Kɩt-y tɩ neba bãng a Zeova yʋʋrã la a tʋʋmã
1 “Bɩ y waoog [a Zeova, NW ] n kos ne bãmb yʋʋre, wilg-y bu-zẽmsã bãmb pãnga tʋʋma. . . . Zusoaba baoodba sũyã na n yɩɩ noodo.” (Yɩɩl 105:1, 3) Yɩɩl gʋlsdã sẽn gʋls gom-kãensã wã goma a Zeova ne a “tʋʋma” yell tɩ rẽ kõ-a sũ-noog wʋsgo. Tʋʋm-bʋse? Sãmbg sẽn ka be, yaa b rãmb nins sẽn tɩ loe ne Wẽnnaam naamã sẽn tar ziirã la ne ‘bãmb fãagr koɛɛgã.’—Yɩɩl 96:2, 3; 145:11, 12.
2 Yʋʋmd 2001 wã Tẽegrã wakat sẽn kolgdã yĩngã, d bee bʋʋm n na n maan sũ-noog wʋsg ne a Zeova sẽn tʋmd to-to ne tõndã. Bõe yĩnga? Soaalã Zaabr Dɩɩb la bũmb ning sẽn sɩd yaa kãseng n yɩɩd kiris-neb hakɩkã sẽn maand yʋʋmdã pʋgẽ. Bũmb a to ka le be b sẽn maand yʋʋmdã pʋgẽ t’a yõod ta Tẽegrã ye. Sasa kãng tẽegda tõnd bũmb ning a Zeova la a Zezi sẽn maan sẽn na yɩl tɩ tõnd paam fãagrã. Dẽ, pa lingr tɩ d gũudẽ tɩ Tẽegrã wakat bɩ d wɩng ne koe-moonegã n paase, d sã n wa kɩtd tɩ neba bãngd ‘fãagr koɛɛgã.’
3 Y na n yɩɩ sõngr so-pakd bɩ? Rɩẽ, saam-biis la saam-bi-pogs wʋsg n yɩ sõngr so-pakdba, hal tɩ b sõorã yɩɩd d sẽn zoe n paam pĩnda. D tõe n wɩnga ne koe-moonegã tʋʋmd tʋʋlg la tʋʋl-nif kiisã pʋse rõandã me bɩ? Tʋʋlg kiuugã tara sib a nu, tɩ tʋʋl-nif kiuugã tar hat rãmb a nu. Koe-moondb wʋsg sẽn maand b nug-tʋʋmd wakat fãa yãame tɩ b tõe n yɩɩ sõngr so-pakdba. La rẽ yaa b sẽn na n moon daarã tõr sibrã la hatã. Sõngr so-pakd segd n moona lɛɛr 12 rasem a yopoe fãa n tõog n paam lɛɛr 50 kiuugã pʋgẽ. Maag-y y yĩng n ges saglsã sẽn be zĩ-gũbrã pʋgẽ seb-neng a 4 pʋgẽ wã. Y yãa saglg a pʋgẽ y sẽn tõe n tũ bɩ? Y sã n pa yã, yãmb mengã tõe n manega y sẽkã sẽn na yɩl n tõog n yɩ sõngr so-pakd tʋʋlg la tʋʋl-nif kiisã sẽn watã.
4 Yaa masã la kẽem dãmbã segd n sɩng n daool koe-moondbã tɩ b tʋll n moon koe-noogã n paase. Rɩẽ, tiging a yembr pʋgẽ, kẽem dãmbã la ministɛɛr sõgen dãmbã fãa maana sõngr so-pakrã tʋʋmde. Tiging kãng pʋgẽ, koe-moondb 121 wã sʋka, bãmb 64 n maan sõngr so-pakrã tʋʋl-nif kiuugã! Yaa ne sũ-noog me la tigingã leb n paam tɩ koe-moondb a yoob sẽn ka reeg lisg sɩng mooneg tʋʋlg la tʋʋl-nif kiisã. Sɩda, yaa wakat kãngã n zems n yɩɩd tɩ kambã la nin-paalsã kos kẽem dãmbã tɩ b ges b sã n tõeeme n naag tigingã n kõt kasetã.
5 D sã n modg n paase, d paamda barka: Tigims nins sẽn yãkd bõn-datɩ sẽn yaa zall la sẽn modgd n paasdẽ wã paamda bark wʋsgo. Tigims kẽer tõeeme n modg n moon zĩis nins b sẽn ka moondẽ wʋsgã n yɩɩda. B tõe n tũnuga ne kaset kũun soay a taaba. B leb n tõeeme me n kõ kaset ne telefõna. Woto b tõe n paama sẽn ka-b yiyã la neb nins b sẽn ka tõe n yã nana-nana wã.
6 Bãas bɩ kʋʋlem tõe n kɩtame tɩ yɩ tɩlae tɩ ned pa moon koe-noogã wa a sẽn tõe tɛk bɩ? Pa wakat fãa la yaa woto ye. Wala makre, yʋʋm 86 saam-bi-poak n da tar kãnsɛɛre. Baa ne a nao wã sẽn modã, a yɩɩ sõngr so-pakd rɩẽ tʋʋl-nif kiuugã. A tũnuga ne telefõnã n tõog n moon koe-noogã sõma-sõma. Dẽ a tõog n pẽga a Zeova n paase. Woto kenga yẽ ne tigingã neb raoodo.
7 Segl-y sõma Tẽegrã yĩnga: Rõandã Tẽegrã na n maana tʋʋl-nif kiuugã rasem a 8. Sẽn yaa hat raarã neb wʋsg segd n tõog n waame. Tõnd sã n maan d sẽn segd n maanã, d tõeeme n paam tɩ neba wa n yɩɩg pĩndã. Pipi tõnd mengã segd n kẽnga Tẽegrã. Yiibu, d segd n boola neb a taabã tɩ b wa naag tõnd Tẽegrẽ wã. Ãnd dãmb la d segd n boole?
8 Ges-y neb nins sẽn wilg nonglem ne sɩdã yʋy, y sẽn gʋls n bĩngã, baa y sã n ka minim n tʋgd n get-b wakat fãa. Semen a yembr bɩ a yiib sẽn deng Tẽegrã bɩ y modg n tɩ bool nin-kãensã fãa. Y sã n tõeyã, bɩ y togs neb nins sẽn tʋll n wa wã tɩ y na n sõng-b lame tɩ b paam rɩkre.
9 Tigims kẽer pʋsẽ, b ka tõogd n pʋɩ Tẽegrẽ wã boolg sɛb tɩ sa ye. Tigimsã sekertɛɛr dãmb segd n modgame tɩ tigingã neb fãa paam Tẽegrẽ wã boolg sɛb pĩnd-pĩnda, sẽn na yɩl tɩ b tõog n pʋɩ-ba. Y sã n data y tõeeme n gʋls Tẽegrã maaneg wakat la a zĩig boolgã sebr zug neere. Tẽegrã sã n na n maana Rĩungã roogẽ, y tõe n naaga sebr sẽn tar Rĩungã roog adɛrs ne boolgã sebr n kɩs a soabã. D tẽegd-y lame tɩ naoor wʋsgo, d segd n kɩsa Tẽegrẽ wã boolg sebr nedã meng a toore.
10 Tẽeg-y neb nins sẽn ka le moondã yelle: Biibl karen-biig sã n dɩk a meng n kõ a Zeova n deeg lisgu, rẽ yaa bũmb sẽn kõt sũ-noogo. Yʋʋmd fãa neb kẽer sẽn be tõnd sʋkã basdame n ka le wat tigissã ye. B leb n ka le togsd neb a taabã a Zeova yʋʋrã la a tʋʋmã ye. D bee bʋʋm n na n maan yɩɩr b yĩnga. Sẽn ka le moond-b wʋsg sẽn yɩɩd ka bas sɩdã ye. La b tõeeme n ka le moondẽ, raood komsgo, yɛl b sẽn tare, bɩ vɩɩmã zu-loees a taab yĩnga. (Mat. 13:20-22) Neb nins tẽeb sẽn lebg kom-komã baooda sõngr sẽn na yɩl n lebg n wa tigingã pʋgẽ t’a Sʋɩtãan siglgã nan da rɩ-b ye. (1 Pɩɛ. 5:8) Tẽegrã wakate, d ratame n modg n sõng sẽn ka le moond-bã, la sẽn pidsd yɛl nins b sẽn baoodã, tɩ b leb n sɩng koe-noogã moonego.
11 Tigingã sekertɛɛr segd n wilga sebr zãmsg taoor-lʋɩtbã neb nins sẽn be bãmb sullẽ wã n ka le moondẽ wã. Tigingã Tʋʋmd Sull na n lʋɩɩ taoor n dɩk segls tɩ neb nins fãa sẽn ka le moondã paam gesgo. B sã n dɩk sard tɩ ned sẽn ka le moond segd n paama Biibl zãmsgo, tʋʋmdã sull segd n yãka ned ning sẽn zems n yɩɩd n tõe n zãms a soabã. Tõeeme tɩ ka tɩlae tɩ b maan zãmsgã n kaoos wʋsg ye. Baa ne rẽ, sẽn maand-a zãmsgã tõeeme n sõd wakatã, lebg-n-tɩ-ges rãmbã, la Biibl zãmsgã a sẽn maandã.
12 Rɩẽ tʋʋl-nif kiuugã, saam-bi-poak sẽn da moond zak-zak yãa bi-bɩɩg sor zug n kãab-a tõnd periodik rãmbã. Bi-bɩɩgã togsame tɩ yẽ pagã yaa Kaset soab sẽn ka le moonda. A sʋka Rĩungã Roog sẽn beẽ, la a kos saam-bi-poakã t’a wa ges yẽ ne a pagã. Rẽ kɩtame tɩ raoã ne a pagã wa tigisg ning sẽn pʋglã la b sak Biibl zãmsgo.
13 Segl-y y mens n moon n paase! Yɩɩl-gʋlsdã sẽn yeel tɩ d segd n kɩtame tɩ neba bãng a Zeova yʋʋrã la a tʋʋmã leb n paasa woto: “Bɩ y yɩɩl bãmb yĩnga, yɩɩl-y ne yʋʋm teed bãmb yĩnga n togs bãmb [tʋʋm kãsemsã, NW ] fãa. Bɩ y maan sũ-noog bãmb yʋ-sõnga yĩnga.” (Yɩɩl 105:2, 3) Bɩ d wilg t’a Zeova yʋ-kãsengã la a “tʋʋm kãsemsã” yell pak-d lame. D maanda woto, d sẽn na n modg n paas koe-noogã mooneg pʋgẽ, n maan tɩ Tẽegrã wakat kãngã yɩ kãseng n yɩɩg a taabã fãa.
[Zĩ-gũbri, seb-neng a 4]
Soay toɛ-toɛy sẽn na yɩl n paam lɛɛr 12 rasem a yopoe fãa, sõngr so-pakrã yĩnga
Daarã Lɛɛr dãmba
Tẽne 1 2 − −
Talaato 1 − 3 −
Arba 1 2 − 5
Lamusa 1 − 3 −
Arzũma 1 2 − −
Sibri 5 4 3 5
Hato 2 2 3 2
Zãnga: 12 12 12 12
Saglg bee ka yãmb sẽn tõe n tũ bɩ? Sã n pa be, bɩ y bao y yam sẽka