Fakalilifu e Fakamauaga ko e Mena Fakaalofa Mai he Atua
“Ko e mena ia ke toka ai he tane hana matua tane mo e hana matua fifine, ka e pipiki ke he hana hoana; ti eke ai a laua mo tino taha.”—KENE. 2:24.
1. Ko e ha kua latatonu a Iehova mo e fakalilifu ha tautolu?
KO IEHOVA KO E ATUA e Punaaga he fakamauaga, ti lata mooli a tautolu ke fakalilifu ki ai. Ko e ha tautolu a Tufuga, Pule Katoatoa, mo e Matua he lagi, kua latatonu a ia ke fakamaama ko e Foaki he ‘tau mena mitaki oti, katoa mo e tau mena fakaalofa oti kua katoatoa ai e mitaki.’ (Iako. 1:17; Fakakite. 4:11) Ko e fakakiteaga anei he fakaalofa lahi haana. (1 Ioa. 4:8) Ko e tau mena oti ne fakaako e ia ki a tautolu, tau mena oti ne ole a ia ki a tautolu, tau mena oti ne foaki e ia ki a tautolu kua mitaki mo e aoga ai ki a tautolu.—Isaia 48:17.
2. Ko e heigoa e tau fakaakoaga ne age e Iehova ke he hoa mau fakamua?
2 Kua fakakite he Tohi Tapu ko e fakamauaga e taha he tau mena fakaalofa “mitaki” nei ne mai he Atua. (Ruta 1:9; 2:12) He taute e ia e mauhoana fakamua, ne age e Iehova ke he hoa ko Atamu mo Eva e tau fakaakoaga pauaki ke he puhala ke kautū. (Totou Mataio 19:4-6.) Ane mai muitua e laua e fakatonuaga he Atua, to moua e laua e fiafia tukulagi. Ka kua tiaki goagoa e laua e poakiaga he Atua ti matematekelea lahi e tau fua ne moua.—Kene. 3:6-13, 16-19, 23.
3, 4. (a) Nakai fakalilifu fēfē he tokologa he vahā nei e fakamauaga mo e pihia mo Iehova ko e Atua? (e) Ko e heigoa e tau fakataiaga ka fakatutala a tautolu ki ai he vala tala nei?
3 Tuga e hoa fakamua ia, tokologa e tagata he vahā nei ne taute e tau fifiliaga he fakamauaga ne nakai lahi po ke nakai onoono ke he takitakiaga a Iehova. Falu ne tiaki katoa e fakamauaga, ka e lali e falu ke hikihiki ai ke felauaki mo e tau manako ni ha lautolu. (Roma 1:24-32; 2 Timo. 3:1-5) Ne fakaheu e lautolu e fakamooliaga ko e mena fakaalofa mai he Atua e fakamauaga, ti ko e nakai fakalilifu ke he mena fakaalofa ia kua nakai fakalilifu foki ke he Foaki, ko Iehova ko e Atua.
4 Ke he tau magaaho, ko e falu foki he tau tagata he Atua ne nakai kitia mitaki e onoonoaga a Iehova ke he fakamauaga. Falu he tau hoa Kerisiano ne fifili ke nonofo kehekehe, po ke tau vevehe, ka e nakai fai fakavēaga faka-Tohi Tapu ke taute pihia. Maeke fēfē ke kalo kehe he tuaga nei? Maeke fēfē e takitakiaga he Atua ia Kenese 2:24 ke lagomatai e tau Kerisiano kua mau ke fakamalolō e fakamauaga ha lautolu? Maeke fēfē ia lautolu hane manamanatu ke mau ke tauteute ke lata mo e mena ia? Onoono la tautolu ke he tolu e fakamauaga kua kautū he vahā Tohi Tapu kua fakakite e puhala he fakalilifu ki a Iehova ko e matapatu aoga ke he fakamauaga kua tumau.
Feaki e Mahani Fakamooli
5, 6. Ko e heigoa e tuaga ne liga kamatamata e tua ha Sakaria mo Elisapeta, ti taui mitaki fēfē e mahani fakamooli ha laua?
5 Ne hako oti e tau mena ne taute e Sakaria mo Elisapeta. Ne fifili tokoua e laua e hoa ne manamanatu fakaagaaga. Ne taute fakamooli e Sakaria e tau matagahua fakaekepoa haana, ti muitua katoatoa tokoua a laua ke he Fakatufono he Atua. Kua lahi mooli e mena ke fakaaue a laua ki ai. Ka e, ka ahiahi atu a koe ke he kaina ha laua i Iuta, to nakai leva ti mailoga e koe kua fai mena ne ai fai. Nakai fai tama a laua. Ne tufua a Elisapeta, ti kua momotua tuai a laua.—Luka 1:5-7.
6 I Isaraela i tuai, ne matalahi e fanafanau tama, ti fa lalahi e tau magafaoa. (1 Samu. 1:2, 6, 10; Sala. 128:3, 4) Ko e tagata taane Isaraela he magahala ia ne liga vevehe fakafualoto e hoana haana ka nakai fanau e hoana haana. Ka ko Sakaria ne pipiki fakamooli a ia ki a Elisapeta. Ne nakai kumi a ia ke he puhala mukamuka ke fakaoti e fakamauaga ha laua, ti pihia foki e hoana haana. Pete he momoko a laua ha kua nakai fai tama, ne fakatumau a laua ke fekafekau fakamooli tokoua ki a Iehova. Ofoofogia ai, fai magaaho ti fakamonuina lahi e Iehova a laua he fanau e tama taane he vahā motua ha laua.—Luka 1:8-14.
7. Ke he puhala fe foki ne fakakite e Elisapeta e mahani fakamooli ke he taane haana?
7 Ne fakakite e Elisapeta e mahani fakamooli uho lahi ke he taha puhala foki. He mogo ne fanau e tama taane haana ko Ioane, ne nakai maeke a Sakaria ke tutala ha kua kuhukuhu a ia he tuahā ke he agelu he Atua. Ka e liga matutaki a Sakaria ke he hoana haana he falu puhala ne tala age he agelu a Iehova ki a ia ke ui e tama taane ko “Ioane.” Ne manako e tau tuutakaina mo e tau magafaoa ke ui e tama taane aki e higoa he matua taane haana. Ka e fakatumau fakamooli ni a Elisapeta ke he fakatonuaga he taane haana. Pehē a ia, “Aua ia; ka e ui ni a ia, ko Ioane.”—Luka 1:59-63.
8, 9. (a) Fakamalolō fēfē he mahani fakamooli e fakamauaga? (e) Ko e heigoa falu puhala pauaki ka fakakite he taane mo e hoana e mahani fakamooli?
8 Tuga a Sakaria mo Elisapeta, ne fehagai e tau hoa mau he vahā nei mo e tau fakahogohogo manava mo e falu paleko. Ko e fakamauaga ne nakai mahani fakamooli to nakai monuina. Ko e kalahī, tau fakatino telefua, faivao, mo e falu peehiaga ke he fakamauaga mitaki ka moumou fakakelea e falanaki he fakamauaga. Ti ka malona e falanaki he fakamauaga, to kamata e fakaalofa ke fifigo. He falu puhala, ko e mahani fakamooli kua tuga e pā ne puipui viko e kaina he magafaoa ke ua hoko ha tagata ahiahi kelea mo e tau fakamatakutaku, ti ha ha i ai e haohao mitaki ma lautolu i loto he kaina. Ti ko e taane mo e hoana kua fefakamooliaki, kua maeke a laua ke nonofo tokolologo tokoua mo e fefakakiteaki e tau fatuakiloto ha laua ati tupu ai e fakaalofa ha laua. E, aoga lahi e mahani fakamooli.
9 Ne tala age a Iehova ki a Atamu: “Mena ia ke toka ai he tane hana matua tane mo e hana matua fifine, ka e pipiki ke he hana hoana.” (Kene. 2:24) Ko e heigoa e kakano he mena ia? He tau matutakiaga fakamua mo e tau kapitiga ti pihia mo e tau magafaoa kua lata ke hiki. Igatia a laua mo e tuku age fakamua ke he hoa haana e magaaho mo e levekiaga. Nakai lata e tau kapitiga mo e tau magafaoa ke tuku mua ke he magafaoa foou; ti nakai lata e hoa ke fakaatā e tau matua ke tauhele e tau fifiliaga po ke tau taufetoko he magafaoa. Kua lata e hoa mogonei ke fepipikiaki a laua. Ko e fakatonuaga he Atua a ia.
10. Ko e heigoa ka lagomatai e tau hoa he fakamauaga ke feaki e mahani fakamooli?
10 Pihia foki e tau kaina ne mavehevehe fakalotu, ne tamai he mahani fakamooli e tau palepale mitaki. Ko e matakainaga fifine ne nakai tua e hoa ne pehē: “Fakaaue lahi au ki a Iehova he fakaako au ke he puhala ke omaoma ke he taane haaku mo e fakalilifu hokulo ki a ia. He pipiki fakamooli ne fua ai ke he 47 e tau he fakaalofa mo e fakalilifu tumau.” (1 Kori. 7:10, 11; 1 Pete. 3:1, 2) Ti gahua fakalahi ke taute e hoa haau he fakamauaga ke logona e haohao mitaki. He tau kupu mo e tau gahua haau, kumi e tau puhala ke tala age ke he hoa haau, ko ia ko e tagata ne uho lahi mahaki he lalolagi ki a koe. Ti fakavē ni ki a koe, kia nakai fakaatā ha tagata po ke ha mena ke vevehe a koe mo e hoa haau. (Totou Tau Fakatai 5:15-20.) Ko Ron mo Jeannette ne fiafia ai he mau ke molea e 35 e tau, ne talahau, “Ha kua fakamooli a maua he taute e mena ne manako e Atua ki a maua, moua e maua e fakamauaga kua fiafia mo e kautū.”
Fakamalolō he Kaufakalataha e Fakamauaga
11, 12. Kaufakalataha fēfē a Akula mo Pisila (a) i kaina, (e) he gahua tupe, mo e (i) he fekafekauaga Kerisiano?
11 He tutala e aposetolo ko Paulo hagaao ke he tau kapitiga tata haana ko Akula mo Pisila, ne totoku fakalataha e ia a laua. Ko e hoa nei ne kaufakalataha ko e fifitakiaga mitaki he mena ne talahau he Atua he mogo ne pehē a ia kua eke e taane mo e hoana mo “tino taha.” (Kene. 2:24) Ne gahua tokoua tumau a laua he kaina, he gahua tupe, mo e fekafekauaga faka-Kerisiano. Ma e fakatai, he hau fakamua ha Paulo ki Korinito, ne uiina mafanatia e Akula mo Pisila a ia ke nofo he kaina ha laua, ti fai magaaho ne fakaaoga e ia he mogo fakamui mo matapatu he tau matagahua haana. Fakamui, i Efeso, ne fakaaoga e laua e kaina ha laua ke taute e tau feleveiaaga he fakapotopotoaga mo e gahua auloa ke lagomatai a lautolu ne foou tuga a Apolo ke tupu fakaagaaga. (Gahua 18:2, 18-26) Ko e hoa fakamakutu nei ne o atu mogoia ki Roma, ne liu a laua hafagi e kaina ha laua ma e tau feleveiaaga he fakapotopotoaga. Fakamui, ne liliu a laua ki Efeso mo e fakamalolō e tau matakainaga.—Roma 16:3-5.
12 Fai magaaho ne gahua fakalataha foki a Akula mo Pisila mo Paulo ke he matagahua mahani mau ha lautolu ko e taute fale ie. Liu foki kitia e tautolu e hoa mau hane kaufakalataha tokoua he nakai fetotokoaki po ke latau. (Gahua 18:3) Mooli mogoia, ko e magaaho ne fakaaoga tokoua e laua he tau fekafekauaga Kerisiano ne fakatumau e fakamauaga ha laua ke malolō ke he tuaga fakaagaaga. He haia i Korinito, Efeso, po ko Roma, ne iloa lahi a laua kua ‘gahua fakalataha ke he gahua a Keriso Iesu.’ (Roma 16:3) Ne gahua fakalataha a laua ke fakalaulahi e gahua fakamatala he Kautu he matakavi ne fekafekau ai a laua.
13, 14. (a) Ko e heigoa e tau tuaga ka nakai fetataiaki he fakamauaga? (e) Ko e heigoa falu mena he tau hoa mau ka taute ke fakamalolō e pipiaga ha laua ko e “tino taha”?
13 Mooli, ko e tatai e tau foliaga mo e tau matagahua kua fakamalolō e fakamauaga. (Fakama. 4:9, 10) Momoko ai, loga e hoa he vahā nei ne tote lahi e magaaho ma laua ni. Ne gahua loa a laua ke he tau gahua kehekehe. Falu ne mamao e tau mena ne o atu ke gahua tupe ai po ke hiki tokotaha ke he taha motu ke gahua ti fakafano atu e tupe ki kaina. Pihia i kaina, falu hoa mau ne nofo tokotaha ha ko e magaaho ne fakamole ai ke he televisoni, tau mena ne manako ke taute, tau sipote, tau pelē vitiō, po ke Internet. Pihia nakai e kaina ha mua? Ka pihia, maeke nakai ia mua ke hikihiki e tau tuaga ke lahi e magaaho ke lata mo mua ni? He ha he taute tokoua e tau gahua fa mahani tuga e taute e tau mena kai, holoholo e tau kapiniu, po ke gahua he katene? Maeke nakai ia mua ke gahua tokoua he leveki e tau tama po ke lagomatai e tau matua momotua ha mua?
14 Aoga lahi ai, ko e fakalataha tokoua tumau he tau matagahua ne matutaki ke he tapuakiaga ki a Iehova. He fakatutala tokoua ke he lauga he aho mo e fakalataha ke he tapuakiaga he magafaoa kua foaki e tau magaaho mitaki lahi mahaki ke fakatatai tumau e manamanatuaga mo e foliaga he magafaoa ha mua. Pihia foki ke gahua tokoua ke he fonua. Ka maeke, lali ke paionia tokoua, pete kua fakaatā he tuaga haau a koe ke taute ni lagataha he mahina po ke he tau. (Totou 1 Korinito 15:58.) Ko e matakainaga fifine ne paionia mo e taane haana ne pehē: “Ko e gahua he fonua ko e taha he tau puhala ke fakaaoga e maua tokoua e magaaho mo e ke tutala ai. Ha kua tatai e foliaga ha maua ke lagomatai fakaagaaga e falu, ne logona hifo e au ko e matakau mooli a maua. Ne logona hifo e au e tata lahi ki a ia, nakai ni ko e taane ka ko e kapitiga mitaki foki.” He gahua tokoua a mua ke he tutuliaga kua aoga lahi, ko e haau a tau mena ne fiafia ki ai, tau mena ne tuku fakamua, mo e tau aga to fakahiku ni ti fetataiaki mo e tau mena he hoa haau, to holo ki mua haau a manamanatu, logona hifo, mo e gahua ko e “tino taha” tuga a Akula mo Pisila.
Fakaatā e Tuaga Fakaagaaga ke Takitaki a Mua
15. Ko e heigoa e matapatu ke he fakamauaga kua kautū? Fakamaama.
15 Iloa e Iesu e aoga he tuku fakamua e Atua he fakamauaga. Kitia e ia a Iehova ne taute e mauhoana fakamua. Ne mailoga e ia e fiafia lahi ha Atamu mo Eva he magaaho ne mumui e laua e fakatonuaga he Atua, ti kitia mua e ia e matematekelea ne fua mai he tiaki ai e laua. Ti ko e mogo ne fakaako e Iesu e falu, ne taogo atu e ia e fakatonuaga he Matua haana ne moua ia Kenese 2:24. Ne lafi foki e ia e manatu nei: “Ko ia kua fakalataha he Atua, aua neke vevehe he taha tagata.” (Mata. 19:6) Ko e fakalilifu hokulo ki a Iehova mogoia ko e matapatu agaia ke he fakamauaga fiafia mo e kautū. Ke he mena nei, ne fakatoka he tau matua ha Iesu he lalolagi ko Iosefa mo Maria e fifitakiaga mua ue atu.
16. Fakakite fēfē e Iosefa mo Maria e tuaga fakaagaaga he moui magafaoa ha laua?
16 Ne totonu mo e fakalilifu a Iosefa ki a Maria. He iloa fakamua e ia kua fatu a Maria, ne manako a ia ke fakakite e fakaalofa noa ki a ia, pihia foki ato fakamaama he agelu he Atua ki a ia e mena ne tupu ki a Maria. (Mata. 1:18-20) Ha ko e hoa, ne omaoma a laua ke he fakatufono a Kaisara mo e pipiki fakatata foki ke he Fakatufono faka-Mose. (Luka 2:1-5, 21, 22) Ti mua atu ko e tau tagata taane ni ne lata ke o atu ke he tau galue fakalotu lalahi i Ierusalema, ko Iosefa mo Maria, fakalataha mo e tau tagata he magafaoa ha laua ne o atu he tau tau takitaha. (Teu. 16:16; Luka 2:41) He tau puhala nei mo e falu puhala foki, ko e hoa faka-Atua nei ne eketaha ke fakafiafia a Iehova mo e fakakite e fakalilifu hokulo ma e tau mena fakaagaaga. Ko e mena ia ne fifili e Iehova a laua ke leveki e Tama haana he vala fakamua he moui ha Iesu he lalolagi.
17, 18. (a) He tau puhala fe ka tuku fakamua he hoa e tuaga fakaagaaga he magafaoa ha laua? (e) To aoga fēfē e mena nei ki a laua?
17 Takitaki pihia nakai he tuaga fakaagaaga e moui magafaoa ha mua? Ma e fakatai, ka taute e mua e tau fifiliaga aoga, kua kumikumi fakamua nakai e mua e tau matapatu fakaakoaga he Tohi Tapu, liogi hagaao ke he manatu, ti kumi e fakatonuaga mai he Kerisiano motua? Po ke fifili ni a koe ke fakamafola e tau lekua he mui ke he tau logonaaga ni ha mua po ke he magafaoa mo e tau kapitiga? Eketaha nakai a koe ke fakagahua e tau lagomataiaga aoga loga ne taute fakailoa he fekafekau fakamoli ke he fakamauaga mo e moui magafaoa? Po ke moua e koe a koe kua mui ke he tau aga fakamotu po ke fakatonuaga mahuiga he lalolagi? Tumau nakai a mua ke liogi mo e fakaako tokoua, fakatoka e tau foliaga fakaagaaga, mo e tutala ke he tau mena ne aoga he magafaoa ha mua?
18 Hagaao ke he 50 e tau fiafia he mau ha laua, pehē a Ray, “Nakai fai lekua a maua ne nakai fakamafola ha kua fakaatā e maua a Iehova ko e vala ha maua he ‘toua kave tolu.’” (Totou Fakamatalaaga 4:12.) Talia e Danny mo Trina. “He fekafekau tokoua a maua ke he Atua,” he ui e laua, “kua malolō lahi tuai e fakamauaga ha maua.” Kua mau fiafia a laua ke molea e 34 e tau. Ka tuku fakamua tumau e mua a Iehova he fakamauaga ha mua, to lagomatai e ia a mua ke kautū mo e to fakamonuina lahi a mua.—Sala. 127:1.
Fakatumau ke Fakalilifu e Mena Fakaalofa he Atua
19. Ko e ha ne foaki he Atua e mena fakaalofa he fakamauaga?
19 Ma e tokologa he vahā nei, ko e mena ni ne aoga ko e fiafia ni ha lautolu. Ka ko e fekafekau ha Iehova kua kehe e kitiaaga. Kua iloa e ia na foaki he Atua e fakamauaga ko e mena fakaalofa ke fakalaulahi e finagalo Haana. (Kene. 1:26-28) Ane fakalilifu e Atamu mo Eva e mena fakaalofa ia, to eke e lalolagi katoa mo parataiso ne puke he tau fekafekau fiafia mo e tututonu he Atua.
20, 21. (a) Ko e ha kua lata ia tautolu ke taute e fakamauaga ko e mena tapu? (e) Ko e heigoa e mena fakaalofa ka fakaako a tautolu ki ai he tapu ka hau?
20 Mua atu, kua kitia he tau fekafekau he Atua e fakamauaga ko e magaaho ke fakaheke ki a Iehova. (Totou 1 Korinito 10:31.) Fitā he kitia e tautolu, ko e tau aga faka-Atua ko e mahani fakamooli, kaufakalataha, mo e fakaagaaga ka fakamalolō e fakamauaga. Ka amanaki, fakamalolō, po ke lali a tautolu ke fakahao e fakamauaga, kua lata fakamua ke kitia e tautolu e kakano he fakamauaga: ko e fakatokaaga faka-Atua mo e tapu. He tokaloto e mena mooli ia to omoi a tautolu ke taute katoatoa e tautolu e tau fifiliaga he fakamauaga ne fakavē ke he Kupu he Atua. He puhala nei kua fakakite e tautolu e fakalilifu nakai ni ke he mena fakaalofa he fakamauaga ka e pihia foki ke he Foaki he mena fakaalofa, ko Iehova ko e Atua.
21 Ko e fakamauaga mogoia, nakai ni ko e mena fakaalofa ha Iehova ne foaki ki a tautolu; po ke puhala hokoia ke he fiafia he moui. He vala tala ha tautolu ka mui mai, to onoono a tautolu ke he taha mena fakaalofa uho foki mai he Atua—ko e mena fakaalofa he nofo tokotaha.
To Tali Fēfē e Koe?
• Lata ke fakaohooho fēfē he mahani fakamooli e tau Kerisiano kua mau?
• Ko e ha e gahua tokoua he kaufakalataha ka fakamalolō e fakamauaga?
• Ko e heigoa falu puhala he tau tagata kua mau ka fakaatā e tuaga fakaagaaga ke takitaki a lautolu?
• Maeke fēfē a tautolu ke fakakite e fakalilifu ki a Iehova, ko e Kamataaga he fakamauaga?
[Tau Fakatino he lau 15]
Ko e gahua tokoua kua lagomatai e hoa ke nonofo tokoua