Ikkultiva Interess Fil-​Ktieb Tgħix Għal Dejjem

¹ Meta mmorru nħabbtu l-​bibien, ġeneralment insibu li n-​nies huma mehdijin bl-​“anzjetajiet taʼ din is-​sistema t’affarijiet.” (Mark 4:19) Niġu ffaċċjati mill-​isfida taʼ li nqajmulhom interess bi preżentazzjoni li ġġagħalhom jaħsbu. Fil-​bidu, il-​biċċa l-​kbira tan-​nies għandhom mnejn ikollhom ftit li xejn interess f’dak li għandna x’ngħidulhom. Jekk nistgħu ngħidulhom xi ħaġa li tolqot lill-​ħajjiet tagħhom, għandu mnejn jirnexxilna nqanqlu xi ftit taʼ l-​interess fil-​messaġġ tas-​Saltna. Mod wieħed taʼ kif nibdew konversazzjonijiet huwa li nagħżlu punti biex nitkellmu b’mod li jappella għan-​nies minn fuq il-​ktieb Tgħix Għal Dejjem. X’tistaʼ tgħid?

² Tistaʼ tuża din il-​preżentazzjoni:

◼ “Kieku kellek il-​qawwa, liema problema taʼ dwejjaq fi żmienna kont tirranġa int? [Stenna tweġiba, u jekk ikun xieraq, aqbel li ħafna nies iħossuhom hekk.] S’issa, il-​mexxejja dinjin jidhru li ftit għandhom suċċess f’li jsibu s-​soluzzjonijiet għall-​ħafna problemi kkumplikati taʼ żmienna. Imma hemm Wieħed li jistaʼ u se jġib tmiem għall-​problemi kollha li qegħdin jifilġu lill-​umanità. Jekk jogħġbok innota x’hawn miktub f’Salm 145:16. [Aqra l-​iskrittura, u irreferi għall-​istampi f’paġni 11-13.] Paragrafu 14 f’paġna 14 iqajjem il-​mistoqsija li għadna kif iddiskutejna u jkompli jistaqsi: ‘Imma dan meta se jiġri?’” Spjega li l-​ktieb se jwieġeb dik il-​mistoqsija, u jekk ikun hemm interess, offri l-​ktieb.

³ Jew tistaʼ tgħid xi ħaġa hekk:

◼ “Forsi taf kemm tħoss vojt ġo fik meta jmutlek xi ħadd li tħobb. X’aktarx li dan ġagħlek tħossok imnikket u bla ħila. Għandek mnejn qgħadt taħseb dwar dawn il-​mistoqsijiet: [Aqra l-​mistoqsijiet f’paragrafu 1 f’paġna 76.] Ma taħsibx li jkun taʼ faraġ li jkollok it-​tweġibiet għal dawn il-​mistoqsijiet? Jistaʼ jinkuraġġik li tkun taf li l-​Bibbja toffri tama ċerta għal dawk li mietu. [Aqra Ġwann 5:​28, 29.] Dan il-​ktieb jgħinna nifhmu l-​kundizzjoni tal-​mejtin u x’tama hemm għall-​futur.” Fil-​qosor irreferi għal kapitli 8 u 20. Jekk jidher li hemm l-​interess, agħti opportunità lill-​inkwilin biex jeżamina l-​ktieb.

⁴ Hemm possibiltà tajba li se tiltaqaʼ m’opportunitajiet biex tagħti xiehda informali. Jekk inhu hekk, tistaʼ fi kliemek tgħid xi ħaġa hekk:

◼ “Id-​dinja mimlija problemi daż-żmien, u int bla dubju għandek il-​problemi tiegħek. Jiddispjaċina ngħidu, jidher li l-​innoċenti jsofru l-​iktar. Taħseb li Alla qatt xi darba se jtemm din is-​sofferenza kollha? [Stenna risposta.] Ħalli nurik Alla x’wiegħed li se jagħmel għal dawk li jaqduh. [Aqra Salm 37:40 u mbagħad iftaħ il-​ktieb Tgħix Għal Dejjem f’paġna 99.] Dan il-​ktieb jispjega għala Alla ppermetta l-​ħażen u kif se jġibu fi tmiem.”

⁵ Jekk int pubblikatur iżgħar, tistaʼ tuża preżentazzjoni bbażata fuq l-​istampi li jinsabu f’paġni 156-8. Tistaʼ tibda billi tistaqsi:

◼ “Tixtieq tgħix f’dinja bħal din? [Stenna risposta.] Kull waħda minn dawn l-​istampi sbieħ hija bbażata fuq wegħda mniżżla fil-​Kelma t’Alla, il-​Bibbja. [Indika r-​referenzi Skritturali.] Il-​ktieb jistaʼ jgħinek issir taf iktar dwar il-​wegħda t’Alla li jagħmel l-​art kollha ġenna. Dan fih informazzjoni li ssalva l-​ħajja u veru jkun vallapena li tieħu l-​ħin biex taqrah.”​—Ġwann 17:3.