Kõ-y-b kasetã n paase
1 D sã n moond koe-noogã d mi n segda neb sẽn pa vɩ tõnd moonegã zĩigẽ bɩ sẽn gomd buud-gom-zẽnga, wall mugsi. Sãnda d sẽn sõs ne sõma Biiblã zug tõeeme n wa ye pa be tõnd moonegã zĩigẽ ye. Wãn-wãn la d tõe n kɩt tɩ nin-kãens paam kasetã n paase? Yaa d sẽn na n tʋm ne Veuillez suivre l’intérêt (S-43) sebrã.
2 Nebã nong n kelgda koe-noogã n yɩɩda, b sã n wʋmd-a b buudã gomd pʋgẽ. (Tʋʋ. 22:1, 2) Rẽ n so tɩ naoor wʋsgo, d sã n seg ned sẽn gomd buud-gom-zẽng bɩ d tog n pids sebrã, baa a soabã sã n pa tall naneb ne Rĩungã koɛɛga. La zĩig ning neb wʋsg sẽn wʋmd buud-gom-zẽngã sẽn paamd kasetã wakat fãa b buudã gomd pʋgẽ wã, ned sã n wilg t’a tʋllame n bãng n paase, pa tɩlae tɩ d pids sebrã ye.
3 Sebrã pidsgu: Maan-y yam n bãng a soabã yʋʋre, a adɛrs la a telefõn nimero. Wilg-y a sẽn tall naneb ne koɛɛgã to-to wã, wakat ning b sẽn tõe n tɩ seg-a, sebr ning a sẽn deegã wall a sẽn kosã, la buud-gomd ning a soabã sẽn wʋmd n yɩɩdã. Y sã n pids sebrã n sa bɩ y kɩs-a tigingã sekertɛɛr t’a tool-a tiging wall sull ning sẽn na n ges a soabã ratmã yellã.
4 Sebrã toolgo: Sekertɛɛrã sã n pa mi tiging bɩ sull ning a sẽn segd n tool sebrã bɩ a sã n pa tar b adɛrs rãmbã, a tõe n telefõna Tʋʋmdã will biru ning sẽn get-a moonegã zĩis yellã n paam kibay nins a sẽn datã. Pa tɩlae tɩ d wilg galʋ-tẽng yel-gɛtã n yaool n tool sebrã ye.
5 Tiging bɩ sull sã n deeg Veuillez suivre l’intérêt sebrã fãa, b segd n baoa nedã zĩig tao-tao. D sã n mao n maan bũmb ning d sẽn segd n maanã, d tõe n talla bas-m-yam t’a Zeova na n paka neb nins fãa sẽn tar yam-sõng vɩɩm sẽn-kõn-sa wã yĩngã sũyã.—Tʋʋ. 13:48.