“Agħmlu Dan b’Tifkira Tiegħi”
1 Il-bnedmin għandhom it-tendenza li jħallu s-sinjifikat taʼ kwistjonijiet importanti jbatti mal-mogħdija taż-żmien. Din hija raġuni waħda għala, meta waqqaf “l-ikla tal-Mulej”, Ġesù kkmanda lid-dixxipli tiegħu: “Agħmlu dan b’tifkira tiegħi.” Minn dak in-nhar ’l hawn, fl-anniversarju tal-mewt taʼ Ġesù, il-Kristjani b’ubbidjenza baqgħu ‘jxandru l-mewt tal-Mulej sa ma jiġi.’—1 Kor. 11:20, 23-26.
2 Dalwaqt issa, Ġesù se jirċievi fl-għamara tas-smewwiet l-aħħar uħud tal-“merħla ċkejkna” li qiegħda tonqos. (Lq. 12:32; Ġw. 14:2, 3) Din is-sena l-fdal taʼ wħud midlukin flimkien mal-folla kbira taʼ “nagħaġ oħra” li dejjem tiżdied se jerġgħu jkollhom il-privileġġ li josservaw l-Ikla taʼ fil-Għaxija tal-Mulej, fil-11 taʼ April. (Ġw. 10:16; Apk. 7:9, 10) L-apprezzament għall-imħabba kbira taʼ Jehovah f’li bagħat lill-Iben uniġenitu tiegħu għan-nom taʼ l-umanità se jissaħħaħ. Se jiġu enfasizzati l-eżempju taʼ Ġesù, imħabbtu, il-fedeltà tiegħu sal-mewt f’li pprovda r-rahan, u l-ħakma tiegħu issa bħala Sultan tas-Saltna stabbilita taʼ Alla, kif ukoll il-barkiet li dik is-Saltna se ġġib lill-umanità. Verament okkażjoni li trid tiġi mfakkra!
3 Ipprepara Issa: Ħalli lkoll kemm aħna nistinkaw biex nagħmlu dan l-istaġun tal-Mafkar wieħed taʼ ferħ kbir u radd il-ħajr għalina nfusna u għal dawk kollha li se jassoċjaw magħna. Nistgħu nħejju qalbna billi nerġgħu naqraw rakkonti mill-Bibbja rigward l-aħħar ftit jiem tal-ministeru taʼ Ġesù u l-ġrajjiet li wasslu sal-mewt tiegħu. L-istudju tagħna tal-familja jistaʼ minn diversi ġimgħat qabel il-Mafkar jiġi ddedikat għal reviżjoni taʼ kapitli 112-16 fil-ktieb L-Aqwa Bniedem.
4 Xi kemm taf nies li għandhom mnejn jiġu għall-Mafkar jekk int tieħu l-inizjattiva biex tibni l-apprezzament tagħhom għal din l-okkażjoni, tistedinhom, u ġġagħalhom iħossuhom milqugħin? Agħmel lista issa, u agħmel l-almu tiegħek biex tgħinhom jiġu. Wara, għinhom ikomplu jikbru spiritwalment billi tinkuraġġihom ħalli jattendu għal-laqgħat regolarment.
5 Matul l-istaġun tal-Mafkar, se jsiru arranġamenti speċjali ħalli kulħadd ikollu iktar opportunitajiet biex jippriedka. Bi skeda tajba, tistaʼ int tkun pijunier awżiljarju f’April? f’Mejju? Wieħed mill-aqwa modi kif nuru li niftakru b’apprezzament dak kollu li s-sagrifiċċju taʼ Ġesù jfisser għalina huwa billi nitkellmu dwar Alla tagħna, Jehovah, u dwar il-barkiet li l-ħakma tas-Saltna minn Ibnu se ġġib.—Salm 79:13; 147:1.