Il-​Preparazzjoni​—Iċ-​Ċavetta Għas-​Suċċess

¹ Preparazzjoni minn qabel għall-​ministeru se tgħin lil dak li jkun biex jegħleb xi inċertezza li jistaʼ forsi jħoss f’li jieħu sehem fis-​servizz taʼ l-​għalqa. Hekk kif toqrob lejn il-​bibien, int se tkun taf dak li trid tgħid lill-​inkwilini. Mhux se jkun hemm għalfejn tħossok beżgħan dwar l-​isfidi li tistaʼ tiltaqaʼ magħhom. Lura lejn id-​dar mis-​servizz, int se tħossok inkuraġġit, billi tkun taf li għamilt sforz kbir fil-​ministeru. Iva, preparazzjoni bir-​reqqa hija ċ-​ċavetta biex insinnu s-​snajja tagħna taʼ l-​ippridkar u tat-​tagħlim.

² Pawlu enfasizza t-​tħejjija billi ħeġġiġna biex ikollna ‘saqajna mxeddin bit-​tagħmir taʼ l-​aħbar tajba taʼ paċi.’ (Ef. 6:15) Dan jinkludi li nippreparaw lil moħħna u lil qalbna kif ukoll li niksbu ħarsa pożittiva u li nkunu lesti għax-​xogħol mill-​qalb. Meta nkunu ppreparati biex naqsmu l-​verità m’oħrajn, il-​ħidma tagħna se tiġi ppremjata bil-​frott tas-​Saltna, u dan jagħmilna henjin.​—Atti 20:35.

³ Kif Wieħed Għandu Jipprepara Għax-​Xogħol Taʼ L-​Ippridkar: Irridu nagħżlu preżentazzjoni li nħossuna komdi biha, forsi minn fost dawk issuġġeriti fil-​ktieb Rea­soning jew dawk li nsibuhom fl-​aħħar paġna taʼ Il-​Ministeru Tas-​Saltna. Aħseb sewwa dwar l-​iskrittura li int bi ħsiebek tuża, fil-​waqt li tiddetermina liema kliem jew frażi se tenfasizza biex toħroġ ċar il-​punt prinċipali tiegħek. M’hemmx għalfejn titgħallem il-​preżentazzjoni bl-​amment; minflok, l-​aħjar huwa li żżomm il-​ħsieb f’moħħok, tpoġġih fi kliemek, u tesprimih b’mod li taħseb li se jolqot lis-​semmiegħ tiegħek.

⁴ Ifli l-​pubblikazzjoni li bi ħsiebek toffri, u islet xi punti interessanti biex titkellem fuqhom. Agħżel xi ħaġa li tħoss li se tkun taʼ interess lin-​nies fit-​territorju tiegħek. Aħseb kif tistaʼ taddatta l-​preżentazzjoni tiegħek skond l-​inkwilini differenti​—raġel, mara, persuna mdaħħla fiż-​żmien, jew żagħżugħ.

⁵ Ġie li ppruvajt tagħmel sessjonijiet taʼ prattika? Inġabar mal-​membri tal-​familja jew pubblikaturi oħrajn biex tiddiskutu liema preżentazzjonijiet jistgħu jkunu effettivi, imbagħad ipprovahom quddiem kulħadd sabiex ilkoll ikunu ċari f’moħħhom. Ipprova oħloq sitwazzjonijiet li jiġru fil-​ħajja taʼ kuljum u oġġezzjonijiet li nistgħu niltaqgħu magħhom fit-​territorju. Prattika bħal din se tagħmlek iktar fluwenti fi kliemek, se ttejjeb l-​effettività tiegħek fl-​ippridkar, u se tibni l-​fiduċja tiegħek.

⁶ Flimkien maʼ li tipprepara u tipprattika l-​preżentazzjoni tiegħek, int għandek ukoll tistaqsi lilek innifsek: ‘Huwa l-​ilbies li bi ħsiebni nilbes xieraq għall-​ministeru? Il-​basket tiegħi fih dak li għandi bżonn, inkluża l-​letteratura li ppjanajt li se nuża? Hija din f’kundizzjoni tajba? Għandi jien il-​ktieb tiegħi tar-​Reasoning, il-​fuljetti, il-​karti tar-​rekords minn dar għal dar, u lapes?’ Ippjanar bil-​ħsieb minn qabel se jikkontribwixxi lejn ġurnata iktar produttiva fis-​servizz.

⁷ Ladarba nkunu għamilna l-​aħjar li stajna biex nippreparaw lilna nfusna, għandna nitolbu għall-​ispirtu taʼ Jehovah biex jgħinna ħalli jkollna suċċess. (1 Ġwann 5:​14, 15) Li nagħtu attenzjoni bil-​għaqal lejn il-​preparazzjoni se jirriżulta f’li nsibu ferħ ikbar fix-​xogħol tagħna, hekk kif ‘inwettqu għalkollox il-​ministeru tagħna.’​—2 Tim. 4:5.