Keman tekui se ueyi kokolis

Linda, akin kipia 71 xiujmej, kijtoua: “Keman tapajtijkej nechiluij ke nikpiaya cáncer itech nopulmón uan noijtik, nikmatia ke yaya nimomikiliti. Sayoj ke, keman niajsik kalijtik, niknemilij: ‘Kuali, amo nikchiaya nejin, sayoj ke moneki nitaxikos’”.

Elise, akin kipia 49 xiujmej, kijtoua: “Tajko noixko semi nechkokoua. Kemansa, amo nikxikoua uan niteltayokoya. Miakpa, nikmachilia ke amo akin noka motekipachoua uan hasta nikneki nimomiktis”.

Se takat akin yetok itech silla de ruedas moajsi iniuan ichankauan

XA SEMI tionmotekipachoj keman mitsoniluijkej ke tikonpia se ueyi kokolis tein uelis kichiuas xionmomikili. Oso xa se mochankauj kipanoua nejon. Uan no, semi se moui uan tesioujtij. Uelis okachi ijkon se momachilis keman moneki miakpa se yas tapajtiloyan, keman patiyoj tekisa se mopajtis oso keman pajti semi teijtakoua. Nejon uelis kichiuas maj se kinemili ke amo se taxikos.

¿Toni uelis mitsonpaleuis? Miakej yolseuij keman kichiuaj netataujtil uan keman kiixtajtoltiaj itech Biblia textos tein kinyolchikauaj. No kinyolchikaua keman ininchankauan uan akin iniuan mouikaj kintasojtaj uan kinpaleuiaj.

TEIN SEKIN KINPALEUIANI

Robert, se takat akin kipia 58 xiujmej, kijtoua: “Xiontakuaujtamati iuan Dios uan yejuatsin mitsonpaleuis xikonxiko kokolis. Xikontataujti Jiova uan xikonilui keniuj tionmomachilia. Xikontajtani maj mitsonpaleui maj ueli xikonnextili mochankauan ke amo tionmosenkaua uan maj ueli xionyolseujto”.

Robert no kijtoua: “Semi tepaleuia keman se ichankauan teyolchikauaj. Mojmostaj, semej nechnotsa uan nechtajtania keniuj niyetok. Uan no, oksekin akin iniuan nimouika akin okseko nemij no nechyolchikauaj. Nejon nechpaleuia maj kuali nimomachili uan maj amo nimosenkaua”.

Komo tikonnemilia tikonkalpanos aksa akin mokokoua uan kuali iuan tionmouika, mitsonpaleuis tein kijtoua Linda. Yejua kijtoua: “Kokoxkej kineki nemis kemej ipa uan kemansa xa amo kinekis ika tajtos kokolis tein kipia. Yejua ika, ximonojnotsakan ika okseki taman”.

Maski tikonpias se ueyi kokolis, uelisok tionyolpakis porin Dios mitsonmakas chikaualis uan no mitsonyolseuis textos itech Biblia. No mitsonpaleuis netasojtalis tein mitsonnextiliskej mochankauan uan akin iniuan tionmouika.

Tein Biblia kijtoua uelis mitsonpaleuis

Xiontakuaujtamati iuan Dios

“Niktajtanij Jiova, uan yejuatsin nechnankilij. Nechmakixtij itech nochi tein nechmoujtiaya. [...] Nejin akin tajyouia tanotsak, uan Jiova kikakik.” (Salmo 34:4, 6.)

Linda kijtoua: “Amo niktajtania Dios maj nechpajti, ta niktajtania maj nechmaka chikaualis uan maj nikxiko nokokolis”.

Xikonixtajtolti Biblia

“Nion se taltikpaknenkej kijtos: ‘Nimokokoua.’” (Isaías 33:24.)

Xiontanemili itech tein Dios kichiuas satepan. Nejon mitsonpaleuis xikonchia tein kuali satepan uan xiontaxiko.

Xionmokaua maj mochankauan uan akin iniuan tionmouika mitsonpaleuikan

“Se yekmelauj tetasojikniuj nochipa tetasojta, uan mochiua se teikniuj keman se kipanoua tajyouilis.” (Proverbios 17:17.)

Elise kijtoua: “Amo xionmoajsi moselti. Xionmokaua maj akin iniuan tionmouika mitsonpaleuikan. Kemansa tionmomachilis moselti uan tikonnemilis ke Dios amo mitsonkaki, sayoj ke amo xionmoajsi moselti”.