D tʋm ne d sẽkã sõma koe-moonegã pʋgẽ
1 D tara tʋʋm wʋsg n na n tʋm koɛɛgã mooneg pʋgẽ, la sẽkã sẽn ketã yaool n paoodame. (Zã 4:35; 1 Kor. 7:29) D sã n deng n segl d mens sõma, d na n tõog n tʋma ne sẽk ning d sẽn yãk koe-moonegã yĩngã sõma.
2 D segl d mense: Nand tɩ d kẽng tigisg ning b sẽn maand koɛɛgã mooneg yĩngã, d segd n tẽeg n dɩka sɛb nins d sẽn dat n tall n moonã, la d segl d sẽn na n yeel bũmb ning n kãab nebã sɛbã me sõma. B sã n wa pʋʋs n sa tigisgã poore, bɩ d tar koe-moonegã zĩigẽ kẽnd bala. Woto na n kɩtame tɩ tõnd ne d tũud-n-taasã tʋm ne sẽkã sõma koe-moonegã pʋgẽ.
3 B sã n yãk-d tɩ d lʋɩ taoor n maan tigisg ning b sẽn maand koɛɛgã mooneg yĩngã, bɩ d ra bas tɩ lɛɛrã loog tɩ d yaool n sɩng ye. D modg tɩ tigisgã ra yɩɩg minit 10 wall 15 ye. Nand tɩ d yeel nebã tɩ b tõe n sɩnga koɛɛgã moonego, bɩ d bao n bãng ned kam fãa sã n mii a sẽn na n moon ne ned ning la zĩig ning a sẽn na n moone.
4 D sã n wa moond koɛɛgã: Tigisgã sã n sa bɩ d kẽng moonegã zĩigẽ tao-tao la d ra yals ye. Sã n mik tɩ tõeeme bɩ d sɩng ne zak-zak moonegã la d yaool n lebg n tɩ ges nebã la d kẽng Biibl zãmsdbã nengẽ. D sã n mi tɩ d pa na n moon n kaoose, bɩ d togs saam-biig ning sẽn maan tigisgã. A tõe n kɩtame tɩ tõnd ne ned a to me sẽn pa na n moon n kaoos tũ taaba. Tõnd ne koe-moondb a taab sã n moond zĩig a yembre, d sã n wa seg ned n sɩng sõsg ne a soabã, bɩ d tẽeg tɩ koe-moondb a taabã gũuda tõnd la d ra kaoos ye. A soabã sã n wẽed no-koeemd ne tõndo, d tõe n maana yam n kos sor n looge. La sã n mikame tɩ yaa ned sẽn dat n bãng n paase, d tõe n dɩka not rãmb sẽn na yɩl n lebg n wa sõs ne-a nindaare.—Mat. 10:11.
5 Y sã n na n lebg n tɩ ges nebã, y tõe n deng n tɩ gesa neb nins sẽn be yambẽ wã n yaool n tɩ ges neb nins sẽn be zĩis a taabã, sẽn na yɩl n da wa kẽn n sãam y sẽkã ye. Y tõe n wẽe bãng n sok kẽer n ges b sã n be b zagsẽ la y yaool n kẽnge.—Yel. 21:5.
6 D vɩɩ wakat ning pʋgẽ d sẽn segd n moon koɛɛgã wʋsgo. (Mat. 9: 37, 38) Ka la bilfu, moonegã na n saame. Dẽnd d segd n modg n tʋma ne d sẽkã sõma koɛɛgã mooneg wakate.