Tgħallimt Kemm Hi Prezzjuża l-​Ħajja

KIENET L-​GĦODWA TAS-​16 T’APRIL, 2007. Hekk kif tgeddist f’rokna t’uffiċċju fit-​tielet sular f’Norris Hall li tinsab fil-​kampus taʼ l-​Istitut Politekniku u l-​Università taʼ l-​Istat taʼ Virġinja, jew il-​Virginia Tech, erġajt ġejt imfakkar dwar kemm għandna nkunu grati għal kull ġurnata taʼ ħajja prezzjuża li jkollna.

Kont fl-​uffiċċju tiegħi qed illesti ħalli mmur fit-​tieni sular biex niġbor il-​posta tiegħi. Wieħed professur ġie ħdejja u staqsieni mmur fl-​uffiċċju tiegħu ħalli ngħinu bi problema li kellu fuq il-​kompjuter. Hekk kif dħalna fl-​uffiċċju tiegħu, smajna ħafna sparar fit-​tieni sular. Mingħajr ma ntbaħna x’kien qed jiġri, aħna għaġġilna lejn l-​uffiċċju tiegħu, sakkarna l-​bieb, u stennejna b’ansjetà ħalli naraw x’kien se jiġri fil-​minuti li kien imiss taʼ ħajjitna. Jien sibt kenn f’rokna u ftaħt qalbi m’Alla Ġeħova fit-​talb, u tlabtu għall-​gwida tiegħu ħalli niffaċċja kwalunkwe ħaġa li kienet se tiġri.

Hekk kif konna qed nistennew, ftakart fi ġrajja li kelli 15-il sena qabel. Kont naħdem bħala mekkanik f’ħanut fejn isewwu l-​karozzi. Sieħbi tax-​xogħol kien qed iżomm f’idu landa żgħira tal-​petrol u din ħadet in-​nar. Bil-​ġenn, hu bla ħsieb tefaʼ l-​landa bin-​nar jaqbad f’wiċċi! Jien blajt id-​dħaħen tan-​nar u sofrejt minn ħruq tat-​tieni u t-​tielet grad fin-​naħa taʼ fuq taʼ ġismi. Ittiħidt bil-​ħelikopter fi sptar li jispeċjalizza fil-​kura tal-​ġrieħi minħabba l-​ħruq u bqajt hemm fis-​sezzjoni tal-​kura intensiva għal tliet xhur u nofs, niġġieled għal ħajti. Wara ħames xhur taʼ kura u riabilitazzjoni, stajt immur lura d-​dar, sempliċement grat talli għadni ħaj. Din l-​esperjenza għallmitni biex inqis kull ġurnata taʼ ħajti bħala waħda prezzjuża. Ukoll saħħitli d-​determinazzjoni tiegħi biex nuża ħajti fis-​servizz tal-​wieħed li tani din il-​ħajja, Alla Ġeħova—bħala wieħed mix-​Xhieda tiegħu.—Salm 90:12; Isaija 43:10.

Peress li ma stajtx naħdem bħala mekkanik tal-​karozzi minħabba l-​komplikazzjonijiet tal-​ġrieħi li ġarrabt, jien tgħallimt naħdem bil-​kompjuters u ġejt impjegat mill-​Virginia Tech. Din hija r-​raġuni għala kont f’Norris Hall dik l-​għodwa.

Hekk kif kompla l-​isparar, aħna bilkemm irrealizzajna li l-​iktar sparatura qattiela fl-​istorja Amerikana kienet biss sular taħtna. Il-​qtil spiċċa meta l-​wieħed li kien qed jispara qatel lilu nnifsu wara li kien qatel 32 vittma innoċenti. Xi 20 minuta wara li beda dan kollu, aħna smajna l-​pulizija fil-​kuritur. Għajjatnielhom, u huma ħaduna f’post ħieles mill-​periklu.

Din l-​esperjenza tant kerha għallmitni kemm il-​ħajja tgħaddi malajr u kemm hija inċerta. (Ġakbu 4:14) Kemm huwa importanti għalina li nafdaw fid-​Donatur tal-​ħajja, Alla Ġeħova, u li nqisu kull jum taʼ ħajjitna bħala rigal prezzjuż mingħandu!—Salm 23:4; 91:2.

[Sors taʼ l-​Istampa f’paġna 29]

AP Photo/The Roanoke Times, Alan Kim