Is-​Saħħa

Jimpurtah Alla minn kif nieħdu ħsieb lil ġisimna?

“Tkunx fost dawk li jixorbu ħafna nbid, fost dawk li għandhom kilba għal-​laħam.”—Proverbji 23:20.

GĦALA HU IMPORTANTI?

Il-​Bibbja mhijiex ktieb mediku; lanqas ma tikkontrolla kull aspett tal-​imġiba umana. Xorta waħda, int tistaʼ tibbenefika jekk tifhem il-​ħarsa t’Alla lejn is-​saħħa kif tidher fil-​Bibbja.

DAK LI TGĦID IL-​BIBBJA

Diversi siltiet tal-​Bibbja jgħinuna nifhmu kif iħossu Alla dwar il-​mod kif nieħdu ħsieb lil ġisimna. Pereżempju, il-​Bibbja tikkundanna affarijiet bħax-​xorb żejjed u l-​kilba għall-​ikel. (Proverbji 23:20) Il-​Liġi t’Alla li ngħatat lil Iżrael tal-​qedem kien fiha istruzzjonijiet li kienu se jikkontrollaw il-​mard u f’xi każi saħansitra jgħinu biex jiġi skansat. Il-​Liġi kien fiha wkoll regoli speċifiċi taʼ sigurtà għall-​prevenzjoni taʼ korrimenti. (Dewteronomju 22:8) B’mod ċar, il-​Bibbja tinkuraġġina biex nieħdu ħsieb lil ġisimna u nieħdu passi responsabbli biex nipproteġu saħħitna.

Skont il-​Bibbja, għala nimirdu?

“Permezz taʼ bniedem wieħed id-​dnub daħal fid-​dinja, u permezz tad-​dnub il-​mewt.”​—Rumani 5:12.

DAK LI JGĦIDU N-​NIES

Ħafna jemmnu li l-​mard hu sempliċement riżultat ikrah tal-​evoluzzjoni umana. Oħrajn jaħsbu li forzi misterjużi, bħal spirti mill-​agħar, huma l-​kaġun tal-​problemi tas-​saħħa tagħna.

DAK LI TGĦID IL-​BIBBJA

Skont il-​Bibbja, aħna nimirdu minħabba r-​ribelljoni tal-​ewwel bnedmin kontra Alla. (Rumani 5:12) Qabel ma rribellaw, l-​ewwel ġenituri tagħna, Adam u Eva, gawdew saħħa perfetta. Kienu jafu li kienu se jmutu jekk jitbiegħdu mill-​ħarsien kollu mħabba t’Alla. (Ġenesi 2:16, 17) Xorta waħda, dawn minn jeddhom qatgħu l-​ħbiberija tagħhom m’Alla u tilfu l-​perfezzjoni.a

Wara li Adam u Eva tilfu l-​perfezzjoni, għaddew l-​imperfezzjoni lilna. Għaldaqstant, minkejja l-​isforzi kollha biex jitneħħa l-​mard tal-​bnedmin, aħna xorta nimirdu.

X’TISTAʼ TAGĦMEL INT?

Il-​Bibbja tgħallem li jekk tobdi l-​prinċipji għaqlin t’Alla, se tiżviluppa relazzjoni tajba miegħu. Minħabba f’hekk, maż-​żmien se tgawdi saħħa perfetta f’ġenna tal-​art. (Isaija 33:24) Alla jwiegħed li se jneħħi l-​uġigħ, il-​mard, u l-​mewt.—Rivelazzjoni 21:3, 4.

Tiskuraġġixxi l-​Bibbja l-​kura medika?

“Nies f’saħħithom m’għandhomx bżonn tabib, imma l-​morda iva.”​—Mattew 9:12.

DAK LI JGĦIDU N-​NIES

Xi wħud jippreferu l-​fejqan spiritwali (magħruf ukoll bħala faith healing) milli l-​kura medika.

DAK LI TGĦID IL-​BIBBJA

Alla ppermetta li jkun hemm nies li jifhmu fil-​qasam mediku biex jaħdmu fost niesu fi żmien il-​Bibbja. (Ġenesi 38:28; Kolossin 4:14) M’hemm xejn fil-​Bibbja li jindika li Alla m’approvax l-​użu tagħhom taʼ pjanti mediċinali, ingwenti, dieti ordnati mit-​tabib, jew kuri taʼ saħħa oħrajn. Fil-​fatt, Ġesù rrikonoxxa li “nies f’saħħithom m’għandhomx bżonn tabib, imma l-​morda iva.”—Mattew 9:12.

Madankollu, il-​Bibbja ma tapprovax kull tip taʼ kura. Pereżempju, il-​Bibbja ma tapprovax il-​prattika taʼ żmienna tal-​faith healing. U trattamenti li jinvolvu prattiki spiritistiċi mhumiex approvati minn Alla. (Galatin 5:19-​21) Minbarra l-​prattiki li l-​Bibbja tikkundanna, meta niffaċċjaw il-​mard, ikun għaqli li fil-​pront infittxu kura tas-​saħħa xierqa, jekk tkun disponibbli.