Ktejjeb Ġdid Bil-​Malti Għall-​Ministeru Taʼ L-​Għalqa

¹ Fil-​konvenzjoni distrettwali riċenti “Uħud li Jfaħħru Ferħanin” li saret f’Malta, is-​Soċjetà b’ferħ ħabbret il-​ħruġ tal-​ktejjeb intitolat Kif Nibdew u Nkomplu Diskussjonijiet Fuq Il-​Bibbja bil-​Malti. Il-​ktejjeb huwa maqsum f’żewġ partijiet. L-​ewwel waħda hija intitolata: “Introduzzjonijiet Għall-​Użu Fil-​Ministeru Taʼ L-​Għalqa”, u t-​tieni sezzjoni ġġib it-​titlu: “Kif Tistaʼ Twieġeb Għal Risposti X’Aktarx Intenzjonati Li Jwaqqfu L-​Konversazzjoni.” L-​ewwelnett, ħalli nikkunsidraw kif dan il-​ktejjeb jistaʼ jgħinna nagħmlu l-​introduzzjonijiet tagħna iktar effettivi.

² Int trid twaqqafha l-​karozza tal-​linja qabel ma tirkibha. B’mod simili, irridu niġbdu l-​attenzjoni tal-​persuna biex nibdew diskussjonijiet fuq il-​Bibbja. Ġesù wera kif meta fetaħ il-​Priedka tiegħu taʼ fuq il-​Muntanja. Hu uża l-​kelma “hieni” disaʼ darbiet. Per eżempju, qal: “Henjin huma dawk li huma konxji tal-​bżonn spiritwali tagħhom, ladarba s-​saltna tas-​smewwiet tappartjeni lilhom. . . . Henjin huma l-​kalmi, ladarba se jirtu l-​art.” (Mattew 5:​3-12) Is-​sentenzi kienu diretti u ċari. U dik l-​introduzzjoni żgur li qajmet interess u ġagħlet lis-​semmiegħa tiegħu jħossuhom involuti, għax min ma jridx ikun hieni?

³ Kif Nibdew u Nkomplu Diskussjonijiet Fuq Il-​Bibbja jsegwi l-​mudell imqiegħed minn Ġesù. Analizza l-​introduzzjonijiet. Innota kif ġew iddisinnjati biex iqanqlu interess u jiġbdu l-​attenzjoni taʼ l-​inkwilini lejn is-​suġġetti li qegħdin jiġu kkunsidrati. M’humiex maħsubin li jkunu makakki jew drammatiċi, imma sempliċi. Huma qosra u ma jdurux mal-​lewża.

⁴ Forsi jkun xieraq li tuża introduzzjonijiet oħrajn flimkien maʼ dawk inklużi f’Kif Nibdew u Nkomplu Diskussjonijiet Fuq Il-​Bibbja. Jiddependi ħafna mit-​tip taʼ persuni li tiltaqaʼ magħhom fit-​territorju tiegħek. Madankollu, se ssibu taʼ benefiċċju li ssegwi l-​mudell taʼ dawn l-​introduzzjonijiet. Mill-​banda l-​oħra, l-​użu taʼ l-​introduzzjonijiet kelma b’kelma kien effettiv ħafna. Dan għen lil dawk li jippreparaw għal għoti taʼ xiehda minn dar għal dar biex ikunu fluwenti u ma jdurux mal-​lewża.

⁵ Bħala għajnuna oħra f’li nwittu t-​triq biex naqsmu l-​verità Biblika m’oħrajn, hemm ġabra taʼ suġġerimenti għal “Kif Tistaʼ Twieġeb Għal Risposti X’Aktarx Intenzjonati Li Jwaqqfu L-​Konversazzjoni.” “M’inix interessat,” “Għandi r-​reliġjon tiegħi stess,” “Għandi x’nagħmel,” u ħafna oħrajn huma ttrattati hawnhekk. Jekk dawn l-​oġġezzjonijiet qegħdin itellfuk milli tagħti xiehda fit-​territorju tiegħek, se ssib modi ġodda t’għajnuna hawnhekk. Din is-​sezzjoni fiha wkoll informazzjoni prattika rigward konversazzjonijiet maʼ Buddisti, Ħindi, Lhud, u Musulmani. Ir-​raġunar huwa tattikuż, mhux dommatiku. Aħna nżuru d-​djar tan-​nies mhux biex nattakkaw, imma biex nattirawhom lejn il-​messaġġ tas-​Saltna. Mela, meta tirraġuna maʼ nies taʼ twemmin ieħor irrikonoxxi s-​sentimenti reliġjużi qawwijin tagħhom u uża dawn bħala bażi biex tmur għat-​tema tal-​messaġġ tiegħek dwar dak Alla veru u r-​rappreżentant Tiegħu, Ġesù rxoxtat.

⁶ Żgur li se nesperjenzaw ħafna ferħ fil-​ministeru jekk nitgħallmu naddattaw l-​introduzzjoni tagħna, jew is-​suġġett li kien bi ħsiebna nużaw, biex tolqot lill-​persuni u r-​reazzjoni tagħhom. Per eżempju, billi tuża Kif Nibdew u Nkomplu Diskussjonijiet Fuq Il-​Bibbja, kif se tkompli meta l-​persuni li ġejjin jirrispondu kif indikat: (a) Mara (‘M’inix interessata fix-​Xhieda taʼ Jehovah’); (b) Raġel xiħ (‘Jien Lhudi’); (ċ) Żagħżugħ (‘Aħna diġà Kristjani hawnhekk’); (d) Xi ħadd li ma tantx jiflaħ (‘M’inix interessat’); (e) Ħaddiem (‘Għandi x’nagħmel’). Billi nagħtu kas u naddattaw erwieħna aħna nuru interess ġenwin fin-​nies.

⁷ Ġorr dan il-​ktejjeb taʼ valur miegħek regolarment fil-​ministeru taʼ l-​għalqa. M’huwiex intenzjonat li timmemorizza dawn ir-​risposti, imma bla dubju se ssibu t’għajnuna li tanalizza għala oħrajn sabuhom effettivi; imbagħad esprimi l-​ideat fi kliemek stess. Bħal Salamun, aħna wkoll irridu nfittxu bir-​reqqa għal kliem li jgħaxxaq hekk kif nippreparaw biex nibdew u nkomplu diskussjonijiet fuq il-​Bibbja fix-​xogħol tagħna minn dar għal dar. Dan il-​ktejjeb ġdid se jgħinna f’din it-​tfittxija.​—Ekkl. 12:​9, 10.