Ix-Xhieda ta’ Ġeħova Għala Ma Jiċċelebrawx il-Milied?
Ideat żbaljati komuni
Ħrafa: Ir-raġuni għala x-Xhieda taʼ Ġeħova ma jiċċelebrawx il-Milied hi għax ma jemmnux f’Ġesù.
Fatt: Aħna Kristjani u nemmnu li s-salvazzjoni tiġi biss permezz taʼ Ġesù Kristu.—Atti 4:12.
Ħrafa: Intom tifirdu l-familji billi tgħallmu lin-nies biex ma jiċċelebrawx il-Milied.
Fatt: Aħna nħobbuha l-familja, u nużaw il-Bibbja biex ngħinu lil dak li jkun jibni familja iktar b’saħħitha.
Ħrafa: Intom ma tesperjenzawx l-“ispirtu tal-Milied” taʼ ġenerożità, paċi fuq l-art, u rieda tajba lejn il-bnedmin.
Fatt: Aħna nistinkaw biex inkunu ġenerużi u paċifiċi kuljum. (Proverbji 11:25; Rumani 12:18) Pereżempju, il-mod kif nikkonduċu l-laqgħat tagħna u nippritkaw hu f’armonija mat-tagħlim taʼ Ġesù: “Irċivejtu b’xejn, agħtu b’xejn.” (Mattew 10:8) Iktar minn hekk, niġbdu l-attenzjoni lejn is-Saltna t’Alla bħala t-tama vera taʼ paċi fuq l-art.—Mattew 10:7.
Ix-Xhieda taʼ Ġeħova għala ma jiċċelebrawx il-Milied?
Ġesù kkmanda li għandna nikkommemoraw il-mewt tiegħu, mhux it-twelid tiegħu.—Luqa 22:19, 20.
L-appostli u d-dixxipli bikrin taʼ Ġesù ma kinux jiċċelebraw il-Milied. In-New Catholic Encyclopedia tgħid li “l-festa tan-Natività ma bdietx tiġi ċelebrata qabel is-sena 243 [W.K.],” iktar minn seklu wara li miet l-aħħar appostlu.
M’hemm l-ebda evidenza li Ġesù twieled fil-25 taʼ Diċembru; id-data tat-twelid tiegħu mhix miktuba fil-Bibbja.
Aħna nemmnu li l-Milied mhuwiex approvat minn Alla għaliex l-għeruq tiegħu huma drawwiet u riti pagani.—2 Korintin 6:17.
Għala ma tiċċelebrawx il-Milied?Biex tispikkaw?
Ħafna nies xorta jiċċelebraw il-Milied minkejja li jafu li l-għeruq tiegħu huma pagani u mhumiex appoġġati mill-Bibbja. Nies bħal dawn forsi jistaqsu: Il-Kristjani għala għandhom jieħdu pożizzjoni mhix popolari bħal din? Għala jridu jispikkaw?
Il-Bibbja tinkuraġġina biex naħsbu b’moħħna, biex nużaw “il-qawwa tar-raġuni” tagħna. (Rumani 12:1, 2) Tgħallimna ngħożżu l-verità. (Ġwanni 4:23, 24) Għalhekk, filwaqt li jimpurtana minn kif ħaddieħor iħares lejna, aħna nżommu mal-prinċipji tal-Bibbja anki jekk dan ikun ifisser li ma nibqgħux popolari.
Għalkemm nagħżlu li aħna nfusna ma niċċelebrawx il-Milied, nirrispettaw id-dritt taʼ kull individwu li jiddeċiedi għalih innifsu f’din il-kwistjoni. Ma nindaħlux fiċ-ċelebrazzjoni tal-Milied taʼ oħrajn.