Fakaatā Nakai e Koe a Iehova ke Eke mo Tufaaga Haau?
“Kia kumikumi fakamua . . . ke he kautu he Atua mo e hana tututonu, ati lafi atu ai e tau mena oti ia kia mutolu.”—MATA. 6:33.
1, 2. (a) Ko hai ne hukui he “Isaraela he Atua” ne talahau ia Kalatia 6:16? (e) Ia Mataio 19:28, ko hai ne hukui he “tau faoa a Isaraela ne hogofulu ma ua”?
KAEKE ke totou e koe e higoa Isaraela he Tohi Tapu, ko e heigoa ne manatu e koe? Manamanatu nakai a koe ke he tama taane a Isaako ko Iakopo ne liu fakahigoa ko Isaraela? Po ke manamanatu a koe ke he tau hologa haana, ko e motu ha Isaraela i tuai? Ka e kua e Isaraela fakaagaaga? He hagaao a Isaraela ke he puhala fakatai, kua fa hagaao ai ke he “Isaraela he Atua,” ko e 144,000, kua fakauku he agaaga tapu ke eke mo tau patuiki mo e tau ekepoa ke he lagi. (Kala. 6:16; Fakakite. 7:4; 21:12) Ka e manamanatu ke he fakamauaga uho ke he tau magafaoa 12 a Isaraela ne moua ia Mataio 19:28.
2 Pehē a Iesu: “Ko mutolu kua mumui mai kia au, ka nofo e Tama he tagata ke he hana nofoaiki lilifu ke he fakafoouaga, ti nonofo ai foki a mutolu ke he tau nofoaiki ne hogofulu ma ua, ke fakafili ai e tau faoa a Isaraela ne hogofulu ma ua.” He kupu tohi nei, ko e “tau faoa a Isaraela ne hogofulu ma ua” ko lautolu ka fakafili he tau tutaki fakauku a Iesu mo lautolu ke moua e moui tukulagi he Parataiso he lalolagi. To aoga mai a lautolu he tau matagahua fakaekepoa he 144,000.
3, 4. Ko e heigoa e fifitakiaga mitaki ne fakatoka e lautolu ne fakauku kua fakamooli?
3 Tuga e tau ekepoa mo e tau Levi i tuai, ko lautolu ne fakauku he vahā nei kua onoono ke he kotofaaga gahua ha lautolu ko e lilifu. (Nume. 18:20) Nakai amanaki a lautolu ne fakauku ke age falu matakavi po ke faahi he lalolagi mo veveheaga. Ka e, amanaki lahi a lautolu ke eke mo tau patuiki mo e tau ekepoa he lagi mo Iesu Keriso. To fakatumau a lautolu ke fekafekau ki a Iehova he kotofaaga ia, tuga ne fakakite he mena ne totou e tautolu ia Fakakiteaga 4:10, 11 hagaao ki a lautolu kua fakauku ke he tuaga ha lautolu he lagi.—Eseki. 44:28.
4 He haia he lalolagi, ko lautolu ne fakauku ne momoui he puhala kua fakakite ko Iehova e tufaaga ha lautolu. Ko e kotofaaga ha lautolu ke fekafekau ke he Atua kua uho lahi mahaki ki a lautolu. Kua fakagahuahua e lautolu e tua ke he poa lukutoto he Keriso mo e fakatumau ke mumui ki a ia, he ‘fakamau ha lautolu a uiaga mo e fifiliaga.’ (2 Pete. 1:10) Kua kehekehe e tau tuaga mo e tau lotomatala ha lautolu takitokotaha. Ka e nakai fakaaoga e lautolu e tau kūkū ha lautolu mo piu ke tote e mena kua taute he fekafekauaga he Atua. Nakai pihia, ne tuku fakamua e lautolu e fekafekauaga ke he Atua he taute e tau mena oti kua maeke ia lautolu. Ti fakatoka e lautolu e fifitakiaga mitaki ma e tau tagata kua amanaki ke momoui he lalolagi parataiso.
5. Maeke fēfē he tau Kerisiano oti ke eke a Iehova mo tufaaga ha lautolu, ti ko e ha kua liga paleko e mena ia?
5 He ha ha ia tautolu e amaamanakiaga ke he lagi po ke he lalolagi, kua lata ia tautolu ke ‘aua neke omaoma ki a tautolu ni, ka e nikiti ha tautolu a satauro, mo e mui kia Keriso.’ (Mata. 16:24) Totou miliona kua amaamanaki atu ke momoui he Parataiso he lalolagi hane tapuaki ke he Atua mo e mumui ke he Keriso he puhala ia. Kua nakai makona a lautolu he taute e mena tote ni ka mailoga e lautolu kua maeke ia lautolu ke lahi e mena ka taute. Tokologa ne omoomoi ke fakamukamuka e tau momoui ha lautolu ti eke mo tau paionia. Falu ne maeke ke paionia he falu mahina he tau tau takitaha. Ha ha i ai foki falu kua nakai maeke ke paionia ka e eketaha a lautolu ke he fekafekauaga. Ko lautolu ia kua tuga a Maria ne fakamooli, kua tākai aki e lolo manogi a Iesu. Pehē a ia: “Ko e mena mitaki ne eke e ia kia au nai. . . . Kua eke e ia e mena ne maeke ia ia.” (Mare. 14:6-8) Ko e taute e tau mena oti kua maeke ia tautolu kua nakai mukamuka, ha kua nonofo a tautolu he lalolagi ne pule e Satani. Ka e eketaha fakamakamaka a tautolu mo e falanaki a tautolu ki a Iehova. Fakatutala ke he fā e puhala pauaki ka taute pihia e tautolu.
Kumi Fakamua e Kautu he Atua
6. (a) Fakakite fēfē he tau tagata tokologa ko e tufaaga ha lautolu ha he moui nei ni? (e) Ko e ha kua mitaki ke moua e onoonoaga a Tavita?
6 Ne fakaako e Iesu e tau tutaki haana ke kumi fakamua e Kautu mo e tututonu he Atua. Mahani e tau tagata he lalolagi ke kumi fakamua e tau mena fakatagata tuga e “tau tagata he lalolagi; ha he moui nai ha lautolu a tufaaga.” (Totou Salamo 17:1, 13-15.) He nakai fai fakalilifu ke he Tufuga ha lautolu, tokologa ne eketaha ke taute ha lautolu a tau momoui ke hagahaga mitaki, feaki e magafaoa, mo e toka hifo e tufaaga. Ko e tufaaga ha lautolu ko e moui nei ni. Ka ko Tavita, ne fiafia ke taute e ‘higoa mitaki’ mo Iehova, ne talahau ai he tama taane haana he mogo fakamui kua lata ke taute he tau tagata oti. (Fakama. 7:1) Tuga a Asafo, ne kitia e Tavita ko e eke a Iehova mo Kapitiga haana kua mahomo hake he tuku fakamua e tau manako fakatagata haana ni he moui. Ne fiafia a ia he o fano mo e Atua. He vahā ha tautolu, tokologa e tau Kerisiano ne tuku fakamua e tau matagahua fakaagaaga ke he tau gahua tupe ha lautolu.
7. Ko e heigoa e monuina ne moua he taha matakainaga taane he tuku fakamua e Kautu?
7 Manamanatu ki a Jean-Claude, he Central African Republic. Ko ia ko e motua fai hoana ne tolu e tama. He motu ia, kua uka ke moua e gahua, ti tokologa e tagata ka taute ha mena ke mau e tau gahua ha lautolu. Taha aho, ne tala age e takitaki gahua ki a Jean-Claude ke kamata e gahua pō—kamata he 6:30 he afiafi, fitu e aho he vahā tapu. Ne fakamaama e Jean-Claude he lafi ke he leveki fakatino he magafaoa haana, kua lata foki a ia ke leveki e tuaga fakaagaaga ha lautolu. Talahau foki e ia ko e kotofaaga haana ke lagomatai e fakapotopotoaga. Ko e tali he takitaki gahua? “Ka uhoaki a koe ke fai gahua, lata a koe ke fakanimo e tau mena oti ne toe, putoia mo e haau hoana, haau a tau fanau, mo e haau a tau lekua. Kua lata a koe ke foaki e moui haau ke he gahua haau—ai fai mena foki ka ko e gahua haau. Taute e fifiliaga haau: ko e lotu haau po ke gahua haau.” Ko e heigoa la haau ka taute? Ne mailoga e Jean-Claude ka ai fai gahua a ia, to leveki he Atua a ia. To lahi agaia e gahua haana ke taute he fekafekauaga he Atua, mo e to lagomatai e Iehova ke leveki e tau manako fakatino he magafaoa haana. Ti fano a ia ke he feleveiaaga he tapu hake. Mole ia, ti tauteute a ia ke fano ke gahua, he nakai iloa po ke mau agaia e gahua. Mogoia ni, ne tagi e telefoni. Ne fakaoti tuai e takitaki gahua, ka e mau agaia e gahua he matakainaga ha tautolu.
8, 9. Puhala fe ka fifitaki e tautolu e tau ekepoa mo e tau Levi he eke a Iehova mo tufaaga ha tautolu?
8 Falu ha he tuaga kua tuga na hagahaga kelea e gahua tupe ha lautolu ne liga manatu, ‘To fakamooli fēfē e au e matagahua haaku ke leveki e magafaoa haaku?’ (1 Timo. 5:8) He fehagai a koe mo e paleko pihia po ke nakai, mai he iloaaga haau to liga mailoga e koe to nakai hogohogo manava a koe ka eke e Atua mo tufaaga haau mo e tokiofa fakahokulo e koe e kotofaaga he fekafekau ki a ia. He tala age a Iesu ke he tau tutaki haana ke kumikumi fakamua ke he kautu kua fakamafana e ia a lautolu: “Ati lafi atu ai e tau mena oti ia kia mutolu,” tuga e tau mena ke kai, inu, po ke tapulu ai.—Mata. 6:33.
9 Manamanatu ke he tau Levi, ne nakai moua e veveheaga he fonua. Ha ko e tapuakiaga meā e matapatu ha lautolu, ma e tau levekiaga tino ne falanaki a lautolu ki a Iehova, ne tala age ki a lautolu: “Ko au ko e hāu a veveheaga.” (Nume. 18:20) Pete he nakai fekafekau a tautolu he faituga tuga e tau ekepoa mo e tau Levi, maeke ia tautolu ke fifitaki ke he aga ha lautolu, he mauokafua to foaki e Iehova ma tautolu. Ko e falanaki ha tautolu ke he malolō he Atua ke foaki kua mua atu e aoga he hokotia atu a tautolu ke he tau aho fakamui.—Fakakite. 13:17.
Kumikumi Fakamua e Tututonu he Atua
10, 11. Falanaki fēfē e falu ki a Iehova ke lata mo e ha lautolu a gahua tupe? Talahau e fakatai.
10 Ne tomatoma foki a Iesu ke he tau tutaki haana ‘kia kumikumi fakamua e tututonu he Atua.’ (Mata. 6:33) Kakano he mena nei ke tuku e tau tuaga ha Iehova he mena kua hako mo e mena kua hepe ki mua he tau aga mau he tagata. (Totou Isaia 55:8, 9.) Liga manatu e koe he mogo kua mole, tokologa e tagata ne putoia he tō tapaka po ke sela e tau tapaka ke ula, fakaako e falu ke felakutaki, po ke taute ti fakafua e tau kanavaakau tau. He mole e iloa e iloilo he kupu mooli, laulahi ne fifili ke hiki e tau gahua tupe ha lautolu mo e hokotia ke papatiso.—Isaia 2:4; 2 Kori. 7:1; Kala. 5:14.
11 Ko Andrew e fakataiaga. He mogo ne iloa e ia mo e hoana haana a Iehova, ne fifili a laua ke fekafekau ki a ia. Ne matalahi a Andrew ke he gahua haana ka e toka ai e ia. Ko e ha? Ha kua gahua a ia he fakatokatokaaga nakai tuuho ti fifili ke tuku fakamua e tututonu he Atua. He toka e Andrew e gahua ia, ne tokoua e tama haana, ai fai totogi, ti lahi ni e tupe ke katoa e tau mahina gahoa. Mai he onoonoaga he tagata, tuga na ai fai “veveheaga” a ia. Ne kumi gahua a ia ka e falanaki ke he Atua. Liu ono ki tua, ne mauokafua a ia mo e magafaoa haana kua nakai fakaku e lima a Iehova. (Isaia 59:1) He fakamukamuka tumau e tau momoui ha lautolu, kua moua foki e Andrew mo e hoana haana e kotofaaga ke gahua mau. “Ha i ai e tau mogo he tau tuaga fakatupe, fale, malolō tino, mo e fuakau fakahaga ne taute a maua ke fakaatukehe,” he ui e ia. “Ka e ha i ai tumau a Iehova mo maua. . . . Maeke ia maua ke talahau mauokafua ko e fekafekau ki a Iehova ko e lilifu lahi mo e palepale mitaki mooli he laliaga he tagata.”a—Fakama. 12:13.
12. Ko e heigoa e mahani kua lata ke tuku mua e tau tuaga he Atua? Talahau e tau fakataiaga he matakavi.
12 Ne tala age a Iesu ke he tau tutaki haana: “Kaeke ke lata ha mutolu a tua mo e fua sinapi, ka tala age a mutolu ke he mouga nai, Fano a a koe ke he mena ko; ti fano ai; nakai fai mena foki ke nakai maeke ia mutolu.” (Mata. 17:20) To maeke nakai a koe ke tuku fakamua e tau tutūaga he Atua ka fua mai ai e tau mena uka? Ka fakauaua a koe ke taute pihia, tutala ke he falu matakainaga he fakapotopotoaga. Nakai noa to atihake fakaagaaga a koe ke logona e tau iloaaga ha lautolu.
Loto Fakaaue ke he Tau Foakiaga Fakaagaaga a Iehova
13. Ka eketaha a tautolu ke he fekafekauaga a Iehova, ko e heigoa ha tautolu ka amanaki ke he tau foakiaga fakaagaaga?
13 Ka tokiofa e koe e lilifu haau he fekafekau ki a Iehova, maeke ia koe ke iloa tonu to leveki e ia e tau manako fakatino mo e fakaagaaga haau, tuga ni he foaki e ia e levekiaga ma e tau Levi. Manamanatu ki a Tavita. Pete ko ia he ana, ne tua a ia ke he Atua ke leveki a ia. Maeke foki a tautolu ke falanaki ki a Iehova he mogo ka nakai iloa e tautolu ha puhala foki. Manatu e mogo ne hau a Asafo ke he “faituga [mua ue atu] he Atua,” ne maama e ia e mena kua fakatupetupe a ia. (Sala. 73:17) Pihia foki, kua lata ia tautolu ke fuluhi atu ke he Punaaga faka-Atua he fagaiaga fakaagaaga ha tautolu. Ti fakakite e tautolu e loto fakaaue ma e kotofaaga ha tautolu he fekafekau ke he Atua pete ne tau tutūaga ha tautolu. Puhala ia kua eke e tautolu a Iehova mo tufaaga ha tautolu.
14, 15. Kua lata ke tali atu fēfē a tautolu ka ha ha ai e maamaaga lahi ke he falu kupu Tohi Tapu, ti ko e ha?
14 Tali atu fēfē a koe ki a Iehova ko e Punaaga he maamaaga fakaagaaga ka fakakite e “tau mena hokulo ia he Atua” ne haia he Tohi Tapu? (1 Kori. 2:10-13) Ha ha ia tautolu e fifitakiaga mitaki lahi mahaki he tali he aposetolo ko Peteru he tala age a Iesu ke he tau tagata fanogonogo Haana: “Kaeke kua nakai kai e mutolu e tino he Tama he tagata, ti nakai inu foki hana toto, nakai ha i loto ia mutolu e moui.” He manamanatu fakatino ke he tau kupu ia, tokologa e tutaki ne pehē: “Ko e kupu uka a ena; to maeke ia hai ke fanogonogo ki ai.” Kua “liliu atu ai” a lautolu. Ka e pehē a Peteru: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi.”—Ioane 6:53, 60, 66, 68.
15 Nakai maama katoa e Peteru e mena ne talahau e Iesu hagaao ke he kai he tino Haana mo e inu e toto Haana. Ka kua falanaki e tau aposetolo ke he Atua ma e maama fakaagaaga. He maama fakahaga e falu fakaakoaga fakaagaaga, lali nakai a koe ke maama e tau matapatu kakano faka-Tohi Tapu ma e tau hikiaga? (Fakatai 4:18) Ne talia he tau Perea he senetenari fakamua e kupu “mo e loto makutu, kua kumikumi ke he tau Tohi ke he taha aho mo e taha aho.” (Gahua 17:11) He muitua a lautolu to fakahokulo e loto fakaaue haau ma e kotofaaga haau ke fekafekau ki a Iehova he eke a ia mo tufaaga haau.
Mau ki a Lata Ni mo e Iki
16. Eke fēfē e Atua mo tufaaga ha tautolu hagaao ke he poakiaga ne moua he 1 Korinito 7:39?
16 Ko e taha faahi ne kua lata e tau Kerisiano ke tokaloto tumau e tau finagalo he Atua ko e fakagahua e takitakiaga he Tohi Tapu ke mau “kia lata mo e Iki.” (1 Kori. 7:39) Tokologa ne fifili ke nofo tokotaha tumau ka e nakai tiaki e fakatonuaga faka-Atua nei. Kua fakaalofa lahi e Atua ki a lautolu ia. Ko e heigoa ne taute e Tavita he mogo ne logona e ia e matimati ti tuga kua nakai fai lagomatai? “Kua liligi atu e au haku a tagi ki mua [he Atua]; kua fakakite atu e au haku a matematekelea ki mua hana; Ka lolelole haku a loto ki loto ia au, ti fioia ai e koe haku a puhala,” he ui e ia. (Sala. 142:1-3) Liga pihia foki e tau logonaaga ne ha ha he perofeta ko Ieremia, ko e tagata nofo tokotaha ne fekafekau fakamooli ke he Atua ke he loga e tau tau. Liga manako a koe ke fakaako e fifitakiaga haana ne fakamaama he tohi God’s Word for Us Through Jeremiah he veveheaga 8.
17. Fahia fēfē e taha matakainaga fifine nofo tokotaha ke he matimati he falu magaaho?
17 “Ne nakai amanaki au ke nofo tokotaha tumau,” he talahau he matakainaga fifine he tau Faahi Kaufakalataha. “Kua atāina au ke fai taane ka feleveia au mo e tagata hako. Ne lali e matua fifine nakai tua haaku ke fakaohooho au ke mau ke he ha tagata noa ni. Ne hūhū au ki a ia kua manako nakai a ia ke fai fakalagoaga ka nakai mitaki e fakamauaga haaku. Fai magaaho ti kitia e ia kua mitaki e gahua tupe haaku, leveki e au au, mo e fiafia foki. Ne nakai liu a ia fakaohooho au.” Kua logona he matakainaga fifine nei e matimati he falu mogo. Pehē a ia, “Ti lali au ke eke a Iehova mo mauokafua haaku. Nakai tiaki e ia au.” Ko e heigoa ne lagomatai a ia ke falanaki ki a Iehova? “Lagomatai he liogi au ke logona kua mooli e Atua mo e nakai tokotaha au. Ko e Mua Ue Atu he lagi mo e lalolagi katoatoa hane fanogonogo, ti maeke fēfē au ke nakai logona e lilifu mo e fiafia?” Mauokafua kua “mua e monuina hana ke foaki atu, ke he monuina hana ke talia mai,” ne pehē a ia: “Lali au ke lagomatai atu ke he falu mo e nakai amanaki ke moua mai ha mena taha. Ka manamanatu au, ‘Ko e heigoa haaku ka taute ke lagomatai e tagata nai?’ Kua logona e au e fiafia he loto.” (Gahua 20:35) E, ko Iehova ko e tufaaga haana, ti fiafia a ia ke he kotofaaga he fekafekau ki a ia.
18. Ke he puhala fe kua eke e Iehova a koe mo tufaaga haana?
18 Ko e heigoa ni e tuaga ne ha ha i ai a koe, maeke ia koe ke eke e Atua mo tufaaga haau. He taute pihia e koe, to ha ha i ai a koe mo e tau tagata fiafia haana. (2 Kori. 6:16, 17) Maeke e mena ia ke fua mai ha ko Iehova e tufaaga haau, tuga ne tupu ke he falu i tuai. (Totou Teutaronome 32:9, 10.) Tuga ne tau Isaraela kua eke mo tufaaga he Atua ke he tau motu, maeke a ia ke fakamailoga a koe ko e haana ti leveki fakaalofa a koe.—Sala. 17:8.
[Matahui Tala]
a Kikite e Awake! Novema 2009, lau 12-14.
To Tali Fēfē e Koe?
Maeke fēfē a koe ke eke a Iehova mo tufaaga haau
• he kumi fakamua e Kautu he Atua mo e haana a tututonu?
• he fakakite e loto fakaaue ma e tau mena kai fakaagaaga?
• he omaoma e poakiaga he Atua ke mau ni ke lata mo e Iki?
[Blurb he lau 13]
Eke a Iehova mo tufaaga ha tautolu he eke e fekafekauaga haana mo matapatu manatu ha tautolu
[Fakatino he lau 15]
Atihake e fifitakiaga ha Ieremia