Fakaaoga Fakamitaki e Magaaho Haau he Fekafekauaga

¹ Kua lahi mooli e gahua ke taute he fekafekauaga ha tautolu, ti kua tote e magaaho ne toe. (Ioane 4:35; 1 Kori. 7:29) He fakatokatoka fakamitaki mo e pulega tuai, kua maeke ia tautolu ke fakaaoga fakamitaki e magaaho ne setulu e tautolu ma e fekafekauaga.

² Kia Mautauteute: Fakamua to fina atu ke he feleveiaaga ma e gahua he fonua, iloa mooli kua ha ha ia koe e tau tohi kua lata mo e iloa mitaki e koe e fakataitaiaga. Ka fakaoti e feleveiaaga ke he liogi, ti ō atu fakahako ke he fonua. To fakaatā he mena nei a koe mo lautolu ne gahua mo koe ke lahi e gahua ka taute he magaaho ne fakatoka ma e gahua he fonua.

³ Ka kotofa a koe ke taute e feleveiaaga he gahua ma e fonua, kia kamata he magaaho kotofa. Kia fakakū e feleveiaaga​—ke nakai molea e 10 ke he 15 e minuti. Fakamua ato fakamavehevehe e koe e matakau, kia mailoga kua igatia e tagata mo e iloa e matakavi mo e hoa ka gahua mo ia.

⁴ He Fekafekauaga: Ka oti e feleveiaaga ma e gahua he fonua, ua heleaki teao, ka e kamata ke ō atu ke he fonua. Ka amanaki a koe ke oti tuai e gahua, liga maeke ia koe ke taute e fakatokaaga ma e fenoga haau ke maeke he falu ne toe ke matutaki e gahua ha lautolu. Ka gahua ko e matakau, kia manamanatu ke he falu ne liga leo ia koe ke oti e fakatutalaaga. Kua liga putoia he mena ia e toka fakailoilo e tagata ne fakafetoko po ke liga fakatoka ke liu atu ki a ia ne fiafia.​—Mata. 10:11.

⁵ Ka taute e tau liu aahi atu, kalo mai he tafeliuaki noa ka e taute e tau liu aahi atu he matakavi ia ato holo atu ke he taha matakavi. Kua liga maeke ke hea telefoni atu ke he tau liu aahi atu ke iloa tonu to haia a lautolu i kaina. (Fakatai 21:5) Ka amanaki a koe ke leva e liu aahi atu, taute e tau fakatokaaga ma e falu he matakau haau ke fakamatala he matakavi tata mai po ke taute falu liu aahi atu.

⁶ Kua nonofo a tautolu he vahā ne lahi e heleheleaga fakaagaaga. (Mata. 9:37, 38) Nakai leva to fakaoti e gahua. Ko e mena ia, kua lata a tautolu ke manako ke lauia mitaki he fakaaoga fakamitaki e magaaho ha tautolu he fekafekauaga.