‘Nakai Maeke ke Fakamamate a Tautolu’
1 Ne leveki fakamakuikui e Iesu Keriso e gahua fakamatala. (Mata. 28:20; Mare. 13:10) Pete kua teitei ono e miliona he tau tagata fakapuloa makai hane fua e gahua fakamatala ke he 234 e motu, kua nakai lata ia tautolu ke amanaki kua oti e fakamatala ha tautolu. Ato fakapuloa he Atua ke fakaoti e gahua, ‘kua nakai maeke ke fakamamate a tautolu’ hagaao ke he tau mena kua fakaako e tautolu.—Gahua 4:20.
2 Falanaki ke he Agaga he Atua: Kua taute e Satani e peehiaga lahi ke fakalolelole aki a tautolu. (Fakakite. 12:17) Ko e tau tino agahala ni ha tautolu kua fakamalaia foki a tautolu aki e tau mena vihi loga. Ko e tau mena pihia ka fakaliliu kehe e onoonoaga ha tautolu mai he gahua fakamatala aoga lahi. Pete ia, ka falanaki a tautolu ki a Iehova, to lagomatai he agaga hana a tautolu he fehagai mo e ha mena uka.
3 He magaaho ne favale kaka ke he fakapotopotoaga Kerisiano he senetenari fakamua, ne liogi e tau matakainaga ke he Atua ma e lagomatai ke fakatumau e vagahau hana kupu mo e malolo katoa. Ne tali e Iehova ha lautolu a liogi, he tuku ia lautolu hana agaga mo e age ki a lautolu e fakamakai mo e fifiliaga kua lata ke fakatumau aki e fakamatala. Ti ko e fua, kua fakatumau a lautolu mo e nakai fakalolelole he fakapuloa e tala mitaki.—Gahua 4:29, 31; 5:42.
4 Ua Matakutaku ke he Tau Tutala Fakalolelole: Ko e tau manatu noa po ke fakapuloaaga pikopiko kua liga ke ha ha ai e lauiaaga matakutaku ki a tautolu. Pete ia, manatu e talahauaga malolo ha Peteru mo e falu aposetolo ki mua he Saneheturini, ne fakamau ia Gahua 5:29-32. He talahau he ako Fakatufono ko Kamalielu, nakai maeke ke kaumahala e gahua he Atua. Kua nakai fakakatoatoa ai ha ko e ha tautolu a malolo. Ko e gahua lahi nei kua ha ha ai e lagomataiaga he Atua, ti ko ia ni ka fakakatoatoa ai!—Saka. 4:6.
5 Kia ole tumau a tautolu ki a Iehova he tau aho oti ma e agaga hana ke lagomatai a tautolu ke fakapuloa fakamalolo e tala mitaki. Kia pehe a tautolu, tuga ne talahau e Ieremia, ko e fekau he Kautu kua tuga e afi kaka i loto he tau hui motua ha tautolu. (Iere. 20:9) Nakai maeke ia tautolu ke fakamamate!