M’Hemmx Isbaħ mis-​Sempliċità!

¹ Il-​pubblikaturi ż-​żgħar għaliex taʼ spiss jiġbdu l-​attenzjoni taʼ dawk li jaqsmu l-​messaġġ tas-​Saltna magħhom? Raġuni waħda hi għax jesprimu ruħhom b’mod sempliċi. Xi pubblikaturi jħossu li biex tagħti xiehda effettiva hemm bżonn taʼ preżentazzjoni elaborata. Madankollu, l-​esperjenza turi li preżentazzjoni sempliċi u ċara hija aħjar.

² Ġesù xandar is-​Saltna t’Alla b’mod sempliċi u dirett u ħarreġ lid-​dixxipli tiegħu biex jagħmlu bħalu. (Mt. 4:​17; 10:​5-7; Lq. 10:​1, 9) Hu kien juża introduzzjonijiet, mistoqsijiet, u tixbihat sempliċi biex jiġbed l-​attenzjoni tas-​semmiegħa tiegħu u jilħqilhom qlubhom. (Ġw. 4:7-​14) Aħna nagħmlu sew jekk nimitaw l-​eżempju tiegħu u nagħmlu preżentazzjonijiet li jinftiehmu malajr.

³ L-​“Evanġelju tas-​Saltna” huwa l-​messaġġ li aħna rridu nxandru. (Mt. 24:14) Jekk tuża s-​Saltna bħala t-​tema prinċipali se tgħinek iżżomm il-​preżentazzjoni tiegħek sempliċi. Tkellem fuq affarijiet li jikkonċernaw lis-​semmiegħa tiegħek. In-​nisa ġeneralment iktar jinteressaw ruħhom fil-​familja tagħhom milli f’suġġetti politiċi. Il-​missirijiet jagħtu importanza kbira lill-​impjieg u s-​sigurtà tal-​familja tagħhom. Iż-​żgħażagħ jinteressahom il-​futur tagħhom; ix-​xjuħ iridu saħħa aħjar u sigurtà. In-​nies ġeneralment ikunu iktar moħħhom fl-​affarijiet li jkunu qed jiġru lokalment milli f’dak li jiġri f’pajjiżi oħra. Wara li titkellem fuq affarijiet li jinteressawkom it-​tnejn, iġbed l-​attenzjoni taʼ dak li jkun lejn il-​barkiet li l-​bnedmin ubbidjenti se jgawdu taħt il-​ħakma tas-​Saltna t’Alla. Ftit kliem sempliċi u magħżul bil-​għaqal, flimkien maʼ xi skrittura jistgħu jkunu l-​aħjar mezz kif tqajjem l-​interess taʼ dak li jkun qed jisimgħek.

⁴ Tistaʼ tibda konversazzjoni billi tgħid:

◼ “Żgur taqbel miegħi meta ngħidlek li l-​bnedmin qed ibatu minħabba l-​ħafna mard bla kura li hawn. Iżda kont taf li Alla wiegħed li dalwaqt se jneħħi għalkollox kull tip taʼ mard, u anki l-​mewt?” Agħti ċans għal tweġiba, u mbagħad aqra Apokalissi 21:​3, 4.

⁵ Bi preżentazzjonijiet ċari u sempliċi, jalla tilħaq l-​imħuħ u l-​qlub taʼ iktar nies fit-​territorju tiegħek, filwaqt li tgħinhom jitgħallmu dwar Jehovah u dwar il-​prospett li jgawdu l-​ħajja taʼ dejjem.​—Ġw. 17:3.