Alla Għamel Arranġament Biex Jeħles lill-​Bnedmin

Alla wiegħed lil-​leali Abraham li n-​‘nisel’ imwiegħed kien se jkun wieħed mid-​dixxendenti t’Abraham. Permezz taʼ dan il-​wieħed, in-​nies tal-​“ġnus kollha” kienu se jitbierku. (Ġenesi 22:18) Ġakobb, in-​neputi t’Abraham, iktar tard mar jgħix l-​Eġittu fejn il-​familja tiegħu kibret u saret il-​ġens taʼ Iżrael tal-​qedem.

Iktar tard, fl-​Eġittu, Fargħun tirann għamel lill-​Iżraelin ilsiera sakemm Alla qajjem lill-​profeta Mosè, li ħareġ lill-​ġens ’il barra mill-​pajjiż billi għaddew mill-​ilmijiet tal-​Baħar l-​Aħmar li ġew mifruqin b’mod mirakoluż. Wara dan, Alla ta liġijiet lill-​Iżraelin, inkluż l-​Għaxar Kmandamenti, biex jiggwidahom u jipproteġihom. Dawn il-​liġijiet kienu jagħtu dettalji dwar offerti għall-​maħfra tad-​dnubiet. Ispirat minn Alla, Mosè qal lill-​Iżraelin li Alla kien se jibgħat profeta ieħor. Dak il-​profeta kien se jkun in-​‘nisel’ imwiegħed.”

Iktar minn erbaʼ mitt sena wara, Alla wiegħed lis-​Sultan David li l-​wieħed li kien ġej, in-​‘nisel’ imbassar fl-​Għeden, kien se jaħkem fuq saltna li ma kienet se tispiċċa qatt. Dan il-​wieħed kien se jkun il-​Messija, il-​Ħellies maħtur minn Alla biex isalva lill-​bnedmin u jerġaʼ jirrestawra l-​art f’Ġenna.

Permezz taʼ David u profeti oħrajn, Alla bil-​mod il-​mod irrivela iktar dwar il-​Messija. Huma bassru li kien se jkun umli u qalbu tajba u li taħt il-​ħakma tiegħu, il-​ġuħ, l-​inġustizzji, u l-​gwerer kienu se jintemmu. Il-​bnedmin kollha se jkunu fil-​paċi maʼ xulxin u saħansitra mal-​annimali. Il-​mard, it-​tbatija, u l-​mewt—li qatt ma kienu parti mill-​iskop oriġinali t’Alla—se jisparixxu, u n-​nies li mietu se jerġgħu jingħataw il-​ħajja fuq l-​art.

Permezz tal-​profeta Mikea, Alla bassar li l-​Messija kien se jitwieled f’Betlehem u permezz tal-​profeta Danjel bassar li iktar tard kien se jiġi maqtul. Imma Alla kien se jqajjem lill-​Messija mill-​mewt u jaħtru bħala Sultan fis-​sema. Danjel ra bil-​quddiem ukoll li fl-​aħħar mill-​aħħar is-​Saltna tal-​Messija kienet se tieħu post il-​gvernijiet l-​oħrajn kollha b’mod permanenti. Il-​Messija veru ġie bħalma kien ipprofetizzat?

​—Ibbażat fuq Ġenesi kapitli 22-​50, kif ukoll Eżodu, Dewteronomju, 2 Samwel, Salmi, Isaija, Danjel, Mikea, Żakkarija 9:9.