Talahauaga he Tohi Tapu ke he Moui mo e Mate

He totou e tala ke he tufugatiaaga he tohi a Kenese he Tohi Tapu, iloa e tautolu na tala age e Atua ke he tagata fakamua ko Atamu he pehē: “Ko e tau akau oti kana ha he kaina ke kai ai ni e koe. Ka ko e akau ke iloa ai e mitaki mo e kelea, aua neke kai ai e koe; ha ko e aho ka kai ai e koe to mate ai ni a koe.” (Kenese 2:16, 17) Fakakite fakamaaliali mo e fakamaama he talahauaga ia, ane mai omaoma a Atamu ke he poakiaga he Atua to nakai mate a ia ka e matutaki ke moui he kaina ko Etena.

Momoko ai, ne nakai fifili a Atamu ke omaoma mo e moui tukulagi, ka e fifili a ia ke fakaheu e poakiaga he Atua, ti kai e ia e fua akau fakatapu he mogo ne age he haana hoana ko Eva ki a ia. (Kenese 3:1-6) Ko e tau lauiaaga kelea he nakai omaoma ia, kua ha ha agaia mo tautolu mogonei. Fakamaama he aposetolo ko Paulo he pehē: “He hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Ko e “tagata tokotaha” ia ko Atamu. Ka ko e heigoa e agahala, ti ko e ha ne takitaki atu ai ke he mate?

Ko e agahala ne taute e Atamu, ha kua liuliu pauaki po ke moumou e fakatufono he Atua. (1 Ioane 3:4) Ti ko e mate e fakahala he agahala, tuga ne tala age he Atua ki a Atamu. Ane mai fakatumau e omaoma ha Atamu mo e tau hologa haana ke he poakiaga he Atua, to nakai agahala a lautolu ti nakai lauia he mate. Nakai tufuga he Atua e tau tagata ke mamate ka e ke momoui ke hoko ke he tukulagi.

Nakai fakauaua kua “hoko mai ai e mate ke he tau tagata oti kana,” tuga ne talahau he Tohi Tapu. Ka e fai vala kia a tautolu ne moui agaia ka mamate a tautolu? Tokologa ka talahau ē, na fai vala a tautolu ne fakahigoa ko e agaaga ka nakai mate. Ka kua tatai e talahauaga nei mo e pehē kua fakavai e Atua ki a Atamu. Puhala fe? Kakano ka fai vala i loto ia tautolu ne matutaki ke moui ke he taha lalolagi foki ka mamate a tautolu, nakai ko e fakahala he agahala e mate tuga ne talahau he Atua. Pehē e Tohi Tapu: “Kua nakai maeke ke pikopiko ai e Atua.” (Heperu 6:18) Ka ko e tala mooli, ko Satani ne pikopiko he tala age ki a Eva: “Nakai ni mamate a mua.”​—Kenese 3:4.

Lagā mai he mena ia e hūhū, Kaeke kua fakavē ke he pikopiko e fakaakoaga kua nakai mate e taha vala ia tautolu, ti ko e heigoa ka tupu mooli he magaaho ka mate?

FAKAMAAMA FAKAHAKO HE TOHI TAPU

Ko e tala he Kenese ke he tufugatiaaga ne pehē: “Eke ai e Iehova ko e Atua e tagata ke he efuefu he kelekele, ti fafagu ke he hana tau poko ihu e fafagu he moui; ti kua eke tuai a ia mo tagata moui.” Ko e talahauaga “tagata moui” kua fakaliliu mai he kupu Heperu ne’phesh,a ne kakano “mena moui ne fafagu.”​—Kenese 2:7.

Fakakite fakamaaliali he Tohi Tapu kua nakai tufuga e tau tagata ti igatia mo e “agaaga” ne nakai mate. Ka ko e tau tagata takitaha ko e “tagata moui.” Kakano haia ka kumi fakamakamaka a koe ke he ha Tohi Tapu to nakai moua e koe e talahauaga ne lalago e manatu kua “fai agaaga ne nakai mate.”

Ha kua nakai talahau he Tohi Tapu na fai agaaga ne nakai mate, ti ko e ha ne kehe e fakaakoaga he tau lotu? Ko e tali kua liuaki taha a tautolu ki Aikupito i tuai.

TUPU LAHI E FAKAAKOAGA POULIULI

Ko Herodotus ko e tagata fakamau tala tuai Heleni he senetenari ke limaaki F.V.N., ne pehē ko e tau Aikupito “ko e tau tagata fakamua ne lalago e fakaakoaga na fai agaaga ne nakai mate.” Taha aga fakamotu i tuai ko e tau Papelonia, ne kamata foki ke manatu na fai agaaga ne nakai mate. He hoko ke he magahala ne kautū a Alesana ne Mua ke he Lotouho he Faahi Uta he 332 F.V.N., ne fitā e tau pulotu Heleni he fakaohooho e fakaakoaga nei, nakai leva ti holofa ai ke he Pule Atu Motu Heleni.

He senetenari fakamua V.N., ua e matakau talahaua i Iutaia ko e tau Essene mo e tau Farasaio ne fakaako na fai vala i loto he tagata ne moui ka mate. He The Jewish Encyclopedia ne pehē: “Ko e taofiaga ke he fai agaaga ne nakai mate ne moua he tau Iutaia he matutaki mo e manatu faka-Heleni ti mua atu foki he fakaakoaga ha Plato.” Pihia foki, ne hagaao e tagata fakamau tala tuai Iutaia he senetenari fakamua ko Josephus ke he fakaakoaga ia kua nakai moua mai he tau Tohiaga Tapu, ka ko e “taofiaga he tau tagata Heleni,” ne onoono a ia ki ai ko e tau tala tuai he tau tagata tala fakataitai ha lautolu.

He holofa e fakaohooho he aga motu faka-Heleni, ne talia foki e lautolu ne talahau ko e tau Kerisiano e fakaakoaga pouliuli nei. Pehē e tagata fakamau tala tuai ko Jona Lendering, “Ko e talahauaga ha Plato ko e vala he tagata ne nakai mate ne kua haia he matakavi mitaki ka e haia mogonei he lalolagi kelea ti mukamuka ke fio e tau fakaakoaga ia mo e faka-Kerisiano.” Ko e fakaakoaga pouliuli na fai agaaga ne nakai mate kua hufia ke he lotu “Kerisiano” ti eke ai mo fakavēaga he tau taofiaga he lotu.

“KO E MENA MOLI FOKI KE TOKA NOA AI A MUTOLU”

He senetenari fakamua, ne talahau he aposetolo ko Paulo e hatakiaga nei: “Kua talahau fakatonu mai he Agaga, to o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau kupu he tau temoni.” (1 Timoteo 4:1) Ti felauaki tonu e tau kupu ia! Ko e taofiaga kua fai agaaga ne nakai mate ko e taha fakatai he “tau kupu he tau temoni.” Nakai mai he Tohi Tapu e taofiaga ia, ti fakavē ai ke he tau lotu pouliuli i tuai mo e tau fakaakoaga.

Fiafia a tautolu he pehē a Iesu: “To iloa foki e mutolu e mena moli, ko e mena moli foki ke toka noa ai a mutolu.” (Ioane 8:32) He moua e iloilo tonu ke he kupu mooli he Tohi Tapu, kua tokanoa ai a tautolu mai he tau fakaakoaga mo e tau gahua ne nakai fakalilifu e Atua ka e fakaohooho he tau lotu loga he lalolagi. Lafi ki ai, ko e mena mooli he Kupu he Atua kua fakatokanoa a tautolu mai he tau līlīaga he tau aga tuai mo e tau mena fakataulatua ne putoia mo e mate.​—Kikite e puha “Ko Fe a Lautolu ne Mamate?”

Kua nakai amanaki e Tufuga ha tautolu ke momoui e tau tagata ke he lalolagi ke 70 po ke 80 e tau, ti holo atu ke momoui tukulagi he taha matakavi ne ha ha e tau agaaga. Finagalo a ia he kamataaga ma e tau tagata ne tufugatia e ia ke momoui tukulagi he lalolagi nei ko e tau fanau omaoma haana. Ko e finagalo mua ue atu nei ko e fakaalofa he Atua ma e tau tagata, mo e to nakai galo noa ai. (Malaki 3:6) Mafanatia foki, ne omoomoi he agaaga e salamo ke talahau: “To eke ni e motu ma e tau tagata tututonu, to nonofo muatua ai a lautolu.”​—Salamo 37:29.