Uiina a Lautolu ke O Mai
1 Ko e uiina na tufa mai he tau senetenari i tuai kua taogo ai mogonei ke he 233 e tau motu he lalolagi katoa: “O mai a, kia o hake a tautolu ke he mouga a Iehova, . . . to fakaako mai foki e ia a tautolu ke he hana tau puhala, ti o ai a tautolu ke he hana puhala.” (Isa 2:3) Takitaki atu e tau tagata ke he fakatokatokaaga a Iehova ko e taha puhala mua atu e mitaki ke lagomatai e tautolu a lautolu ke tolomaki fakaagaga ke hoko atu ke he moui tukulagi.
2 Kua liga fakauaua e falu tagata fakailoa ke uiina e tau tagata ke he Fale he Kautu ato oti e fakatata e lautolu e tolomaki kua lata he fakaakoaga Tohi Tapu he kaina. Pete ia, to kamata e tau tagata falu magaaho ke o mai ke he tau feleveiaaga he fakapotopotoaga ato kamata e fakaakoaga Tohi Tapu mo lautolu. Kia nakai fakamule a tautolu he foaki e uiina mafanatia mo e fakamalolo e tau tagata ke o mai ke he tau feleveiaaga.
3 Ko e Mena Ka Taute: Kia fakaaoga fakamitaki e tau laupepa fakailoa ke tala age ke he tau tagata hagaao ke he tau feleveiaga ha tautolu he matakavi. Tala age ko e tau feleveiaaga kua nakai fai totogi ti nakai oko tupe foki. Fakamaama e puhala ka taute aki e tau feleveiaaga. Fakakite age ko e tau fakaholoaga fakaakoaga Tohi Tapu mo e tohi fakaako kua foaki ma e tau tagata oti ke muitua ki ai. Talahau e tau tutupuaga kehekehe mo e tau puhala momoui ha lautolu kua o mai ai. Talahau ko lautolu ko e tau tagata mai ni he matakavi ia ti kua uiina ai e tau fanau ikiiki he tau tau momoui kehekehe ke o mai. Kia uiina e tautolu a lautolu kua fakaako mo tautolu, foaki e lagomatai ki a lautolu ke he ha puhala ni ke fakalataha mai.
4 Ko e taha mena fakahiku ne fakamau he Tohi Tapu ko e uiina mafanatia ke fai vala he tau foakiaga a Iehova ma e moui: “Kua pehe mai foki e Agaga mo e kitofaitane, Ati hau ā; . . . ko ia foki kua fia inu kia hau a ia, katoa foki mo ia kua manako ki ai, kia uta noa e ia e vai he moui.” (Fakakite. 22:17) Nakai fai mena ke hukui aki e uiina fakatumau e falu ke fakalataha ke he tau feleveiaaga ha tautolu.
5 Kua fakatino fakaperofeta mai he Isaia 60:8 e tau teau afe he tau tagata fakaheke fou mogonei hane o mai ke he tau fakapotopotoaga he tau tagata he Atua tuga e tau lupe “kua lele po ke aolagi, ke tuga ne tau lupe foki ke he tau gutuhala ha lautolu.” Kia uiina e tautolu oti a lautolu kua fou ke he tau feleveiaaga ha tautolu mo e fakafeleveia fakamitaki a lautolu. He puhala nei, to kaufakalataha a tautolu mo Iehova he fakamafiti e ia e gahua fakapotopoto.—Isa 60:22.