Min Għandu Mnejn Jaċċetta Studju tal-​Bibbja?

¹ Il-​profeta Għamos iddikjara li kien se jkun hemm il-​ġuħ fl-​art taʼ Iżrael, “mhux il-​ġuħ tal-​ħobż, lanqas l-​għatx għall-​ilma, iżda għas-​smigħ tal-​Kelma tal-​Mulej.” (Għam. 8:11) Għall-​benefiċċju taʼ dawk li huma bil-​ġuħ u bl-​għatx spiritwalment, l-​organizzazzjoni taʼ Jehovah qed tqassam ammont enormi taʼ letteratura Biblika mad-​dinja kollha.

² S’issa, stampajna 70 miljun kopja tal-​ktieb Għarfien u 91 miljun kopja tal-​browxer X’Jirrikjedi. Hekk kif ngħallmu l-​verità, aħna napprezzaw is-​sempliċità u l-​effettività taʼ dawn il-​pubblikazzjonijiet. Madankollu, hemm letteralment għadd kbir taʼ nies li rċivew il-​letteratura tagħna u li għadhom ma studjawx il-​Bibbja magħna. X’nistgħu nagħmlu dwar dan?

³ Kull Letteratura li Nħallu Tfisser Studju Potenzjali! Ikkunsidra l-​esperjenza taʼ pubblikatur li offra studju lil waħda mara l-​ewwel darba li kellimha minn bieb għal bieb. Hi mill-​ewwel aċċettat. Iktar tard hi qaltlu, “Int l-​ewwel persuna li qatt offrietli biex tistudja l-​Bibbja miegħi.” Fit-​territorju tiegħek, kemm hemm nies li diġà għandhom il-​letteratura tagħna u jistgħu jgħidu l-​istess ħaġa? Kull letteratura li tħalli tipprovdi opportunità għal żjajjar lura u studju tal-​Bibbja fid-​dar.

⁴ Ladarba taʼ sikwit niltaqgħu maʼ nies li diġà għandhom il-​pubblikazzjonijiet tagħna, kif nistgħu nqanqlu l-​interess tagħhom biex jitgħallmu dak li hemm fil-​letteratura tagħna? Waħda Xhud staqsiet direttament lill-​inkwilina jekk kellhiex xi mistoqsijiet fuq il-​Bibbja, u din qabdet u qaltilha, “Le.” L-​oħt ippersistiet, “Żgur li għandek xi ftit.” Fil-​fatt hekk kien, u nbeda studju. Għala ma tistaqsix lill-​inkwilin jekk jixtieqx jitgħallem x’inhi l-​ħarsa tal-​Bibbja fuq xi mistoqsija jew kwistjoni li tinteressah? Kun preparat li tqajjem xi mistoqsija taʼ interess jekk ma jkunx jistaʼ jaħseb f’xi ħaġa hu. Diskussjonijiet bħal dawn jistgħu jħejju t-​triq għal studju regulari taʼ veritajiet bażiċi mill-​Bibbja.

⁵ L-​attività taʼ studju tal-​Bibbja hi l-​qalba tal-​ministeru tagħna. Ladarba qatt ma nkunu nafu min għandu mnejn jaċċetta studju, iżżommx lura milli toffri wieħed lil kulmin tiltaqaʼ miegħu. Ħu l-​kwistjoni quddiem Jehovah fit-​talb, u aħdem fi qbil mat-​talb tiegħek. Għandek mnejn malajr issib li xi ħadd jaċċetta l-​istudju li tkun offrejtlu!—1 Ġw. 5:​14, 15.