Ko e Hūhū Uka ke Maama

KUA loga mo e kehekehe e tau onoonoaga ke he moui mo e mate. Logona hifo e falu ka mamate a lautolu, to matutaki ai ke momoui foki ke he taha moui po ke taha matakavi. Logona hifo e falu to liu fanau a lautolu ti momoui he taha tuaga foki. Ka e manatu e falu ko e mate e fakaotiaga.

Liga fai taofiaga foki a koe ke he matakupu nei ne fakavē ke he feakiaga po ke aga fakamotu haau. Ha kua kehekehe lahi e tau manatu ke he mena ka tupu ka hoko e mate, fai tagata po ke fai matakavi nakai ke moua e tautolu e tau tali mauokafua mo e moolioli ke he hūhū uka nei?

Ke he tau senetenari loga, ne fakaako he tau takitaki lotu e taofiaga na fai mena e tagata ne moui ka mate. Teitei e tau tagata he tau lotu lalahi oti​—tau Kerisiano, tau Hinitū, tau Iutaia, tau Musilimi, mo e falu​—ke talitonu na fai mena e tagata ne moui ka mate, ati holo atu ke moui he matakavi ne ha ha e tau agaaga. Ka ko e tau Puta, ne talitonu ko e lagaloga e liu fanau ke he taha moui foki, to hokotia e tagata ke atāina mai he tau mena mamahi. Ko e tuaga fiafia katoatoa nei ne fakahigoa ko e Nirvana.

Ha ko e tau fakaakoaga pihia, tokologa e tagata he lalolagi ne talitonu ko e mate ko e hafagiaga he gutuhala ke moui he taha lalolagi foki. Ke he tokologa, ko e mate mogoia e lakaaga aoga he holoaga he moui, mo e ki a lautolu ko e mate kua tuga e vala he finagalo he Atua. Ka ko e heigoa e talahauaga he Tohi Tapu ke he mena nei? Fakamolemole totou e vala tala ka mui mai. Liga ofo a koe he tali.