Proklamaturi tas-​Saltna Jirrapportaw

Nilħqu lil Dawk li Diffiċli Tilħaqhom

IX-​XHIEDA TAʼ JEHOVAH jagħmlu ħilithom kollha biex jikkuntattjaw lil kulmin jistgħu bil-​messaġġ tas-​Saltna. Xi drabi jirrikjedi sforz straordinarju biex tilħaq lil dawk li rari jkunu d-​dar. (Mark 13:10) F’dan ir-​rigward, ħu li jaqdi bħala pijunier speċjali f’pajjiż li jinsab fl-​Amerika t’Isfel jirrakkonta l-​esperjenza li ġejja.

“Jum wieħed sirt naf li l-​gvernatur taʼ l-​istat kien se jżur it-​territorju fejn ninsabu inkarigati jien u marti. Peress li hu kien ovvjament wieħed minn dawk li rari ssibhom id-​dar, ktibtlu ittra u magħha bgħattlu diversi pubblikazzjonijiet Bibliċi, flimkien mal-​browxer Alla X’Jirrikjedi Minna? u l-​kotba Mankind’s Search for God u l-​Għarfien Li Jwassal Għall-​Ħajja Taʼ Dejjem. Fl-​ittra tiegħi spjegajtlu l-​iskop taʼ kull pubblikazzjoni.

“Peress li kelli interess li nkun naf x’kienet ir-​reazzjoni tiegħu għal-​letteratura, staqsejt jekk stajtx niltaqaʼ miegħu. Xi ftit ġimgħat wara ngħatajt il-​permess li niltaqaʼ miegħu, u ħadt miegħi kopja tal-​vidjo Jehovah’s Witnesses​—The Organization Behind the Name (Ix-Xhieda taʼ Jehovah—L-​Organizzazzjoni Wara l-​Isem). Il-​laqgħa damet sejra xi sagħtejn. Wara li rajt il-​vidjo mal-​gvernatur, staqsejtu x’jaħseb dwaru. Hu weġibni: ‘M’hawnx organizzazzjoni oħra bħal tagħkom fuq l-​art. Nixtieq kelli nies bħalkom li jistgħu jgħinuni nwettaq il-​proġetti tal-​gvern tiegħi!’ Imbagħad hu staqsieni jekk qattx irnexxieli mmur sal-​kwartieri ġenerali taʼ l-​organizzazzjoni tagħna. Jien għedtlu li għalkemm kienet il-​mira tiegħi li nagħmel dan minn meta kelli 14-il sena, kienet għadha qatt ma ġietni l-​opportunità biex inżur il-​kwartieri ġenerali fi Brooklyn, New York. Kienet waħda minn dawk il-​miri li huma diffiċli biex tilħaqhom. Għal mument hu ċċassa lejja. Imbagħad qalli li ried jagħtini dik l-​opportunità. Ħa ħsieb il-​permessi legali u tana żewġ biljetti taʼ l-​ajru bħala rigal!

“Il-​gvernatur issa jirċievi r-​rivisti t-​Torri taʼ l-​Għassa u Stenbaħ! b’mod regulari. Nittamaw li dalwaqt inkunu nistgħu nibdew studju tal-​Bibbja miegħu.”