“Zab[-y] tẽeb zabr sõama”
1 Tʋm-tʋmd a Poll sagla a Tɩmote t’a “zab tẽeb zabr sõama.” (1 Tɩm. 6:12) A Poll meng saka gom-kãensã a vɩɩmã pʋgẽ. Kaoosg zugẽ a vɩɩmã pʋgẽ, a goma ne bas-m-yam n yeel t’a mengã zaba zabr sõma. (2 Tɩm. 4:6-8) Zĩis fãa wɛɛngẽ, a pidsa a ministɛɛrã ne yẽesem, raoodo, la tõog-toogo. D sã n dɩk togs-n-taar ne a Polle, d tõe n talla bas-m-yam a woto me d sũur pʋgẽ tɩ d maanda d sẽn tõe tɛka, d kiris-neb tẽebã zabr pʋgẽ.
2 Maan-y modgr ning sẽn yaa tɩlae wã: A Poll tʋma wʋsg ministɛɛrã pʋgẽ. (1 Kor. 15:10) Yaa woto me la d maanda, wakat ning d sẽn baood neb nins fãa sẽn zemsã tõnd koe-moonegã zĩigẽ wã. (Mat. 10:11) Sẽn na yɩl n yã bãmb kẽere, tõeeme tɩ rɩlla d yik pĩnd n tɩ kõ neb nins d sẽn segd sorã zugã kaseto. Bɩ tõeeme n dat n yeel tɩ d moon nebã wĩnd-kaoorã baasgẽ bɩ zaabre, b sã n wa lebg n wa b yiy poore.
3 Rẽ baoodame tɩ d tall kibl-m-meng la geelg-n-tʋm sẽn yaa sõma sẽn na yɩl n kẽng lɛɛre, d sã n wa yit ne d sebrã zãmsg sull neb koe-moonegã yĩnga. Sẽn yɩɩd fãa, Sebr Zãmsg taoor-lʋɩtbã segd n kõo mak-sõng n yɩ neb sẽn wat lɛɛre. D tara naneb wʋsg ne modgr ning tõnd tigingã koe-moondb la zags neb sẽn maandã, n yit zĩ-zãrgẽ n watẽ, n yaool n tat lɛɛrã. Modgr sõma wakat fãa la meng yɛl siglg a woto yaa mak-sõma sẽn segd ne tũubu.
4 D sũurã segd n tus-d lame tɩ d pʋg ratem nins fãa d sẽn yãtã. Baa d sã n bas sebr ne ned sorã zug bɩ ne manesem sẽn ka yãk wakate, d segdame n modg n paam nedã adɛrs bɩ a telefõn nimero. Rẽ poore, d tõe n bao a soabã n bɩɩs a ratmã la d modg n sɩng Biibl zãmsg ne-a.
5 Yit-y koe-moonegã n ka vaandẽ ye: A Poll ra moondame n ka vaandẽ la a maand dẽ sõma zãnga. (Rom 15:19) La yãmb yẽ? Yãmb kẽesda y meng ministɛɛrã pʋgẽ n ka vaandẽ bɩ? Ki-kãngã yãmb zoe n yii koe-noogã mooneg bɩ? Tigingã sebr zãmsg taoor lʋɩtb ratame n yã tɩ b sullã ned fãa moon koe-noogã sa-sik kiuugã. B na n sõng-y lame tɩ y maan woto.
6 Tõnd sã n tũ a Poll makrã n teel koe-noogã zãng-zãnga, d na n ket n ‘zabda tẽeb zabrã sõma.’