To Fakaako e Tautolu e Tohi Ko e Mena Galo he Fiafia he Magafaoa
1. Ko e heigoa hane tupu ke he moui magafaoa he lalolagi?
1 Moolioli ai, kua mavehevehe e moui magafaoa he tau aga fakamotu oti he lalolagi katoa. Kua hufia e lalolagi a Satani ke he fakafualoto mo e mahani feuaki. (1 Ioa. 5:19) Foaki he mena nei e fakamafiti ha tautolu ke ‘ta ai ha tautolu a fale,’ po ke, atihake e magafaoa, ti fakaako e puhala ke he falu ke leveki pihia ha lautolu a tau magafaoa.—Fakatai 24:3, 27.
2. Maeke fēfē he fakagahua e tau matapatu fakaakoaga he Tohi Tapu ke lagomatai e moui magafaoa ha tautolu?
2 Ko e mena galo he fiafia mooli he magafaoa kua moua he fakagahua e tau matapatu fakaakoaga he Tohi Tapu. Aoga e tau kupu mooli malolō lahi nei ma e tau tagata takitaha he magafaoa ke he tau faahi oti he moui. Ko e magafaoa ne fakagahua ai to fiafia mo e to olioli e mafola mahani Atua.—Fakatatai Isaia 32:17,18. To fiafia a koe he nakai leva to fakatutala a tautolu ke he tohi Ko e Mena Galo he Fiafia he Magafaoa he Fakaakoaga Tohi Tapu he Fakapotopotoaga. Ko e fakaholoaga he fakaakoaga to fakaatā ke kumikumi fakamatafeiga e tau paratafa mo e tau kupu Tohi Tapu oti he tohi.
3. Ke he puhala fe kua lagomatai e puha fakaako?
3 Ko e vala aoga he fakaakoaga ko e fakatutala ke he vala tala he puha fakaako he matahiku he tau veveheaga takitaha. Ko e mena ia, kua lata ke lahi e magaaho ka fakatoka ke manamanatu ke he tau hūhū mo e tau kupu tohi ne tutū he puha. Laulahi he tau puha nei kua kamata aki e hūhū, “Maeke fefe he tau matapatu fakaakoaga Tohi Tapu nei ke lagomatai . . . ?” Kua hagaaki e mena nei ke he tau manatu he Atua ke maeke ia tautolu ke moua e manamanatuaga haana ke he matakupu kua fakatutala.—Isaia 48:17.
4. Ko e heigoa e tau veveheaga ne futiaki ki a koe?
4 Fakamahani mo e tohi. Kua fakatutala e tohi ke he tau matakupu tuga anei: mena kua lata ke onooono ki ai e tagata ka kumi ma e hoa mau (veveheaga 2), tau matapatu manatu ka hafagi ke he fakamauaga fiafia tukulagi (veveheaga 3), puhala ke feaki he tau mamatua e tau fanau fuata ha lautolu ke eke mo tau tagata lalahi kua aoga mo e matakutaku Atua (veveheaga 6), puhala ke puipui e magafaoa mai he tau fakaohoohoaga moumou (veveheaga 8), tau matapatu fakaakoaga ke lagomatai e tau magafaoa matua tokotaha ke kautu (veveheaga 9), lagomatai fakaagaaga ma e tau magafaoa ne lekua he hufia ke he kava mo e favale (veveheaga 12), mena ke taute ka hoko e fakafetuiaga he fakamauaga ke he tuaga mavehevehe (veveheaga 13), mena ka taute ke fakalilifu e tau mamatua kua momotua (veveheaga 15), mo e puhala ke puipui e mau tumau he vaha i mua he magafaoa he tagata (veveheaga 16). Ko e ha magaaho ni ka fehagai e magafaoa haau mo e tau lekua po ke tau paleko foou, liu kitekite ke he tau veveheaga he tohi ne tutala ke he tau matakupu nei, ti manamanatu ke he liogi e puhala ke fakagahua e fakatonuaga. Kua fakaaue mooli a tautolu ke he fakaakoaga faka-Atua mai he Punaaga he magafaoa!
5. Ko e heigoa kua lata he tau tagata ne taute e fakaakoaga ke fakagahua?
5 Ko e tau tagata ne taute e Fakaakoaga Tohi Tapu he Fakapotopotoaga kua tomatoma ki ai ke mataala pauaki ke he tauteuteaga ha lautolu ke he fakaakoaga mo e fakamalolō ke he tau tagata oti he fakapotopotoaga, putoia a lautolu kua foou, ke tauteute fakamitaki, fakalataha tumau, mo e fai vala i ai.