woto ye!+ Da n tẽ-y-yã a goamã ye. Bala tẽng bɩ rĩung baa a ye wẽnnaam pa tõog n fãag a nin-buiidã mam nugẽ la mam yaab-rãmbã nugẽ ye. Rẽ wã, yãmb Wẽnnaamã yɩta a wãn n tõog n fãag yãmb mam nugẽ?’”+
16 A Senakeriib tʋm-tʋmdbã kell n goma goam a taab n paoog a Zeova sẽn yaa Wẽnnaam sɩd-sɩdã, la b paoog a Ezekɩyaas sẽn yaa a tʋm-tʋmdã. 17 A Senakeriib leb n gʋlsa sɛb+ n tʋ Israyɛll Wẽnnaam a Zeova+ la a paoog-a n yeele: “Buud a taabã wẽnnaam-dãmb sẽn pa tõog n fãag b nin-buiidã mam nugẽ wã,+ a Ezekɩyaas Wẽnnaamã me pa na n tõog n fãag a nin-buiidã mam nugẽ ye.” 18 Bãmb da zẽkda b koees n gomd Zʋɩf-rãmbã buud-gomd ne Zerizalɛm nebã sẽn da be lalgã zugã n na n yɛɛs-ba, n kẽes-b rabeem n paam n deeg tẽngã.+ 19 Bãmb gomame n paoog Zerizalɛm Wẽnnaamã wa b sẽn da gom n paoog dũniyã tẽns a taabã neb wẽnnaam-dãmbã sẽn yaa ninsaalb nus tʋʋmã. 20 La rĩm a Ezekɩyaas ne no-rɛɛs a Ezayi+ sẽn yaa a Amooz biigã ra pʋʋsda rẽ wɛɛngẽ, la b kelemdẽ n boond Wẽnnaam sẽn be saasẽ wã n kot sõngre.+
21 Dẽ, a Zeova tʋma malɛk Asiiri rĩmã sikã zĩigẽ t’a tɩ kʋ gãndaadã,+ nanambsã ne taoor dãmbã fãa, tɩ rĩmã lebg n leb a soolmẽ wã ne yãnde. Rẽ zugẽ, a wa n kẽe a wẽnnaamã roogẽ, t’a kom-dibli kʋ-a be ne sʋʋga.+ 22 Woto, a Zeova fãaga a Ezekɩyaas ne Zerizalɛm nebã Asiiri rĩm a Senakeriib nugẽ, la tẽns a taabã nugẽ n kɩt tɩ bãan zĩnd b soolmã zĩig fãa. 23 Rẽ poore, neb wʋsg talla kũun n wa kõ a Zeova Zerizalɛm, la b wa ne bõn-sõma n kõ Zida rĩm a Ezekɩyaase.+ La tẽns a taabã fãa nebã ra waoogda a Ezekɩyaas hal wʋsgo.
24 Wakat kãnga, a Ezekɩyaas lʋɩɩ bãaga, hal n dat n ki. La yẽ pʋʋsa a Zeova+ t’a leok a pʋʋsgã n kõ-a bãnde.+ 25 La a Ezekɩyaas pa pʋʋs a zaamẽ, neer ning b sẽn maan-a wã yĩng ye. Bala yẽ lebga wuk-m-meng soab tɩ Wẽnnaam sũur puug ne-a, la ne Zida la Zerizalɛm nebã. 26 La a Ezekɩyaas sika a menga, n bas a wuk-m-mengã,+ yẽ ne Zerizalɛm nebã fãa, t’a Zeova pa sɩbg-b a Ezekɩyaas wakatẽ wã ye.+
27 A Ezekɩyaas paama arzɛk wʋsg la ziiri.+ Yẽ mee teed bĩngr doto,+ n na n bĩngd wanzuri, sãnem, kug-neeba, bomiye kaam,* zab gãndo, la te-sõma a taabã fãa. 28 Yẽ leb n mee rot n na n bĩngd koodo, divẽ-paal la ka-rãmba. A mee rot me a rũms toor-toorã yĩnga, rũm-bɛd la rũm-bõonego. 29 Yẽ leb n mee tẽnse, la a paam rũms wʋsgo, rũm-bɛd la rũm-bõonego. Bala Wẽnnaam kõ-a-la arzɛk wʋsgo. 30 Yaa a Ezekɩyaas n yẽd Gihon yĩngr ko-bundgã zĩiga,+ n wẽnemd-a n tees a Davɩɩd tẽngã nin-taoorã.+ A Ezekɩyaas paama tõogr a tʋʋmã fãa pʋsẽ. 31 La Babilon nanambsã sẽn wa n tʋm b koe-taasdb tɩ b tɩ sok a Ezekɩyaas bãndã+ sẽn zĩnd soolmẽ wã wɛɛngẽ wã,+ Wẽnnaam bas-a lame n na n mak-a+ n bãng bũmb ning fãa sẽn be a sũurẽ.+
32 A Ezekɩyaas vɩɩmã kibay nins sẽn kellã, tʋʋm-sõma nins a sẽn tʋmã,+ b gʋlsa rẽ fãa tɩ be Wẽnnaam sẽn vẽneg no-rɛɛs a Ezayi+ sẽn yaa a Amooz biigã t’a yã bũmb ninga, tɩ b gʋls tɩ be Zida ne Israyɛll rĩm-dãmbã kibay sebrã pʋgẽ wã.+ 33 A Ezekɩyaas wa n kii wa a yaab-rãmbã, tɩ b mum-a a Davɩɩd kom-dibli wã yaadã rʋʋndẽ.+ Zida ne Zerizalɛm nebã fãa waoog-a-la a kũumã sasa. La a biig a Manase n ledg-a n lebg rĩma.
33 A Manase+ sẽn deeg naamã t’a tara yʋʋm piig la a yiibu, la a rɩɩ naam Zerizalɛm yʋʋm pis-nu la a nu.+
2 Yẽ maana sẽn yaa wẽng a Zeova nifẽ, n da tʋmd tʋʋm-yood nins bu-zẽmsã a Zeova sẽn dig n yiis Israyɛll nebã taoorã sẽn da tʋmdã.+ 3 A lebs n mee zĩ-zãnts* nins a ba a Ezekɩyaas sẽn da sãamã,+ n me tẽn-kug Baal-dãmbã yĩnga, la a pees ra-lugs b sẽn pʋʋsde. Yẽ wõgemda bũmb nins fãa sẽn be saasẽ wã* taoore, n tũ-ba.+ 4 Sẽn paase, a mee tẽn-kug a Zeova roogẽ wã,+ roog ning wɛɛngẽ a Zeova sẽn da yeele: “Mam yʋʋrã na n zĩnda Zerizalɛm wakat fãa yĩnga.”+ 5 A mee tẽn-kug a Zeova rooga saman a yiibã pʋsẽ,+ bũmb nins fãa sẽn be saasẽ wã yĩnga. 6 Yẽ rɩka a kom-dibli n yõog bugum+ a Hinom bi-riblã longã+ pʋgẽ n maan maoongo. Sẽn paase, a maana tɩto,+ a bʋga bagre, a yãka neb sẽn gomd ne kɩɩmse, la a yãk bag-bʋgdba.+ Yẽ maana sẽn yaa wẽng wʋsg a Zeova nifẽ n beeg-a.
7 A Manase rɩka bõn-naandgã a sẽn kɩt tɩ b peesã, n kẽes Wẽnnaam sɩd-sɩdã roogẽ wã,+ roog ning Wẽnnaam sẽn da gom a yell ne a Davɩɩd la ne a biig a Salomo n yeele: “Mam na n ninga m yʋʋrã wakat fãa ro-kãngã zugu,+ la Zerizalɛm sẽn yaa tẽng ning mam sẽn yãk Israyɛll buud toɛy-toɛyã fãa sʋkã zugu. 8 Israyɛll nebã sã n tũ bũmb nins fãa mam sẽn yeel-bã neere, noyã ne Tõogã tõre, la bʋ-kaoor toor-toorã mam sẽn kɩt t’a Moyiiz kõ bãmbã, mam pa na n le yiis Israyɛll nebã tẽng ning mam sẽn kõ b yaab-rãmbã pʋgẽ ye.” 9 A Manase ra kẽesda Zida ne Zerizalɛm nebã moogo, tɩ b maand wẽng n yɩɩd bu-zẽms nins a Zeova sẽn da sãam Israyɛll nebã taoorã.+
10 A Zeova ra gomda wakat fãa ne a Manase la ne a nin-buiidã tɩ b pa kelgdẽ ye.+ 11 Woto, a Zeova kɩtame tɩ Asiiri rĩmã tãb-biisã nanambs wa zab ne-ba, n yõk a Manase ne bãense, la b balg-a ne zũud sẽbds a yiib n tall-a n kẽng Babilon. 12 A toogã pʋgẽ, a yõka a Wẽnnaam a Zeova sɛɛga, n bõos-a t’a zoe a nimbãanega, n kell n sik a meng wʋsg a yaab-rãmbã Wẽnnaamã taoore. 13 Yẽ talla Wẽnnaam pʋʋsgo, hal t’a nimbãaneg wa yõk-a, t’a kelg a pʋʋsgã n deeg a kosgã n lebs-a a naamẽ wã Zerizalɛm.+ Dẽ, a Manase bãngame t’a Zeova la Wẽnnaam sɩd-sɩdã.+
14 Rẽ zugẽ, yẽ mee lalg yɩng a Davɩɩd tẽngã yĩnga,+ Gihon+ ko-bundgã sẽn be longã* pʋgẽ wã nin-taoore, hal n tãag Zĩmã rignoore,+ n gilg n ta Ofɛll.+ Yẽ me-a lame t’a zẽk hal wʋsgo. Sẽn paase, a yãka tãb-biis nanambs n zĩnig Zida tẽns nins fãa sẽn gũbg ne lalsã pʋsẽ. 15 Dẽ, yẽ yiisa wẽn-sãamsã la bõn-naandgã a Zeova roogẽ wã,+ ne tẽn-kug nins fãa a sẽn da me a Zeova roogã tãng zug+ la Zerizalɛmmã, n kɩt tɩ b tall-b n yiis tẽngã pʋgẽ n tɩ lobe. 16 Yẽ leb n manega a Zeova tẽn-kugrã+ n lebs n sɩng zems-n-taar maand+ la bark pʋʋsg maand+ maaneg a zugu, la a yeel Zida nebã tɩ b tũ Israyɛll Wẽnnaam a Zeova. 17 Baasgo, nebã ra ket n maanda maand zĩ-zãntsẽ* wã, la ra yaa bãmb Wẽnnaam a Zeova yĩng bala.
18 A Manase vɩɩmã kibay nins sẽn kellã, pʋʋsg ning a sẽn pʋʋs a Wẽnnaamã, la bãngdb nins sẽn gom ne-a Israyɛll Wẽnnaam a Zeova yʋʋr yĩngã goamã, b gʋlsa rẽ fãa Israyɛll rĩm-dãmbã kibay sebrã pʋgẽ. 19 Sẽn paase, a pʋʋsgã,+ la Wẽnnaam sẽn deeg a kosgã to-to wã, a yel-wẽnã fãa ne a kɩɩsgã,+ zĩis nins a sẽn da me zĩ-zãnts* la a lugl ra-lugs b sẽn pʋʋsde,*+ ne bõn-naandsã nand t’a sik a mengã, b gʋlsa rẽ fãa n naag a bãngdbã* goamã. 20 Dẽ poore, a Manase kii wa a yaab-rãmbã tɩ b mum-a a yirã. La a biig a Amo n ledg-a n lebg rĩma.+
21 A Amo+ sẽn deeg naamã t’a tara yʋʋm pisi la a yiibu, la a rɩɩ naam Zerizalɛm yʋʋm a yiibu.+ 22 Yẽ ra maanda sẽn yaa wẽng a Zeova nifẽ wa a ba a Manase.+ A maana maand n kõ bõn-naands nins fãa a ba wã sẽn maanã,+ la a ra pʋʋsd-ba. 23 La a pa sik a meng a Zeova taoor+ wa a ba a Manase ye.+ A pʋd n paasa a taalã wʋsgo. 24 A tʋm-tʋmdbã wa n sɩɩga taab noor+ n kʋ-a a roogẽ wã. 25 La tẽngã nebã kʋʋ neb nins fãa sẽn sɩɩg taab noor n kʋ rĩm a Amo wã,+ la b kɩt t’a biig a Zoziyas+ ledg-a n lebg rĩma.
34 A Zoziyas+ sẽn deeg naamã t’a tara yʋʋm a nii, la a rɩɩ naam yʋʋm pis-tã la a yembr Zerizalɛm.+ 2 A maana sẽn yaa tɩrg a Zeova nifẽ. Yẽ rɩka a yaab a Davɩɩd naoore, n pa bʋdg goabg wall rɩtg ye.
3 A naamã yʋʋm a nii-n-soabã, a sẽn wa n nan ket n yaa biiga, yẽ sɩnga a yaab a Davɩɩd Wẽnnaamã baoobo.+ A naamã yʋʋm piig la a yiib-n-soabã, a sɩnga Zida ne Zerizalɛm yɩlgre,+ n menes zĩ-zãntsã*+ ne ra-lugsã b sẽn lugl n pʋʋsdẽ* wã la bõn-naands nins b sẽn peesã+ la b sẽn dõosã. 4 Sẽn paase, b siiga Baal-dãmbã tẽn-kugã rĩmã nifẽ, la b lub wisd tẽn-kugã sẽn da be b zutã. A leb n kɛɛ ra-lugsã b sẽn lugl n pʋʋsdẽ* wã la a wã bõn-naandsã b sẽn peesã la b sẽn dõosã n wer-b zom-zom, n wʋk n fãeeg neb nins sẽn da maand maand n kõt-bã yaad zutu.+ 5 A yõoga maan-kʋʋdb kõab b tẽn-kugã zutu.+ Woto, yẽ yɩlga Zida ne Zerizalɛm.
6 Manase ne Efrayim+ la Sɩmeyõ n tãag Naftali tẽnsã la rabood nins sẽn gũbg-bã pʋsẽ, 7 yẽ siiga tẽn-kugã la a kɛ ra-lugsã b sẽn lugl n pʋʋsdẽ* wã ne bõn-naandsã b sẽn peesã,+ n wer-b tɩ b lebg zom-zom. Sẽn paase, a luba wisd tẽn-kug nins fãa sẽn da be Israyɛll soolmẽ wã.+ La rẽ poore, a leba Zerizalɛm.
8 A Zoziyas naamã yʋʋm piig la a nii-n-soabã, a sẽn yɩlg soolmã ne wẽnd-doogã n sa wã, yẽ tʋma a Azaliya biig a Safan+ ne tẽngã naab a Maaseya n paas a Yowahaaz biig a Yowa sẽn yaa seb-bĩngdã, tɩ b na n tɩ maneg a Wẽnnaam a Zeova roogã.+ 9 Bãmb kẽnga maan-kʋʋdb kãsem a Hilkiya nengẽ n tɩ kõ-a ligdã nebã sẽn tall n wa Wẽnnaam doogẽ wã, ligd ning Levi buudã neb sẽn yaa rignoorã gũudbã sẽn dees Manase, Efrayim, la Israyɛll neb nins fãa sẽn ket-bã nengẽ,+ la Zida ne Bẽnzame la Zerizalɛm nebã nengẽ wã. 10 Dẽ, bãmb dɩka ligdã n kõ neb nins b sẽn yãk tɩ b get a Zeova roogã tʋʋmdã yellã. La tʋm-tʋmdb nins sẽn tʋmd a Zeova roogẽ wã rɩka ligdã n maneg roogã. 11 B rɩka ligdã n kõ nug-tʋʋm dãmbã la tãn-metbã tɩ b ra kug b sẽn peese, la raad n na n paas roogã pãnga, la b ra ra-paads n me rot nins Zida rĩm-dãmbã sẽn da bas tɩ sãamã.+
12 La rapã tʋma tʋʋmdã ne pʋ-peelem.+ B ra yãka Levi buudã neb tɩ b yaa b taoor dãmba. Yaa a Yahat ne a Abdiyaas sẽn yaa a Merari yagensã,+ n paas a Zakari ne a Mesulam sẽn yaa a Kehat yagensã.+ La Levi buudã neb nins fãa sẽn da mi yʋʋm-teed wẽeb sõma wã+ 13 n da get tʋm-tʋm-zaalsã* yelle, la neb nins fãa sẽn da tʋmd tʋʋm a taabã yelle. Levi buudã neb kẽer da yaa seb-gʋlsdba, yel-gɛtb la rigno-gũudba.+
14 Bãmb sẽn kẽng n na n tɩ rɩk ligdã b sẽn tall n wa a Zeova roogẽ wã,+ maan-kʋʋd a Hilkiya yãa Tõogã+ a Zeova sẽn da kɩt t’a Moyiiz kõ-bã.*+ 15 Dẽ, a yeela seb-gʋlsd a Safan yaa: “Mam yãa Tõogã sebr a Zeova roogã pʋgẽ.” La a Hilkiya rɩka sebrã n kõ a Safan. 16 Dẽ, a Safan talla sebrã n kẽng rĩmã nengẽ n tɩ yeel-a yaa: “Yãmb tʋm-tʋmdbã maanda bũmb ning fãa b sẽn yeel-b tɩ b maanã. 17 Bãmb vaaga ligd ning sẽn da be a Zeova roogẽ wã, n dɩk n kõ rap nins b sẽn yãkã, la sẽn tʋmd-b tʋʋmdã.” 18 Seb-gʋlsd a Safan leb n yeela rĩmã yaa: “Ad sebr maan-kʋʋd a Hilkiya sẽn kõ maam.”+ Dẽ, a Safan sɩnga sebrã kareng rĩmã taoore.+
19 Rĩmã sẽn wʋm Tõogã goamã, tao-tao bala, a pãrsa a futã.+ 20 Dẽ, a yeela a Hilkiya, a Safan biig a Ahikam,+ a Mise biig a Abdon ne seb-gʋlsd a Safan la rĩmã tʋm-tʋmd a Aazaya yaa: 21 “Kẽng-y n tɩ sok-y-yã a Zeova mam yĩnga, la neb nins sẽn ket Israyɛll ne Zida wã yĩnga, sebrã b sẽn yã wã goamã wɛɛngẽ. Bala sũ-puugr ning a Zeova sẽn na n sik tõnd zugã yaa wʋsgo, d yaab-rãmbã sẽn pa tũ a Zeova goamã, b sẽn pa tũ bũmb ning fãa sẽn gʋls seb-kãngã pʋgẽ wã yĩnga.”+
22 Woto, a Hilkiya ne neb nins rĩmã sẽn tʋmã kẽnga no-rɛɛs-poak+ a Ulda nengẽ. Yẽ ra yaa a Haraas biig a Tikva biig a Salum sẽn get futã bĩngr yellã paga. A Ulda ra bee Zerizalɛm sak a yiib-n-soabã pʋgẽ. Yaa be la bãmb tɩ gom ne-a.+ 23 A yeel-b lame: “Ad Israyɛll Wẽnnaam a Zeova sẽn yeele: ‘Kẽng-y n tɩ yeel-y rao ning sẽn tʋm yãmb mam nengẽ wã yaa: 24 “Ad a Zeova sẽn yeele: ‘Mam na n kɩtame tɩ yel-beed paam tẽn-kãngã ne a nebã.+ Kãab-wẽns nins fãa b sẽn gʋls sebr+ ning b sẽn karem Zida rĩmã taoorã na n pidsame. 25 Bala bãmb basa maam+ n maand maand sẽn nusd bug-zõos n kõt wẽnnaam-dãmb a taaba, n na n beeg maam+ ne b nusã tʋʋmã fãa. Rẽ n so tɩ mam na n sik m sũ-puugr tẽn-kãngã zugu, la m sũurã pa na n sig ye.’”+ 26 La y segd n tɩ yeela Zida rĩmã sẽn tʋm yãmb tɩ y wa sok a Zeova wã yaa: “Ad Israyɛll Wẽnnaam a Zeova sẽn yeele: ‘Goam nins fo sẽn wʋmã wɛɛngẽ,+ 27 fo sũur sẽn sãam tɩ f sik f meng Wẽnnaam taoore, fo sẽn wʋm mam sẽn yeel tɩ m na n maana tẽn-kãngã ne a nebã bũmb ningã, n sik f meng mam taoor la f pãrs f futã n yãb mam taoorã yĩnga, ma-me wʋma f pʋʋsgã.+ Yaa a Zeova meng n gome. 28 Rẽ n so tɩ mam na n kɩt tɩ fo babs f yaab-rãmbã,* tɩ b mum foo ne laafɩ f yaoogẽ wã. Fo ninã pa na n yã yel-beed nins fãa mam sẽn na n kɩt tɩ paam tẽn-kãngã ne a nebã ye.’”’”+
Dẽ, bãmb tɩ togsa rĩmã a Ulda sẽn yeelã fãa. 29 La rĩmã tʋmame tɩ b tɩ bool Zida ne Zerizalɛm kãsem-dãmbã fãa tɩ b wa tigmi.+ 30 Rẽ poore, rĩmã kẽnga a Zeova roogẽ wã ne Zida nebã la Zerizalɛm nebã fãa, n paas maan-kʋʋdbã la Levi buudã nebã. Yɩɩ nin-buiidã fãa, sẽn sɩng ne kom-bõonegã n tãag kãsembã. A karma kaoolã sebrã b sẽn yã a Zeova roogã pʋgẽ wã goamã fãa tɩ nebã kelge.+ 31 Rĩmã yalsa yĩngr a zĩigẽ wã n maan kaool*+ a Zeova taoore, n yeel t’a na n tũu a Zeova la a sak a noyã, a saglsã la a tõodã ne a sũur fãa la ne a sɩɩgã* fãa,+ n tũ kaoolã goamã b sẽn gʋls seb-kãngã pʋgẽ wã.+ 32 Sẽn paase, yẽ kɩtame tɩ neb nins fãa sẽn be Zerizalɛm la Bẽnzame wã yeel tɩ b saka kaoolã. La Zerizalɛm nebã tʋmame tɩ zems ne Wẽnnaam kaoolã, b yaab-rãmbã Wẽnnaam kaoolã.+ 33 A Zoziyas yiisa bũmb nins fãa Wẽnnaam sẽn kisã* Israyɛll tẽnsã fãa pʋsẽ,+ la a kɩt tɩ ned ning fãa sẽn be Israyɛll tũ bãmb Wẽnnaam a Zeova. A Zoziyas vɩɩmã tõre, bãmb pa bʋdg n bas b yaab-rãmbã Wẽnnaam a Zeova tũub ye.
35 A Zoziyas maana Pakã+ Zerizalɛm a Zeova yĩnga, tɩ b kʋ Pakã maoong+ pipi kiuugã rasem piig la a naas-n-soabã daare.+ 2 A ninga maan-kʋʋdbã b tʋʋmẽ wã, la a keng b raood tɩ b tʋm tʋʋmd ning b sẽn segd n tʋm a Zeova roogẽ wã.+ 3 Dẽ, yẽ yeela Levi buudã neb sẽn yaa Israyɛll fãa karen-saam-dãmbã,+ n yaa neb b sẽn welg toor a Zeova yĩngã yaa: “Ning-y Koglgã sẽn yaa sõngã roog ning Israyɛll rĩm a Davɩɩd biig a Salomo sẽn me wã pʋgẽ.+ Y pa na n leb n tʋk-a y bãgdẽ ye.+ Masã, tʋm-y y Wẽnnaam a Zeova yĩnga, la Israyɛll nebã yĩnga. 4 Segl-y y mens wa sẽn zems y buudã rot la y sulã, n maan wa Israyɛll rĩm a Davɩɩd ne a biig a Salomo sẽn gʋlsã.+ 5 Yals-y zĩ-sõngẽ wã wa sẽn zems y ba-biisã sẽn yaa nin-buiidã sẽn kellã* buud roto. Buud roog fãa segd n zemsa ne Levi buudã roog a yembre. 6 Kʋ-y Pakã maoongã+ la y yɩlg y mense, n segl y ba-biisã yĩng wa a Zeova sẽn da kɩt t’a Moyiiz togsã.”
7 A Zoziyas yãka rũms n kõ nin-buiidã. Yaa pe-bi-raad la boees sẽn na n maan Pakã maand neb nins fãa sẽn da be be wã yĩnga. Rũm-bõonegã fãa yɩɩ bãmb tus-pis-tã, n paas niis tus a tãabo. Rĩmã yãka woto fãa a paoongã pʋgẽ.+ 8 A nanambsã me kõo yamleoog kũun nin-buiidã yĩnga, maan-kʋʋdbã la Levi buudã neb yĩnga. A Hilkiya,+ a Zakari la a Yeyiyɛll sẽn yaa Wẽnnaam doogã taoor dãmbã kõo maan-kʋʋdbã rũm-bõoneg tus a yi la kobs-yoob tɩ b na n maan Pakã maando, la niis kobs-tã. 9 A Konaniya ne a ba-biis a Semaya ne a Netanɛll n paas a Hasabiya ne a Yeyɛll la a Zozabaad sẽn yaa Levi buudã nanambsã kõo Levi buudã neb rũm-bõoneg tus a nu Pakã maand yĩnga, la niis kobs-nu.
10 B segla tʋʋmdã n sɛ, tɩ maan-kʋʋdbã yals b zĩisẽ, tɩ Levi buudã neb me yals wa sẽn zems b sulã+ wa rĩmã sẽn da kõ noorã. 11 Bãmb kʋʋ Pakã rũmsi,+ tɩ maan-kʋʋdbã reeg zɩɩmã bãmb nengẽ n mese.+ Rẽ tɩ Levi buudã neb sɩɩda rũmsã.+ 12 Rẽ poore, bãmb manega maandã sẽn yõogd bugmã n na n pʋɩ nin-buiidã sẽn kellã sẽn da tigim taab wa sẽn zems b buudã rotã, sẽn na yɩl tɩ b tõog n wilg-b a Zeova wa b sẽn gʋls a Moyiiz sebrã pʋgẽ wã. Bãmb maana woto me ne niisã. 13 B sẽe Pakã nemd bugmẽ wa b sẽn minim n maandẽ wã,+ la b segl kũun nins sẽn welg toorã rʋg-bi la rʋg-yalems pʋsẽ, la ne powall-dãmba.* Rẽ poore, bãmb tall n tɩ kõo nin-buiidã sẽn kellã tao-tao. 14 Dẽ, bãmb segla Pakã maoong bãmb ne maan-kʋʋdbã yĩnga, bala maan-kʋʋdbã sẽn yaa a Aarõ yagensã ra maanda maand sẽn yõogd bugmã la b yõogd kaamã hal tɩ zĩigã tɩ sobge. Woto, Levi buudã neb segla Pakã maoong bãmb ne maan-kʋʋdbã sẽn yaa a Aarõ yagensã yĩnga.
15 Yɩɩn-yɩɩndbã sẽn yaa a Azaf+ kom-dibli wã ra yasa b zĩisẽ wa a Davɩɩd+ ne a Azaf+ la a Heman ne rĩmã bãngd* a Yedutun+ sẽn da wilgã. Rigno-gũudbã ra yasa b rignoyẽ wã.+ Bãmb pa yi b tʋʋmã zĩisẽ, bala Levi buudã nebã sẽn yaa b ba-biisã ra segenda Pakã bãmb yĩnga. 16 Baraare, bãmb segla bũmb nins fãa a Zeova sẽn yeel tɩ b maan Pakã+ yĩngã fãa n sa, la b maan maandã sẽn yõogd bugmã a Zeova tẽn-kugrã zug wa rĩm a Zoziyas sẽn yeelã.+
17 Israyɛll nebã sẽn da be be wã maana Pakã ne bur sẽn pa ning rabɩll tigrã rasem a yopoe.+ 18 Hal sẽn sɩng ne no-rɛɛs a Sãmwɛll wakatã, b ra nan zɩ n maan Pak a woto buud ye. Israyɛll rĩm-dãmb a taabã baa a ye ra zɩ n maan Pak wa a Zoziyas+ ne maan-kʋʋdbã, Levi buudã neb la Zida nebã fãa ne Israyɛll nebã sẽn da be be wã, la Zerizalɛm nebã fãa sẽn maanã ye. 19 Yɩɩ a Zoziyas naamã yʋʋm piig la a nii-n-soabã la b maan Pak-kãnga.
20 Bõn-kãensã fãa poore, rĩm a Zoziyas sẽn maneg wẽnd-doogã n sa wã, Ezɩpt rĩm a Neko+ waa Karkemis, Efrat kʋɩlgã noor n na n zabe, t’a Zoziyas yi n na n zab ne-a.+ 21 Dẽ, a Neko tʋma neb tɩ b tɩ yeel-a yaa: “Zida rĩma! Yel-kãngã paka foo zĩ-bʋgo? Mam pa wat rũndã n na n zab ne foom ye. Yaa ne buud a to. La Wẽnnaam yeela maam tɩ m kẽng tao-tao. Dẽ wã, f neer yĩnga, ra kɩɩs Wẽnnaam sẽn be ne maamã ye. Sã n pa rẽ, a na n sãam-f lame.” 22 La a Zoziyas pa lebg n bas-a ye. Yẽ toeema fut+ n na n tɩ zab ne a Neko, n pa kelg a goamã sẽn da yit Wẽnnaam nengẽ wã ye. Woto, yẽ kẽnga Megido+ tẽn-nabrẽ wã n na n tɩ zab ne-a.
23 Tãb-tãoodbã tãoo rĩm a Zoziyas t’a yeel a tʋm-tʋmdbã yaa: “Tall-y maam n yi ka tɩ b pogla maam, la sãmpogrã yaa kãsenga.” 24 Woto, a tʋm-tʋmdbã yiis-a-la saarã* pʋgẽ, n kẽes a zabr saar a yiib-n-soabã pʋgẽ n tall-a n kẽng Zerizalɛm. Dẽ, yẽ kiime tɩ b mum-a a yaab-rãmbã yaadẽ.+ La Zida ne Zerizalɛm nebã fãa yãba a Zoziyase. 25 A Zeremi+ yɩɩla sũ-sãang yɩɩll a Zoziyas yĩnga. La yɩɩn-yɩɩndbã, b pagb la rap fãa+ me gomda a Zoziyas yell b sũ-sãang yɩɩlã* pʋgẽ n tãag rũndã. B yiisa noor tɩ b segd n yɩɩnd yɩɩn-kãens Israyɛlle, la b gʋls-b-la sũ-sãang yɩɩlã sebr pʋgẽ.
26 A Zoziyas vɩɩmã kibay nins sẽn kellã, a sẽn maan neer n tũ bũmb ning b sẽn gʋls a Zeova Tõogã pʋgẽ wã, 27 la a tʋʋm a taabã, hal b sɩngr n tãag b saabo, b gʋlsa rẽ fãa Israyɛll ne Zida rĩm-dãmbã kibay sebrã pʋgẽ.+
36 Tẽngã nin-buiidã yãka a Zoziyas biig a Zowakaaz+ n kɩt t’a ledg a ba wã n dɩ naam Zerizalɛm.+ 2 A Zowakaaz sẽn wa n deeg naamã t’a tara yʋʋm pisi la a tãabo, la a rɩɩ naam Zerizalɛm kiis a tãabo. 3 La Ezɩpt rĩmã sik-a-la a naamẽ wã Zerizalɛm, n kɩt tɩ tẽngã neb yao wanzuri talã* koabga, la sãnem talã a ye.+ 4 Sẽn paase, Ezɩpt rĩmã kɩtame t’a Zowakaaz ba-biig a Eliyakim lebg Zida ne Zerizalɛm dĩma, n toeem a yʋʋrã tɩ lebg a Zowakim. La a Neko+ talla a ba-biig a Zowakaaz n kẽng Ezɩpti.+
5 A Zowakim+ sẽn deeg naamã t’a tara yʋʋm pisi la a nu, la a rɩɩ naam Zerizalɛm yʋʋm piig la a yembre. Yẽ ra maanda sẽn yaa wẽng a Wẽnnaam a Zeova nifẽ.+ 6 Babilon rĩm a Nebukadnezaar+ wa n zaba ne yẽ, sẽn na yɩl n sẽb-a ne zũud sẽbds a yiib n tall n kẽng Babilon.+ 7 A Nebukadnezaar wʋka a Zeova roogã teed kẽer n kẽng ne Babilon n tɩ bĩng a na-yirã.+ 8 A Zowakim vɩɩmã kibay nins sẽn kellã, bõn-wẽns nins fãa a sẽn maanã, la bũmb nins poorẽ b sẽn tõe n ning-a taalã, b gʋlsa rẽ fãa Israyɛll ne Zida rĩm-dãmbã kibay sebrã pʋgẽ. La a biig a Zowakin n ledg-a n lebg rĩma.+
9 A Zowakin+ sẽn deeg naamã t’a tara yʋʋm piig la a nii, la a rɩɩ naam Zerizalɛm kiis a tã la rasem piiga. Yẽ ra maanda sẽn yaa wẽng a Zeova nifẽ.+ 10 La yʋʋmdã sɩngrẽ, rĩm a Nebukadnezaar tʋmame tɩ b tɩ tall-a n wa Babilon,+ la b zɩ a Zeova roogã bõn-sõma kẽer n wa.+ La yẽ kɩtame t’a ba wã ba-biig a Sedesiyaas lebg Zida ne Zerizalɛm dĩma.+
11 A Sedesiyaas+ sẽn deeg naamã t’a tara yʋʋm pisi la a yembre, la a rɩɩ naam yʋʋm piig la a ye Zerizalɛm.+ 12 Yẽ ra maanda sẽn yaa wẽng a Wẽnnaam a Zeova nifẽ. A pa sik a meng no-rɛɛs a Zeremi+ a Zeova sẽn da tʋm t’a tɩ gom ne-a wã taoor ye. 13 Sẽn paase, yẽ tõdgame t’a kõn sak rĩm a Nebukadnezaar+ sẽn da kɩt t’a wẽen ne Wẽnnaamã ye. Yẽ kell n yẽda a tʋb n diglim a sũur n tõdg t’a kõn lebg n wa Israyɛll Wẽnnaam a Zeova nengẽ ye. 14 Maan-kʋʋdbã taoor dãmb ne tẽngã nebã fãa ra pa maand sɩd ne Wẽnnaam baa bilf ye. B ra maanda bõn-wẽns nins fãa bu-zẽmsã neb sẽn da maandã. Bãmb rẽgma a Zeova roogã+ a sẽn da yɩlg Zerizalɛmmã.
15 Bãmb yaab-rãmbã Wẽnnaam a Zeova ra tʋmda koe-taasdb bãmb nengẽ tɩ b keoogd-ba, n keoogd-b n yɩlemdẽ. Bala a ra zoeta a nebã nimbãanega, la a ra pa rat tɩ b sãam a roogã ye. 16 La bãmb ra yaanda Wẽnnaam koe-taasdbã,+ n paoogd a goamã+ la b laad a no-rɛɛsdbã+ hal t’a Zeova sũur wa puug ne bãmb+ tɩ tɩɩm kae ye.
17 Woto, Wẽnnaam kɩtame tɩ Kalde nebã+ rĩm wa zab ne-ba, n kʋ b kom-bɩɩsã ne sʋʋg+ b ro-sõngã pʋgẽ.+ Bãmb pa zoe bi-ribl wall pʋg-sad nimbãanega, pa rẽ bɩ nin-kẽem wall koams nimbãaneg ye.+ Wẽnnaam ninga bũmba fãa b nugẽ.+ 18 Bãmb wʋka Wẽnnaam a Zeova roogã teed fãa, b bɛd la b bõonego, Wẽnnaam roogã laogo, ne rĩmã la nanambsã laogo, bũmba fãa n kẽng Babilon.+ 19 Yẽ yõoga Wẽnnaam doogã,+ n siig Zerizalɛm lalgã,+ n yõog a gasd nins sẽn tar pãngã fãa ne bugum, la a sãam bõn-sõma wã fãa.+ 20 A talla neb nins fãa sẽn põs sʋʋgã n kẽng Babilon+ tɩ b tɩ lebg yẽ ne a kambã tʋm-tʋmdba,+ hal n tãag Pɛrs soolmã* sẽn wa n sɩng naam dɩɩb tẽn-kãng pʋgẽ wã,+ 21 sẽn na yɩl t’a Zeova goam nins a sẽn da kɩt t’a Zeremi togsã pidsi,+ hal tɩ tẽngã yao a vʋʋsg rayã.+ Wakat ning fãa tẽngã sẽn yɩ raboogã, a vʋʋsame* hal tɩ yʋʋm pis-yopoe pidi.+
22 Pɛrs rĩm a Sirus+ naamã pipi yʋʋmdã, sẽn na yɩl t’a Zeova gomdã a Zeremi sẽn da togsã+ pidsi, a Zeova pirsa Pɛrs rĩm a Sirus t’a yiis koɛɛga, n kɩt tɩ b moon a soolmã fãa pʋgẽ. A kɩtame me tɩ b gʋls koe-kãnga.+ A mooname n yeel yaa: 23 “Ad Pɛrs rĩm a Sirus koɛɛga: ‘A Zeova sẽn yaa saasẽ Wẽnnaamã kõo maam tẽngã soolem toɛy-toɛyã fãa,+ la a yeel maam tɩ m me roog n kõ-a Zerizalɛm sẽn be Zida wã.+ Ãnd dãmb n be yãmb sʋkã n naag a nin-buiidã? Bɩ b Wẽnnaam a Zeova zĩnd ne-ba, la bɩ b kẽng be.”+
Ges-y gom-biis võor bilgrã zĩigẽ.
Bɩ, “ra sokda Wẽnnaam beenẽ.”
Ges-y gom-biis võor bilgrã zĩigẽ.
Yaa bũmb sẽn wõnd sarɛt tɩ wed-moos tatẽ.
Bɩ, “wed-rʋʋdba.”
Bɩ, “wed-rʋʋdb.”
Yaa tɩɩg sẽn wõnd kankanga.
Pa rẽ bɩ, “Ezɩpt ne Kuwe. Rĩmã toandbã da raad-b-la Kuwe.” Tõe tɩ Kuwe yaa Silisi.
Bɩ, “neb sẽn zɩt zɩɩb.”
Bɩ, “kɩt t’a lebg sõng.”
Rat n yeel tɩ burã b sẽn wilgã.
Bɩ, “bʋla.”
Koor yaa litr 220. Ges-y vẽnegr ning sẽn yaa B14.
Orz yaa kood sẽn wõnd bɩle.
Bat zemsa litr 22. Ges-y vẽnegr ning sẽn yaa B14.
Bɩ, “bʋla.”
Orz yaa kood sẽn wõnd bɩle.
Bɩ, “neb sẽn zɩt zɩɩbo.”
Kãntɩɩg zemsa sãntimetr 44,5. La kẽer tagsdame tɩ “pĩnd dãmbã makdgã” yaa kãntɩɩg woglem sẽn zems sãntimetr 51,8. Ges-y vẽnegr ning sẽn yaa B14.
Yaa zãnd buudu.
D pa mi sã n yaa kãntɩɩg bɩ bũmb a to ye.
Talã zemsa kɩlo 34,2. Ges-y vẽnegr ning sẽn yaa B14.
Sɩkl zemsa garam 11,4. Ges-y vẽnegr ning sẽn yaa B14.
Rat n yeel tɩ Zĩ-sõngã sẽnese.
Bɩ, “bʋla.”
Rat n yeel tɩ “Bɩ a (rat n yeel t’a Zeova) vigl kãn-kãe.”
Tõe n dat n yeelame tɩ “ne pãnga.”
Yaa laok sẽn yaa yaleng b sẽn maan ne zũud n ningd koom.
Nug-biis a naas zemsa sãntimetr a 7,4. Ges-y vẽnegr ning sẽn yaa B14.
Bat yaa litr 22. Ges-y vẽnegr ning sẽn yaa B14.
Bɩ, “koom puus-puus.”
Bɩ, “kɩt tɩ lebg sõamyã.”
Rat n yeel tɩ Zãn tigrã sasa.
Bɩ, “Levi buudã neb sẽn yaa maan-kʋʋdbã.”
Ebre, “fo bi-riblã, soab ning sẽn na n yi fo pendẽ wã.”
Kãntɩɩg zemsa sãntimetr 44,5. Ges-y vẽnegr ning sẽn yaa B14.
Ebre, “saasẽ saasã.”
Ebre, “kãab-wẽng.”
Ebre, “kãab-wẽngã.”
Bɩ, “sik-bã.”
Ebre, “y nugã pãnga, la y kangã sẽn tẽegã.”
Ges-y gom-biis võor bilgrã zĩigẽ.
Bɩ, “b sẽn pʋʋsd zĩ-kãngã wɛɛngẽ.”
Ebre, “zae.” Ges-y gom-biis võor bilgrã zĩigẽ.
Tõe tɩ yaa ne Levi buudã nebã.
Bɩ, “Hamat noor.”
Ges-y gom-biis võor bilgrã zĩigẽ.
Tigrã vẽkembeoogã bɩ rasem piig la a nu soabã daare.
Ebre, “la m kɩt t’a lebg yel-bũnd.”
Bɩ, “na-yirã.”
Ebre, “a Israyɛll kom-dibli.”
Yaa bũmb sẽn wõnd sarɛt tɩ wed-moos tatẽ.
Yaa zãnd buudu.
B boond-a lame me tɩ Rasem a yopoe naoor a yopoe vẽkembeoogã tigri, bɩ Pãntekotã tigri.
Talã zemsa kɩlo 34,2. Ges-y vẽnegr ning sẽn yaa B14.
Yaa tɩɩs kẽer kaam sẽn tar yũ-noogo.
Ebre, “pa solg.”
Bɩ, “goamã.”
Talã zemsa kɩlo 34,2. Ges-y vẽnegr ning sẽn yaa B14.
Yaa tɩɩs kẽer kaam sẽn tar yũ-noogo.
Pa rẽ bɩ, “n paas kũun sẽn zem.”
Sɩkl zemsa garam 11,4. Ges-y vẽnegr ning sẽn yaa B14.
Yaa sẽn tãood-b tãbdã n da wae n zãad gãn-bila.
Biiblã babg ning b sẽn da gʋls ne Ebre wã pʋgẽ, min zɩslem yaa garam 570. Ges-y vẽnegr ning sẽn yaa B14.
Yaa tɩɩs kẽer kaam sẽn tar yũ-noogo.
Yaa wed-moaag ne bõang biiga.
Yaa bũmb sẽn wõnd sarɛt tɩ wed-moos tatẽ.
Bɩ, “wed-rʋʋdb.”
Rat n yeel tɩ Efrat kʋɩlgã.
Yaa tɩɩg sẽn wõnd kankanga.
Yaa ned sẽn taasd a taab bũmb Wẽnnaam sẽn vẽneg-a t’a yã.
Bɩ, “kãsem-dãmb.”
Bɩ, “kãsem-dãmbã.”
Bɩ, “kãsem-dãmbã.”
Bɩ, “kãsem-dãmbã.”
Ezayi.
Bɩ, “fu-rotẽ.”
Yaa bũmb sẽn wõnd sarɛt tɩ wed-moos tatẽ.
Ebre, “b sẽn tũusi.”
Ges-y gom-biis võor bilgrã zĩigẽ.
Bɩ, “zĩn-dãmb sẽn wõnd bʋʋsã.” Ebre, “bʋʋsã.”
Ges-y gom-biis võor bilgrã zĩigẽ.
Bɩ, “n sãeeg a kom-dibli wã kẽer.”
Yaa bũmb sẽn wõnd sarɛt tɩ wed-moos tatẽ.
Ebre, “zoɛtb.”
Yaa ned sẽn taasd a taab bũmb Wẽnnaam sẽn vẽneg-a t’a yã.
Ebre, “b sẽn tũusi.”
Ebre, “b sẽn tũusi.”
Rat n yeel tɩ kaool sẽn paad wakat fãa n pa toeemdẽ ye.
Ebre, “sẽn wa n na n pids a nug ne.”
Rat n yeel tɩ burã b sẽn wilgã.
Ebre, “b sẽn tũus.”
Bɩ, “a tẽn-kɩremsã.”
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ebre, “kʋɩlens sẽn tar pagds a yiib.”
Yaa sẽn tãoodb tãbdã n da wae n zãad gãn-bila.
Ebre, “la b tabd tãpo.”
Yaa bũmb sẽn wõnd sarɛt tɩ wed-moos tatẽ.
Ebre, “laafɩ ra ka be ned ning sẽn yitã bɩ ned ning sẽn kẽedã yĩng ye.”
Ebre gom-bilã tõe n dat n bilga “bĩndu.” B wae n pʋta gom-bi-kãng n na n paoog bũmb ning yell b sẽn gomdã.
Yaa zãnd buudu.
Ges-y gom-biis võor bilgrã zĩigẽ.
Ebre, “kɩtame t’a Maaka pa le yaa na-poak ye.”
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ebre, “sẽn kɩt tɩ lebg sõamyã.”
Bɩ, “lebs n me Geba ne Mizpa.”
Yaa bũmb sẽn wõnd sarɛt tɩ wed-moos tatẽ.
Yaa tɩɩs kaam sẽn tar yũ-noogo.
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Fadg yaa lampo buudu.
Rat n yeel t’a sakame t’a zakã ned kẽ kãadem ne a Akaab zakã neda.
Yaa bũmb sẽn wõnd sarɛt tɩ wed-moos tatẽ.
Bɩ, “gãn-tikã.”
Ebre, “sikẽ.”
Yaa ned sẽn taasd a taab bũmb nins Wẽnnaam sẽn vẽneg-a t’a yã.
Ges-y gom-biis võor bilgrã zĩigẽ.
Bɩ, “segla y sũur.”
Bɩ, “zĩnd ne sẽn yaa neerã.”
Pa rẽ bɩ, “Meenit-rãmbã.”
Yaa Mog-kɩɩngã.
Ebre, “kom-dibli wã.”
Bɩ, “kosoogã.”
Bɩ, “tõoga toogo.”
Ebre, “n ning a Zeova barka.”
Rat n yeel tɩ “Barka.”
Ges-y gom-biis võor bilgrã zĩigẽ.
Ebre, “segl b sũyã.”
Rat n yeel tɩ yagenga.
Yaa bũmb sẽn wõnd sarɛt tɩ wed-moos tatẽ.
Ges-y gom-biis võor bilgrã zĩigẽ.
Bɩ, “yo ne wẽnnaam-dãmb a taaba.”
Bɩ, “yo ne wẽnnaam-dãmb a taaba.”
B boond-a lame me t’a Akaziya.
Ebre, “bi-puglã.”
Biiblã sɛb nins b sẽn gʋls ne nugã kẽer pʋsẽ, yaa “Azariya.”
Bɩ, “a sẽn da pa keemã yĩnga.”
Ebre, “bi-ribl.”
Ebre, “zae.” Ges-y gom-biis võor bilgrã zĩigẽ.
Yaa sẽn tãood-b tãbdã n da wae n zãad gãn-bila.
Tõe tɩ yaa seb-pindem Wẽnnaam tõogã sẽn be a pʋgẽ.
Bɩ, “pʋʋsgã roogẽ.”
Pa rẽ bɩ, “hal tɩ b fãa wa kõ.”
Ges-y gom-biis võor bilgrã zĩigẽ.
Bɩ, “ra kõta bãmb kaseto.”
Rat n yeel tɩ Siiri nebã.
Bɩ, “t’a tara bãas wʋsgo.”
Bɩ, “bi-riblã.” B sẽn yeel tɩ “kom-dibli wã,” tog n yaa waoogr buudu.
Ebre, “yẽbgr.”
Ebre, “b sẽn tũus.”
Talã zemsa kɩlo 34,2. Ges-y vẽnegr ning sẽn yaa B14.
Bɩ, “na-yirẽ wã.”
Ebre, “fu-rotẽ.”
Zemsa metr 178. Ges-y vẽnegr ning sẽn yaa B14.
Rat n yeel t’a ba a Amazɩya.
Fadg yaa lampo buudu.
Tog n yaa pĩis zutu.
Bɩ, “tẽn-laagẽ.”
Bɩ, “gãn-tigsi.”
Wõnda pʋ-kãngã ra bee rĩm-dãmbã yaad sɛɛgẽ.
Talã zemsa kɩlo 34,2. Ges-y vẽnegr ning sẽn yaa B14.
Koor yaa litr 220. Ges-y vẽnegr ning sẽn yaa B14.
Orz yaa kood sẽn wõnd bɩle.
Ges-y gom-biis võor bilgrã zĩigẽ, zĩig ning b sẽn gʋls tɩ “Zeyɛnnã.”
Ges-y gom-biis võor bilgrã zĩigẽ.
Bɩ, “a tẽn-kɩremsã.”
Bɩ, “a tẽn-kɩremsã.”
Bɩ, “a tẽn-kɩremsã.”
Ges-y gom-biis võor bilgrã zĩigẽ.
Yaa zãnd buudu.
Bɩ, “laadẽ.”
Bɩ, “vʋʋs.”
Yaa zãnd buudu.
Rat n yeel tɩ burã b sẽn wilgã.
Ges-y gom-biis võor bilgrã zĩigẽ.
Yaa ned sẽn taasd a taab bũmb nins Wẽnnaam sẽn vẽneg-a t’a yã.
Yaa ned sẽn taasd a taab bũmb nins Wẽnnaam sẽn vẽneg-a t’a yã.
Ebre, “yɩɩ sũ-tɩrs rãmb.”
Bɩ, “segla.”
Ebre, “zoɛtbã.”
Ebre, “zoɛtbã.”
Ebre, “n kõ-b sũur a yembre.”
Ebre, “sẽn segl a sũurã.”
Ebre, “n maag nin-buiidã.”
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ebre, “sigsã zĩis.”
Bɩ, “kõ b mens zãng-zãnga.”
Bɩ, “rɩɩbã rot.”
Bɩ, “zĩig ning b sẽn zam tãndã.” Yaa Ebre gom-bil sẽn dat n yeel tɩ “pidsi.”
Ges-y gom-biis võor bilgrã zĩigẽ.
Yaa tɩɩs kẽer kaam sẽn tar yũ-noogo.
Ges-y gom-biis võor bilgrã zĩigẽ.
Ebre, “saasẽ tãb-biisã fãa.” Tõe n makda wĩndgã, kiuugã la ãdsã.
Bɩ, “kosoogã.”
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Yaa neb sẽn taasd b taab bũmb Wẽnnaam sẽn vẽneg-b tɩ b yã.
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Bɩ, “neb nins sẽn zɩt zɩɩbã.”
Ebre, “sẽn da kõ ne a Moyiiz nugã.”
Rat n yeelame t’a na n maana kaalem.
Bɩ, “n lebs n maan kaool.”
Ges-y gom-biis võor bilgrã zĩigẽ.
Bɩ, “bõn-naandsã.”
Ebre, “nin-buiidã kom-dibli wã.”
Yaa laok sẽn tar n kɩɩmd rɩɩbo.
Yaa ned sẽn taasd a taab bũmb nins Wẽnnaam sẽn vẽneg-a t’a yã.
Yaa bũmb sẽn wõnd sarɛt tɩ wed-moos tatẽ.
Bɩ, “kʋʋr yɩɩlã.”
Talã zemsa kɩlo 34,2. Ges-y vẽnegr ning sẽn yaa B14.
Bɩ, “rĩungã.”
Bɩ, “yɩɩ vʋʋsg daar.”