‘Kunu Lesti għal Kull Għemil Tajjeb’
1 Meta Ġesù beda kampanja ġdida taʼ ppridkar, hu ħa l-ħin biex jipprepara lid-dixxipli tiegħu. (Mt. 10:5-14) Għalkemm ilkoll kemm aħna għandna x’nagħmlu, preparazzjoni saħansitra taʼ ftit minuti qabel ma nieħdu sehem fil-ministeru minn bieb għal bieb se tgħinna naħsdu riżultati mill-aqwa.—2 Kor. 9:6.
2 Kif Tipprepara: Preparazzjoni tajba tibda billi nsiru familjari maʼ l-informazzjoni fil-letteratura li nippjanaw li noffru. Irridu wkoll naħsbu dwar in-nies fit-territorju tagħna. Liema suġġetti jikkonċernawhom? Liema twemmin reliġjuż x’aktarx li jitkellmu dwaru? Għal iktar ideat, nistgħu naraw l-eżempji tal-preżentazzjonijiet li nsibu fil-Ministeru tas-Saltna u fil-ktieb Reasoning From the Scriptures.
3 Se niġu megħjunin ukoll meta nisimgħu b’attenzjoni t-turijiet mogħtijin fil-Laqgħa tas-Servizz. Hekk kif niksbu l-esperjenza f’li nużaw il-preżentazzjoni tagħna, se jkollna bżonn inqas ħin biex nippreparaw. Madankollu, jekk kull darba li mmorru fuq il-ministeru nieħdu ftit ħin minn qabel biex naħsbu dwar dak li se ngħidu u nkomplu nirfinaw il-preżentazzjoni tagħna, se nkunu iktar effettivi. Irridu wkoll niċċekkjaw li l-basket li nużaw għall-ministeru fih il-letteratura kollha li se niġu bżonn.
4 X’se jgħinna niftakru l-preżentazzjoni tagħna? Mod wieħed kif nistgħu nżommu f’moħħna dak li rridu ngħidu hu billi nipprattikaw b’leħen għoli. Xi wħud jieħdu gost jagħmlu sessjonijiet taʼ prattika waqt l-istudju tal-familja tagħhom. Oħrajn isibuha t’għajnuna li jiktbu l-preżentazzjoni tagħhom fil-qosor fuq biċċa karta u jagħtuha daqqa t’għajn qabel ma jħabbtu l-bieb.
5 Għala taʼ Benefiċċju: Preparazzjoni tajba se żżid maʼ li nkunu effettivi u jkollna l-ferħ fil-ministeru. Se tgħinna nkunu rilassati u inqas nervużi minn bieb għal bieb. Se nkunu kapaċi nagħtu iżjed attenzjoni lill-inkwilin minflok ma nkunu preokkupati dwar dak li se ngħidu. Barra minn hekk, il-fatt li nkunu familjari mal-letteratura se jgħinna nkunu iktar entużjastiċi meta noffruha.
6 L-Iskrittura tħeġġiġna biex ‘inkunu lesti għal kull għemil tajjeb.’ (Titu 3:1) Liema xogħol aħjar hemm minn dak li nippridkaw l-aħbar tajba? Permezz taʼ preparazzjoni tajba, aħna nuru rispett lejn l-inkwilin li jaċċetta li jismaʼ u lejn Ġeħova, l-Alla li aħna nirrappreżentaw.—Is. 43:10.