Moon-y koe-noogã zĩig fãa

¹ Pipi kiris-nebã moona koe-noogã zĩig fãa. B ra moona koe-noogã ne yẽesem wʋsg hal t’a Zezi Kirist vʋʋgrã loogr yʋʋm 30 poore, rẽ tɩ Rĩungã koɛɛg zoe n ‘moona dũniyã fãa.’—Kol. 1:23.

² Rũndã-rũndã a Zeova sõgen dãmbã bõn-datl me yaa taas neb wʋsg wa b sẽn tõe tɛk Rĩungã koe-noogo. Bõe n na n sõng tõnd tɩ d pids bõn-datl kãnga? Neb wʋsg sẽn yɩɩd sẽn tʋmd wakat fãa wã yĩng kɩtame tɩ d sã n wa kẽng b yiyã bɩ d ka minim n yãt-b ye. B sã n ka be tʋʋm zĩigẽ me, tõe tɩ yaa so-toaka, te-raando, bɩ pemsem kokr zug la b be. Wãn-wãn la a Zeova sõgen dãmbã taasd neb nins sẽn zemsã sẽn be bãmb sʋkã Rĩungã koɛɛga?—Mat. 10:11.

³ Bãmb kẽer yaa b tʋʋma zĩigẽ la d yãt-ba. Baa tẽn-bõoneg tara yaar dãmb tɩ neb wʋsg nong n be be raarã tõre. Galʋ-tẽn-bɛdã pʋsẽ, neb sẽn tʋmd luzin dãmb zĩisẽ bɩ tẽng pʋgẽ nasaar do-bɛdẽ la b rãmb nins sẽn be rot b sẽn gũud tɩ ned yaar ka tõe n kẽ pʋsẽ paamda kasetã, la ne bãmb wʋsgo ra yaa b pipi. Wɩkɛn dãmbã sasa neb wʋsg b sẽn yã tɩ b kokd pemsem park rãmbẽ, zardẽ piblik rãmbẽ, tɩ b gũud parkĩngẽ bɩ tɩ b be soay noy butigs sẽn tong taabẽ, n sak n kelg koe-noogã.

⁴ Koe-moondb wʋsg n maand modgr wʋsg n tʋgd n kõt kasetã zĩis zãma sẽn beẽ, la zĩig ning b sẽn tõe yãẽ neba. Sɩngrẽ wã, Kaset rãmb kãens yama ra yoodame, tɩ b ra maand rabeem bilf ne kaset kũun a woto buudu, bala b sẽn da minimã yaa kasetã kũun ne manesem sẽn sigl sõma zak-zaka. Wãn-wãn la b tagsd ne rẽ masã?

⁵ Saam-biig a yembr sẽn tar minim yeela woto ne sũ-noogo: “A paasa mam koe-moonegã pãnga!” Tɩ saam-biig a to paase: “A kɩtame tɩ mam yama tik koe-moonegã zug n paase.” So-pakd sẽn kʋʋl yeelame: “A paasa mam yamã, mam yĩngã, la m tẽebã pãnga, . . . la m ket n bɩta zĩ-kãensã wɛɛngẽ.” Koe-moond a yembr yeelame t’a paam n sõsã ne neb wʋsg sẽn da zɩ n gom ne a Zeova Kaset rãmbã pĩnda. Kom-bɩɩsã me kẽesda b mens tʋʋm kãngã sẽn kõt sũ-noogã pʋgẽ. Bi-biig a yembr yeela woto: “Bee yamleoog wʋsgo, bala f tõe n goma ne neb wʋsgo.” Tɩ bi-bɩɩg a to yeele: “Sɛbã sõor mam sẽn basd ne nebã yɩɩda pĩndã!” B tõog n maana bõn-kãensã fãa zĩisẽ b sẽn da moon n yɩlem wʋsgo.

⁶ Kaagr yel-gɛtbã lʋɩta taoor tʋʋmdã pʋgẽ: Sosiete wã miimi tɩ ‘zamaana neng ka zɛɛd toeeng ye.’ Rẽ n so tɩ Sosiete wã sagl kaagr yel-gɛtbã tɩ b maneg b sẽkã sẽn na yɩl tɩ semen fãa bɩ b tõog n taas neb wʋsg wa b sẽn tõe tɛk koe-noogã. (1 Kor. 7:31, Sebr Sõngo) Sẽn na maan yʋʋma, tigims gĩn yel-gɛtbã rɩkda ra-zaan-dayã yibeoog fãa n moond zak-zaka, la b maand lebg-n-tɩ-ges rãmbã la Biibl zãmsg ne nebã wĩnd-kaoore. Zĩis kẽere, mooneg tʋʋmd na-kẽndr a woto tõe n ket n zemsame. La zĩis a taaba mooneg zak-zak yibeoog kẽer ra-zaan-dayã ka womd biis wʋsg ye. Kaagr yel-gɛtã tõeeme n yãk yam n yeel tɩ zĩ-kãense, yɩtẽ-la sõma tɩ b kõ kasetã butik-butik bɩ sor zug yibeoog pĩnd-pĩnda. A leb n tõeeme n maan segls tɩ sul-bõoneg tɩ kõ kasetã nasaar ro-bɛdẽ, leebg zĩisẽ, parkĩng rãmbẽ, bɩ zĩis a taaba. Koe-moondbã sã n tʋm ne sẽk ning b sẽn tar moonegã yĩngã sõma n paase, b na n tõog n yãa neb wʋsg n paase.

⁷ Kɩbay d sẽn paam wilgdame tɩ kaagr yel-gɛtbã la koe-moondbã sũy yɩɩ noog ne remsg a woto. Kãsem dãmb sul kẽer kosa tigims gĩnd yel-gɛtã t’a zãms koe-moondb kẽer moonegã tʋʋmd nens kẽer sẽn pak tigingã. Koe-moondb kãens sẽn tũ kaagr yel-gɛtã naf-b lame. Bãmb me tõogame n zãms neb a taaba. (2 Tɩm. 2:2) Rẽ kɩtame tɩ masã bɩ b tõe n taas koe-noogã neb wʋsg n yɩɩda.

⁸ La ka tɩlae tɩ y gũ tigims gĩnd yel-gɛtã waoong n yaool n mak moonegã so-kãensã kẽer tũub ye. Ad tagsa toɛy-toɛy sẽn tõe n zems ne yãmb moonegã zĩiga:

⁹ Sor zug kaset kũuni: D sã n wa kẽng sak pʋgẽ ra-zaan-daar yibeoog n tɩ mik tɩ neba ka be b yiya, d tõeeme n wa sʋkd d mens woto: ‘Neba fãa kẽe yɛ?’ Tõe tɩ bãmb kẽer bee kẽn zugu, bɩ b kẽnga teed raabo. Rẽ yĩnga yãmb makame n na n tũnug ne sor zug kaset kũunã n yã nin-kãensã bɩ? D sã n maan dẽ wa sẽn segde, koe-moonegã nen-kãngã tõe n woma biis wʋsgo. Walla tɩ d yas zĩ-yend ne zʋrno rãmbã, yɩta sõma tɩ d kolg nebã n sɩng sõasg ne-ba. Ka tɩlae tɩ y kõ so-loaad fãa kasetã ye. Gom-y ne neb nins sẽn ka yãgdã, wala sẽn kẽnd-b la b get butigsã teedã, b rãmb nins sẽn be mobill pʋgẽ n gũudẽ wã, bɩ neb nins sẽn gũud n na n kẽ lorã. Sɩngrẽ wã y tõe n pʋʋsa nedã, la y gũ a leokre. Nedã sã n sak sõasga, bɩ y sʋk a sẽn tagsd yell ning y sẽn ges tɩ tõe n pak-a lame wã zugu.

¹⁰ Kaagr yel-gɛt kosa koe-moondb a yoob tɩ b wa yãag yẽ ne a pagã tɩ b kõ kasetã sor zugu. Rẽ biis yɩɩ bõe? A yeelame: “Tõnd moonegã sɩd yɩɩ sõma yibeoogẽ! Ra ka be tɩ ned ka be yir ye. D basa zʋrno rãmb pis-nii la seb-vãad wʋsg ne neba. D talla sõss sẽn zĩnd yamleoog ne nebã. Koe-moond a yembr sẽn da kõt kaset sor zug a pipi, yeela woto ne sũ-noogo: ‘Mam bee sɩdã pʋgẽ sẽn na maan yʋʋma, la mam ka bãng tɩ m da kongda bõn-sõma woto ye!’ Semenã ne a na n sa wã tɩ tigingã zʋrno rãmb sõor sẽn da loog nugã saame.”

¹¹ Kaagr yel-gɛt kãng sẽn kẽng tiging ning sẽn pʋgdã pʋgẽ, a wʋmame tɩ koe-moondb n dag n kõ kasetã sor zug yibeoog a yembr pĩnda, la ka wom biis sõma woto ye. Wakat ning b sẽn moona fãa pʋgẽ neb a yiib bal la saam-bi-poak a yembr paam n gom ne, bala neb a taaba fãa ra yãgdame n dabd tʋʋma. Yel-gɛtã sagl-b lame tɩ b lebg n kẽng so-kãng zĩigẽ yibeoogo, la b ra kẽng pĩnd ye. Yaa woto la b maan-yã, n pa be n tãag wĩnto-sʋka. Saam-bi-poak ning sẽn dag n gom ne neb a yiib balã kaset kũun woma biis n sãoog pĩndã. A basa zʋrno rãmb 31 la seb-bi 15 ne neba, n paam neb a yopoe yʋy la b adɛrs rãmba, la a sɩng Biibl zãmsg a yiibu! Sullã neb a taab me paama biis sẽn kengd raood woto.

¹² Y sã n yã ned sẽn dat n bãng n paase, bɩ y modg n bãng a soabã yʋʋre, a adɛrse, la a telefõn nimero. Walla tɩ y kell n kos-a vẽeneg t’a togs-y bõn-kãensã wã, y tõe n yeela woto: “Sõs-kãngã yɩɩ maam noogo. Wãn to la d tõe n kẽng taoor ne sõs-kãngã nindaare?” Bɩ y tõe n leb n yeela woto: “Sor bee m sẽn tõe n tũnug ne n paam yãmb y yir bɩ?” Neb wʋsg b sẽn gom ne woto sakame tɩ b lebg n wa ges-ba. Modg-y n zɩ tigissẽ wã boolg sɛb wʋsgo, sẽn na yɩl n tõog n tũnug ne-b n bool neb nins sẽn dat-bã tɩ b wa tigissã.

¹³ Yãmb sã n gom ne ned sẽn dat n bãng sɩdã n paase, sẽn be tiging a to mooneg zĩigẽ, bɩ y taas tiging kãng saam-biisã kɩbay nins sẽn tɩ loe ne nedã tɩ b tɩ ges a yelle. Sor zug kaset kũun yaa manesem sẽn yaa sõma wʋsg sẽn na yɩl n yelg koe-noogã yãmb babgẽ wã bɩ? Sã n yaa woto, bɩ y lebg n ges sõasg ning gom-zug sẽn yaa “D moon sorã zug ne manesem sẽn yaa sõama n yã neb nins sẽn sak n na n kelga” sẽn be yʋʋmd 1994, sẽoog kiuug Rĩungã Tʋʋmd pʋgẽ. Rẽ poor bɩ y segl y mens n kõ kaset sor zug daarã wakat ning y sẽn na n tõog n yã neb wʋsg wa y sẽn tõe tɛka.

¹⁴ Kaset kũun d sã n wa be mobill sẽn dɩkd neb pʋgẽ: Vugri so-pakdb kẽer n yãk yam n yik yibeoog n na n tɩ kõ kasetã neb nins sẽn gũud n na n dɩk biis lekoll kãseng a yembr sɛɛgẽ. La b sã n da sɩng sõasg fãa, a sẽn wat n wa lebg noog n bee a piig a la yiib zugã la biisã sẽn wat n dɩk nebã tɩ sõasgã be saabẽ. Sẽn na yɩl n welg yel-kãngã so-pakdbã kẽeda biisã n kell n kẽng taoor n kõt sẽn be-b a pʋgẽ wã kasetã. Biisã sã n wa kẽn n tɩ ta a yaoolem yalsgã zĩigẽ, so-pakdbã lebgd n dɩk-a lame n kõt kasetã la b watẽ. B sẽn maan woto n watẽ la b lebdẽ n yɩlem naoor a wãna, b kʋmsa b sẽn tõog n pidsã n yã tɩ b basa zʋrno rãmb 200 ne neba, la b sɩng Biibl zãmsg a yoob ne neba. Biisã rɩkdb kẽer sakame n kõ b adɛrs rãmb la b telefõn nimero rãmb sẽn na yɩl tɩ so-pakdbã tõog n wa ges-b yiri. Semen ning sẽn pʋglã, so-pakdbã lebg n kẽnga biisã yalsg zĩigẽ n leb n tɩ maan wa b sẽn da maanã. B basa zʋrno rãmb 164 la b sɩng Biibl zãmsg a yembr n paase. Biisã yalsg zĩig a yembrẽ, zĩ-vɩʋʋg a yembr bal n da be n kɛg so-pakdã, tɩ ned kẽ n kell n zĩnd be. A gesa saam-biigã n yõgemd a noor n yeele: “Mam miimi tɩ f tara Gũusg Gasg n na n kõ-ma.”

¹⁵ Koe-moondb wʋsg kõo kaset sẽn yaa sõma b sẽn da wa n be biisi, tẽre, bɩ sɩlg pʋgẽ n togd sore. Wãn to la y tõe n sɩng sõasg ne ned sẽn zĩ n kɛg yãmba? Koe-moond sẽn tar yʋʋm 12 sɩnga Réveillez-vous ! wã kareng biisã pʋgẽ, n saagdẽ tɩ rẽ na n kɩtame tɩ bipugl sẽn zĩ n kɛg yẽ tʋlg n bãng n paase. Sɩd yɩɩ woto me. Bipuglã sʋka a sẽn karemd bũmb ninga, tɩ bi-bɩɩgã leok t’a karemda sebr sẽn wilgd zu-loeesã kom-bɩɩsã sẽn maood ne wã tɩɩm. A paasame tɩ sõasgã nafa yẽ wʋsgo, la t’a tõe n sõng-a lame me. Bipuglã saka zʋrno rãmbã ne sũ-noogo. Kom-bɩɩs a yiib n wʋm b goamã n kos zʋrno rãmba. Rẽ kɩtame tɩ sʋfɛɛrã wẽnemd mobillã n yals sorã noore, la a sʋk n na n bãng bũmb ning sẽn kɩt tɩ nebã rat zʋrno kãensã wʋsg woto wã. A sẽn bãngã la yẽ me sẽn deeg zʋrno rãmba. Yaa vẽeneg tɩ koe-moondã sã n ka tarẽ zʋrno rãmb wʋsg sẽn na yɩl n kãab neb nins fãa sẽn da ratã, woto ra kõn tõog n yɩẽ ye!

¹⁶ Kasetã kũun park rãmbã la parkĩng rãmbã zĩisẽ: Kasetã kũun park rãmbã la parkĩng rãmbã zĩisẽ yaa manesem sõng sẽn na yɩl n yã nebã n moone. Yãmb zoe n makame n na n kõ kaset toleng zĩigẽ parkĩngẽ bɩ? Wakat fãa bɩ y rɩk sẽk bilf n maag y yĩng n ges zĩigã sẽn yaa to-to. Bao-y ned sẽn ka yãgde, bɩ sẽn be mobill sẽn gaar pʋgẽ n gũudẽ n sɩng sõasg ne-a. Sõasgã sã n ket n kẽngd taoor bɩ y gom Rĩungã yelle. Moon-y y yembre, tɩ koe-moond a to be yambẽ. Ra zã-y kor-bedre, bɩ bũmb a to sẽn na n kɩt tɩ b neẽ tɩ y moondame ye. Maan-y gũusgu. Yɩtẽ-la sõma tɩ y maan wakat bilf parkĩng a yembr pʋgẽ tɩ rẽ poor bɩ y toeem parkĩngi. Ned sã n ka rat n sõs ne-yã, ne waoogre, bɩ y bas-a la y bao ned a to n sõs ne. Saam-biig a yembr sẽn da wa n kõt kaset woto parkĩng rãmb zĩisẽ basa zʋrno rãmb 90 kiuug a ye pʋgẽ.

¹⁷ Neb kẽer rabda park rãmbẽ n na n tɩ kok pemsem, tɩ neb a taab rabd be n na n tɩ reem bɩ b zĩnd ne b kamba. Bao-y sor n kõ-b kasetã la maan-y gũusg n da tiis-b bũmb nins b sẽn maandã pʋgẽ ye. Saam-biig a yembr sɩnga sõasg ne park zĩig zãad a yembr n mik tɩ dorgã la kambã beoog-daar yell pak-a lame. A sɩnga Biibl zãmsg ne-a, n da maand-a parkã pʋgẽ wakat fãa.

¹⁸ Kaset kũun soayã noy koosem zĩisẽ: Tẽngã laloa sẽn mi n gɩdg rẽ wã yĩnga, kɩtame tɩ pa wakat fãa la b tõe moon butik-butik soay noy koosem zĩisẽ ye. Ne rẽ fãa, koe-moondb kẽer baooda soay n kõt kasetã be ne manesem sẽn ka yãk wakate. B zĩndeda goeel zug n sɩng sõasg ne neb a taab sẽn yals n na n vʋʋse. Ned sã n wilg t’a rat n bãng n paasame, ne gũusgu, b kõta a soabã seb-vãoog bɩ zʋrnall la b modg n maan segls sẽn na yɩl n lebg n wa ges-a. B sã n kõ kasetã koosgã zĩigẽ babg a yembr minit a wãn poore, b rabda babg a to n tɩ sɩng sõasg ne ned a to be. Yaa vẽeneg tɩ d sã n wa kõt kaset sẽn pa yãk wakat woto, d segd n gũusa neer n da wa maan tɩ puk vẽeneg nebã nifẽ tɩ d moondame ye.

¹⁹ Y sã n pʋʋs nedã bɩ y sɩng sõasg sẽn be yamleoog ne-a. Nedã sã n sak n na n kelg bɩ y maan-a sʋkre, la a sã n gomd bɩ y maag y yĩng n kelg a sẽn yetã neere. Wilg-y tɩ y nanda a tagsgã. Sã n tõe bɩ y sak t’a sẽn yeelã yaa sɩda.

²⁰ Saam-bi-poak talla sõasg sẽn zĩnd yamleoog ne pʋg-yãanga, a sẽn wilg tɩ vɩɩmã lebga toog wʋsgã yĩnga. Zĩig pʋgẽ bala, pagã sakame tɩ yaa woto, tɩ sõasg sẽn yɩ noog pʋgle. Saam-bi-poakã tõog n paama pagã yʋʋr la a adɛrse, n lebg n tɩ ges-a semen kãng pʋgẽ bala.

²¹ Kaset kũun koosem zĩisẽ: Tigims kẽer tara leebg zĩ-bɛd lɛɛbdb sẽn pidẽ wʋsg b moonegã zĩisẽ. Saam-biig ning sẽn get-a moonegã zĩis yellã tõe n segla kart rãmb zĩ-kãens yĩnga. B segd n ninga moonegã zĩis kart dãmb pʋsẽ vẽeneg tɩ b ka segd n lagem leebgã zĩ-kãens ne sakã zĩis a taab n moon ye. Mooneg zĩis a taabẽ, b tõe n lagma leebgã zĩisẽ ne saka zĩis a taab n moone. Sẽn na yɩl tɩ b ra wa yĩm tolengã zĩisẽ kaset kũun yelle, kãsem dãmbã tõe n kosa saam-biis sẽn tar tõog tɩ b moond zĩ-kãens wakat fãa.

²² B sã n kos yãmb tɩ y maan tʋʋm kãngã tɩ y ra zɩ n maan-a pĩnda, bũmb a yembr sẽn na yɩl n paam ‘daood’ yaa y sẽn na n deng n moon koosem zĩ-bõonesẽ, tɩ rẽ poor tɩ y tõog n paam bas-m-yam n moon koosem zĩ-bɛdẽ. (1 Tes. 2:2) Y sã n moond koosmã zĩisẽ, bɩ y ning y futã tɩ yaa wala y rabda Rĩungã Roogẽ. Sã n tõe fãa bɩ y kẽ koosmã zĩigẽ wakat ning neb sẽn ka be a pʋgẽ n daad teedã. Yeel-y tɩ y ratame n gom ne taoor soabã bɩ sẽn get-a koosmã yelle. Tall-y manesem sẽn be yamleoogo, la sẽn yɩɩd fãa ra gom-y n kaoos ye. Ka tɩlae tɩ y kos sugr ye. Koosem zĩis wʋsg pʋsẽ, b minim n deegda raadens wʋsgo, tɩ b mi wakat fãa tɩ neb n na n wa b nengẽ.

²³ Y sã n pʋʋs butik-koaasa poore, y tõe n yeela woto: “Lɛɛbdbã ka tar sẽk ye, tɩ rẽ kɩt tɩ b yir yãab yaa toogo. Yaa rẽ yĩng la d sẽn wa yãmb koosmã zĩigẽ ka n na n kõ-y sebr sẽn tar sʋkr sẽn kɩtd tɩ ned tags sõma wã.” Rẽ poor bɩ y gom zʋrnall ning y sẽn kãabdã zug bilfu.

²⁴ Y sã n sõsd ne taoor soaba, y leb n tõe n yeela woto: “D yãame tɩ lɛɛbdb wʋsg modgdame n na n dɩ kɩbay tɩ seke. Yaoolem Gũusg Gasgã (bɩ Réveillez-vous ! wã) tara sõasg sẽn pak tõnd ned kam fãa.” Wilg-y sõs-kãng sẽn ya a soaba, la y yeel woto n baase: “D mii vẽeneg t’a karengã na n yɩẽ-y-la noogo.”

²⁵ Tʋm-tʋmdb sã n beeme tɩ y mik tɩ zemsame, y tõe n paasame: “Rẽ yĩnga m tõeeme n kell n wilg yãmb tʋm-tʋmdbã mam sẽn togs yãmbã koɛɛg-koɛɛg bɩ?” B sã n kõ-y sor bɩ y tẽeg tɩ y pʋlmame tɩ y na n goma koɛɛg-koɛɛga, dẽnd taoor soabã na n gũudame tɩ y maan wala y sẽn yeelã. Tʋʋm-tʋmdb sã n dat n sɩng sõs-wogdo, yɩta sõma tɩ y bʋʋg-b b yiri.

²⁶ Tẽn-bil a yembrẽ koe-moondb a wãn n naag tigims gĩnd yel-gɛtã n moon butik-butika. Sɩngrẽ wã, koe-moondb kẽer da maanda rabeem, b sẽn zɩ n maan tʋʋm a woto buud yĩnga. La pa kaoos la b rabeema sa tɩ b sɩng n kõt kasetã ne sũ-noog ye. Ka yã n maan lɛɛr la b zoe n gom ne neb 37 la b bas zʋrno rãmb 24 ne seb-bi a 4 ne neb ye. Saam-biig a yembr yeelame tɩ zak-zak tʋʋmdã pʋgẽ, kiuug a yembr pʋgẽ b ka yãt neb sõor sẽn ta wala b sẽn maan butik-butik kasetã n yã wakat bilf pʋgẽ wã ye.

²⁷ D bao soay n moone: Pa ne manesem sẽn sigl pʋgẽ bal la a Zezi kõ kasetã ye. A yelga koe-noogã wakat sẽn zems pʋgẽ fãa. (Mat. 9:9; Luk 19:1-10; Zã 4:6-15) Ges-y koe-moondb kẽer sẽn baood soay to-to n moondẽ.

²⁸ Koe-moondb kẽer minimame n moond roagdb sẽn be lekoll sɛɛgẽ n gũud b kambã. Roagdb wʋsg sẽn wat minit 20 nanand tɩ wakatã yaool n ta wã yĩngã, sẽk bee b sẽn tõe n tũnug ne n sõs ne-b sõasg sẽn be yamleoog sẽn tik Gʋlsg Sõamyã zugu.

²⁹ So-pakdb wʋsg modgdame n tʋgd n yãt neba, b sẽn mi tɩ bũmb yell la b gom tõnd zʋrno rãmbã pʋsẽ tɩ tõe n pak-b n yɩɩdã. Wala makre, saam-bi-poak n kẽng yẽ tigingã mooneg zĩigẽ lekoll dãmb a yoobẽ n tɩ kãab yʋʋmd 1995, yʋʋm-sar kiuug rasem 22 Réveillez-vous ! wã sẽn gomd “Lekoll dãmb sẽn be yell pʋgẽ wã” yellã tɩ nebã sak n deeg-b sõma. A leb n talla zʋrno rãmb sẽn gomd zak vɩɩm la kamb pãng maaneg yell n kẽng goosneema sɛrvɩɩs nins sẽn get-b zak yɛlã yellã zĩigẽ, tɩ b kos-a t’a sã n paam sɛb sẽn tɩ loe ne gom-zut a woto buud bɩ a tall n wa ne. Yʋʋmd 1996, tʋʋlg kiuug rasem a 8 Réveillez-vous ! wã goma tʋʋma kaalem yelle. Saam-bi-poakã sẽn tall-b n kẽ tʋʋma baoob biruẽ wã, nebã saka zʋrnallã sõma wʋsg hal t’a wilg t’a “ra pa tẽed woto baa bilf ye.”

³⁰ Tigims gĩn sull yel-gɛt a yembr wilgame tɩ yẽ ne a pagã sã n kẽng n na n tɩ ra teedo, b minim n tũnugda ne rẽ n kõt kasetã. B kẽngda mangasẽ wã wakat ning a sẽn ka pid ne neba, tɩ neb nins sẽn be mangasã pʋgẽ wã pa kẽnd ne yãgbã. B wilgame tɩ b paama sõss wʋsg sẽn zĩnd yamleoog ne nebã.

³¹ Koe-moondb wʋsg wilgame tɩ b paama biis sẽn yaa sõma b sẽn da wa n kõt kasetã fut pɛgb zĩisẽ wã. B pa bas zʋrno rãmb wakat ning neb sẽn ka be be wã bal ye. B ratame n taas nebã koe-noogã. Rẽ n so tɩ b modgd n na n gom ne neb nins sẽn wat futã pɛgb zĩigẽ wã.

³² Zĩis kẽere, koe-moondb la b yãk n kõ sor tɩ b tõe n kõ kasetã sɩls yiya. Wakat ninga b paama zu-noog n yã neb sẽn yit tẽnsẽ a Zeova kaset rãmbã sẽn ka waoogẽ n kõ-b kasetã. B sã n paam ned sẽn dat n bãng n paase, b kãabda seb-vãoog bɩ zʋrno rãmba.

³³ Tigingã mooneg zĩig ning b sẽn ka paamd sor n kõ kasetã neb nins sẽn be ro-bɛdẽ b sẽn gũud n ka basd ned yaar t’a kẽ wã pʋgẽ, ne yam, koe-moondb kẽer kõta ro-gũudbã la ro-kãens yel-gɛtbã kasetã. Yaa woto me la b maand ne zag-bɛd nins neb sẽn so tɩ b gũudẽ tɩ ned yaar ka tõe n kẽ wã. Tigims gĩnd yel-gɛt ne koe-moondb a wãn kẽngame n tɩ kõ kasetã woto zags a woto buud a yopoe pʋsẽ. Wakat fãa, b togsa rotã yel-gɛt tɩ baa ne b sẽn ka tõe n tɩ yã nebã b zagsẽ wa b sẽn da minim n maand raasenkamã, b ka rat t’a kong yaoolem zʋrno rãmbã ye. Zĩ-kãensã a yopoe wã fãa yel-gɛtb sak n deega zʋrno rãmbã la b kos-b tɩ b lebg n wa ne nindaar zʋrno rãmbã me! Rẽ poore b telefõna neb nins sẽn be ro-kãens pʋsẽ wã. Y tõe n paama tagsa sẽn yaa sõma kaset kũun ne telefõna wɛɛngẽ gom-zug ning sẽn yaa “Kaset kũun ne telefõn sẽn womd biisi” sẽn be yʋʋmd 2001, wao-fugdg kiuug Rĩungã Tʋʋmd seb-paasdem pʋgẽ (ne farende).

³⁴ Modg-y n moon zĩig fãa: Vɩɩmd tɩ zems ne d sẽn dɩk d mens n kõ Wẽnnaamã baoodame tɩ d moon Rĩungã koɛɛg ne yãgbo. Rɩlla d bas wakat ning sẽn zems ne tõndã n modg n kẽng nebã nengẽ wakat ning sẽn zems ne-ã, sẽn na yɩl n ‘fãag kẽere.’ A Zeova sõgen dãmb nins fãa sẽn dɩk b mens n kõ wã ratame n tõog n yeel wala tʋm-tʋmd a Poll woto: “Mam maanda bũmb fãa Koe-nooga yĩnga tɩ mam tõe n paam pʋɩɩr ne Koe-noogo.”—1 Kor. 9:22, 23.

³⁵ A Poll leb n gʋlsa woto: “Woto, mam na n maana sũ-noog n yɩɩd m pãng komsma pʋgẽ tɩ Kirist pãng pid maam. . . . Tɩ bõe, mam sẽn ka be pãng wakate, yaa wakat kãng la mam paamd pãnga.” (2 Kor. 12:9, 10) Woto rat n yeelame tɩ tõnd ned ba a yembr ka tõe n maan tʋʋm kãng ne a meng pãng ye. D segd n pʋʋsa a Zeova n kos a vʋʋsem sõngã sẽn tar pãngã. D sã n pʋʋs Wẽnnaam n kos pãng fãa, d tõe n kɩsa sɩd t’a na n sɩd saka d pʋʋsgã. Woto, tõnd nonglmã ne nebã na n tus-d lame tɩ d bao soay n moon-b koe-noogã, zĩig ning fãa d sẽn tõe n yã-ba. Bõe yĩng tɩ y ka na n mak n tũ sagls nins sẽn be seb-paasdem kãngã pʋgẽ wã a yembr semen ning sẽn watã?