Ko e Heigoa Hau Ka Talahau ke he Tagata Iutaia?
1 He senetenari fakamua, tokologa “ke he fanau a Isaraela” ne tali fakaaue ke he fakamatala ha Iesu mo e hana tau aposetolo. (Gahua 10:36) Ti kua moli ai mogoia, tokologa e tau Iutaia fakamoli he vaha nei ne kuku mo e loto katoa e kupu moli—nakai ni i Isaraela ka e pihia foki i Rusia, ko e Tau Fahi Kaufakalataha, mo e falu motu. Manako nakai a koe ke kautu lahi he hokotia ke he tau tagata Iutaia? Ko e tau manatu lagomatai nai ka lagomatai a koe ke fakamatala fakailoilo ke he tau Iutaia fakalotu mo e nakai fakalotu.
2 Fakamatala ke he Tau Iutaia Fakalotu: Kua lata ke mailoga ko e tau Iutaia fakalotu kua fa manamanatu lahi he muitua ke he tau aga fakamotu he tau rapai mai he tau fakaakoaga pauaki ne kua fakamaama. Moli, kua fa onoono a lautolu ke he aga fakamotu ke tatai e pule ke he tau Tohiaga Tapu. Ti, nakai fiafia moli a lautolu ke fakatutala ke he tau mataulu Tohi Tapu hokulo. Kua mahani foki a lautolu ke manamanatu ke he Tohi Tapu ko e tohi Kerisiano. Ma e kakano ia, kua fa mitaki lahi ka hagaao ke he Tohi Tapu ke fakaaoga e tau kupu “ko e Tau Tohiaga Tapu Heperu,” “ko e Torah,” po ke “ko e Tau Tohiaga Tapu.” Ko e tohi mitaki lahi ne tauteute pauaki ma e tau tagata Iutaia ko e porosua Will There Ever Be a World Without War?
3 Ko e heigoa e tau mataulu tala kua liga fakafiafia aki e tau tagata Iutaia fakalotu? Kua talitonu a lautolu ko e mena taha ni e Atua, ne kua fiafia lahi ke he tagata. Kua mauokafua foki a lautolu kua fakalava mai e Atua he tau mena he tagata. Liga fakaaoga e koe e tau manatu nei ke fakatu aki e fiafia taha ia. Lafi ki ai, tokologa e tau Iutaia kua mataala lahi ke he matematekelea he tau tagata ha lautolu he Felakutaki II he Lalolagi. Ne manamanatu a lautolu ko e ha ne fakaata he Atua e nakai fakafili tonu pihia mo e magaaho ka fakaoti e mahani kelea. Kua mautali a tautolu ke tali e tau huhu pihia, hagaao, he fakatai, ke he tau matakainaga ha tautolu ne moua he Fakalutukiaaga.
4 Moli, ke nakai fakamafoki kehe e tagata he kaina, kua mitaki lahi ke nakai ta mai tuai e manatu ke he Mesia ke he fakatutalaaga. Ka kua mitaki ke liga tutala a koe ke he matagahua ha Mose he fakamauaga tuai i Isaraela mo e huhu ke he tagata he kaina kua talitonu nakai a ia ko e aoga e tau fakaakoaga a Mose he vaha nei. Ka hagahaga tutonu ke fakatutala e tahaaga he Mesia, liga totou mua e koe e Teutaronome 18:15, kua talahau: “To fakatu mai e Iehova hau a Atua ia koe, he hau a tau matakainaga, ha perofeta māu ke tuga au nai; to fanogonogo a mutolu kia ia.” Huhu ke he tagata he kaina ko hai ne toka he loto ha Mose he vagahau a ia hagaao ke he perofeta tuga ni a ia. Ti talahau falu manatu he porosua World Without War, lau 14, paratafa 17 mo e 18.
5 Kehe e Onoonoaga he Tau Iutaia Nakai Fakalotu: Nakai talia oti e lautolu kua talahau ko e tau Iutaia e tau fakaakoga faka-Iutaia. Tokologa e tau Iutaia kua nakai onoono fakalotu a lautolu. Kua fiafia lahi a lautolu ke fakatupu e fakatoka kehe he kaufakalatahaaga faka-Iutaia, mo e aga fakamotu, mahani tuai, mo e fakaakoaga, mai he taute e lotu faka-Iutaia. Falu tagata Iutaia ko e tau tagata nakai fai iloilo he Atua—tokogahoa kua eke mo tau tagata nakai talitonu ke he Atua. Kamata ai, nakai lahi e mena kua fakamoli he fatiaki fakalahi mai he Tau Tohiaga Tapu Heperu. Liga to aoga lahi ke talahau he ha fakatutalaaga mo e ha tagata nakai fakalotu. Liga fakamaama e koe, ma e fakatai, e aoga he Tohi Tapu he vaha ha tautolu. Ka nakai talitonu e tagata he kaina na omoomoi he agaga e Tohi Tapu, kua liga lagomatai e falu manatu he porosua World Without War, mua atu ke he vala kua moua he lau 3 ne mataulu “Ko e Tohi Tapu—Omoomoi he Agaga he Atua?”
6 Ka fakamatala ke he tagata Iutaia, kia pehe a koe:
◼ “Tokologa ia tautolu ne momoko he galo e fakahele ke he mate. Ko e heigoa e mena ka tupu ki a tautolu ka mamate he manatu e koe?” Fakaata ma e tali. Ti hataki atu e tagata he fale ke he puha ne mataulu “Mate mo e Solu—Ko e Heigoa?” he lau 22 he porosua World Without War. Kua fakatatai he puha e tau Tohiaga Tapu he talahau hagaao ke he moui he mole e mate mo e fakaakoaga he tau rapai. Ti fufuke ke he paratafa 17 he lau 23, ti fakakite age hagaao ke he tau Tohiaga Tapu, to fakaliu tutu mai a lautolu ne mamate ke he moui he lalolagi parataiso. Foaki e porosua. He tauteute ma e liu ahi atu, liga ke talahau e koe na amaamanaki e tupuna ko Iopu ke he liu tu mai. Hagaao ke he tau tohiaga tapu ne fakakite he matahiku he paratafa 17, ti foaki e liu ahi atu mo e fakatutala ki ai.
7 Ko e tau tohi Mataio, Mareko, Luka, Ioane, mo Gahua ne fakamau e tau mena iloa he tau Iutaia ne fanogonogo ki ai mo e gahuahua ke he kupu moli. Hafagi agaia e Iehova e puhala ke he moui tukulagi. Tokologa e tau Iutaia ne nakai la fakaako ia hagaao ki a Iehova, ko e Atua moli, ke maeke foki ia lautolu ke momoui tukulagi ke he lalolagi fou he Atua.—Mika 4:1-4.